Saka 12 Folad

Iraay ko ˈicel ni Yihofa patikol paˈorip to mapatayay tamdaw han? Iraay! Samanen ‘Malefotay ko ˈIcel’ Ningra. (Paˈarawan 1:8) Iraay ko ˈicel Ningra mipadik to kihcod a ˈada, mahawpay ko patay. (1 Korinto 15:26) O nika pakasoˈlin ita to Kawas to ngangaˈay patikol paˈorip to mapatayay tamdaw a roma lalangian i, samanen awaay ko tolas no piharateng Ningra. Panganganan Ningra ko kahacecay a foˈifoˈis. (Isaya 40:26) Maharatengayho Ningra ko polong a mapatayay tamdaw. (Yopu 14:13; Luka 20:38) Pakayni i papatikolen Ningra paˈorip a kahacecay tamdaw i, maharatengay Ningra ko polong a demak, mahawpay ko DNA, nalifetan ato niharatengan nonini a tamdaw. Ano komoden a somowal kora ifafekangay i, tangongolay ko nika pakasoˈlin ita to papatikolen ni Yihofa paˈorip ko mapatayay tamdaw, samanen iraay ko kalim iraay ko ˈicel Ningra milahci tonini a sakiˈok. Papakasoˈlin kita tonini sakiˈok a roma a lalangian i, samanen na mihaenayto to demak ci Yihofa. Itini nolitengan, pakaynian Ningra to madimadiay sikawdan ato kanonoˈan Wawa Ningra ci Yis patikol paˈorip to mapatayay tamdaw. w23.04 9-10 fiedac 7-9 fatac

Ano damsayen ita ko pakayraan pacaˈof to tao i, mamakahito a mitengil ko tao, padadotocto ko kasasowal. Manaokaniw, ano sakalacongisaw anca milokes to pihakelongan no mita i, hamaanto padotocen ko kalalengo i cingranan. (Taneng 26:4) Kawra o mahaenay tamdaw cowa ka ˈaloman, soˈlinay haw i, ˈalomanay ko makahiay mitengil a tamdaw. Patirengen iso ko patosokan palahad to damsayay a capeling, tada o ciepocay. Cangacangen ci Yihofa pafeli tisowanan to ˈicel, padama tisowanan ano salalicayen anca likafen no tao i, mamitawmec to damsayay. Haratengen, ano mitawmec kiso to damsayay, cowa ito pasalaten ko nika sasiroma no pinengneng a malacongis to tao. Ano misakangodoay ko waywayan iso, damsay ko sowal, alatek mamafalic ko pinengneng no romaroma tamdaw to Misawacayay Tamdaw ni Yihofa ato Kimad no Fangcalay Cudad. Ka talaˈayaw a misaday paˈading to pihakelongan, hanaca ‘damsay ko waywayan, misakangodo’ to tao. (1 Pitiro 3:15) O damsayay a tamdaw o ciˈicelay, seteken ko falocoˈ malo damsayay a tamdaw! w23.09 19 fiedac 18-19 fatac

Haratengen hena ngaˈay kita i maanan a sepat pakayraan paihkal to mihadidiay falocoˈ. Saka cecay, ira ko mihadidiay falocoˈ a tamdaw cowa ka ranikay mangolaw. Ano maroero anca mapakararaw no tao i, mihadidiay a tamdaw papadadotoc a rihaday ko falocoˈ, cowa ko mamiˈodis. (Kasadakan 34:6) Saka tosa, o mihadidiay a tamdaw rihadayay ko falocoˈ a mitala. Ano halafinay a mitala i, iraay ko mihadidiay falocoˈ a tamdaw cowa ka carirawen anca maˈefangen. (Patnakay 7:8) Saka tolo, o mihadidiay falocoˈ a tamdaw cowa ka caloh sa ko demak. O mihadidiay a tamdaw itini pidemak to masakalimlaan a tayal i, cowa ko mamacaloh a misatapang, cowa ko mamikasimaan to demak. Aisalakat cingra milimasmas to toki, misongilaˈ a misahalaka, misaadihay to toki milahci to tayal. Saka sepat, iraay ko mihadidiay falocoˈ a tamdaw kakiemel a miemem, eca ka ngaliwngiw. Mamiemem to sapalifet cingra, misaˈicel a mitawmec to tawlikay falocoˈ. (Kolosay 1:11) O finawlan ni Yihofa itini sepat a pakayraan mamipaihkal to mihadidiay falocoˈ. w23.08 20-21 fiedac 3-6 fatac

Sapidipotaw kita to falocoˈ, o cecay lalangian i, mikinsaay ci Yihofa to falocoˈ no tamdaw. Tatodong nonini, cowa ko papotal aca ita ko maˈaraway Ningra, mafanaˈayho to soˈliˈlinay a waywayan ita. O taneng no Kawas papafeli kitaanan to midaˈocay a ˈorip. Padadotoc kita misimsim to citanengay a sowal Ningra, mamaolah Cingra kitaanan. (Yohani 4:14) Matomes ko ponoˈ ita to citanengay a sowal no Kawas, cowato ko papacomod i ponoˈ ita to mangah ni Satan ato malafoay harateng no hekal, miwarak to harateng no mita. (1 Yohani 5:18, 19) Ano mangalef ko piingid ita ci Yihofaan, mamangalef ko kaolah ato pikangodo Cingranan. Caay ka ciharateng kita pakasomad Cingranan, mihaenay o piharateng aca to mamararaw mapiliˈayto kita. Fafahiyan salikaka ci Marta itiniay i Kroatia cingra, na micadaay cingra to sakayhid malafo ko kadadiˈi to tao. Sanay cingra: “Mamiˈimer to tireng, padadotoc ihkal ko piharateng, eca ka pilayap to pairaan no mararaway a cecayay liyad a lipahak, cowa ko madoloay! Kawra o mangodoay ci Yihofaan a falocoˈ midipotay takowanan.” Mikangodoay a falocoˈ hano midipotay cingranan hani? Sanay ci Marta, misongilaˈay cingra misimsim to pairaan no raraw a minaroˈan. Ano kitato ngangaˈay mihaen to demak. w23.06 20-21 fiedac 3-4 fatac

Mafanaˈay ci Yis o araaw ni Yihofa o papatalahkal to fangcalay ngangan no Niyah, palahdaw to kihcod pakangodoay tonini a ngangan. Mihaenay, palimoˈotay ci Yis to nisawawaan mihaen ko pitolon: ‘Itiniay kakarayan a Wama niyam, nanay mapatalahkal ko ngangan Iso malo fangcalay.’ (Matay 6:9) Mafanaˈay ci Yis, pakayni to masangaˈay a tamdamdaw, o sakalimlaan a demak konini. Itini pipatalahkal to fangcalay ngangan no Kawas, awaay ko cima to mikikakaay ci Yisan ko nika adihay no midemakan. Nikawrira, tiya cepeten no ˈada ci Yis i, pakokotay cingranan to maanan a raraw hani? O milokesay a pakadit to Kawas a raraw! Miharateng ci Yis patelas sa misaka dademak ato pakadit to fangcalay ngangan no kakarayan Wama o satatiihay a raraw, ˈarawhan paketingan cingra to hatiniay a raraw, oninian ko lalangian to ‘kaadadaan no falocoˈ’ ni Yis i ˈayaw no macepet.—Luka 22:41-44. w24.02 11 fiedac 11 fatac

Sapilahciaw to midaˈocay ˈorip a cacikayen, o olah ita ci Yihofaan aci Yisan, o mamikikaka to kaolah to paro no lomaˈ. (Matay 10:37) Kawra cowa ka ngaˈay falahen ita ko ˈinorong no niyah to paro no lomaˈ, hato miconaay kitanan midemak to kaolahan no Kawas aci Kristo a demakan konini. Soˈlinay i, sapilifokaw to pihayda no Kawas aci Kristo, o mamidemak kita to ˈinorong no niyah i paro no lomaˈ. (1 Timoti 5:4, 8) Mihaen ko demak ita, mamatongal ko lipahak no niyah, samanen mitoor to araaw no Kawas, masasingodo masasiolah ko raramod, ciharateng a pasifanaˈ ko wama wina to wawa, midofdof ko wawa to wama wina, o paro no lomaˈ rarahekerto a lipahak. (Ifiso 5:33; 6:1, 4) Ano o mananto ko saaroˈan iso i lomaˈ, tatooren ko sakayat no Fangcalay Cudad, aka toor han ko harateng no niyah ato pinangan no serangawan a midemak, aka pitengil to sowal no sao inanengay a tamdaw a midemak. Sakadademaken ko mitepangan no likakawa a cudad. Onini a lalakaw mihadakay to adihayay ciepocay sapaini, padama kitanan mafanaˈ samaan misaka dademak to safalod no Fangcalay Cudad. w23.08 28 fiedac 6-7 fatac

O fafahiyan salikaka maminanam to pina ciepocay a inaneng. O fafahiyan kaemangho minanamto to pina inaneng, oha sakaciepoc i hakelong no kaˈorip nangra. Tinakoen, palahaden ko inaneng a miˈosi ato mitilid. Itini i romaroma serangawan, o fafahiyan tamdaw cowa ko masakalimlaan a mafanaˈ miˈosi ato mitilid sanay. ˈArawhan pakaynien i kahacecay Krisciyang, tada masakalimlaan ko mafanaˈay miˈosi ato mitilid a inaneng. (1 Timoti 4:13) Mankora, ano tahalifa to maanan a pasangar, aka misawad a minanam miˈosi ato mitilid. Mihaen kiso mamalifok ko maanan a epoc hani? Ano ira ko mahaenay inaneng iso i, madolo a mietan to payci a paririˈ to niyah, hanaca itini pinanam no niyah to Fangcalay Cudad ato pasifanaˈ to tao minanam to Fangcalay Cudad i, wa ngaˈay ko demak. O masakalimlaan i, pakayni i picekiw ato midotim to Kimad no Kawas, mamatongal ko piingid iso ci Yihofaan.—1 Timoti 4:15. w23.12 20 fiedac 10-11 fatac

Cangacangen ci Yihofa padama kitaanan micoˈay to sakayhid. Cowa ka lefot kita, mansa marariday milood to mararaway a coos no falocoˈ. Roma i, ci Satan tano masakenakenaay a pakayraan mikayhid kitaanan, itini tonini a lalood mipadik kitaanan. O cecay pakayraan ningra i, tano malafoay a lawla minahol to falocoˈ no mita. Mirienang kita to mahaenay a lawla, mamatomesto ko ponoˈ to cikaditay a harateng, o mahaenay a harateng papakadit to falocoˈ no mita, mikayat kitaanan midemak to pakidemay a raraw. (Marko 7:21-23; Yakop 1:14, 15) Ano sapilowidaw kita to sakayhid, eca ka pidemak to mararaway a demak, misaaliay to sapadama ni Yihofa. Ci Yis itini taˈarawan a satolon micangacangay ci Yihofaan sanay: ‘Aka parefongen kami i sakayhid, nanay paˈoripen kami a paliyas toya tatiihay.’ (Matay 6:13) Makalimay ci Yihofa sapipadamaaw kitaanan, kawra papasayra kita Cingranan micangacang to sapadama ngaˈ ngaˈay. Papahecadenho ita ko demak to mitolonan. w23.05 6-7 fiedac 15-17 fatac

Ano misakareteng a minengneng ko mararamoday tamdaw to kalalaˈed nangra aci Yihofa, o mamakalimto cangra kalasaka dademak to safalod no Fangcalay Cudad. Papadama cangranan miliyas ato miremo to pasangar, ho eca ka mafasaw ko olah nangra tatosa. O roma i, ano tanektekay ko kalawidang no mararamoday aci Yihofa i, o mamisaˈicelto cangra mitodong ci Yihofaan, palahad to makapahay capeling ni Yihofa, tinakoen o sidaˈitay, mihadidiay ato makahiay misodod a waywayan. (Ifiso 4:32–5:1) O faˈinay ato fafahi ano patalahkal cangra to mahaenay a makapahay capeling i, o mamadoloto cangra makakaolah. Fafahiyan salikaka ci Lina mataˈlifayto ko 25 miheca a ciraramod, sowal ningra: “Ano tanektek ko kalawidang aci Yihofa, o mamadoloto kiso maolah ato mikangodo to ramod.” Nengnengen ko tinakoan no Fangcalay Cudad. Tiya mamipiliˈ ci Yihofa to cecay mararamoday malo wama wina ni Misiya i, mikitiniay ˈalomanay a teloteloc ni Tafiti mipiliˈ ci Yosifan aci Mariyaan. Misamaanay hani? Samanen cangra tatosa tangongolay ko kalawidang aci Yihofaan, mansa mafanaˈay ci Yihofa, ikor no mararamod cangra papaisalakat Cingranan i kaˈorip. w23.05 21 fiedac 3-4 fatac

O ˈAˈideman ita ci Yis o malefotay, kawra misaka dademakan ningra mikeriday a tamdaw cowa ko malefotay, midofdof cangranan cowa ko madoloay saan kita miharateng alatek. Ano palimoˈot cangra kitaanan midemak to cowa ko kaolahan ita a demak i, papasangarto midofdof. Tarokos ci Pitiro kinacecayay pasangaran nanay midofdof. Itiya, palimoˈotay ko coyoh ci Pitiroan komaen to heci no pinaˈorip. Kawra tooren ko Rikec ni Mosi, cowa ka korac konini pinaˈorip. Oranto i, cowa ka kinacecay aca minaˈay ci Pitiro to coyoh, ao kinatoloay a minaˈay! (Dmak 10:9-16) Misamaanay hani? Samanen cowa ka cipinang cingra hano mihaen ko sakayat no coyoh cingraanan. Roma i, nengnengen ko tinakoan no tarokos ci Pawlo. O malohemay malitengay no Yirusalim palimoˈotay ci Pawloan miˈorong to sepat a tamdaw tayra i fangcalay sefi midemak to sakakorac, mihaen mamafanaˈto ko ˈalomanay tamdaw midofdofay ci Pawlo to Rikec ni Mosi. Soˈliˈlin cowa ka raraw ko demak ni Pawlo, hanaca mafanaˈay cingra cowato ko mamidofdof ko Krisciyang to Rikec ni Mosi, kamayan cingra kaliki a mitoor tonini sakayat midemak. Saka 2 romiˈad, ‘miˈorongay cingra toya papina tamdaw malingad, malacafay midemak to sakakorac a demak.’ (Dmak 21:23, 24, 26) Makahiay ci Pawlo midofdof, telocto micowatay to kakedec no kasakopang.—Loma 14:19, 21. w23.10 10 fiedac 15-16 fatac

Cowa ka harateng iso to kakangodoen ko widang iso. Kawrira, sakalawidangaw ci Yihofaan, oha ‘mamikangodo Cingranan.’ Ano hakowaayto ko halafin ita midoko ci Yihofaan, oha papadotoc kita mikangodo Cingranan. O maanan ko tatodong no mikangodo ci Yihofaan hani? Mikangodoay to Kawas a tamdaw tangongolay ko olah to Kawas, caay ka sapipalakaw to kalalaˈed ato Cingranan. O mahaenay ci Yis. Sanay ko Fangcalay Cudad, ‘mikangodoay cingra to Kawas.’ (Hipray 5:7) Ci Yis matatodongay ko kaciˈangi ci Yihofaan. (Isaya 11:2, 3) Tangongolay ko olah ni Yis ci Yihofaan, makalimay a midofdof Cingranan. (Yohani 14:21, 31) Malecad ci Yisan, o tatangongol ko pikangodo ita ci Yihofaan, samanen matomesay ko olah ato taneng Ningra, masadafdafay cowa pisateked, mikiriwiˈay ko ˈicel. Mafanaˈay kita, tangongolay ko olah ni Yihofa kitanan, misakaretengay minengneng to samaanay ko waywayan ita to sakayat Ningra. Alatek o mipiliˈan ita papakahemek ci Yihofaan, anca papakasomad to falocoˈ Ningra.—ˈOlic 78:41; Taneng 27:11. w23.06 14 fiedac 1-2 fatac; 15 fiedac 5 fatac

Taˈangayto ko ˈicel ikor, mapawanay ci Uciya o paˈicelay cingranan o ci Yihofa. Mananamay ita ko manan a sapasifanaˈ hani? Mamicerid kita patalipaˈelal to niyah, o kihcod a sapalemed ato tayal ita sahtoay o sapafeli ni Yihofa. Aka pasengi to nano demak no niyah, ao panokayen ko narorayan ci Yihofaan. (1 Korinto 4:7) Mamisapoener kita, mihayi to cowa ko malefotay ko niyah, mamicada to sarikec nolatekay. O cecay 60 mihecaan a faˈinayan salikaka sanay: “Mananamay ako aka pakidem ko pinengneng to niyah. Latekay, pakayni i pina maapaay a raraw micadaay kako to sarikec, kawra misaˈicelay kako miliyaw a talifak, padadotoc talaˈayaw.” Ano mikangodo kita ci Yihofaan, padadotoc misapoener minengneng to niyah, wa ira ko lipahakay a nokaˈorip.—Taneng 22:4. w23.09 10 fiedac 10-11 fatac

Oha mamihadidi ko saka 1 hahekalan Krisciyang. Cowa ko mamisiˈayaw aca cangra to pasangar no kalo a tamdaw, pakayniho i pihakelongan tahalifa to romaroma a pasangar. O ˈalomanay Krisciyang tahacadaay to piroero no kakeridan no pidoyongan no Yutaya ato sifo no Loma, tahacadaayho cangra to pisafelit no paro no lomaˈ. (Matay 10:21) Latekay, o mamicoˈay cangra to pifiyor no mitowakangay to kimad a tamdaw, samanen itini i kasakopang milosiyangay to mararaway kimad, mikidat to sakaliwasakaw. (Dmak 20:29, 30) Kawra, padadotocay cangra mihadidi. (Paˈarawan 2:3) Samaanay ko pidemak nangra hani? Midotimay cangra to mihadidiay a taˈarawan i Fangcalay Cudad, tinakoen ci Yopu. (Yakop 5:10, 11) Mitolonayho cangra micangacang to Kawas pafeli to ˈicel. (Dmak 4:29-31) Roma i, misamacayay cangra to ngaˈayay a teloc noka pihadidi. (Dmak 5:41) O Fangcalay Cudad ato mitepangan a cudad adihayay ko padadotocay mihadidi a tinakoan, ano mararid kita minanam tonini a taˈarawan, hanaca misongilaˈ a midotim, o ngangaˈay padadotoc mihadidi. w23.07 3 fiedac 5-6 fatac

Ci Yihofa aci Yis cowa ko mamisawad kitanan. Mihakenoto ci Pitiro ci Yisan i, awaayto ko pinang to papasicowa ko rakat no kaˈorip. Papadadotoc cingra malo nisawawaan ni Kristo ha, anca misawad ha? Iˈayaw na micangacangay ci Yis ci Yihofaan padama ci Pitiroan, ho caka malahdaw ko nika pakasoˈlin ni Pitiro. Pasowalan ni Yis ci Pitiro to mihaenay cingra patado ci Pitiroan mitolon, pasifanaˈ ci Pitiroan, pakasoˈlinay cingra to papadama ci Pitiro noikor to romaroma salikaka a tanektek. (Luka 22:31, 32) Tikolen ni Pitiro miharateng ko nano sowal ni Yis i, maedeng masayaray ko falocoˈ ningra! Ano awaayto ko pinang ita to papasicowa ko rakat no kaˈorip i, kakalasaka dademaken ni Yihofa ko sidaˈitay a misimaway kantok mihinom kitanan, padama kitanan padadotoc a madimadi. (Ifiso 4:8, 11) Na midimokosan ni Yihofa ko sakaˈorip ni Pitiro ato romaroma tarokos. Ano paisalakaten ita ko mitosilay tayal i, o dadimokosen ni Yihofa ko saali ita. w23.09 24-25 fiedac 14-15 fatac

O demak ita i tao soˈlin mimingay aca a demak, maˈaraway ni Yihofa maemin. O pinengneng Ningra to ngaˈayay demak ita malecaday o kalimlaan a sapatoˈaya, o papatikoen Ningra kita, malecad to citadahay kitaanan. Ano nao dama sikawdan anca o malohemay malitengay kiso, cowa ko mamapawan ci Yihofa to nano demak iso isalakat ato ciolahay a falocoˈ. (1 Korinto 15:58) Nohatini padotoc kiso patalahkal to olah, maˈaraway Ningra. Halamhamay ci Yihofa kitanan maemin matongal ko kaolah Cingranan ato salikaka. Mikingkiw ato midotim to Fangcalay Cudad, halo micerid a mitolon, wa matongal ko kaolah ci Yihofaan. Sapitongalaw kita to olah i salikaka, mamakahi talaˈayaw a padama cangranan. Matongal matongal ko olah ita i, o kalalaˈed ci Yihofaan ato salikaka mamatongal ko kaaingid. Onini masakalimlaan a kalawidang tatahadaˈoc, awaay ko tolas! w23.07 10 fiedac 11 fatac; 11 fiedac 13 fatac; 13 fiedac 18 fatac

Pakayni to sasamaan midimokos to sakatanoktok no tireng, o kahacecay a Krisciyang ko mamisaˈosi. Pakayni toninian, pinaay aca ko ihkalay a saˈosi no Fangcalay Cudad to dadofdofen ita, tinakoen oha mamikeceng a miliyas kita to remes ato pakayniay i misakawasay a demak. (Dmak 15:20; Kalatiya 5:19, 20) Ano cowa ka pisafelit tonini saˈosi i, oha mamipiliˈ ko Krisciyang to niyah a hapakayraan a sapiadah. Pakayni to o maanan ko papiliˈen a sapiadah alatek iraay ko no niyah a harateng, sasakaretengen ko mipiliˈan no salikaka, pasalaten cangra mipiliˈ. Itini tonini a demak, haratengen ko ilaenoay a sepat kalimlaan: (1) Edengan o Hongti Kitakit no Kawas ko papalahdaw to adada, tahadaˈocto a tanoktok ko tireng. (Isaya 33:24) (2) O kahacecay Krisciyang ko mamipiliˈ, ‘pakasoˈlin’ to sangaˈayay ko mipiliˈan no niyah. (Loma 14:5) (3) Aka pilikaf kita to tao, aka pidemak to pakapolinay to cimacimaan a tamdaw. (Loma 14:13) (4) O Krisciyang maolahay to salikaka, o pasalat no niyah a mipiliˈ cowa ko papaikakaen to nika kedec no kasakopang.—Loma 14:15, 19, 20. w23.07 24 fiedac 15 fatac

Maolahay kiso ci Yihofaan han? Maedeng saan ko sowal iso: “Maolahay kako ci Yihofaan.” Mikitini nolitengan tahanini, ˈalomanay tamdaw mahecaday tisowanan tangongolay ko olah ci Yihofaan. (ˈOlic 104:33, 34) ˈAlomanay tamdaw pakayniay pidoko ci Yihofaan a kinafalah, nolitengan Israil ‘Micidekay a tamdaw’ hananay, no Hipray sowal tatodong i, ‘Patafangay a tamdaw’ sanay. Fanekfekay ko falocoˈ no Micidekay a tamdaw midoko ci Yihofaan, mikinafalahay cangra, tano mikiriwiˈay a pakayraan matayal saki Yihofaan. Mikitini saˈosi no Rikec ni Mosi, ano faˈinayanto fafahiyanto wa ngaˈay pasayra ci Yihofaan miketon to sowal, malo Micidekay a tamdaw to cecay a liyad. (Saˈosi 6:1, 2) O tamdaw mikifalocoˈ a miketon to sowal mamalo Micidekay a tamdaw ikor, mamidofdof to cowa ko dadofdofen no kalo Israil tamdaw a demak. Mihaenay i, hano makahi ko romaroma Israil tamdaw malo Micidekay a tamdaw hani? O lalangian i, pakayniay noka olah ci Yihofaan, hanaca miakoˈid to kadofahay sapalemed ni Yihofa cangranan.—Limoˈot 6:5; 16:17. w24.02 14 fiedac 1-2 fatac

Itini i Fangcalay Cudad, mihongyakan to ‘madimadi’ anca ‘madimadiay a olah’ hananay no Hipray a sowal, mitoroˈan i, o dihkoay o tangongolay a nafalocoˈan sanay. Onini a sowal marariday a somowal to paihkalan no Kawas a olah i sikawdan Ningra, sakadademakanho i noka sasiolah no finawlan no Kawas. (2 Samuil 9:6, 7) Makalimay ko Kawas madimadi kita Cingranan. O mahaenay a capeling ngaˈayay padadotocen a mipaˈicel, nengnengen ko tinakoan ni Taniil. O nika madimadi ni Taniil ci Yihofaan, kinapinapinaay mapalifet itini nokaˈorip ningra, o cecay i, itiraay i 90 ko mihecaan a malifa, tada pakidemay koni sapalifet. Itiya, o tapatapang no hongti ci Taliyus tada mapiliˈay ci Taniilan, hanaca awaay ko ngodongodo to midokoan ningra a Kawas, oranto i, misahalakaay sapipatayaw ci Taniilan. Miowingan nangra ko hongti palimoˈot to cecay sarikec, pakayni tonini sarikec oha papatalahkal ci Taniil to madimadiay ci Yihofaan, anoca madimadiay to hongti hokira. Soˈlinay haw i, ilalomaˈ no 30 romiˈad ano caka pitolon ci Taniil ci Yihofaan i, mamafanaˈ ko tao to madimadiay cingra to hongti, mahaen cowa ko mamatefoc cingra. Nikawrira, cowa ka kahi ci Taniil mihayi.—Taniil 6:12-15, 20-22. w23.08 5 fiedac 10-12 fatac

Halamhamay ci Yihofa kitanan kodait a cowa pisawad maolah to salikaka. Soˈlin eca ka paihkal ko salikaka to capeling no Krisciyang, papakasoˈlin kita makalimay cangra midoedo to safalod no Fangcalay Cudad a midemak, pakasoˈlin cowa ko padetengay cangra midokaˈ kitanan. (Taneng 12:18) Haratengen hena, cowa ko malefotay kita, kawra maolahay ko Kawas kitanan, cowa ka pakayni Cingra i raraw no mita sawad sa misawidang kitanan, anca aˈinteh sa kitanan. (ˈOlic 103:9) Tada miakoˈiday kita Cingranan! Ciharatengay kita mahecad Cingranan makahi misodod to salikaka. (Ifiso 4:32–5:1) Haratengen, mangata mangatato ko salikoray romiˈad i, matongalay ko pisaali ita a makedec malacecay ato salikaka. O papakidem pakidem ko hakokay, latek papakayni kita pihakelongan a marofo i kapalitan, itiyato i, mamangalef ko pisaali ita to sadama no salikaka.—Taneng 17:17. w24.03 15-16 fiedac 6-7 fatac

Maˈoningay no Fangcalay Cudad ko romaroma nalifetan no kapah tamdaw, miingiday cangra ci Yihofaan, milifokay to pihayda ni Yihofa, marenecen ko hakelong no kaˈorip. O ngaˈayay a tinakoan ci Tafiti, kaemangho cingra i, midokoayto ci Yihofaan, ikor malo ngaˈayay a hongti, padotoc madimadi to Kawas. (1 Hongti 3:6; 9:4, 5; 14:8) Mikingkiwkiso to nalifetan ni Tafiti, mamicada to sapakalalok malecad cingranan madimadi matayal saki Kawas. O roma i, ngaˈay kiso misongilaˈ a mikingkiwto maˈoningay i Marko anca Timoti. Mamananam iso mikitini kaemangho cangra i, midokoayto ci Yihofaan, hanaca madimadi Cingranan i hakelong no kaˈorip. O mipiliˈan nangra cowa pakahemek aca ci Yihofaan, ciepocayho ko kaˈorip no niyah. Wa ira ko masamaanay a hatokel iso, o kalimlaan i, mipiliˈan iso nohatini ko samaanay a nokaˈorip. Ano mitadiˈec kiso ci Yihofaan, eca ko inaneng no niyah ko mitiˈeran, papadama Cingra tisowanan citaneng ko misaˈosian. Caciepoc ko kaˈorip iso, marenec ko kaˈorip. Haratengen misaaretengay ci Yihofa to nano demak iso Cingranan. Misaka dademak kiso to hakelong no kaˈorip matayal i sidaˈitay Wama ci Yihofaan, awaay ko mikikakaay tonini ko kangaˈay! w23.09 13 fiedac 18-19 fatac

Tarokos ci Pawlo mafanaˈay to cowa ko malefotay ko salikaka. Hano mafanaˈ kita hani? Mala Krisciyang cingra caho ka halafin i, mapararaway no salikaka a minengneng cingra. (Dmak 9:26) Ikor, o roma tamdaw milikafay i lalikor ningra. (2 Korinto 10:10) Maˈaraway ningra ko cecay mikeriday a faˈinayan salikaka mararaway ko pisaˈosi, onini a pisaˈosi papakapolin to tao. (Kalatiya 2:11, 12) Roma i, o cecay ngaˈayay a kapot ningra ci Marko patoleday cingranan. (Dmak 15:37, 38) Ci Pawlo cowa ka pakayni to mahaenay a demak, sawad sato micawmaˈ to patoleday cingranan a tamdaw. Iraay ko tawlikay a noka pinengneng ningra to salikaka, padadotocay a fanekfek matayal saki Yihofaan. Misamaanay hano kodait ci Pawlo caka pisawad hani? Tangongolay ko olah ni Pawlo to salikaka, onini a olah pakalalokay cingranan misinanot to kangaˈayan no salikaka, ao cowa ko dangoc nangra, pakalalokay cingranan mikifalocoˈ misodod to salikaka, malecad o misowalan ningra i aniniay a sinael. w24.03 15 fiedac 4-5 fatac

Ilalomaˈ no Fangcalay Cudad adihayay ko maˈoningay, paihkalay to tada ciepocay ko damsayay. Nengnengen ko tinakoan ni Isak. Tayrato i Filistin a kilac i, itiniay i Kirar maroˈ, kawra maˈinapay ko Filistin cingranan, miselenan nangra ko mikorkoran no wama a tefon. Kawra, cowa ka sakalacongisaw ci Isak cangranan, ao malinahay tayra i roma pala, misafaeloh a mikorkor to tefon. (Satapangan 26:12-18) Kawra o niyam haca a nanom kora sanay a micoli ko Filistin. Soˈlin hatira, kamayanay ci Isak damsay a misiˈayaw cangranan. (Satapangan 26:19-25) Sapikidataw to lacongis ko Filistin a tamdaw, misamaanay hano kamayan ci Isak padadotoc a damsay hani? O wama ni Isak ci Apraham mihaenay a dipayal malacafay to tao, o wina ningra ci Sara iraay ko ‘rihadayay damsayay a falocoˈ,’ mansa mikitiniay cingra taˈarawan no wama wina adihayay ko mananamay.—1 Pitiro 3:4-6; Satapangan 21:22-34. w23.09 15 fiedac 4 fatac

Maraodto ko misaˈosian a toki i, ci sidaˈitay a Yihofa ocoran ko fisac a Wawa tayni i fafekang no sera, pasifanaˈ to tamdaw mafanaˈ tonini Hongti Kitakit no Kawas, halo patafang to ˈorip malo sapatefoc milidong to tamdaw miliyas to raraw ato patay. Ikorto, patikol maˈorip ci Yis tayra i kakarayan i, malo Hongtiayto no Hongti Kitakit no Kawas. O lalangian no Fangcalay Cudad i, papakaynien i pikowan ni Yis i Hongti Kitakit no Kawas, palaˈosien ni Yihofa ko araaw no Niyah to cikiw, salikor mamasahci a mapakorac ko mapakaditay a fangcalay ngangan no Kawas. O araaw ni Yihofa cowa ko mamafalic, mikiˈokay Cingra to papalaˈosien ko araaw no Niyah. (Isaya 46:10 ato roma pihongyak; Hipray 6:17, 18) Ikor i, mamalo lakoingto ko cikiw, o polong moecelay ko falocoˈ a teloteloc ni Atam aci Ifa papatikol a malefot ko ˈorip, hanaca aitini i lakoing ‘midaˈoc a maˈorip.’ (ˈOlic 22:26) Kawrira cowa koninian aca ko lalahcien ni Yihofa. Salikoray a araaw Ningra i, o papakelecen Ningra ko madimadiay coyoh ato tamdamdaw malacecay a midoko Cingranan, midofdof Cingranan malo Saˈakawangay a Mikowanay. (Ifiso 1:8-11) Mihaenay ci Yihofa tano kasapaan a pakayraan milahci to araaw no Niyah, coko masemeran nanay kiso han? w23.10 20 fiedac 7-8 fatac

Minokay ko Yutaya tamdaw nai Papilon tayra i Yirusalim caho ka halafin, mamisiˈayaw to kacangoˈot no sakaˈorip, o kasasifod no mirikecay ato pisafelit no ˈada. Telocto, o romaroma tamdaw pasangaray misarocod ko falocoˈ mirienang to patirengay to fangcalay sefi a tayal. Mihaenay, miocoran ni Yihofa ci Hakay aci Cikariya oniya tatosaay pairasolay pakalalok cangranan, padama cangranan miliyaw fanekfek ko falocoˈ. O sapakalalok noniya tosa pairasolay iraay ko ngaˈayay a minaroˈan. (Hakay 1:1; Cikariya 1:1) Kawra mataˈlif ko 50 miheca ikor, o Yutaya tamdaw miliyaway aca matoled ko falocoˈ. Itiya, oya mitatiliday to Fangcalay Cudad a Icraan mikitini Papilon minokay tayra i Yirusalim, pakalalokan ningra ko finawlan no Kawas miliyaw paisalakat i nokaˈorip to matatodongay a pidoko. (Icra 7:1, 6) Itini nolitengan, milasilan ni Hakay aci Cikariya a lihaf padamaay to finawlan no Kawas, tahasiˈayaw cangra to pisafelit padadotocay a mitiˈer ci Yihofaan. Anini, onini a lihaf papadama kitanan tahasiˈayaw to pades i, padadotoc a mitiˈer ci Yihofaan.—Taneng 22:19. w23.11 14 fiedac 2-3 fatac

Sasamaan kita patalahkal to olah i salikaka hani? O cecay pakayraan i, mihinom cangranan. Ano iraay ko siniˈadaay a falocoˈ ita, wa ngaˈayto ‘padadotoc masasihinom.’ (1 Tisalonika 4:18) Samaan ko pidemak ita ngaˈ padadotoc fanekfek masasiolah hani? Ano mararaw ko salikaka i, misarocod kita misodod cangranan. Hano mikiriwiˈay kita anini misaali to masasiolahay hani? Pasowalay ci Pitiro kitaanan to cecay kalimlaan a lalangian, sanay cingra: ‘Mangatato ko paherekan no hekal. Mihaenay . . . ka fanekfek a masasiolah.’ (1 Pitiro 4:7, 8) Pakayni noka ngatato no paherekan no ciraraway a hekal, kita o mikotoday ci Yisan a tamdaw wa tahalifa to maanan hani? Paˈayaway ci Yis somowal: ‘Pakayni kamo i ngangan ako, o kakaˈintehen no polong a kasafinawlan.’ (Matay 24:9) Sapiememaw to mahaenay a kaˈinteh, o papadadotoc kita makedec a malacecay. Ano fanekfek kita masasiolah to salikaka, awaayto ko pakayraan ni Satan paliwasak kitaanan.—Filipi 2:1, 2. w23.11 13 fiedac 18-19 fatac

O soˈlinay kimad no Fangcalay Cudad awaay ko tolas no ˈicel. Misaka dademak kita to Fangcalay Cudad pasifanaˈ to tamdaw mafanaˈ ci Yihofaan, ato masakenakenaay makapahay a capeling Ningra, wa irato ko ngaˈayay a minaroˈan. Na masaˈfitay no mangah ni Satan ko ˈalomanay tamdaw, kawra micada to soˈlinay kimad ikor palidlid sanay maˈaraw ko ˈodingar, matongalay ko kafanaˈ to masakenakenaay a makapahay capeling no kakarayan Wama. Maˈaraw nangra awaay ko tolas no ˈicel no kakarayanay a Wama, mikangodoayto Cingranan. (Isaya 40:26) Mafanaˈ cangra cowa pisakakinih ko kakarayan Wama, o masadafdafay Cingra, ikorto i, misatapangay mitadiˈec Cingranan. (Limoˈot 32:4) Samanen minanam cangra to tangongolay a taneng no kakarayan Wama, cipinangayto to adihayay a demak. (Isaya 55:9; Loma 11:33) Mananamay nangra o pinangan no Kawas o olah i, milifokay to taˈangayay a sahinom. (1 Yohani 4:8) Matongal ko kapiingid nangra ci Yihofaan, matongalay ko pakasoˈlin o ngangaˈay tahadaˈoc maˈorip ko niyah, tahadaˈoc malo wawa no Kawas. Padama kita to tao miingid to kakarayan Wama, o ‘malacafayay matayal’ Cingranan saan ko pinengneng Ningra kitaanan, tada o kalikoan konini!—1 Korinto 3:5. w24.02 12 fiedac 15 fatac

Minanamay kiso to Fangcalay Cudad nohatini han? Anca nano mimingho itiniay kiso i soˈlinay kimad a lomahad han? Miharatengay kiso to mamipaputisem nohatini han? O sangaˈayay a patosokan konini, kawra ˈayaw no mipaputisem i, aisalakatho kiso patafang to tireng ci Yihofaan. Sasamaan kiso patafang to tireng ci Yihofaan hani? Itini satolon pasayra ci Yihofaan miketon to sowal, mamisamacay kiso midoko Cingranan, hanaca paisalakaten ko araaw Ningra i nokaˈorip. Mihaen o miketonay kiso to sowal ci Yihofaan, papadadotoc kiso ‘misarocod to falocoˈ, harateng, ˈicel, tano polong a ˈorip’ maolah Cingranan. (Marko 12:30) Patafangay to tireng o notekedan iso a demak, edengan kiso aci Yihofa ko mafanaˈay. Micadaay to paputisem o pakapapotalay a demak konini, ngaˈayay mafanaˈ ko romaroma tamdaw maherekayto kiso patafang to tireng ci Yihofaan. Ano mikifalocoˈay kiso miketon to sowal patafang to tireng, o dadoedoen ko miketonan a sowal, halamhamay ci Yihofa tisowanan mihaen ko pidemak.—Patnakay 5:4. w24.03 2 fiedac 2 fatac; 4 fiedac 5 fatac

Polong a raramod iraay ko mahaenay a pasangar. Ihkalay ko Fangcalay Cudad a somowal, o ‘mamaroray’ ko mararamoday tamdaw. (1 Korinto 7:28) Misamaanay hani? Samanen o raramod hananay i, makakadepay ko tatosaay cowa ka lefot a tamdaw, makairaay cangra tono niyah a pinangan ato kaolahan, cowa ka lecad ko serangawan anca lalengawan nangra, hanaca ikor no mararamod ngaˈ mahapinangay ko maanan a demak. Onini a lalangian latek mamikidat to lacongis. Ano mifekad ko pasangaray i, makoiraay ko raraw nangra tatosa alatek, kawra cowa pikinsa cangra to niyahan alatek, cowa ka malacafay misaysay to pasangar, makamirorohay cangra, ka pisieked anca malacinowas ko sangaˈayay a sapisaysay pakayraan wa saanto cangra. Nikawrira, palimoˈotay ci Yihofa to ciraramoday a tamdaw, soˈliˈlin pasangar ko kalacafay to ramod, o mamikangodo to limasmas no mararamoday. w24.03 16 fiedac 8 fatac; 17 fiedac 11 fatac

Mikitini i Fangcalay Cudad mananamay iso, ira ko hatokel no niyah tahadaˈoc i fafekang no sera a lakoing maˈorip. Soˈlin ikor no patafang to tireng micada to paputisem i, padadotoc matongal ko kafanaˈ ci Yihofaan, itini pihakelongan mamalingad ko katenes, hato matongalay ko katanektek no hatokel no niyah. (Hipray 5:13–6:1) Pakayni nalifetan no niyah, mafanaˈayto kiso to tatodong no sowal i Loma 5:2-4. Tahalifaay kiso to masakenakenaay a pades, kawra padotocay kiso miemem, mahapinangayho to mihaydaay ci Yihofa tisowanan. Pakasoˈlinay kiso tada maolahay ci Yihofa tisowanan, mansa adihayayto ko lalangian iso pakasoˈlin nohatini, o mamalifok no niyah ko mikiˈokan no Kawas a sapalemed. Palalinien to kafanaˈho iso to soˈlinay kimad i, matongalayto ko katanektek no hatokel iso nohatini. Onini a hatokel ihkalayto i falocoˈ iso, matongalay ko epoc tisowanan, taˈangayay ko pifiyor tisowanan. Onini a hatokel mifalicay to kahirahira no kaˈorip iso, mahawpay to sasamaan misiˈayaw to paro no lomaˈ, sasamaan misaˈosi, ato sasamaan misaka dademak to toki. Malifokto ita ko pihayda no Kawas i, iraayto konini a hatokel, pakayni toninian misaˈicelay ci Pawlo a somowal, o mamalaˈosi konini a hatokel sanay.—Loma 15:13. w23.12 12-13 fiedac 16-19 fatac

Ano malifa ko pakidemay a sapalifet i, o falocoˈ, harateng ato pidemak ita cowa ka lecad to kalo romiˈad alatek, tada macariraway ko falocoˈ alatek. Ano hato mamaˈemek no tatiihay falocoˈ kita i, sasamaan ci Yihofa padama kitaanan hani? Mikiˈokay ci Yihofa to papatanekteken Ningra kita. O tamina ano tahafaliyos i, latek satapangay a mangoyangoy. Toha sapilowanaw to kangoyangoy, ilaeno no tamina makofatiˈiyan iraay ko mikiriwiˈay a lalosidan, ngangaˈay a milowan to kangoyangoy no tamina, rihaday ko karomakat, hanaca sinowayen ko midakaway a tamdaw. Ora sasinanoten i, o sapilowan to kangoyangoy no tamina a lalosidan, ano romakatto talaˈayaw ngaˈ, satapangay a dademak a mipatanektek to tamina. Malecaday, itini kapasangaran ano padadotoc kita madimadi midoko ci Yihofaan i, o papadamaen ni Yihofa kita patanektek. w24.01 22 fiedac 7-8 fatac

Ano matalawen kiso i, ngaˈayay saharateratengen: “Na midemakay ci Yihofa to maanan?” Haratengen ko misangaˈan ni Yihofa a maamaan. Tinakoen, ‘songilaˈen a mihapinang’ samaanay ci Yihofa midimokos to maeferay ˈayam ato hana. Soˈlin cowa ka paringien no Kawas Cingranan misangaˈ to ˈayam ato hana, cowa ka pidoko Cingranan, kawra kamayan songilaˈen ni Yihofa a midimokos cangra. Misaharaterateng tonini a demak, o mamatongal ko pakasoˈlin no mita to dadimokosen ni Yihofa kita. (Matay 6:25-32) Ngaˈayayho haratengen iso, ci Yihofa pakayni midokoay Cingranan a tamdaw midemakay to maanan. Ngaˈayay kingkiwen iso ko cecay tanektekay ko pakasoˈlin no falocoˈ a tamdaw i Fangcalay Cudad, anoca miˈosi to nalifetan no aniniay lintad a sikawdan ni Yihofa. Roma i, haratengenho iso to samaanay ci Yihofa midimokos tisowanan. Isaˈayaw samaanay Cingra misolot tisowanan mafanaˈ to soˈlinay kimad hani? (Yohani 6:44) Samaanay Cingra pacaˈof to satolon no miso? (1 Yohani 5:14) To romiˈamiˈad, mikitiniay kiso i sapatefoc no kanonoˈan a Wawa Ningra milifok to maanan a haepoc hani?—Ifiso 1:7; Hipray 4:14-16. w24.01 4 fiedac 6 fatac; 7 fiedac 17 fatac