Saka 2 Folad

Kinacecayay pakidemay ko adada no Hongti ci Hicikiya, micangacangay cingra ci Yihofaan patanoktok to tireng ningra, oranto i, miadahan ni Yihofa cingra. (2 Hongti 20:1-6) Tarokos ci Pawlo mihadakay to malecaday a picangacang. Mingitangit ci Yihofaan palahdaw to ‘cecay ceka’ i tireng ningra, o adada no tireng ningra ko mitoroˈan alatek, kawra cowa ka palahdawen ni Yihofa ko pasangar ningra. (2 Korinto 12:7-9) Pakayni Hongti ci Hirotian misiˈayaway ko tarokos ci Yakop aci Pitiro to katalawan. Ikor, mipatayan ci Yakop, milidongan no coyoh ci Pitiro. (Dmak 12:1-11) Saan kita miharateng alatek, hano lidongen ni Yihofa ci Pitiro, eca ka pilidong ci Yakopan hani? Cowa ka somowal ko Fangcalay Cudad to lalangian. Kawra wa ngaˈay pakasoˈlin kita ‘sahtoay masadafdafay ko demak’ ni Yihofa. (Limoˈot 32:4) O teloc no demak latekay cowa ka lecad to halamhaman no mita, nikawrira pakasoˈlinay kita sahtoay o sidaˈitay, masadafdafay ko demak ni Yihofa, mihaenay cowa ko cacisasa kita to pakayraan Ningra pacaˈof kitanan.—Yopu 33:13. w23.11 21 fiedac 6 fatac

Itini sakayat no Kawas sanay ko sowal ni Yakop, o citanengay a tamdaw ‘makahiay midofdof.’ O manan ko tatodong nonini hani? O mamakahi kita, hanaca makalim midofdof to paikenan ni Yihofa to fadangalan a tamdaw. Manaokaniw, ano misaali ko tamdaw kitanan papisafelit to limoˈot ni Yihofa, caayto ka ciharateng ci Yihofa midofdof kita tora tamdaw. (Dmak 4:18-20) Palinien to pidofdof to tamdaw, wa ikaka ko kalim ita midofdof ci Yihofaan alatek. Samanen tocerid o malefotay ko mihadakan ni Yihofa a sakayat kitanan. (ˈOlic 19:7) Kawra o wama wina, tapang no sifo ato malohemay malitengay no kasakopang cowa ka haen. Soˈlin mahaen, o kakarayan a Wama ita kamayan pafeli cangranan to pina a fadangalan. (Taneng 6:20; 1 Tisalonika 5:12; 1 Pitiro 2:13, 14) Midofdof kita toniya paikenan ni Yihofa to fadangalan a tamdaw, malecaday o midofdofay ci Yihofaan. w23.10 6 fiedac 2-3 fatac

Sapaˈicelaw to pakasoˈlinay falocoˈ a hapakayraan i, dotimen to hakowaay ko kataˈangay no ˈicel ni Yihofa. Iraay ko ˈicel Ningra palaˈosi to kahacecay mikiˈokan no Niyah. Samanen o Malefotay ko ˈIcel a Kawas Cingra! (Yopu 42:2; Marko 10:27; Ifiso 3:20) Mikiˈokan Ningra koya matoˈasayto a Apraham aci Sara, o mamahofoc cangra to cecay a faˈinayan wawa. (Satapangan 17:15-17) Pasowalayho Cingra, aitini i Kanan a pala ko teloteloc ni Apraham. Nikawrira, halafinay mala koli ko Israil tamdaw i Icip. Itiya i, o sakiˈok no Kawas hato cowa ka laˈosi, ˈarawhan malaˈosiayto kona mikiˈokan ni Yihofa a demak. Hananayho ni Yihofa pasowal ko limocedan ci Mariya, cacipoyapoy cingra a mahofoc to Wawa no Kawas. Na hofocento konini Wawa i, oya mikiˈokan ni Yihofa i ˈayaw no pina caˈol a miheca i Itin, malaˈosiayto! (Satapangan 3:15) Mitooran ni Yihofa ko sowal, palaˈosi to sakiˈok no Niyah. Ano rariden ita midotim koniya demak papaˈicel to nika pakasoˈlin, iraay ko ˈicel Ningra paira to faelohay a hekal.—Yosuwa 23:14; Isaya 55:10, 11. w23.04 28 fiedac 10-12 fatac

Pacaˈofan ni Yihofa ko satolon ni Tafiti, milidong cingranan paliyas nai masakatalawan. (1 Samuil 19:10, 18-20; 2 Samuil 5:17-25) Ngaˈayay kita ira ko mahecaday cingranan a pakasoˈlin no falocoˈ. (ˈOlic 145:18) Latek cowa ka hecad to mihalamhaman ita ko pipacaˈof ni Yihofa to satolon. Tarokos ci Pawlo pasowal to niyahan ‘mapacekay no ceka ko tireng’ ako sanay, mansa kinatoloay cingra mingitangit ci Yihofaan padama cingranan palahdaw tonini a pasangar. Pacaˈofan ni Yihofa han? Hayi, kawra cowa ka lecad to niharatengan ni Pawlo. Cowa ka palahdawen ni Yihofa ko pasangar ningra, ao pafelian no Kawas to ˈicel cingra, toha ngangaˈayto cingra padadotoc madimadi. (2 Korinto 12:7-10) Malecaday, nolatekay malifokay ita ko pipacaˈof, kawra cowa ka lecad to mihalamhaman no mita. Ngaˈayay a pakasoˈlinen ita, mafanaˈay ci Yihofa sasamaan padama kitaanan o sangaˈayay. Cingra i, ‘papalaˈosi to tadamaanay a demak, ikakaay no nilongocan ato niharatengan ita a maamaan a demak.’ (Ifiso 3:20) Mihaenay i, alatek aitini i cowa ka harateng ita a tatokian, anca tano cowa ka harateng ita a pakayraan, pacaˈof ci Yihofa to satolon ita. w23.05 8-9 fiedac 4-6 fatac

Micerid kita miharateng to patikolay maˈorip a mikiˈokan no Fangcalay Cudad, tada ciepocay konini. Misamaanay hani? Samanen cowa ka fanaˈ kita to hahacowa pakidem ko adada no niyah alatek, anca mapatay ko kanonoˈan a salawina. (Patnakay 9:11; Yakop 4:13, 14) Ano tahalifa kita to hatiniay a sapalifet i, o patikolay maˈorip a hatokel papadama kitaanan padadotoc a mihadidi. (1 Tisalonika 4:13) Roma i, mikitini i Fangcalay Cudad mafanaˈayto kita, cipinangay ko kakarayan Wama kitaanan, tangongolay ko olah kitaanan. (Luka 12:7) Ano dotimen ita ko patikolay maˈorip a hatokel, tatangongolto ko kacipinang tonini. Patikol maˈorip kita i, mamahecad to isalakatay ko pinangan ato miharatengan, samanen ci Yihofa a Kawas tada ihkalay ko kacipinang kitaanan; ira ko toki ita tahadaˈoc a maˈorip, soˈlinto mapatay o papatikolen a paˈorip, samanen ci Yihofa tada maolahay kitaanan. Misamaanay hano pakasoˈlin kita to patikolay maˈorip a sakiˈok hani? Samanen pakasoˈlinay kita, iraay ko kalim iraayho ko ˈicel no Kawas palaˈosi tonini a sakiˈok. w23.04 8-9 fiedac 2-4 fatac

Ci Yosif aci Mariya malacafayay a misaˈicel patanektek to kalalaˈed nangra aci Yihofa. Mafanaˈay cangra, tada masakalimlaan mapolong ko paro no lomaˈ midoko ci Yihofaan. (Luka 2:22-24; 4:16) Pakaynien to aniniay a mararamoday ko sowal, tada o ngaˈayay a taˈarawan cangra. Ano malecaday kiso ci Yosifan aci Mariyaan ira ko wawa, milimasmas to toki mirienang to saˈopo anca misikay to pakalomaˈay a pidoko cowa ko madoloay alatek, mamikilimho to toki ko mararamoday tatosa mikingkiw anoca mitolon, mangalef ko nika pasangar alatek. Nikawrira haratengen, ano malacafay kamo midoko ci Yihofaan i, o kalalaˈed namo aci Yihofa, ato kalalaˈed namo tatosa, mangalef ko nika kedec. Mansa, papaisalakaten ko midokoay to Kawas a demak itini nokaˈorip namo. O kalalaˈed no mararamoday ano cowa ka tadangaˈay i, ano maharatengho to mamalacafay kamo i pakalomaˈay a pidoko i, o maanan ko kapo wa saan kiso miharateng alatek. Ano mahaenay i, sasamaanto aki? Salakatho kapotoˈen masasowal to kaolahan ato kahemekan a demak namo tatosa. Ano mihaen i, palidlid sato masalofto ko kalalaˈed namo, mamakahito malacafay midoko ci Yihofaan. w23.05 22 fiedac 7-8 fatac

Tona mikangodoay ci Yihofaan, malo masamaanay a tamdaw ci Opatiya hani? O soˈliˈlinay ko waywayan ngaˈayay tiˈeren cingra, mansa nilnilen no hongti cingra mikowan to lomaˈ no hongti. (Nengnengen ko Nihimiya 7:2.) Tona mikangodoay ci Opatiya to Kawas, iraay ko mikiriwiˈay a timolo, tada kalimlaan ningra konini a capeling. Itiya i, ci Ahap ko Hongti. (1 Hongti 16:30) Roma i, o fafahi ci Yicipil mitaˈongay ci Paalan, tada ˈintehay ci Yihofaan, sapipalahdawaw to matatodongay a pidoko i lalomaˈ no Israil, mipatayayho to ˈalomanay pairasolay ni Yihofa. (1 Hongti 18:4) Tiya sapipatayaw ci Yicipil to pairasolay ni Yihofa i, milidongan ni Opatiya ko 100 a pairasolay ni Yihofa, ‘o cecay a kasakapot i, 50 a tamdaw, papilimeken i dihidihifan cangra, pafeli cangranan to epang ato nanom.’ (1 Hongti 18:13, 14) Ano malepet i, maedeng o papatayen ci Opatiya. Manaokaniw, o kalo a tamdaw cingra, caay ka sakapatayaw. Kawra palinien to ˈorip no niyah, ikakaay ko olah ningra ci Yihofaan ato romaroma midokoay ci Yihofaan a tamdaw. w23.06 16 fiedac 9-10 fatac

Anini, padotocay ci Yihofa mikayat to finawlan Ningra, malecad to itiyaayho. Padotocay pakayni i Kimad Ningra o Fangcalay Cudad ato ˈaˈideman no kasakopang ci Yis mihaen to demak. Mihaenay i, padadotocayho Cingra misaka dademak to tamdaw a mikayat han? Hayi, nengnengen ko pinapina wacay. Kalikorto no saka 19 hahekalan, ci Cares Tayce Loso ato cafacafay ningra micalepay a mikingkiw to sapairasol no Fangcalay Cudad, mahapinangay nangra isaka 1914 miheca tada o masakalimlaan a mihecaan, samanen itini tonini a mihecaan misatapangayto mikowan ko Hongti Kitakit no Kawas. (Taniil 4:25, 26) Itini i pikingkiw nangra to Fangcalay Cudad, ihkalay mahapinang mikayatan ni Yihofa cangra. Itini 1914 mihecaan, mafekaday a demak i hekal, misawacayay to tomirengayto ko Hongti Kitakit no Kawas. Salakat mafekaday ko Saka Cecay Lalood no Hekal, dotoc iraayho ko taˈangayay a lifong, ˈatoray ato kedal. (Luka 21:10, 11) Misawacayay konini, soˈlinay sakadademaken ni Yihofa koniya madimadiay faˈinayan a salikaka mikayat to finawlan Ningra. w24.02 22 fiedac 11 fatac

O finawlan ni Yihofa kita, mansa mafanaˈay kita tangongolay ko olah Ningra kitaanan, makalimay Cingra o sangaˈayay ko kaˈorip no mita. (Loma 8:35-39) Pakasoˈlinay kita, edengan mitoor to safalod no Fangcalay Cudad maˈorip mamilifok to ngaˈayay epoc. (Isaya 48:17, 18) Kawra, ano fahal sa kita tahalifa to pasangaray no kaˈorip, sasamaan ko piharateng hani? Tinakoen, o midemakan no paro no lomaˈ papatoled kitaanan alatek. Iraay ko pakidemay a adada no tireng ita alatek, telocto caayto ka adihay ko demak ci Yihofaan. Tahalifaay kita to pades alatek, anca pakayni pihakelongan tahacada to hakokay. Tahalifa to mahaenay a sapalifet i, saan kita miharateng alatek: “Hano mifekad konini a demak i tireng ako? O maanan ko mararaway a demak ako? Cowato ko papalemed ci Yihofa takowanan han?” Na iraay ko mahaenay a harateng iso han? Ano iraay i, aka a matoled! ˈAlomanay madimadiay sikawdan ni Yihofa na iraay ko malecaday a nafalocoˈan.—ˈOlic 22:1, 2; Hapakuk 1:2, 3. w23.04 14 fiedac 1-2 fatac

Ano makayhid i, tangsol miemet to tireng no niyah, aka piharateng, aka pidemak to maanan mamipalak to kalawidang ita ato Kawas a demak. Halamhamay ci Yihofa kitanan ‘mikifalocoˈ a midofdof’ to sakayat Ningra. (Loma 6:17) Cowa ko mamipiliˈ a midofdof to pinapina a sarikec, haratengen, o sakayat Ningra sahtoay o sakaciepoc ita. (Isaya 48:17, 18; 1 Korinto 6:9, 10) Sapilonayaw to pisetek no falocoˈ ita, miˈodisay ci Akoma, itini i tireng ato harateng midokaˈ kitanan. Sowal no Fangcalay Cudad, misamacayay cingra ‘sapitaˈemodaw’ kitanan, tatodong i, misahalakaay cingra sapipalakaw to kalalaˈed ita ci Yihofaan. (1 Pitiro 5:8) Saka 1 hahekalan a Krisciyang tona mitawmecay to saaroˈan, mansa mapatalaw no tamdaw, mapekpek, anca mipatayan. (Dmak 5:27, 28, 40; 7:54-60) Anini, padadotocay ci Satan mihakokay to finawlan no Kawas. Tinakoen, itini i Rowasiya ato roma kitakit, makariˈangay no sifo ko salikaka. Cowa ko maˈaraway aca a piˈodis kitanan, roma i, tano ‘misaˈfitay a pakayraan’ ci Satan a milonay to pisetek no falocoˈ ita.—Ifiso 6:11. w23.07 15-16 fiedac 6-9 fatac

Padadotoc kiso minanam to Fangcalay Cudad, mamatongal ko olah ci Yihofaan, onini a olah papakalalok tisowanan misaka dademak to minanaman. Misaka dademak kiso to safalod no Fangcalay Cudad, citanengayto ko misaˈosian. Misalofanto iso ko waywayan no niyah, samanen makalimay kiso pakahemek ci Yihofaan. Padadotoc kiso mitodong to kakarayan a Wama, malecad o pitodong no wawa to maolahay cingranan a wama wina. (Ifiso 5:1, 2) Ngaˈayay kita misaharaterateng: “Palalinien tiya malo Krisciyangho i, matongalay ko olah ako ci Yihofaan anini han? Ikor no micada to paputisem, o harateng ato waywayan ako matongalay ko kalecad ci Yihofaan han? Mangalef itini patalahkal to olah i salikaka, samaanay ko midemakan ako hani?” Ano mahapinang iso ‘mafasaway ko salakatay a olah no niyah,’ aka matoled. Itini saka 1 hahekalan a Krisciyang iraay ko malecaday a pakayraan, kawra cowa ka sawaden ni Yis cangra, cowa ko mamisawad cingra kitanan. (Paˈarawan 2:4, 7) Mafanaˈay cingra to ngangaˈay kita miliyaw a marengreng ko salakatay a olah tiya minanamho to soˈlinay kimad. w23.07 8 fiedac 2-3 fatac

Tarokos ci Pitiro dadotodotoc sanay mararaw ko demak. Salakat i, pakinaliay ci Pitiro a pakasoˈlin to niyah, mahiyo ko sowal, ano soˈlinto miliyas ko romaroma tarokos ci Yisan, cingra i, o papadadotoc a madimadi ci Yisan. (Marko 14:27-29) Dotoc i, kinatoloay ci Yis a mitolon, patikol cingra i, maˈaraway ci Pitiro a mafotiˈ, cowa ka talipaˈelal. (Marko 14:32, 37-41) Ikor i, ta micepet ko mariˈangay tamdaw ci Yisan i, comikayay ci Pitiro a milaliw ci Yisan. (Marko 14:50) Salikor i, kinatoloay ci Pitiro mihakeno to mafanaˈay ci Yisan, pakayni toninian miˈekakay a pasowal. (Marko 14:66-71) Mafanaˈto ci Pitiro to pakidemay ko raraw ningra i, samaanay ko piharateng hani? ‘Ongong sanay a tomangic’ cingra. (Marko 14:72) Ikor, cowa pikimkim ci Yis to nano raraw ningra isaˈayaw, padotocayho malo widang ningra, hanaca patorod to karetengay a ˈinorong i cingranan. (Yohani 21:15-17) Mafanaˈto ci Pitiro to pakidemay ko raraw no niyah i, cowa ka lonay sato. Misamaanay hani? Samanen pakasoˈlinay cingra to Tapang ningra ci Yis cowa ka pisawad cingranan. O manan ko mananamay ita? Halamhamay ci Yihofa kitanan pakasoˈlinen to tangongolay ko olah Ningra kitanan, makahiay a misodod kitanan.—Loma 8:38, 39. w24.03 18-19 fiedac 13-15 fatac

Mifekad ko malafoay madadiˈiyay a demak ikor, mamalahdaw ko kasenengan no niyah, mangodoen ko harateng. O hatiniay a demak sakaira no kapiliˈan a kapoyapoy ato maliwasak ko paro no lomaˈ. Mahapinangay, eca ka tayra i lomaˈ no ‘maapaay a fafahiyan’ a komaen o citanengay a pisaˈosi. ˈAlomanay tamdaw mifekad ko malafoay madadiˈiyay a demak ikor, mapalakayto ko ngaˈayay kalalaˈed aci Yihofaan, pakayniho i kadenga no katalawan a adada malahdaw ko ˈorip no niyah. (Taneng 7:23) Mitolasay ko sowal no Taneng 9:18 sanay: ‘O lafang ningra itiniay i kemod no patademan.’ Ano kaadayayan ko teloc i, hano ˈalomanho ko malipalaway a tamdaw, micada to satahidang ningra hani? (Taneng 9:13-18) O marariday maˈaraw a talakal o maˈodangay a lalakaw. Harateng no ˈalomanay minengneng to maˈodangay a lalakaw awaay ko katatiihan sanay, kawra cowa ka hatira ko demak. Tada tatiihay ko maˈodangay a lalakaw, cowato pikangodo to niyah ato tao, madoloayho a mahiyan. O sasing no maˈodangay padotocay materek i ponoˈ, caay ka lahdaw. O maˈodangay a lalakaw cowa ko mamifalah, ao mamitongal to mararaway coos. (Kolosay 3:5; Yakop 1:14, 15) Hatiraayto, ˈalomanay minengnengay to maˈodangay a lalakaw ikor mifekaday ko malafoay kadadiˈi to tao. w23.06 23 fiedac 10-11 fatac

Soˈliˈlin o romaroma kitakit misafafolaway to saaroˈan no Ikok ato Padaka, kawra cowa ko mamikotay tonini a ciˈicelay mikowanay. Mafanaˈay kita tonini, samanen mitaypiyaway to Hongti Kitakit no Kawas a fakeloh o mamipesiˈ to waˈay noya taˈangayay faco, o Ikok ato Padaka ko mitoroˈan toni. (Taniil 2:34, 35, 44, 45) Pakayniay i waˈay no taˈangayay faco a sapairasol, pakasoˈlinay kiso han? Ano pakasoˈlinay i, wa taˈangay ko pifiyor to pakayraan iso i nokaˈorip. Cowato ko mamicangacang kiso to sadipot no payci ato dafong, samanen mafanaˈay kiso mamalaˈafoto konini a hekal. (Luka 12:16-21; 1 Yohani 2:15-17) Roma i, cipinang kiso toniya sapairasol, wa mahapinang tada kalimlaan ko mitosilay pasifanaˈay to tamdaw a tayal. (Matay 6:33; 28:18-20) Mikingkiw kiso toniya sapairasol ikor, ngaˈayay licayen ko niyah: “O masakenakenaay a misaˈosian ako paihkalay to pakasoˈlinay kako, kakalikito palaˈafoen no Hongti Kitakit no Kawas ko polong a sifo no hekal hokira?” w23.08 11 fiedac 13-14 fatac

Ano pakayniay kiso i mihecaan, tanoktok no tireng ato pakayraan nohatini caka pakaremo to pinapina a demak, ka pisamiming to falocoˈ micada tonini a demak. Malecad ci Parcilayan, o tanoktok no tireng iso ano cowa pihayi micada kiso to cecay katayalan, aka pacieci, wa ngaˈay kiso minaˈay. (2 Samuil 19:35, 36) Malecad ci Mosian, cadaen ko sapadama, ano matatodongay i, paladaˈen ko tao to tayal. (Kasadakan 18:21, 22) Paihkal kiso to misamimingay, cowato ko papatireng to cowa ka tatodong a patosokan, telocto awato ko ˈicel no niyah. Papatado ko niyah mitamorong to ˈinorong i mararaway saˈosi no tao saan ko harateng. Cowa ka ngaˈay kita patado to tao misaˈosi. Mararaw ko misaˈosian no tao, cowa ka ngaˈay kita mikiˈayaw cangranan, eca ka papitamorong cangranan to tatiihay a teloc. Tinakoen, ano misaˈosi ko wawa ecato ka pidoko ci Yihofaan, maedeng o papakasomad to wama wina konini. Nikawrira, ano padadotoc ko wama wina pakayni tonini a demak makesem mirikec to niyah, mitamorongayto to karetengay a ˈinorong. Caay ka ciharateng ci Yihofa to wama wina mitamorong to mahaenay a saroero. w23.08 29 fiedac 11-12 fatac

Ci Samson malecaday kitanan cowa ko malefotay a tamdaw, na midemakay cingra to cowa ka citaneng a saˈosi, o cecay i, pairaay to kaadayayan a teloc. Malo kakitaan ci Samson to cecay liyad ikor, ‘itini i Sorik a Dafdaf maolahay to cecay ci Tilila hananay a fafahiyan.’ O pakayraan anini cowa ka lecad to saˈayaway. Iˈayaw, na mipatapanganto ci Samson to cecay Filistin a fafahiyan, o ‘harateng ni Yihofa konini,’ samanen ‘sapihalakaaw’ ci Yihofa miˈodis to Filistin tamdaw. Kinacecayay, milafinay i lomaˈ no pacopiyaway ci Samson itini i Kaca, itiya pafelian ni Yihofa ci Samson to ˈicel, tamorong hananayto ni Samson ko cacafiˈan no ˈadawang, awaayto ko sapicoker a hecek tonini a niyaroˈ. (Kakitaan 14:1-4; 16:1-3) Nikawrira, misaˈosi ci Samson sakalacafayaw ci Tililaan, cowa ko sapiˈodisaw to Filistin tamdaw, samanen o Israil tamdaw ci Tilila alatek, cowa ko Filistin tamdaw. O Filistin tamdaw tano adihayay a payci paˈalofo ci Tililaan, misaali cingranan pacakay ci Samsonan. w23.09 5 fiedac 12-13 fatac

Micalep a cipinang kita to demak mamadolo a damsay. Ano misalalicay ko tao to pihakelongan ita i, micalepay cipinang a tamdaw papakaˈimer to niyahan, caay ka caloh sa a pacaˈof. Tinakoen, ano maˈaraw ko soeda a lotok, o mimingay aca ko maˈaraway, o kakahaday nonini soeda a lotok matolemay ilaeno no nanom. Hatiraayto, milicay ko tao to maanan a salicay i, cowa pasowal to maanan ko araaw ningra ato maanan ko sasa no falocoˈ ningra a milicay. Mankora, ˈayaw no sapacaˈofaw haratengen ita, cowa ka cipinang kita to lalangian ningra a misalalicayan. (Taneng 16:23) Nengnengen ci Kitiyon samaanay pacaˈof to Ifraim a tamdaw. Tada mangolaway ko Ifraim tamdaw, misalalicayan ci Kitiyonan, hano caka pitahidang cangranan milood to ˈada sanay. O maanan ko lalangian nangra maketer hani? Tada misakahmaway cangranan sanay miharateng cangra han? Micalepay ko nika cipinang ni Kitiyon to demak, misikolay cingra to nafalocoˈan nangra, damsayay a pacaˈof cangranan, telocto i, mafasawayto ko keter nangra.—Kakitaan 8:1-3. w23.09 16 fiedac 8-9 fatac

Tada tangongolay ko noka lalaˈed ni Yihofa aci Yis mikikakaay to kalalaˈed no wama ato wawa itini hekal. Maˈaraw ko kaolahan a Wawa misemsem a makariˈang, maedeng hato mikeritan no poˈot ko falocoˈ. O tahalifaayto to kapatay no wawa a wama wina mafanaˈay to hakowaay ko pisemsem no falocoˈ. Soˈliˈlin pakasoˈlinay kita to iraay ko patikolay maˈorip a hatokel, kawra ano mapatay sato ko kaolahan ita a paro no lomaˈ i, adadaan nanay ko falocoˈ ita. Padamaay kitanan konini cipinang, i Kongyen saka 33 miheca kacanglahan toya romiˈad, maˈaraw ni Yihofa ko kaolahan a Wawa misemsem a mapatay i, hakowaay ko nika adada no falocoˈ Ningra. (Matay 3:17) ˈAyaw no Piharatengan a Saˈopo, ngaˈayay kiso itini notekedan a picekiw anca Pakalomaˈay Pidoko, ˈosien ko milingatay to sapatefoc a lalakaw. Piharatengan a Saˈopo toya romiˈad iraay ko mikiriwiˈay tono papacem pidoko a kamok, maraodto koya romiˈad i, aka matawal a minengneng. Ano maharekayto kita i falocoˈ a misaday, o ngangaˈay padama to tao mikitini i Piharatengan a Saˈopo milifok to epoc.—Icra 7:10. w24.01 11 fiedac 10-12 fatac

Sapilifokaw to sapafeli ni Yihofa a ˈicel, cecay pakayraan i, mitolon Cingranan. Papacaˈof ci Yihofa kitanan, pafeli kitanan to ‘kasapaan a ˈicel.’ (2 Korinto 4:7) Roma i, miasip kita to Fangcalay Cudad halo midotim to lalomaˈay a lalakaw, o mamilifok to ˈicel, samanen o Kimad no Kawas ‘o ciˈicelay.’ (Hipray 4:12; ˈOlic 86:11) Mitolon kiso ci Yihofaan ato mikingkiw to Kimad i Fangcalay Cudad o tatanektekto a ciˈicel, ngaˈay mihadidi to pasangaray, padadotoc a lipahak, milahci to pasangaray a ˈinorong. Nengnengen samaanay ci Yihofa patanektek ci Yonaan. Patorodan ni Yihofa ci Yona to cecay karetengay a ˈinorong, ˈarawhan mikalicay ci Yona to tamina a milaliw, telocto pakayni i cecay taˈangayay faliyos mangata mapatay cingra, pairaayho to katalawan no romaroma tamdaw i tamina. Mafahkol ci Yona i riyar ikor, cecay taˈangayay foting mitaˈemoday cingranan. Toniya tatokian itiniay ci Yona i kafahalan a kitiraan, satoˈeman sanay ko taliyok. Itiniay toˈemanay a tiyad no foting ci Yona miliyasay toniya hekal, samaanay cingra milifok to ˈicel hani? Mitolonay cingra.—Yona 2:1, 2, 7. w23.10 13 fiedac 4-6 fatac

Soˈliˈlin onini a tikami ni Pitiro o saki saka 1 hahekalan a Krisciyang a tiliden, kawra pasalalomaˈan ni Yihofa i Fangcalay Cudad konini tosa tikami. Mankora, ano kingkiwenita konini tosa tikami i, o mamilifok to haepoc. (Loma 15:4) I tatihiay ita ˈalomanay tamdaw cowa pakasoˈlin to sapairasol no Fangcalay Cudad. Samanen halafinayto kita mitala to sakahererekaw nonini hekal, milokesayto ko misafelitay tamdaw kitanan. O romaroma milikafay tamdaw cowa ko aira ko pihererekan sanay. (2 Pitiro 3:3, 4) Ano matengil ita ko hatiniay a sowal no cafay matayal, paro no lomaˈ anca mitosilan a tamdaw i, alatek mamangiyangi ko pakasoˈlin no falocoˈ ita. Nengnengen ko sowal ni Pitiro sasamaan paˈicel to pakasoˈlin no falocoˈ ita. O romaroma tamdaw miharateng tada minayaray ci Yihofa, tahanini cowaho palaˈafo tonini mariˈangay hekal sanay. O sowal ni Pitiro patalipaˈelalay kitanan, o pinengneng ni Yihofa to toki cowa ka lecad kitanan. Pakaynien ko sowal ci Yihofaan, 1,000 miheca malecaday o cecayay a romiˈad. Ano haratengen konini papadama kitanan ira ko matatodongay a noka pinengneng to demak. (2 Pitiro 3:8, 9) O roma i, tada mihadidiay ci Yihofa, cowa ka ciharateng malaˈafo ko cecacecay tamdaw. Kawra ano irato ko taˈangayay romiˈad Ningra i, o mamatekopto konini hekal. w23.09 26-27 fiedac 2-5 fatac

Hano patikami ci Pawlo to i Yutiyaay Hipray Krisciyang hani? Alatek tosaay ko lalangian. Saka cecay, pakalalokay cangranan. Ilalomaˈ nangra ˈalomanay tamdaw mimingho midokoayto to Yutayakiyo. Mala Krisciyangto cangra i, alatek malikafay no ˈaˈideman no pidoyongan, samanen o Krisciyang awaay ko tadamaanay fangcalay sefi pidokoan to Kawas, awaay ko soˈlinay cadada pipatafangan to sapatoˈaya, awaay ko masakapotay a saysi matayal saki cangranan. Onini a demak patoleday to falocoˈ nangra alatek, misatapangto a mangiyangi ko pakasoˈlin no falocoˈ nangra. (Hipray 3:12, 14) O papinapina tamdaw ilalomaˈ nangra alatek sapatatikolaw midoko to Yutayakiyo. Saka tosa, somowalay ci Pawlo to Hipray Krisciyang cowa ka pisongilaˈ cangra komaen to “ˈatekakay a kakaenen” no Kimad no Kawas, cowa pisaˈicel cangra cipinang to faelohay anoca ikemoday a soˈlinay kimad no Fangcalay Cudad. (Hipray 5:11-14) Ano nengnengen i, ilalomaˈ nangra iraayho ko midofdofay to Rikec ni Mosi. w23.10 24-25 fiedac 3-4 fatac

Iraay ko romaroma fafahiyan salikaka cowa ka ciraramod, ci Yihofa aci Yis cowa ka pisakahmaw cangranan. (Matay 19:10-12) Itini paro no kakarayan, o caay ka ciraramod a fafahiyan salikaka pairaay to tawlikay a noka pifiyor i kasakopang. Onini a fafahiyan salikaka matomesay ko olah, misasoˈlin a ciharateng to tao, itini noˈadingoan malo kakaay, malo safaay ato wina no ˈalomanay cangra. (Marko 10:29, 30) O romaroma fafahiyan salikaka miemin to toki matayal saki Kawas. Itini i paro no cikiw mitosilay a tayal, o fafahiyan salikaka tada karetengay ko ˈinorong nangra. (ˈOlic 68:11) Toha sapirienangaw to mieminay to toki a matayal tono Kawas a demak, nohatiniho ngaˈay kiso milimasmas han? Ngangaˈay kiso patireng to patosokan, malo miceriday misakafahay, patirengay a tayal anca itini i Pitil a matayal. Ka pitolon micangacang ci Yihofaan padama tisowanan malaˈosi konini a patosokan, malalicay toya malaˈosiayto ko patosokan a tamdaw, minengneng to mamisamaan kiso pakatoor to hatatodong. Dotoc, limasmasen iso ko mamadangar a demak. Ano ngaˈay kiso miemin to toki a matayal, aadihayto ko toki iso sakadademaken ni Yihofa, matongal ko nika raheker no kaˈorip iso. w23.12 22 fiedac 16-17 fatac

Mafanaˈay kita, mitenakay to ngaˈayay lihaf a tayal mikikakaay to iti:yaayho ko nika caloh, samanen mangata mangataayto ko taˈangayay padiing. Kawra ano tahalifa to kacangoˈot no sakaˈorip, anca macada ko pisafelit i, papasangaren kita misarocod to mitosilay tayal alatek. O maanan ko papadama kitanan paisalakat to Hongti Kitakit no Kawas hani? O ‘kakeridan no ikakarayanay sofitay a Tapang ci Yihofa’ papakasoˈlinen to mikapotay kitanan. Ano isalakaten ita micangacang ko Hongti Kitakit Ningra caay ko sakaciepoc no niyah i, o mamidama Cingra kitanan. Awaayto ko maanan katalawan ita! (Hakay 2:4) Halamhamay ci Yihofa kitanan misarocod to milidongay to ˈorip a tayal, padadotoc padama to tamdaw malo nisawawaan ni Kristo. Pakalalokan ni Hakay ko finawlan ni Yihofa miliyaw a patireng to fangcalay sefi. Ano mihaen to demak cangra i, mikiˈokay ci Yihofa to papalemed cangranan. (Hakay 2:18, 19) Kita i, papakasoˈlinen ano isalakaten ita midemak ko patorodan ni Yihofa kitanan a tayal, o mamilifok to sapalemed ni Yihofa. w23.11 16 fiedac 8 fatac; 17 fiedac 11 fatac

O sowal no tarokos ci Pawlo itini Loma cudad, ciraraway ko tamdamdaw sanay. Ano mahaenay i, hano o moecelay awaay ko raraw han no Kawas minengneng ko tamdaw, hanaca milifok to pihayda no Kawas hani? Toha sapadamaaw to polong misasoˈlinay ko falocoˈ a Krisciyang makilim ko sapacaˈof, somowalay ci Pawlo to tinakoan ni Apraham. Miliyas ci Apraham to nalacolan, itiniay i Kanan maˈorip, itiyaay malo o moecelay tamdaw hananay ni Yihofa. Hano ngaˈay malo o moecelay tamdaw han ni Yihofa ci Apraham hani? Samanen malefotay ko pidofdof ni Apraham to Rikec ni Mosi han? Cowa ka hatira. (Loma 4:13) Soˈlinay haw i, malo o moecelay han no Kawas ci Apraham ikor, mataˈlif ko 400 mihecaan ngaˈ milasilan ko Rikec ni Mosi i Israil tamdaw. Ano hatiraay i, manan ko lalangian ni Yihofa palo moecelay tamdaw ci Aprahaman hani? Iraay ko pakasoˈlinay falocoˈ ni Apraham ci Yihofaan, patalahkalan ni Yihofa cingra to mikiriwiˈay a sidaˈit, malo o moecelay tamdaw han no Kawas cingra.—Loma 4:2-4. w23.12 3 fiedac 4-5 fatac

Pairasolay ci Natan pasowal to aniniay a sinael ci Tafitian, toya dadaya pasowalan ni Yihofa ci Natan, cowa ko ci Tafiti ko papatireng to fangcalay sefi sanay. (1 Rayray 17:3, 4, 11, 12) Matengil konini a lihaf ikor i, samaanay ko piharateng ni Tafiti hani? Satapangayto cingra misaday to payci ato lalosidan to sapatireng no wawa ci Solomon. (1 Rayray 29:1-5) Pasowalan ni Yihofa ci Tafiti cowa ko cingra ko mamisangaˈ to fangcalay sefi, ikor tangsolay ko Kawas patireng to katatelekan cingranan, mikiˈok cingranan to papala hongtien ko cecay a teloc ningra tahadaˈoc. (2 Samuil 7:16) I faelohay hekal, wa itini ci Tafiti i Pikowan ni Yis to Comaˈol Miheca a tatokian, milayap to rahekeray lipahakay a kaˈorip. Itiya mafanaˈto cingra, onini a tadamaanay a Hongti nao teloc ningra. Papalipahak konini cingranan! Mikitini tonini maˈoningay mananam ita, ano ciharatengay kita matayal saki ci Yihofaan to pina a demak, kawra cowa ka malaˈosi konini a kalim no falocoˈ, alatek pakaynien ni Yihofa i cowa ka harateng a pakayraan palifon kitaanan. w23.04 16 fiedac 8-10 fatac

Ano makokiˈen kiso i, o pina a sowal ilalomaˈ no Fangcalay Cudad alatek mikiriwiˈay a mikowad tisowanan, tinakoen o Yopu, ˈOlic, Taneng a pinapina sinael, ato matiliday i Matay saka 6 fedengan a sowal ni Yis. Tolonen iso ci Yihofa, halo micekiw to Kimad Ningra i, mamatinakoto iso ko pihinom Ningra. Ngaˈayay pakasoˈlinen ita, itini katoˈemanan no kaˈorip no tamdaw, wa itini ci Yihofa i tatihi ita. Tahadaˈoc cowa ko mamatoˈol kita. (ˈOlic 23:4) Mikiˈokay ci Yihofa to mamisimaw, mamidama ato mamihinom kitanan, patanektek kitanan. Itini Isaya 26:3 sanay somowal ci Yihofaan: ‘Dadipoten Iso ko mitiˈeray Tisowanan a tamdaw, pafelien Iso cangra to midaˈocay a rihaday, samanen mitadiˈecay cangra Tisowanan.’ Mihaenay i, ka pitadiˈec ci Yihofaan, cadaen ko sapadama Ningra tisowanan. Mihaen i, soˈlinto pasangar ko kaˈorip iso, o mamiliyaw a tanektek. w24.01 25 fiedac 16-17 fatac

Malaˈosiay koniya sapairasol anini. Maˈarawayho ita ko kalaˈosi no ilaenoay mihinomay to tamdaw a sowal: ‘O wawa iso mamicada to sapasifanaˈ ni Yihofa, kakadofah ko rihaday no wawa iso. O moecelay papatanektek tisowanan. . . . Ano mananto cowa ko mamatalaw kiso, cowa ko mamacekid, cowa ko aira ko katalawan a demak.’ (Isaya 54:13, 14) Matatodongay pidoko miliyawayto tomireng, hanaca cowato ko mamiliyaw a mapohed, ano o ‘kawas nonini a lekakawa’ ci Satan cowa ko papakaconged to mitosilay pasifanaˈay to tamdaw a tayal no finawlan ni Yihofa i paro no kakarayan. (2 Korinto 4:4) Matatodongay pidoko o mamaterek, tahira i daˈodaˈoc. O kihcod sapilood kitaanan a lalosidan, sahto awaay ko kapo! w24.02 4 fiedac 10 fatac

Malo Krisciyang, mamisaˈicel kita mitoor to sapalimoˈot no Fangcalay Cudad midimokos to saali no paro no lomaˈ, kawra o mamisakareteng kita minengneng to mipatafangay to tireng a miketonan a sowal. O tatodong i, ano misaˈosi to demak, cowa ko papaisalakaten ko saali no paro no lomaˈ to saali ni Yihofa. (Matay 10:35, 36; 1 Timoti 5:8) Mihaenay haw i, sapakahemekaw ci Yihofaan, o midemakan anca misaˈosian ita cowa ka hemek ko paro no lomaˈ alatek, mihaen to demak malecaday o kinafalahay konini. Ci Yihofa ko patirengay to paro no lomaˈ, maedeng makalimay Cingra lipahak ko paro no lomaˈ ita. (Ifiso 3:14, 15) Ano sapilifokaw kita to soˈliˈlinay a lipahak, o mamitoor to pakayraan ni Yihofa a maˈorip. Sayaren iso ko falocoˈ, ano mikinafalah kiso matayal saki Yihofa, hanaca misongilaˈ a midimokos to paro no lomaˈ, tano ciolahay falocoˈ ato mikangodoay a waywayan micada cangranan, o papaifalocoˈen ni Yihofa konini demak.—Loma 12:10. w24.02 17 fiedac 11 fatac; 18 fiedac 13 fatac