Saka 10 Folad

Pasangaray midofdof saan kiso miharateng han? Na iraay ko mahaenay harateng no Hongti ci Tafiti, mansa saan ko sowal ningra mitolon ci Yihofaan: ‘Cangacangen Kiso paira to makahiay midofdof a harateng i falocoˈ ako.’ (ˈOlic 51:12) Tada maolahay ci Tafiti ci Yihofaan, kawra nolatekay pasangaran nanay patalahkal to midofdofay a waywayan. Mahaenay kita. Misamaanay hani? Saka cecay, hofoc han kita iraayto ko mitowakangay harateng. Saka tosa, nai litengan tahanini, mihalakaay ci Satan mikayhid to tamdaw malecad cingranan mitowakang ci Yihofaan. (2 Korinto 11:3) Saka tolo, o kaˈoripan ita a hekal matomesay ko mitowakangay a pinangan, ‘o hatiniay miontingay to tamdaw a pinangan, oyaan itiniay i tireng no mitowakangay a tamdaw.’ (Ifiso 2:2) Mihaenay, o mamisaˈicel kita micoˈay to ciraraway a pinangan, ci Akoma ato nini a hekal, mihaen o ngangaˈayto kita midofdof ci Yihofaan ato paikenan Ningra to fadangalan a tamdaw. w23.10 6 fiedac 1 fatac

Mikitini kita to pipala epah ni Yis to nanom a kafahkaˈan a demak, mamananam ko maanan hani? O misapoeneray. Midemak ci Yis tonini a kafahkaˈan cowa ka sapipasengiaw to niyah. Soˈlinay haw i, to hati:niay cowa ka pasengi cingra to nano demak no niyah. Mitawmecay cingra to misapoeneray, panokayan ningra ko ˈdil i Wamaan. (Yohani 5:19, 30; 8:28) Ano mitodong kita ci Yisan, mararid a mitawmec to misapoeneray i, cowa ko papahiyo kita to nano demak no niyah. Nanay cowa ko mamalitaˈang kita, o papaˈdilen koya midokoan ita tadamaanay a Kawas. (Yirimiya 9:23, 24) Nanay panokayen ita ko kihcod a ˈodingar i Cingranan. Citatodongay Cingra toninian, samanen ano awa ko sapadama Ningra, cowa ko mamalaˈosi ko maamaan a demak ita. (1 Korinto 1:26-31) Ano misapoeneray kita, o mananto ko demak ita to tao, aka pahiyo to niyah. O nano demak ita maˈaraway ni Yihofa, misalimlaay Cingra. Mafanaˈ toninian i, marenecan nanayto kita. (Nengnengen ko Matay 6:2-4; Hipray 13:16) Mitodong kita ci Yisan mala misapoeneray a tamdaw, wa pakahemek to falocoˈ ni Yihofa.—1 Pitiro 5:6. w23.04 4 fiedac 9 fatac; 5 fiedac 11-12 fatac

Itini sakayat no Kawas o tarokos ci Pawlo, palimoˈotay to Krisciyang a misikol to tao. Itini saˈopo i, sasamaan kita mihakelong tonini sapalimoˈot hani? Haratengen, o tao malecaday kitaanan makalim a pacaˈof. Haratengen hena, ano masasowal to widang cowa ka tomerep kiso, awato ko hapakayraan no tao a caciyaw han? Cato awih. Maedeng makalimay kiso malacafay misacaciyaw. Malecadayto, itini saˈopo makalimay kita ˈaloman ko pacaˈofay. Soˈlinay haw i, pairaen ita ko hatoki no salikaka patalahkal to pakasoˈlin no falocoˈ, o ngaˈayay a pakayraan pakalalok cangranan konini. (1 Korinto 10:24) Mihaenay, apotoˈen ita ko sowal. Ano mihaen i, o misikayay a tamdaw ngangaˈay mitoroˈ to ˈalomanay tamdaw pacaˈof to salicay. O roma sa i, soˈlinto apotoˈ ko sowal iso, aka somowal to adihayay a masakalimlaan. Ano pakinacecay han iso milahci ko cecay fatac i, wa awato ko hasowal no romaroma tamdaw. w23.04 22-23 fiedac 11-13 fatac

Haratengen ita, padadotoc padama to tao o kalimlaan konini, mangalef mitongal a mirienang to mitosilay tayal, padama to tao mafanaˈ to soˈlinay kimad. Mitosil i, o mamakahi kita mifalic. Malitemohay ita ko masakenakenaay a tamdaw, masasiromaay ko lalengawan, pihakelongan ato pinengneng nangra to demak. Itini makahiay mifalic a pakayraan, o ngaˈayay a taˈarawan ita ko tarokos ci Pawlo. Minilnilan ni Yis ci Pawlo malo tarokos, ‘matayal saki kalo a kitakit.’ (Loma 11:13) O mitosilan ni Pawlo mahawpay ko Yutaya tamdaw, Krisiya a tamdaw, adihayay ko sifanaˈ a tamdaw, cowa ka picudad a maomahay, o cihafayay tamdaw ato hongti. Sapitemeraw to masakenakenaay a tamdaw, ano masamaanayto a tamdaw ko misiˈayawan samatiyaen ni Pawlo cangranan. (1 Korinto 9:19-22) Misinanotay cingra to serangawan, lalengawan ato pihakelongan no tamdaw, patatodong a misalof to sapitosil cangranan. Malecaday, ano makahi kita mifalic, patatodong to saali no tamdaw misalof to hapakayraan a mitosil, o mitosilay a tayal ita wa taˈangayto ko epoc. w23.07 23 fiedac 11-12 fatac

O damsayay a tamdaw hananay i, cowa ko malonayay, ao tada ciˈicelay. O tamdaw ano tahasiˈayaw to pasangaray pakayraan i, ira ko ikemoday a ˈicel wangaˈ rihadayen ko falocoˈ. O damsayay i, o ‘minaroˈan no fangcalay saocor.’ (Kalatiya 5:22, 23) Mihongyakan tono Krisiya sowal, onini “damsayay” hananay, somowalay to mapahatatanamayto a malafelay efa. Haratengen hena, o malafelay a efa soˈlin mapahatatanamayto, kawra kamayan a ciˈicelay cimira. Kita i, sasamaan malo damsayay a ciˈicel hani? Cowa ko niyah aca ko tatiˈeren, tolonen ita ci Yihofa pafeli kitanan to fangcalay saocor, padama kitanan palahad tonini makapahay capeling. Madangarayto no ˈalomanay salikaka konini, ano tahasiˈayaw cangra to pilikaf anoca pisalalicay no tao i, kamayan a damsay cangra pacaˈof, oranto i, masemerayto ko tamdaw.—2 Timoti 2:24, 25. w23.09 14 fiedac 3 fatac

Itini cecay kasapaan a mapolosi, maˈaraway no tarokos ci Yohani ko 24 a malohemay malitengay itini kakarayan midokoay ci Yihofaan. Pakahemekay cangra ci Yihofaan, somowal to citatodongay Cingra milifok to ‘ˈdil, pikangodo, ˈicel.’ (Paˈarawan 4:10, 11) O madimadiay a coyoh pakahemekay ci Yihofaan. Adihayay ko lalangian nangra mihaen to demak, samanen malacafayay cangra ci Yihofaan itini kakarayan, cipinangay Cingranan, hanaca mikitini midemakan ni Yihofa mahapinang adihayay ko masakenakenaay makapahay capeling Ningra. Maˈaraw nangra ko nano demak ni Yihofa, mikifalocoˈayto pakahemek Cingranan. (Yopu 38:4-7) Ciharatengay kita itini i satolon pakahemek ci Yihofaan, pasowal Cingranan hano maolah kita Cingranan, masemer Cingranan. Mikingkiw to Fangcalay Cudad i, ngaˈayay songilaˈen a miharateng, o maanan a capeling ni Yihofa ko mikiriwiˈay a misolot tisowanan. (Yopu 37:23; Loma 11:33) Ikor pasowalen ci Yihofa, onini a capeling samaanay mitemer to falocoˈ iso. Roma i, cowa ko pipadama aca Ningra tisowanan, mipadamaayho to romaroma salikaka, mansa ngaˈayay kiso pakayni tonini a demak pakahemek Cingranan.—1 Samuil 2:1, 2. w23.05 3-4 fiedac 6-7 fatac

Isaka 1919 miheca, matedalayto ko finawlan no Kawas miliyas to Taˈangayay Papilon. Itiyaay toyaan a mihecaan, ‘madimadiay citanengay a koli’ misatapangay matayal, militemoh to matatodongay ko piharateng a tamdaw romakat to mafawahayto a “Makoracay a Lalan.” (Matay 24:45-47; Isaya 35:8) Samanen iraayto ko misadakan a sapadama no iˈayaway a madimadiay ‘mitomadaway to lalan a tamdaw,’ oya romakatay tonini taˈangayay lalan a tamdaw, hato matongal matongalayto ko kafanaˈ ci Yihofaan ato araaw Ningra. (Taneng 4:18) Mikitiniayto cangra mitoor to palinian ni Yihofa a maˈorip. Soˈliˈlin adihayay ko sasalofen nangra, kawra cowa ka halamham ci Yihofa cangranan to tatangsol sa madangar koniya kihcod, ao palidlid hananay a misalof cangranan. Ikorto i, kita kahacecay tamdaw ngangaˈay a pakahemek ci Yihofaan itini maamaan a demakan, itiya o hahakowato ko kalipahak ita saw! O kahacecay a lalan o caceriden a mitomadaw. Mikitini 1919 miheca misatapang, mitomadaway to “Makoracay a Lalan” caay ka paselaˈ, o araaw i, papadama to ˈalomanay tamdaw miliyas to Taˈangayay Papilon. w23.05 17 fiedac 15 fatac; 19 fiedac 16 fatac

O Malohemay Malitengay i Congpo pahatatanamay to madimadiay ngaˈayay pakasoˈlinen a hadama nangra, midamaay cangra to Malohemay Malitengay i Congpo i kahacecay a kapot no iing misaysay to adihayay kalimlaan a tayal. Maherekayto cangra misaday padadotoc a midimokos to lopayˈay siri ni Kristo. Ano mamaherekto ko taˈangayay padiing i, o maˈoripayho i fafekang no sera a manilnilay no fangcalay saocor a Krisciyang mapolongto tayra i kakarayan ikor, o matatodongay pidoko papadadotoc a materek itini fafekang no sera, samanen papadadotocen ni Yis Kristo mikerid ko finawlan no Kawas i fafekang no sera. Soˈliˈlin mamaˈodis no Makok a Kok (makomoday a kalo kitakit) ko finawlan no Kawas, kawra ora saˈodis cowa ko hahalafin ko toki, hanaca cowa ko mamalaˈosi cangra. (Icikil 38:18-20) Orira noka piˈodis cowa ko papakaconged to finawlan ni Yihofa padadotoc midoko Cingranan. O lalidongen no Kawas cangra! Itini i mapolosi no Paˈarawan, maˈaraway no tarokos ci Yohani ko ‘taˈangayay ˈopo’ no roma lopayˈay siri, pasowalan no coyoh ci Yohani: ‘Onini a tamdaw mikitiniay i taˈangayay padiing a masadak.’ (Paˈarawan 7:9, 14) Mihaenay, o dadipayal a rihaday ko taˈangayay ˈopo a tamdaw. w24.02 5-6 fiedac 13-14 fatac

Sasamaan kita milifok to fangcalay saocor hani? Tolonen a micangacang ko Kawas pafeli kitaanan to fangcalay saocor, kingkiwen ko mitemeran no fangcalay saocor a Fangcalay Cudad, ato micawmaˈ to mikayatan no fangcalay saocor a likakawa no Kawas. Mihaen kita to demak i, ngangaˈayto a palahad to minaroˈan no fangcalay saocor. (Kalatiya 5:22, 23) Edengan oya makoracay ko harateng ato waywayan a tamdaw ko pafelian no Kawas to fangcalay saocor. Ano padadotoc kita miharateng to cowa ka korac a midemakho i, caayto pafeli ko Kawas to fangcalay saocor. (1 Tisalonika 4:7, 8) Sapadadotocaw milifok to fangcalay saocor, aka a ‘misakahmaw to patemeran no Kawas a lihaf.’ (1 Tisalonika 5:20) Itini tonini a lihaf, o roma milingatay to romiˈad ni Yihofa, o roma patalipaˈelalay kitaanan macalohayto nohatini, o pakaynian no Kawas i fangcalay saocor pafeli kitaanan. Hato maraayayho ko Armakiton cowa ko aitini i kaˈorip ita a mifekad, aka ka saan. Paifalocoˈen ita to mangataayto konini a romiˈad, misaˈicel a mitawmec to makapahay a waywayan, hanaca ˈifowa matayal to midokoay to Kawas a demak.—2 Pitiro 3:11, 12. w23.06 12 fiedac 13-14 fatac

Itini i tingnaw ano mahadak ko maˈodangay a sasing, sasamaan ko pidemak ita hani? O tatangsol kita a misaˈosi, eca ka pinengneng to mahaenay a sasing. Pakaynien kitaanan, o kalalaˈed aci Yihofaan o sakakaay kalimlaan. Maharateng konini, o mamadoloto tangsol a midemak. O roma sasing cowa ko maˈodangay a lalakaw saan ko pinengneng no tamdaw, kawra mikidatay to sakaˈodangaw. O mahaenay a sasing hano laliyasen hani? Samanen o mimingay aca maˈodangay a harateng caay ka olah kita. (Matay 5:28, 29) Ci Taywi o malohemay malitengay i Taylan, sanay cingra: “Milicayan ako ko niyah: ‘Soˈliˈlin cowa ko maˈodangay a lalakaw konini a sasing alatek, kawra ano padadotoc kako minengneng, mamahemek ci Yihofa han?’ Miharateng tonini a salicay, padamaay takowanan citaneng ko pisaˈosi.” Mikangodo kita ci Yihofaan, caay ka ciharateng to sakaecaaw ka hemek Ningra, wa ngaˈayto citaneng ko pisaˈosi. Mikangodo to Kawas o ‘satapangan no taneng.’ w23.06 23 fiedac 12-13 fatac

O ‘lomaˈ’ o kasakopang no Krisciyang ko mitoroˈan alatek. Itini taˈangayay padiing, ano padadotoc kita makelec malacafay to salikaka, mikiˈokay ci Yihofa o mamidipot kitaanan. Mihaenay, o mamisaˈicel kita maolah to salikaka, cowa ko pihadidi aca cangranan. O milingatay to sakaˈorip ato sakapatay konini! Ano irato ko ‘romiˈad ni Yihofa’ i, mamisemsem ko tamdamdaw. (Cifaniya 1:14, 15) Ano finawlanto ni Yihofa tatahalifa to pasangaray a laliyadan. Nikawrira, ano aniniho maherekto kita misaday, itiya o papadadotoc a rihaday, ngaˈayho padama to tao. Ano samaanto ko sapalifet noikor, papadadotoc kita mihadidi. Ano misemsem ko salikaka i, mamisaˈicel kita padama cangranan, patalahkal to siniˈadaay falocoˈ cangranan, midimokos to saali nangra. Papatalahkalho kita to olah i salikaka, malecad o midemakan anini. O papalifonen ni Yihofa kita, padama kitanan itini faelohay a hekal milayap to midaˈocay a ˈorip. Itiya, mamalahdawto ko kihcod a roray ato pades.—Isaya 65:17. w23.07 7 fiedac 16-17 fatac

O tanektekay ciˈicelay a tamdaw ko madimadiay midokoay to Kawas a tamdaw sanay ko Fangcalay Cudad, nikawrira malonayan nanay cangra nolatekay. Tinakoen, miharateng ko Hongti ci Tafiti to niyah, latekay sano ‘lotokay a tanektek,’ kawra nolatekay ‘matalaway a mamirmir.’ (ˈOlic 30:7) Ano matomes no fangcalay saocor ci Samson i, taˈangayay ko ˈicel, nikawrira mafanaˈay cingra, ano malahdaw ko fangcalay saocor i, ‘malecaday to romaroma tamdaw cowato ka taˈangay ko ˈicel.’ (Kakitaan 14:5, 6; 16:17) Ira ko ˈicel nonini a madimadiay sikawdan, samanen iraay ko sapadama ni Yihofa. Tarokos ci Pawlo mihayiay to misaaliay ko niyah to sapafeli ni Yihofa a ˈicel. (2 Korinto 12:9, 10) Ciadadaay ko tireng ningra. (Kalatiya 4:13, 14) Latekay pasangaray cingra midemak to matatodongay a demak. (Loma 7:18, 19) Latekay macariraway caka rihaday ko falocoˈ ningra. (2 Korinto 1:8, 9) Nikawrira, hacowa malonay ci Pawlo i, hacowaay ira ko ˈicel. Misamaanay hani? Samanen pafelian ni Yihofa ci Pawlo to misaalian a ˈicel, patanektek a paˈicel ci Pawloan. w23.10 12 fiedac 1-2 fatac

Nolatekay ciharatengay kiso to awaay ko epoc no niyah alatek, aka mapawan o ci Yihofa ko misolotay tisowanan tayra i tatihi Ningra. (Yohani 6:44) Cipinangay Cingra to kemod no falocoˈ ita, maeminay Ningra maˈaraw ko cowa ka ˈaraw ita a kangaˈayan no niyah. (2 Rayray 6:30) Mihaenay ano na pasowalay Cingra, itini pinengneng Ningra o kalimlaan kita saan i, o papakasoˈlinen ita Cingra. (1 Yohani 3:19, 20) O roma salikaka ˈayaw no mafanaˈ to soˈlinay kimad i, midemakay to mararaway, telocto tahaniniay a cikiyamen ko falocoˈ nangra. (1 Pitiro 4:3) O romaroma salikaka cikiyamen ko falocoˈ i, samanen kamayan cangra pakayni sapicoˈayaw to mararaway a coos a marowien ko falocoˈ. Kiso i? Iraay ko mahaenay ˈangongolay a kiyam no falocoˈ han? Ano hatiraay i, haratengen ko papina madimadiay sikawdan no Kawas, maedeng o mamasayar ko falocoˈ iso, samanen iraay ko malecaday a harateng nangra. Tinakoen, tarokos ci Pawlo na miharatengay to tadancaay ko niyah, hato marorayen ko falocoˈ. (Loma 7:24) O roma sa i, soˈlinto pasasiyoray cingra to nano raraw no niyah itiyaho, micadaayto to paputisem, kawra saanho ko sowal to niyahan ‘o samimingay kako i lalomaˈ no tarokos,’ “o satatiihay no ciraraway a tamdaw kako.”—1 Korinto 15:9; 1 Timoti 1:15. w24.03 27 fiedac 5-6 fatac

Mikitini ci Yoasan mananamay ita a cecay sapasifanaˈ i, mamalawidang kita to maolahay ci Yihofaan, pakahemekay Cingranan a tamdaw, samanen tawlikay ko pifiyor nangra kitaanan. Cowa ko sahto sa malecaday ko mihecaan a tamdaw ko hawidang ita, haratengen o mihecaan ni Yihoyata ikakaay ko taˈangay ci Yoasan, kawra o sangaˈayay a widang cangra. Itini pipiliˈ to widang i, ngaˈayay licayen ko niyah: “Ngaˈay cangra padama takowanan paˈicel to pakasoˈlin ci Yihofaan han? Pakalalokay cangra takowanan midofdof to palinian ni Yihofa han? Maolahay cangra milengo to pakayniay ci Yihofaan ato soˈlinay kimad a demak han? Mikangodoay cangra to palinian no Kawas han? Edengan o kaolahan ako mitengil a sowal ko hasowal nangra, anca itini matatodongay a tatokian misalof takowanan han?” (Taneng 27:5, 6, 17) Soˈlinay i, ano cowa ka olah ko widang iso ci Yihofaan, o cowato ko misaalian iso a widang cangra. Kawra ano maolahay ci Yihofaan ko widang iso, o sasalimlaen ko hatiniay a widang, o papadama cangra tisowanan!—Taneng 13:20. w23.09 9-10 fiedac 6-7 fatac

O alfa hananay o saka cecay tilid no Krisiya, o omika hananay o salikoray a tilid. ‘O Alfa, o Omika Kako’ sanay ci Yihofa to Niyahan, o mamitadtad ano miteka Cingra to cecay a demak i, o papadotocen a milahci, tangasa i kalaˈosian no demak. Maherekto ci Yihofa misangaˈ ci Ataman aci Ifaan i, pasowal cangranan: “Ka lenak, miedef i fafekang no sera, mipamatang tonini sera.”’ (Satapangan 1:28) Ta somowal ci Yihofa tonini araaw i, hato pasowalay to “Alfa” sanay. O teloteloc ni Atam aci Ifa ano miedefto to polong a hekal, onini malefotayto midofdofay to Kawas a tamdaw, palakoingen ko kihcod a cikiw i, malaˈosiayto ko araaw ni Yihofa, itiyato i, o “Omika” ci Yihofa. ‘Maharekto masangaˈ ko kakarayan ato sera’ ikor, o fangcalay romiˈad hananay Ningra ko saka pito a romiˈad a misawacay, itini i pihererekan no saka pito romiˈad i, o araaw Ningra to cikiw ato tamdaw malaˈosiayto a maemin.—Satapangan 2:1-3. w23.11 5 fiedac 13-14 fatac

Mikitini Papilon tahira i Israil a lalan cowa ka ngaˈay rakaten, wa sepat folad ko halafin alatek, kawra mikiˈokay ci Yihofa papalahdaw to kihcod a sacara itini i lalan. Pakaynien i madimadiay a Yutaya tamdaw ko sowal, o malifokay a sapalemed i ikor no minokay i Israil, ikakaay ko kaadihay to kinafalahan nangra, o sakakaay a sapalemed o milingatay to midokoay a demak. Itini Papilon awaay ko fangcalay sefi ni Yihofa, awaay ko patoˈayaan a cadada, awaayho ko masacefangay no saysi. Mihaenay, awaay ko pakayraan no Israil tamdaw mitoor to Rikec ni Mosi patoˈaya ci Yihofaan. Roma i, o midokoay to makaniway kawas a tamdaw, ikakaay ko ˈaloman to midokoay ci Yihofaan a tamdaw, oniya tamdaw cowa pikangodo ci Yihofaan ato ˈakawangay palinian Ningra. Mihaenay, masapatekay masaˈofaday mikangodoay ci Yihofaan a Yutaya tamdaw halamhamay patikol i nalacolan, miliyaw patireng to matatodongay a pidoko itira. w23.05 14-15 fiedac 3-4 fatac

Sapadadotocaw ‘malo ˈodingaray a wawa,’ misaaliayho kita to sapadama no fangcalay saocor, samanen itini tonini a mapelalay ko waywayan a hekal sapadadotocaw a makorac, cowa ko madoloay. (1 Tisalonika 4:3-5, 7, 8) O fangcalay saocor papadama kitanan micoˈay to harateng no hekal, mahawpay ko kihcod misafelitay to araaw no Kawas a sasowalen ato harateng. Papadamaho ko fangcalay saocor kitanan palahad to ngaˈayay minaroˈan, o ‘masakenakenaay ngaˈayay, moecelay, madimadiay.’ (Ifiso 5:9) O cecay pakayraan milifok to fangcalay saocor i, pasayra i Kawas mitolon. Sowal ni Yis, ci Yihofa ‘papafeli to fangcalay saocor i micangacangay Cingranan a tamdaw.’ (Luka 11:13) Roma i, mirienang kita to saˈopo, malacafay to salikaka pakahemek ci Yihofaan, mamilifok to fangcalay saocor. (Ifiso 5:19, 20) O fangcalay saocor pairaay to tawlikay, padama kitanan malo kahemekan ni Yihofa a tamdaw. w24.03 23-24 fiedac 13-15 fatac

Mamisaali kiso to mihadidiay a falocoˈ han? Ano hatiraay i, cangacangen ko Kawas. O cecay a capeling no fangcalay saocor ko mihadidiay. (Kalatiya 5:22, 23) Mansa, ngitangiten ci Yihofa pafeli kitanan to fangcalay saocor, padama kitanan palahad tonini capeling. Kita ano itiniay i maanan a pakayraan madoloay a maˈefangen i, ‘padadotocen mingitangit’ ci Yihofa pafeli to fangcalay saocor, padama kitanan paihkal to mihadidiay. (Luka 11:13) Ngaˈayay ngitangiten ci Yihofa padama kitanan mikitini i pinengneng Ningra minengneng to demak. Ikor no pitolon i, mamisaˈicel kita to romiˈamiˈad paihkal to mihadidiay falocoˈ. Papadadotoc kita mitolon halo misaˈicel patalahkal to mihadidiay, papadamaento ni Yihofa kita malo iraay ko mihadidiay falocoˈ a tamdaw, mihaen i, mamalo capelingto no mita ko mihadidiay. Minanam to ngaˈayay taˈarawan i Fangcalay Cudad wa ira ko sapadama. I Fangcalay Cudad adihayay ko patalahkalay to mihadidiay falocoˈ a ngaˈayay taˈarawan, ano dotimen ita konini a maˈoningay mamananamto sasamaan patalahkal to mihadidiay falocoˈ. w23.08 22-23 fiedac 10-11 fatac

Mikiˈokan ni Yis ci Pitiro to dadamaen ni Yihofa cingra. Patikolto maˈorip ci Yis midemakay to kafahkaˈan, padama ci Pitiroan ato mikapotay cingranan a tarokos mitafokod to adihayay foting. (Yohani 21:4-6) Onini kafahkaˈan maedeng padamaay ci Pitiroan pakasoˈlin, iraay ko ˈicel ni Yihofa midimokos to saali nangra i kaˈorip. Itiya maharatengay ni Pitiro alatek ko nano sowal ni Yis, o tamdaw ano ‘padadotoc a micangacang to Hongti Kitakit,’ o dadimokosen ni Yihofa cangra. (Matay 6:33) Oranto i, paisalakatan ni Pitiro i kaˈorip ko mitosilay tayal, cowato pisamacay a mifoting. Kongyen 33 miheca to Kocinsic, timoloay ci Pitiro a misawacay, padama to pinaay caˈol a tamdaw micada to ngaˈayay lihaf. (Dmak 2:14, 37-41) Ikor, padamaayho cingra to Samariya ato roma finacadan a tamdaw mikotod ci Kristoan. (Dmak 8:14-17; 10:44-48) Awaay ko hasasa, misakaretengan ni Yihofa misaka dademak ci Pitiro, padama to masakenakenaay a tamdaw micomod i kasakopang no Krisciyang. w23.09 20 fiedac 1 fatac; 23 fiedac 11 fatac

Itiniay pipalaˈafo no Papilon to Yirusalim ikor no 2 mihecaan, o Hongti no Papilon ci Nipukatnicar itini nitiih ningra maˈaraway ko taˈangayay a faco. Macariraway cingra, misaaliay to citanengay a tamdaw mitadtad to nitiihan ningra, ano eca i, papatayen cangra maemin, mahawpay ci Taniil. (Taniil 2:3-5) Itini i kacalohan a tatokian, tatangsol ci Taniil a midemak, oranto i, ‘misaaliay to sapipanayaraw no hongti to romiˈad, sakangaˈayaw ningra misahci a pasowal toya nitiihan.’ (Taniil 2:16) Awaay ko sowal no Fangcalay Cudad to mitadtaday i ˈayaw ci Taniil to nitiihan, mihaen ci Taniil tada misaaliay to timolo ato pakasoˈlin no falocoˈ. Misaaliay to tatoloay widang ‘mingitangit to ikakarayanay a Kawas siniˈada cangranan, patalahkal to tatodong nonini nitiihan.’ (Taniil 2:18) Mipacaˈofan ni Yihofa ko satolon nangra, padama ci Taniilan mitadtad to nitiihan ni Nipukatnicar, telocto matafoay ko ˈorip ni Taniil ato tatoloay widang. w23.08 3 fiedac 4 fatac

Saharateratengen ko epoc no mihadidiay. Ano ira ko mihadidiay falocoˈ ita i, o lalipahak, rarihaday, mihaen i, ciepocay to sakatanoktok no tireng ato falocoˈ. Ano mihadidi kita to tao i, ngangaˈay ko kalalaˈed cangranan, o mamakedec ko polong a kasakopang a tamdaw. Ano mapakararaw no tao kita i, cowa ito ko raranikay a mangolaw, cowa ito ko mamangalef a tatiih ko demak. (ˈOlic 37:8 ato roma pihongyak; Taneng 14:29) Ora masakalimlaan i, o mitodongay to Wama ci Yihofaan, mamatongal ko nika piingid Cingranan. Mihadidiay falocoˈ onini a capeling misolotay to tamdaw, papaira to adihayay haepoc ita. Soˈliˈlin patalahkal to mihadidiay cowa ko madoloay nolatek, kawra tadiˈecen ko sapadama ni Yihofa, ngangaˈay kita padadotoc palahad tonini a capeling. Itini pihadidi a mitala to hakaira no faelohay hekal i, pakasoˈlinen ita ‘ci Yihofa minengnengay to mikangodoay Cingranan a tamdaw, midimokosay to mitalaay to madimadiay a olah Ningra a tamdaw.’ (ˈOlic 33:18) Nanay kita maemin misetek to falocoˈ, padadotoc micaˈedong to mihadidiay onini a makapahay capeling. w23.08 22 fiedac 7 fatac; 25 fiedac 16-17 fatac

Patodicekay ko sowal ni Yakop, o tamdaw alatek iraay ko pakasoˈlin no niyah sanay, kawra ora mahecaday a midemakan ningra icowaay hani? (Yakop 2:1-5, 9) Ikor masowalay ni Yakop o tamdaw maˈaraw ko ‘salikaka cowa ka edeng ko rikoˈ, cangoˈotay ko kakaenen toya romiˈad,’ kawra cowa pilayaˈ to kamay a midama. Onini a tamdaw alatek iraay ko pakasoˈlin no niyah saan, kawra o pakasoˈlin ningra awaay ko midemakan a midama, o manan ko epoc hani? (Yakop 2:14-16) Masowalayho ni Yakop ci Lahap, somowal to tano midemakan a patalahkal cingra to pakasoˈlin a ngaˈayay taˈarawan. (Yakop 2:25, 26) Onini a ˈalafang fafahiyan tahatengilay to pakayniay ci Yihofaan a demak, hanaca mahapinangay to iraay ko sadama ni Yihofa to Israil tamdaw. (Yosuwa 2:9-11) Samaanay cingra tano midemakan patalahkal to pakasoˈlin hani? Midipotan ningra ko tatosaay tahalifaay to katalawan misolapay no Israil, telocto malecaday cingra ci Aprahaman, soˈlin cowa ko malefotay a tamdaw, o moecelay sanay ko pinengneng no Kawas. Mikitini patirengan ningra ngaˈayay taˈarawan mahapinangay ita, o pakasoˈlin no falocoˈ pairaen ko midemakan a midama. w23.12 5-6 fiedac 12-13 fatac

Kita o Krisciyang, soˈlinto mafanaˈ to pinapina taˈeneran kimad no Fangcalay Cudad cowa ko mamasaloento. Itini sapadama no fangcalay saocor no Kawas, sapinanamaw kita to ‘tangongolay a demak no Kawas.’ (1 Korinto 2:9, 10) Ngaˈayay tanamen iso ko cecay micekiway a limasmas, hongaˈ matongal ko piingid no niyah ci Yihofaan han? Tinakoen, ngaˈayay songilaˈen iso micekiw samaanay ci Yihofa patalahkal to olah to nolitengan madimadiay a sikawdan, ato onini a tinakoan samaanay misawacay to maolahay Cingra tisowanan. Ngaˈayay songilaˈen iso minengneng ko patirengan ni Yihofa a midokoay a limasmas itini nolitengan Israil a kitakit, ato aniniay limasmas no kasakopang no Krisciyang iraay ko maanan a kalalecadan ato kasasiromaan. Ngangaˈayho kiso micalep a minanam to kaˈorip ni Yis ato mitosilay ningra, samaanay malaˈosi ko sapairasol no Fangcalay Cudad. Ano sapicekiwaw kiso toninian i, ngaˈayay sakadademaken ko Pirorodan to Mitepangan Cudad no Mikecolay ato Pirorodan to Mitepangan Cudad no Misawacayay Tamdaw ni Yihofa, ano mihaen kiso i, mamalifok ko taˈangayay a kahemek. Micalep a micekiw to Fangcalay Cudad, mamatongal ko kaciˈicel no pakasoˈlinay falocoˈ iso, ‘mamahelato iso ko pakayniay i Kawas a sifanaˈ.’—Taneng 2:4, 5. w23.10 18-19 fiedac 3-5 fatac

Tatodong no ‘fanekfek’ sanay i, ‘layaˈen pasadak.’ Kaikoray no sinael mitadtaday, o mahaenay a olah mamitahepo to raraw no salikaka, tatodong i, ira ko hatiniay a olah ita ngangaˈayto misodod to dangoc ato raraw nangra. Haratengen hena, alaen ko cecay kiradom mitahepo to cikaditay a cokowi, ano celaken kora kiradom i, cowato ko cecayay aca a kadit ko mitahepoan, ao masongilaˈay a matahepo maemin. Malecaday, ano misaˈicel kita fanekfek a maolah to salikaka, cowa ko cecayay tosaay a dangoc no salikaka, ao mamisodod to ‘adihayay a raraw’ nangra. Nolatekay, sapisododaw kita to salikaka cowa ko madoloay, kawra ano tangongolay ko olah ita cangranan, o mamadangarto no mita. (Kolosay 3:13) Ano ngaˈay kita misodod to salikaka, paihkalay konini to soˈliˈlinay ko olah ita cangranan, wa ngaˈayho pakahemek ci Yihofaan. w23.11 10-12 fiedac 13-15 fatac

Taˈangayto i, misatapangay ko Hongti ci Yosiya mitomadaw to fangcalay sefi ni Yihofa. Toniya tatokian, mahelaay no tamdaw ko ‘nipafelian no Kawas ci Mosian a Rikec a cudad.’ Matengil ni Yosiya miˈosi ko tamdaw to sarikec ikor i, matemeray ko falocoˈ, tangsol mitoor to sarikec a midemak. (2 Rayray 34:14, 19-21) Sapitanamaw kiso miasip to Fangcalay Cudad to romiˈamiˈad han? Ano mihaenayto kiso a midemak, samaanay ko pidemak iso hani? Mitiliday kiso to sapadama to niyah a sinael han? Maedeng 39 ko mihecaan ni Yosiya i, taˈangayay ko raraw, telocto malahdaway ko ˈorip no niyah. Mitiˈeray cingra to niyah, cowa pasayra ci Yihofaan micangacang to sakayat. (2 Rayray 35:20-25) Mananamay ita ko manan? Ano hakowato ko mihecaan ita, hakowa ko halafin a minanam to Fangcalay Cudad, padadotoc kita micangacang ci Yihofaan. Tatodong i, mamicerid micangacang ci Yihofaan pafeli kitanan to sakayat, mamiceridho mikingkiwto Kimad Ningra, hanaca micada to sapaini no matenesay a Krisciyang. Mihaen ko demak ngaˈay padama kitanan maliyas ko sakararawaw, o lalipahakto ko kaˈorip ita.—Yakop 1:25. w23.09 12 fiedac 15-16 fatac

Itini Fangcalay Cudad ˈalomanay ko ngangaˈay todongen ita a fafahiyan. Cangra maolahay ci Yihofaan, madimadiay midoko Cingranan, ‘o mamiˈimer to kaˈorip, madimadi i maamaan a demakan.’ (1 Timoti 3:11) Roma sa i, itini kasakopang iraay ko matenesay a fafahiyan a Krisciyang, ngangaˈay todongen no kaemangay fafahiyan salikaka. Kaemangay fafahiyan salikaka, haratengen cima a matenesay fafahiyan salikaka ngangaˈay todongen namo ko taˈarawan nangra. Sinanoten iraay ko maanan makapahay capeling nangra, ikor saharateratengen sasamaan patalahkal kamo tonini a capeling. Papairaen no matenesay Krisciyang a capeling ko misapoeneray a falocoˈ. O misapoeneray fafahiyan salikaka iraay ko ngaˈayay kalalaˈed aci Yihofa ato tao. Misapoeneray cingra maolahay ci Yihofaan, mansa mikangodoay cingra to mipatirengan no kakarayan Wama a fadangalan no mikeriday limasmas. (1 Korinto 11:3) Itini paro no lomaˈ ato i kasakopang, midofdofay cingra to mikayatay a tamdaw. w23.12 18-19 fiedac 3-5 fatac

Halamhamay ci Yihofa to faˈinay maolah to fafahi, itini notirengan, nofalocoˈan, ato noˈadingoan midimokos to saali no fafahi. Ano palahad kiso to inaneng a misimsim, mafanaˈ mikangodo to fafahiyan, malo ngaˈayay pakasoˈlinen a tamdaw, maherekayto kiso a misaday, malo ngaˈayay a faˈinay noikor. Ano ciraramodto kiso latek ciwawato. Pakayni malo ngaˈayay a wama, ngaˈay kiso mikitini ci Yihofaan minanam to maanan hani? (Ifiso 6:4) Patodicekay ci Yihofa pasowal ci Yisan to tada maolahay cingranan, tada mihaydaay cingranan. (Matay 3:17) Ano malo wama kiso i, ka picerid pasowal to wawa tada maolahay kiso cangranan. Ano ngaˈay ko demak nangra i, pakahemeken cangra. O malo wamaay, ano mitodong to ngaˈayay taˈarawan ni Yihofa, o papadama to wawa malo o matenesay a Krisciyang. Mihaenay i, sasamaan ko pisaday iso anini hani? Wa ngaˈay kiso minanam maolah to paro no lomaˈ ato salikaka i kasakopang, hanaca mararid pasowal cangranan to maolahay kiso cangranan, masemeray cangranan.—Yohani 15:9. w23.12 28-29 fiedac 17-18 fatac

Madimadiay kita midoko ci Yihofaan, kawra malecaday kita to romaroma tamdaw mamisiˈayaw to adada ato maanan a pasangaray. Roma i, tatahalifaho kita to pisafelit ato hakokay, samanen o roma tamdaw ˈintehay to finawlan no Kawas. Soˈliˈlin cowa ko papalasawaden ni Yihofa ko sapalifet ita, kawra mikiˈokay Cingra to papadama kitaanan. (Isaya 41:10) Mitiˈer to sapadama Ningra, soˈlinto tahalifa kita to pasangaray, o ngangaˈay kita lipahak, mataneng ko pisaˈosi, hanaca padadotoc a madimadi Cingraanan. Mikiˈokay ci Yihofa to papafeli to rihaday no mita. (Filipi 4:6, 7) O paparihaday to ponoˈ, paparihaday to falocoˈ ita, edengan o iraay ko ngaˈayay noka lalaˈed aci Yihofaan a tamdaw mamatinako ko mahaenay a rihaday. Onini sapafeli no Kawas a rihaday ‘mataˈlifay to niharatengan no tamdaw,’ ikakaay to nisahalakaan ita ko nika fangcal. Na mingitangitay kiso mitolon ci Yihofaan, ikor sarihaday sanayto ko falocoˈ iso han? Mahaenay i, matinakoayto iso ko sapafeli no Kawas a rihaday kira. w24.01 20 fiedac 2 fatac; 21 fiedac 4 fatac

O madimadiay a tamdaw samanen tangongolay ko olah ci Yihofaan, mieminay to falocoˈ pakahemek to fangcalay ngangan Ningra. Mafanaˈay ci Tafiti pakahemek to fangcalay ngangan ni Yihofa malecaday o pakahemekay ci Yihofaan, samanen o ngangan ni Yihofa papiharatengay to tamdaw to o masamaanay a Kawas Cingra, maharatengto ko kihcod makapahay capeling ato kasemeran a midemakan Ningra. O pinengneng ni Tafiti o ngangan no kakarayan Wama o fangcalay, ciharatengayho ‘miemin to falocoˈ miemin to harateng’ pakahemek to fangcalay ngangan no kakarayan Wama. O Lifi a ngasaw mikeriday to tamdaw pakahemek ci Yihofaan, misapoeneray ko falocoˈ nangra a pasowal, ano tano maananto a sasowalen pakahemek to fangcalay ngangan ni Yihofa i, caayho ka edeng paihkal to mamalifok ni Yihofa a sapakahemek. (Nihimiya 9:5) Misapoeneray ko waywayan nangra, mikifalocoˈay a pakahemek ci Yihofaan, maedeng o papalipahak Cingranan. w24.02 9 fiedac 6 fatac

Ano eca ka laˈosi iso ko cecay mitaˈlifay to ˈicel iso a patosokan i, o mapadikayto kiso cowa ka saan ci Yihofa. (2 Korinto 8:12) Sapihatatanamaw a toki ko pasangaray han a minengneng. Haratengen ko malahciayto iso a demak. Sowal no Fangcalay Cudad: ‘O moecelay ko Kawas, cowa ko mamapawan Ningra ko nano demak namo.’ (Hipray 6:10) Mankora, kisoto i, aka mapawan. Haratengen ko malahciayto iso a demak: Latek o nika palahad iso to kalawidang ci Yihofaan, latek pasowalanto iso ko tao pakayniay ci Yihofaan a demak, latek malaˈosiayto ko micadaay to paputisem a patosokan. Toniya mataˈlifay a mihecaan, padadotocay kiso a macakat, matoorayto iso ko pina patosokan itini pidoko to Kawas. Nohatini, ngangaˈay kiso padadotoc a macakat, pasayra to kaˈayaway iso a patosokan talaˈayaw. Ira ko sapadama ni Yihofa, o ngangaˈay malaˈosi iso ko patosokan. Aka mapawan a misinanot to samaanay ci Yihofa padama tisowanan ato palemed tisowanan, ano mihaen i, itini kalingad no pipalaˈosi iso to patosokan, o lalipahak ko harateng. (2 Korinto 4:7) Ano caka pisawad kiso, o papafelien ni Yihofa kiso to adihayay a sapalemed.—Kalatiya 6:9. w23.05 31 fiedac 16-18 fatac

Mahemekay ci Yihofa patalahkal to pihayda i kaolahan Ningra a tamdaw. Itini Fangcalay Cudad maˈosiay ita, na kinatosaay ci Yihofa pasowal ci Yisan, sowal sa o kaolahan Ningra ci Yis, o mihaydaan Ningra. (Matay 3:17; 17:5) Sapakatengilaw kiso to paihkal ni Yihofa pihayda tisowanan han? Soˈliˈlin nohatini cowato ko mamikitini i kakarayan pangihaˈ Cingra, kawra pakaynian Ningra i Fangcalay Cudad a pasowal kiso. Mihaenay, ano ‘sapakatengilaw’ kiso to patalahkalan ni Yihofa to pihayda kitanan i, o cecay pakayraan i, fohaten ko Ratoh a Cudad, ˈosien ko damsayay a sowal ni Yis to nisawawaan. Malefotay ci Yis a mitodong to capeling no i kakarayan a Wama. Mansa ano maˈosi ita ko pipatalahkal ni Yis to pihayda i coka lefot kao madimadiay a nisawawaan i, malecad o matengilay ko patalahkalan ni Yihofa to pihayda kitanan. (Yohani 15:9, 15) Ano tahalifa kita to sapalifet i, aka miharateng to malahdawayto ko pihayda ni Yihofa to niyah, soˈlinay haw i, o sapalifet pairaay to hatoki ita misawacay hakowaay ko kaolah no niyah ci Yihofaan, hakowaay ko noka pitadiˈec Cingranan.—Yakop 1:12. w24.03 28 fiedac 10-11 fatac