Saka 5 Folad

O ‘polong no hekal’ mifekad ko pakidemay a kedal i, o itiyaay Krisciyang malecaday to tao mamisiˈayaw tonini pasangaray a pakayraan. O tawki no lomaˈ maedeng calemcemay to ngangaˈay paririˈ to paro no lomaˈ hokira. Mihalakaay misakakahad to tayal a kaemangay tamdaw sasamaanto hani? O nanayaren ko mihalakaan no niyah saan cangra miharateng han? Soˈliˈlin cowa ka lecad ko kahacecay a pakayraan, kawra misalofay cangra. Padadotocay cangra misaˈicel a mitosil, hanaca makahiay paladaˈ to dafong i Yutiyaay a salikaka. (Dmak 11:29, 30) O tahacadaay to sapakiyaho a salikaka matinakoay nangra ko pidama ni Yihofa. (Matay 6:31-33) Maedeng makakedecayto cangra to padamaay a salikaka sanay a miharateng, o pakiyahoay to dafong anca tano romaroma pakayraan mipadang to mapadesay a salikaka, matinakoay nangra ko mipaladaˈay a hemek.—Dmak 20:35. w23.04 16 fiedac 12-13 fatac

Latekay maherek kita mitolon ikor i, alatek pakaynian ni Yihofa i cowa pidoko Cingranan a tamdaw patado kitaanan midemak to pina a demak. Tinakoen, mikayatan ni Yihofa ko harateng no Hongti ci Artakirkis, mihaydaanto no Hongti ci Artakirkis ko saali ni Nihimiya, panokay ci Nihimiyaan tayra i Yirusalim mipadang to mipatirengay a tayal. (Nihimiya 2:3-6) Anini, itini i pisaalian ita a tatokian, alatek pakaynian ni Yihofa i cowa pidoko Cingranan a tamdaw mipadang kitaanan. O Wama ita i kakarayan tocerid cowa ka tano masakafahkaˈan a pakayraan pacaˈof to satolon no mita, kawra oha papacaˈof Cingra, o sapadama Ningra o soˈlinay a nisaalian no mita, ho ngaˈay kita padadotoc a madimadi Cingranan. Mihaenay haw i, sinanoten a minengneng ko pipacaˈof ni Yihofa tisowanan. Ngaˈayay kita misalatelatek a tomerep, misongilaˈ a miharateng to samaanay ci Yihofa pacaˈof to satolon no mita. (ˈOlic 66:19, 20) Pasayra kita ci Yihofaan mitolon, micadaho to pakayraan Ningra pacaˈof, pakayni ko pipaihkal to pakasoˈlinay kita Cingranan.—Hipray 11:6. w23.05 11-12 fiedac 13, 15-16 fatac

Itini pipatafang to tireng a satolon i, miketonay kita ci Yihofaan to mamidoko Cingranan ato midofdof to araaw Ningra. O misowalan ita o tatooren a midemak. Soˈlin midemak to miketonan patafang to tireng cowa ko pakarorayay a ˈinorong konini, o patonekan a misangaˈ kitanan i, o mamidofdof to araaw ni Yihofa. (Paˈarawan 4:11) Pafeliay ci Yihofa kitanan to nofalocoˈan a saali, miringiay to Kawas a sangaˈen kita. Mansa, ngaˈayay kita miingid Cingranan, wa pakayniho pidoedo to araaw Ningra midemak a lipahaken. Roma i, midoedo kita to araaw no Kawas maˈorip, hanaca mikotod to kanonoˈan a Wawa Ningra ci Yisan, oha ‘lalipahak ko falocoˈ.’ (Matay 11:28-30) Papadotoc mitongal to olah iso ci Yihofaan. Ngaˈayay haratengen iso, kihcod nano demak ni Yihofa tisowanan, ato sapafeli Ningra tisowanan a sapalemed noikor. Ano matongal ko olah iso ci Yihofaan, mamadoloto midofdof Cingranan. (1 Yohani 5:3) Mitolonay ci Yis ci Yihofaan micangacang to sadama, misamacayayho to sapalifon i kaˈayaw, mansa malaˈosi cingra midofdof to araaw ni Yihofa. (Hipray 5:7; 12:2) Malecad ci Yisan, ka pitolon kiso micangacang ci Yihofaan pafeli to ˈicel tisowanan, aka mapawan to makapahay hatokel midaˈoc maˈorip. w23.08 27-28 fiedac 4-5 fatac

Maolahay kita to iraay ko mihadidiay falocoˈ a tamdaw. Tinakoen, roma tamdaw cowa pakayni i pitala macarirawen ko falocoˈ, masemeray kita cingranan. O roma tamdaw ano mararaw kita i, patalahkalay to mihadidiay falocoˈ, tada miakoˈiday kita cingranan. Miakoˈiday kita to pakingkiway a singsi mihadidi padama kitanan cipinang a micada ato misaka dademak to kimad no Fangcalay Cudad. Manaokaniw, sakakaay aakoˈiden ita ci Yihofa paihkalay to mihadidiay falocoˈ i kitanan. Soˈliˈlin maolahay kita paihkal ko tao to mihadidiay falocoˈ, kawra ano o kita ko mamihaen to demak i, latekay cowa ko madoloay. Tinakoen, ano masoˈot ko rakat no paliding i, pasangaran nanay kita rihaday ko falocoˈ, mangalefay ano matayoayto kita i, marawraway ko falocoˈ. Ano pakararaw ko tao kitanan i, madoloay a maketer kita alatek. Soˈliˈlin mikiˈokay ko Kawas papaira to faelohay hekal, kawra nolatekay pasangaray a mitatala kita. Itini toniya pakayraan, mamisaali kita to mihadidiay. w23.08 20 fiedac 1-2 fatac

Mitooran ni Kitiyon ko limoˈot ni Yihofa, papinokay to ˈalomanay a sofitay, o maˈosaway a tamdaw cowato ka pakaala to kalicecay no simoˈot. Saan cingra miharateng alatek: “Kalimlaan ko mahaenay a pifalic han? Ano mihaen mamalaˈosi ko demak han?” Ano samaanto i, mitooran ni Kitiyon a midemak. Anini, mitodongay ko malohemay malitengay to taˈarawan ni Kitiyon, midofdof to sakayat no likakawa, makahi a misalof. (Hipray 13:17) Soˈlin matalawan nanay ci Kitiyon, anca misiˈayaw to sakapatay no ˈorip, kamayan a midofdof ci Yihofaan. (Kakitaan 9:17) Malifok ningra ko sakiˈok ni Yihofa ikor, pakasoˈlinayto papadamaen ni Yihofa cingra midipot to Israil tamdaw. Itini makecengay ko mitosilay tayal a kilac, mitodongay ko malohemay malitengay to taˈarawan ni Kitiyon. Soˈlinto mapasawad ko tayal, marepet, masayfang anca makariˈang no tamdaw, kamayan a timolo cangra mikerid, malacafay to salikaka mirienang to saˈopo ato mitosilay a tayal. Itini taˈangayay padiing a tatokian, cowa ko caciˈangi ko malohemay malitengay to katalawan, tatimolo a midofdof to sakayat. w23.06 5-6 fiedac 12-13 fatac

Itini i Fangcalay Cudad miˈoningan ni Yihofa ko nano demak ni Yihoyata, ho ngaˈay mananam ita. (Loma 15:4) Mapatay ci Yihoyata ikor milifokay to mikiriwiˈay a sapalemed, ‘mitademan i Niyaroˈ ni Tafiti, malacafay to hongti a tademen i malecaday a kitiraan, samanen makapahay ko nidemakan ningra itini Israil pakayni i Kawas ato fangcalay sefi.’ (2 Rayray 24:15, 16) Minanam ci Yihoyataan papadama kitaanan palahad to mikangodoay ci Yihofaan a falocoˈ. O malohemay malitengay a Krisciyang wa ngaˈay mitodong ci Yihoyataan, madimadi to ˈinorong, micerid misinanot to saali no salikaka, midipot cangranan. (Dmak 20:28) O matoˈasay a salikaka wa ngaˈay mikitini ci Yihoyataan minanam, ano mikangodoay ci Yihofaan, padadotoc madimadi, o sakadademaken ni Yihofa cangra palaˈosi to araaw Ningra. O kaemangay a Krisciyang wa ngaˈay misinanot to samaanay ci Yihofa mikangaˈay ci Yihoyataan, mitodong ci Yihofaan mikangodo to matoˈasay a Krisciyang, mangalef oya halafinayto madimadi matayal saki Yihofaan a salikaka. (Taneng 16:31) Mamidofdof kita to ‘mikeriday a tamdaw’ i lalomaˈ no mita, madimadi a midama cangranan.—Hipray 13:17. w23.06 17 fiedac 14-15 fatac

Itini i saˈopo hahakowa ko kararid a pacaˈof to salicay, mamisongilaˈ kita mihapinang. Ano papakamay saan kita, wa irato ko saroero no misikayay papipacaˈof kitaanan. Telocto, awaayto ko toki no romaroma tamdaw a pacaˈof, kita saan kinapinapinaayto a pacaˈof. O papatoled to tao konini, hawad sato a pakamay alatek. (Patnakay 3:7) Ano ˈalomanay ko tamdaw pakamay i, cowa kao kiso saan ko mitoroˈan no misikayay, nolatekay lalomaˈ no saˈopo cowa ka matoroˈ kiso. Mamatoled kiso alatek, kawra aka piharateng to padetengay ko misikayay a salikaka. (Patnakay 7:9) Ano pakamay kiso cowa ka matoroˈ i, ngaˈayay sinanoten mitengil ko caˈof no tao, malahci ko saˈopo pakahemeken cangra. Papakalalok to salikaka ko sapakahemek iso, malecad o sapacaˈof iso pakalalok cangranan. w23.04 23-24 fiedac 14-16 fatac

Mikingkiw to Fangcalay Cudad misongilaˈ a midotim. O lamit no kilang ano padadotoc a midapdap i taliyok, pasilaeno ˈangongol ko pipalamit, wa tanektek a tomireng. Malecaday, ano misongilaˈ kita mikingkiw midotim, wa mapalamit ko pakasoˈlinay falocoˈ i Kimad no Kawas, mamatongal ko pakasoˈlin no mita, midoedo to pakayraan no Kawas dademak o sangaˈayay wa saan. (Kolosay 2:6, 7) Songilaˈen ita a miharateng, nolitengan madimadiay a sikawdan no Kawas samaanay mikitini i sakayat no Kawas ato sadipot milifok to sapadama. Tinakoen, maˈaraway ni Icikil i mapolosi ko cecay coyoh misongilaˈay a milalat to fangcalay sefi, misarocoday cingra a mitengil minengneng, mapaˈicelay ko pakasoˈlinay falocoˈ. Ano misongilaˈ kita mikingkiw ato midotim to Kimad no Kawas, misarocod minengneng to ˈangongolay a kimad, mamalifok ita ko taˈangayay a epoc. Tinakoen, midotim tonini mapolosi ni Icikil ngaˈay pakafanaˈ kitanan, samaan tanektek mitawmec to patirengan ni Yihofa a matatodongay a palinian a midoko. (Icikil 40:1-4; 43:10-12) Ano kitato ngangaˈay tanektek ko falocoˈ, misarocod a mitadiˈec ci Yihofaan.—ˈOlic 112:7. w23.07 18 fiedac 15-16 fatac

Itini lalomaˈ no Fangcalay Cudad adihayay ko ngaˈayay taˈarawan nananamen no kapah salikaka. Onini a nolitengan madimadiay sikawdan maolahay to Kawas, hanaca pakayni sapidimokosaw to finawlan no Kawas mitamorongay to masakenakenaay a ˈinorong. Itini paro no lomaˈ ato kasakopang wa ngaˈay mahela iso ko nananamen a ngaˈayay taˈarawan. (Hipray 13:7) Roma i, patirengay ci Yis to malefotay taˈarawan ngangaˈay sinanoten iso. (1 Pitiro 2:21) Itini pinengneng iso to ngaˈayay taˈarawan i, songilaˈen miharateng ko makapahay capeling nangra. (Hipray 12:1, 2) Ikor, haharatengen iso sasamaan a mitodong cangranan. Iraay ko inaneng a misimsim a tamdaw misaharateratengay a dademak. O faˈinayan salikaka papalahad ato midipot to inaneng a misimsim. Sarocoden minanam ko safalod no Fangcalay Cudad, hanaca songilaˈen a miharateng onini a safalod iraay ko maanan epoc tisowanan, dotoc sakadademaken ko safalod no Fangcalay Cudad citaneng ko misaˈosian, pakahemek ci Yihofaan. (ˈOlic 119:9) Ano mihaen ko demak iso i, itini i sakatenesaw a lalan taˈangayayto ko kacakat iso.—Taneng 2:11, 12; Hipray 5:14. w23.12 24-25 fiedac 4-5 fatac

O wama wina sakadademaken ko ciepocay a hapakayraan, pasifanaˈ to wawa damsay a pacaˈof to pisalalicay no tao. (Yakop 3:13) O romaroma wama wina itiniay pakalomaˈay a pidoko, malacafay to wawa mihatatanam. Isalakatan nangra misaharaterateng, nolatek mamilicay ko singsi anca cafacafay to maanan a salicay. Dotocto i, malalengoay to wawa, patiriˈen cangra sasamaan a pacaˈof, ngaˈ mahatatanam no wawa to sasamaan a damsayen ko pipacaˈof to tao. O mihatatanamay cowa ko papadama aca to kapah mafanaˈ tano matatodongay a pakayraan mitadtad to pihakelongan i tao, papadamaho cangranan pakasoˈlin to pihakelongan no niyah to iraay ko wacay. Itini jw.org wangcan iraay ko “Salicay no Kapah” sanay madadoedoay a lalakaw, ato pakayniay i kapah a misafacoan a pihatatanaman, paˈicel to pakasoˈlin nangra, hanaca mafanaˈ tano niyah a sowal pacaˈof to salicay no tao. O paro no lomaˈ ano malacafay minanam tonini a lalakaw, mamafanaˈto cangra sasamaan tano madoloay cadaen no tao a pakayraan damsay a miˈading to pihakelongan. w23.09 17 fiedac 10 fatac; 18 fiedac 15-16 fatac

Na patirengay kiso to patosokan itini i midokoay a demak, kawra ikor mahapinangay pasangaray malaˈosi han? Ano mahaenay i, aka matoled ko falocoˈ, malifaay no ˈalomanay tamdaw konini. Tinakoen, ci Filipo miharatengay to sakararidaw a mitolon ato sapisalofaw to kangaˈay no pitolon, kawra pasangaran nanay cingra mikilim to toki mitolon. Ci Aylika patirengay to patosokan mitoor to toki mirienang to ˈayaw no mitosilay a saˈopo, kawra matayoayto tahira cingra. Ano iraay ko cecay patosokan iso samaamaanen cowa ka madangar, aka masawi, o mapadikay kiso cowa ka saan konini. Tohati:niay, ano sapilaˈosiaw to cecay kantangay a patosokan, misaaliay to adihayay a toki ato nika pisaˈicel. ˈArawhan cowa ka pisawad kiso tora patosokan, paihkalay konini to misakaretengay kiso to kalalaˈed aci Yihofa, sapafeliaw Cingranan to sangaˈayay. Misalimlaan ni Yihofa ko mihadakan iso a ˈicel, hanaca cowa pisaali tisowanan midemak to caay ko mamadangar iso a demak. (ˈOlic 103:14; Mika 6:8) Mihaenay i, patatodongen ko patosokan iso, tooren ko mamadangar iso a demak. w23.05 26 fiedac 1-2 fatac

O timoloay a tamdaw latekay matalaway ko harateng alatek, kawra cowa ko sasawad sato cangra midemak to matatodongay a demak. Ci Taniil tada timoloay a kapah. Misongilaˈay cingra mikingkiwto nitilidan no pairasolay a sowal, mahawpay ko sapairasol ni Yirimiya, mankora mahapinangay ni Taniil, ora halafinayto a malaholiw i Papilon a Yutaya tamdaw mangataayto a matedal. (Taniil 9:2) Maˈaraw ko nika laˈosi no sapairasol maedeng paˈicelay to pakasoˈlin ci Yihofaan, o mitiˈeray ci Yihofaan a tamdaw i, iraay ko tadamaanay a timolo. (Nengnengen ko Loma 8:32, 37-39.) Ora kalimlaan i, marariday ci Taniil mitolon to i kakarayanay a Wama. (Taniil 6:10) Mihayiay cingra ci Yihofaan to raraw no niyah, pasowal to nafalocoˈan no niyah ci Yihofaan, micangacang to sapadama ni Yihofa. (Taniil 9:4, 5, 19) Ci Taniil mahecaday kitanan o kalo a tamdaw, hofoc han awaayho ko timolo ningra. To nika misongilaˈay cingra mikingkiw, mitolon, mitiˈer ci Yihofaan, mansa mapalahad konini kalimlaan a capeling. w23.08 3 fiedac 4 fatac; 4 fiedac 7 fatac

Midofdof kita to cifadangalay no hekal, o papaira to haepoc no niyah ato salikaka. Misamaanay hani? Cecay lalangian i, cowato ko papakayni kita i pisafelit to rikec a matefoc no sifo. (Loma 13:1, 4) Roma lalangian i, wa ira ko ngaˈayay ngangan i pinengneng no sifo to Misawacayay Tamdaw ni Yihofa. Tinakoen, ˈayaw no pina miheca, i Nayciliya itini kasaˈopoan a tatokian micomoday ko sofitay i Hongti Kitakit Kasaˈopoan, sapikilimaw to misafelitay to pasataay a mifodifoday a tamdaw. Kawra o mikeriday a tapang no sofitay palimoˈotay to sofitay miliyas, saan ko sowal: “O Misawacayay Tamdaw ni Yihofa cowa pisafelit to pasataay.” O kahacecay iso midofdof to sarikec, wa ngaˈay patado to finawlan ni Yihofa milifok to ngaˈayay ngangan, o hatiniay ngaˈayay ngangan latek itini noikoran a romiˈad, mamidipot to salikaka. w23.10 9 fiedac 13 fatac

ˈAlomanay midokoay to Kawas a tamdaw, halafinayto ko tatokian a mitala to kalahcian noniya lekakawa. I pinengneng no tamdaw, hato manayaray ko Kawas palaˈosi to mikiˈokan no Niyah. Kawra, cipinangay ci Yihofa to nafalocoˈan no finawlan Ningra. Na mikiˈokan Ningra ko pairasolay ci Hapakuk: ‘Wa itini i misaˈosian a tatokian malaˈosi ko mapolosi, pasayra i tolas a talaˈayaw, cowa ko makaniway. Soˈlin hato manayarayto i, halamhamenho a mitala! Samanen wa malaˈosi maemin, cowa ko mamanayar ko romiˈad!’ (Hapakuk 2:3) Itini sakayat no Kawas, misaka dademakan no tarokos ci Pawlo konini a sowal, pakalalok to halamhamay a mitala to faelohay hekal a Krisciyang. (Hipray 10:37) Oniya sapairasol cowa ko pipasowal aca ci Hapakukan, mikiˈokayho ko Kawas kitanan maemin. Mansa pakasoˈlinay kita to mamilidong ko Kawas kitanan, ano hato manayaray konini a sakiˈok nengnengen, wa ‘malaˈosi maemin, cowa ko mamanayar ko romiˈad!’ w23.04 30 fiedac 16 fatac

Soˈlin ihkalay mahapinang ko wacay, o ˈalomanay Israil tamdaw kamayan caay pihakelong to pakaynian ni Yihofa ci Mosian a sakayat cangranan. (Saˈosi 14:10, 11) Misaliyaliyaway cangra miliyang to pikerid ni Mosi, telocto oya lintaday a Israil tamdaw cowa ka ngaˈay micomod i Mikiˈokan no Kawas to sapafeli cangranan a Sera. (Saˈosi 14:30) Kawrira, o romaroma Israil tamdaw mihakelongay to sakayat ni Yihofa, ci Kalip o masalalomaˈay a cecay. Sowal ni Yihofa: ‘Ci Kalip . . . mieminay to falocoˈ mieminay to harateng a mikotod Takowanan.’ (Saˈosi 14:24) Mipalifonan ni Yihofa ci Kalip, pafelianho ci Kalip to kaolahan ningra a pala i Kanan. (Yosuwa 14:12-14) O faelohay a kasarayray no Israil tamdaw mihakelongay to sakayat ni Yihofa. Mikotayay ci Yosuwa ci Mosian a mikerid cangranan, ikor padadotocay cangra mikangodo ci Yosuwaan. (Yosuwa 4:14) Telocto palemedan ni Yihofa cangra, pafeli cangranan to mikiˈokan i lalitengan nangra a pala.—Yosuwa 21:43, 44. w24.02 21 fiedac 6-7 fatac

O ising pakayniay i pikinsa to tatemik no safak, cacipinang to falocoˈ no tireng tanoktokay hokira. Malecaday, hapinangen hakowaay ko olah ita to salikaka, o mamafanaˈ to hakowaay ko olah ita to Kawas. Ano mahapinang ita mafasawayto ko olah ita to salikaka i, o paihkalay konini, o olah ita to Kawas maˈesalayto alatek. Kawra ano mararid kita patalahkal to olah i salikaka i, o mamahapinangto ita o olah no niyah to Kawas kamayan a tangongol. Ano maˈesalayto ko olah ita to salikaka i, ka pinaˈon. Misamaanay hani? Samanen paihkalay koni to miraayayto kita ci Yihofaan. Patalipaˈelalay ko tarokos ci Yohani kitaanan: ‘O cima ko cowa ka olah to maˈaraway a salikaka i, caay ka olah to cowa ka ˈaraw a Kawas.’ (1 Yohani 4:20) Mananamay ita ko maanan hani? Ano ‘masasiolah’ kita i, o mamihayda ci Yihofa kitaanan.—1 Yohani 4:7-9, 11. w23.11 9 fiedac 5-6 fatac

Kaemangho ci Yoas awaayto ko wama, kawra madimadiay a Sakakaay Saysi ci Yihoyata midimokosay cingranan, malecad o wawa no niyah, pasifanaˈ cingranan midoko ci Yihofaan. Mitengilay ci Yoas to sapasifanaˈ ni Yihoyata, mansa citaneng ko misaˈosian, mikayat to finawlan midoko ci Yihofaan, mitomadawayho to fangcalay sefi ni Yihofa. (2 Rayray 24:1, 2, 4, 13, 14) Ano pasifanaˈ ko wama wina anca matoˈasay tisowanan maolah ci Yihofaan ato midofdof to palinian Ningra i, o micadaay kiso to cecay kalimlaan a sapatelong. (Taneng 2:1, 10-12) Adihayay ko pakayraan no wama wina pasifanaˈ to wawa. Ano mitengil kiso to mikitiniay i Fangcalay Cudad mihadakan a sapaini no wama wina, o mamahemek cangra. Kalimlaan i, papakahemek kiso to Kawas, patireng to tahadaˈocay tanektekay a kalawidang Cingranan. (Taneng 22:6; 23:15, 24) Maharateng konini, makalimay kiso sapitodongaw to kaemangayho a Yoasan han? w23.09 8-9 fiedac 3-5 fatac

Mikiˈokay ci Yihofa o mamitengil to satolon no mita. Maolahay ko Kawas to madimadiay midoko Cingranan a tamdaw, mansa oha tatengilen Ningra ko satolon nangra. (ˈOlic 10:17; 37:28) Kawrira, ano o maanto ko micangacangan ita, papafelien Ningra kita cowa ka saan. O micangacangan ita a pina a demak, tahirato i faelohay hekal ngaˈ malaˈosi alatek. Sasinanoten ni Yihofa ko micangacangan ita samaanay ko kalaliting to araaw Ningra. (Isaya 55:8, 9) O araaw Ningra i, micadaayho to pikowan Ningra a tamdaw aitini i cikiw a maˈorip, lipahak, makakedec cangra midoko Cingranan. Kawra, o tamdaw ko mikowan to niyah aikaka ko nika ngaˈay sanay ko sowal ni Satan. (Satapangan 3:1-5) Toha sapisawacayaw to mangah ko sowal ni Satan, pasalatan ni Yihofa ko tamdaw mikowan to cecay a liyad. Nikawrira, mahaenay noka pikowan pairaay to adihayay pasangar no tamdaw. (Patnakay 8:9) Mafanaˈay kita cowa ko papalahdawen ni Yihofa nohatini konini a pasangar. w23.11 21 fiedac 4-5 fatac

Mikiˈokay ci Yihofa, o kasafinacadan mamikitini ci Aprahaman a milifok to sapalemed. Kawrira, 100 ko mihecaan ni Apraham, 90 ko mihecaan ni Sara i, onini a mikiˈokan no Kawas kamayan cowaho ka malaˈosi. Kitinien i pinengneng no tamdaw, ci Apraham aci Sara caayto ko mamahofoc to wawa. Pakaynien ci Aprahaman ko sowal, onini a demak tada milifetay to pakasoˈlin no falocoˈ ningra. Kawrira, ci Apraham ‘kamayan mikitini i tokel, pakasoˈlin to mamalo wama no ˈalomanay a finacadan.’ (Loma 4:18, 19) Salikor malaˈosiayto ko mitokelan ni Apraham! Mahofocayto to halafinay talaen a faˈinayan a wawa ci Isakan. (Loma 4:20-22) O ngangaˈay kita matira ci Aprahaman, milifok to pihayda no Kawas, o moecelay tamdaw han Ningra minengneng ato malawidang Ningra. Mankora, sanay ci Pawlo: ‘“Malo o moecelay tamdaw” saan a sowal i, cowa ko pakayraay aca [ci Aprahaman] a tiliden. Ano ngangaˈay kita malo o moecelay tamdaw hananay, onini a sowal pakayniay kitanan ko sapitilid, samanen pakasoˈlinay kita to Kawas, pasoˈlinay to patikolanto Ningra a paˈorip ko tatapangan ita ci Yis Kristo.’ (Loma 4:23, 24) Matira ci Aprahaman, ira ko pakasoˈlinay falocoˈ ita, ato midemakan, pairaayho to hatokel. w23.12 7 fiedac 16-17 fatac

Ano pakayniay i malifaay a sapalifet a makokiˈen kiso, haratengen mafanaˈay ci Yihofa to malifaay iso ko maanan nohatini, hanaca ihkalay mafanaˈ to samaanay ko falocoˈ iso. Tinakoen itini Icip ko Israil tamdaw i, maˈaraway ni Yihofa ko macadaay nangra a saroero, hanaca ‘ihkalay mafanaˈ to roray nangra.’ (Kasadakan 3:7) Nikawrira, ano tahalifa kiso to katalawan a sapalifet i, alatek cowa ka hapinang to midamaay ci Yihofa tisowanan. Mankora, tolonen Cingra padama tisowanan pakahapinang toninian. (2 Hongti 6:15-17) Ikor saharateratengen: Iraay ko maanan a kimad i saˈopo anoca sapacaˈof no salikaka paˈicelay tisowanan han? Iraay ko maanan a mitepangan a cudad, maanan a ika anoca maanan a JW Tilifi Radiw pakalalokay to falocoˈ iso han? Iraay ko cima pasowalay tisowanan anca paladaˈay to cecay sinael, masayaren ko falocoˈ iso han? Alatek malawaay ita ko patalahkalan no salikaka kitanan a olah, ato malawaay ko naitiniay i sapahaled to pakasoˈlinay falocoˈ a kakaenen a sapakalalok. Kawrira, onini sahtoay o nipafelian ni Yihofa kitanan a kalimlaan a sapatelong. (Isaya 65:13; Marko 10:29, 30) Onini a sapatelong misawacayay to tada ciharatengay ci Yihofa tisowanan, o ngangaˈay a tadiˈecen no miso.—Isaya 49:14-16. w24.01 4-5 fiedac 9-10 fatac

ˈAyaw no patikol tayra i kakarayan i, palimoˈotan ni Yis ko nisawawaan ningra ‘itini i Yirusalim, Yutiya, Samariya, tahira i samaraayay a pala’ misawacay cingranan. (Dmak 1:8; Luka 24:46-48) Caka halafin ikor, o ˈaˈideman no pihakelongan no Yutaya mirepetay to tarokos ci Pitiroan aci Yohanian, patayra cangranan i Lomaocay, halo patalaw cangranan, mikeceng cangranan a mitosil. (Dmak 4:18, 21) Sanay ci Pitiro aci Yohani: ‘Midofdof tamowanan eca ka pidofdof to Kawas, o matatodongay i pinengneng no Kawas hokira, o kamo ko mamisaˈosi! Kawra o manengnengay matengilay niyam a demak, cowa ka ngaˈay mihawad a pasowal.’ (Dmak 4:19, 20) Matedal ci Pitiro aci Yohani ikor, makelecay malacecay ko falocoˈ no nisawawaan mitolon to Kawas, micangacang to Kawas padama cangranan mitoor to araaw Ningra a midemak. Pacaˈofan ni Yihofa konini a mikifalocoˈay a satolon.—Dmak 4:31. w23.05 5 fiedac 11-12 fatac

Makakapot ci Yihofa aci Yisan tada halafinayto. Itini koˈedaway a tatokian, mapalahadayto nangra ko tangongolay noka makakaolah. Ngaˈayay itini aniniay a sinael maˈosi ita, to samaanay ci Yihofa patalahkal to olah Ningra ci Yisan. Na ngangaˈay ci Yihofa misakantang ko sowal: “O mihaydaan Ako a tamdaw cingra” wa saan. Kawra halamhamay Cingra to sakafanaˈaw ita to hakowaay ko kaolah Ningra ci Yisan, mansa saan ko sowal Ningra: ‘O Wawa Ako konini, o kaolahan Ako.’ Malikoan nanay ci Yihofa ci Yisan, pakayniay to lalahcien ni Yis a demak a malikoen Cingra. (Ifiso 1:7) Cowa ka cisasa ci Yis to olah no Wama cingranan. Itini kemod no falocoˈ ningra, misasoˈlinay a matinako no falocoˈ ningra konini a olah. Mihaenay haw i, kinapinapinaay pasowal cingra to maolahay ko kakarayan a Wama cingranan.—Yohani 3:35; 10:17; 17:24. w24.01 28 fiedac 8 fatac

Haratengen hena, misakaretengan iso a tamdaw pasowalay i tao to milikafay tisowanan a sowal. Onini a sowal cowa ko soˈlinay, kawra pakasoˈlinay ko roma tamdaw. Mangalefay i, onini a mangah mayakayakayto, telocto i, ˈaloman ˈalomanayto ko pakasoˈlinay a tamdaw. Samaan ko piharateng iso hani? Maedeng o mamasomad ko harateng iso, hatiraay han? Oniya tinakoan padamaay kitanan cipinang, ano mapalak ko fangcalay ngangan ni Yihofa i, samaanay ko harateng Ningra. O cecay ˈadingoan ko tireng a wawa Ningra itiniay i ˈaˈayaw no saka cecay fafahiyan ci Ifaan mipaoraf Cingranan, pakasoˈlin sanay ci Ifa. Telocto cingra ato faˈinay malacafayay mitowakang ci Yihofaan, mikitiya misatapang o polong a tamdaw mafakecayto no raraw ato patay. (Satapangan 3:1-6; Loma 5:12) Pakayniay i piyakayak ni Satan to mangah pakayni ci Yihofaan, mansa oniya hekal matomesay ko adihayay a pades, tada pakarorayay to tamdaw. Mapaoraf ci Yihofa, maˈarawho ko pairaan no mangah a pades i tamdaw, samaanay ko harateng Ningra hani? Maedeng adadaay ko falocoˈ Ningra. Kawra, cowa ka padadotoc a masofaw ko harateng Ningra. Soˈlinay haw i, kamayan Cingra o ‘lipahakay a Kawas.’—1 Timoti 1:11. w24.02 8 fiedac 1-2 fatac

Sasamaan kiso mitodong ci Yosifan, misetek to falocoˈ madimadi ci Yihofaan hani? Nohatiniho ngaˈayto kiso miharateng ano micada to sakayhid i, sasamaan ko pidemak. Ka padadotoc misaˈicel, minanam tangsol minaˈay to sakayhid, eca ka pidemak to kapiliˈan ni Yihofa a demak, ano o piharateng aca caay ka ngaˈay. (ˈOlic 97:10; 119:165) Ano mihaen, tahacada kiso to sakayhid cowato ko mamangiyangi. Mafanaˈayto kiso mahelaay no niyah ko soˈlinay kimad alatek, hanaca makalim sapisarocodaw midoko ci Yihofaan, kawra matalawayho kiso patafang to tireng micada to paputisem. Ano mahaenay i, todongen ko Hongti ci Tafiti, micangacang ci Yihofaan: ‘Kawasaw, nanay kinsaen kako, cipinang to nafalocoˈan ako, nanay palifeten kako, cipinang to cariraw ako. Nanay hapinangen ko falocoˈ ako iraay ko mararaway a harateng hokira, nanay kayaten kako romakat to midaˈocay a lalan.’ (ˈOlic 139:23, 24) Pasayra kiso i patafangay to tireng micada to paputisem a patosokan padadotoc misaˈicel, paihkalay koni to ‘mikifalocoˈay kiso micangacang’ ci Yihofaan. O papalifonen ni Yihofa ko mahaenay a tamdaw.—Hipray 11:6. w24.03 6 fiedac 13-15 fatac

Mitaypiyaway to finawlan ko sakakaay saysi i kaˈayaw no Kawas. Tiya mapatireng ko fangcalay kopang i, mapanilnilay ni Yihofa ci Aron malo saka cecay a sakakaay saysi no Israil. Kawra matira o sowal no tarokos ci Pawlo: ‘Madadotodotocay a mala saysi ko ˈalomanay tamdaw, tona mamapatay cangra, cowa ka ngaˈay a midaˈoc mala saysi.’ (Hipray 7:23-26) Roma i, orira sakakaay saysi sahtoay o cowa ka lefot a tamdaw, misaaliay to sapatoˈayaaw pakayni i raraw no niyah. Mihaenay i, o sakakaay a saysi no Israil ato tadamaanay Sakakaay Saysi ci Yis Kristo tada taˈangayay ko nika sasiroma. O Sakakaay Saysi no mita, ci Yis Kristo ‘itiniay i soˈlinay fangcalay kopang . . . a matayal. Onini a fangcalay kopang oni Yihofa a mipatirengan, cowa kono tamdaw.’ (Hipray 8:1, 2) Sanay ci Pawlo, ci Yis ‘o midaˈocay a maˈorip, cowa pisaali to mamikotay cingranan a tamdaw mala saysi.’ Roma i, ci Yis ‘awaay ko patelac, cowa ka lecad to ciraraway tamdaw,’ ‘cowa ka lecad to romaroma sakakaay saysi patoˈaya to romiˈamiˈad.’ w23.10 26 fiedac 8-9 fatac

‘Iˈayaway kakarayan’ mitoroˈan i, o mafiyoray ni Satan ato tatiihay coyoh a sifo no tamdaw. (Matay 4:8, 9; 1 Yohani 5:19) Itini Fangcalay Cudad, o ‘sera’ hananay i, latekay o tamdaw ko mitoroˈan. (Satapangan 11:1; ˈOlic 96:1) Mihaenay haw i, ‘iˈayaway sera’ o aniniay tatiihay a tamdaw no hekal ko mitoroˈan. Ci Yihofa cowa aca ko mamisalof anca mitapid, ao sasahcien a palaˈafo ko aniniay a ‘kakarayan’ ato ‘sera.’ Tatano ‘faelohay kakarayan faelohay sera,’ oyanan faelohay a sifo ato faelohay a likakawa no tamdaw, mamikotay to aniniay a ‘kakarayan’ ato aniniay a ‘sera.’ O sasafaelohento ni Yihofa ko cikiw ato tamdamdaw, patikolto a malefot. Mahecad to sapaliˈayaw ni Isaya, polong a cikiw mamatiya to isaˈayaway a Itin a pala. Mamalefotto ko kahacecay a tamdaw, mapiˈiway, mapohaway ato madoˈengay tamdaw wa maadahto maemin, ano mapatayayto a tamdaw papatikol a maˈorip.—Isaya 25:8; 35:1-7. w23.11 4 fiedac 9-10 fatac

Wa fahal sa ira ko ‘taˈangayay padiing.’ (Matay 24:21) Kawra cowa ka lecad to adihayay a pades, ano irato ko taˈangayay padiing i, iraayto ko maherekayto a misaday a tamdaw. Maedeng ˈayaw no 2,000 miheca, patalipaˈelalanto ni Yis ko nisawawaan papisongilaˈ a misaday. Ano masongilaˈto ita a misaday i, o mamadoloto milakowit tora pasangaray a lintad, wa ngaˈayho mipadang to tao. (Luka 21:36) Ano sapidofdofaw kita ci Yihofaan, oha mamihadidi, pakasoˈlin Cingranan mamidipot kitaanan. Itiya, ano malahdaw ko dafong no salikaka i, mamisamaanto kita hani? (Hapakuk 3:17, 18) Ano sapitangsolaw mipadang cangranan i, ira ko siniˈadaay falocoˈ. Ano makakapot ko kasakitakit miˈodis kitaanan i, latek oha kakalacafay kita to salikaka milimek to cecay a liyad, itiyato i, mamisamaan kita misiˈayaw to mahaenay a pakayraan hani? (Icikil 38:10-12) Ano sapikalacafayaw kita cangranan milakowit to pasangar i, papairaen ko ciolahay falocoˈ. w23.07 2 fiedac 2-3 fatac

Itini saka 1 hahekalan, maolahay ko ˈalomanay salikaka ci Akuilaan aci Priskilaan, o ciraramoday a tamdaw ngaˈayay minanam tonini mararamoday. (Loma 16:3, 4) Malacafayay cangra matayal, mitosil, malacafayayho mipadang to tao. (Dmak 18:2, 3, 24-26) Soˈlinay haw i, ano masowalho no Fangcalay Cudad konini mararamoday i, masowalayto ko ngangan nangra tatosa. O ciramodayto a tamdaw ngaˈayay misamaan mitodong cangranan hani? Saharateratengen o maanan ko dademaken namo tatosa, o romaroma tayal ngaˈayay kamo malacafay a midemak, caka pisiwatik a dademak han? Tinakoen, malacafayay ci Akuila aci Priskila a mitosil, kamo ngangaˈay malacafay milimasmas to toki mihaen to demak han? Ci Akuila aci Priskila malacafayayto a matayal, soˈliˈlin o tayal no miso caay ka lecad tono ramod alatek, kawra ngaˈayay kamo malacafay dademak tono lomaˈ a tayal han? (Patnakay 4:9) Ano madadama kamo i, malecaday o makakapotay kamo, irato ko toki misacaciyaw to tihi. w23.05 23 fiedac 10-12 fatac

Kahacecay tamdaw nolatekay iraay ko katalawan. Tinakoen, tiya sapipatayaw ko Hongti ci Sawlo milepel cingranan i, milaliway tayra i niyaroˈ no Filistin a tamdaw i Kat. Kawra, o hongti no Kat ci Akis kalikiay a pakahapinang ci Tafitian oya ciˈicelay a sofitay no Israil tamdaw, samanen na mipatayay ci Tafiti to ˈalomanay Filistin a tamdaw. Teloc i, ci Tafiti ‘tada matalaway to hongti no Kat ci Akisan,’ caay ka fanaˈ to sasamaan ci Akis micada cingranan. (1 Samuil 21:10-12) Mihaenay haw i, samaanay ci Tafiti milowid to makokiˈay a falocoˈ hani? Itini ˈOlic saka 56 fedengan, mihadakay ci Tafiti to nafalocoˈan ningra tiya itini i Kat cingra. Ihkalay pasowal to tada matalaway cingra itiya, kawra somowalay to samaanay miremo cingra to ˈangi. Ta matalaw cingra i, mitiˈeray ci Yihofaan. (ˈOlic 56:1-3, 11) Cowa ka patoleden ni Yihofa cingra. Itini sakayat ni Yihofa, maharatengay ni Tafiti ko cecay mikiriwiˈay a hapakayraan, misasingkisingkiay cingra. Nohatini, tada o kaˈesaman ni Akis minengneng ci Tafiti, awaay ko katalawan sanay cingra. Telocto i, milaliwayto ci Tafiti.—1 Samuil 21:13–22:1. w24.01 2 fiedac 1-3 fatac

Aniniay sinael o cima ko mitoroˈan hani? O patikolay maˈorip manilnilay no fangcalay saocor a Krisciyang cangra. O polong manilnilay no fangcalay saocor a Krisciyang masaˈopoto tayra i kakarayan ikor, salakatay hademak nangra o mamilood. Patikol maˈorip cangra tayra i kakarayan ikor, wa malacafay ci Kristoan ato coyoh itini i salikoray a lalood palaˈafo to ˈada no Kawas. Haratengen hena, o romaroma manilnilay no fangcalay saocor a Krisciyang nohatini matoˈasayto, tada malonayayto ko tireng. Kawra patikol maˈorip cangra i kakarayan ikor, tangsolay malo taˈangayay ko ˈicel, tahadaˈoc caayto ka patay a ˈadingoan a tireng. Wa malacafay to Hongti ci Yis Kristo a milood. Mahererek ko Armakiton a lalood i, wa malacafay cangra aci Yis mikayat to tamdaw palidlid sa patikol malefot. Awaay ko hasasa, tayra cangra i kakarayan o midemakan saki kaolahan nangra a salikaka, ikakaay ko nika adihay to midemakan nangra i fafekangho no sera, samanen nohatini caayto ko cowa ka lefot a kalo tamdaw cangra. w24.02 6-7 fiedac 15-16 fatac

Romaroma tamdaw iraay ko tatodong patafang to tireng micada to paputisem, kawra manayaray eca ka pidemak. Alatek matalaway cangra ikor no micada to paputisem pakayni kapakidem no raraw a mafalah no kasakopang. Ano iraay ko mahaenay a sasa no harateng iso, aka calemcem, papafelien ni Yihofa ko kihcod a saali iso, padama tisowanan ‘matatodong ko waywayan i falocoˈ [Ningra], maamaan a demakan palipahak Cingranan.’ (Kolosay 1:10) Papafeliho Cingra to ˈicel tisowanan, ho ngaˈay kiso midemak to matatodongay a demak. O nalifetan no ˈalomanay tamdaw misawacayay mamihaen ko demak ni Yihofa. (1 Korinto 10:13) Soˈlinay haw i, o mafalahay a tamdaw cowa ka ˈaloman. Ira ko sapadama ni Yihofa, o ngangaˈay madimadi ko finawlan Ningra i Cingranan. O kahacecay cowa ka lefot a tamdaw iraay ko macadaay a sakayhid. (Yakop 1:14) Nikawrira mamarefong i sakayhid hokira o ngangaˈay kiso ko mipiliˈ. Sakoniya sowal, edengan kiso ko mamisaˈosi sasamaan ko kaˈorip no niyah. Sowal no romaroma tamdaw cowa pakaˈimer to macalohay harateng sanay, kawra oha ngangaˈay kiso minanam miˈimer to coos no harateng. w24.03 5 fiedac 11-12 fatac