Saka 3 Folad

Soˈlin caho ka ira ko faelohay hekal, kawra nengnengen hena ko foˈifoˈis, kilang, pinaˈorip ato i tatihiay a tamdaw. Na awaayho koniya kihcod, nohatini soˈlinayto a ira. Samanen sahtoay o misangaˈan ni Yihofa konini. (Satapangan 1:1, 26, 27) Misaˈosiay ko Kawas ita patireng to faelohay hekal, wa palaˈosien Ningra koniya araaw. I faelohay a hekal, wa malefotto ko tireng ita, milayap to midaˈocay a ˈorip. Itini misaˈosian no Kawas a tatokian, wa malaˈosito ko faelohay hekal, mahecad o maˈaraway ita nohatini a kasapaan a dohaw. (Isaya 65:17; Paˈarawan 21:3, 4) Itini pitalaan a tatokian, sakadademaken ko kahacecay toki a paˈicel to pakasoˈlinay falocoˈ no niyah. Rariden a miharateng ko milingatay to sapatefoc a demak, pakayni ko piakoˈid ci Yihofaan. Dotimen to hakowaay ko taˈangay no ˈicel ni Yihofa, tawliken a mirienang ko midokoay a demak. Mihaen i, wa ngaˈayto kiso ‘pakayni i pakasoˈlinay falocoˈ ato miememay, malo milifokay to sakiˈok a tamdaw.’—Hipray 6:11, 12. w23.04 31 fiedac 18-19 fatac

Micaˈengaw ci Yis to kakarayan, pasayra ci Yihofaan mitolon itini kaˈayaw no ˈalomanay, samanen sapakafanaˈaw cingra to tamdaw, dotoc o dademaken ningra a demak sahtoay o mitadiˈecay ci Yihofaan a midemak. Taˈangayay ko ngihaˈ ni Yis miowaw: ‘Lacarus, ka sadak!’ (Yohani 11:43) Mikitini pitademan romakatay a masadak ci Lacarus! Itini pinengneng no ˈalomanay tamdaw caay ko mamalaˈosi koniya demak, kawra madangarayto ni Yis. Oniya maˈoningay patongalay to pakasoˈlin ita, patikolay maˈorip a tokel o mamalaˈosi. Misamaanay hani? Na mikiˈokan ni Yis ci Marta saan: ‘Papatikol maˈorip ko salikaka iso.’ (Yohani 11:23) Malecad to kakarayan a Wama, iraay ko kalim ato ˈicel ni Yis midemak tonini a sakiˈok. Mikitini cilosaˈ a tomangic cingra ngaˈay mahapinang ita, mikifalocoˈay a makalim cingra palahdaw to patay ato pairaan no patay a kihcod a somad. Itini kasadakan ni Lacarus i tadem a tatokian, misawacayay ci Yis iraay ko ˈicel ningra patikol paˈorip to mapatayay. Roma i, haratengen ko aniniay sinael, sapatalipaˈelal ni Yis ci Martaan. Iraay ko adihayay a lalangian ita pakasoˈlin, o pakayniay patikolay maˈorip a sakiˈok no Kawas o mamalaˈosi. w23.04 11-12 fiedac 15-16 fatac

Ano mahapinangto ita to o maanan ko araaw ni Yihofa i, latek mamifalic to misowalan i satolon. Haratengen ita, iraay ko araaw ni Yihofa, aitini i misaˈosian Ningra a tatokian palaˈosi tonini a araaw Ningra. Onini araaw mamidaˈoc, misongilaˈ a misaysay to kihcod a roray ato pasangar, tinakoen o pades no serayan, adada ato patay. O papakaynien ni Yihofa i Hongti Kitakit Ningra palaˈosi tonini a demak. (Taniil 2:44; Paˈarawan 21:3, 4) Kawra iˈayaw noniya demak i, mihayian ni Yihofa ci Satan mikowan tonini a hekal. (Yohani 12:31; Paˈarawan 12:9) Ano aniniho misaysay ci Yihofa to pasangar no tamdamdaw i, ngaˈayayto ko pikowan ni Satan, wa saanto ko pinengneng no tamdaw alatek. Mansa, o mamitala kita ci Yihofaan palaˈosi to mikiˈokan Ningra. Kawra itini i pitalaan ita a tatokian, wa pakihater sa ci Yihofa eca ka pidemak, cowa ka saan. Papadama ci Yihofa kitaanan. w23.05 8 fiedac 4 fatac; 9-10 fiedac 7-8 fatac

Sasamaan kita padama to maolahay to Fangcalay Cudad a tamdaw mikitini tonini Piharatengan a Saˈopo milifok to epoc hani? Salakat, tahidangen cangra mirienang tonini saˈopo. Cowa ko malitemohay aca ita i pitosilan a tamdaw, ngaˈayho tahidangen ita kafanaˈan a tamdaw, tinakoen o salawina, cafay micudad, cafay a matayal, tahidangen cangra mirienang tonini a saˈopo. O ngaˈayay i, tiliden iso ko ngangan no maharatengay iso a tamdaw, tanamen mitahidang cangra. Soˈlinto caay ka adihay ko matolicay a satahidang a tancang, ngaˈayay pafelien iso to i tingnaway a satahidang. Alatek wa fahkaˈen kiso, ˈalomanay ko makahiay micada to satahidang no miso! (Patnakay 11:6) Haratengen, alatek iraay ko sasa no falocoˈ no mitahidangan ita a tamdaw, ano cowaho ka pirienang cangra to saˈopo ita i, mangalef aira ko hatiniay a falocoˈ nangra. Paisalakaten ita misaharaterateng to aira ko masamaanay a salicay nangra, paliˈayawen a misaday pacaˈof to salicay nangra. Satapang sanayho maolahay to Fangcalay Cudad a tamdaw maharekto mirienang to Piharatengan a Saˈopo ikor, aira ko romaroma salicay nangra alatek. ˈAyaw no Piharatengan a Saˈopo, kasaˈopoan a tatokian ato ikor, saˈicelen ita padama ko ‘iraay ko matatodongay falocoˈ’ a tamdaw milifok to epoc mikitini tonini a saˈopo.—Dmak 13:48. w24.01 12 fiedac 13, 15 fatac; 13 fiedac 16 fatac

Masowalay no Fangcalay Cudad faloay ko tamdaw patikolay maˈorip i fafekang no sera. Ngangaˈay kiso misongilaˈ miasip to kahacecay a maˈoningay han? Ano miasip i, haratengen o maanan ko mananamay iso kalimlaan a kimad, ato sasamaan misawacay toniya maˈoningay, iraay ko kalim ato ˈicel no Kawas patikol paˈorip to mapatayay tamdaw. Mamisongilaˈho mikingkiw to milingatay ci Yisan patikolay maˈorip a maˈoningay, samanen o masakalimlaan a patikolay maˈorip konini. Haratengen na iraay ko pina soˈot a tamdaw pakaˈaraway tonini a demak, hanaca oniya demak o kalimlaan lalangian ita pakasoˈlin to papatikol maˈorip ko mapatayay. (1 Korinto 15:3-6, 20-22) Mikiˈokay ci Yihofa, miliyaw paˈorip to mapatayay a tamdaw, tada miakoˈiday kita Cingranan! Pakasoˈlinay kita to mamalaˈosi konini a sakiˈok, samanen iraay ko kalim ato ˈicel ni Yihofa mihaen to demak. Nanay misetek kita to falocoˈ padadotoc mihadak to ˈicel, matongal matongal ko pakasoˈlin tonini patikolay maˈorip a hatokel. Ano mihaen i, mamatongal ko piingid ita to Kawas ci Yihofaan. Haratengen ko sakiˈok Ningra tisowanan: ‘O kaolahan iso a tamdaw papatikol maˈorip!’—Yohani 11:23. w23.04 8 fiedac 2 fatac; 12 fiedac 17 fatac; 13 fiedac 20 fatac

O misamimingay ato misapoeneray oniya tosa tada mararingiay a capeling. O misamimingay a tamdaw, mihayiay to cowa ko mamadangar no niyah ko roma demak, cowa ko papakidem misaareteng a minengneng to niyah. Misapoeneray a tamdaw mikangodoay to tao, o pinengneng to tao ikakaay to niyah a masakalimlaan saan. (Filipi 2:3) Tocerid, o misamimingay a tamdaw, o misapoeneray ko falocoˈ a tamdaw. Misamimingay ko waywayan ni Kitiyon, misapoenerayho. Itiya o Israil tamdaw tahacadaay to saroero no ciˈicelay Mitiyaan a tamdaw, oranto mipiliˈan ni Yihofa ci Kitiyon milidong to Israil a tamdaw. Tiya pasowalen no coyoh ci Kitiyon tonini a lihaf i, sanay cingra: ‘O aˈirangan ako itini i Manasi a ngasaw i, o samimingay, o satadancaay itini i paro no lomaˈ no wama kako.’ (Kakitaan 6:15) Harateng ningra awaay ko tatodong no niyah mitamorong tonini a ˈinorong sanay, kawra ikakaay ko kacipinang ni Yihofa cingranan. Pakayni pitadiˈec to sapadama ni Yihofa, malahciayto ni Kitiyon konini a ˈinorong. O malohemay malitengay itini kahirahira no demak, o mamisaˈicel paihkal to misamimingay ato misapoeneray a capeling. (Dmak 20:18, 19) Cowa ko mamaliko cangra to inaneng ato malaˈosiay no niyah a demak, cowa ko papakayni mararaw ko pina a demak, ciharateng to awaay ko kapo no niyah saan. w23.06 3 fiedac 4-5 fatac

Oya nisowalan no sapairasol to papesiˈen ko fongoh ni Satan sa i, onini a demak itiniayho i ˈaˈayaw, awaawa sa mataˈlifto ko 1,000 miheca wangaˈ mafekad. (Paˈarawan 20:7-10) Paliˈayaway ko Fangcalay Cudad, o mamingernger to hekal konini demak. Salakat, ‘dipayalayto rihadayayto’ wa saan a milasil ko kasakitakit. (1 Tisalonika 5:2, 3) Dotoc i, ‘tangsol’ a miˈodis ko kasakitakit to mararaway a pidoyongan. O tahapinangan konini misatapangayto ko taˈangayay padiing. (Paˈarawan 17:16) Dotoc i, o mamisawkit ci Yis to tamdamdaw maemin, pafafidaˈ to lopayˈay siri ato lotok a siri. (Matay 25:31-33, 46) Kawra, mafirangay ko keter ni Satan, cowa ko papakihater saan cingra. O mamiˈowing cingra to Makok a Kok, o makomoday a kasakitakit konini, mamiˈodis to finawlan ni Yihofa. (Icikil 38:2, 10, 11) Itini i cecay tatokian, ya itiniayho i sera a manilnilay no fangcalay saocor a Krisciyang sasaˈopoen patayra i kakarayan, kalacafay ci Kristoan ato kakarayanay a sofitay ningra mifekad to Armakiton a lalood, itiyato a mahererek ko taˈangayay padiing. (Matay 24:31; Paˈarawan 16:14, 16) Ikorto i, mamisatapangto ko Comaˈol Miheca Pikowan ni Kristo.—Paˈarawan 20:6. w23.10 20-21 fiedac 9-10 fatac

Anini, ˈalomanay salikaka itiniay i makecengay ko mitosilay a tayal a kilac maˈorip. Soˈliˈlin mikangodoay cangra to sifo, kawra malecaday cangra ci Opatiyaan kiemel misamacay a mihodop ci Yihofaan. (Matay 22:21) Mikangodoay cangra to Kawas, midofdof Cingranan eca ko tamdaw ko dofdofen. (Dmak 5:29) Padotocay cangra milasil to ngaˈayay lihaf, hanaca minaˈonay a misikay to saˈopo. (Matay 10:16, 28) Ciharatengayho cangra to saali no salikaka, mansa misaˈicelay padama to salikaka milifok to sapahaled to pakasoˈlinay falocoˈ a kakaenen. Nengnengen ko nalifetan ni Enli. Itiniay cingra i Afrika, iraay ko cecay liyad makecengay ko mitosilay tayal i kilac ningra. Toya tatokian, talaˈayaway ci Enli pangangan palilam to mitepangan a cudad i salikaka. Sanay cingra: “O hinatalaway a tamdaw kako. Ano cowa ko pakayniay ci Yihofaan i, wa awa ko mahaenay a timolo ako.” Makalimay kiso malecad ci Enlian a timolo han? Ano palahaden iso ko mangodoay to Kawas a falocoˈ, o mamadangarto iso. w23.06 16 fiedac 9, 11 fatac

Mitowakang to Kawas ci Atam aci Ifa ikor ano nengnengen i, hato malaˈosiayto ci Satan miconged ci Yihofaan milahci to araaw no Niyah, o harateng ni Satan awaayto ko ngaˈayay hapakayraan ni Yihofa, ka pipatay ci Ataman aci Ifaan ko ngaˈay sanay, ikor miliyaw haca misangaˈ to malefotay a mararamoday a milahci to araaw no Niyah pakayni i tamdamdaw. Kawra ano mihaen ci Yihofa to demak i, o ngangaˈayto mipakokot ci Satan to misamangahay ci Yihofa, samanen mikitini i Satapangan 1:28, o sowal ni Yihofa ci Ataman aci Ifaan i, o teloteloc nangra mamiedef i fafekang no sera sanay. Alatek miharateng ci Satan, soˈliˈlin o teloteloc ni Atam aci Ifa tahadaˈoc caayto ko malefotay a tamdaw, kawra papakihater wa hanto ni Yihofa cangra mihofoc to cowa ka lefot a teloteloc wa saan cingra. (Patnakay 7:20; Loma 3:23) Mihaen i, cowa ito ko mamaedef ko malefotay a tamdaw i fafekang no sera, malakisawayto ko mihalakaan ni Yihofa wa saan ko sowal ni Satan. w23.11 6 fiedac 15-16 fatac

Anini, pakaynian ni Yihofa i Fangcalay Cudad ato likakawa Ningra pafeli to ihkalay a sakayat kitaanan, awaay ko halalangian ita mitongal to maanan a saˈosi. (Taneng 3:5-7) Mihaenay, aka pitaˈlif kita to sowal no Fangcalay Cudad, aka itini i notekedan a sasaˈosien patado to salikaka misaˈosi. Misaka dademakay ci Satan to ‘mahoracay misaˈfitay a sowal’ ato ‘pantaay a harateng no hekal,’ miolat a paliwasak to hekal. (Kolosay 2:8) Itini saka 1 hahekalan, midopoay ko ˈalomanay to pakatamdaway a harateng, pasifanaˈay ko singsi no Yutaya to cowa pisalalangi to Fangcalay Cudad a kimad, dadadofdofen no Krisciyang ko Rikec ni Mosi sanay. O misaˈfitay a sowal konini, paliyasay to tamdaw toya Pipowaran no taneng a Yihofaan. Anini, pakaynian ni Satan i wanglo ato sakacacawmaˈ a wangcan milasil to misaˈfitay a sowal. Tinakoen, miowingay ko romaroma a mirikecay to ‘misafakofakoay a sowal,’ anca milasil to makaniway a lihaf. w23.07 16 fiedac 11-12 fatac

Misiˈayaw ci Yihofa to pitowakang ni Satan ato saka cecay mararamoday tamdaw i, o sapisaysay pakayraan Ningra cowa ka haraterateng ni Satan. Co:wa ka pisamangah ci Yihofa, o soˈlinay ngaˈayay tiˈeren Cingra, pasalatan ci Atam aci Ifa mihofoc to wawa. Cowa ka malakisaw ko araaw ni Yihofa, pakaynian Ningra i cecay a ‘teloc’ milidong to polong midofdofay ci Yihofaan a fofofofo ni Atam aci Ifa, mihaen a milahci to araaw no Niyah, tangasa i kalaˈosian. (Satapangan 3:15; 22:18) Misawacayay konini, ano somowalho ci Yihofa to hadademaken a demak i, o mamalaˈosito sanay. Maedeng macekokay ci Satan to mipatalaan ni Yihofa a sapatefoc! Hano mahaen ko sowal hani? Samanen o sapatefoc ni Yis mikitiniay i caay pisateked a olah, ˈarawhan o niyah aca ko miharatengan ni Satan, awaay ko hatiniay a capeling ningra. (Matay 20:28; Yohani 3:16) Pakayni i limasmas no sapatefoc, mahererekto ko Pikowan ni Yis to Comaˈol Miheca i, oya patikolay malefot a midofdofay to Kawas a teloteloc ni Atam aci Ifa, aitini i fafekang no sera a lakoing a maˈorip. Mihaenay haw i, oya salakatay a araaw ni Yihofa malaˈosiayto. w23.11 6 fiedac 17 fatac

Dofdofen ita ko sarikec ni Yihofa, fangcalay ko remes ato ˈorip han a minengneng. Misamaanay hani? Samanen mitaypiyaway to ˈorip ko remes sanay ci Yihofa, o kalimelaan a sapatelong Ningra ko ˈorip. (Lifi 17:14) Isaˈayaw tiya haydaen ni Yihofa ko tamdaw komaen to titi i, aka komaen to remes sanay Cingra. (Satapangan 9:4) Tiya palimoˈot Cingra to Rikec ni Mosi to Israil tamdaw i, miliyaway somowal tonini Rikec. (Lifi 17:10) Tahinito isaka 1 hahekalan i, pakaynian Ningra i mikayatay malohemay malitengay palimoˈot ko polong a Krisciyang ‘papikeceng to remes.’ (Dmak 15:28, 29) Anini, itini pisaˈosi to mamicada to maanan a sapaising i, o mamisetek kita a midofdof tonini sapalimoˈot. Mamikedec a mitawmec kita to ˈakawangay palinian ni Yihofa i waywayan. Somowalay ci Pawlo kitanan ‘patayen’ ko no seraay a tireng sanay, tatodong i, tanekteken ko pidemak, falahen ko mararaway a coos no harateng. Ano o mananto, oha mamikidat to madadiˈiyay a waywayan i, cowa ko maminengneng, cowa ko mamidemak kita.—Kolosay 3:5; Yopu 31:1. w23.07 15 fiedac 5-6 fatac

Saliyaliyaw sanay ci Tilila mikalisanga ci Samsonan, miliclic hano taˈangay ko ˈicel ningra. Maapohayto no olah ko mata ni Samson alatek, caay pakahapinang to nafalocoˈan ni Tilila. Salikor, pasowal hananayto ni Samson to mahimeday a demak cingra. Pakayni tonini a raraw, malahdaway ni Samson ko pihayda ni Yihofa. Telocto, itini halafinay a tatokian, cowato ka lecad ci Samson to isaˈayaway a ciˈicel. (Kakitaan 16:16-20) Mararaway ko pipakasoˈlin ni Samson ci Tililaan, cowa pitadiˈec ci Yihofaan, telocto kaadayayan ko malifaay a demak. Micepetan no Filistin tamdaw cingra, mipohaw to mata ningra, patayraan i Kaca a niyaroˈ. Marofoay ci Samson i kapalitan no Kaca, mapacieciay pakarorayan a miilang. Mataˈlif ko cecay liyad, misamsaman haca no Filistin tamdaw i kaˈayaw no ˈalomanay. Itiya, misalisinay ko Filistin tamdaw, patoˈaya to makaniway a kawas nangra ci Takonan, samanen onini a kawas ko padamaay cangranan micepet ci Samsonan sanay miharateng. Pahadakan nangra ci Samson nai kapalitan, ‘papipalawlaan’ cingra to ˈalomanay tamdaw.—Kakitaan 16:21-25. w23.09 5-6 fiedac 13-14 fatac

O cafay matayal anca picudadan ano misalalicay kitanan to samaanay ko pinengneng ita to maanan a waywayan i, sasaˈicelen ita paˈading ko pihakelongan no niyah, kangodoen ko pinengneng no tao. (1 Pitiro 3:15) Ngaˈayay kita pakayni to pilicay ningra cipinang to o maanan ko kaciharatengan ningra, aka o miˈodisay anca milikafay kitanan han a miharateng. Mihaen ko demak marariday paira to ngaˈayay minaroˈan. Ano o mananto ko lalangian no tao a misalalicay i, o mamisaˈicel kita damsay a pacaˈof. Mihaen, mamasemer cingra alatek, makahito misaharaterateng to matatodongay anca mararaway ko pinengneng no niyah hokira. Ano milicay ko cafay matayal kitanan hano caka pisalisin kamo to kahofocan romiˈad sa i, haratengen ita: “Cowa ka ngaˈay rihaked a mahemeken to kaˈorip sanay cingra miharateng kitanan han?” Pakahemeken cingra to nika ciharateng to cafacafay. Mihaen kita to demak alatek mamalahdaw ko sasa no falocoˈ ningra, hanaca ngaˈay kita lipahak a masasowal to pakayniay kahofocan a kimad no Fangcalay Cudad. w23.09 17 fiedac 10-11 fatac

Sangaˈayen ita misaka dademak ko maˈosaway a toki, misawacay to kasakitakit kasafinacadan a tamdaw. Mirikecay ci Pitiro kitanan ‘paifalocoˈen’ ko taˈangayay romiˈad ni Yihofa sanay. (2 Pitiro 3:11, 12) Sasamaan ko pidemak hani? Sangaˈayay i, to romiˈamiˈad haratengen ko kasemeran a sapalemed i faelohay a hekal. Haratengen mamihelip to fangsisay a fali kiso, komaen to sakatanoktok no tireng a kakaenen, militemoh to patikolay maˈorip a salawina widang, ato pasowal to nolitengan a tamdaw to samaanay malaˈosi ko sapairasol no Fangcalay Cudad. Ano micerid miharateng tonini demak, papadama kitanan halamham a hinatala to noikoran, hanaca paifalocoˈen to mangataayto mahererek konini a hekal. Ano ‘isalakat kita mafanaˈ’ to mamafekad a demak noikor i, cowato ko ‘mamasaˈfit’ no mararaway a kimad no tamdaw.—2 Pitiro 3:17. w23.09 27 fiedac 5-6 fatac

ˈAlomanay kaemangay ‘mitowakangay to wama wina.’ (2 Timoti 3:1, 2) Misamaanay hani? Harateng no romaroma tamdaw tada makaniway ko wama wina sanay, misaali to wawa papidemak to pina demak, ˈarawhan cowa ka pidemak ko niyah. Harateng no romaroma tamdaw o sapaini no wama wina mataˈlifayto, pakidemay awaay ko kapo sanay. Kaemangay tamdaw, iraay ko mahaenay harateng iso han? Pafeliay ci Yihofa to kaemangay to limoˈot no aniniay a sinael. Harateng no ˈalomanay kaemangay pakayni i sapidofdofaw to sowal no sinael a midemak pasangaran nanay. O manan ko papadama tisowanan hani? Pakayni pidofdof to wama wina, ngaˈay kiso pasayra i sangaˈayay taˈarawan ita ci Yisan a minanam. (1 Pitiro 2:21-24) Malefotay a tamdaw ci Yis, kawra o wama wina ningra cowa ko malefotay. Soˈliˈlin mararaway cangra nolatekay, mangalef mioratay ci Yisan, kawra kamayan mikangodo ci Yis cangranan.—Kasadakan 20:12. w23.10 7 fiedac 4-5 fatac

Mitadtaday ci Pawlo, o misaˈosian no Rikec a sapatoˈaya cowa ko mamisongilaˈ mihepol to raraw, mankora ‘malasawadayto’ kora Rikec. Dotoc i, pasifanaˈan ni Pawlo cangra to ikemoday a soˈlinay kimad. Patalipaˈelal cangranan iraay ko ‘ikakaay ko nika ngaˈay a tokel’ no Krisciyang, samanen onini a tokel misalalangiay to sapatefoc ni Yis, o ngangaˈay a padama cangranan ‘miingid to Kawas.’ (Hipray 7: 19) Pasowalan ni Pawlo ko Hipray a salikaka, o pidoko no Krisciyang hano mikikaka ko nika ngaˈay to isaˈayaway noka pidoko nangra. O limasmas no pidoko no Yutayakiyo ‘o ˈadingo aca no ikoran a demak, ci Kristo ngaˈ o tatirengan nora ˈadingo.’ (Kolosay 2:17) O ˈadingo o potal aca ko patalahkalan, cowa ko tatirengan. Mankora, somowalay ci Pawlo to limasmas no pidoko no Yutayakiyo o ˈadingo aca, tatodong i, iraayho ko mikikakaay ko nika ngaˈay a midokoay a limasmas, onini a limasmas ngaˈ o soˈlinay a tatirengan. O cacipinang kita tonini sapihepolaw ni Yihofa to raraw ita a limasmas, hongaˈ pakasoˈlin kita to hahaydaen ni Yihofa ko pidoko ita Cingranan. w23.10 25 fiedac 4-5 fatac

Saka 11 fedengan no Taniil somowalay to tosa hongti, malaˈafasay cangra to saaroˈan a sapikowanaw to hekal. Palalinien ita konini a sapairasol to roma sapairasol no Fangcalay Cudad i, o mamahapinang o ‘kaˈamisay a hongti’ o Rowasiya ato kapot ningra ko mitoroˈan, o ‘katimolay a hongti’ o Ikok ato Padaka Ciˈicelay Mikowanay to Hekal ko mitoroˈan. Itini mikowanan no ‘kaˈamisay hongti’ a pala, mamihadidi ko salikaka to hakokay. Pakayni pihakelongan o romaroma salikaka mapekpekay ato mapalitay, kawra o hatiniay a demak cowa ka pakapolin to salikaka, ao paˈicelay to pakasoˈlin nangra. Misamaanay hani? Samanen mafanaˈay cangra, mahakokay ko finawlan no Kawas, o matatodongay to sapairasol ni Taniil. (Taniil 11:41) Mafanaˈ toninian, papadama kitanan matongal ko ˈicel madimadi to Kawas, hanaca matongal ko pakasoˈlin ita to hatokel noikor o mamalaˈosi maemin. w23.08 11 fiedac 15-16 fatac

Tangongolay ko olah ni Yihofa kitanan, tada ciharatengay to nafalocoˈan ita, sapidipotaw kitanan. Ano masomad kita i, mararomay Cingra. Mihaenay, ngaˈayayto kita pasayra Cingranan mitolon a pasowal: ‘Nanay dipoten Iso kako, malecad o pidipot to ˈamamosa no mata Iso.’ (ˈOlic 17:8) O mata tada o kalimlaan no tireng, ano macocaˈ i, taˈenekan nanayto. Mihaenay, patinakoan ni Yihofa kita to ˈamamosa no mata Ningra, malecad to pasowalay kitanan: ‘Kamo o finawlan Ako, cima ko mikariˈangay tamowanan i, o mikariˈangay Takowanan, samanen pakayni Takowanan tada o kalimlaan kamo’ sanay. Halamhamay ci Yihofa kitanan pakasoˈlin, maolahay Cingra kitanan o kahacecay tamdaw. Nikawrira mafanaˈay Cingra, pakayni i malifaay isaˈayaw, pasangaran nanay kita alatek pakasoˈlin to maolahay Cingra kitanan, anoca pakayni masiˈayaway ita nohatini a sapalifet, misatapangay kita cisasa to olah Ningra kitanan alatek. Ano hatiraay i, sasamaan kita paˈicel to nika pakasoˈlin no falocoˈ Cingranan hani? Nengnengen samaanay ci Yihofa patalahkal to olah ci Yisan, ato manilnilay no fangcalay saocor a Krisciyang ato kitanan a maemin. w24.01 27 fiedac 6-7 fatac

Maˈaraway ni Icra to samaanay ci Yihofa midama to finawlan no Niyah mitaˈlif to kapasangaran. ˈAyaw no Kongyen 484 mihecaan, Hongti ci Ahasuirus palimoˈotay to papalaˈafoen ko polong a Yutaya tamdaw i lalomaˈ no Pirsiya Kitakit, itiya ci Icra itiniay i Papilon ko aroˈ alatek. (Istir 3:7, 13-15) Ci Icra ato finawlan ningra mamisiˈayaw to tada katalawan! Itini pisiˈayaw tonini katalawan, o icowacowaay Yutaya tamdaw misaliwayay, tomangicay cangra, maedeng mitolonay ci Yihofaan micangacang to sakayat Ningra. (Istir 4:3) Kawra ikor talifahal sanay a masafafelit ko pakayraan, nohatini oyato a sapipatayaw to Yutaya tamdaw ko papatayen. Haratengen hena, itiya ci Icra ato finawlan samaanto ko piharateng nangra hani? (Istir 9:1, 2) Onini malifaay ni Icra i saˈayaw a sapalifet, maedeng papadama cingranan misongilaˈ a misaday to ikoray a sapalifet, alatek paˈicelay to pakasoˈlin no falocoˈ ningra, pakasoˈlin ci Yihofaan to iraay ko ˈicel Ningra midipot to finawlan no Niyah. w23.11 17 fiedac 12-13 fatac

O nisowalan no tarokos ci Pawlo o ‘midofdofay to rikec a waywayan,’ onini a rikec oya sapafeli ni Yihofa to Israil tamdaw i Sinay Lotok a rikec ni Mosi. (Loma 3:21, 28) Mitilid ci Pawlo to Loma cudad i, ano nengnengen harateng no romaroma Yutaya Krisciyang o mamidofdofho to Rikec ni Mosi sanay. Mihaenay, tano tinakoan ni Apraham ci Pawlo a mitadtad, o cecay tamdaw malo o moecelay han no Kawas a minengneng, o pakayniay i pakasoˈlinay falocoˈ, cowa ko pakayniay i ‘pidofdof to rikec a waywayan.’ Mafanaˈ tonini tada pakalalokay kitanan! Papakasoˈlin kita, o ngangaˈay kita malo o moecelay han no Kawas a minengneng. Ano pakasoˈlinay kita to Kawas aci Kristoan i, salikor o ngangaˈay kita milifok to pihayda no Kawas. O roma pakayraan i, masowalay i Yakop saka 2 fedengan a ‘midemakan,’ cowa ko misowalan ni Pawlo ‘midofdofay to rikec a waywayan,’ ao waywayan no Krisciyang i cerid no kaˈorip. (Yakop 2:24) O hatiniay a waywayan wa mahapinang o Krisciyang soˈlinay a pakasoˈlin to Kawas hokira. w23.12 3 fiedac 8 fatac; 4-5 fiedac 10-11 fatac

Ano makalimay kiso sakaciramodaw, sasinanoten a minaˈon mipiliˈ ko hararamod. Aka mapawan, ikor no ciraramod o mamidofdof kiso to fadangalan no faˈinay. (Loma 7:2; Ifiso 5:33) Mihaenay, itini pisinanot to hararamod i, saharateratengen: “O matenesay a Krisciyang cingra han? Paisalakatan ningra i kaˈorip ci Yihofa han? Citanengay ko misaˈosian ningra han? Ano mararaw cingra i, mihayiay to raraw han? Mikangodoay cingra to fafahiyan han? Ngaˈayay cingra itini midokoay demak talaˈayaw mikerid, mietan to payci paririˈ to paro no lomaˈ, itini nofalocoˈan misalimla a midipot takowanan han?” Manaokaniw, sapikilimaw kiso to ngaˈayay faˈinay, ano kisoto mamisaˈicel malo ngaˈayay a fafahi noikor. Sowal no Fangcalay Cudad, o ngaˈayay a fafahi ‘matatodongay a cafay’ no faˈinay, ‘papadama’ to faˈinay sanay. (Satapangan 2:18) Tangongol ko kaolah ningra ci Yihofaan, o mamisarocod patado to faˈinay milifok to pikangodo no tao. (Taneng 31:11, 12; 1 Timoti 3:11) Mitongal kiso to olah ci Yihofaan, misaˈicelho itini paro no lomaˈ ato kasakopang padama to tao, ngaˈayto ko pisaday, malo ngaˈayay fafahi noikor. w23.12 22-23 fiedac 18-19 fatac

Mikiˈokay ci Yihofa to papafeli kitaanan to taneng, ho mataneng ko pisaˈosi ita. Itini i kalimlaan a pisaˈosi i nokaˈorip, mikiriwiˈay a misaali kita to sakayat no Kawas. O roma i, pafelian ni Yihofa kita to ˈicel padadotoc a miemem. Na pafelian Ningra to ˈicel ko tarokos ci Pawlo, o papafeli Cingra kitaanan to ˈicel, padama kitaanan mihadidi to sapalifet. (Filipi 4:13) Pakaynianho ni Yihofa i salikaka padama kitaanan. ˈAyaw no kinafalah to ˈorip ci Yis toya dadaya, mingitangitay a mitolon ci Yihofaan, micangacang to Wama i kakarayan aka papitamorongen cingra to pakaditay a raraw. Soˈlin cowa ka tooren ni Yihofa ko micangacangan ni Yis a pacaˈof, kawra miocoran ni Yihofa ko cecay coyoh mitongal to ˈicel ningra. (Luka 22:42, 43) Anini, ci Yihofa papakayni i salikaka mitongal to ˈicel ita alatek, tinakoen patingwa ko salikaka pakalalok kitaanan, anoca tayni a milisoˈ kitaanan. Soˈlinay haw i, kita kahacecay tamdaw ngangaˈay talaˈayaw a tano ‘fangcalay a sowal’ pakalalok to salikaka.—Taneng 12:25. w23.05 10-11 fiedac 9-11 fatac

Ano mirienangayto to Piharatengan a Saˈopo ko misawaday mitosil a salikaka i, calemcemay to aira ko tatiihay noka pinengneng no tao cangranan. Mankora, aka a pakangodoen cangra, milicay to kangodoan a salicay, anoca somowal to mamidokaˈ cangranan a sowal. Cangra i, o kanonoˈan no mita a salikaka, miliyawto cangra kalacafay kitanan midoko ci Yihofaan, tada o kalipahakan ita. (ˈOlic 119:176; Dmak 20:35) To mihecahecaan midoedoan ita ko sapalimoˈot ni Yis miharateng to ka pikinafalah ningra, cowa ko kita aca ko caciepoc, o papadamaho to roma tamdaw milifok to adihayay sapalemed. (Isaya 48:17, 18) Ano mirienang kita tonini a saˈopo i, mamatongal ko kaolah ci Yihofaan aci Yisan, hanaca paihkalay to piakoˈid ita to kihcod a nano demak Nangra. O kalalaˈed ita ato salikaka mamatongal ko kaˈangongol. O ngangaˈayho padama kita to tao, sasamaan ngaˈ milifok to sapalemed no sapatefoc. Nanay kita maemin ka pisaˈicel, misaday to aniniay miheca a Piharatengan a Saˈopo, samanen onini a romiˈad o sakalimlaan i lalomaˈ no cecay a miheca! w24.01 14 fiedac 18-19 fatac

Samaanay ci Yihofa mikayat kitanan hani? Sakakaay i, pakaynian i Kimad Ningra, o Fangcalay Cudad. Roma i, sakadademakan Ningra ko pinapina tamdaw mikayat kitanan. Tinakoen, sakadademakan Ningra ko ‘madimadiay citanengay koli’ pafeli to sapahaled to pakasoˈlinay falocoˈ a kakaenen, padama kitanan mataneng ko pisaˈosi. (Matay 24:45) Misaka dademakanho Ningra ko kasakilac kantok, ciˈinorongay a malohemay malitengay i kasakopang, mikayat kitanan pakalalok kitanan, padama kitanan misiˈayaw to pasangar no kaˈorip. Itini tonini pasangaray siˈayawen a salikoray lintad, ngaˈay yaca pafeliay ci Yihofa to tatiˈeren a sakayat kitanan, hato ngaˈayay padadotoc kita tanektek ko kalawidang Cingranan, materek i sakatayraaw i midaˈocay ˈorip a lalan. Tada miakoˈiday kita ci Yihofaan! Nikawrira, nolatekay mihakelong to sakayat ni Yihofa cowa ko madoloay. Ano o cowa ko malefotay a tamdaw ko pafeliay tonini a sakayat i, latek pasangaran nanay a micada. Itiya i, o papalahad kita to tanektekay noka pakasoˈlin, pasoˈlinen ci Yihofa to mikayatay to finawlan Ningra, pakasoˈlin mihakelong to sakayat Ningra i, o mamalifok ita ko epoc. w24.02 20 fiedac 2-3 fatac

Misongilaˈ kita mikingkiw to Fangcalay Cudad, mamatongal ko kaolah ci Yihofaan. Miˈosi to Fangcalay Cudad i, songilaˈen miharateng ko sinael samaanay padama tisowanan matongal ko kafanaˈ ci Yihofaan. Ngaˈayay licayen ko niyah: “Oniya maˈoningay samaanay paihkal to maolahay ci Yihofa takowanan hani? Mikitini mahapinangay ako, hano mamaolah kako ci Yihofaan hani?” Micerid kita mitolon ci Yihofaan, pasowal Cingranan to kihcod a nafalocoˈan no niyah, mamatongal ko olah Cingranan. (ˈOlic 25:4, 5) Papacaˈofen ni Yihofa ko mikifalocoˈay a satolon ita. (1 Yohani 3:21, 22) Patongalen ko olah ita i tao. Mala Krisciyang ikor no pina miheca, mafanaˈayto ko tarokos ci Pawlo ci Timotian. Ci Timoti o idahiyay a kapah, maolahay ci Yihofaan ato tao. Pasowalan ni Pawlo ko Filipiay a salikaka sanay: ‘Caay ka hela ako ko malecaday ci [Timotian] ko pinangan a tamdaw, edengan cingra ko mikifalocoˈay ciharateng to nano demak namo.’ (Filipi 2:20) Ano nengnengen i, o maharatengay ni Pawlo tada maolahay ci Timoti to salikaka. Mafanaˈ ko salikaka i kasakopang to aira ci Timoti a milisoˈ, maedeng halamhamay a mitala.—1 Korinto 4:17. w23.07 9 fiedac 7-10 fatac

Itini ˈayaw no micomod ko Israil tamdaw to Mikiˈokan no Kawas sapafeli cangranan a Pala i, oya mikeriday cangranan a Mosian mapatayayto. Itiya, mifalahanto ko finawlan no Kawas han? Cowa. Madimadi cangra ci Yihofaan i, padotocay ci Yihofa midimokos cangranan. ˈAyaw no mapatay ci Mosi, palimoˈotan ni Yihofa ci Mosi minilnil ci Yosuwaan mikerid to Israil tamdaw, hanaca maherekayto pahatatanam ci Mosi ci Yosuwaan to pina poloˈ mihecaan. (Kasadakan 33:11; Limoˈot 34:9) Roma i, ˈalomanay citanengay a faˈinayan ngaˈayay malo mikeriday, tinakoen iraay ko cecay patek a tamdaw, cecay soˈot a tamdaw, lima poloˈ a tamdaw ato moetep a tamdaw to mikeriday. (Limoˈot 1:15) Mihaenay, milifokay ko finawlan no Kawas to sangaˈayay a pidimokos. Nengnengen ko roma tinakoan. Cecay halafinay a tatokian, ci Iliya itini Kaˈamisay moetepay ngasaw a Israil kitakit padamaay to finawlan tano matatodongay a pakayraan midoko ci Yihofaan. Kawra ikor, miocoran ni Yihofa ci Iliya tayra i Katimolay a Yuta matayal. (2 Hongti 2:1; 2 Rayray 21:12) Itiya, o madimadiay midoko ci Yihofaan i Kaˈamisay a Israil kitakit mifalahanto han? Cowa. Samanen maherekayto pahatatanamen ni Iliya ci Ilisa to adihayay mihecaan. Padadotocay ci Yihofa palaˈosi to araaw no Niyah, hanaca padadotocay midimokos to madimadiay midoko Cingranan a tamdaw. w24.02 5 fiedac 12 fatac

Pacomodan no Ifiso a Krisciyang ko tedi no soˈlinay kimad i kaˈorip no niyah. (ˈOlic 119:105) Mifalahanto nangra ko mararaway pihakelongan ato malafoay a waywayan. Midokoay cangra to Kawas, midemak to kaolahan Ningra a demak, hanaca misarocod ‘mitodong to Kawas.’ (<u2060>Ifiso 5:1) Malecaday ko pakayraan ita. ˈAyaw no mafanaˈ kita to soˈlinay kimad, itiniay i toˈemanay no pihakelongan ato no waywayan. Ilalomaˈay ita o romaroma tamdaw na misalisinay to lisin no mararaway pihakelongan, anca malafoay ko nokaˈorip, kawra mafanaˈ to palinian ni Yihofa ikor cowato ka pihaen to demak. Misatapangay kita mitoor to moecelay a palinian no Kawas a maˈorip, hanaca mikitini milifok to taˈangayay a epoc. (Isaya 48:17) Nikawrira, sapiliyasaw kita to toˈemanay, ‘padadotoc malo ˈodingaray a wawa,’ o papadadotoc misaˈicel miremo to masakenakenaay a sacona. w24.03 21 fiedac 6-7 fatac

Cowaho ka herek misaday ko niyah patafang to tireng micada to paputisem saan kiso miharateng alatek. O lalangian i, iraayho ko fafalicen iso i nokaˈorip alatek, hongaˈ matoor ko palinian ni Yihofa. Misaaliayho kiso to toki paˈicel to pakasoˈlinay falocoˈ alatek. (Kolosay 2:6, 7) Aka mapawan o kacakat no kahacecay tamdaw cowa ka lecalecad, o kaemangay tamdaw cowa ka itini malecaday a mihecaan maherek a misaday patafang to tireng micada to paputisem. Itini pihapinang to kacakat no niyah i, simsimen ko pakayraan no niyah, aka palalinien ko tao. (Kalatiya 6:4, 5) Soˈlin mahapinang iso caayho ka herek misaday ko niyah patafang to tireng ci Yihofaan, aka pisawad tonini a patosokan. Tolonen ci Yihofa micangacang to sapadama Ningra tisowanan a misalof to sasalofen. (Filipi 2:13) Ngaˈay pakasoˈlinen iso, cowa ko pitengil aca ni Yihofa to satolon iso, ao papacaˈofen Ningra kiso.—1 Yohani 5:14. w24.03 5 fiedac 9-10 fatac

Kinacecayay tada masomaday ci Sara, oranto pasowalan ningra ci Apraham to roray no falocoˈ, hato mirorohay ci Aprahaman. Mafanaˈay ci Apraham to o midofdofay to faˈinay a ngaˈayay tihi ci Sara. Mihaenay i, mitengilan ningra ko sowal ni Sara, misaˈicel a misaysay to pasangar. (Satapangan 16:5, 6) Ngaˈayay mananam ita ko maanan hani? O malo faˈinayay, iraay ko fadangalan iso misaˈosi to demak no paro no lomaˈ. (1 Korinto 11:3) Nikawrira, ˈayaw no misaˈosi i, salakatho misinanot to harateng no fafahi, o ciolahay ko pihaen to demak. Onini a saˈosi ano mamifiyor to fafahi i, o aisalakatenho a milicay cingra, samaanay ko piharateng ningra. (1 Korinto 13:4, 5) Kinacecayayho, sapihamhamaw ci Apraham to papina cowa ko kafanaˈan a tamdaw, oranto ocoran ningra ci Sara papisaday to kadofahay a kakaenen mipatahka to lafang. (Satapangan 18:6) Midamaay ci Sara to saˈosi ni Apraham, tangsolay a midemak. O malo fafahiyay, ngaˈayay kiso mitodong ci Saraan, midama to saˈosi no faˈinay, mihaen i, o papatanoktok kiso to raramod namo.—1 Pitiro 3:5, 6. w23.05 24-25 fiedac 16-17 fatac

Manilnil ci Kitiyon malo kakitaan ikor, misaaliay to mamidofdof ci Yihofaan, misaaliayho patalahkal to timolo. Tinakoen, palimoˈotan ni Yihofa cingra mitastas to nisangaˈan no wama a pipatoˈayaan ci Paalan a cadada, tada o katalawan konini a ˈinorong. (Kakitaan 6:25, 26) Ikor, misaˈopoan ni Kitiyon ko sofitay micoˈay to ciˈicelay a ˈada, kawra kinatosaay ci Yihofa palimoˈot cingranan miˈesal to ˈaloman no sofitay. (Kakitaan 7:2-7) Salikor, palimoˈotanho ni Yihofa cingra itini lafii miˈodis to pakopangan no sofitay no ˈada. (Kakitaan 7:9-11) O malohemay malitengay o ‘mamakahi midofdof,’ makahi mitoor to sakayat no Fangcalay Cudad ato likakawa no Kawas a midemak. Mihaen ko demak nangra o patirengay to ngaˈayay taˈarawan. Kawra, sapihaenaw to demak cowa ko madoloay nolatekay. Tinakoen, o mihadakan no likakawa no Kawas a sakayat adihayay, anca kalikiay ko kafalic nolatekay saan ko harateng no malohemay malitengay. Latekay cisasaay ko malohemay malitengay to maanan a sakayat o matatodongay hokira. O roma i, sapidemakaw ko malohemay malitengay to maanan a ˈinorongan o mamarepet alatek. Itini mahaenay a pakayraan, sasamaan ko malohemay malitengay mitodong ci Kitiyonan ira ko makahiay midofdof a waywayan hani? Songilaˈen misinanot ko sakayat ato mitoor a midemak. w23.06 4-5 fiedac 9-11 fatac