Micekiw to Fangcalay Cudad Matongal ko Epoc Adihay ko Raheker

Miasipay ci Yosuwan to sarikec a cudad; Maperaray ko ˈadipel no Yiriko, cowa ka perar ko lomaˈni Rahap; Pasayraay kakarayang ko kamay ni Yosuwa a mitolon

MISIˈAYAWAY ci Yosuwa to taˈangayay a sapalifet, mikerid cingra to Israil kitakit micomod i Mikiˈokan a Pala, adihayay ko raremoen a demak. Patimoloan ni Yihofa ci Yosuwa, tanoktok, midofdof to sarikec, pakalalokayho cingranan to romiˈamiˈad miˈosi to sarikec a cudad, ngaˈmisinanot a midofdof tora rikec. Mikiˈokay ci Yihofa, ano mihaen ko demak ni Yosuwa, wa citaneng a malaˈosi ko demak.—Yosuwa 1:7, 8.

Itiniay i ‘pasangaray siˈayawen a ˈawaled’ a maˈorip kita, wa mahecad ko masiˈayaway a pasangray a sapalifet. (2 Timoti 3:1) Ano tengilen ita ko sapalimoˈot ni Yihofa ci Yosuwaan i, wa mahecad cingranan malaˈosi ko demak. Ceriden ita miˈosi ko Fangcalay Cudad, ano masiˈayaw ko pasangar i, sakademaken ko minanaman.

ˈAlomanay a tamdaw cowa ka fanaˈto sasamaan micekiw, anca pasangaray ko micekiway sanay a miharateng, kawra, ano kalimlaan ko micekiway to Fangcalay Cudad, wa ngaˈay nengnengen ko sapasifanaˈlalakaw “Tanamen Hena”, adihayay ko sapaini ilaloma, padama tisowanan ciepoc ko picekiw, wa taˈangay ko hemek iso.

Sanay ko radiw no mitiliday to ˈOlic: “Nanay keriden kako a parakat to limoˈot a lalan Iso, nawhani naitira a miala kako to sakalipahak ako.” (ˈOlic 119:35) Mikitini picekiw to Kimad no Kawas wa ngaˈay malifok iso ko taˈangay a hemak. Mamahapinang iso adihayay ko noˈadingoan a odoˈmitalaay tisowanan a mikadkad.

Soˈlin cowa ko mamahecad kiso ci Yosuwaan mikerid to cecay a kitakit, kawra, wa masiˈayaw iso ko sapalifet alatek, mihaenay pasayra ci Yosuwaan a minanam, micekiw to kimad no Kawas ato misakadademak to limoˈot ilaloma. Mihaen ko demak iso, wa citaneng a malaˈosi ko demak.

TANAMEN HENA

ˈAyaw no micekiw mitolonho. Mahaopay ko harateng no ciˈicelay a Kawas i Fangcalay Cudad, sahtoay o ciepocay ko mitilidan. Mansa, cangacangen ci Yihofa pahapinang tisowanan ato maharateng ko micekiwan a lalakaw, padama tisowanan ngaˈay sakadademaken i kaˈorip no miso.—Icra 7:10.
Licayen ko niyah to pina salicay. Micekiw to Fangcalay Cudad ato roma cudad i, licayen ko niyah: “Mikitini i cudad minanam to maanan a demak pakayni ci Yihofaan? Oniya lalakaw ato lalangian no Fangcalay Cudad, iraay ko maanan a kalaliting? Sasamaan kako misakadademak to minanaman a padama to tao?”
Midotimen to maˈosiay a lalakaw. Ano micekiw i, tomerepho a midotim, haratengenho ko laenoay a salicay: “O miˈosian a lalakaw iraay ko samaanay a harateng ako? Hano ira ko hatiniay a harateng ako hani? Oniya lalakaw ato nalifetan ako isalakat, nohatiniay pakayraan, ato ikor mamisiˈayaw a demak iraay ko maanan kalaliting hani? Samaanen ako sakadademak ko safalod ato limoˈot no Fangcalay Cudad i kaˈorip hani?” (Yopu 23:5; ˈOlic 49:3) Ngaˈay haratengen: “Hano patalipaˈelal ci Yihofa to finawlan Ningra aka pidemak to maanan a demak hani? O roma tamdaw i Fangcalay Cudad, ano midemak to cowa ka hecad a demak i, wa samaanto ko teloc hani?”—Limoˈot 32:28, 29.
Sakadademaken ko sapiharateng a inaneng. Ano miˈosi kiso to lalakaw no tawcikel i, haratengen ko mifekaday a demak itiya, tinakoen, tiya pacakayen no kaka ni Yosif cingra i, misasingdiay no Ismail samaanay ko pakayraan hani? (Satapangan 37:18-28) Ano micekiw kiso i, o maˈaraway, matengilay, mahanekay ko maanan hani? Telien ko niyah ilalomaˈ, miharateng to masalalomaˈay ko niyah, wa samaan ko harateng ato milefetan. Sakadademaken ko sapiharateng a inaneng wa padama tisowanan to tahalifetay kiso toniya demak, mihaen ko picekiw wa matongal ko haepoc.
Sakadademaken ko sapicekiw to Fangcalay Cudad a lalosidan. Oniya lalosidan wa padama tisowanan mahela ko adihayay a lalakaw. Ano o mitepangan anca o wangcannan a lalosidan, iraay ko no miso a sowal a sapicekiw a lalosidan, nanamen samaan a misakadademak. Ano caka fanaˈkiso a midemak i, ngaˈay licayen ko tao to sasamaan misakademak toniya lalosidan. Pirorodan to Mitepangan Cudad no Mikecolay ato Pirorodan to Mitepangan Cudad no Misawacaay Tamdaw ni Yihofa, ngangaˈay padama tisowanan mahela ko cowa ka hecad ko lalangian a lalakaw, ato sapitadtad to sinael. Ngaˈayho kiso sakadademak to Tanengnengan to Fangcalay Cudad, oniya cudad wa mihadak to pakayni i kitiraan pala, lintad, karateng, sapilalat to dafong a lalakaw.
Komoden ko kalimlaan no picekiw. Mihaen to demak i, wa ngaˈay padama tisowanan a pakaramot to na micekiwan a lalakaw. O cecay ngaˈayay a pakayraan i, paladaˈen ko tao to kalimlaan, tinakoen, sakadademeken ko mananamay i pitosilan. Ano mihaen to demak kiso, wa maharateng ko kalimlaan i falocoˈ, ngaˈayho padama to tao.