Pinengnengan to lalakaw no Mitosilay ato Nikaˈorip Rayray no Saˈopo
SAKA 7 FOLAD 1-7 ROMIˈAD
O ODOˈ KO KIMAD NO KAWAS | KOLOSAY 1-4 FEDENGAN
‘Helongen ko Katelangay Pinangan, Caˈedongen ko Faelohay Pinangan’
(Kolosay 3:5-9) Orasaka, patayen ko nohekalan a tatiihay a demak no tireng oya maˈodangay, kaacekan a demak, kasimelangan a demak, o imah ato masamaamaanay a ˈanof. (O ˈanof i, o cecay no pitaˈong to samiyay.) 6 Onini a demak ko sakaketer no Kawas to caay pitoor a tamdaw. 7 Yo masalalomaˈho nonini a demak kamo iˈayaw i, hatiniay ko demak namo. 8 Nikawrira, anini sato i, o fafalahen namo ko masamaamaanay a maketeray ato mafirangay ato ˈintelay a falocoˈ ato mitonganganay ato kasimelangan a sowal namo. 9 Aka ka sasisamangah kamo. Nawhani mahelongto namo a mifalah ko katelangay a falocoˈ ato demak nonini.
w11 3/15 10 fiedac 12-13 fatac
Milayap to Fangcalay Saocor no Kawas, Cowa ko Nohekalan
12 O pinangan ako ato waywayan ako paihkalay to nohekalan pakayraan ha anca paihkalay to saocor no Kawas ha? (ˈOsien ko Kolosay 3:8-10, 13.) Ono hekalan a pakayraan micowatay to coos no tireng. (Kalatiya 5:19-21) Maˈimeray no nima a pakayraan kita sa i, ano mapalifet kita itiyaay a mahapinang, patinakoen ano caka pisikor ko salikaka kitanan, mikariˈang kitanan, anca pakararaw kitanan. O roma i, o demak ita itini i lomaˈ, mahapinangay to mafiyoray no hekalan ha anca mafiyoray no saocor no Kawas ha. Saharateratengen hena: “Toni mataˈlifay a 6 folad, o pinangan ako mahecad mahecaday ci Kristoan han? Anca o tatiihay a pinangan ko miliyaway a masadak han?
13 O saocor no Kawas papadama kitanan “mihelong to katelangay pinangan”, “micaˈedong to faelohay pinangan”. O papadama kitanan matongal ko sidaˈit ato olah a falocoˈ. Soˈlina iraay ko lalangian ita ngaliwngiw, makahiayho kita a misodod to tao. Ano malifa ita ko cowa ka sadafdaf a demak, hamaan patahkal to “ˈintel ato maketeray ato mafirangay a falocoˈ. Aka piceliˈ, aka pilokes, aka piharateng to masamaamaanay a tatiihay.” Sasafeliten ita a patahkal ko “kasasiniˈadaˈada”.—Ifiso 4:31, 32.
(Kolosay 3:10-14) O micaˈedongayto kamo to faelohay a falocoˈ. Onini a faelohay a falocoˈ i, o miringiay to misangaˈay a Kawas. Masafaeloh a masafaeloh konini to sakasongilaˈaw namo a mafanaˈ i Cingraan. 11 Saka, ano o Krisiyato, ano o Yutayato, ano o makeritayto a tamdaw, ano caayto ka kerit a tamdaw, ano o maapacayto ko ˈorip, ano o kulito, ano caayto ko kuli i, awaay ko kasasiroma. Nawhani o mikomoday ci Kristo. O maroˈay i kahacecacecay no tamdaw cingra. 12 O nipiliˈanto no Kawas kamo. O kaolahan Ningra a finawlan kamo. Saka, kao adayayay, kao siniˈadaay, kao misapoeneray, kao damsayay, kao kodaitay ko falocoˈ namo. 13 Kasasisolol kamo. Ano iraira ko katatiihan no falocoˈ no nima namo i cimaanan i, kasasihepol. Haenen o nipihepol no Tapang to raraw namo ko nika sasihepol namo to raraw. 14 Itini tonini a demak a maemin i, pahapinangen ko olah. Nawhani o olah ko misongilaˈay a mipalacecay to falocoˈ no tamdamdaw.
w13 9/15 21 fiedac 18-19 fatac
Masafaelohayto Kiso a Mafalic han?
18 Ano maolahay kiso masafaeloh a mafalic no Kimad no Kawas i, mararid a miasip ato minanam to Fangcalay Cudad, cowa ka edeng koni. Marariday a miasip ko ˈalomanay tamdaw, mafanaˈay to lalomaˈay no Fangcalay Cudad. Itini i pitosilan alatek malitemohay iso ko matiniay a tamdaw. O roma tamdaw mafanaˈay pakaharatengan sanay a miˈosi. Soˈliˈlin hatira, cowa ka mafiyor no Fangcalay Cudad ko harateng ato kaˈorip nangra. Hano mahaen hani? Samanen pacomoden i kemod no falocoˈ ko Kimad no Kawas wangaˈ, mafalic ko kaˈorip no tamdaw. Mankora, palaken ko toki misimsim to mahatatanamay a sifanaˈ no Fangcalay Cudad. Licayen ko niyah: “Mahapinangay ako to o soˈlinay kimad, ao cowa ko cecay a sapasifanaˈ no pidoyongan koni han? Tangongolay ko nika pakasoˈlin ako toni han? Pasifanaˈan ako ko tao toni sifanaˈ, halo kalasaka dademakan no mako han? Pakasoˈlinay kako to naitiniay ci Yihofaan koni sifanaˈ, mahapinangay to pakayniay i Fangcalay Cudad Cingra a pasowal i takowanan han?” Ano dotimen ita ko matiniay a salicay i, mamaingid ita ci Yihofa, mangalef ko kaolah i Cingranan. Masemer ko falocoˈ, irato ko matatodongay a demak.—Taneng 4:23; Luka 6:45.
19 O sowal ni Pawlo: ‘Helongen ko katelangay pinangan ato katelangay waywayan. Caˈedongen ko faelohay pinangan. O matiniay a pinangan o pakayniay i soˈlinay sifanaˈ. . .palidlid sanay a masafaeloh.’ (Kolosay 3:9, 10) Alatek misarocodayto kiso misaˈicel. Ano mararid kita miasip to Fangcalay Cudad, midotim to mananamay a sifanaˈ i, aairato ko taˈangayay a ˈicel a kalasaka dademak to sapalimoˈot ni Pawlo. Edeng ano soˈlin a cipinang to Kimad no Kawas, kiemel a midoedo i, o mamacaˈedongto ko faelohay pinangan no Krisciyang. Ano macaˈedongto ko faelohay pinangan i, cowa ito ko mamasaˈfit ni Satan kita.
Kadkaden ko Noˈadingoan Odoˈ
(Kolosay 1:13, 14) Paˈoripen no Kawas kita a paliyas nai ˈicel no toˈmanay a milinah a patayra i nikowanan no kakaolahan Ningra a Wawa. 14 Pakayni tonini a Wawa ko sakatedal ita ato sakahepol no raraw ita.
it-2 142 fiedac 1-3 fatac
Hongti Kitakit no Kawas
‘Kitakit no Kanonoˈan a Wawa Ningra.’ Isaka 33 miheca a Kocinsic, to ikor no katayra ni Yis i kakarayan to 10 a romiˈad, mitaktakan ningra ko fangcalay saocor i tireng no nisawawaan, mihaenay a misawacay to nika ‘mapacakatay cingra, tayra i kawanan no Kawas’. (Dmak 1:8, 9; 2:1-4, 29-33) Itiyaay a misatapang malaˈosi koya “faelohay a katatelekan”, ngaˈayto a mala fangcalay finacadan ko nisawawaan (noˈadingoan a Israil).—Hipray 12:22-24; 1 Pitiro 2:9, 10; Kalatiya 6:16.
Itiyaay misatapang maroˈ ci Kristo i kawanan no ikakarayanay a Wama, malo Kakeridan no Krisciyang a kasakopang. (Ifiso 5:23; Hipray 1:3; Filipi 2:9-11) O sowal no Fangcalay Cudad, naitini saka 33 miheca misatapang, mapatirengayto ko cecay noˈadingoan a kitakit, mikowan to nisawawaan. Tiya patikami ci Pawlo to Kolosayay Krisciyang i, somowalay toni tomirengayto a noˈadingoan a kitakit ni Kristo, sowal sa: “Paˈoripen no Kawas kita a paliyas nai ˈicel no toˈmanay a milinah a patayra i nikowanan no kakaolahan Ningra a Wawa.”—Kolosay 1:13; palalinien to Dmak 17:6, 7.
Onini kitakit ni Kristo, o noˈadingoan a kitakit, isaka 33 miheca a Kocinsic misatapang a mikowan to noˈadingoan a Israil, oya nihofocan i fangcalay saocor a Krisciyang, malo noˈadingoanto a wawa no Kawas cangra. (Yohani 3:3, 5, 6) Onini nai fangcalay saocor a hofocen a Krisciyang, ano tayrato i kakarayan milayap to sapalifon i, cowa ito ko nikowanan no kitakit ni Kristo cangra, ao mikapotto ci Kristoan a mala hongti i kakarayan.—Paˈarawan 5:9, 10.
(Kolosay 2:8) Pinaˈon kamo to sakacaaw ka saˈfit a mapalit no awaay ko epoc a noharatengan a fanaˈ. O nano tatoˈasan a nika tatorotorodan a lekakawa ato lisin a demak no hekal konini. Caay ko nano ni Kristo konini.
w08 8/15 28 fiedac 9 fatac
Kalimlaan no Kalatiya, Ifiso, Filipi ato Kolosay a cudad
2:8—O manan kora ‘pantaay a nohekalan a harateng’ sanay a palimoˈot ci Pawlo hani? Mitoroan o pantaay a harateng to mikayatay ato micorohay toni hekal ni Satan a demak. (1 Yohani 2:16) Mahawpay kono pakatamdaway a sifanaˈ, pasadafongay a falocoˈ ato mararaway a pidoyongan.
Miˈosi to Sinael
(Kolosay 1:1-20) O nano nafalocoˈan no Kawas a malatarokosay ni Kristo Yis ci Pawlo kako. 2 Patilid kako aci Timoti i tamowanan o i Kolosayay a malacecayay aci Kristo a soˈlinay ko falocoˈ a finawlan no Kawas a salikaka niyam. Nanay mapalemed maparihaday no Wama ita a Kawas kamo. 3 Yo mitolon kami to saki tamowanan i, mararid kami a mikansya to Wama a Kawas no Tapang ita. 4 Nawhani matengil niyam ko pakayniay i nipitiˈer namo i ci Kristo Yisan ato nika olah namo to finawlan no Kawas. 5 Yo mapatenak i tamowanan i saˈayaw ko Ngaˈayay a Ratoh to pakayniay i sowal no Kawas i, mahapinangto namo i Ngaˈayay a Ratoh ko malopafalocoˈan namo. Ira i kakarayan konini. Onini a pafalocoˈan ko sakapitiˈer namo ato sakaciolah namo. 6 Matenak matenak i polong no hekal konini a Ngaˈayay a Ratoh a lomahad a ciheci i falocoˈ no mitengilay. Mahaenay kamo. Namitengil kamo to pakayniay i siniˈada no Kawas i, mahapinangto namo ko nika soˈlin nonini a tahanini. Saka, malahad i tamowanan konini a Ngaˈayay a Ratoh a ciheci. 7 Ci Ipafras o kaolahan niyam a kapot, o soˈlinay ko falocoˈ a matayalay ni Kristo to saki titaanan ko sakafanaˈ namo to siniˈada no Kawas. 8 Cingra ko pakafanaˈay i tamiyanan to nika o nano [fangcalay saocor] ko sakaciolah namo. 9 Orasaka, namatengil niyam ko pakayniay i tamowanan a tahanini i, mararid kami a mitolon to saki tamowanan. Nanay, mapafeli no Kawas kamo to nano [fangcalay saocor] a taneng ato sakafanaˈ namo a misongilaˈ a mihapinang to nafalocoˈan no Kawas. 10 Ta madoedo namo ko matatodongay i nafalocoˈan no Tapang a demak a mararid a palipahak i Cingraan. Ta ngaˈay ko demak namo a maemin. Ta matongal matongal ko nika fanaˈ namo to Kawas. 11 Nanay, pakayni i maedilay a ˈicel no Kawas ko sakaciˈicel mapaˈicel kamo to masamaamaanay a ˈicel ta maedeng kamo a, kodait a mihadidiˈ to pades a maemin. Nanay, o lipahakay a falocoˈ ko 12 sapikansiya namo to Wama a Kawas. Nawhani patatodongen no Wama a Kawas kamo to sakangaˈay namo a mikapot to finawlan Ningra itira i taengaday a sakowan a milayap to saparocek Ningra. 13 Paˈoripen no Kawas kita a paliyas nai ˈicel no toˈmanay a milinah a patayra i nikowanan no kakaolahan Ningra a Wawa. 14 Pakayni tonini a Wawa ko sakatedal ita ato sakahepol no raraw ita. 15 Ci Kristo ko faco no caay ka ˈaraw a Kawas. O ikakaay no masangaˈay a maamaan cingra. 16 Nawhani pakayni i cingraan ko nipisangaˈ no Kawas to maamaan. Ano ikakarayanayto, ano ihekalayto, ano o maˈarawayto, ano o caayto ka ˈaraw a maˈoripay a maamaan halotapatapang ato mikowanay ato cisakowanay a kawakawas i, pakayni i cingraan ko nipisangaˈ no Kawas tonini a maemin. O romasato, o saki cingraan ko nipisangaˈ no Kawas tonini. 17 Iˈayaw no nika ira no maamaan a ira ci Kristo. Cingra ko sakaterek no maamaan. 18 O fongoh no tatirengan cingra, o tapang no saˈopo no mitooray. O tatapangan no ˈorip no mitooray cingra. O saˈayaway a lomowad a maˈorip nai patay cingra. Onini ko saka malasakakaay cingra i polong no maamaan. 19 O nafalocoˈan no Kawas saka, pafeli han Ningra i Wawa Ningra ko polong no pinangan Ningra. 20 Saka, pakaynien no Kawas i nika patay no Wawa Ningra i [hecek] ko sapararihaday to maamaan ato Cingra. Ano ihekalayto, ano ikakarayanayto a maemin i, pakayni i cingraan ko sakalaliˈay. O karahekeran no Kawas a misafalocoˈ konini a demak.
SAKA 7 FOLAD 8-14 ROMIˈAD
O ODOˈ KO KIMAD NO KAWAS | 1 TISALONIKA 1-5 FEDENGAN
“Haenento O Demak Namo Anini ko Nika Sasipaˈicel Namo a Masasipadama”
(1 Tisalonika 5:11-13) Orasaka, haenento o demak namo anini ko nika sasipaˈicel namo a masasipadama. 12 Salikakaaw, milongoc kami i tamowanan, kangodoen ko marorayay a matayal to saki tamowanan a tamdaw. Nawhani o nipatirenganto no Tapang cangra a papikerid a pasifanaˈ i tamowanan. 13 Tona o matayalay cangra saka, kangodoen cangra. Kaolahen cangra. Kararihaday kamo.
w11 6/15 26 fiedac 12 fatac
Kangodoen ko Marorayay a Matayal to Saki Tamowanan a Tamdaw
12 “Mikayat” to kasakopang sa i, cowa ko papasifanaˈ aca. Itini i 1 Timoti 3:4 kalasaka dademakan ni Pawlo koni “mikayatay” hananay a tilid. Sowal sa cingra, o malo kantokay a tamdaw ‘mafanaˈay a mikayat to paro no lomaˈ no niyah, midofdof ko wawa, matenes ko demak nangra.’ Ora “mikayatay” hananay a sowal, cowa ko nika pasifanaˈ aca to wawa, mahawpay to mamikayat to paro no lomaˈ maemin, hongaˈ ‘midofdof ko wawa’. Mahapinangay itini, o malohemay malitengay oha mamikayat to kasakopang, padama to polong a salikaka midofdof ci Yihofaan.—1 Timoti 3:5.
w11 6/15 28 fiedac 19 fatac
Kangodoen ko Marorayay a Matayal to Saki Tamowanan a Tamdaw
19 Ano iraay ko tamdaw pafeli tisowanan to sapakaolah, hanaca o misarocodan ningra a misaday, wa sasamaan ko falocoˈ iso hani? O sasalimlaen iso kalaska dademak koni sapakaolah, paihkal to nika piakoˈid iso tora pafeliay a tamdaw han? ‘Malo sapakaolahay’ a tamdaw hananay i, nao pakaynian ci Yisan a sapafeli ni Yihofa tisowanan. O cecay a pakayraan to nika piakoˈid iso toranan i, samacayen a mitengil ko kimad no malohemay malitengay, saˈicelen a mitoor ko sowal nangra. O roma a pakayraan i, itini i kasaˈopoan pasowal to citatodongay a caˈof. Midama to mikeridan no malohemay malitengay a demak, mahaen o mitosilay a demak. Ano palimoˈotan no malohemay malitengay kiso, malifokay iso ko epoc i, pasowalen cingra tora harateng iso. Aka a mapawan miakoˈid to paro no lomaˈ ningra, samanen maroray ko malohemay malitengay matayal saki kasakopang i, malowanay ko toki nangra mikalacafay to paro no lomaˈ.
(1 Tisalonika 5:14) Salikakaaw, paˈicel kami a somowal i tamowanan. Palimoˈoten ko matokaay a tamdaw. Paˈicelen ko matoleday a tamdaw. Padamaen ko tadancaay a tamdaw. Kao kodaitay ko falocoˈ namo to saki cangraan a maemin.
Sasamaan Patahkal to Soˈlinay Olah
13 Damaen ko malonayay tamdaw. Pakalalokay ko Fangcalay Cudad kitanan midama to malonayay tamdaw, kodait a micada to polong a tamdaw, iraay hokira ko soˈlinay a olah ita milingatay toni sapalimoˈot. (1 Tisalonika 5:14) ˈAlomanay isaˈayaw matoleday ko falocoˈ a salikaka, ikor tanektekayto cangra. Kawra, o romaroma alatek o hahadidien ita cangra, dotocen a mipadama cangra. Lengoen ita cangra to mikowaday sowal no Fangcalay Cudad, ataen cangra mitosil, anca palaken ko toki mitengil to falocoˈ nangra. Tohatiniay tanektekay kita, kawra nolatek iraay ko kalonayan, mansa ano malonay ko salikaka i, aka pakihater han, ano ci Pawloto somowalay to nika tadanca no niyah. (2 Korinto 12:9, 10) Mihaenay haw i, kita kahacecay a Krisciyang oha mamasasi damadama a mipadang.
w15 2/15 9 fiedac 16 fatac
Todongen ci Yis Misapoener ato Damsay ko Falocoˈ
16 O damsayay a sowal ita. Ano damsay ko sowal ita, patahkalay to siniˈadaay, “mapaˈicel ko matoleday a tamdaw.” (1 Tisalonika 5:14) O manan ko hasowal ita pakowad to tao hani? Ngaˈayay pasowalen ita to ciharatengay kita i cangranan. Pakahemeken ko inaneng ato noka pisaˈicel nangra, halo pasowalen cangra, tona o ci Yihofa ko padamaay cangranan pakahela to kimad, maedeng misalimlaan no Kawas cangra a minengneng. (Yohani 6:44) Pasowalen cangra to ciharatengay ci Yihofa toya “mararomay matoleday a tamdaw”, ato “makesemay ko falocoˈ a tamdaw.” (ˈOlic 34:18) O sowal ita ano damsayay siniˈadaay i, o mamaadah ko falocoˈ nangra.—Taneng 16:24.
Kadkaden ko Noˈadingoan Odoˈ
(1 Tisalonika 4:3-6) O nafalocoˈan no Kawas i, o nika korac namo ato nipiliyas namo to maˈodangay a demak. 4 Kamo o mararamoday, kao fangcalay, makoracay ko falocoˈ namo a mararamod. 5 Aka ka matiya o mafokilay to Kawas a roma a finacadan a pakonira to ˈanof no tireng a miolatek a mikalona. 6 Caay ko hahaenen a mipararaw, caay ko hahaenen a misamsam ko malecaday ato kiso a mitooray. Mahaen ko papinaˈon niyam i tamowanan iˈayaw a pasowal to nika o mamatefoc no Tapang ko matiniay a demak a maemin.
it-2 973
Maˈodangay
O karetengay a raraw ko maˈodangay, o saka mafalahaw no Krisciyang nai kasakopang. (1 Korinto 5:9-13; Hipray 12:15, 16) O sowal ni Pawlo, o maˈodangay tamdaw hananay i, malaˈalipay to cowa ko raramod no niyah a tamdaw, pakararaw to tireng no niyah. Mihaenay tada mirepatay to noˈadingoan no niyah, pakadit to kasakopang, hanaca mirepatay to tireng no niyah, latek saka adadaaw to lingpiw. (1 Korinto 6:18, 19) Hanaca, o maˈodangay tamdaw misamsamay to fadangalan no romaroma Krisciyang (1 Tisalonika 4:3-7): (1) Oniya kasimelangan a waywayan pakangodoay ato pakaditay to kasakopang (Hipray 12:15, 16), (2) mapalahedaway ningra ko korac nora sakaaˈodang a tamdaw, ano caayho ka ciraramod cingra i, ikor ano ciraramodto cingra i, cowa ito ko limocedan ko tireng, (3) pakaditay to makapahay ngangan no paro no lomaˈ, (4) pakararaway to wama wina no tao, faˈinay ningra anca hahafaˈinay ningra. O maˈodangay tamdaw cowa aca pisakahemaw to mirikecay no hekal, soˈlina pasalatan no hekal ko matiniay a demak, nawhani o Kawas ko misakahemawan nangra. O maˈodangay a raraw, cowa ko aˈca ka tefocen no Kawas.—1Tisalonika 4:8.
(1 Tisalonika 4:15-17) O nano sowal no Tapang ko sapasowal niyam tamowanan. Kita o maˈoripayho tangasa i nipiliyaw no Tapang a tayni i, caay ko mamikiˈayaw to mapatayayto a tamdamdaw. 16 Nawhani ano ira ko lekal no palimoˈotay ato ngihaˈ no kakeridan no coyoh ato soni no laepa no Kawas i, itiya a maepod ko Tapang nai kakarayan. Ta malasaˈayaway a lomowad ko mitooray ci Kristoan a mapatayay. 17 Doedo sa i, kita o maˈosaway a maˈorip ko mamikapot i cangraan a makakoy a tayra i toˈem a malalitemoh ato Tapang i fatad no kakarayan. Saka, o mamidaˈoc kita a mikapot to Tapang.
w15 7/15 18-19 fiedac 14-15 fatac
Mangataayto ko Sakalidongaw Iso!
14 Ano miloodto ko Kok no Makok to finawlan no Kawas i, wa mafekad ko manan a demak hani? Sowal no Fangcalay Cudad i, “o aocoren Ningra ko coyoh a patayra i kaˈamis i katimol i kawali i kaetip a papisaˈopo to nai cowacowaay a nipiliˈan Ningra a finawlan.” (Marko 13:27; Matay 24:31) Onini pasaˈopoay a demak, mitoroan nira cowa ko isalakatay a noka pipiliˈ to mapasimalay Krisciyang, cowa koya pipatopaˈ toya iseraayho a mapasimalay a Krisciyang. (Matay 13:37, 38) Ora mipatopaˈay a demak hananay i, o aitini ˈayaw no taˈangayay a padiing a mafekad. (Paˈarawan 7:1-4) O papalisopsopen koya nipiliˈan sa ko sowal ni Yis i, o manan kora demak hani? Mitoroan noni o tatayrato i kakarayan micada to halifon ko iseraayho a mapasimalay Krisciyang o sanay. (1 Tisalonika 4:15-17; Paˈarawan 14:1) O aitini ikor no pilood no Kok no Makok to finawlan no Kawas a misatapang a mafekad. (Icikil 38:11) Sowal ni Yis: “Itiya i, o mamatedi a matiya o cidal ko moecelay ko falocoˈ a tamdaw” itini i Hongti Kitakit no Wama nangra.—Matay 13:43.
15 Itini i kalo kiyokay, pakasoˈlinay ko ˈalomanay to mamiˈorong to tatirengan ko Krisciyang tayra i kakarayan. Pakasoˈlinay haca cangra to mamaˈaraw nangra tano tatirengan no tamdaw patikor ci Yis tayni a mikowan toniya cikiw. Nikawrira, o sowal no Fangcalay Cudad cowa ko mamaˈaraw no tamdaw ko nika patikor ni Yis sanay. Sowal no Fangcalay Cudad i, “o mamaˈaraw i kakarayan ko kacipinangan to nipiliyaw noya Tamdaw [ci Yis] a tayni, o ciˈdilay koya Tamdaw [ci Yis] a pakatoˈem a tayni nai kakarayan.” (Matay 24:30) Oniniya tosa demak cowa ko mamaˈaraw no mata no tamdaw. O roma sowal no Fangcalay Cudad, “caay ko mamicomod i nikowanan no Kawas a kitakit ko ciheciay a tatirengan”. Mihaenay haw i, oya tatayra i kakarayan a Krisciyang oha mamafalic cangra. “Itiya i saikoray a soni no laepa to cecay a melet, fahal asa kita a mafalic a maemin”. (ˈOsien ko 1 Korinto 15:50-53) Orasaka, oya iseraayho a mapasimalay Krisciyang o aitini i ˈapotoay a toki a mapalisopsop.
Miˈosi to Sinael
(1 Tisalonika 3:1-13) Tona caayto pakahadidi kamo saka, kita a tatosa ko mamasiday i Atin saan ko keton no falocoˈ niyam itiya. 2 Saka, ocoren niyam ko salikaka ita ci Timoti, o kapot niyam a matayalay tono Kawas a patenak to Ngaˈayay a Ratoh to pakayniay ci Kristoan. O sakapiocor niyam cingraan i, o sapaˈicelaw niyam a patanektek to pitiˈer namo i Kawas. 3 Ta caay ka ngiyangi ko falocoˈ namo tona mapades. Mafanaˈ kamo to nika o airaira aca ko matiniay a pades. 4 Yo itiraho kami i tamowanan i, o mamapades kita saan ko nipipaliˈayaw niyam a somowal i tamowanan. Mato nika fanaˈ namo, laheci sato anini. 5 Mahaenay saka, caay pakahadidi kako itiya. Masamaanay ko pitiˈer nangra to Kawas hakini? Nanay caay ka sawi no kakeridan no palafoay cangra, ta caay ka lasawad ko nitayalan niyam saan ko harateng ako. Saka, ocor han ako ci Timoti a patayra i tamowanan. 6 Nikawrira, anini sato minokayto ci Timoti nai tamowanan a paratoh i tamiyanan to pakayniay i pitiˈer namo to Kawas ato olah namo. Paratoh cingra to nika rarid namo a miharateng tamiyanan ato nika lecad no harateng ita to sakasasoˈarawaw. 7 Orasaka, salikakaaw, o pitiˈer namo i Kawas ko sakahinom niyam itini i nipisemsem ato nika pades niyam to masamaamaanay. 8 Nawhani ano tanektek ko falocoˈ namo a malacecay ato Tapang i, mangaˈay ko harateng niyam. 9 Mararid kami a mikansya i Kawas to pakayniay i tamowanan. Nawhani kamo ko sakalipahak niyam i kaˈayaw Ningra. 10 Misaˈicel kami to romiˈad to dadaya a mitolon to sakangaˈayaw niyam a minengneng i tamowanan. Ta ngaˈay mapaˈicel niyam ko pitiˈer namo to Kawas. 11 Nanay makerid no Wama ita a Kawas ato Tapang ita ci Yis ko sakatayraaw niyam i tamowanan! 12 Nanay mapaˈicel no Tapang kamo ta matiya o nika olah niyam i tamowanan ko nika tongal no kasasiolaolah namo ato olah namo to tamdamdaw. 13 Nanay mapatanektek no Tapang ko falocoˈ namo ta ano miliyaw a tayni ko Tapang ita a malahakelong ato finawlan Ningra i, makorac, masongilaˈ kamo i kaˈayaw no Wama ita a Kawas.
SAKA 7 FOLAD 15-21 ROMIˈAD
O ODOˈ KO KIMAD NO KAWAS | 2 TISALONIKA 1-3 FEDENGAN
“O Tatalahkal ko Paculiay to Rikec a Tamdaw”
(2 Tisalonika 2:6-8) Irato a matayal imatini ko mitenaˈay tonini a demak. Mafanaˈ kamo tonini. Nikawrira, ano maraodto ko romiˈad i, o tatalahekal koya paculiay to rikec. 7 Matayalay anini koya pakalimekay a paculiay a demak. Nikawrira, tangasa i nikaalaan noya mitenaˈay i, itiyato a talahekal konini a demak. 8 O tatalahekal itiya koya paculiay to rikec a tamdaw. Nikawrira, ano miliyawto a tayni ko Tapang ci Yis i, o seraˈ ato edil ningra ko sapipatay ningra cingraan a mitekop.
it-1 807 fiedac
Tangongol ko Falocoˈ a Midoko to Kawas
Somowalayho ko Fangcalay Cudad to roma pakalimekay a paculiay to rikec a demak, misaˈicelay cangra a misafelit to “pakakemoday a nisahalakaan no Kawas a demak.” Itini i lintad ni Pawlo, oniniya pakalimekay a paculiay to rikec a demak hananay, cowaho ka mapatalasekal itiya, samanen cowaho ka masaheci a malaˈosi a mahapinang to ciˈicelay cangra. Soˈliˈlin itiya satapangayto talahkal kora tamdaw, kawra o cima cangra mahimedayho to ˈalomanay, samanen misao midokoay to Kawas cangra, ˈarawhan midemakay to adihayay a tatiihay a demak. Oiyaan miliyasay to soˈlinay noka pidoko to Kawas a paculiay to rikec a tamdaw cangra. Sowal ni Pawlo, itira i lintad ningra, misatapangayto a tatemik kora paculiay to rikec i lalomaˈ no kasakopang, salikorto ngaˈ, safeleng sanayto a masadak a paculi a misafelit. Ano miliyawto ci Yis a tayni i, o papalaˈafoento ningra koni “paculiay to rikec a tamdaw.” Ora paculiay a misafelitay to Kawas a tamdaw, maˈimeray ni Satan cangra, “misatakaraw to tireng, mamaroˈ cingra i pitaˈongan to Kawas a lomaˈ a palakawas to tireng ningra.” (Krisiya sowal, seʹba·sma hananay). Ora “paculiay to rikec a tamdaw” o sakadademakan ni Satan, tada mariˈangay, milipalaw to tamdaw mikihatiya cangranan a mapalaˈafo. Tona mihimedan nangra ko nika mariˈang nangra, saka malo ciˈicelayto a paculi cangra.—2 Tisalonika 2:3-12; palalinien to Matay 7:15, 21-23.
(2 Tisalonika 2:9-12) O nano tayal ni Satan ko sakaira noya paculiay to rikec a tamdaw. O caciˈicel cingra a midemak to masamaamaanay a pacefaay a kafahekaˈan a demak. 10 O mamidemak cingra to masamaamaanay a tatiihay a demak a misaˈfit to mamatekop a tamdamdaw. O nika caan ka olah nangra a milayap to sapaˈorip i cangraan a soˈlinay a sowal ko sakatekop nangra. 11 Orasaka, patayraen no Kawas i cangraan ko parawraway a ˈicel a papipasoˈlin cangraan to pacefaay a demak. 12 Ta o caay pasoˈlin to soˈlinay a sowal, oya maolahay to tatiihay a demak i, o mamapasetek i patay.
it-1 612 fiedac 6 fatac
Misamangah
Pakihater hananay ni Yihofa koya cowa ka olah to soˈlinay kimad a tamdaw ‘pasoˈlin to pacefaay a demak’, caka pitengil to pakayniay ci Yis Kristoan a ngaˈayay ratoh. (2 Tisalonika 2:9-12) ˈAyaw no pina hahekalan, tinakoan no hongti no Israil ci Ahap, mitadtaday tonini a demak. Itiya, i raringiday ni Ahap a pairasolay misamangahay pasowal, ano tayra ci Ahap a milood to Ramot a niyaroˈ no Kiliyat i, o papakalowid sanay, ˈarawhan o pairasolay ni Yihofa ci Mikaya i, maˈaraway ningra ko mapolosi, patayraan ni Yihofa ko cecay coyoh a papisamangah ci Ahapan, misaˈfit cingranan sanay. Oniniya coyoh midemakay to ˈicel a papisamangah to polong a mipairasolay somowal to kaolahan a tengilen ni Ahap a mangah a sowal. Cowa pitengil ci Ahap to sapalimoˈot a sowal, pakasoˈlin to makaniway a sowal, mihaento a malahedaw ko ˈorip ningra.—1 Hongti 22:1-38; 2 Rayray 18 fedengan.
Kadkaden ko Noˈadingoan Odoˈ
(2 Tisalonika 1:7, 8) O paparihadayen Ningra kamo o mapadesay a tamdaw. Halo ami a mamaparihaday Ningra. Itiya ano malahakelong ko Tapang ci Yis ato ciˈicelay a coyoh ningra a paˈaraw cingra i marengrengay a namal a milaheci tonini. 8 Itiya a matefoc no Tapang ko caay ka fanaˈ to Kawas ato caay pidoedo to Ngaˈayay a Ratoh to pakayniay i Tapang ita ci Yisan.
it-1 635 fiedac 2 fatac
Namal
Sowal sa ci Pitiro: “Nikawrira, oyananto a sowal no Kawas ko sapipalihaen no Kawas to aniniay a kakarayan ato hekal. Tangasa i pisawkitan, pitodohan a mitekop.” Ano nengnengen kora ifafekangay ato ilaenoay a sowal nora sinael i, mahapinangay to cowa ko soˈliay namal kora, ao midaˈocay a pitekop koni. Oya lenlen i lintad ni Nowa, cowa palaˈafo to soˈlinay a kakarayan ato sera, ao palaˈafoay aca to caay ka ngodo to Kawas a tamdaw, mahecaday ano irato ci Yis atoya ciˈicelay a coyoh, mapatahkal i marengrengay namal i, ao yaan aca caay ka ngodo to Kawas a tamdaw atoniya lekakawa no mariˈangay a hekal ko papalaˈafoen.—2 Pitiro 3:5-7, 10-13; 2 Tisalonika 1:6-10; palalinien to Isaya 66:15, 16, 22, 24.
(2 Tisalonika 2:2) Ano iraay ko hato nai [fangcalay saocor] a sowal, anca tano tamdawan a palihaf, anca hato naitiniay tamiyan a tikami, cisowal to iraayto ini ko romiˈad ni Yihofa ano sa i, aka ka rawraw, aka ka siwala ko falocoˈ namo a mitengil.
it-2 209 fiedac 2 fatac
Sapatemer a Sowal
Sapatemer a Sowal—O Soˈlinay ato Makaniway. Ora misao “nai fangcalay saocor a sowal” hananay, iraay ko soˈlinay iraay ko makaniway. Patinakoen, itini i Tisalonika 2:2, palimoˈotan ni Pawlo ko i Tisalonikaay salikaka, ‘ano iraay ko hato nai fangcalay saocor a sowal, anca tano tamdawan a palihaf, anca hato naitiniay tamiyan a tikami, cisowal to iraayto ini ko romiˈad ni Yihofa ano sa i, aka ka rawraw, aka ka siwala ko falocoˈ namo a mitengil.’ Itini tano pneuʹma hananay a no Krisiya a mitilid ci Pawlo, tatodong noni, o pakayniay ‘tano tamdawan a palihaf’ anca ‘tano tikami’ a paterong tora sasowalen o sanay. Mankora iraay ko soˈlinay iraay ko makaniway sato maan ci Pawlo, o Fangcalay Cudad Faelohay Hekal Mihongyakan [no Padaka], “sapatemer a sowal” hananay a mihongyak.
Miˈosi to Sinael
(2 Tisalonika 1:1-12) Patilid kako ci Pawlo aci Silas aci Timoti i tamowanan o i Tisalonikaay a saˈopo no mitooray to Wama ita a Kawas ato Tapang ci Yis Kristoan. 2 Nanay mapalemed, maparihaday no Wama ita a Kawas ato Tapang ci Yis Kristo kamo. 3 Salikakaaw, tona matongal ko pitiˈer namo i Kawas ato nika sasiolaolah namo a maemin saka, o papararid kami a mikansya i Kawas to pakayniay i tamowanan. O matatodongay ko pihaen niyam. 4 Orasaka, paseneng kami i kalo saˈopo no mitooray to Kawas to pakayniay i tamowanan. O nika rarid namo a mihadidi ato nipipasoˈlin namo to Kawas i masamaamaanay a kariˈang ato pades namo ko kalitaˈangan niyam. 5 O kacipinangan to nika moecel no demak no Kawas konini. Orasaka, o mamatatodong kamo a micomod i nikowanan no Kawas a kitakit. Onini ko saka mapasemsem kamo. 6 Tona o moecelay ko demak no Kawas saka, o papacoˈayen Ningra to pades ko mipadesay tamowanan. 7 O paparihadayen Ningra kamo o mapadesay a tamdaw. Halo ami a mamaparihaday Ningra. Itiya ano malahakelong ko Tapang ci Yis ato ciˈicelay a coyoh ningra a paˈaraw cingra i marengrengay a namal a milaheci tonini. 8 Itiya a matefoc no Tapang ko caay ka fanaˈ to Kawas ato caay pidoedo to Ngaˈayay a Ratoh to pakayniay i Tapang ita ci Yisan. 9 O tefoc no matiniay a tamdaw i, mapaliyas nai kaˈayaw no Tapang ato tadamaanay a ˈicel Ningra a midaˈoc a matekop. 10 Ano miliyaw ko Tapang a tayni, itiya toya romiˈad i, o mamapahemek no finawlan Ningra cingra. O mamakahemek no polong no mitiˈeray cingra. Halo kamo a mikapot i cangraan a mapahemek itiya tona pasoˈlin kamo to sowal niyam. 11 Onini ko sakararid niyam a mitolon to saki tamowanan. Yo mitolon kami to Kawas i, nanay matatodong i niharatengan no mitahidangay tamowanan a Kawas ita kamo. Nanay pakayni i ˈicel Ningra a malaheci Ningra a maemin ko nilongocan namo to sakangaˈay no pinangan namo ato demak no nipitiˈer namo Cingraan. 12 Ta pakayni tonini a mapahemek namo ko Tapang ita ci Yis ta makahemek ningra kamo saan ko pitolon niyam. O sakalaheci nonini i, o nano siniˈada no Kawas ato Tapang.
SAKA 7 FOLAD 22-28 ROMIˈAD
O ODOˈ KO KIMAD NO KAWAS | 1 TIMOTI 1-3 FEDENGAN
Micangacang to Makapahay a Demak
(1 Timoti 3:1) Ano mangalay ko tamdaw a malakakeridan no saˈopo no mitooray i, o milongocay cingra to tadamaanay a tayal. Soˈlinay konini a sowal.
w16.08 21 fiedac 3 fatac
Mahapinangay Iso to Mamacakat Kiso i Noˈadingoan Han?
3 ˈOsien ko 1 Timoti 3:1. Ono Krisiya sowal “mangalayay” (micangacang, nw) hananay, tatodong “milayaˈay” sanay, mahaenay o milayaˈay a milawis to maanan. Tano ninian a Krisiya tilid ci Pawlo misaˈicel a pasowal, ano sakacakataw ko tamdaw i noˈadingoan i, mamisaˈicel o sanay. Patinakoen, iraay ko faˈinayan salikaka miharateng to mamisamaan ko demak matayal saki kasakopang, soˈlin cowaho ko padamaay sikawdan cingra, kawra mafanaˈay to papalahad cingra to kaolahan no Kawas a capeling, milawis to hatatodong a mala padamaay sikawdan. Mataˈlifto ko cecay liyad i, alatek sakacakataw cingra mala kantok. Ano masamaamaanayto, oha mamisaˈicel cingra mitoor to noˈadingoan a palinian, hongaˈ ngaˈay mala kantok a adihay ko tayal i kasakopang.
(1 Timoti 3:13) Malasakacakat no mipadangay to tayal no kakerikeridan no saˈopo no mitooray ko nika ngaˈay no tayal nangra. Ta caay paseka cangra a pawacay to pakayniay i pitiˈer nangra i ci Yis Kristoan.
km 9/78 4 fiedac 7 fatac
Malifok Nangra ko Ngaˈayay Ngangan
7 Mahapinangay a maˈaraw, hano pasowalho ci Pawlo to malifok nangra ko ngaˈayay ngangan saan, kawra onini cowa ko matiraay o misasingsiay no kiyokay. O padamaay sikawdan ano songilaˈen nangra milaheci ko tayal nangra i, o mamacada nangra ko sapalemed nai ci Yihofaan aci Yisan. O tatahacada cangra to pisakareteng ato pidama no polong a kasakopang, ho ngaˈayto cangra timolo a pasowal, pasowal to nika pitiˈer ci Yisan. Tona madimadiay cangra to tayal, mamiakoˈid ko tao to makapahay demak nangra, fanekfekto ko falocoˈ nangra, awato ko talaw a mipaihkal to nika pasoˈlin no falocoˈ nangra.
Kadkaden ko Noˈadingoan Odoˈ
(1 Timoti 1:4) Papisawaden cangra a miharateng to kimad no matoˈasay ato rayray no tatoˈasan. Nawhani caay padama ko matiniay a demak to nafalocoˈan no Kawas a papitiˈer to tamdaw ci Kristoan. Deng o palowaday to sakalaliyaliyang konini.
it-2 252
Rayray no Tatoˈasan
Misolap ato micekiw to rayray no tatoˈasan awaayto ko epoc, mangalefay tiya patikami ci Pawlo ci Timotian. Itini noka pinengneng no Kawas, o Yutaya tamdaw ato ˈalafang tamdaw ilalomaˈ no Krisciyang a kasakopang awaayto ko kasasiromaan nangra. Ano mahaenay i, hamaanto ko rayray no tatoˈasan a misawacay to lalengawan no niyah. (Kalatiya 3:28) O maˈoningay i Fangcalay Cudad a rayray no tatoˈasan, maharekayto patireng to naitiniay ci Kristo i rayray ni Tafiti. Hanaca, tiya palimoˈot ci Pawlo tora ifafekangay a sowal ikor to cowa ka halafin, mapalaˈafoayto ko Yirusalim, malahedawayto ko rayray no tatoˈasan no Yutaya tamdaw. Cowa ka tereken no Kawas koni rayray no tatoˈasan. Mihaenay haw i, ora kaciharatengan ni Pawlo i, cowato ko hamami palak to adihayay toki a misolap a micekiw to maˈoningay a rayray no tatoˈasan, anca malacongis to lalengawan no niyah, a makalisangaˈto ko falocoˈ, o matiniay demak awaay ko epoc to nipasoˈlinan no Krisciyang. O maˈoningay i Fangcalay Cudad a rayray no tatoˈasan maedengayto misawacay to saaroˈan ni Kristo toci Misiya cingra, oninian ko soˈlinay a epoc no rayray no tatoˈasan to Krisciyang. O romaroma a rayray no tatoˈasan i Fangcalay Cudad, misawacayay to nika o soˈlinay ko lalakaw no Fangcalay Cudad.
(1 Timoti 1:17) Mangalay cangra a malapasifanaˈay to rikec no Kawas. Nikawrira, mafukil cangra to tatodong no sowal nangra ato patosokan no sowal nangra.
cl 12 fiedac 15 fatac
“Nengnengen o Kawas Ita Cingra”
15 O roma a sapangangan to saaroˈan ni Yihofa i, “o midaˈocay a Hongti.” (1 Timoti 1:17; Paˈarawan 15:3) O maanan ko tatodong noni hani? Citolasay ko taneng ita, pasangaray a miharateng to nika naiti:yaho tangasa i daˈoc ci Yihofa a materek. Pinaay a ˈofad a mamihecaan, materekayto Cingra. ˈOlic 90:2, sanay ko sowal: “O Kawasto Kiso naiti:yaho tangasa i daˈoc.” Tatodong noni sowal, tohati:niay materekayto ci Yihofa, awaay ko satapangan Ningra. Hay ano caayho ka sangaˈ ko maamaan i, iraayto ko Kawas, mankora “midaˈocay a ˈorip a Kawas” sa ko Fangcalay Cudad, tada matatodongay! (Taniil 7:9, 13, 22) Hani cimaho ko iraay ko lalangian a cisasa to nika o saˈakawangay a Kawas Cingra hani?
Miˈosi to Sinael
(1 Timoti 2:1-15) O saˈayaway a sapaˈicel ako tisowanan i, pilongoc, pitolon, pipatado a mitolon, pikansiya i Kawas to saki polong no tamdaw ato 2 saki hongti ato romaroma a mikowanay. Ta masinanot, rihaday ko demak ita a maˈorip itini i hekal. Ta moecel ko demak ita a mitaˈong to Kawas. 3 O ngaˈayay konini, o matatodongay i nafalocoˈan no paˈoripay titaanan a Kawas. 4 Mangalay ko Kawas to sakafanaˈaw no polong no tamdaw to soˈlinay a sowal. Ta mapaˈorip Ningra cangra. 5 Nawhani cecay ko Kawas. Cecay ko pakayakayay to Kawas ato tamdaw, oya malatamdaway a Kristo ci Yis. 6 Kinafalah sa Cingra to tireng a malasapatefoc a patodong to saki polong no tamdaw. Pakayni tonini a mapahapinang i nipatonekan a romiˈad ko sapaˈoripaw no Kawas to tamdamdaw. 7 Orasaka, mapatireng kako a malapatenakay a malatarokos a malapasifanaˈay i roma a finacadan to pakayniay i pitiˈer ci Kristoan ato soˈlinay a sowal. Soˈlinay ko sowal ako. Caay ko misamangahay kako. 8 Ano masaˈopo icowacowa ko mitooray i, nanay mitolon ko faˈinayan. Nanay o soˈlinay ko falocoˈ nangra a pakamay a mitolon. Nanay caay ka keter, caay ka caculiculi cangra. 9 O romasato, kamo o fafahiyan i, nanay caay pisatadamaamaan ko nika cirikoˈ ato nika eres namo. Aka pakinalien ko piporong to fukes namo. Aka pakinali a micaˈedong to tadaekim ato cincu. Aka pakinali a micaˈedong to matekesay a rikoˈ. 10 Kao ngaˈayay a demak ko sakaeres no tireng namo. Onini ko matatodongay a demak no soˈlinay a mitooray to Kawas a fafahiyan. 11 Aka ka caciyaw kamo o fafahiyan i saˈopo. Sapoeneren ko falocoˈ namo a minanam. 12 Caay pihayda kako to pipasifanaˈ no fafahiyan ato pikowan no fafahiyan to faˈinayan. O nika tomerep nangra ko ngaˈay. 13 Nawhani isaˈayaw a masangaˈ ci Atam. Iikor a masangaˈ ci Ifa. 14 O romasato, caay ka ci Atam ko masafanaˈay. Oya fafahiyan ko masafanaˈay. Malapaculiay cingra to rikec no Kawas. 15 Nikawrira, ano mararid ko fafahiyan a mitiˈer to Kawas a maolah i Cingraan, ano makorac cingra a minaˈon to tireng i, itini i nika hofoc ningra to wawa a mapaˈorip cingra.
SAKA 7 FOLAD 29 -SAKA 8 FOLAD 4 ROMIˈAD
O ODOˈ KO KIMAD NO KAWAS | 1 TIMOTI 4-6 FEDENGAN
“Misarocoday ko Falocoˈ Midoko to Kawas Anca Pasahafayay ko Falocoˈ Han?”
(1 Timoti 6:6-8) Hai, ano caay ka ˈanof ko mitooray i, tada cietanay ko pitoor ningra. 7 Awaay ko nitatoyan ita a maamaan a tayni i hekal. Caay pitatoy kita to maamaan a miliyas tonini a hekal. 8 Ano iraho ko kakaenen ato rikoˈ ita i, maedengto kita.
w03 6/1 9 fiedac 1-2 fatac
Minanam a Marenecto ko Falocoˈ
Itini i maamaan a demakan rihadayan nanay ci Pawlo, samanen mananamayto ningra ko marenecay falocoˈ. O manan ko marenecay falocoˈ hananay hani? Ano ihekalen ko sowal i, iraho ko sakaˈorip marenecento ko falocoˈ. Pakayni toninian, pasowalan ni Pawlo ko kapot ningra ci Timoti: ‘Tangongol ko falocoˈ a midoko to Kawas halo marenec ko falocoˈ, o saka cietanaw a pakayraan koni. Awaay ko nitatoyan ita a maamaan a tayni i hekal, caay pitatoy kita to maamaan a miliyas tonini a hekal. Ano iraho ko kakaenen ato rikoˈ ita i, maedengto kita.’—1 Timoti 6:6-8.
Sinanoten koni, sowal ni Pawlo o tangongolay ko falocoˈ a midoko to Kawas makedecay ko kalalaˈed ato marenecay a falocoˈ. Matinakoay ningra o tangongolay ko falocoˈ a midoko i, misakaretengay to mihodopay to Kawas a demak, ao cowa pitaling to hafay, onini ko soˈlinay a lipahakay a nokaˈorip. O rikoˈ ato kakaenen o sakaˈorip aca ita kora, ho ngaˈay a padadotoc micangacang to tangongolay noka pidoko to Kawas. Mihaenay haw i, pakayni ci Pawloan ko sowal, o hapakayraan a marenec i: Ano masamaamaanto ko demak, ano ngaˈayay ha anca tatiihay ha, sasarocoden a mitiˈer ci Yihofa.
(1 Timoti 6:9) Nikawrira, o sakacidafongananay a tamdaw i, masaˈfit a matilo no maapaay a falocoˈ ato tatiihay a ˈanof ningra. Onini a ˈanof ko sakatefad no tamdaw a matekop.
g 6/07 6 fiedac 3 fatac
O Pasahafayay Falocoˈ—Samaanay Mifiyor Tisowanan
Manaokaniw, o ˈalomanay tamdaw cowa ka lahedaw ko ˈorip to nika pasahafay sa cangra. Nikawrira, ano milepel cangra to hafay i, wa haen sa o maˈalolay ko ˈorip nangra. O saroero no tayal ato payci pairaay to kokiˈ, caay ka fotiˈ, halafin a adada ko fongoh anca ciadada to moretesay, o mahaenay adada no tireng milowanay to ˈorip no tamdaw, awaayto ko hemek nokaˈorip. Soˈliˈlin talifahal sato talipaˈelal itiya, to sapisalofaw to kaˈorip, ˈarawhan maosoyayto. Alatek cowato pakasoˈlin ko raramod i titaanan, madokaˈayto ko falocoˈ no wawa, marepatayto ko tanoktok no tireng no niyah. O romaroma a dokaˈ alatek ngaˈayay a salofen, kawra adihayay ko dadademaken. O mahaenay tamdaw, maharekayto ‘tano adihayay roray a mipacok to niyah a madokaˈ ko tireng.’—1 Timoti 6:10.
(1 Timoti 6:10) O lamit no masamaamaanay a tatiihay ko nika ˈanof to payso. Onini ko sakapisawad no romaroma a tamdaw a mitiˈer ci Kristoan ta mapades a mararom ko falocoˈ nangra to masamaamaanay.
g 11/08 6 fiedac 4-6 fatac
Enem a Hapakayraan to Sakalaˈosiaw
Itini i saka cecay lalakaw maˈaraway ita, o tamdaw ano misaˈicel a micangacang to hafay, o sakalaˈosiaw a pakayraan sanay cangra, ˈarawhan i, o mahoracay a dafong ko micangacangan nangra. Mamatoled ko falocoˈ nangra, hanaca o papaira to adihayay a roray. Patinakoen, pasahafay sanay a tamdaw, kinafalahay to sakalacafayaw to paro no lomaˈ ato widang a toki, mirepat to kalalaˈed nangra. O romaroma tamdaw tona pakinaliay a matayal cangoˈotay ko fotiˈ, o romaroma tamdaw pakayniay cariraw a cato ka fotiˈ. Patnakay 5:12 sanay ko sowal: “O matayalay a tamdaw i, ano mafecolto ano cato ka fecol i, sangaˈay sa ko fotiˈ nangra. Nikawrira, o payso no cidafongay a tamdaw ko sakaeca ka ala no fafotiˈen ningra.”
O payci hananay i, mahecaday o mariˈangay ato misaˈfitay a tawki. Somowalay ci Yis o hafay mafanaˈay a misaˈfit to tamdaw sanay. (Marko 4:19) Ano falicen ko sowal, o hafay hato palipahakay to tamdaw, ˈarawhan cowa, misafelitay a paˈanof to adihayay a hafay. Sanay ko sowal no Patnakay 5:10: “O maˈanofay to payso i, caay ko payso ko sakaraheker ningra.”
Ano komoden kora sowal, maˈanofay to hafay a tamdaw o saka tatiih no niyah, salikor mamasomad ko falocoˈ a matoleden, latek sakararawaw. (Taneng 28:20) Mihaenay haw i, ano saka rahekeraw ato sakalaˈosiaw a maˈorip, iraay ko romaroma a lalangian, mahawpay ko hinapafeliay, hinasododay, makorac ko waywayan, ira ko olah, ira ko ngaˈayay kalalaˈed ato Kawas.
Kadkaden ko Noˈadingoan Odoˈ
(1 Timoti 4:2) Mapatenak no misafanaˈay, cikasaparananay ko falocoˈ a tamdaw ko matiniay a sifanaˈ.
w05 10/1 14 fiedac 2 fatac
Misonglaˈan Iso Pahatatanam ko Makapahay a Falocoˈ Iso han?
17 Sanay pasowal ci Pitiro: “ˈImeren ko [makapahay] a falocoˈ namo.” (1 Pitiro 3:16) Kadayayan i, ano padotoc sa misatalimaan to safalod ni Yihofa i, saikor cowato pirikec ko makapahay a falocoˈ nangra. O mahaenay makapahay falocoˈ mahecaday to “cikasaparananay ko falocoˈ.” (1 Timoti 4:2) Ano matodoh a macedet ko fanges i, iraay ko padiyac, matimaˈayto ko fanges. O makapahay falocoˈ no ˈalomanay tamdaw mahaenay a macedet a madokaˈ matimaˈayto, caayto ka pirikec to tamdaw, caayto pilalang a miˈateng, awaayto ko ngodo to nika raraw no demak. Soˈlinay haw i, pasokiyawayto ko makapahay falocoˈ nangra.
(1 Timoti 4:13) O piasip to Fangcalay Cudad i kaˈayaw no salikaka ato pipakimad ato pipasifanaˈ to mitooray ko sasarocoden iso tangasa i katahiraan ako.
it-1 496 fiedac 7-8 fatac
Miasip i Kaˈayaw no ˈAlomanay
Itini i Kasakopang no Krisciyang. Itini i kasakopang no Krisciyang isaka cecay hahekalan, o iraay ko Fangcalay Cudad a tamdaw cowa ka hakowa, miasip i kaˈayaw no ˈalomanay tada o masaka limlaan a demak. Palimoˈotay ci Pawlo papiasip to tikami ningra i saˈopo, halo mafafalic to sapatikami to roma kasakopang a tikami, ho ngaˈay cangra miasip to tikami nangra. (Kolosay 4:16; 1 Tisalonika 5:27) Hananay ni Pawlo palimoˈot koya kaemangay a kantok ci Timoti, “o piasip to Fangcalay Cudad i kaˈayaw no salikaka ato pipakimad ato pipasifanaˈ to mitooray ko sasarocoden iso tangasa i katahiraan ako.”—1 Timoti 4:13.
O miasipay a tamdaw, samalaymayen a miasip. (Hapakuk 2:2) O sapasifanaˈaw to tamdaw ko miasipay i kaˈayaw no ˈalomanay, mankora o miasipay tamdaw songilaˈen a cipinang tora lalakaw, ihekal a mihapinang to tatodong nora mitiliday tamdaw, sarocoden ko falocoˈ a miasip, ho caka mararaw ko pitengil no ˈalomanay. Paˈarawan 1:3 sanay ko sowal, o miasipay, o mitengilay tonini a nipaliˈayawan a sowal, o maˈimeray tonini a matiliday i, o malemeday.
Miˈosi to Sinael
(1 Timoti 4:1-16) Nikawrira, pahapinang ko [fangcalay saocor] a somowal to nika i saikoikoray nonini a hekal i, o mamisawad ko tamdaw a mitiˈer ci Kristoan. O papasayra ko falocoˈ nangra i sifanaˈ no palafoay a mitoor to misafanaˈay a kawakawas. 2 Mapatenak no misafanaˈay, cikasaparananay ko falocoˈ a tamdaw ko matiniay a sifanaˈ. 3 Palimoˈot ko matiniay a tamdaw to sakacaaw ka ciramod no tamdaw ato sakacaaw ka komaen to romaroma a kakaenen. Nikawrira, o nisangaˈan no Kawas konini a kakaenen a pafeli i tamdaw. O kakansyaen no pasoˈlinay ato mafanaˈay to sowal no Kawas konini a komaen. 4 O ngaˈayay ko nisangaˈan no Kawas a maemin. Awaay ko fafalafalahen. O kakansyaen ko Kawas a milayap tonini. 5 Nawhani pakayni i sowal no Kawas ato pitolon a malamakoracay konini. 6 O papalahaden iso ko [ˈorip] iso to nano pipakifalocoˈ iso to papitiˈeray tisowanan a sowal no Kawas ato nano pidoedo iso to soˈlinay a sifanaˈ. Ta ano pasifanaˈ kiso tonini i salikaka i, malangaˈayay a matayalay ni Yis Kristo kiso. 7 Liyasen ko awaay ko epoc a caay ka tatodong i pitoor to Kawas a kimad no matoˈasay. Pananamen ko tireng iso to sapiringiaw iso to Kawas. 8 Ciepocay to mamang ko piyatayat to tireng. Nikawrira, tada ciepoc i masamaamaanay a demak ko nipipananam ita to falocoˈ to saki Kawas. Nawhani pakayni tonini a mapalemed ko imatiniay ato aira a ˈorip ita. 9 O soˈlinay konini a sowal. O tada papasoˈlinen konini. 10 Orasaka, maroray, mapades kita a matayal. Nawhani o maˈoripay a Kawas ko kacifalocoˈan ita. O paˈoripay Cingra to polong no tamdaw. Mangalef ko pipaˈorip Ningra to pasoˈlinay Cingraan. 11 Palimoˈoten, pasifanaˈen cangra tonini a demak. 12 Aka kao kacangalan no nimanima ko nika mamangho no mihecaan iso. Kao malo piˈarawan no pasoˈlinay ci Kristoan a tamdaw ko sowal iso ato demak ato nika olah ato nipitiˈer ato nika korac no falocoˈ iso. 13 O piasip to Fangcalay Cudad i kaˈayaw no salikaka ato pipakimad ato pipasifanaˈ to mitooray ko sasarocoden iso tangasa i katahiraan ako. 14 Aka palasawaden koya fanaˈ iso oya niparocekan i tisowanan a fanaˈ pakayni i nipaliˈayawan a sowal no Kawas yo mikapa ko [malohemay malitengay] a patireng i tisowanan. 15 Sarocoden ko falocoˈ iso a midemak tonini ta mahapinang no ˈalomanay ko nika cakat no tayal iso. 16 Pinaˈon to tireng iso ato pipasifanaˈ iso. Kararid a misaˈicel tonini ta mapaˈorip iso kiso ato mitengilay to sowal iso.