Saka 11 Folad

Ano iraay ko wawa iso, ngaˈayay mitoor to mihecaan nangra, padama cangranan misaday to matatodongay a sapacaˈof. Nolatekay, itini saˈopo milengoay to mararamoday, ato no waywayan a lalangian, kawra iraay ko cecay anca tosa a fatac a salicay ngaˈayay ko wawa pacaˈof alatek. Roma i, padamaen ko wawa cipinang, o kahacecay a pakamay hano cowa ko mamatoroˈ. Mihaenay, ano caay ka matoroˈ ko wawa i, cowato ko mamatoled cingra. (1 Timoti 6:18) Kita kahacecay tamdaw ngangaˈay misongilaˈ a misaday, ho pakahemek ci Yihofaan ko sapacaˈof ita, ato pakalalok to salikaka. (Taneng 25:11) Latekay mikitohay kita to nalifetan no niyah, kawra aka kao niyah sa a demak ko sasowalen i pipacaˈof. (Taneng 27:2; 2 Korinto 10:18) O mipacaˈofan ita a demak samacayen i ci Yihofaan, i Fangcalay Cudad ato finawlan Ningra.—Paˈarawan 4:11. w23.04 24-25 fiedac 17-18 fatac

To sapadadotocaw a talipaˈelal, mararid a mapalal, kalimlaan ko ciolahay a falocoˈ. (Matay 22:37-39) Maolah kita to Kawas i, o kakodait a mitosil, soˈliˈlin tahalifa to pasangaray cowa ko mamisawad. (2 Timoti 1:7, 8) Ano maolah kita toya caayho ka fanaˈ to kimad a tamdaw i, o papadadotoc a mitosil, tano masakenakenaay a pakayraan a misawacay, tinakoen tano tingwa ato tikami paladaˈ to ngaˈayay lihaf. Makalimay kita mamafalic cangra ano hacowa alatek, misatapang a midemak to moecelay a demak, cowa ko mamisawad kita mitala cangranan. (Icikil 18:27, 28) O kaolahan ita a tamdaw mahawpay ko salikaka i kasakopang. Sasamaan kita patalahkal to hatiniay a olah hani? ‘Masasihinom pakalalolalok’ kita. (1 Tisalonika 5:11) Mahecad kita o makakapotay mamilood a sofitay, masasipaˈicel to salikaka. Cowa ko papadeteng kita midokaˈ anca miˈodis to salikaka. (1 Tisalonika 5:13, 15) Roma i, mamikangodo kita to mikeriday a faˈinayan salikaka i kasakopang.—1 Tisalonika 5:12. w23.06 10 fiedac 6 fatac; 11 fiedac 10-11 fatac

O cecay sapaˈicel to pakasoˈlinay falocoˈ a pakayraan i, dotimen ko milingatay to sapatefoc a demak. Pakaynian no Kawas i sapatefoc a limasmas mikiˈok kitanan, o mamalaˈosi ko sakiˈok Ningra. Songilaˈen ita misimsim hano limasmasen no Kawas ko sapatefoc, ato o maanan ko kinafalahan Ningra, mihaen i, wa matongal ko pakasoˈlin ita to mikiˈokan Ningra, pakasoˈlin to mamilayap kita to midaˈocay a ˈorip itini faelohay a hekal. Hano mahaen ko sowal hani? Sapalaˈosiaw to sapatefoc, o maanan ko kinafalahan ni Yihofa hani? Ocoran Ningra ko kaolahan a foseniˈan a Wawa, oya kanonoˈan a cafay Ningra, naitini i kakarayan tayni i fafekang no sera, mala o malefotay ko ˈorip a tamdaw. I fafekangho no sera ci Yis i, miememay to masakenakenaay a roray ato sapalifet, salikor mapasemsemay a mapatay. Tada taˈakayay ko kinafalah ni Yihofa! Ano sapasinowayaw ko Kawas kitanan i kapotoˈay miheca ko kaˈorip, hano hayi sa Cingra pasemsem a mapatay ko kanonoˈan a Wawa Ningra hani? (Yohani 3:16; 1 Pitiro 1:18, 19) Ano maherekayto ci Yihofa mihadak toniya matekesay a sapatefoc i, wa palaˈosien Ningra to mamicada kita to midaˈocay a ˈorip itini i faelohay a hekal. w23.04 27 fiedac 8-9 fatac

Iraay ko kalim ni Yihofa patikol paˈorip to mapatayay tamdaw han? Iraay. Mikayatan Ningra ko pina a tamdaw mitilid i Fangcalay Cudad to pakayniay patikol maˈorip a sakiˈok. (Isaya 26:19; Paˈarawan 20:11-13) Roma i, ano mikiˈokho ci Yihofa i, o lalahcien Ningra a midemak. (Yosuwa 23:14) Soˈlinay haw i, makalimay ci Yihofa patikol paˈorip to mapatayay a tamdaw. Mikitini i sowal ni Yopu mamahapinang ita, mafanaˈay cingra ano mapatayto cingra i, ciharatengay ci Yihofa to sapiliyawaw a minengneng cingranan. (Yopu 14:14, 15) Pakayni to polong a madimadiay mapatayay a sikawdan i, iraay ko mahaenay a harateng ni Yihofa, tada makalimay Cingra patikol a paˈorip cangranan maemin, tanoktokto ko tireng nangra, lipahak ko kaˈorip. Nikawrira, ˈayaw no patay caayho ka fanaˈ ci Yihofaan a masaˈofaday a tamdaw, wa misamaanto hani? Ciharatengay ko ciolahay a Kawas to sapatatikolaw cangranan a paˈorip. (Dmak 24:15) Halamhamay mala widang Ningra cangra, hanaca midaˈoc a maˈorip i fafekang no sera.—Yohani 3:16. w23.04 9 fiedac 5-6 fatac

Samaan ko pidemak iso matongal ko pakasoˈlin to hatokel noikor hani? O hatokel iso ano aitini fafekang no sera milayap to midaˈocay ˈorip, ngaˈay kiso miˈosi to pakayniay i lakoing a lalakaw no Fangcalay Cudad, halo pisongilaˈ midotim samanay ko kaˈorip itini faelohay a hekal. (Isaya 25:8; 32:16-18) Haratengen itiniayto kiso i lakoing. Paifalocoˈen iso ko makapahay a hatokel i faelohay hekal, o malifaay no niyah a pasangaray o ‘cecayay a liyad’ wa saanto kiso miharateng. (2 Korinto 4:17) O sapafeli ni Yihofa tisowanan kalimlaan a hatokel papadama tisowanan padadotoc mihadidi i sapalifet. Sapadamaaw tisowanan milifok to ˈicel, maharekayto ci Yihofa mihadak to misaalian iso a kihcod. Mihaenay, ano misaaliay kiso to sapadama milahci to ˈinorong, miemem to sapalifet anca padadotoc lipahak i, mikitini i falocoˈ mitolon ci Yihofaan, hanaca pakayni notekedan a pikingkiw micangacang to sakayat Ningra. Cacadaenho iso ko sapakalalok no salikaka, hanaca mararid miharateng to makapahay hatokel noikor. Mihaen, ‘mamitoor kiso to kasapaan a ˈicel no Kawas, milifok to misaalian a ˈicel, ngaˈay tanektek a ciˈicel,’ hanaca ‘ira ko mihadidiay ato lipahakay, padadotoc miemem.’—Kolosay 1:11. w23.10 17 fiedac 19-20 fatac

Adihayay ko lalangian ita, itini satolon mihaen to demak. O kihcod malifokay ita a makapahay a demak sahtoay o sapafeli Ningra kitaanan, ngangaˈay kita pakayni tonini a miakoˈid Cingranan. (Yakop 1:17) Tinakoen, akoˈiden ita Cingra misangaˈ to makapahay a cikiw ato kasapaan a maamaan, akoˈidenho Cingra pafeli to ˈorip ita, paro no lomaˈ, widang ato kalimlaan a hatokel. Roma i, tada miakoˈiday kita ci Yihofaan ira ko tatodong ita malo widang Ningra. Mamikiriwiˈ kita mihadak to ˈicel alatek, miharateng iraay ko maanan a lalangian no niyah miakoˈid ci Yihofaan. Anini, ˈalomanay tamdaw awaay ko miakoˈiday a falocoˈ, tocerid o misaalian aca no niyah ko kaciharatengan nangra, cowa ka pakayni i iraayto no niyah paihkal to miakoˈiday. Ano mafiyor no mahaenay a waywayan kita, alatek misaalian aca ko mihadakan ita mitolon ci Yihofaan. Sapicongedaw to mahaenay a demak mifekad, papadadotoc kita palahad ato paihkal to miakoˈiday a falocoˈ ci Yihofaan.—Luka 6:45. w23.05 4 fiedac 8-9 fatac

O cisidaˈitay a Wama Cingra, cowa ka sapakaˈarawaw kitanan misemsem. (Isaya 63:9) Kawra caay ko papalifaen Ningra kita to pasangar cowa ka saan. Nolatekay, pakidemay ko malifaay ita a sapalifet, hato itiniay i tangongolay a nanom ato faedetay a namal. (Isaya 43:2) Kawrira, mikiˈokay ci Yihofa to papadamaen kita milakowit tonini a sapalifet, hanaca onini a sapalifet cowa ko tatahadaˈoc midokaˈ kitanan. Roma i, papafelien ni Yihofa kita to fangcalay saocor, padama kitanan padadotoc a miemem. (Luka 11:13; Filipi 4:13) Mihaenay ngaˈayay kita a pakasoˈlin, o mamilifok kita to kihcod a misaalian, ngaˈay a padadotoc a miemem, tahatolas madimadi ci Yihofaan. Halamhamay ci Yihofa kitanan mitadiˈec Cingranan. (Hipray 11:6) Latekay, ano nengnengen hato cowa ko mamaremo ko sapalifet. Latek misatapangto cisasa ci Yihofaan to cowa papadama kitanan. Kawra mikiˈokay ko Fangcalay Cudad, mitiˈer kita to ˈicel no Kawas i, o ngangaˈay milakowit to ‘takaraway a ˈadipel.’ (ˈOlic 18:29) Aka cisasa kita, pakasoˈlin ko falocoˈ a mitolon, pasoˈlinen ci Yihofa papacaˈof Cingra padama kitanan.—Yakop 1:6, 7. w23.11 22 fiedac 8-9 fatac

Tada kasemeran ko kasomowal no Fangcalay Cudad to soˈlinay olah! Onini a sowal papadama to mararamoday tamdaw pakasoˈlin, o ngangaˈay tahadaˈoc ko olah no mararamoday tamdaw. Sakairaaw no midaˈocay a olah no mararamoday, oha mamihadak to ˈicel. Tinakoen, ano ciharatengay kita padotoc marengreng ko mataringay a namal i, o papatongalen to kasoy. Ano pakiyadi han i, o mamapadengto ko namal. Malecaday, ano sakairaaw no midaˈocay olah no mararamoday, o papadadotoc patanektek to kalalaˈed nangra. O romaroma mararamoday mafasawayto ko olah nangra sanay miharateng, mangalef ano mapaekel no sakaˈorip, adada no tireng anca palahad to wawa, hato caayto ka ngaˈay a saselaˈ, mamadoloto ira ko mahaenay a harateng. Toha sakacaaw ka mapadeng ko ‘marengrengay namal ni Yihofa,’ o faˈinay ato fafahi oha mamisaˈicel patanektek to kalalaˈed aci Yihofaan. w23.05 20-21 fiedac 1-3 fatac

Sasamaan kita palahad to timolo hani? Pakalalokay ko wama wina kitanan alatek malo timoloay a tamdaw, kawra o timolo hananay i, cowa ka lecad to hafay no lomaˈ, ngaˈay paroceken no wama wina. Palahad to timolo malecaday o minanamay to faelohay a inaneng, ano sapimametaw kiso to maanan a inaneng i, songilaˈen a mihapinang samaanay ko singsi a midemak, dotoc todongen a midemak. Malecadayto, sapalahadaw to timolo, ngaˈayay misongilaˈ mihapinang samaanay patalahkal ko tao to mahaenay capeling, dotoc todongen ko taˈarawan nangra. Malecad ci Taniilan, calepen ita a cipinang ko Kimad no Kawas, micerid pasayra ci Yihofaan mifowah to nafalocoˈan, palahad to tangongolay a kalawidang, mitadiˈec ci Yihofaan, pakasoˈlin to mamidama Cingra kitanan. Mihaen i, ano o mananto ko malifaay a sapalifet to pakasoˈlin no falocoˈ, o tatimoloto kita. Ano patalahkal kita to timolo i, marariday mikangodo ko tao, ngaˈayay padama to misasoˈlinay ko falocoˈ a tamdaw mafanaˈ ci Yihofaan. Soˈlinay haw i, tada masakalimlaan a capeling ko timolo, sasaˈicelen ita a palahad. w23.08 2 fiedac 2 fatac; 4 fiedac 8-9 fatac

Ora ‘hapinangen’ sanay a Krisiya sowal i, milingatay to mihapinangay to ekim anca linkim to o soˈlinay o makaniway hokira, patalipaˈelalay kitaanan mihapinang to matengilay anca maˈosiay a lihaf to o soˈlinay o makaniway hokira. Mihaen to demak tada masakalimlaan i kitaanan, samanen mangata mangataayto ko taˈangayay padiing. Aka sao maapaay a tamdaw, maamaan a sowalan pakasoˈlin sa, ao sakadademaken ko inaneng, pakayni to maˈosiay matengilay ita palalinien to Fangcalay Cudad ato sakayat no likakawa ni Yihofa. Ano mihaen i, cowa ito ko mamalipalaw kita, pakasoˈlin to naitiniay i tatiihay coyoh a sasowalen. (Taneng 14:15; 1 Timoti 4:1) Kita o ˈalomanay tamdaw, mamilakowit to taˈangayay padiing. Nikawrira o kahacecay tamdaw, cowa ka fanaˈ to mamifekad ko maanan a demak nocila. (Yakop 4:14) O mamaˈorip kita milakowit to taˈangayay padiing hokiya, anca ˈayaw nonini mapatayto, ano padadotoc kita madimadi, o mamilifok to midaˈocay ˈorip malo sapalifon. Nanay kita maemin pamoteken ko pinengneng to makapahay a hatokel, micerid a misaday a militemoh to romiˈad ni Yihofa. w23.06 13 fiedac 15-16 fatac

Cowa ka fanaˈ kita to sasamaan matatodong ko cecay sapairasol. (Taniil 12:8, 9) Nikawrira caka songilaˈ ko kacipinang ita to cecay sapairasol sasamaan matatodong i, o cowato ko mamalaˈosi konini a sapairasol cowa ka saan. Pakasoˈlinay kita malecaday ci Yihofa to isalakatay, itini matatodongay a tatokian patalahkal to hakafanaˈan ita a demak. Cato ka halafin, mamilasil ko tamdaw ‘dipayalay rihakedayto.’ (1 Tisalonika 5:3) Ikor, mamiˈodis ko kalo kitakit to mararaway a pihakelongan, palahdaw to polong mararaway a pihakelongan. (Paˈarawan 17:16, 17) Dotoc, mamiˈodis ko kalo kitakit to finawlan no Kawas. (Icikil 38:18, 19) Onini a demak mamikidat to Armakiton a lalood. (Paˈarawan 16:14, 16) Wa ngaˈay pakasoˈlin kita, kakalikito mifekad konini a demak. ˈAyaw nonini, nanay padadotoc kita misinanot to sapairasol no Fangcalay Cudad, hanaca padama to tao mihaen to demak, pakayni ko pipatalahkal to piakoˈid ita to kakarayan Wama. w23.08 13 fiedac 19-20 fatac

Ta somowal ci Pawlo to pakasoˈlinay falocoˈ, tokel ato olah i, sanay cingra mihererek to sowal, ilalomaˈ nonini tolo capeling ‘o olah ko sakakaay.’ (1 Korinto 13:13) Hano mihaen ko sowal ni Pawlo hani? Ano ikor, malaˈosito ko sakiˈok no Kawas pakayni faelohay hekal i, caayto ko papatalahkal kita to nika pakasoˈlin tonini a sakiˈok, caayto ko mamitala kita halamham to sakalaˈosiaw nonini sakiˈok. Kawra oha mamidaˈoc kita maolah ci Yihofaan ato maolah to tao, hanaca o mahaenay a olah o papadadotoc a matongal, tahadaˈoc a masafaeloh. Roma i, masasiolah kita, wa misawacay to soˈliˈlinay a Krisciyang kita. Pasowalan ni Yis ko tarokos: ‘Ano masasiolah kamo, pakayni toninian mafanaˈ ko polong a tamdaw to nisawawaan ako kamo.’ (Yohani 13:35) Roma i, masasiolah papadama kitanan makedec a malacecay to salikaka. Sanay ci Pawlo: ‘O olah misongilaˈay a palacecay to tamdaw.’ (Kolosay 3:14) Sanay ko tarokos ci Yohani: ‘O maolahay to Kawas i, mamaolah to salikaka.’ (1 Yohani 4:21) Masasiolah kita, paihkalay to maolahay kita to Kawas. w23.11 8 fiedac 1, 3 fatac

Sanay ko sowal no Fangcalay Cudad, o Krisciyang malecaday o misiayay comikay. O tahiraay kahiceraan comikay a tamdaw mamilifok to sapalifon, o midaˈocay a ˈorip. (2 Timoti 4:7, 8) Mamisarocod kita padotoc comikay, samanen itiniayto i kaˈayaw ko kahiceraan. Tarokos ci Pawlo mihadakay to pakayraan pakalowid tonini a cacikayen, ‘falahen ita ko maamaan karetengay a ˈinorong . . . , mihadidi comikay to i kaˈayaway a cacikayen.’ Sakoniya sowal ni Pawlo, fafalahen ko kihcod a ˈinorong sanay han? Cowa. Tatodong ningra i, o fafalahen ita ko cowa ko kalimlaan a ˈinorong, samanen o hatiniay ˈinorong mamicona kitanan talaˈayaw comikay, pakaroray kitanan. Sakatahatolasaw mihadidi, o kakalikien ita mihapinang ko kihcod pakarorayay kitanan a ˈinorong, ikor falahen. Kawra toniya tatokian, o roma ˈinorong oha tatamorongen ita, cowa ka ngaˈay sawaden, ano eca i, mamalahdaw ko tatodong ita misiay.—2 Timoti 2:5. w23.08 26 fiedac 1-2 fatac

Makahi micaˈi kita, o mamikangodo to pinengneng no tao. Tinakoen, roma fafahiyan salikaka maolahay micipoh, o roma i, cowa ka olah micipoh. O romaroma Krisciyang maolahay miˈenip to epah, o romaroma misaˈosiay caka pitefing to epah. Makalimay kita maemin tanektek ko tireng no niyah, kawra o mipiliˈan sapiadah a pakayraan cowa ka lecalecad. Edengan o mipiliˈan no niyah ko sangaˈayay, ano saan kita miharateng, palimoˈotho to salikaka malecad ko mipiliˈan, mihaen o papakapolin to tao alatek, mikidat to sakaliwasak no kasakopang. (1 Korinto 8:9; 10:23, 24) Itini pilafa to caˈedong cowa ka patireng ci Yihofa to pakidemay a saˈosi, kawra mihadakay Cingra to pina safalod mikayat kitanan. Malo sikawdan no Kawas, o sasanengseng ko pilafa ita to caˈedong, ‘patalahkal to matatodongay a harateng,’ mihaen ngaˈ mapaˈdil ko Kawas. (1 Timoti 2:9, 10) Mihaenay, caay ka ciharateng kita pakidem ko tao minengneng to caˈedong no mita. Ano tooren no malohemay malitengay ko safalod no Fangcalay Cudad i, cowato ko sao niyahan saan pacieci misaˈosi to caˈedong ato fokes. w23.07 23-24 fiedac 13-14 fatac

Padamaay ci Yihofa kitaanan cipinang samaan milifok to lipahakay a hanoikor. ‘Maapaay a fafahiyan’ kafangafangan mahadang, micadaay to satahidang ningra a tamdaw sapilifokaw to kasalo no mitakawan a olah. Teloc nangra marefongay i ‘kemod no Patademan.’ (Taneng 9:13, 17, 18) Micadaay to satahidang no ‘soˈlinay a taneng’ a tamdaw cowa ka hecad! (Taneng 9:1) Padotocay kita minanam maolah to kaolahan ni Yihofa, ˈinteh to kaˈintehan ni Yihofa. (ˈOlic 97:10) Misaˈicelayho kita mitahidang to tao mitengil to sapasifanaˈ no ‘soˈlinay a taneng,’ hanaca pakayni ko kalipahak no falocoˈ. Malecaday kita to itiniay i ˈakawangay a niyaroˈ milekal: ‘O cima ko cangoˈotay to nalifetan, ka tayni mamaan!’ Kita ato polong micadaay to satahidang a tamdaw ‘pakayni i noka citaneng ngaˈay ko kaˈorip,’ cowa ko anini aca ngaˈayto milifok to adihayay sapalemed, noikor mamilifokho to midaˈocay a epoc, tahadaˈoc a maˈorip.—Taneng 9:3, 4, 6. w23.06 24 fiedac 17-18 fatac

O cafacafay picudadan anoca katayalan milicayay tisowanan pakayni to pihakelongan a demak, sasamaan ko falocoˈ iso hani? Marawraw ko falocoˈ iso han? Mahaenay marawraw ko ˈalomanay tamdaw. Kawra misalalicay ko tamdaw patalahkalay alatek to piharateng ningra ato maanan ko pakasoˈlinan ningra, hato madoloayto kita mipaladaˈ to ngaˈayay lihaf i cingranan. Kawraan, milokesay kora pilicay nangra alatek. Aka fahkaˈen kita, samanen mararaway a pakasoˈlin cangra to pakayniay pihakelongan ita a sowal. (Dmak 28:22) O roma i, itiniay i ‘salikoray a ˈawaled’ kita, ˈalomanay tamdaw ‘manaˈayay malakangaˈay,’ latekay tada ‘mariˈangay.’ (2 Timoti 3:1, 3) Alatek saan kiso miharateng: “Ano misalalicay ko tao to pihakelongan ako i, sasamaan kako rihaday ko sowal a pacaˈof cingranan hani?” Damsayen a pacaˈof. O damsayay tamdaw ano malikaf anoca caka fanaˈ to sasamaan pacaˈof i, ˈimeren ko niyah, rihadayen ko falocoˈ. w23.09 14 fiedac 1-2 fatac

Latekay macadaay ita ko pina sapatalipaˈelal, tinakoen aka misakareteng to pakadafongay, ato miliyas to katalawan, ho eca ka pisafelit to sarikec no Kawas. Hakelongen ita ko hatiniay a sakayat mamilifok to adihayay a sapalemed. (Isaya 48:17, 18; 1 Timoti 6:9, 10) Itini i taˈangayay a padiing ato Kacomaˈolan Miheca Noka Pikowan ni Kristo i, maedeng papadadotoc ci Yihofa misaka dademak to pinapina tamdaw mihadak to sakayat. Mamihakelong kita to sakayat nangra han? Ano mitengil kita to sakayat ni Yihofa nohatiniho i, noikor mamadoloto mihaen to demak. Rariden ita mihakelong ko sakayat ni Yihofa, mahawpay ko pihakelong to sakayat no ciˈinorongay faˈinayan salikaka, haratengen onini a salikaka o misaka dademakan ni Yihofa to mamisimaw kitaanan. (Isaya 32:1, 2; Hipray 13:17) Nanay kita maemin sarocoden ko falocoˈ mitadiˈec ci Yihofaan, o kakeriden Ningra kita miliyas to masakenakenaay a katalawan, salikor tangasa i faelohay hekal, milayap to midaˈocay a ˈorip. w24.02 25 fiedac 17-18 fatac

Matayal saki Yihofaan marenecan nanay ko tarokos ci Pawlo, kawra o mamiremo cingra to adihayay a pasangar. Pakayni sapitosilaw, marariday ci Pawlo maraay ko rarakaten, itira lintad ningra, tayra i maraayay cowa ko madoloay a demak. Na tahalifaay cingra to ‘sakanaopan no cedas’ ato ‘makariˈang no kokong,’ misetiˈanho no misafelitay tamdaw cingra. (2 Korinto 11:23-27) Roma i, soˈlin mikifalocoˈay ci Pawlo padama to salikaka, kawra cowa ka sahto sa ko salikaka miakoˈid cingranan. (2 Korinto 10:10; Filipi 4:15) Hano ngaˈay ci Pawlo padadotoc matayal ci Yihofaan hani? Pakayniay cingra i Fangcalay Cudad ato nalifetan no niyah, micalep ko kafanaˈ to makapahay capeling ni Yihofa. (Loma 8:38, 39; Ifiso 2:4, 5) Pakasoˈlinay cingra tada maolahay ci Yihofa cingranan, ano cingrato maolahay ci Yihofaan, mansa misaˈicel cingra padadotoc ‘matayal saki fangcalay finawlan,’ pakayni ko pipatalahkal to olah ci Yihofaan.—Hipray 6:10. w23.07 9 fiedac 5-6 fatac

Panganganan no Fangcalay Cudad ko sifo no hekal to ‘o cifadangalay tamdaw i hekal.’ Harateng no ˈalomanay ira ko sifo o ngaˈayay, hanaca o dadofdofen ko patirengan no sifo a sarikec, kawra o cecay sarikec ano cowa ka tatodong anca pakidemay ko saali, caayto ka ciharateng cangra sapidofdofaw. Somowalay ko Fangcalay Cudad, o sifo no hekal ci Satan ko mikowanay, pairaay to adihayay a pades no tamdaw, cato ka halafin papalaˈafoento no Kawas. (ˈOlic 110:5, 6; Patnakay 8:9; Luka 4:5, 6) Pasowalayho ko Fangcalay Cudad kitanan, ‘o cima ko misafelitay to cifadangalay i, o misafelitay to limasmas no Kawas.’ Nohatini mihayian no Kawas ko sifo no hekal mikowan to cecay liyad, pakayniay sapairaaw to rihaday no lekakawa, makalimay ko Kawas midofdof kita to sifo. Mihaenay ano o tatodong no sifo a lalifoken i, ‘papatikolen’ no mita, mahawpay ko pasataay, mikangodo ato midofdof to sifo. (Loma 13:1-7) O cecay sarikec cowa ka tatodong saan kita miharateng alatek, midofdof toniya sarikec kaafadanto, anca matekesay ko ˈaca. Kawra kakamayan kita midofdof to sifo, samanen o sapalimoˈot ni Yihofa konini. O saali no sifo kitanan ano cowa pisafelit to rikec ni Yihofa, o dadofdofen no mita.—Dmak 5:29. w23.10 8 fiedac 9-10 fatac

Hofocen ci Samson i, makowanay ato maroeroay no Filistin tamdaw ko Israil tamdaw. (Kakitaan 13:1) O pikariˈang no Filistin tamdaw pakarorayay to Israil tamdaw, misaka dademakan ni Yihofa ci Samson ‘talaˈayaw milidong to Israil tamdaw paliyas to saroero no Filistin tamdaw.’ (Kakitaan 13:5) Sapilahciaw tonini a ˈinorong, o mamitadiˈec ci Samson ci Yihofaan. Kinacecayay, o sofitay no Filistin tayraay i Lihi micepet ci Samsonan, o Lihi itiniay i Yuta a pala. Matalaway ko finawlan no Yuta, sapipatayraaw ci Samsonan to ˈada. Tano faelohay a sasoˈot cangra mifedfed ci Samsonan, patayra i Filistin tamdaw. (Kakitaan 15:9-13) Kawra, ‘o fangcalay saocor ni Yihofa paˈicelay ci Samsonan,’ mihepolan ningra koya sasoˈot. Dotoc, ‘maˈaraway ningra ko cecay cowaho ka ˈicang a calaˈ noya mapatayay lofa,’ podpodan ningra, tano nini a calaˈ mipatay ko 1,000 Filistin tamdaw!—Kakitaan 15:14-16. w23.09 2-3 fiedac 3-4 fatac

Tada miakoˈiday kita ci Yihofaan itini Fangcalay Cudad palidlid sanay patalahkal to ‘midaˈocay a araaw’ Ningra. Ngaˈayay kalasaka dademaken ni Yihofa ko masasiromaay a pakayraan palaˈosi to araaw no Niyah, hanaca mamalahci Ningra, samanen ngaˈayay Cingra ‘milahci to kihcod a araaw Ningra.’ (Taneng 16:4) Malahcito ni Yihofa ko araaw Ningra i, pairaay to makapahay minaroˈan, o tatahadaˈoc konini minaroˈan. Ano hatiraay i, o maanan ko araaw ni Yihofa hani? Toha sapilahciaw to araaw no Niyah, misalofay Cingra to maanan hani? Pasowalan no Kawas ko saka cecay a tamdaw, o araaw Ningra cangranan i, ‘ka lenak, miedef i fafekang no sera, mipamatang to sera, mikowan to . . . kahirahira a pinaˈorip.’ (Satapangan 1:28) Ikor misafelitay ci Atam aci Ifa, o raraw micomodayto i hekal, kawra cowa piconged konini to sapilahciaw ni Yihofa to araaw Ningra. Misaka dademakan ni Yihofa ko roma pakayraan. Tangsolay Cingra misaˈosi a patireng to cecay Hongti Kitakit i kakarayan, palaˈosi to isalakatay araaw Ningra to tamdaw ato cikiw.—Matay 25:34. w23.10 20 fiedac 6-7 fatac

Padamaay ci Yihofa kitanan kodait tahatolas. Kawrira, padadotoc mikotod ci Yisan cowa ko madoloay, mangalefay ano hamamiremo to halafinayto a dangoc i, tada mamahaen. Palalinien ci Pitiroan i, o dangoc no mita alatek ikakaay ko pasangar a remoen, kawra papafelien ni Yihofa kita to ˈicel, padama kitanan padadotoc a kodait. (ˈOlic 94:18, 19) Tinakoen, cecay faˈinayan salikaka na halafinayto mihecaan makakaolah to faˈinayanto, kawra mafanaˈto cingra to kimad i, misetekayto a mafalic, caayto pidemak to malafoay a demak. Kawrira, nolatekay mamiˈodotho cingra to mararaway harateng. O maanan ko padamaay cingranan padadotoc misaˈicel eca ka pisawad hani? Sanay cingra: “Pafelian ni Yihofa kako to ˈicel . . . , i sapadama no fangcalay saocor ni Yihofa, o ngangaˈay kako padadotoc mitoor to kimad maˈorip . . . Makahiay ci Yihofa misaka dademak takowanan. Soˈlinto adihayay ko dangoc no mako, kamayan Cingra midama takowanan, cowa ka pisawad a miliyas takowanan.” w23.09 23 fiedac 12 fatac

O kapah salikaka, cowa ko tatalifahal wasa malo o matenesayto a Krisciyang kamo. Mamisaˈicel kamo mipiliˈ a mitodong to ngaˈayay taˈarawan, palahad to inaneng a misimsim, malo ngaˈayay pakasoˈlinen a tamdaw, minanam to ciepocay a inaneng ato misaday to noikoran. Ano haharateng han to aadihay ko dadademaken iso, latek tataˈangay ko piroero tisowanan. Kawra aka calemcem, o mamadangar iso. Aka mapawan, ciharatengay ci Yihofa to sapadamaaw tisowanan. (Isaya 41:10, 13) Roma i, o salikaka i kasakopang papadama tisowanan. Malo o matenesayto a faˈinayan salikaka kiso i, tada kasemeranto ko hakelong no kaˈorip iso, mamarenecen ko falocoˈ iso. O kapah salikaka, tada maolahay kami tamowanan! Misaˈicel kamo a malo o matenesay a Krisciyang, maedeng mamilifok to kadofahay a sapalifon ni Yihofa. w23.12 29 fiedac 19-20 fatac

Haratengen ko cecay sapatinako. Malacafayay kiso to papina salikaka malisopsop, ira ko lipahakay no kacacawmaˈ. Mahererekto micawmaˈ i, pacafayan iso ko ˈalomanay misasing, dotoc kinatosaayho kiso misasing, samanen cowa ka ngaˈay koya saka cecay misasingan alatek. Nohatini toloayto ko sasing iso, kawra mahapinangay iso ko cecay sasing miˈosengetay ko cecay faˈinayan salikaka. Wa mipadeng kiso tonini a sasing, samanen iraayho ko tosa ngaˈayay nengnengen a sasing. Itini toniya tosa sasing, onini a salikaka ato romaroma tamdaw matawaay ko pising. Adihayay ko malifetay ita kahemekan macacawmaˈ to salikaka. Nikawrira kinacecayay, o cecay faˈinayan salikaka anca fafahiyan salikaka somowalay to pina sowal anca pina a demak, pakasomaday kitanan. Sasamaan ko pidemak ita hani? Ngaˈayay tanamen ita mipawan konini a demak, malecad o pipadeng to cecay cowa ka ngaˈay nengnengen a sasing. (Ifiso 4:32) Cowa ko nanaˈengen ita i falocoˈ ko mimingay raraw no widang, samanen iraayho ko adihayay makapahay nalifetan ita malacafay cingranan, o hatiniay nalifetan o sasalimlaen ita minaˈeng. w23.11 12-13 fiedac 16-17 fatac

Onini sowal ni Pawlo paihkalay, o fafahiyan Krisciyang itini i caˈedong papatalahkal to misamimingay a waywayan, sikolen ko piharateng no tao, ho eca ka pikidat to kaciharateng no tao. O matenesay a fafahiyan salikaka itini i caˈedong, patalahkal to misamimingay a waywayan, tada masemeray kita cangranan. Mafanaˈ pafafidaˈ to demak, o papatalahkalen no matenesay fafahiyan Krisciyang a roma capeling. O manan ko mafanaˈay pafafidaˈ to demak hani? Tatodong nonini iraay ko inaneng pafafidaˈ to ngaˈayay ato tatiihay, citanengay ko pisaˈosi. Nengnengen ko taˈarawan ni Apikail. Tona mararaway ko saˈosi no faˈinay ningra, teloc mangata mapatay ko polong paro no lomaˈ ningra. Kao ngaˈayay mafanaˈay ci Apikail pafafidaˈ to demak, kalamkamay dademak, hato madipotay ko ˈorip no paro no lomaˈ. (1 Samuil 25:14-23, 32-35) Ano mafanaˈ kita pafafidaˈ to demak i, mamafanaˈ to hahacowa caciyaw, hahacowa a tomerep, hanaca mafanaˈay to sasamaan a ciharateng to tao, aeca ka tatiihen ko falocoˈ no tao.—1 Tisalonika 4:11. w23.12 20 fiedac 8-9 fatac

O sapatilid ni Pawlo a sowal to i Lomaay a kasakopang a Krisciyang. O itiraay a salikaka mafanaˈayto ci Yihofaan aci Yisan, tano midemakan patalahkal to pakasoˈlin, malo Krisciyangayto. Pakayniay noka pakasoˈlin no falocoˈ ‘malo o moecelay tamdaw’ hanto no Kawas, hanaca mapanilnilayto no fangcalay saocor. (Loma 5:1) Mihaenay haw i, iraay ko cecay kasapaan, tanektekay a hatokel nangra. Ikor, ci Pawlo itini i Ifiso cudad somowalay to manilnilay no fangcalay saocor a Krisciyang to iraay ko hatokel nangra milifok to ‘sapafeli no Kawas to fangcalay finawlan a hafay.’ (Ifiso 1:18) Ci Pawlo itini i Kolosay cudad mitadtaday to aicowa milifok cangra to halifon. Sowal ningra iraay ko hatokel nangra milifok to ‘miterekan no Kawas cangranan itini i kakarayan a sapalemed.’ (Kolosay 1:4, 5) Mihaenay, hatokel nonini a Krisciyang, o papatikol maˈorip tayra i kakarayan milifok to tahadaˈocay a ˈorip, hanaca kalacafay ci Yis Kristoan mala hongti.—1 Tisalonika 4:13-17; Paˈarawan 20:6. w23.12 9 fiedac 4-5 fatac

‘Misimaw’ sanay a tilid i, ono sofitay a sasowalen, mitoroˈan i, misimaway ko sofitay to niyaroˈ, mieteng to pilood no ˈada, midimokos to sakadipayal no niyaroˈ. Mafanaˈ ko ilalomaˈay no niyaroˈ a finawlan to pisimaw no sofitay i ˈadawang, hato sarihaday saan a mafotiˈ. Malecaday, o sapafeli no Kawas a rihaday o mamisimaw to falocoˈ ato ponoˈ no mita, mihaen i, o rarihadayto ko falocoˈ ita. (ˈOlic 4:8) Matira ci Hanaan, soˈlin cowa ka tangsol sa a masaysay ko pasangaray, o ngangaˈayho matinako ita ko rihaday. (1 Samuil 1:16-18) Ano rihaday ko falocoˈ ita, to cerid mamadoloto a ihkal ko pisimsim no ponoˈ, mataneng ko pisaˈosi. Mamidemak kita to maanan hani? Ano maoratay ko falocoˈ iso i, ngitangiten ci Yihofa misimaw tisowanan. Mamisamaan ko demak aki? Padadotoc a mitolon, tangasa matinakoto no falocoˈ iso ko sapafeli no Kawas a rihaday. (Luka 11:9; 1 Tisalonika 5:17) Ano tahasiˈayaway kiso to pasangaray a pakayraan, kodaiten aka pisawad a mitolon. Ano mihaen i, mamatinakoto iso ko sapafeli ni Yihofa a rihaday to samaanay misimaw to falocoˈ ato ponoˈ iso.—Loma 12:12. w24.01 21 fiedac 5-6 fatac

To sapatalahkalaw to fangcalay ngangan no kakarayan Wama, hayi sanay ci Yis miemem to masakenakenaay sapaoraf, pilokes ato pisemsem. Itini sapasangaray a tatokian, mafanaˈay cingra midofdofay ko niyah to kakarayan Wama, mansa awaay ko dangoc no falocoˈ ningra. (Hipray 12:2) Mafanaˈay cingra malifaay no niyah a pasangaray, sahtoay mikitiniay ci Satanan. (Luka 22:2-4; 23:33, 34) Misahalakaay ci Satan pacieci ci Yisan misawad to madimadi, kawra masongilaˈay a mapadik ci Satan! Ihkalay ci Yis misawacay to o misaˈfitay ci Satan, misawacayho wa ira ko tamdaw madimadi ci Yihofaan. Soˈlin tahasiˈayaw to masakatalawan a sapalifet, o madimadiay sikawdan ni Yihofa cowa ko mamisawad to madimadi! Makalimay kiso palipahak to Hongti ci Yisan han? Ano makalimay i, ka padadotoc pakahemek to fangcalay ngangan ni Yihofa, padama to tao mafanaˈ to masakenakenaay makapahay capeling ni Yihofa. Mihaen ko demak iso o mitodongayto ci Yisan. (1 Pitiro 2:21) Malecad ci Yisan, wa ngaˈay kiso palipahak ci Yihofaan, hanaca misawacay to ˈada Ningra ci Satan o awaay ko ngodo a misaˈfitay! w24.02 11-12 fiedac 11-13 fatac

Itini mataˈlifayto 5 mihecaan, iraay ko 100 ˈofad micadaay to paputisem malo Misawacayay Tamdaw ni Yihofa. Patafang kiso to tireng ci Yihofaan, mipiliˈay to mamikotod ci Yis Kristoan, hanaca paisalakat to araaw ni Yihofa i nokaˈorip no niyah. O manan ko tatodong nonini hani? Sowal ni Yis: ‘O cima sapikotodaw takowanan, mamihayi caayto kono niyah ko tireng.’ (Matay 16:24) ‘Mamihayi caayto kono niyah ko tireng’ onini a sowal no Krisiya mihongyakan to “pasowal to niyahan ‘akato’” sanay. Ikor no patafang ko tamdaw to tireng ci Yihofaan, ano mahapinang ko cecay a demak cowa ka tatodong to araaw ni Yihofa i, papasowal to “akato” saan. (2 Korinto 5:14, 15) Tinakoen, mamifalah to kihcod ‘mitooray to ciraraway a waywayan,’ mahawpay ko malafoay a madadiˈiyay. (Kalatiya 5:19-21; 1 Korinto 6:18) Midoedo to sapalimoˈot no Kawas a midemak, pakarorayay tisowanan han? Ano maolahay kiso ci Yihofaan, hanaca pakasoˈlin midofdof to sarikec Ningra o sakaciepoc no miso, o sapalimoˈot Ningra cowato ko karetengay a ˈinorong.—ˈOlic 119:97; Isaya 48:17, 18. w24.03 2 fiedac 1 fatac; 3 fiedac 4 fatac

Pafelian ni Yihofa to fangcalay saocor ko mihaydaan Ningra a tamdaw. (Matay 12:18) Ngaˈayay licayen ita ko niyah: “Itini kaˈorip ako patalahkalay to pina capeling no fangcalay saocor han?” Tinakoen, palalinien to ˈayawho noka fanaˈ iso to soˈlinay kimad i, matongalay ko pihadidi iso to tao han? Soˈlinay haw i, ano matongalay ko pipaihkal iso to capeling no fangcalay saocor i, o aadihay ko lalangian iso a pakasoˈlin to mihaydaan ni Yihofa kiso. Roma i, ano haydaen ni Yihofa ko cecay tamdaw i, o papadama ci Yihofa cingranan mikitini i sapatefoc milifok to haepoc. (1 Timoti 2:5, 6) Ano pakasoˈlin kita to sapatefoc, micadato to paputisem, kawra cowaho ka pihayda ci Yihofa takowanan ano saan a miharateng i, sasamaanto hani? Aka mapawan, o mahaenay a harateng ita aka pasoˈlinen, kawra ngangaˈay kita mitadiˈec ci Yihofaan. Itini pinengneng ni Yihofa, pakasoˈlinay to sapatefoc a tamdaw o moecelay, hanaca mikiˈokay Cingra to papalemeden cangra.—ˈOlic 5:12; Loma 3:26. w24.03 30 fiedac 15 fatac; 31 fiedac 17 fatac