Saka 9 Folad

Pafelian no Kawas to ˈicel ci Yis, palahdaw to polong pasangaray no tamdaw. Mikitini i nidemakan ni Yis a kafahkaˈan mahapinangay ita, awaay ko hapakayraan ita misaysay to pasangaray, ˈarawhan madoloay a madangar ni Yis. Tinakoen, iraay ko ˈicel ningra palahdaw to lamit no roray, oya pairaan no mirocokan ita a raraw, ato pairaan no raraw a adada ato patay. (Matay 9:1-6; Loma 5:12, 18, 19) O nidemakan ni Yis a kafahkaˈan misawacayay, ngaˈayay cingra a miadah to ‘masakenakenaay a adada,’ ato patikol paˈorip to mapatayay tamdaw. (Matay 4:23; Yohani 11:43, 44) Roma i, iraay ko ˈicel ni Yis paterep to faliyos, milaplap to tatiihay coyoh. (Marko 4:37-39; Luka 8:2) Pafelian ni Yihofa ko kanonoˈan a Wawa Ningra to taˈangayay a ˈicel, mafanaˈ toninian tada rihadayay ko falocoˈ ita. O Hongti Kitakit no Kawas papalemed to tamdamdaw noikor. O Hongti no Kitakit no Kawas ci Yis, mamikowan to polong no cikiw. Mikitini nidemakan ningra a kafahkaˈan a demak mahapinang ita, papalaˈosien ningra ko masamaanay a demak, hanaca mikikaka ko kataˈangay. w23.04 3 fiedac 5-7 fatac

Ano ˈalomanay ko tamdaw i kasakopang iso, mararid kiso pakamay cowa ka matahidang. Ano mahaenay i, caayto ka sapipakamayaw alatek. Kawra aka pisawad a pacaˈof. Alatek ngaˈayay adihayen iso ko misadayan a sapacaˈof. Ano mihaen, soˈlinto misatapang a malalengo caayho matahidang kiso i, ikor wa irato ko hatoki iso pacaˈof. Ano misaday to Lalengoena Lalakaw no Mikecolay i, saharateratengen ko kahacecay fatac samaanay milingat to lalangian. Mihaen i, itini i lalomaˈ no saˈopo, wa irato ko sapaladaˈ iso a pina kalimlaan. O roma i, ano pasangaray ko pina fatac, cowa ka dolo a tadtaden, ngaˈay kiso misaday pacaˈof tonini a fatac, samanen milengo tonini a fatac i, o pakamayay a tamdaw cowa ka papina alatek. Ano mataˈlifto ko kinapinapina a saˈopo, caayho ka pacaˈof i, sasamaanto hani? ˈAyaw no saˈopo, ngaˈayay kiso saˈayawen pasowal ko misikayay tamdaw to icowaay ko papacaˈofen iso a salicay. w23.04 21-22 fiedac 9-10 fatac

Makahiay midofdof ci Yosif to sakayat ni Yihofa, padamaay cingranan malo sangaˈayay a faˈinay. Kinatoloay ci Yihofa pafeli ci Yosifan to ihkalay a sakayat, pasowal cingranan mamisamaan ko demak saki paro no lomaˈ, i kahacecay tangsolay ci Yosif a mitoor a midemak. Soˈlinto pairaay to taˈangayay no kafalic no kaˈorip ni Yosif konini, kamayanay cingra makahi a midofdof. (Matay 1:20; 2:13-15, 19-21) Tona mitengilay to sakayat no Kawas, hato ngaˈayayto ci Yosif misongilaˈ midimokos ato midipot ci Mariyaan. Haratengen hena, maˈaraw ni Mariya ko pihaen ni Yosif a midemak, maedeng matongalay ko olah cingranan, mikangodoay cingranan! O malo faˈinayay a tamdaw, ngangaˈay kiso mitodong ci Yosifan, itini pidimokos to paro no lomaˈ mikilim to sakayat no Fangcalay Cudad. Ano misarocod kiso misaka dademak to safalod no Fangcalay Cudad, caka talaw a misalof, patalahkalay kiso to olah to fafahi, o ngangaˈayho patanoktok to raramod iso. O cecay fafahiyan salikaka i Wanato mataˈlifayto ko 20 miheca ko kacifaˈinay, sowal sa cingra: “Maˈaraw ako ko faˈinay mikilim ato midofdof to sakayat ni Yihofa i, matongalayto ko pikangodo cingranan. Tada rihadayan nanay kako, pakasoˈlinay ko falocoˈ to misaˈosian ningra a demak.” w23.05 21 fiedac 5 fatac

O patikolay i nalacolan a Yutaya tamdaw o mamalo ‘makoracay finawlan’ no Kawas. (Limoˈot 7:6) Sakoniya sowal, ikor no miliyas ko Yutaya tamdaw to Papilon cowato ko hamamisalof to maanan, o ngangaˈayto padadotoc milifok to pihayda ni Yihofa cowa ka saan. ˈAlomanay a Yutaya tamdaw itiniay i Papilon a hofocen mananamayto to pinangan ato palinian no Papilon. Onini iraay ko maanan a pifiyor hani? Saka cecay a liyad minokay i Israil a Yutaya tamdaw ikor no pina miheca, mahapinangay no ˈAˈideman ci Nihimiya, o mihofocan no Israil a wawa cowa ka fanaˈ tono Hipray a sowal. (Limoˈot 6:6, 7; Nihimiya 13:23, 24) Itiya, o Kimad no Kawas tano Hipray a sowal tiliden, ano cowa ka fanaˈ koniya wawa to mahaenay a sowal i, sasamaan a minanam maolah ato midoko ci Yihofaan hani? (Icra 10:3, 44) Mihaenay, o tataˈangay ko pifalic noniya Yutaya tamdaw. Kawra itini Israil, madoloay cangra mihaen to demak, samanen itini toniya pala palidlid sanay patikol ko matatodongay a pidoko.—Nihimiya 8:8, 9. w23.05 15 fiedac 6-7 fatac

Ano hakowaayto ko micikelohay a ˈicel ato piˈimer ita, tatahalifaho to pasangaray alatek. Tinakoen, o ‘cowa ka harateng a pakayraan’ mamiˈafas to toki ita alatek, micona kitaanan palaˈosi to patosokan. (Patnakay 9:11) Tatahalifa kita to pasangaray alatek, telocto matoleday ko falocoˈ, awaayto ko ˈicel. (Taneng 24:10) Cowa ko malefotay kita, latekay mararaway ko demak, micona kitaanan palaˈosi to patosokan. (Loma 7:23) Anca malotayan nanay ko piharateng ita. (Matay 26:43) Ano mahaenay i, samaan ko pidemak ita ngaˈ caka sawi a padadotoc hani? Haratengen, tahalifa to pasangar o mapadikay cowa ka saan. Sowal no Fangcalay Cudad, wa kinapinapina kita tahalifa to pasangaray alatek. Nikawrira ihkalay ko Fangcalay Cudad a pasowal, ngangaˈay kita miliyaw a tomireng. Hayi, soˈlinto tahalifa kiso to pasangar padadotoc a talaˈayaw, ngaˈayayto kiso misawacay to ciharatengay to sapahemekaw ci Yihofaan. Maˈaraw ni Yihofa ko nika pisaˈicel iso palaˈosi to patosokan no niyah, maedeng taˈangayay ko kahemek Ningra. w23.05 30 fiedac 14-15 fatac

Misakafah ko kapah salikaka ikor, mafanaˈay to sasamaan ngaˈay ko kalacafay to masakenakenaay a tamdaw, mafanaˈayho sasamaan misaˈosi to matatodongay a sakaˈorip ato miˈimer to mamapalak a payci. (Filipi 4:11-13) Salakat ngaˈay kiso malo dama misakafahay to cecay liyad, papadama tisowanan misaday a misatapang malo miceriday misakafahay. Micerid misakafah kiso ikor, wa ira ko toki mirienang to roma mieminay to toki a tayal no Kawas alatek, tinakoen malo patirengay a sikawdan ato matayal itini i Pitil. Polong faˈinayan salikaka o mamisarocod ira ko tatodong malo malohemay malitengay no kasakopang, matayal saki salikaka. Sowal no Fangcalay Cudad misaˈicel ko faˈinayan salikaka micangacang to mahaenay a patosokan, o ‘mangalayay to makapahay a tayal’ sanay. (1 Timoti 3:1) Cecay faˈinayan salikaka ˈayaw no malo malohemay malitengay, o sasalakatho ira ko tatodong malo dama sikawdan. O dama sikawdan itini adihayay demakan midamaay to malohemay malitengay. Ano malohemay malitengayto anca o dama sikawdan, o papatalahkal to misapoeneray a waywayan matayal saki salikaka, hanaca fanekfek ko falocoˈ mirienang to mitosilay a tayal. w23.12 28 fiedac 14-16 fatac

Misatapang ci Yosiya micangacang ci Yihofaan i, o kapahho cingra. Makalimay cingra sapitongalaw to kafanaˈ ci Yihofaan, mitoor to araaw ni Yihofa a midemak. Kawrira, oniya kapah a hongti misiˈayaway to pasangaray a pakayraan, itiya ˈalomanay tamdaw no kitakit midokoay to makaniway a kawas, o aira ko taˈangayay a timolo ningra ngaˈ midopo to matatodongay a pidoko. Soˈlinay patalahkal cingra to timolo, caho ka 20 ko mihecaan mapalahdawayto ko mararaway a pihakelongan. (2 Rayray 34:1, 2) Soˈlinto kaemangayho ko mihecaan iso, ngangaˈay mitodong ci Yosiyaan micangacang ci Yihofaan, micalep ko kafanaˈ to makapahay capeling Ningra. Ano mihaen ko demak iso, mamatongal ko kalim sapatafangaw to tireng ci Yihofaan. Ano patafangto kiso to tireng ci Yihofaan i, wa ira ko manan a kafalic nokaˈorip hani? 14 ko mihecaan no salikaka ci Luke micadaay to paputisem, sanay cingra: “Misatapang nohatini, paisalakaten ako ci Yihofa i nokaˈorip, misaˈicelho pakahemek Cingranan.” (Marko 12:30) Ano makalimay kiso mihaen to demak, mamalifok ko adihayay a sapalemed. w23.09 11 fiedac 12-13 fatac

Tiya mitilid ko tarokos ci Pawlo to saka 1 Tisalonika a cudad i, cowaho pakaala to cecay miheca mapatireng ko Tisalonika a kasakopang. O malohemay malitengay awaayho ko manan a nalifetan, nolatek mararaway ko demak nangra, kawrira kamayan mikangodo ko salikaka cangranan. Anini, mangata mangatato ko taˈangayay padiing, mangalef ko pitiˈer ita to sakayat no malohemay malitengay, samanen anoikor latek mamalahdaw ko pirinnak ita to i congpoay ato fenpoay salikaka. Mihaenay, nohatiniho o papalahad kita to olah ato mikangodo to malohemay malitengay. Ano o mananto ko mamafekad a demak, ka padadotoc kita talipaˈelal. Aka minengneng to dangoc no malohemay malitengay, ao mamisinanot samaanay ci Yihofa pakayni ci Yis Kristoan, mikerid tonini madimadiay a salikaka. Matiya o kafong mamidipot to fongoh no sofitay, sakalidong a tokel mamidipot to ponoˈ ita. Mahapinangay ita o hekal ni Satan awaay ko maamaan a epoc i tamdaw. (Filipi 3:8) O tokel i, papadama kitanan eca ka marawraw ko falocoˈ. w23.06 11-12 fiedac 11-12 fatac

O micadaay to satahidang a tamdaw tosaay ko papiliˈen: Micada anca minaˈay. Adihayay ko lalangian ita miliyas to malafoay madadiˈiyay a waywayan. Sowal no ‘maapaay a fafahiyan’ sanay: ‘O mitakawan a nanom tada koesanay.’ (Taneng 9:17) ‘O mitakawan a nanom’ o maanan ko mitoroˈan hani? Patinakoen no Fangcalay Cudad ko madadiˈiyay a demak no mararamoday to nanom. (Taneng 5:15-18) O mararamoday wa mikitini toniya makakaolahay a demak milifok to lipahak. Kawrira, ‘mitakawan a nanom’ cowato ka lecad. ‘O mitakawan a nanom’ o malafoay a madadiˈiyay a waywayan. Midemakay to hatiniay a demak a tamdaw matalaway maˈaraw no tao, malecaday o tohoy. O midemakan no niyah cowa ko mamafanaˈ ko tamdaw ano saan cangra, o koesanay ko ‘mitakawan a nanom’ wa saanto ko piharateng. O misamangahay to niyah konini! Maˈaraway ni Yihofa maemin. Malahdaw ko pihayda ni Yihofa o kasomadan a demak konini, sasamaan o koesanay konini hani?—1 Korinto 6:9, 10. w23.06 22 fiedac 7-9 fatac

Ikor no mipaputisem, latekay o pitolon iso oyananto ko sowal, o mitosilay a demak hato o nanaman aca. Misiˈayaw to mahaenay a pakayraan i, aka miharateng to malahdawayto iso ko fangcalay saocor ni Yihofa. Cowa ko malefotay tamdaw kita, latekay ngaˈayay ko kalingad no demak latekay cowa ka ngaˈay. Ano mafasaway ko faedet no falocoˈ iso i, ngaˈay haratengen ko taˈarawan ni Pawlo. Soˈlinto misakiemelay cingra mitodong ci Yisan, nolatekay cangoˈotan nanay to ˈicel cingra. Ano masamaanayto ko harateng ni Pawlo itiya, misetekay to falocoˈ cingra milahci to patorodan no Kawas i cingranan a tayal. Malecadayto, ano misaˈosi kiso i, hamaan toor han ko maharatengay a midemak. Ano masamaanayto ko harateng iso, seteken ko falocoˈ midemak to matatodongay a demak. Ano kiemel kiso mihaen to demak, alatek mamatongal ko ˈicel iso.—1 Korinto 9:16. w24.03 11-12 fiedac 12-13 fatac

Wa ngaˈay kita pasayra i salikaka paihkal to olah, misaˈicel malawidang cangranan. (2 Korinto 6:11-13) Itini kasakopang ita, cowa ka lecalecad ko pinangan no salikaka, taˈangayay ko kasasiroma no lalengawan nangra. Misinanot kita to makapahay capeling nangra, mamatongal ko olah cangranan. Nanamen ita tano pinengneng ni Yihofa a minengneng to salikaka, mamisawacay to maolahay kita cangranan. Itini taˈangayay padiing, masasiolah kita to salikaka tada kalimlaan. Toya tatokian, sasamaan kita milifok to sadipot hani? Nengnengen o maanan ko sakayat ni Yihofa to nolitengan a finawlan Ningra. ˈAyaw no demak mirikecanto ni Yihofa ko maholiway tayra i Papilon a Yutaya tamdaw, pasowal cangranan ano maˈodis koniya niyaroˈ sasamaan ko pidemak nangra. Sanay ci Yihofa: ‘Finawlan Ako, ka picomod i lomaˈ namo, ˈedefen ko fawahan. Milimek to cecay liyad, tagasa i kafasawan no keter.’ (Isaya 26:20) Ano mifekad ko taˈangayay padiing i, o mamidofdof kita to malecaday a sakayat. w23.07 6-7 fiedac 14-16 fatac

Ngaˈayay licayen ita ko niyah: “Minengneng ko tao takowanan o makahiay micaˈi, makahiay misodod han? Anca o pakidemay ko saali, misatekeday to harateng no niyah hokira? Mitengilay kako to harateng no tao, ano ngangaˈay i, makahi micaˈi han?” Hakowaay ko nika kahi ita micaˈi, patalahkal to malecaday kita ci Yihofaan aci Yisan. Ano mafalic ko pakayraan i, makahi kita micaˈi o mamakahi mifalic. O noka falic papairato caay ka harateng a pasangar alatek. O tireng ita fahal sa ira ko pakidemay adada alatek. Anca itini kitiraan ita a pala, o pakapayciay a demak ato mirikecay fahal sa mafalic alatek, hato sasifod sanay ko kaˈorip no mita. (Patnakay 9:11) Roma i, o tayal ita itini likakawa no Kawas ano fahal sa mafalic, pasangaray kita misiˈayaw alatek. Ano o mananto a demak, ano tooren ita ko ilaenoay sepat a pakayraan, mamalaˈosito misiˈayaw to kafalic. Onini a pakayraan: (1) cadaen ko mifekaday a demak, (2) pasiˈayaw minengneng, (3) misamacay to tawlikay a demak, (4) padama to tao. w23.07 22 fiedac 7-8 fatac

Pairasolay ci Taniil kaemangho i, mihawikidan no ˈada miholiw tayra i maraayay a Papilon, samanen iraay ko makapahay tatirengan ningra mahemekan nanay ko tapang no Papilon cingranan. ‘Awaay ko dangoc, tada makapahay’ cingra, hanaca tadamaanay ko lalomaˈan ningra. (1 Samuil 16:7) Pakayni tonini a lalangian, pahatatanaman no Papilon tamdaw cingra, malo citanengay a tamdaw. (Taniil 1:3, 4, 6) Tona ngaˈayay ko waywayan ni Taniil, saka maolah ci Yihofa cingranan. Masemeray ci Yihofa minengneng ci Taniilan, mahecaday ci Nowaan aci Yopuan a moecel sanay. Ya mihaen ci Yihofa to sowal i, 20 ko mihecaan ni Taniil, ˈarawhan mapatayayto ci Nowa aci Yopu, o halafinayto a madimadiay midoko ci Yihofaan a sikawdan. (Satapangan 5:32; 6:9, 10; Yopu 42:16, 17; Icikil 14:14) Padadotocay maolah ci Yihofa ci Taniilan, patihi cingranan milakowit to halafinay a hakelong no ˈorip ningra.—Taniil 10:11, 19. w23.08 2 fiedac 1-2 fatac

Sapicakayaw kiso to cecay lomaˈ. Sapisahciaw cipinang kiso tonini a lomaˈ, cowa ko sapilawaaw to cecacecay a demak. Ano micekiw kita to Fangcalay Cudad i, ngaˈayay haenen ko pakayraan. Ano caloh han a miˈosi i, ‘o taˈeneran no kimad no Kawas’ ko kafanaˈan aca ita, tatodong i, pantaay aca ko nika fanaˈ to Fangcalay Cudad. (Hipray 5:12) Kawra “micomod” kita tora lomaˈ minengneng wangaˈ mahapinang, malecaday konini, mamicalep kita micekiw to Fangcalay Cudad wangaˈ masahci a cipinang to lalomaˈay lalakaw. O cecay ngaˈayay pakayraan no picekiw to Fangcalay Cudad i, nengnengen ko masasiromaromaay a lalakaw no Fangcalay Cudad, misamaanay ko nika laliting. O roma i, kiemelen ita pakasoˈlin kora kacipinangan ita a soˈlinay kimad, o maanan ko tatodong, hanaca hapinangen to misamaanay hano pakasoˈlin ko niyah tonini soˈlinay kimad. Toha sapisahciaw a cipinang to Kimad no Kawas i, maminanam kita to tangongolay a soˈlinay kimad no Fangcalay Cudad. Itini saka 1 hahekalan, tarokos ci Pawlo palimoˈotay to salikaka malalok a micekiw to Kimad no Kawas, ‘songilaˈen a cipinang ko kakayaˈ, kakahad, takaraw ato talolong no soˈlinay kimad,’ mihaen cangra wangaˈ ‘tangongol ko lamit no nika pakasoˈlin.’ (Ifiso 3:14-19) Ano kitato i, mamihaen to demak. w23.10 18 fiedac 1-3 fatac

Ilalomaˈ no Fangcalay Cudad adihayay ko patalahkalay to mihadidiay a ngaˈayay taˈarawan. Ngaˈayay kiso mitanam a misahalaka, misinanot a mikingkiw to pakayniay cangranan a maˈoningay. Tinakoen, ci Tafiti kaemangho i, minilnilanto mamalo hongti no Israil, kawra halafinayho cingra a mitala ngaˈ mala hongtiay. Ci Simiyon aci Anna itini halafinay a pitala to kaira ni Misiya i, padadotocay a madimadi midoko ci Yihofaan. (Luka 2:25, 36-38) Mikingkiw kiso tonini a maˈoningay i, sinanoten a miharateng: “Onini a tamdaw hano ngaˈay patalahkal to mihadidiay falocoˈ hani? Malayapay ningra ko maanan epoc hani? Sasamaan kako a minanam cingranan hani?” Roma i, ngaˈayay mikitini i tatiihay a tinakoan minanam to sapasifanaˈ. (1 Samuil 13:8-14) Haratengen iso hena: “Onini a tamdaw hano awa ko mihadidiay falocoˈ hani? Pairaay to maanan a teloc hani?” w23.08 25 fiedac 15 fatac

Tada madimadiay ci Pitiro, ano o mananto ko mafekaday a demak i, cowa ka pisawad mikotod ci Yisan. Kinacecayay somowalay ci Yis to kafokilan no nisawawaan a sowal. Itiya i, cowa pitala ko ˈalomanay to pitadtad ni Yis, anca misaali to sapitadtad ni Yis, sawad sanayto mikotod ci Yisan. Kawra ci Pitiro cowa pisawad cowa piliyas ci Yisan, edengan ci Yis ‘iraay ko midaˈocay a kimad’ sanay. (Yohani 6:68) Mafanaˈay ci Yis to mamiliyas ci Pitiro ato romaroma tarokos cingranan. Kawrira, patalahkalay ci Yis to pakasoˈlin ningra ci Pitiroan, ka tanektek sanay pasowal ci Pitiroan, papipadadotoc madimadi a mikotod cingranan. (Luka 22:31, 32) Mafanaˈay ci Yis to tarokos, ‘soˈlin faedetay . . . ko falocoˈ, rarimaay ko tireng’ sanay. (Marko 14:38) Mankora, soˈliˈlin mihakeno ci Pitiro ci Yisan, cowa ka sawaden ni Yis cingra. Patikolto maˈorip ci Yis, tiya cecay ci Pitiro i, paˈarawan ni Yis cingra. (Marko 16:7; Luka 24:34; 1 Korinto 15:5) Oniya demak maedeng taˈangayay ko pikowad ato pihinom tonini masomaday a Pitiroan! w23.09 22 fiedac 9-10 fatac

O tamdaw ano paihkal to nika pakasoˈlin to Kawas, sasododen no Kawas, mitahepo ko raraw nonini a tamdaw. Sasahcien no Kawas misodod cingra, caayto ko ciraraway a tamdaw han cingra. (ˈOlic 32:1, 2) Tona paihkalay konini tamdaw to pakasoˈlinay falocoˈ, o moecelay, makoracay awaay ko raraw, hananayto no Kawas minengneng cingra. Soˈliˈlin ci Apraham, Tafiti ato nolitengan romaroma madimadiay midokoay to Kawas a tamdaw malo o moecelayto a tamdaw hananay, kawra kamayan o cowa ka lefot ciraraway tamdaw cangra. Nikawrira, tona iraay ko pakasoˈlinay falocoˈ, malo o makoracay awaay ko raraw hananay no Kawas, itini i pinengneng no Kawas cangra atoya cowa ka pakasoˈlin to Kawas a tamdaw taˈangayay ko kasasiroma. (Ifiso 2:12) Itini Loma a cudad ihkalay ci Pawlo mitadtad, o tamdaw ano sakalawidangaw ni Yihofa, aira ko pakasoˈlinay a falocoˈ wangaˈ. Ci Apraham aci Tafiti o mahaenay, ano kitato i, o mamihaen ko demak. w23.12 3 fiedac 6-7 fatac

Anini, polong a Krisciyang iraay ko mikiriwiˈay a fadangalan patafang ci Yihofaan. Tano maanan a pakayraan hani? Sakadademaken ko toki, ˈicel, ato hafay no niyah micowat to tayal no Hongti Kitakit no Kawas. Ano patafangen ita ko sangaˈayay ci Yihofaan i, o patalahkalay to misalimlaay to pidoko ci Yihofaan. Somowalay ko tarokos ci Pawlo to pina cowa ko sasakahmawen a midokoay a tayal, mahawpay ko pitolon ci Yihofaan, mitenak to tokel no mita, malacafay a masaˈopo i kasakopang, masasipakalalok. (Hipray 10:22-25) Patalipaˈelalayho ci Pawlo kitanan, ‘tona maˈaraway ko nika ngata no romiˈad ni [Yihofa], mamangalef ko pihaen to demak.’ Roma i, itini hererekan no Paˈarawan cudad, o coyoh ni Yihofa kinatosaay misaˈicel a pasowal, ‘ka pidoko to Kawas’ sanay. (Paˈarawan 19:10; 22:9) Nanay paifalocoˈen ita ko soˈlinay kimad pakayni to noˈadingoan a tadamaanay fangcalay sefi, paifalocoˈen ita ko kalimlaan a sapalemed i pidoko to tadamaanay a Kawas, o sasalimlaen ita konini! w23.10 29 fiedac 17-18 fatac

Makalimay kita sapadadotocaw ‘masasiolah.’ Nikawrira haharatengen ita, na patalipaˈelalay ci Yis kitanan: “O mamafasaw ko olah no ˈalomanay a tamdaw” sanay. (Matay 24:12) O mamahaen ko ˈalomanay nisawawaan ni Yis cowa ka saan, nikawrira, o papadadotoc kita talipaˈelal, misaˈicel micoˈay to pifiyor nonini a hekal, aka mafasaw ko olah ita to salikaka. Mihaenay, dotoc mamilengo kita to cecay kalimlaan a salicay: Sasamaan kita mafanaˈ to fanekfekay ko niyah maolah to salikaka hokira?Sakafanaˈaw to hakowaay ko tangongol no kaolah no niyah to salikaka, nengnengen ita samaanay ko niyah misiˈayaw to pina pakayraan. (2 Korinto 8:8) Tinakoen, tarokos ci Pitiro sanay ko sowal: ‘Ka fanekfek a masasiolah, samanen o olah mitahepoay to adihayay a raraw.’ (1 Pitiro 4:8) Mihaenay haw i, nengnengen ita samaanay ko niyah misiˈayaw to raraw ato dangoc no salikaka, o mamafanaˈto hakowaay ko tangongol no kaolah no niyah cangranan. w23.11 10 fiedac 12-13 fatac

Ano o papinapina aca salikaka i kasakopang ko kaolahan ita, eca ka olah to romaroma salikaka i, cowa ito pidofdof kita to pakayniay olah a sapalimoˈot ni Yis. Manaokaniw, matira ci Yisan, makedecay ko kalalaˈed ita to cimaanan a salikaka saan miharateng alatek. (Yohani 13:23; 20:2) Kawra patalipaˈelalay ci Pitiro, papasayra kita to polong a salikaka patalahkal to ‘olah,’ o mitoroˈan nonini i, o dihkoay sano paroay no lomaˈ a noka aolah to polong a salikaka. (1 Pitiro 2:17) Palimoˈotay ci Pitiro kitanan ‘faedeten ko falocoˈ a masasiolah.’ (1 Pitiro 1:22) ‘Faedeten ko falocoˈ’ maolah to salikaka tatodong i, soˈlinto cowa ka dolo patalahkal to olah i cimaanan i, kamayanho misaˈicel maolah cingranan. Tinakoen, o cecay salikaka ano pakararaway anca mikariˈangay kitanan, latek sapiˈodisaw kita, cowa ko sapipatalahkalaw to olah i cingranan. Mananamay ni Pitiro ci Yisan i, o miˈodisay a waywayan cowa ka hemek ko Kawas. (Yohani 18:10, 11) Sanay ci Pitiro: ‘Ano makariˈang no tao i, aka pacoˈay a mikariˈang. Ano malokes no tao i, aka pilokes a pacoˈay, ao palemeden cingra.’ (1 Pitiro 3:9) Edengan ano faedetay ko falocoˈ iso a maolah to salikaka, o ngangaˈayto kiso padadotoc tano sidaˈitay damsayay a pakayraan micada to salikaka. w23.09 28-29 fiedac 9-11 fatac

Sahosaho maˈaraw ko nika lomahad no wawa malo taˈangayay a tamdaw, marariday fahkaˈan nanay kita. O tatirengan no tamdaw lingad sanay a lomahad, kawra malo o matenesay a Krisciyang cowa ka mahaen. (1 Korinto 13:11; Hipray 6:1) To sakatenesaw kita, papalahaden ita ko tangongolay noka lawidang aci Yihofa, hanaca tatiˈeren ita ko fangcalay saocor Ningra palahad to makapahay a capeling, minanam to ciepocay a inaneng, misaday to sapitamorongaw to ˈinorong anoikor. (Taneng 1:5) Misangaˈan ni Yihofa ko faˈinayan ato fafahiyan. (Satapangan 1:27) Mahapinangay, itini i tatirengan faˈinayan fafahiyan taˈangayay ko kasasiromaan, kawra itini i romaroma pakayraan iraay ko kasasiromaan. Tinakoen, pafelian ni Yihofa ko faˈinayan fafahiyan to cowa ka lecad a saaroˈan, mansa o papalahad cangra to pina a capeling ato inaneng, ngaˈ ngaˈay mitamorong to ˈinorong no niyah.—Satapangan 2:18. w23.12 18 fiedac 1-2 fatac

Misaka dademakay ci Yis to ngangan no kakarayan Wama pangangan Cingranan, mihamhamayho to mamihaen ko demak no tao. Itiya i, pangihaˈ a miˈosi to fangcalay ngangan no Kawas o pakaditay to Kawas sanay a miharateng ko romaroma ˈaˈideman no pihakelongan. Kawra ci Yis cowa ka pakayni i mahaenay cowa pisalalangi to Fangcalay Cudad a pinangan, hawad sato milasil to fangcalay ngangan no Wama ningra. Nengnengen ko cecay tinakoan. Na itiniay ci Yis i kilac no Kirasa tamdaw miadah to cecay maˈimeray no tatiihay coyoh a tamdaw, maˈaraw no itiraay a tamdaw konini a demak tada matalawan nanay, orato i, micangacangay ci Yisan papiliyas. (Marko 5:16, 17) ˈAyaw no miliyas ci Yis palimoˈotay toya miadahan ningra a tamdaw pasowalen ko tamdaw to maanan ko mafekaday a demak, kawra aka pilasil to midemakay ci Yis to maanan, ao mamilasil to midemakay ci Yihofa to maanan, samanen halamhamay ci Yis mafanaˈ ko itiraay a tamdaw to fangcalay ngangan ni Yihofa. (Marko 5:19) Anini, makalimay ci Yis kitaanan ngaˈay padama to paro no kakarayan a tamdaw mafanaˈ to ngangan no kakarayan Wama. (Matay 24:14; 28:20) Ano misaˈicel kita mihaen to demak, o papalipahak to Hongti ita ci Yisan. w24.02 10 fiedac 10 fatac

Itini tonini pasangaray siˈayawen a mikiriwiˈay a lintad, masalalomaˈ no likakawa ni Yihofa soˈlinayto adihayay ko malifokay ita a sapalemed. Soˈliˈlin tatiih tatiihay ko pakayraan no hekal, kawra pafelian ni Yihofa kita to makedecay makakaolahay a kasakapot no salikaka. (ˈOlic 133:1) Padamaayho Cingra kitanan patanoktok to kalalaˈed ato paro no lomaˈ. (Ifiso 5:33–6:1) Roma i, pafeliayho Cingra kitanan to taneng ato micalepay mihapinang to demak a inaneng, padama kitanan padadotoc rihaday ko falocoˈ. Kawrira, mamisaˈicel kita ngaˈ ngaˈay padadotoc madimadi matayal saki Yihofaan. Misamaanay hani? Samanen nolatekay pakayniay kita i sasowalen no salikaka anca midemakan nangra a mapakararaw alatek, pakayniayho i pisaliyaliyaw mararaw to malecaday a raraw no niyah a matoleden ko falocoˈ alatek. Aka mapawan, (1) ano mapakararaw no salikaka kita i, (2) ano mapatoled no ramod kita i, (3) ano matoled kita to niyahan i, kamayan kita padadotoc caay ka pisawad midoko ci Yihofaan. w24.03 14 fiedac 1-2 fatac

Finawlan ni Yihofa tada makalimay a adihay ko demak saki Cingranan. Alatek matengilay iso ko nalifetan no ˈalomanay salikaka, cangra mirienangay to SKE, o roma malinahay tayra misaaliay to ˈalomanay mitosilay a pala. Ano ngangaˈay kono miso a pakayraan i, patirengen iso ko mahaenay a patosokan. (Dmak 16:9) Ano cowa ka ngaˈay kiso patireng to mahaenay a patosokan nohatini i, aka piharateng to masalaenoay ko niyah, samanen itini i cacikayen no Krisciyang, o kalimlaan i, o mihadidiay. (Matay 10:22) Ano kitinien iso i ˈicel no niyah ato pakayraan iso misaˈicel a mihodop ci Yihofaan i, aira ko taˈangayay a epoc. Mihaen kiso i, ngangaˈayto a padadotoc mikotod ci Yisan ikor no micada kiso to paputisem.—ˈOlic 26:1. w24.03 10 fiedac 11 fatac

Sidaˈitay a Wama i kakarayan mikiˈokay a pasowal, ano pasasiyor kita i, o sasododen Ningra kita. (ˈOlic 86:5) O papakasoˈlinen ita ko mikiˈokan ni Yihofa. Ano mikifalocoˈ kita pakayni i raraw no niyah a pasasiyor i, o papakasoˈlin to misododanto ni Yihofa kita. Haratengen, ci Yihofa cowa ko pakinaliay ko saali a Kawas, cowa ko mamisaali Cingra kitanan to cowa ko mamadangar ita a demak. Ano misarocodayto kita i, o midemakan ita misalimlaan Ningra maemin. Roma i, haratengen ita koya misarocoday matayal ci Yihofaan a tamdaw i Fangcalay Cudad. Tinakoen, halafinay a tatokian, ci Pawlo marorayay a matayal to demak ni Yihofa. Maraayay ko nirakatan ningra a lalan, tayra icowacowa a pala, patireng to adihayay kasakopang. Ikorto, mafalicay ko pakayraan, caayto ka ngaˈay cingra matira to isalakatay, adihay ko mitosilay a demak. Pakayniay cingra a malahdaw ko pihayda no Kawas han? Cowa! Padadotocay cingra midemak to madangaray no niyah, palemedan ni Yihofa cingra. (Dmak 28:30, 31) Malecaday, o midemakan ita saki Yihofaan, pakayni kafalic no pakayraan cowato ka lecad. Nikawrira, pakayni ci Yihofaan, o masakalimlaan i, mikitini i araaw no falocoˈ ita matayal Cingranan. w24.03 27 fiedac 7, 9 fatac

Itini mitolonay a pakayraan, miterekay ci Yis to ngaˈayay taˈarawan no nisawawaan. Itini pidemak to mitosilay a tayal i, marariday ci Yis a mitolon. Adihayay ko dademaken ningra, marariday ˈaloman ko tamdaw mitoor cingranan, mansa papadeteng ci Yis milimasmas to toki a mitolon. (Marko 6:31, 45, 46) Paceremay cingra a lomowad, mihaen ngaˈ ira ko toki ningra misateked a mitolon. Kinacecayay, sapidemakaw cingra to kalimlaan a sasaˈosien misalafiiay a mitolon. (Luka 6:12, 13) Roma i, sapilahciaw to sapasangaray a ˈinorong i fafekang no sera i, ˈayaw no mamikinafalah to ˈorip a dadaya kinapinapinaay ci Yis pasayra ci Yihofaan a mitolon. (Matay 26:39, 42, 44) Mikitini taˈarawan ni Yis mananamay ita, ano hakowato ko ˈifowa no demak, o mamilimasmas kita to toki mitolon. Tinakoen, ngaˈay kita malecad ci Yisan pacerem a lomowad anca maosoy a mafotiˈ, dotoc sakadademaken konini a toki mitolon ci Yihofaan, mihaen ko demak o paihkalay kita to miakoˈiday ci Yihofaan pafeli to hatoki ita mitolon. w23.05 3 fiedac 4-5 fatac

Sinanoten, o cecay piˈarawan to Fangcalay Cudad a lalakaw saan ko sowal, ora “taktaken” sanay a tilid paharatengay to tamdaw, o olah ni Yihofa mahecaday o nanom no ˈalo a micefos to falocoˈ no Krisciyang. Onini kasemeran a sapatinako pahapinangay kitanan, o olah ni Yihofa tora manilnilay no fangcalay saocor a Krisciyang tada tangongolayto! O manilnilay no fangcalay saocor a Krisciyang mafanaˈay to maolahay ko Kawas cangranan. (Yuta 1) Hatiraay haw i, tarokos ci Yohani mikifalocoˈay a pasowal: ‘Tada maolahay ko kakarayanay a Wama kitanan, o wawa no Kawas saan minengneng kitanan!’ (1 Yohani 3:1) Oyanan aca manilnilay no fangcalay saocor a tamdaw ko kaolahan ni Yihofa han? Cowa ka hatira, maolahay Cingra kitanan maemin. O manan ko sangaˈayay a wacay to maolahay ci Yihofa kitanan hani? O sapatefoc. Pakayni sapatefoc, patalahkalay ci Yihofa to kasapaan a olah kitanan.—Yohani 3:16; Loma 5:8. w24.01 28 fiedac 9-10 fatac

Aniniay a sinael wa ngaˈay mahapinang ita ko cecay pakayraan ni Tafiti pakalowid to kokiˈ no falocoˈ. Itini katalawan a pakayraan misarocoday cingra midotim mamidemak ci Yihofa noikor to maanan pakayni cingranan. Mafanaˈay ci Tafiti aitini i matatodongay tatokian milidong ci Yihofa cingranan, samanen na somowalayto ci Yihofa, o mamidotoc a mala hongti no Israil ci Tafiti. (1 Samuil 16:1, 13) Pakaynien ci Tafitian ko sowal, o mikiˈokanho ni Yihofa a demak, mahecaday o malaˈosiayto maemin. Pakayni tisowanan mikiˈokay ci Yihofa mamidemak to maanan hani? Soˈlin nohatini wa tahalifaho kita to sapalifet, kawra itini faelohay hekal wa palahdawen ni Yihofa ko kihcod a pasangaray. (Isaya 25:7-9) Misangaˈay a Tatapangan ita ci Yihofa o ˈicel Ningra awaay ko tolas, wa ngaˈay patikol paˈorip to mapatayay a tamdaw, miadah to adada ita, hanaca palahdaw to kihcod misafelitay kitanan a tamdaw.—1 Yohani 4:4. w24.01 6 fiedac 12-13 fatac

Haratengen ko lalangian iso patafang to tireng micada to paputisem. Patafang kiso to tireng micada to paputisem, samanen makalimay kiso tomireng i tatihi ni Yihofa. Tikolen miharateng, samaanay kiso pakasoˈlin to mahelaay a soˈlinay kimad. Minanamay kiso to pakayniay ci Yihofaan a sifanaˈ, mansa matongalay ko pikangodo ato kaolah Cingranan, o kakarayan a Wama saan ko pinengneng Cingranan. Palahaday kiso to pakasoˈlinay falocoˈ, makesem to nano demak i salakat, oranto ecato pidemak to kaˈintehan ni Yihofa a demak, mitoor to araaw ni Yihofa a maˈorip. Mafanaˈay kiso maherekayto ci Yihofa misodod tisowanan, rihadayayto ko falocoˈ. (ˈOlic 32:2) Mirienangay kiso to saˈopo no Krisciyang, pasowal i tao to mananamay a kimad. Nohatini o patafangayto micadaayto to paputisem a Krisciyang kiso, romakatay to sakatayra midaˈocay ˈorip a lalan, misetek to falocoˈ padadotoc a romakat. (Matay 7:13, 14) Tanekteken ita eca ka ngiyangi, misarocod maolah ci Yihofaan, misetek to falocoˈ midofdof to limoˈot Ningra. w23.07 17 fiedac 14 fatac; 19 fiedac 19 fatac

Ano songilaˈen iso miharateng ko miketonan a sowal iso mipatafang to tireng i, caciˈicel a minaˈay to maamaan a sakayhid. Tinakoen, mamikalona kiso to ramod no tao han? Maedeng cowa ko mamahaen! Samanen maherekayto kiso miketon to sowal ci Yihofaan, “naˈayto” saan kiso somowal to tatiihay a demak. Cowato ko tatahira i kacilamitan no mararaway a coos a misafilofilo a miˈodot a mifalah to hatiniay a coos. Satapangho wa ‘palaliyoc a miliyas’ to ‘lalan no mararaway a tamdaw.’ (Taneng 4:14, 15) Tona maherekayto kiso patafang to tireng ci Yihofaan, mansa tatangsol minaˈay to kapiliˈan ni Yihofa a demak. Caay ko mamapawan kiso to taˈarawan ni Yis, misarocod midemak to kaolahan ni Yihofa a demak. (Matay 4:10; Yohani 8:29) O sapalifet ato sakayhid o sangaˈayay a toki, ho ngaˈay kiso misawacay to makalimay ko niyah ‘padadotoc mikotod’ ci Yisan. Pakasoˈlinen iso to papadama ci Yihofa tisowanan. w24.03 9-10 fiedac 8-10 fatac