Saka 8 Folad

Tosaay ko kalimlaan nonini sinael: (1) Tatahapades ko moecelay tamdaw. (2) Mamilidong ci Yihofa kitanan paliyas to sapalifet. Sasamaan ci Yihofa milidong kitanan hani? O cecay pakayraan i, papadama kitanan ira ko matatodongay noka pinengneng to kaˈorip itini tonini hekal. Na mikiˈokay ci Yihofa, o lalipahak kita midoko Cingranan, nikawrira nohatiniho o aawa ko cariraw no kaˈorip cowa ka saan Cingra mikiˈok. (Isaya 66:14) Pamoteken kono ikoran a tokel sanay palimoˈot Cingra kitanan, samanen noikor i, o mamahaen kita to halamhaman Ningra maˈorip kita tahadaˈoc. (2 Korinto 4:16-18) Nohatini, padamaay Cingra to romiˈamiˈad kitanan, ho ngaˈay kita pakahadidi miemem. (Radiw no mararomay 3:22-24) Mikitini i nolitengan ato aniniay madimadiay sikawdan ngaˈay kita minanam to maanan hani? Mamalifa no tamdamdaw ko talifahal sanay a pasangaray, kawra ano tadiˈecen ci Yihofa, o mamalifok ko sapadama Ningra.—ˈOlic 55:22. w23.04 14-15 fiedac 3-4 fatac

Ci Yosif aci Mariya itini cowa ko kadepocan a pakayraan i, kamayan makahi midofdof to cifadangalay no hekal, ngaˈayay nanamen ita ko taˈarawan nangra. (Luka 2:1-6) Cipoyapoy ci Mariya maedeng 9 folad i, hongti no Loma ci Aukustus milasilay to sarikec, misaali to polong finawlan no kitakit minokay i nalacolan mitingki to ngangan. Tada miafaday ci Yosifan aci Mariyaan konini, samanen raromakat cangra to 150 kongli tayra i Piclihim mitingki, macokacokayho ko lalan i lotok. Pakayni ci Mariyaan tada o karorayan konini. Cingra ato itiyaday a wawa wa ira ko katalawan han? Itini fatad no lalan ano mahofocto ci Mariya samaanto hani? Ora poyapoy ningra o mamalo Misiya noikor! Pakayni tonini ci Yosif aci Mariya o cacalemcem alatek. Wa hawad sato cangra midofdof to sifo wa ngaˈay han? Soˈliˈlin iraay ko lalangian ni Yosif aci Mariya calemcemen, nikawrira kamayan cangra midofdof to sifo. Mihaenay hato palemedan ni Yihofa cangra, cowa ko karihaked aca ni Mariya tahira i Piclihim, mahofocayho to tanektekay a wawa. Hato malaˈosiayto ko sapairasol no Fangcalay Cudad!—Mika 5:2. w23.10 8 fiedac 9 fatac; 9 fiedac 11-12 fatac

Ano haharateng han iso to papacaˈof i, marawrawto ko falocoˈ, sasamaanto hani? Songilaˈen a misaday, wa padama tisowanan. (Taneng 21:5) Ano macalep iso cipinang to lalakaw no saˈopo i, ano pacaˈof to salicay cowa ito ko mamarawraw. O roma i, apotoˈen ko sapacaˈof. (Taneng 15:23; 17:27) Ano cecay tosa aca ko sowal, cowa ito ko mamarawraw kiso. Apotoˈen tano niyahen a sowal pacaˈof to salicay, paihkalay konini to ngaˈayay ko pisaday iso, macalepay a cipinang to lalakaw. Ano mitanamanto iso ko pina pakayraan ikor, marawrawho ko falocoˈ alatek, cecay tosa aca ko mapacaˈofay, sasamaanto aki? Hamaan tatiih ko falocoˈ, ano misaˈicelto kiso, mamahemekto ci Yihofa. (Luka 21:1-4) Aka mapawan, o saali ni Yihofa o pisaˈicel aca iso, ao cowa ka papidemak tisowanan to mitaˈlifay to ˈicel no niyah a demak. (Filipi 4:5) Saharateratengen o maanan ko mamadangar iso, ikor patireng to cecay patosokan, hanaca cangacangen ci Yihofa padama tisowanan eca ka marawraw ko falocoˈ. Satapang i, o patosokan iso ngaˈayay kinacecay aca pacaˈof to apotoˈay a sapacaˈof. w23.04 21 fiedac 6-8 fatac

Patinakoan no tarokos ci Pawlo kita to micaˈedongay to kihcod rikoˈ no sofitay, padadotoc a talipaˈelal. Itini kalaloodan, ano hacowato oha mamisaday ko sofitay milood. Malecaday, pakayni to romiˈad ni Yihofa micerid kita a misaday, eca ka mahokaˈ. Micaˈedong to pakasoˈlinay falocoˈ ato olah a sapatada to falohang, misakafong to hatokel a kafong. Malecad o sapatada to falohang mamidipot to falocoˈ no tireng no sofitay, o pakasoˈlinay ato ciolahay midipotay to kemod no falocoˈ ita, padama kitanan padadotoc midoko to Kawas ato mikotod ci Yisan. Ira ko pakasoˈlinay ita i, o papasoˈlin to palifonay ci Yihofa to misarocoday micangacang Cingranan a tamdaw. (Hipray 11:6) Ira ko pakasoˈlinay ita i, o mamadimadi to ˈAˈideman ci Yisan, soˈlinto misiˈayaw to sapalifet cowa ko mamisafelit cingranan. Anini, ˈalomanay salikaka soˈlinto misiˈayaw to hakokay anca cangoˈot to sakaˈorip, kamayan mitawmec to madimadi. Ano todongen ita cangra i, wa mapaˈicel ko pakasoˈlinay falocoˈ, miremo to pasangar. O ˈalomanay salikaka isalakatay micangacang to Hongti Kitakit misakantang to kaˈorip. Todongen ita ko taˈarawan nangra wa ngaˈay paˈicel to pakasoˈlin, caka pitiˈer to pakadafongay. w23.06 10 fiedac 8-9 fatac

O miˈimeray to niyah i, iraay ko ˈicel miemet to harateng ato pidemak. Ano sapalaˈosiaw to patosokan i, mamiˈimer kita to niyah, mangalefay ano pasangaray a malaˈosi ko patosokan, anoca awaay ko micikelohay a ˈicel ita i, tada mamiˈimer to niyahan. Haratengen, o miˈimeray to niyah i, o cecay a minaroˈan no fangcalay saocor. Mankora, cangacangen ci Yihofa pafeli to fangcalay saocor padama tisowanan palahad tonini masakalimlaan a capeling. (Luka 11:13; Kalatiya 5:22, 23) Masadayto ko kihcod ngaˈ miteka a midemak, aka ka saan. Onini a hekal awaay ko malefotay a pakayraan. Ano tatala han ita ko mahaenay a pakayraan i, cowa ito ko mamalaˈosi ko patosokan. Ano cangoˈot kita to micikelohay a ˈicel, alatek pasangaray a palaˈosi to patosokan. Ano mahaenay kiso i, ngaˈayay folfolen a misamiming ko patosokan han? Tinakoen, o patosokan iso ano sapalahadaw to maanan a capeling, tanamen itini mimingay a demak patalahkal tonini a capeling. O patosokan iso ano sapihaeminaw kiso miˈosi to Fangcalay Cudad i, saˈayaw tanamen a miˈosi ko miming aca. w23.05 29 fiedac 11-13 fatac

Itini salikoray ˈawaled, pakaynian ni Yihofa i likakawa Ningra padadotoc mihadak to sapahaled to pakasoˈlinay falocoˈ a kakaenen, padama kitaanan maemin padadotoc a romakat to “Makoracay a Lalan.” (Isaya 35:8; 48:17; 60:17) Ngaˈayay haenen ita ko sowal, misatapangho minanam ko tamdaw to Fangcalay Cudad i, ngaˈayayto a romakat tonini “Makoracay a Lalan.” Romaroma tamdaw mimingayho ko mirakatan, miliyasayto tonini a lalan. O romaroma tamdaw misetekay to falocoˈ padadotoc a romakat, tangasa i kahiceraan. Icowaay ko kahiceraan hani? Pakaynien ko sowal i tatayra i kakarayan ko kaˈorip a Krisciyang, o “Makoracay a Lalan” mamikerid cangranan micomod to ‘lakoing no Kawas’ i kakarayan. (Paˈarawan 2:7) Pakaynien ko sowal i sakitini fafekang no sera tahadaˈoc maˈorip a Krisciyang, wa itini cangra kahererekan no Pikowan ni Kristo to Comaˈol Miheca tangasa i kahiceraan, itiya malo malefotayto a tamdaw cangra. Ano romakatay kiso nohatini tonini a lalan, aka a pasilikor a minengneng, aka a miliyas, ka padadotoc a romakat, tangasa i faelohay hekal. w23.05 17 fiedac 15 fatac; 19 fiedac 16-18 fatac

Haratengen ko kihcod midemakan ni Yihofa pakayni tisowanan, makalimayto kiso sapatafangaw to tireng ci Yihofaan. (ˈOlic 116:12-14) Sowal no Fangcalay Cudad, ‘masakenakenaay a fangcalay a sapatelong, masakenakenaay a malefotay a sapalifon’ sahtoay mikitiniay ci Yihofaan. (Yakop 1:17) Itini sapafeli ni Yihofa tisowanan a sapatelong, sakakaay kalimlaan i, o sapatefoc. Kinafalahan Ningra ko Wawa Ningra ci Yis, padama tisowanan ngaˈay mala widang Ningra, iraho ko tokel tahadaˈoc maˈorip. (1 Yohani 4:9, 10) Pakaynian ni Yihofa i sapatefoc paihkal to kasapaan a olah tisowanan, pafeliayho tisowanan to romaroma sapalemed. Miakoˈiday kiso Cingranan, mansa makalim patafang to tireng Cingranan.—Limoˈot 16:17; 2 Korinto 5:15. w24.03 5 fiedac 8 fatac

Maˈaraw ita ko kapelal no waywayan nonini a hekal, malecaday ko nafalocoˈan toya moecelay a Lotoan. Maˈaraw ningra ko ‘cowa pitoor to sarikec a tamdaw kaacekan ko waywayan, tada adadaay ko falocoˈ,’ samanen mafanaˈay cingra ˈintehay ci Yihofa to tatiihay a waywayan. (2 Pitiro 2:7, 8) Samanen mangodoay ato maolahay to Kawas, cowa ka pahecad ci Loto to italiyokay a tamdaw, misaka dademak to malafoay a palinian nangra. Anini, italiyokay ita a tamdaw cowa pikangodo to palinian ni Yihofa. Kawra, ano padadotoc kita maolah to Kawas, palahad to mikangodoay Cingranan a falocoˈ, oha ngangaˈayto mitoor to ˈakawangay palinian no waywayan. Tada maolahay ci Yihofa kitaanan, sapadamaaw kitaanan, pakaynian Ningra i Taneng pafeli to sapakalalok kitaanan. Polong a Krisciyang, ano faˈinayanto fafahiyan malitengay kaemangay, ngaˈayay mikitini i citanengay a sowal no sinael milifok to epoc. Ano mikangodoay kita ci Yihofaan papatalipaˈelal to niyah, eca ka paˈading to mararaway waywayan no niyah. w23.06 20 fiedac 1-2 fatac; 21 fiedac 5 fatac

Alatek tatahasiˈayaw kiso to pisafelit no paro no lomaˈ, anoca pakayni to sapisalakataw micangacang to Hongti Kitakit no Kawas misawad to sakacihafayaw. (Matay 6:33) Ano mahaenay i, ngangaˈay pakasoˈlinen iso to mafanaˈay ci Yihofa to pikinafalah iso. (Hipray 6:10) Latek matinakoayto iso to soˈlinay ko nano sowal ni Yis, sowal sa cingra: ‘O tamdaw ano pakayni i takowanan ato ngaˈayay lihaf, misawad to lomaˈ, faˈinayan salikaka, fafahiyan salikaka, wina, wama, wawa anoca omah, ano aniniho mamicada to simoˈot a camahaw a lomaˈ, faˈinayan salikaka, fafahiyan salikaka, wina, wawa, omah, o tatahalifaho to hakokay, itini i noikoran a likakawa mamilifok to midaˈocay a ˈorip.’ (Marko 10:29, 30) O malayapay iso a sapalemed mataˈlifay ko kinafalahan iso.—ˈOlic 37:4. w24.03 9 fiedac 5 fatac

Isaka 1 hahekalan, pakidemay ko kedal itini Yutiya. Itiniay Siriya Antiyok a kasakopang mitoor to ˈicel no niyah pakiyaho to sadama a dafong, pafeli to itiniay i Yutiya a salikaka. (Dmak 11:27-30) Soˈlin miraayay to tahapadesay a salikaka, o itiniay i Antiyok a Krisciyang kamayan mihadak to sapadama. (1 Yohani 3:17, 18) Anini, wa ngaˈay kita pasayra i tahapadesay a salikaka patalahkal to siniˈadaay falocoˈ. Oha tatangsol kita a midemak. Samaan ko pidemak hani? Ngaˈayay licayen ko malohemay malitengay ngangaˈay kita mirienang to cecay padamaay to tahapadesay a demak hokira, wa ngaˈayho pakiyaho midama to polong no hekal a tayal, hanaca patado to tahapadesay a salikaka mitolon. Misaaliay to sapadama ko salikaka alatek, ho ira ko sakaˈorip a dafong. Nanay padadotoc kita patalahkal to siniˈadaay falocoˈ, ano ira a misawkit ko Hongti ita ci Yis Kristo i, oha mamihayda kitaanan, padama kitaanan itini Hongti Kitakit ningra maˈorip.—Matay 25:34-40. w23.07 4 fiedac 9-10 fatac; 6 fiedac 12 fatac

Mitodongay ci Yis ci Yihofaan, makahi micaˈi to tamdaw. Tayni ci Yis i fafekang no sera, ‘mamitosil to moraraway a siri finawlan no Israil,’ kawra midemak cingra toniya ˈinorong makahiay mifalic. Kinacecayay, o cecay ˈalafang fafahiyan micangacangay ci Yisan miadah to fafahiyan wawa ningra, samanen mipasemseman no tatiihay coyoh ko wawa ningra. Siniˈadaay ci Yis cingraanan, hayi sanay to saali ningra, miadah to wawa ningra. (Matay 15:21-28) Nengnengen ko roma tinakoan. Na somowalay ci Yis: ‘O cima ko cowa pihayda takowanan i kaˈayaw no tamdaw i, ano kakoto . . . , cowa ko mamihayda cingranan.’ (Matay 10:33) Kawra ikorto, kinatoloay ci Pitiro caka pihayda ci Yisan, kawra kamayan mihayda ci Yis ci Pitiroan. Misamaanay hani? Mafanaˈay ci Yis soˈliˈlinayto pasasiyor ci Pitiro, hanaca iraay ko pakasoˈlinay falocoˈ. Patikol ci Yis maˈorip patalahkalay ci Pitiroan, mifanaˈayho ci Pitiroan, maherekayto ko niyah misodod cingranan, kamayan maolah cingranan. (Luka 24:33, 34) Ci Yihofa aci Yis itini makahiay micaˈi a pakayraan patirengay to malefotay a taˈarawan. Makalimay ci Yihofa kitanan makahi micaˈi. w23.07 21-22 fiedac 6-7 fatac

O papalaˈosien ni Yihofa ko sakiˈok Ningra pakayni to Lakoing. Ano iraay ko sasa no tao toninian i, sasamaanen ita pasowal cangra hani? Saka cecay, onini sakiˈok o ci Yihofa ko misadakay. Sanay ko Paˈarawan: ‘Oya maroˈay i tadamaanay ˈanengan sanay ko sowal: “Nengnengen! Safaelohento Ako ko kihcod nohatini.”’ Ci Yihofa iraay ko taneng ato ˈicel, iraayho ko kalim palaˈosi tonini sakiˈok. Saka tosa, o misowalanho ni Yihofa to dadademaken i, o mamalaˈosi, itini pinengneng Ningra onini a demak hato mafekadayto. Mankora sa ko sowal Ningra: ‘O soˈliˈlinay konini a sowal, ngaˈayay tiˈeren. . . . Malaˈosiayto maemin!’ Saka tolo, ano mitekaho ci Yihofa to cecay demak i, o papadadotocen Ningra milahci tangasa kalaˈosian. Mankora sa ko sowal Ningra: “O Alfa Kako, o Omika Kako.” (Paˈarawan 21:6) Ikor sasongilaˈen ni Yihofa a misawacay, ci Satan ko misamangahay mamalakisaw ko misahalakaan ningra. “Mana ira ko hatiniay makapahay a demak saw?” Ano saan ko sowal no tao i, ngaˈayay ˈosien iso a mitadtad ko saka 5 ato 6 sinael, mikiˈokay itini ci Yihofa o mihayianho Ningra a demak o mamalaˈosi maemin, malecaday tano kamayan Ningra a mitilid konini a sakiˈok.—Isaya 65:16. w23.11 7 fiedac 18-19 fatac

Mihadak ci Yihofa tonini a sakiˈok i, ci Apraham 75 ko mihecaan, awaayho ko wawa. Maˈaraway ni Apraham ko nika laˈosi nonini sakiˈok han? Milakowit ci Apraham to Iufratis ˈAlo i, mitalaayho to 25 miheca, ngaˈ maˈaraway ko pidemak no Kawas to kafahkaˈan ciwawa ci Isakan. Ikor no 60 miheca i, o fofo ni Apraham ci Isau aci Yakop mihofocanto. (Hipray 6:15) Nikawrira, itini hakelong no ˈorip ni Apraham cowaho ka maˈaraw ko fofofofo ningra malo taˈangayay kitakit, cowaho ka layap ningra ko mikiˈokan no Kawas to papafelien cingranan a sera. Soˈliˈlin hatira, madimadiay a Aprahaman iraay ko tangongolay a kalawidang aci Yihofaan. (Yakop 2:23) Ikor patikolto maˈorip ci Apraham i, o mamafanaˈ cingra pakayniay i pakasoˈlinay falocoˈ ato pihadidi ningra milayap ko kasakitakit to adihayay sapalemed, lalipahakto cingra itiya. (Satapangan 22:18) O maanan ko mananamay ita hani? Alatek cowa ko tatangsol a maˈaraw malaˈosi ko mikiˈokan ni Yihofa, kawra ano matira kita ci Aprahaman a mihadidi i, o papasoˈlinen ita ci Yihofa to cowa ko papalifon aca kitanan nohatini, ikor itini faelohay hekal papafeli Cingra to mikikakaay ko nika adihay a sapalemed.—Marko 10:29, 30. w23.08 24 fiedac 14 fatac

Kaemangho ci Uciya tada misapoeneray, ‘mikangodoay to Kawas.’ O kaˈorip ningra 68 ko mihecaan, itini hakelong no kaˈorip ningra, padadotocay ci Yihofa palemed cingranan. (2 Rayray 26:1-4) Malowiday ni Uciya ko ˈalomanay a ˈada, mipaˈicelay to sapaˈading a demak no Yirusalim. (2 Rayray 26:6-15) Padamaan ni Yihofa cingra malaˈosi ko adihayay a demak, maedeng tada lipahakay cingra. (Patnakay 3:12, 13) O Hongti ci Uciya, somowal cingra to maanan, mamitoor ko tao midemak. Oranto i, ano sapidemakaw cingra to maanan haratengay sato midemak saan cingra miharateng hokira? Cecay romiˈad micomoday cingra i fangcalay sefi ni Yihofa, itini patoˈayaan a cadada mipaexiw. Mihaen ko demak ningra misafelitay to sapalimoˈot no Kawas, ˈamelasay a mitaˈlif to fadangalan ko demak ningra. (2 Rayray 26:16-18) O Sakakaay Saysi ci Acariya sapicongedaw cingranan, kawra ‘mangolaway’ cingra, telocto misayfangan ni Yihofa cingra, palonoˈan cingra. Adihayay mihecaan, padadotocay ci Uciya madimadi ci Yihofaan, kaadayayan i, cowa ka kodait cingra tahatolas. (2 Rayray 26:19-21) Ano padadotoc misapoener cingra, maedeng cowa ko mamahecad ko teloc! w23.09 10 fiedac 9-10 fatac

Mapanilnilto no fangcalay saocor ikor, padadotocayho ci Pitiro miˈodot to dangoc no niyah. Kongyen 36 miheca, maˈaraway ni Pitiro ko cowaho picada to kerit a roma finacadan ci Kornilius mapanilnil no fangcalay saocor, onini ihkalay mahapinang to ‘cowa pisakakinih ko Kawas,’ o roma finacadan ngaˈayto micomod i kasakopang no Krisciyang. (Dmak 10:34, 44, 45) Ikor, sangaˈay sanay ci Pitiro a malacafay to roma finacadan a komaen, o mahaenay demak cowa ko mamihaen cingra isaˈayaw. Kawrira, o piharateng no romaroma Yutaya Krisciyang, cowa ka ngaˈay ko Yutaya tamdaw malacafay to roma finacadan a tamdaw komaen. Tangasa i Antiok ko mahaenay ko pinengneng a tamdaw, matalaway ci Pitiro pakararaw cangranan alatek, sawad sanayto malacafay to roma finacadan a salikaka a komaen. Misakaniway ko demak ni Pitiro sanay ci Pawlo, rikec hananay ni Pawlo cingra i kaˈayaw no ˈalomanay. (Kalatiya 2:13, 14) Soˈlin mararaw haca ci Pitiro, kamayan eca ka pisawad cingra. w23.09 22 fiedac 8 fatac

Ano sasoˈlinen iso a misinanot ko niyah i, mamahapinang iso ko pina dangoc alatek. Kawra aka a matoled, o sidaˈitay ko Tapang ita, papadamaen Ningra ikaka ko kangaˈay no pidemak iso. (1 Pitiro 2:3) Pakalalokay ci Pitiro kitanan: ‘Papilahcien ko Kawas . . . to pipahatatanam tamowanan. Papatanoktoken Ningra kamo, ciˈicel kamo, tanektek a tomireng.’ Ci Pitiro na awaay ko hatatodong ako malacafay to Wawa no Kawas sanay. (Luka 5:8) Tona cowa piliyas ci Yihofa aci Yis ci Pitiroan, padadotocay padama cingranan, hato kodaitayto mikotod ci Yisan. Salikor, mihaydaanto ci Pitiro, ‘micomod i Hongti Kitakit no midaˈocay Tapang ato Milidongay a Yis Kristoan.’ (2 Pitiro 1:11) Tada taˈangayay a sapalifon konini! Ano hatiraay kiso ci Pitiroan kodait a tahatolas, hanaca papilahcien ci Yihofa to pipahatatanam tisowanan i, o mamalifok iso ko tahadaˈocay a ˈorip malo sapalifon. O ‘mamalaˈosi ko patosokan no nika pakasoˈlin no falocoˈ a malidong ko ˈorip.’—1 Pitiro 1:9. w23.09 31 fiedac 16-17 fatac

Fangcalay kopang iraay ko cecay potal, aitini tonini miˈadipelan a kitiraan matayal ko saysi. Itira tora potal iraay ko cecay pitodohan to sapatoˈaya a fodawan a cadada, ato cecay kamonanawan a fodawan. ˈAyaw no mamidemak to fangcalay tayal ko saysi i, aitini tora kamonanawan a fodawan mikorac to niyah. (Kasadakan 30:17-20; 40:6-8) Anini, ˈayaw no tatayra i kakarayan mikapot ci Yisan a mala saysi i, oya mapanilnilay no fangcalay saocor itiniayho i fafekang no sera a Krisciyang, madimadiay cangra itini tonini noˈadingoan a lalomaˈay a potal no fangcalay sefi, matayal saki Kawas. Oya lalomaˈay a potal piparoan to nanom a kamonanawan a fodawan patalipaˈelalay cangranan, o mamitawmec cangra to makoracay waywayan ato noˈadingoan, o sasinanoten no polong Krisciyang konini. Oya ‘taˈangayay ˈopo a tamdaw’ aicowa cangra midoko to Kawas hani? Maˈaraway no tarokos ci Yohani tomirengay cangra i ‘kaˈayaw no tadamaanay kamaroˈan, romiˈad dadaya i fangcalay sefi a midoko to [Kawas.]’ O taˈangayay ˈopo a tamdaw itiniay i fafekang no sera a midoko to Kawas, itini i papotalay a potal noˈadingoan a fangcalay sefi cangra matayal saki Kawas. (Paˈarawan 7:9, 13-15) Ira ko saaroˈan ita itini matatodongay noka pidoko a limasmas, tada mamiakoˈid kita ci Yihofaan! w23.10 28 fiedac 15-16 fatac

Pakayniayho ci Yihofa i malohemay malitengay patongal to ˈicel kitanan. (Isaya 32:1, 2) Mansa, ano macariraw kiso i, o kacalemceman a demak ngaˈayay pasowalen ko malohemay malitengay. Ano padama cangra tisowanan i, aka pinaˈay kiso, pairaen ko miakoˈiday a falocoˈ micada. Pakayni i malohemay malitengay, papatanektek a paˈicel ci Yihofa tisowanan. O sapafeli no Fangcalay Cudad a hatokel o papaˈicel kitanan. Iraay ko hatokel no mita itini i fafekang no sera a lakoing anca itini kakarayan a Hongti Kitakit milayap to midaˈocay ˈorip. (Loma 4:3, 18, 19) Pakayni toninian a kalimlaan hatokel, iraayto ko ˈicel ita miemem to sapalifet, padadotoc milasil to ngaˈayay lihaf, hanaca itini kasakopang mitamorong to masakenakenaay a ˈinorong. (1 Tisalonika 1:3) Onini a hatokel padamaay to tarokos ci Pawloan padadotoc a tanektek. Sowal ningra to niyah ‘adihayay ko saroero,’ ‘cisasaay ko falocoˈ,’ ‘micadaay to sapalak,’ ‘mapolinay’ sanay. Latekay, iraay ko katalawan no ˈorip. (2 Korinto 4:8-10) Pamotekay ci Pawlo to kaˈayaway a hatokel, milifokay to ˈicel ngaˈay padotoc a mihadidi. (2 Korinto 4:16-18) Itini kakarayan milayap to midaˈocay ˈorip marariday ci Pawlo midotim tonini a hatokel, telocto ‘masafaeloh masafaelohayto’ ko falocoˈ no niyah. w23.10 15-16 fiedac 14-17 fatac

Mitolon i, ngaˈay kita miharateng, o pipacaˈofan ni Yihofa to picangacang ako a tatokian nohatini han? Halamhamay kita tangsol pacaˈof ci Yihofa to picangacang ita alatek. Nikawrira soˈlinay i, mafanaˈay ci Yihofa ihacowa padama kitanan o sangaˈayay. (Hipray 4:16) Ano cowa ka tangsol malifok ita ko micangacangan no niyah, “cowa ka ngaˈay” sanay ko caˈof ni Yihofa wa saan miharateng alatek. Nikawrira “cowaho ka raod ko toki” sanay ko caˈof Ningra alatek. Tinakoen, cecay kapah salikaka mitolonay micangacang ci Yihofaan miadah to adada ningra, kawra cowa ka ngaˈay ko tireng ningra. Ano midemak ci Yihofa to kafahkaˈan a demak, wa ira ko lalangian ni Satan somowal tonini a salikaka padadotoc cingra midoko ci Yihofaan, samanen maadahayto ko adada ningra. (Yopu 1:9-11; 2:4) Roma i, maharekayto ci Yihofa misaˈosi to toki palahdaw to polong a adada. ˈAyaw nonini, cowa ko hahalamham kita midemak ci Yihofa to kafahkaˈan a demak miadah kitanan. (Isaya 33:24; Paˈarawan 21:3, 4) Mihaenay, o ngangaˈay ko salikaka micangacang ci Yihofaan pafeli cingranan to ˈicel ato rihadayay a falocoˈ, ho ngaˈay cingra miemem to adada, padadotoc madimadi matayal saki Kawasan. w23.11 24 fiedac 13 fatac

Soˈlin pakidemay ko raraw ni Samson, kawra cowa ka pisawad cingra. Makalimay cingra sapilahciaw to patorodan no Kawas cingranan a ˈinorong, hato mikilimay to hatoki miˈodis to Filistin tamdaw. (Kakitaan 16:28-30) Micangacangay ci Samson ci Yihofaan padama cingranan miˈodis, pacaˈofan ni Yihofa ko satolon ningra, patikol to taˈangayay ˈicel ningra. Telocto, o mipatayan ni Samson a Filistin tamdaw ikakaay to isaˈayaway ko kaˈaloman. Soˈliˈlin pakayniay ci Samson i raraw no niyah mitamorong to karorayan a teloc, kawra cowa pisawad cingra milahci to sapafeli ni Yihofa cingranan a ˈinorong. Soˈlinto pakayniay noka ciraraw masalof kita anca malahdaw ko ˈinorong, aka a pisawad kita. Haratengen, cowa ko mamisawad ci Yihofa kitanan. (ˈOlic 103:8, 9) Soˈlin na mararaway kita, ngangaˈayho sakadademaken ni Yihofa, malecad ci Samsonan. w23.09 6 fiedac 15-16 fatac

Cowa ka olah ko Kawas maˈaraw kita taharoray, kawra maˈaraw Ningra kita taharoray i, kamayan madimadi Cingranan, tada mahemekan nanay Cingra. Padadotoc kiso miemem, mamilifok to pihayda Ningra. Tada o masakalimlaan konini a sapalemed! (ˈOlic 5:12) Na miememay ci Apraham to sapalifet, milifokay to pihayda ni Yihofa. O widang ni Yihofa cingra, o moecelay a tamdaw hananay. (Satapangan 15:6; Loma 4:13, 22) O ngangaˈay kita malo mahaenay a tamdaw. Mihayda ci Yihofa kitanan, cowa ko nika adihay ko katayal ita Cingranan, anoca iraay ko maanan mikiriwiˈay a saaroˈan, ao pakayniay noka padadotoc ita miemem, madimadi tahatolas. Ano hakowaayto ko mihecaan ita, ano masamaanayto ko pakayraan, anoca hakowaay ko ˈicel, kita kahacecay tamdaw oha ngangaˈay miemem tahatolas. Nohatini i, miememay kiso to sapalifet, padadotocay madimadi to Kawas han? Ano hatiraay i, aka calemcem, malifokayto iso ko pihayda no Kawas. Mafanaˈ to mihaydaan no Kawas ko niyah i, pafeliay kitanan to taˈangayay ˈicel, padama kitanan matongal ko pakasoˈlin to mamalaˈosi ko hatokel ita. w23.12 11 fiedac 13-14 fatac

O faˈinayan salikaka o maminanam ngaˈay ko kasasowal to tao. O mafanaˈay masasowal a tamdaw misamacayay a mitengil, hanaca misarocod cipinang to harateng ato nafalocoˈan no tao. (Taneng 20:5) O ngangaˈay cingra mikitini i ngihaˈ, papisingan ato kawing no tao cipinang to harateng ningra. Nikawrira, ano caka pipalak kiso to toki malacafay to tao i, caayto ka ngaˈay palahad to mahaenay a inaneng. Ano sahto han iso tano soci, pingpan tingnaw masasowal to tao i, o inaneng iso masasiˈayaw to tamdaw masasowal o mamalingad ko katatiih. Mihaenay, adihayen ko toki masasiˈayaw to tamdaw masasowal. (2 Yohani 12) O matenesay a faˈinayan salikaka o hamamafanaˈ paririˈ to niyah ato paro no lomaˈ. (1 Timoti 5:8) Ano mafanaˈ to cecay inaneng papadama tisowanan mahela ko matatodongay a tayal. (Dmak 18:2, 3; 20:34; Ifiso 4:28) Ano dademak kiso kalalok misarocod, tahira i lahci ko pidemak, ano mihaen kiso mamalifok ko ngaˈayay a ngangan, mamadoloto mahela ko katayalan hanaca padadotoc matayal. w23.12 27 fiedac 12-13 fatac

Itini Fangcalay Cudad, ‘romiˈad ni Yihofa’ hananay i, o pipalaˈafoan ni Yihofa to ˈada a romiˈad, milidong to finawlan Ningra. Itini nolitengan, na mitefocay ci Yihofa to pinapina a kitakit. (Isaya 13:1, 6; Icikil 13:5; Cifaniya 1:8) Itini lintad no mita, ‘romiˈad ni Yihofa’ misatapangay itini piˈodis to Taˈangayay Papilon a tatokian, tahira i kafekadan no Armakiton a malahci. Toha sakaterekaw maˈorip tonini a romiˈad, nohatiniho a mitengil kita to sowal ni Yis. Palimoˈotay ci Yis kitaanan pakayni tonini ‘taˈangayay padiing’ ‘misongilaˈ a misaday,’ tatodong i, ka picerid a misaday to sapisiˈayawaw tonini a romiˈad, aka mahokaˈ to kahacecay a tatokian. (Matay 24:21; Luka 12:40) Itini saka 1 Tisalonika, tarokos ci Pawlo kalasaka dademakay to pina sapatinako padama to Krisciyang micerid a misaday, militemoh to pisawkitan ni Yihofa a romiˈad. Mafanaˈay ci Pawlo cowa ko tatangsol a ira ko romiˈad ni Yihofa. (2 Tisalonika 2:1-3) Kawra papiceriday a misaday to salikaka, malecad to airato anocila kora romiˈad. Tengilen ita ko sapalimoˈot ni Pawlo. w23.06 8 fiedac 1-2 fatac

Isaka 1978 miheca, cecay 60 tingloh ko ˈakawang a mipatirengan a lomaˈ i Tokyo no Dipong. Miharatengay ko ˈalomanay tamdaw, o mahaenay mipatirengan itini i marariday maˈatoray a niyaroˈ, sasamaan eca ka matelep hokira. Samaanay ko pakayraan no sayho a patireng hani? Tada mipatanektekan nangra misangaˈ, hanaca ngaˈay a mangiyangi to miming, cato ka matelep no ˈatoray. O Krisciyang i, mahaenay tonini a ˈakawangay mipatirengan a lomaˈ, hano saan ko sowal hani? O Krisciyang ka tanektek a tomireng, eca ka ngiyangi, makahi a mifalic. O mamisetek cingra midopo to sarikec ato palinian ni Yihofa. ‘Makahi midofdof’ cingra to Kawas, co:wa ko mamisafelit to sapalimoˈot no Kawas. O roma sa i, ano hangangaˈay anca ira ko saali i, o ‘mamakahi cingra pacaˈi,’ mamakahi a mifalic. (Yakop 3:17) Ano ira ko mahaenay matatodongay a waywayan no Krisciyang, cowa ko papakinali, cowa ko papakidem, kawra cowa ko mamikasimaan. w23.07 14 fiedac 1-2 fatac

Misaliyaliyaway ci Satan mikayhid ci Yisan, mangalef hamaanto a madimadi to Kawas saan. (Matay 4:1-11) Misamacayay ci Satan mikayhid ci Yisan mararaw, ho ecato ka ngaˈay ci Yis patafang to sapatefoc, kawra cowa ka ngiyangi ci Yis. Tiya itiniho i fafekang no sera ci Yis milahci to mitosilay tayal i, o mamihadidiho cingra to romaroma sapalifet. Miroeroan no ˈada cingra, kinapinapinaay tahasiˈayaw to patay. (Luka 4:28, 29; 13:31) Oha mamihadidiho cingra to dangoc no nisawawaan. (Marko 9:33, 34) Itini pisawkitan, masamsamay ato milokesan cingra. Ikorto i, sano mararaway a tamdaw cingra macaˈit itini i hecek, pakidem ko kaadada palidlid sa mapatay. (Hipray 12:1-3) Itini salikoray a nokaˈorip ningra, cecayay cingra miemem to sapalifet, samanen paliyasan ni Yihofa ko pidipot cingranan. (Matay 27:46) Pakayni sapatafangaw to sapatefoc a milidong kitanan, hayi sanay ci Yis mikinafalah to ˈorip. Ano songilaˈen ita miharateng konini, tada maolahay kita cingranan. w24.01 10-11 fiedac 7-9 fatac

O mihadidiay falocoˈ papadama kitanan ngaˈay ko kalalaˈed ato tao. Ira ko mihadidiay falocoˈ ita i, mamisongilaˈ mitengil to sowal no tao. (Yakop 1:19) Ira ko mihadidiay falocoˈ ita i, mamicowat to sakadipayal. Tinakoen, ano maroero kita i, cowa ko foriforsa a somowal to midokaˈay to tao a sowal, ano makariˈang no tao i, cowa ko raranikay a mangolaw. Cowa ko mamiˈodis, ao ‘padadotoc masasihadidi, masasisodod.’ (Kolosay 3:12, 13) Ira ko mihadidiay falocoˈ ita, mamataneng ko pisaˈosi. Cowa ko mafolafol ko demak, ao mamipalak to toki amikingkiw, halo miforifor to cowa ka lecad a papiliˈen, iraay ko manan kangaˈayan iraay ko manan katatiihan. Tinakoen, ano mikilimay to katayalan, alatek ira saho ko katayalan tangsol a micada kita. Kawrira ano ira ko mihadidiay falocoˈ ita, o mamipalak to toki misinanot, onini a katayalan samaanay mifiyor to paro no lomaˈ ato kalalaˈed ita ci Yihofaan. Ira ko mihadidiay falocoˈ ita, o mamatanengto ko pisaˈosi. w23.08 22 fiedac 8-9 fatac

Padadotoc micoˈay to ciraraway a coos papatoled tisowanan alatek. Kawrira, ano haratengen ko miketonan a sowal iso a mipatafang to tireng i, irato ko misetekay a falocoˈ midemak to matatodongay a demak. Hano saan ko sowal hani? Patafang to tireng kiso ci Yihofaan i, o mihayiay to caayto kono niyah ko tireng iso. Tatodong i, misawaday kiso to notekedan a mihalakaan ato coos no falocoˈ, eca ka pidemak to kapiliˈan no Kawas a demak. (Matay 16:24) Ano tahasiˈayaw to sapalifet i, caayto ko mamipalak to toki misaharaterateng to sasamaan ko pidemak, samanen maherekayto kiso misetek to falocoˈ madimadi ci Yihofaan, pakahemek Cingranan, cowa ko mamisinanot kiso to romaroma papiliˈen. Mihaen kiso to demak o mitodongay ci Yopuan. Ci Yopu soˈlinto tahasiˈayaw to pakidemay a sapalifet i, tanektekay cingra pasowal: ‘Tahira i patay cowa ko mamisawad kako to nika madimadi to Kawas!’—Yopu 27:5. w24.03 9 fiedac 6-7 fatac

Matomesay ko olah a Kawas ci Yihofa mikapotay kitanan. (2 Korinto 13:11) Ciharatengay Cingra kitanan kahacecay a tamdaw. Papakasoˈlinen ita o ‘madimadiay a olah’ Ningra miceriday a misimaw kitanan. (ˈOlic 32:10) Ano simsimen ita to samaanay Cingra patalahkal to olah kitanan i, mamaˈaraw ko nika ciharateng Ningra kitanan, wa ngaˈayto matongal ko noka piingid Cingranan. Sayaren ita ko falocoˈ a mitolon Cingranan, pasowal Cingranan to hakowaay ko nika pisaali ita to olah Ningra. Polong a cariraw no mita ngaˈayay pasowalen Cingra, samanen pakasoˈlinay kita cowa aca ka cipinang Cingra to falocoˈ ita, hanaca ciharatengay to sapadamaaw kitanan. (ˈOlic 145:19) O olah ni Yihofa malecaday to mataringay a namal to kasienawan, misolotay kitanan miingid Cingranan. Tada ciˈicelay ko olah Ningra, tada damsayay. Itini maamaan no kaˈorip sarocoden a mitinako ko patalahkalan ni Yihofa tisowanan a damsayay a olah. Nanay kita maemin patikoen ko olah Ningra, mikitini i kemod no falocoˈ a pasowal to: ‘Maolahay kako ci Yihofaan!’—ˈOlic 116:1. w24.01 31 fiedac 19-20 fatac

Sakakaay pasifanaˈan ni Yis o Yutaya tamdaw, cangra i, mafanaˈayto to ngangan no Kawas o ci Yihofa, mihaenay cowa ko pipasowal aca ni Yis to manan ko ngangan no Kawas, ‘ihkalayho mitadtad’ o masamaanay a Kawas ci Yihofa. (Yohani 1:17, 18) Tinakoen, o Hipray Maloloday Cudad sanay ko sowal, o siniˈadaay to tamdaw ci Yihofa, o sidaˈitay to tamdaw a Kawas, misaka dademakay ci Yis to sapatinako to pinokay no malafelay a wawa, padama to tamdaw pakahapinang to mahaenay a Kawas ci Yihofa. (Kasadakan 34:5-7) Itini tonini sapatinako somowalay ci Yis, ora malafelay a wawa ‘ira:ayayho no lomaˈ’ i, maˈaraw no wama cingra, tangsolay comikay tayra a mitakec, mikifalocoˈ a misodod cingranan. Mikitini tonini kasemeran a sapatinako, mahapinangay ita to tada siniˈadaay, sidaˈitay to tamdaw ci Yihofa. (Luka 15:11-32) Soˈlinay a mapadama ni Yis ko tamdaw mafanaˈ to kakarayan Wama. w24.02 10 fiedac 8-9 fatac

Ci Yihofa wa ngaˈay paira to sasayar ato sahinom i misemsemay a tamdaw. Sasamaan kita malecad ci Yihofaan, ira ko siniˈadaay falocoˈ i tamdaw, makahi mihinom to tao hani? Cecay pakayraan i, palahad to pina makapahay capeling. Sapadadotocaw kita masasiolah, to romiˈamiˈad ‘padadotoc masasihinom,’ o papalahad to sidaˈitay ato olah no salikaka, minanam palecad to falocoˈ no tao. (1 Tisalonika 4:18; Kolosay 3:12; 1 Pitiro 3:8) O hatiniay a capeling sasamaan padama kitanan hani? O siniˈadaay a falocoˈ ato milingatay a capeling ano masalalomaˈayto no pinangan no mita, o mamakalimto kita mihinom to misemsemay a tamdaw. Malecad o nano sowal ni Yis: ‘Ano masamaanay ko falocoˈ noya tamdaw i, hatiraay ko masadakay i ngoyos ningra. O ngaˈayay a tamdaw minaˈengay to fangcalay, o fangcalay ko masadakay ningra.’ (Matay 12:34, 35) Mihinom kita to salikaka, o pasowalay cangranan tada maolahay kita cangranan. w23.11 10 fiedac 10-11 fatac

Ano sakacipinangaw kita to sapairasol no Fangcalay Cudad, mamicangacang to sapadama. Tinakoen, ano tayra kiso i kafahalan a pala miliwko, o kalacafayay tisowanan a widang mananamay tonini a pala. Cowa ko kafanaˈ aca to kitiraan namo, mafanaˈayho to tatalacowa ko kahacecay a lalan. Maedeng o mamahemek kiso kalacafay tonini a widang miliwko. Ci Yihofa o mahaenay a widang, cowa ko kafanaˈ aca Ningra to itiniay kita i maanan a lintad nohatini, mafanaˈayho mamifekad ko maanan a demak noikor. Sakacipinangaw kita to sapairasol no Fangcalay Cudad, o mamisapoener pasayra ci Yihofaan micangacang to sapadama. (Taniil 2:28; 2 Pitiro 1:19, 20) Makalimay ko wama wina ira ko makapahay hanoikor no wawa, ano kakarayanto Wama ci Yihofa mahecaday. (Yirimiya 29:11) Kawra cowa ka lecad to no tamdaw a wama wina, matatodongay ko pipaˈayaw ni Yihofa to hanoikoran. Mikayatan Ningra ko tamdaw itini Fangcalay Cudad mitilid to sapairasol, padama kitanan talaˈayaw mafanaˈ to mamafekad ko maanan a taˈangayay demak noikor.—Isaya 46:10. w23.08 8-9 fiedac 3-4 fatac