Saka 4 Folad

Nolitengan madimadiay sikawdan ni Yihofa tahalifaay to masakenakenaay talifahal sanay a pasangar. Nengnengen ko nalifetan ni Yakop. Palimoˈotan no wama cingra tayra i fakian ci Lapanan misafafahi to wawa ningra, samanen o midokoay to Kawas ci Lapan. Mikiˈokan no wama cingra, o papalemeden ni Yihofa cingra. (Satapangan 28:1-4) Oranto i, matatodongay ko pisaˈosi ni Yakop, miliyas to Kanan a pala, malingad tayra i lomaˈ no faki ci Lapanan. Tatosaay ko fafahiyan a wawa ni Lapan, o cecay ci Liya, o roma ci Rakil. Maolahay ci Yakop ci Rakilan, to sakacifafahiyaw cingranan, hayi sanay ci Yakop patado ci Lapanan matayal to 7 miheca. (Satapangan 29:18) ˈArawhan o kalingad no demak cowa ka hatira to niharatengan ni Yakop. Misakaniwan ni Lapan ci Yakop, papisafafahi cingranan to sakakaay a wawa ci Liyaan. Soˈliˈlin mihaiay ci Lapan ikor no cecay lipay pafafahien ci Yakop ci Rakilan, nikawrira o saali ningra i, papatadoho ci Yakop cingranan matayal to 7 mihecaan. (Satapangan 29:26, 27) O roma sa i, kinapinapinaay ci Lapan micicih to mihaian ningra a sapalifon ci Yakopan. Padadotocay misamsam ci Yakopan, 20 miheca ko nika halafin.—Satapangan 31:41, 42. w23.04 15 fiedac 5 fatac

Papasayra kita cimaanan micangacang to sahinom ato sakayat hani? Mafanaˈay kita to caˈof no salicay, pasayra i Kawas ci Yihofaan. Wa ngaˈay kita pakayni satolon micangacang to sadama Ningra, ano Cingrato pakalalokay kitaanan mihaen to demak. Makalimay Cingra ‘padadotoc mitolon’ kita. (1 Tisalonika 5:17) Ano hacowato a tatokian ngangaˈay kita mitolon to Kawas, hanaca itini kahirahira no kaˈorip micangacang to sakayat Ningra. (Taneng 3:5, 6) Caay ka ˈidi ci Yihofa, cowa pisaˈosi Cingra to kakinapina kita a mitolon. Mafanaˈay ci Yis misaaretengay ci Yihofa to satolon no sikawdan Ningra. ˈAyaw no tayni i hekal ci Yis i, maˈaraway ni Yis ko pipacaˈof ni Yihofa to satolon no ˈalomanay madimadiay sikawdan. Tinakoen, ci Hana, Tafiti aci Iliya na mikifalocoˈay a micangacang ci Yihofaan, tiya pacaˈofen ni Yihofa cangra i, itatihiay Ningra ci Yis. (1 Samuil 1:10, 11, 20; 1 Hongti 19:4-6; ˈOlic 32:5) Mihaenay, ikor no tayni i fafekang no sera ci Yis i, pasifanaˈay to nisawawaan pairaen ko pakasoˈlin micerid a mitolon.—Matay 7:7-11. w23.05 2 fiedac 1, 3 fatac

Sakakaay Saysi ci Yihoyata tada mangodoay ci Yihofaan. Itiya, ci Ataliya mihalakaay miˈafas to saaroˈan no hongti. O fafahiyan a wawa ni Yicipil, maˈanofay cingra, sapipatayaw to cifadangalay midotoc to saaroˈan no hongti. O fofo ningra cangra! (2 Rayray 22:10, 11) Kawra cecay a wawa ci Yoas materekay a maˈorip, samanen o fafahi ni Yihoyata ci Yihosipa mipaˈoripay cingranan. Cangra mararamod mipalimekay tonini a wawa, misongilaˈ a midimokos cingranan, mihaen o teloc ni Tafiti iraay ko mamidotoc to saaroˈan no hongti. Soˈliˈlin misiˈayaw to katalawan no ˈorip, kawra ci Yihoyata madimadiay to Kawas, cowa ka talaw toya mariˈangay a Ataliyaan. Pito ko mihecaan ni Yoas i, miliyaway ci Yihoyata paihkal to madimadi ci Yihofaan. Milimasmasay ci Yihoyata, ano malaˈosi i, o ngangaˈayto ci Yoas maroˈ i kamaroˈan no hongti ci Tafiti, ano caka laˈosi i, o mamapatay ci Yihoyata. Palemedan ni Yihofa cingra, malaˈosiay konini a mihalakaan. w23.06 17 fiedac 12-13 fatac

Tada mitowakangay ci Taniil o papatayen wa saan ko hongti ci Nipukatnicar a miharateng alatek. Kawra, cowa ka talalikor ci Taniil, timoloay pasowal a mitadtad to nitiihan. O maanan ko padamaay ci Taniilan patalahkal to timolo i hakelong no kaˈorip hani? Mimingho cingra, patirengayto ko wama wina to ngaˈayay taˈarawan pasifanaˈ cingranan. (Limoˈot 6:6-9) Cowa ko kafanaˈ aca ni Taniil to Moetep a Rikec, mafanaˈayho to adihayay saˈosi no Rikec. Tinakoen, mafanaˈay to o maanan ko ngaˈayay kaenen no Israil tamdaw, o maanan ko cowa ka ngaˈay kaenen. (Lifi 11:4-8; Taniil 1:8, 11-13) Mafanaˈayho ci Taniil to likisi no finawlan no Kawas, ano caka pidofdof cangra ci Yihofaan malifaay ko maanan a padiing. (Taniil 9:10, 11) O milifetan no hakelong no kaˈorip ni Taniil, pakasoˈlinay cingra, ano o mananto ko mafekaday a demak, ci Yihofa ato ciˈicelay a coyoh o mamidama cingranan.—Taniil 2:19-24; 10:12, 18, 19. w23.08 3 fiedac 5-6 fatac

Ci Ripika o matanengay fafahiyan, kalamkamay ko pidemak, mafanaˈay cingra itini matatodongay a tatokian midemak to matatodongay a demak. (Satapangan 24:58; 27:5-17) Nikawrira, mikangodoayho cingra to tao, makahiyay midofdof. (Satapangan 24:17, 18, 65) Ano matiraay kiso ci Ripikaan ira ko misapoeneray a waywayan, makahi midama to limasmas ni Yihofa i, ngangaˈay kiso itini i paro no lomaˈ ato kasakopang ira ko tawlikay noka pifiyor. Misamimingay ko falocoˈ, o papairaen no matenesay a Krisciyang a capeling. Ci Istir mikangodoay to Kawas tada o misamimingay, cowa pitaˈlif to fadangalan midemak. Mitengilay to sapaini no kaka ningra ci Mortikay, hanaca padadotocay midoedo a midemak. (Istir 2:10, 20, 22) Ngangaˈay kiso mitodong ci Istiran malo misamimingay a tamdaw, talaˈayaw pasayra i tao micangacang to ngaˈayay a sapaini, halo midoedo a midemak. (Titus 2:3-5) Ci Istir itini roma pakayraan patalahkalay to misamimingay a waywayan. Soˈliˈlin “o makapahay a kaying cingra, makapah ko tireng ningra,” kawra cowa ka sapikidataw to kaciharateng no tao cingranan.—Istir 2:7, 15. w23.12 19-20 fiedac 6-8 fatac

Ano pakidem ko kakesem hatiniay mikalisangaay a demak o fafalahen ita. Ano maherekayto kita mihayi to raraw, pasasiyor, hanaca misaˈicel ko pidemak eca ka piliyaw a mararaw, wa ngaˈayto kita pakasoˈlin maherekayto ci Yihofa misodod kitanan. (Dmak 3:19) Toniya tatokian, cowato ka ciharateng ci Yihofa padadotoc kita a makesem ko falocoˈ. Mafanaˈay Cingra, ano padadotoc kita mirikec to niyah, o papaira to taˈangayay pidokaˈ to niyah. (ˈOlic 31:10) Ano pakidem ko kasomad ita, o mamisawadto to midaˈocay ˈorip a cacikayen alatek. (2 Korinto 2:7) Ano pakidemay kiso a makesem ko falocoˈ, haratengen o ‘soˈliˈlinay misodod to tamdaw’ a Kawas ci Yihofa. (ˈOlic 130:4) Misododan Ningra ko mikifalocoˈay pasasiyor a tamdaw, mikiˈokay ‘cowato ko mamiharateng to raraw nangra.’ (Yirimiya 31:34) Tatodong nonini, cowato ko mamitikol ci Yihofa miharateng to nano raraw iso. Ano pakayniay kiso i raraw isalakat malahdaw ko tatodong a matayal, aka pakayni ko pirikec to niyah. Cowa ko haharateng sa ci Yihofa o maanan ko raraw iso, ano kisoto cowa ko ngangaˈay mihaen ko demak. w23.08 30 fiedac 14-15 fatac

Itini pifekad no 2019 lifong a tatokian, pakasoˈlinay ko ˈalomanay to mangah a sowal, telocto tada macariraway. Kawra Misawacayay Tamdaw ni Yihofa pakayni pitengil to sakayat no likakawa no Kawas, rihadayay ko falocoˈ. (Matay 24:45) Mamisamacay kita to ‘ikakaay ko nika kalimlaan a demak.’ (Filipi 1:9, 10) Mikalisangaay to falocoˈ a demak miˈafasay to adihayay a toki ato ˈicel, wa awato ko hapakayraan ita misamacay to cacangacangen ciepocay a patosokan. O maanan a demakan ko mikalisangaay hani? Tinakoen, alatek papaisalakaten ita i nokaˈorip ko kakomaen ato lawla ato tayal. (Luka 21:34, 35) Roma i, pakayni no hekalan ato mirikecay masasiromaromaay a safanaˈ no sinfon, adihayay ko matengilay to romiˈamiˈad. Ano pakidem ko piharateng ita to mahaenay a lacongis, mamakalisanga ko falocoˈ ita, alatek itini i falocoˈ sapidamaaw to cecay. Ci Satan tatano masakenakenaay a pakayraan milonay to pisetek no falocoˈ, micona to pidemak ita to matatodongay a demak. w23.07 16-17 fiedac 12-13 fatac

Pakayni i finawlan no Kawas, o Piharatengan to Kinafalah ni Yis to ˈOrip a romiˈad o sakalimlaan i lalomaˈ no cecay miheca, samanen edengan koniya romiˈad na palimoˈotan ni Yis ko nisawawaan to haharatengen. (Luka 22:19, 20) Patalipaˈelalayho kitaanan tatano maanan a pakayraan paihkal to piakoˈid ita to patafangan ni Yis a sapatefoc. (2 Korinto 5:14, 15) Itini toniya saˈopo wa ira ko toki ita ‘masasipakalalok’ to salikaka. (Loma 1:12) Roma i, ˈalomanay maolahay to Fangcalay Cudad a tamdaw ikor no mirienang toniya saˈopo, pakayni maˈaraway matengilay no niyah masolotay ko falocoˈ, oranto misatapangay romakat i midaˈocay ˈorip a lalan. Ka piharateng, o Piharatengan a Saˈopo samaanay mikedec a palacecay to salikaka i paro no kakarayan. Mihaenay, itini falocoˈ ita o Piharatengan to Kinafalah ni Yis to ˈOrip a romiˈad tada o mikiriwiˈay. w24.01 8 fiedac 1-3 fatac

Ano calepen ita misimsim ko mihadakan ni Yihofa aci Yis a sapatefoc, mamahapinangto tada maolahay Cangra kitanan o kahacecay tamdaw. (Kalatiya 2:20) O sapatefoc mikitiniay i olah ni Yihofa a sapatelong kitanan. Pakaynien ci Yihofaan o masakalimlaan a tamdaw ci Yis, nikawrira kamayan mihayi ci Yihofa tano nini a Wawa pakayni kitanan a misemsem ato kinafalah to ˈorip, misawacayay konini to tada maolahay ci Yihofa kitanan. Cowa ka himeden ni Yihofa ko tangongolay a olah Ningra kitanan, ihkalan Ningra patalahkal. (Yirimiya 31:3) Maolahay ci Yihofa kitanan, misolot kitanan tayra i tatihi Ningra. (Nengnengen ko Limoˈot 7:7, 8.) Ano o cimato, ano o mananto, cowa ko papaliyas to olah Ningra i kitanan. (Loma 8:38, 39) Pakayni tonini olah samaanay ko piharateng iso hani? w24.01 28 fiedac 10-11 fatac

O mapanilnilay no fangcalay saocor a Krisciyang tada misalimlaay tonini a hatokel no niyah. Fratelik Frans salikaka o masalalomaˈay nangra. Mikifalocoˈay a somowal cingra: “O hatokel niyam tanektekay, o mamasahci a malaˈosi, mikikakaay to niharatengan niyam. O kahacecay no 144,000 tamdaw, o mamilayap to mikiˈokan no Kawas to mimingay ˈopo a siri a sapalemed.” Itini 1991 miheca, salikaka ci Frans tanektekay somowal: “Kamayan kami misakareteng tonini a hatokel. . . . Halafin ko nika pitala niyam i, matongalay ko pisalimla tonini a hatokel. Pakayni tonini hatokel mihadidi kami a mitala . . . kako nohatini, ikakaay to itiyaayho a misalimla tonini a hatokel no niyah.” O mitalaan ita ano itiniay i fafekang no sera anoca itiniay i kakarayan a midaˈoc ko ˈorip, ora iraay ita a kasapaan a hatokel papalipahak kitanan. Roma i, ora hatokel ita ngangaˈay a padadotocen a paˈicel. w23.12 9 fiedac 6 fatac; 10 fiedac 8 fatac

Itini i sacomod no kasasoˈarawan a kopang iraay ko cecay fodawan a cadada, itiniay i fafaed nira ko saysi patafang to pinaˈorip ci Yihofaan. (Kasadakan 27:1, 2; 40:29) Kawrira, onini a sapatoˈaya cowa ko mamisahci a mihepol to raraw no finawlan. (Hipray 10:1-3) Ora padadotocan a patafang i fangcalay kopang a pinaˈorip, o paliˈayaway to ngangaˈay misahci milidong to tamdamdaw a sapatoˈaya. Mafanaˈay ci Yis ocoren ni Yihofa cingra tayni fafekang no sera, o sapatafangaw to ˈorip ningra malo sapilidong to tamdamdaw a sapatoˈaya. (Matay 20:28) Mihaenay haw i, tiya micada to paputisem i, patafangay ci Yis to tireng no niyah a milahci to araaw no kakarayan a Wama. (Yohani 6:38; Kalatiya 1:4) ‘Kinacecayay aca patafang’ ci Yis to ˈorip no niyah, ngaˈayayto midaˈoc a mihepol to raraw no mihakelongay cingranan a tamdaw.—Hipray 10:5-7, 10. w23.10 26-27 fiedac 10-11 fatac

Ano o niyah ko tiˈeren, cowa ko mamahepol ita ko pifedfed no raraw ato patay. (ˈOlic 49:7, 8) Sapilidongaw kitaanan, milimasmasay ci Yihofa, papikinafalah ci Yisan to ˈorip. Adihayay ko mikinafalahan ni Yihofa aci Yis. Haharatengen ita, kinafalahay to maanan ci Yihofa aci Yis pakayni kitaanan, wa matongal ko pisalimla to sapatefoc. Ikor no mararaw ci Atam, malahdaway ningra ko midaˈocay a ˈorip, mafiyorayho ko teloteloc ningra, awaayto ko hatokel. Sapiˈacaaw to malahdaway ni Atam a kihcod, kinafalahay ci Yis to malefotay a ˈorip. Tayni ci Yis i fafekang no sera i, ‘awaay ko raraw, cowa pisamangah,’ mansa o malefotay a ˈorip ko patafangan, maroyaroyay to malahdaway ni Atam a ˈorip.—1 Pitiro 2:22; 1 Korinto 15:45; 1 Timoti 2:6. w24.01 10 fiedac 5-6 fatac

Patikol maˈorip ci Yis ikor, micomodayto i noˈadingoan a fangcalay sefi itini i Safangcalay Kitiraan. Ihkalay mahapinang ita, o pidoko no Krisciyang mikikakaay ko nika ngaˈay, samanen mipatireng ci Yihofa tonini limasmas, o taˈeneran i, oya mitamorongan a ˈinorong no Sakakaay Saysi ci Yis ato sapatefoc ningra. Sakakaay saysi no Israil mihawikiday to remes no pinaˈorip micomod i mipatirengan no tamdaw a Safangcalay Kitiraan, kawra ci Yis i, ‘tayniay i kakarayan’ i kaˈayaw ni Yihofa. O samakoracay a kitiraan korira, patafang ci Yis to epoc no malefotay ˈorip no niyah, patado kitanan mihepol to raraw. (Hipray 9:24-26) Ano o tatayra i kakarayan ko hatokel anoca mamilifok to midaˈocay ˈorip i fafekang no sera, ngaˈayayto kita itini tonini noˈadingoan a fangcalay sefi midoko ci Yihofaan. w23.10 28 fiedac 13-14 fatac

Haratengen ko karetengay a ˈinorong ni Yis i kakarayan nohatini. O Hongti no Hongti Kitakit no Kawas cingra mikowan nohatini, o siniˈadaay kitanan a Sakakaay Saysi cingra. Pakayni cingranan, ngangaˈay kita miingid toya ‘sidaˈitay’ a Kawas, mifowah to falocoˈ i Cingranan, micangacang ‘itini pisaalian no mita’ siniˈada ato midama kitanan. (Hipray 4:14, 15) Nanay kita to romiˈamiˈad dotimen ko nidemakan ni Yihofa aci Yis saki kitanan, ato aniniay midemakan Nangra. O patalahkalan Nangra a olah kitanan, tangongolay a mitemer to falocoˈ ita, pakalalok kitanan fanekfek a matayal saki Kawas. (2 Korinto 5:14, 15) O cecay sapiakoˈidaw a hapakayraan i, misaˈicel a padama to tao malo Misawacayay Tamdaw ni Yihofa ato malo nisawawaan ni Yis. (Matay 28:19, 20) Mihaenay ko demak no tarokos ci Pawlo. Mafanaˈay cingra o araaw ni Yihofa i, ‘mamilidong to masakenakenaay a tamdaw, matatodong ko kafanaˈ to soˈlinay kimad.’.—1 Timoti 2:3, 4. w23.10 22-23 fiedac 13-14 fatac

Mitosil kita i, miˈosiay tonini padihkoay to falocoˈ a sinael, pasowal to tamdaw to sasamaan ko kaˈorip i faelohay hekal. Sasamaan kita padama to niyah ato tao pakasoˈlin, o masowalay i Paˈarawan 21:3, 4 a sapalemed o mamalaˈosi hani? Cowa ko pihadak aca ni Yihofa tonini a mitemeray to falocoˈ no tamdaw a sakiˈok, mihadakayho to ciˈicelay a wacay, padama kitanan ira ko lalangian pakasoˈlin tonini a sakiˈok. Itini dotoc a sinael, mahapinang ita ko pina lalangian pakasoˈlin to mamalaˈosi konini a sakiˈok. Sanay ko sinael: ‘Oya maroˈay i tadamaanay ˈanengan sanay ko sowal: “Nengnengen! Safaelohento Ako ko kihcod nohatini.” Sanayho ko sowal Ningra: “Tiliden iso, o soˈliˈlinay konini a sowal, ngaˈayay tiˈeren.” Sanay Cingra pasowal takowanan: “Malaˈosiayto maemin! O Alfa Kako, o Omika Kako, o Satapangan Kako, o Hererekan Kako.”’—Paˈarawan 21:5, 6a. w23.11 3 fiedac 3-5 fatac

Iraay ko matatodongay inaneng a misimsim a kapah salikaka itini pilafa to caˈedong citanengay ko mipiliˈan. ˈAlomanay misafacoay to caˈedong a tamdaw, mikayatay to kalingad no caˈedong cowa ko misakangodoay ci Yihofaan cangra, anca malafoay ko kaˈorip. O misafacoan nangra a caˈedong no faˈinayan kincoay a makedec, anca hato no fafahiyan a rikoˈ. Mihaenay, itini pipiliˈ to rikoˈ i, o misaˈicelay macakat malo o matenesay a kapah salikaka mamisaka dademak to safalod no Fangcalay Cudad, mitodong to ngaˈayay taˈarawan i kasakopang. Ngaˈayay cingra misaharaterateng: “O mipiliˈan ako paihkalay to matatodongay ko harateng, misikoray to nafalocoˈan no tao han? O caˈedong ako madoloay mahapinang no tao to o soˈliˈlinay midokoay to Kawas a tamdaw kako han?” (1 Korinto 10:31-33) Iraay ko inaneng a misimsim a kapah salikaka, cowa ko pilifok aca to pikangodo no salikaka, mamilifokho to pikangodo no kakarayan Wama ci Yihofa. w23.12 26 fiedac 7 fatac

Isaˈayaw, na mihakokayay ko ‘katimolay hongti’ to finawlan no Kawas. (Taniil 11:40) Tinakoen, itini satapangan no 20 hahekalan, ˈalomanay faˈinayan salikaka pakayni pitafo to misatenokay saaroˈan mipalitan, o wawa no romaroma salikaka pakayni malecaday a lalangian mifalahan no picudadan. Kawra i ngata no pina poloˈ miheca, o madimadi no salikaka tahacadaay to cowa ka lecad a sapalifet, oniya sapalifet cowa ka hapinang. Tinakoen, itini pisingkiwan a tatokian, soˈlin o cecay Krisciyang cowa ko mamitopa midama to cecay tamdaw, kawra harateng ningra o cecay a yofayof anca cecay a tamdaw ikakaay to tao ko kangaˈay, hanaca makalim maritos koniya tamdaw. Kawra o haharatengen ita, cowa ka itini aca i midemakan, wa itiniho i noharatengan ato nofalocoˈan mitafo kita to misatenokay a saaroˈan!—Yohani 15:18, 19. w23.08 12 fiedac 17 fatac

Itini midaˈocay ˈorip a cacikayen, ‘seteken ko falocoˈ pakalowid a comikay.’ (1 Korinto 9:24) Sowal ni Yis ‘o mamaroero no halikaenay, haliepahay ato cariraw no kaˈorip’ kita. (Luka 21:34) Itini kacomikay iso to midaˈocay ˈorip a cacikayen i, o mahaenay a sinael papadama tisowanan mihapinang, alatek mamidemak ko niyah to manan sasalofen. Wa ngaˈay kita pakasoˈlin, o mamalahci ita ko midaˈocay ˈorip a cacikayen, samanen o papafeli ci Yihofa kitanan to haˈicel. (Isaya 40:29-31) Mihaenay, aka matayo! Todongen ko tarokos ci Pawlo, misaˈicel micangacang to halifon i kaˈayaw. (Filipi 3:13, 14) Awaay ko papatado tisowanan comikay tonini a cacikayen, ira ko sapadama ni Yihofa tisowanan, o mamalaˈosi kiso. Papadama ci Yihofa tisowanan mitamorong to ˈinorong no niyah, mifalah to mikalisangaay a demak. Ira ci Yihofa i tatihi midama tisowanan, o ngangaˈay kiso padadotoc a comikay, salikor o papakalowidto! w23.08 31 fiedac 16-17 fatac

12 ko mihecaan ni Yis, maharek misalisin ci Yosif aci Mariya tona minokay i, cowa ka fanaˈ to materekayho i Yirusalim ci Yis. (Luka 2:46-52) Nao mamihapinang cangra to iraayto i tatihi ko polong wawa nangra, o ˈinorong nangra konini. Mahelato nangra ci Yis i, mirorohay ci Mariya ci Yisan tada miafaday cangranan! Na ngangaˈay ci Yis pasowal to o wama wina ko mararaway, nikawrira cowa ka pihaen ko demak ningra, ao tano mikangodoay a pakayraan pacaˈof to wama wina. Nikawrira, ‘cowa ka cipinang ci Yosif aci Mariya to tatodong no sowal ni Yis.’ Ikorto, ‘kamayan midofdof cangranan’ ci Yis. Kaemangay tamdaw, ano mararaw ko pinengneng no wama wina tisowanan i, pasangaran nanay kiso midofdof cangranan han? Sasamaan ko pidemak iso hani? Haratengen ko nafalocoˈan ni Yihofa. Sowal no Fangcalay Cudad, midofdof kiso to wama wina ‘wa pakahemek to Tapang’ sanay. (Kolosay 3:20) O wama wina iso cowa ka songilaˈ ko kacipinang tisowanan han? O misaˈosian nangra a sarikec no lomaˈ cowa ka tada tatodong han? Aka calemcem, mafanaˈay ci Yihofa maemin. Maˈaraw Ningra kiso i mahaenay a pakayraan, kamayanho midofdof to wama wina, maedeng o lalipahak Cingra. w23.10 7 fiedac 5-6 fatac

O cecay cafay micudad latek somowalay, o Misawacayay Tamdaw ni Yihofa oha mamifalic to kapinengneng to tongsinlien. Ngaˈay pasowalen cingra, iraay ko fadangalan no kahacecay tamdaw mipiliˈ to niyah a kaˈorip sanay kami, ano masamaanayto ko mipiliˈan no tamdaw, mikangodoan niyam, ciharatengay cangranan. (1 Pitiro 2:17) Latek ngangaˈay kita pasowal cingranan, midofdof to palinian no Fangcalay Cudad pakayni to waywayan iraay ko maanan a epocan. Soˈlinto misafelit ko tao to pinengneng no mita, aka sakaliki sa to o mafanaˈay kita to maanan ko pakasoˈlinan ningra. O cafay micudad ano milikaf to misangaˈay ko Kawas to kihcod i, tada cipinangay cingra a pakasoˈlin to sinkalon wa saan ko piharateng iso hokira? ˈArawhan i, cowa ka tada cipinang cingra to sinkalon. Latek panengnengen iso to jw.org wangcan to pakayniay pisangaˈ a lalakaw, mihaen mamakahito cingra masasowal tisowanan to ika ato lalakaw i wangcan alatek. Mikangodo kita cingranan, mamitengilto cingra to samaanay ko sowal no Fangcalay Cudad alatek. w23.09 17 fiedac 12-13 fatac

Ngaˈay kita pakasoˈlinen, soˈlinto mararaw, ano misaˈicel kita misalof to raraw hanaca padadotoc mitadiˈec ci Yihofaan i, o sasakadademaken ato papalemeden ni Yihofa kita. (Taneng 28:13) O cowa ka lefot a tamdaw ci Samson, kawra misaˈicelay cingra matayal saki Yihofaan. Soˈlin na taˈangayay ko raraw ningra, cowa ka pisawad midoko ci Yihofaan. Ano ci Yihofato cowa pisawad cingranan, miliyaway misaka dademak cingranan palaˈosi to taˈangayay demak. Itini pinengneng ni Yihofa, kamayan ci Samson matomes ko nika pakasoˈlin, mansa itini Hipray saka 11 fedengan misilsilan ni Yihofa ko ˈalomanay taˈarawan no pakasoˈlinay falocoˈ, masowalay ko ngangan ni Samson. O matomesay to olah sidaˈitay a Wama ci Yihofa, itini kalonayan ita i, mikiriwiˈay Cingra midama kitanan. Mafanaˈ tonini, tada masayaray ko falocoˈ ita. Mihaenay, matira kita ci Samsonan a micangacang ci Yihofaan, saan ko sowal: ‘Nanay aka mapawan takowanan, Kawasaw, nanay pafelien Iso kako to ˈicel.’—Kakitaan 16:28. w23.09 7 fiedac 18-19 fatac

Ano paifalocoˈen ko romiˈad ni Yihofa i, o mamakalim kita sapipaladaˈaw to ngaˈayay lihaf i tao. Kawrira latekay, tona maˈangiay kita to tamdaw hato cowa ka timolo a pasowal. Iraay ko mahaenay a nalifetan ni Pitiro. Ta masawkit ci Yis toya dadaya i, matalaway ci Pitiro mihayi to o nisawawaan ni Yis ko niyah, kinatoloay mihakeno to mafanaˈay cingra ci Yisan. (Matay 26:69-75) Nikawrira, ikor no pi:na miheca fanekfekayto ko falocoˈ ni Pitiro, sanay cingra: “Aka ka talaw kamo to pipatalaw no nimanima. Aka ka rawraw ko falocoˈ namo.” (1 Pitiro 3:14) Onini sowal ni Pitiro pakasoˈlinen ita, to ngangaˈay kita miremo to ciˈangiay to tamdaw a falocoˈ. Sapiremoaw to ciˈangiay to tamdaw a falocoˈ, sasamaan ko pidemak hani? Sanay ci Pitiro: ‘Kifalocoˈen a mihayi to fangcalay ci Kristo, o Tapang namo.’ (1 Pitiro 3:15) Saka dangaraw tonini i, haratengen ko saaroˈan ato fadangalan no Hongti ato Tapang ita ci Yis Kristo. w23.09 27-28 fiedac 6-8 fatac

Ano kitato papadadotoc mihadak to ˈicel, miliyas to ‘toˈemanay awaay ko epoc a demak.’ (Ifiso 5:11) Misawacayay ko nalifetan, ano mararid ko tamdaw mitengil, minengneng anca malalengo to tao to cowa ka korac ato malafoay a demak, oha mamidemakto to mahaenay a demak alatek. (Satapangan 3:6; Yakop 1:14, 15) O hekal ni Satan sahtoay sapilipalawaw kitanan, papiharateng kitanan o malafoay kaacekan a demak i pinengneng ni Yihofa cowa ko tatiihay saan. (2 Pitiro 2:19) Mananamay ci Satan misaka dademak to mioratay to tamdaw a pakayraan, ho ecato ka hapinang no tamdaw ko ngaˈayay ato tatiihay. (Isaya 5:20; 2 Korinto 4:4) Mansa o milasilan no adihayay ika, kamok no tilifi ato wanglo a sasowalen, sahtoay misafelitay to moecelay palinian ni Yihofa. Mihalakaay ci Satan misaˈefit kitanan, o kaacekan a waywayan ato pakayraan a maˈorip cowa ko mararaway, cowa ko papaira to tatiihay a teloc sanay.—Ifiso 5:6. w24.03 22 fiedac 8-10 fatac

O fangcalay pakopangan malecaday o patirengan a kopang. Itiniay ko Israil tamdaw patoˈaya ci Yihofaan. Ya itiniho i kohkohan ko Israil tamdaw misalinalinah i, mihawikidanto nangra konini fangcalay kopang a micoloˈ. Maedeng 500 mihecaan, o pidokoan a kitiraan no Israil tamdaw konini fangcalay kopang, tangasa mapatirengto ko fangcalay sefi i Yirusalim. (Kasadakan 25:8, 9; 29:43-46; Saˈosi 9:22) Soˈlinay haw i, onini fangcalay kopang o tahapinangan to ikakaay ko nika ngaˈay a limasmas. Nolitengan a fangcalay kopang ‘o tahapinangan ato ˈadingo no ikakarayanay a demak,’ mitaypiyaway to noˈadingoan a tadamaanay fangcalay sefi. Sowal ni Pawlo ‘onini fangcalay kopang o tahapinangan aca, somowalay to aniniay mafekaday a demak.’ (Hipray 9:9) Mikitini tora sowal ningra mahapinangay ita, tiya mitilid cingra to Hipray cudad i, iraayto konini noˈadingoan a fangcalay sefi. Itiniay i Kongyen 29 miheca a masadak. Tora mihecaan, micadaay ci Yis to paputisem, itiyaay misatapang malo ‘sakakaay saysi’ ni Yihofa itini tonini noˈadingoan a fangcalay sefi.—Hipray 4:14; Dmak 10:37, 38. w23.10 25-26 fiedac 6-7 fatac

Sapadadotocaw ko Krisciyang lipahak a midoko ci Yihofaan, o mamakahi a mifalic, makahi misalof. Misamaanay hani? Samanen ano makahi kita mifalic, makahi micaˈi, o ngangaˈayto a misiˈayaw to kafalic no pakayraan no niyah, hanaca mikangodo to harateng ato misaˈosian no romaroma tamdaw. O sikawdan ni Yihofa kita, makalimay makahiay micaˈi ko niyah, makalimayho o misapoeneray, iraay ko siniˈada a tamdaw. Sowal no Fangcalay Cudad o ‘ˈOngcoy’ ci Yihofa, samanen tanektekay ko saaroˈan Ningra, cowa ka ngiyangi. (Limoˈot 32:4) Nikawrira, makahiay micaˈi ci Yihofa. Sapalaˈosiaw Cingra to araaw no niyah, mitooray to kalingad no demak padadotoc a misalof. Paringian Ningra kita i Cingranan a misangaˈ, mansa iraay ko inaneng ita misiˈayaw to kafalic no pakayraan. Roma i, pafeliayho ci Yihofa kitanan to ngaˈayay tadiˈecen a safalod no Fangcalay Cudad, padama kitanan misiˈayaw to masakenakenaay a pasangar, ngangaˈayho citaneng ko misaˈosian. Mikitini taˈarawan ni Yihofa ato sapafeli kitanan a safalod ngangaˈay mahapinang ita, o tanektekay a ˈOngcoy Cingra, makahiay micaˈi. w23.07 20 fiedac 1-3 fatac

Itini Fangcalay Cudad, patinakoan ni Yihofa ko Niyah to o sidaˈitay a wina. (Isaya 66:12, 13) Haratengen hena, o cecay a wina samaanay misalimla a midimokos to kaemingay a wawa no niyah. Malecaday, ano taharoray kita i, o dadamsay ci Yihofa a misimaw kitanan. Ano mararaw kita i, cowa ka sapisawadaw ci Yihofa kitanan. (ˈOlic 103:8) O Israil tamdaw kinapinapinaay a patoled ci Yihofaan, kawra mikiˈokay ci Yihofa to pasasiyoray tamdaw, kamayan Cingra ˈangongol ko olah cangranan. Tinakoen, sanay ko sowal ni Yihofa: ‘O kalimlaan no Mako kiso, patadamaan tisowanan, marariday ko olah Ako i tisowanan.’ (Isaya 43:4, 5) Mahaenay ko olah ni Yihofa kitaanan. Soˈlinto pakidem ko raraw ita i, edengan ano mikifalocoˈ kita pasasiyor, minokay i tatihi ni Yihofa, o mamatinakoto ita ko midaˈocay a olah Ningra. Mikiˈokay Cingra ‘tataˈangay ko pisodod’ kitanan, ‘paira to sakarihaday’ no mita.—Isaya 55:7; Dmak 3:19. w24.01 26-27 fiedac 4-5 fatac

Misiˈayaw kita to pasangaray ngangaˈay ci Yihofa mipadama kitanan. Tinakoen, pakayni to sapirienangaw to taykay, latek pasowalen ko tawki to papahanhan to pina romiˈad kita. Anoca, sapirienangaw to polong a saˈopo, latek saalien ko tawki mifalic to katayalan a toki ita. Itiya i, mamaˈaraw ita ko nika pipadang ni Yihofa kitanan. Alatek fahkaˈen a mahemek kita to minaroˈan nora demak, mihaen i, mamatongal ko pakasoˈlin no falocoˈ ita ci Yihofaan. Misapoeneray ko falocoˈ ni Icra micangacang to sapadama ni Yihofa. Ano taˈangay ko saroero ni Icra to nika ˈareteng no ˈinorong i, misapoenerayto cingra mitolon ci Yihofaan. (Icra 8:21-23; 9:3-5) Maˈaraw no romaroma tamdaw ko nika pitiˈer ni Icra ci Yihofaan i, masemeran nanay ko falocoˈ, sapidamaawto cingranan a mitodong to pakasoˈlinay falocoˈ ningra. (Icra 10:1-4) Ano calemcemay kita pakayni to sakaˈorip ato sakarihaday no paro no lomaˈ a taˈangay ko saroero, itiya i, pairaen ko pakasoˈlinay falocoˈ mitolon ci Yihofaan. w23.11 18 fiedac 15-17 fatac

Cowa pasowal ci Yihofa, ano ciharatengay kita o moecelay tamdaw han Ningra minengneng i, o hahaenen o ni Apraham ko pidemak. Soˈlinay haw i, adihayay ko hapakayraan ita pakayni midemakan a patalahkal to nika pakasoˈlin no falocoˈ. Tinakoen, ngaˈayay kita mihamham to faelohay tamdaw tayni i kasakopang, padama to mapadesay a salikaka, ato sangaˈayen ko paro no lomaˈ no niyah. Mihaen ko demak ita, mamilifok to pihayda no Kawas ato sapalemed. (Loma 15:7; 1 Timoti 5:4, 8; 1 Yohani 3:18) O roma i, ano fanekfek kita mitenak to ngaˈayay lihaf no Hongti Kitakit, o ngaˈayay pakayraan patalahkal to pakasoˈlin no falocoˈ. (1 Timoti 4:16) Kita maemin ngangaˈay pakaynien i midemakan patalahkal, pakasoˈlinay kita to mamalaˈosi ko mikiˈokan ni Yihofa, hanaca pakasoˈlin to sahtoay o sangaˈayay ko pakayraan Ningra a dademak. Mihaen, ngangaˈayto kita pakasoˈlin, o moecelay a tamdaw han ni Yihofa ko pinengneng kitaanan, malo widangto Ningra kita. w23.12 2 fiedac 3 fatac; 6 fiedac 15 fatac

ˈAyaw no mapatay ci Tafiti pasowalay ci Solomonan toni sowal i fafekang. (1 Hongti 2:1, 3) Anini, polong a faˈinayan salikaka o mamidofdof tonini a sapalimoˈot. O maminanam cangra midofdof to sarikec no Kawas, hanaca itini kahirahira no kaˈorip sakadademaken ko safalod no Fangcalay Cudad. (Luka 2:52) Kapah salikaka hano mamisaˈicel malo o matenesay a Krisciyang hani? O faˈinayan salikaka itini paro no lomaˈ ato kasakopang adihayay ko kalimlaan a ˈinorong. Kapah salikaka maemin, maedeng na miharatengay kiso ano ikor wa mitamorong to maanan a ˈinorong. Alatek iraay ko patosokan namo mirienang to mieminay to toki a matayal saki Kawas, malo dama sikawdan, ikorto malo malohemay malitengay no kasakopang, ciharatengay kamo alatek saka ciraramodaw ato saka ciwawaaw. (Ifiso 6:4; 1 Timoti 3:1) Sakalaˈosiaw nonini a patosokan, hanaca madangar ko masakenakenaay a ˈinorong, o mamalo o matenesay a Krisciyang kamo ngaˈ ngaˈay. w23.12 24 fiedac 1-2 fatac

Micadaay to sapatorod ni Yihofa ko malohemay malitengay, mamidimokos to kalimlaan a siri Ningra. Misaaretengay cangra toniya kalimlaan a ˈinorong matayal saki salikaka, caay ka rorayen ‘misongilaˈ pakaen’ to siri no Kawas. (Yirimiya 23:4; 1 Pitiro 5:2) Ira ko mahaenay a pakaenay ilalomaˈ no kasakopang, tada miakoˈiday kita ci Yihofaan! O malohemay malitengay ngangaˈay minanam to taˈarawan no Kakitaan ci Kitiyon. (Hipray 6:12; 11:32) Manilnilay cingra midipot ato pakaen to finawlan no Kawas. (Kakitaan 2:16; 1 Rayray 17:6) Malecad ci Kitiyonan, o malohemay malitengay anini manilnilay itini mafodifoday a lintad midimokos to finawlan no Kawas. (Dmak 20:28; 2 Timoti 3:1) Wa ngaˈay ko malohemay malitengay minanam ci Kitiyonan, patalahkal to misapoeneray, misamimingay ato makahiay midofdof a waywayan, wa ngaˈayho mitodong cingranan mihadidi a mitamorong to ˈinorong. O romaroma salikaka maherek minanam to nano demak ni Kitiyon i, o mamatongal ko piakoˈid to marorayay a matayal a malohemay malitengay, hanaca makahi a midama cangranan.—Hipray 13:17. w23.06 2 fiedac 1 fatac; 3 fiedac 3 fatac