Pinengnengan to lalakaw no Mitosilay ato Nikaˈorip Rayray no Saˈopo
SAKA 8 FOLAD 5-11 ROMIˈAD
O ODOˈ KO KIMAD NO KAWAS | 2 TIMOTI 1-4 FEDENGAN
“Caay ko Patalaway ko Nipafelian no Kawas i Titaanan a [Fangcalay Saocor]”
(2 Timoti 1:7) Nawhani caay ko patalaway ko nipafelian no Kawas i titaanan a [fangcalay saocor]. O pakiemelay, o papiolahay, o pasinanotay to falocoˈ cingra.
w09 5/15 15 fiedac 9 fatac
Kaemangay Tamdaw—Pahapinangen ko Tao to Nika Cakat Iso
9 Toha sapadamaaw ci Timotian milaheci to tayal, patalipaeˈlalan ni Pawlo cingra: “Nawhani caay ko patalaway ko nipafelian no Kawas i titaanan a [fangcalay saocor]. O pakiemelay, o papiolahay, o pasinanotay to falocoˈ cingra.” (2 Timoti 1:7) ‘Pasinanoten ko falocoˈ’ hananay, o mafanaˈay citaneng ko pisinanot, piforfor to demak, timolo a misiˈayaw to sapalifet, soˈliˈlin caay ka ngaˈay ko lingad no demak cowa ka masoked. Tona caayho ka matenes ko falocoˈ, romaroma kaemangay tahasiˈayaw to pasangar i, masokeday a talalikor, saromiˈad sanay mafotiˈ, minengneng to tilifi, anca maacang miowak to epah ato widawidang, o roma i, mihelipay to etok, maˈodang ˈamelas ko waywayan. O Fangcalay Cudad patalipaˈelalay to Krisciyang ‘mifalah to cowa kangodo to Kawas a falocoˈ ato coos no hekal, itini toniya lekakawa matatodong ko harateng, moecel, mangodo to Kawas ko kaˈorip.’—Titus 2:12.
(2 Timoti 1:8) Orasaka, aka ka ngodo a pasowal to pakayniay i Tapang ita. O romasato, aka ka ngodo to pakayniay i nika rofo ako to nano nika tayal ako ci Kristoan. Kao mapaˈicelay no Kawas kiso a milecad takowanan a mapades a mipatenak to Ngaˈayay a Ratoh.
w03 3/1 9 fiedac 7 fatac
‘Ka Timolo, Ka Tanoktok!’
7 Patikamian ni Pawlo ci Timoti, sowal sa: “Nawhani caay ko patalaway ko nipafelian no Kawas i titaanan a [fangcalay saocor]. O pakiemelay . . . Orasaka, aka ka ngodo a pasowal to pakayniay i Tapang ita.” (2 Timoti 1:7, 8; Marko 8:38) Licayen ita ko niyah: “Pakayni to pihakelongan no mako, mangodoan nanay kako ha, anca timoloay a mihayi ha? Matalaway kako mafanaˈ ko cafay picudadan to o Misawacayay Tamdaw ni Yihofa, anca kako ko mikiˈayaway pasowal cangranan han? Matalaway kako misiwatik to tao, anca timoloay a malikoen to midokoay ci Yihofaan han?” O tamdaw ano matalaw mitenak to ngaˈayay lihaf no Hongti Kitakit, calemcelem to nika caka lecad ko pihakelongay to tao i, haratengen ko nano sowal ni Yihofa ci Yosuwaan: “Saˈicelen, safaˈinaˈinayen ko falocoˈ iso.” Aka mapawan, ora tada masaka limlaan i, o nika pinengneng ni Yihofa aci Yis Kristo, ao cowa ko cafacafay a matayal ato cafacafay a micudad.—Kalatiya 1:10.
Kadkaden ko Noˈadingoan Odoˈ
(2 Timoti 2:3, 4) ˈOrongen kono miso a pades a malamalalokay a sofitay ni Yis Kristo. 4 O malasofitayay a tamdaw i, caay piharateng to romaroma a tayal. Deng o sapalipahakaw ningra to mikowanay cingraan a tapang a sofitay.
Micangacang to Soˈlinay a Hafay
13 Ci Timoti o pasoˈlinay ko falocoˈ a tamdaw. “Sofitay ni Yis Kristo”, hananay ni Pawlo cingra, pakalalok cingranan “o mala sofitayay a tamdaw i, caay piharateng to romaroma a tayal [anca misasingdiay demak]. Deng o sapalipahakaw ningra to mikowanay cingraan a tapang a sofitay.” (2 Timoti 2: 3, 4) O mitooray ci Yisan anini, mataˈlifayto ko 100 a ˈofad mieminay to toki a mitosil, mitengilay to sapalimoˈot ni Pawlo. Kiemelay cangra micoay to sakayhid no kowangkaw no misasingdiay, paifalocoˈan ko safalod no Fangcalay Cudad: “O mikiyamay a tamdaw i, o koli no pikiyaman ningra a tamdaw.” (Taneng 22:7) Misahalakaay ci Satan kitanan mihaemin to toki ato ˈicel itini to misasingdiay a demakan. O roma tamdaw pinaayto a mihecaan cikiyam, micakay to lomaˈ, matekesay ko ˈaca a tosiya, taykowan no micudaday wawa, anca mipalak to adihayay payci to sapakaetim, taˈangayay ko piroero to tamdaw. Ano mataneng ko waywayan ita, misadolo to nokaˈorip, milowan to kiyam ato mipalakan a payci, wa irato ko pasalat ita midoko to Kawas, cowato ka mala koli no lekakawa no misasingdiay.—1 Timoti 6:10.
(2 Timoti 2:23) Liyasen ko maapaay a nika laliyaliyang no tamdaw. Mafanaˈ kiso, o sakacaculiculi no tamdaw ko matiniay a demak.
w14 7/15 14 fiedac 10 fatac
Tamdaw ni Yihofa Samaanay Mifalah to Caay ka Moecel a Demak
10 Anini, kasakopang no tamdaw ni Yihofa, cowa ka mararid a ira ko misafelitay to kimad a tamdaw. Nikawrira, alatek mamatefingho ita ko sasowalan nangra to miliyasay to kimad no Fangcalay Cudad. Ano o naicowaayto ira kora sowal, o sasahecien ita a milalang. O misafelitay to kimad tamdaw ano miculi cangra, cowa ka pisiˈayaw to tamdaw, ao itiniay i tingnaw a misiday to sowal, ano pakaynien ita i maanan a pakayraan a malaliyaliyang cangranan, cowa ko matanengay a demak koni. Soˈlin alatek o araaw ita o sapadamaaw cingranan, kawra mihaen to demak misafelitay to sakayat no Fangcalay Cudad. Hay ano o tamdaw ni Yihofa kita i, ka piliyas to mahaenay misafelitay to kimad a demak.
Miˈosi to Sinael
(2 Timoti 1:1-18) O nano nafalocoˈan no Kawas a malatarokosay ni Yis Kristo ci Pawlo kako. O papatenak kako to pakayniay i nano nisowalan no Kawas a faelohay a ˈorip to nano nika lacecay ita aci Yis Kristo. 2 Patilid kako i tisowanan, Timoti o kaolahan ako a wawa. Nanay, palemeden, adayayen, parihadayen no Wama a Kawas ato Tapang ita ci Yis Kristo kiso. 3 Mikansya kako i Kawas. Matiya o tatoˈasan ako ko nika tingalaw no falocoˈ ako a mitaˈong i Cingraan. Yo mikansya kako i Kawas a mitolon to romiˈad to dadaya i, maharateng ako kiso. 4 Maharateng ako ko losaˈ iso yo malaliyas kita. Saka, sakatayraan kako i tisowanan to sakalipahak ako. 5 Maharateng ako ko soˈlinay a pitiˈer iso ci Kristoan. Matiya o pitiˈer no mamo iso ci Lois ato ina iso ci Iunici itiyaho ko pitiˈer iso. Mahaenay ko pitiˈer iso anini saan ko pipasoˈlin ako. 6 Orasaka, papiharatengen ako kiso a papipalowad toya iraay i tisowanan a fanaˈ, oya niparocekan no Kawas yo mikapa kako tisowanan a patireng. 7 Nawhani caay ko patalaway ko nipafelian no Kawas i titaanan a [fangcalay saocor]. O pakiemelay, o papiolahay, o pasinanotay to falocoˈ cingra. 8 Orasaka, aka ka ngodo a pasowal to pakayniay i Tapang ita. O romasato, aka ka ngodo to pakayniay i nika rofo ako to nano nika tayal ako ci Kristoan. Kao mapaˈicelay no Kawas kiso a milecad takowanan a mapades a mipatenak to Ngaˈayay a Ratoh. 9 O nipaˈoripan no Kawas kita a mitahidang a palafinawlan Ningra. Caay ko nano ngaˈayay a demak ita konini, o nano nafalocoˈan no Kawas ato siniˈada Ningra. Pakaynien no Kawas i ci Yis Kristoan iˈayaw no nika sangaˈ no hekal ko pipafeli i titaanan tonini a siniˈada. 10 Pakayni i nika talahkal ni Yis Kristo o paˈoripay titaanan a mapahapinangto anini i titaanan konini a siniˈada. Palasawaden ni Kristo ko ˈicel no patay. Pakaynien Ningra i Ngaˈayay a Ratoh ko pipahapinang to midaˈocay a ˈorip. 11 Patirengen no Kawas kako a palatarokos a palapasifanaˈay to papatenak tonini a Ngaˈayay a Ratoh. 12 Onini ko sakapades ako to matiniay. Nikawrira, caay ka ngodo kako tonini. Nawhani mafanaˈ kako to nitiˈeran ako. Pasoˈlin kako, pakapidipot Cingra toya nipaconohan Ningra i takowanan tangasa i piliyawan no Tapang a tayni saan kako. 13 ˈImeren koya nipasifanaˈan ako i tisowanan a malodadoedoˈen iso a soˈlinay a sowal. Kararid kiso a maˈimer to pitiˈer iso ato olah iso to nano nika lacecay iso aci Yis Kristo. 14 Kaoya iraay i falocoˈ ita a [fangcalay saocor] ko sapiˈimer iso toya nipaconohan i tisowanan a soˈlinay a sowal. 15 Mafanaˈ kiso to nipiliyas no i Aciyaay a tamdamdaw takowanan. Halo ci Fikilus aci Hermokinis a miliyas. 16 Nanay, kaadayayen no Tapang ko paro no lomaˈ ni Onisiforus. Nawhani hinatayni ci Onisiforus a mipaˈicel i takowanan. Saka, mahinom ko falocoˈ ako. Caay ka ngodo cingra to pakayniay i nika rofo ako. 17 Yo tahini cingra i Loma i, tangsol cingra a misakilikilim takowanan ta matama ningra kako. 18 Nanay, kaadayayen no Tapang cingra itiya toya piliyawan ni Kristo a tayni. Ano hakowaay ko nitayalan ningra to saki takowanan yo itiraho i Ifiso kita i, kiso ko tada mafanaˈay.
SAKA 8 FOLAD 12-18 ROMIˈAD
O ODOˈ KO KIMAD NO KAWAS | TITUS 1 FEDENGAN–FILIMON
‘Minilnil to Malohemay Malitengay’
(Titus 1:5-9) O sakapisiday ako i tisowanan i Kriti i, o sapilaheciaw iso a milosimet to caayho ka laheci a demak ato sapatirengaw iso to [malohemay malitengay] i kasaniyaroaroˈ. Haratengen ko sowal ako iˈayaw. 6 O [malohemay malitengay] i, o awaay ko tatoroˈen a raraw, o cecayay ko fafahi, o pasoˈlinay ko wawa, o caay ka cilikaf to macilasay ato paculiay ko wawa. 7 Nawhani o kakeridan no saˈopo no mitooray i, o cacitodong to tayal no Kawas a midipot. Saka, o awaay ko tatoroˈen a raraw a tamdaw, o caay pisatakaraw, o caay karaketer, o caay ka haliepah, o caay ka tomay, o caay ka ˈanof to payso, 8 o halilafangay, o maolahay to ngaˈayay, o minaˈonay, o moecelay, o fangcalay, o pakaˈmetay to tireng ko mamalokakeridan. 9 O mamaˈimer cingra to papasoˈlinen a sowal, oya matatodongay i sifanaˈ a sowal. Ta maedeng cingra a pasifanaˈ to tao to soˈlinay a sifanaˈ. O romasato, maedeng cingra a misalof to moraraway a demak no paculiay a tamdaw.
w14 11/15 28-29 fiedac
Salicay No Miˈosiay Tamdaw
O Fangcalay Cudad soˈliˈlin cowa pisongilaˈ somowal to kadadoedo to pinilnil to malohemay malitengay ato padamaay sikawdan. Kawra, iraay matilid to samaanay minilnil to malohemay malitengay isaka cecay hahekalan. Patinakoen, tiya malaheci ca Pawlo aci Parnapas mitaliyok a mitosil i, tona patatikor a minokay i,“piliˈen nangra a [minilnil] ko [malohemay malitengay] itira i [kasakopang]. Maherek a mitolon, misaliway ca Pawlo i, patorod han nangra koya [malohemay malitengay] i nitiˈeran nangra a [Yihofaan].” (Dmak 14:23) Ikor no pina a miheca, patikamien ni Pawlo ci Titus, sowal sa: “O sakapisiday ako i tisowanan i Kriti i, o sapilaheciaw iso a milosimet to caayho ka laheci a demak ato [sapinilnilaw] iso to [malohemay malitengay] i kasaniyaroaroˈ.” (Titus 1:5) Na mihakelongay ci Titus ci Pawloan milisoˈ to icowacowaay a kasakopang. O roma miceriday mihakelong ci Pawloan a milisoˈ to kasakopang i, ci Timoti, iraay ko fadangalan ningra minilnil to malohemay malitengay. (1 Timoti 5:22) Mahapinangay itini, isaka cecay hahekalan, o malohemay malitengay ato padamaay a sikawdan o kasakilac kantok ko minilnilay, ao cowa ko tarokos ato i Yirusalimay malohemay malitengay ko minilnilay.
Mikitini toni tinakoan no Fangcalay Cudad, Mikayatay a Malohemay Malitengay i Congpo mifalican ko pinilnil to malohemay malitengay i kasakopang. Isaka 2014 miheca ka 9 folad saka 1 romiˈad misatapang, o faelohay noka pinilnil hatiniay: O kahacecay kasakilac kantok mamikingsa to nitoroˈan no kasakopang a tamdaw. Tiya milisoˈ cingra toya lipay, kalacafayen ningra mitosil kora nitoroˈan a faˈinayan salikaka, ho mafanaˈ cingranan. Itini i kasakapot no malohemay malitengay milengo cangra tora hatatodong nora salikaka. Salikorto i, o kasakilac kantok ko maminilnil to faelohay malohemay malitengay ato padamaay sikawdan. O mahaenay noka falic mingataay ko nika lecad to isaka cecayay hahekalan a pakayraan.
Ano komoden kora sowal i, itini to minilnilay a demakan, o kahacecay a ˈinorong samaanay a pafafidaˈ hani? Isalakat, o “madimadiay citanengay a kuli” ciˈinorongay a mipawsa to noˈadingoan a kakaenen. (Matay 24:45-47) O tatiˈeren nangra ko fangcalay saocor mikilim to safalod no Fangcalay Cudad, mikayat to icowcowaay a Misawacayay Tamdaw ni Yihofa a milikakawa cangranan. O roma, iraay ko ˈinorong nangra minilnil to kasakilac kantok ato iing no fenpo. O fenpoto i, papadama to icowacowaay a kasakopng mitoor to sakayat no madimadiay kuli. O masakapotay a malohemay malitengay no kahacecay kasakopang, mamisongilaˈ a misinanot to hatatodong no faˈinayan salikaka. O kahacecay kasakilac kantok ciˈinorongay cingra misinanot to nitoroˈan a tamdaw no malohemay malitengay no kasakopang, ikor nilnilento ko citatodongay a faˈinayan salikaka.
Kadkaden ko Noˈadingoan Odoˈ
(Titus 1:12) Sowal sa ko cecay a paliˈayaway to sowal a Kriti ito a tamdaw. “O karamangahay ko Kriti a tamdaw. Matiya o tatiihay a ˈaˈadopen, O halikaenay a matokaay cangra,” saan.
w89 9/1 31 fiedac 5 fatac
Salicay No Miˈosiay Tamdaw
Cowa pihayi ci Pawlo a mihaemin a milokes to i Kritiay a tamdaw. Samanen mafanaˈay cingra o ˈalomanay a Kriti tamdaw, o mapasimalay no fangcalay saocor a ngaˈayay a Krisciyang. (Dmak 2:5, 11, 33) O mangodoay to Kawas ko falocoˈ a Krisciyang palaˈosiay to kasakopang icowacowa a niyaroˈ. Soˈlin cowa ko malefotay korira Krisciyang, kawra cowa ka saheto saan o karamangahay cangra, o halikaenay a matokaay cangra; ano hatiraay i, cowa ko mamilifok cangra to hemek ni Yihofa. (Filipi 3:18, 19; Paˈarawan 21:8) Mahaen to aniniay a kasakitakit a tamdaw, itini i Kriti iraay ko madimadiay a tamdaw, mararomay ko falocoˈ nangra to italiyokay a tatiihay a waywayan no tamdaw, halo makahiyay a mitengil to lihaf no Krisciyang.—Icikil 9:4; palalinien to Dmak 13:48.
(Filimon 15, 16) O sapipacenaˈ ni Onisimus a miliyas i tisowanan i, latek o sapidaˈocaw ningra a maroˈ i tisowanan. 16 Caayto ko kalokuli cingra anini. Ikakaayto no kuli cingra. O kaolahan a salikaka cingra. Tada o kalimlaan ako cingra. Mangalef i tisowanan, nawhani o kuli iso cingra. O romasato, o malecaday ato kiso a mitooray to Tapang cingra. Saka, o kaolahan iso a salikaka cingra.
w08 10/15 31 fiedac 4 fatac
Kalimlaan no Titus, Filimon ato Hipray Cudad
15, 16—Misamaanay hano cowa palimoˈot ci Pawlo ci Filimonan papipasalat ci Onisimusan? Misamacayay ci Pawlo tono niyah a ˈinorong, mitenak to Hongti Kitakit no Kawas, pasifanaˈ to demak ni Yis Kristo, cowa ka sapicapidaw to demak no hekal, matira o pakayniay i kuli a demakan.—Dmak 28:31.
Miˈosi to Sinael
(Titus 3:1-15) Papihakelongen ko nidipotan iso a salikaka to mikowanay a tamdaw a papitoor. Ta lonok o sasaan cangra a matayal to masamaamaanay a ngaˈayay a demak. 2 Pasowalen cangra, “Aka pilikaf to tao. Aka ka caculi. Kao mararihadayay kamo. Kao damsayay ko falocoˈ namo to sakipolong no tamdaw,” han a somowal. 3 Nawhani nano maapaay kita, o paculiay, o moraraway, o kuli no masamaamaanay a ˈanof ato acang kita. Saheto o tatiihay, o mapodohay ato masasiˈintelay ko pinangan ita a maˈorip iti:yaho. 4 Nikawrira, yo patalahkalto ko Paˈoripay titaanan a Kawas to sidaˈit ato olah Ningra i, 5 paˈoripen Ningra kita. Onini i, caay ko nano nika moecel no demak ita. O nano adayay Ningra pakayni i nipihofoc ato nipipafeli no [fangcalay saocor] titaanan to faelohay a ˈorip a misawsaw. 6 Pakaynien no Kawas ci Yis Kristoan o Paˈoripay titaanan ko pipafeli tonini a [fangcalay saocor] i titaanan a palemed. 7 Ta pakayni i siniˈada Ningra a mangaˈay kita a malayap no Kawas. Ta malamamilayap kita to kacifalocoˈan ita a midaˈocay a ˈorip. 8 O papasoˈlinen konini a sowal. Saka, mangalay kako to pipaˈicel iso tonini a demak. Ta malalok ko pasoˈlinay to Kawas a tamdaw a misaˈicel to ngaˈayay a demak. O fangcalay, o sakaciepoc no tamdamdaw konini a demak. 9 Liyasen ko maapaay a nika laliyaliyang no tamdaw ato kimad to pakayniay i rayray no tatoˈasan ato nika caculiculi ato tao ato nika laliyaliyang no tamdaw to pakayniay i rikec. Awaay ko epoc to matiniay a demak. 10 O palowaday a tamdaw to sakalacinowas no saˈopo no mitooray i, sowalen to kinacecay ano eca i, kinatosa. Ano caay pitengil cingra i, akato pikihar cingraan. 11 Mafanaˈ kiso to nika o tatiihay ko matiniay a tamdaw. O raraw ningra ko pawacayay to nika o moraraway cingra. 12 Ano ocoren ako ci Artimas ano eca i, ci Tikikus a patayra i tisowanan i, ano mamaedeng kiso i, katayni i Nikopolis. Nawhani maketonto ko falocoˈ ako to sakaitiraaw ako tonini a kasienawan. 13 Ano mamaedeng kiso i, patonoen ko rakat ni Apolos atoya mafanaˈay to rikec a tamdaw ci Cinas. Hapinangen ano o maan ko kacangoˈotan nangra. 14 O papasifanaˈen ko salikaka no mita to sakalalokaw nangra to ngaˈayay a demak a mipadang to kacangoˈotan nangra to sakacepocaw no ˈorip nangra. 15 Ngaˈayho saan i tisowanan ko kapot ako a maemin. Ngaˈayho han a paratoh ko maolahay tamiyanan a mitiˈeray ci Kristoan a salikaka.
Nanay mapalemed no Kawas kamo a maemin.
SAKA 8 FOLAD 19-25 ROMIˈAD
O ODOˈ KO KIMAD NO KAWAS | HIPRAY 1-3 FEDENGAN
“Maolahay to Moecelay a Demak, Miˈintel to Tatiihay a Demak”
(Hipray 1:8) Nikawrira, o sowal Ningra to pakayniay i Wawa Ningra i, “o mamidaˈoc ko pikowan iso, caay pisakakinih ko pikowan iso.”
w14 2/15 5 fiedac 8 fatac
Pakahemek ci Kristoan, Tadamaanay a Hongti!
8 Isaka 1914 miheca, pala hongtian ni Yihofa ko kanonoˈan a Wawa malo Misiya Hongti. “Caay pisakakinih ko pikowan”ni Yis. O mamicowat to moecelay ci Yis, masadafdaf ko pikowan. O ‘kamaroˈan no hongti’ ni Yis ko Kawas, tatodong nora o ci Yihofa ko pala hongtiay cingranan, mankora citatodongay ko fadangalan ningra. O roma i, o kamaroˈan ni Yis ‘midaˈocay, cowa ko mamafalic’. Ora minilnilan no Kawas a hongti taˈangayay ko ˈicel, itini ilaeno no sakayat noni hongti a mihodop ci Yihofaan, coko kalikoan han?
(Hipray 1:9) O maolahay kiso to moecelay a demak. Mˈintel kiso to tatiihay a demak. Orasaka, piliˈen Ako kiso a palatadamaanay. Ikakaen Ako to lipahak no kapot iso ko pipalipahak i tisowanan,” saan.
w14 2/15 4 fiedac 7 fatac
Pakahemek ci Kristoan, Tadamaanay a Hongti!
7 ˈOsien ko ˈOlic 45:6, 7. Tona faedetay ko nika olah ni Yis to moecelay, miˈintel to maamaan a pakangodoay to Wamaan a demak, mansa nilnilen no Wama cingra malo Hongti no Misiya Kitakit. Ta mapasimal ci Yis i, micadaay to ‘lipahakay a sapasimal’, mikikaka to ‘lecad ningra a tamdaw’, oiyaan malecaday to naitiniay i ngasaw no Yuta a rayray no hongti ci Tafiti. Misamaanay mikikaka ci Yis cangranan hani? Saka cecay, ci Yihofa ko panilnilay ci Yisan. Saka tosa, mapanilnilay ci Yis malo Hongti ato malo Sakakaay Saysi. (ˈOlic 2:2; Hipray 5:5, 6) Saka tolo, o fangcalay saocor ko macadaay ni Yis ao cowa ko kalo simal, cowa ko aitini i sera ao ikakarayan a mala hongti cingra.
Kadkaden ko Noˈadingoan Odoˈ
(Hipray 1:3) Cingra ko patalahkalay to ˈdil no Kawas. O romasato, cingra ko todong no masongilaˈay a pinangan no Kawas. O ciˈicelay a sowal ningra ko sapidipot ningra to polong no maamaan. Maherek cingra a mihepol to raraw no tamdaw i, maroˈ cingra i kawanan no tadaciˈicelay a Kawas i kakarayan.
it-2 590 fiedac 5 fatac
O Faco no Kawas
Tohati:niay masongilaˈay a patahkal ci Yis to pinangan no Wama han?
Sakakaay Wawa no Kawas (ya mala tamdaway a Yisan) patahkalay to faco no Wama. (2 Korinto 4:4) Tiya pasowal ko Kawas, “Sangaˈaw Ita ko milecaday, miringiay Titaanan a tamdaw” sa i, ci Yis oya sakakaay Wawa Ningra ko sakasasowal Ningra. Masangaˈto no Kawas ko Wawa i, milecaday koni Wawa mato faco no Kawas. (Satapangan 1:26; Yohani 1:1-3; Kolosay 1:15, 16) Ta itini i hekal ci Yis o malefotay a tamdaw, misaheciay patahkal to capeling ato pinangan no Wama, mankora, mihaen ko sowal ningra: “O pakaˈaraway i takowanan i, o pakaˈaraway to Wama.” (Yohani 14:9; 5:17, 19, 30, 36; 8:28, 38, 42) Nikawrira, patikolto maˈorip malo noˈadingoan ci Yis i, nai Wamaay micada to ikakarayanay ato iseraay a fadangalan, itiya mangalefayto ko nika lecad to Wamaan. (1 Pitiro 3:18; Matay 28:18) Tiya “pacakaten no Kawas ci Kristo a palasakakaay” i, masaheciayto ni Yis patalahkal ko ˈodingar no Kawas, mikakaay to iˈayaway no tatayni i sera cingra. (Filipi 2:9; Hipray 2:9) Nohatini, “cingra ko todong no masongilaˈay a pinangan no Kawas.”—Hipray 1:2-4.
(Hipray 1:10-12) O romasato a sowal ningra: “Tapangaw, o nisangaˈan iso isaˈa:yaw ko hekal. O nisangaˈan no kamay iso ko kakarayan, 11 O mamalahedaw konini a maemin. Nikawrira, o mamidaˈoc kiso. O mamatiya o rikoˈ konini a maˈomac. 12 O mamatiya o kafafang ao tatepiken iso ko kakarayan ato hekal. O mamatiya o nipipatisod to rikoˈ ko nika falic no kakarayan ato hekal. Nikawrira, awaay ko kafalican iso. Caay ka citolas ko mihecaan iso,” saan.
it-2 394 fiedac 6 fatac
Kakarayan
ˈOlic 102:25, 26 a sinael soˈlinay o ci Yihofa ko misowalan, kawra kalasaka dademakan ni Pawlo itini a mitoroˈ ci Yis Kristoan, tada matatodongay koni, samanen tiya misangaˈ ko Kawas to maamaan i, fosnian a Wawa ci Yis Kristo o itatihiay a mipadangay Ningra. Palalinian ni Pawlo to kakarayan ato sera ko Wawa no Kawas, somowal ano papasalaten ni Yihofa i, o kakarayan ato sera ngangaˈay “matiya o kafafang” a mifalah, kawra o Wawa no Kawas i, tatahadaˈoc a materek.—Hipray 1:1, 2, 8, 10-12; palalinien to 1 Pitiro 2:3.
Miˈosi to Sinael
(Hipray 1:1-14) Iti:yaho i, pakaynien no Kawas i paliˈayaway to sowal Ningra a tamdaw ko nipipasowal i tatoˈasan ita. Kinapinapi:nato Cingra a misaromaroma to pakayraan a pasowal i cangraan. 2 Nikawrira, itini i saikoikoray a romiˈad i, pakaynien no Kawas i Wawa Ningra ko nipipasowal i titaanan. Pakaynien no Kawas i cingraan ko nipisangaˈ to polong no maamaan. Cingra ko nipatirengan no Kawas to cacitodong tonini a maemin i pahererekan no hekal. 3 Cingra ko patalahkalay to ˈdil no Kawas. O romasato, cingra ko todong no masongilaˈay a pinangan no Kawas. O ciˈicelay a sowal ningra ko sapidipot ningra to polong no maamaan. Maherek cingra a mihepol to raraw no tamdaw i, maroˈ cingra i kawanan no tadaciˈicelay a Kawas i kakarayan. 4 Mapafeli no Kawas cingra to ikakaay no coyoh a tadamaanay a ngangan. Saka, ikaka no coyoh ko nika tadamaan ningra. 5 “O wawa Ako kiso. Aninito Kako a ciwawa i tisowanan,” caho ka saan ko Kawas a somowal i cecacecay aca no coyoh Ningra. “O wawato Ako kiso. Malawamato iso Kako,” caho ka saan ko Kawas a somowal i cecacecay aca a coyoh. 6 Yo mamiocor ko Kawas to Fisac a Wawa Ningra a patayni i hekal i, pasowal Cingra, “O tataˈongen no polong no coyoh Ako cingra,” saan. 7 O sowal Ningra to pakayniay i coyoh i, “Palecaden Ako to fali ko coyoh Ako. Palecaden Ako to marengrengay a namal ko matayalay Ako,” saan. 8 Nikawrira, o sowal Ningra to pakayniay i Wawa Ningra i, “o mamidaˈoc ko pikowan iso, caay pisakakinih ko pikowan iso.” 9 O maolahay kiso to moecelay a demak. Miˈintel kiso to tatiihay a demak. Orasaka, piliˈen Ako kiso a palatadamaanay. Ikakaen Ako to lipahak no kapot iso ko pipalipahak i tisowanan,” saan. 10 O romasato a sowal ningra: “Tapangaw, o nisangaˈan iso isaˈa:yaw ko hekal. O nisangaˈan no kamay iso ko kakarayan, 11 O mamalahedaw konini a maemin. Nikawrira, o mamidaˈoc kiso. O mamatiya o rikoˈ konini a maˈomac. 12 O mamatiya o kafafang ao tatepiken iso ko kakarayan ato hekal. O mamatiya o nipipatisod to rikoˈ ko nika falic no kakarayan ato hekal. Nikawrira, awaay ko kafalican iso. Caay ka citolas ko mihecaan iso,” saan. 13 “Kamaroˈ kiso i kawanan Ako tangasa i papihinokopan Ako to ˈada iso i pasaripaˈan iso a malataripaˈan iso,” caho ka saan ko Kawas a somowal i cecacecay aca no coyoh Ningra. 14 Ano hatira i, o maan ko coyoh hakiya? O matayalay no Kawas cangra a kawakawas. O niocoran no Kawas cangra to mamipadama to mamapaˈorip no Kawas a tamdamdaw.
SAKA 8 FOLAD 26 –SAKA 9 FOLAD 1 ROMIˈAD
O ODOˈ KO KIMAD NO KAWAS | HIPRAY 4-6 FEDENGAN
“Saˈicelen Iso a Micomod ko Paselaˈan no Kawas”
(Hipray 4:1) Maherekto ko Kawas a miketon to sowal to sapicomodaw ita i nisowalan Ningra a paselaˈan. Nikawrira, latek ira i tamowanan ko caay pakatahira i nisowalan Ningra a paselaˈan. Saka, orira ko katalawan ita.
(Hipray 4:4) Ira a matilid i Fangcalay Cudad ko pakayniay i saka pito a romiˈad. “Maherekto ko polong no tayal no Kawas saka, paselaˈ cingra to saka pito a romiˈad,” saan.
11 7/15 24-25 fiedac 3-5 fatac
Hapinangen to Manan ko Tatodong no Paselaˈan a Romiˈad no Kawas
3 Tangasato isaka cecay hahekalan i, cowaho ka malaheci ko saka pito romiˈad, iraay ko tosa a wacay paihekal toni. Saka cecay i, iraay ko milikafay ci Yisan miadah to adada i Paselaˈan Romiˈad, samanen o tayal ko miadahay to adada sanay cangra. Pacaˈof sa ci Yis i cangraan, “Awaay ko selaˈ no tayal no Wama ako. Saka, halo ako a matayal.” (Yohani 5:16, 17) O manan ko tatodong noni sowal hani? Pakokotay ko Yutaya tamdaw to nika tayal ni Yis i Paselaˈan Romiˈad, oraanto, “awaay ko selaˈ no tayal no Wama ako” hananay ni Yis paculi. Pasowalan ni Yis kora milikafay cingranan a tamdaw: “Wama ako ato kako malecaday a matayal. Ano pinaayto a patek a miheca ko Wama ako padadotoc matayal i Paselaˈan a lintad i, o ngangaˈay kako a matayal, soˈlinto itini i Paselaˈan Romiˈad.” Paihkalay kora sowal ni Yis, tahirato isaka cecay hahekalan i, tadamaanay a Paselaˈan Romiˈad no Kawas (saka 7 romiˈad to paselaˈan misangaˈ to maamaan i fafekang no sera) cowaho ka mahererek.
4 Saka tosa a wacay i, itiraay tora sowal ni Pawlo. Kalasaka dademakan ni Pawlo ko Satapangan 2:2 somowal to nika paselaˈ no Kawas, patemeran no fangcalay saocor a mitilid: “Kita o pasoˈlinay a tamdaw i, o micomoday to nisowalan no Kawas a paselaˈan.” (Hipray 4:3, 4, 6, 9) Mahapinangay itini, ya saka 7 romiˈad cowaho ka mahorirek i lintad ni Pawlo. O tatahacowa mahorirek koni Paselaˈan Romiˈad hani?
5 Toha sapacaˈofaw toni salicay, haratengen ita ko araaw no Kawas to saka 7 a romiˈad. Somowalay ko Satapangan 2:3 toni araaw: “Palemeden no Kawas konini a saka pito a romiˈad a misafangcal to malo micidekay a romiˈad.” Onini saka 7 romiˈad “misafangcal to malo micidekay a romiˈad” hananay ni Yihofa, micidek toni romiˈad, hongaˈ malaheci ko araaw Ningra itini toni romiˈad. O araaw Ningra i, papaitinien i saseraan ko midofdofay Cingranan a tamdaw, papidimokos toni sera ato kihcod a maˈoripay. (Satapangan 1:28) Toha sapalaˈosiaw toni araaw, ci Yihofa a Kawas atoya “Tapang no paselaˈan a romiˈad” ci Yis Kristo “awaay ko selaˈ no tayal” nangra. (Matay 12:8) Paselaˈan Romiˈad no Kawas papadadotoc tangasa pihrerekan to kapikowan ni Kristo to cecay patek a miheca. Tahirato i, o araaw no Kawas to Paselaˈan Romiˈad mamalaˈosito.
(Hipray 4:6) Oya mitengilay to ngaˈayay a ratoh isaˈa:yaw i, caay pasoˈlin cangra saka, caay pacomoden no Kawas cangra i paselaˈan. Nikawrira, ira ko romaroma to mamangaˈay a micomod toya nisowalan no Kawas a paselaˈan.
w11 7/15 25 fiedac 6 fatac
Hapinangen to Manan ko Tatodong no Paselaˈan a Romiˈad no Kawas
6 Misongilaˈan no Kawas mitadtad ci Atam aci Ifa to araaw Ningra, kawra cowa pitoor cangra. Ikorto i, ˈalomanay a tamdamdaw mikotoday ci Ataman aci Ifaan a misafelit to Kawas, ano oyato a nipiliˈan no Kawas a finawlan a Israil kitakit mahecaday a misafelit. Patalipaˈelalay ci Pawlo to isaka cecayay hahekalan Krisciyang, to iraay ilalomaˈ nangra ko matiraay to Israil a mararaw, sowal sa: “Orasaka, saˈicelen no mita a micomod to nisowalan no Kawas a paselaˈan. Ta caay ka matiya oya paculiay to Kawas a tamdaw ko cimacima ita a eca pakacomod.” (Hipray 4:11) Sinanoten itini, o misafelitay cowa ko mamilifok to paselaˈan no Kawas sanay ci Pawlo. O manan ko mamananam ita itira tora sowal ningra hani? Ano itini i maanan a demak a misafelit to araaw no Kawas i, cowa ko mamilifok to paselaˈan no Kawas han? O caˈof noni salicay tada masaka limlaan kitanan, ilaenoay lalakaw mamiforfor toni. Nikawrira, salakaten ita minengneng ko tinakoan no Israil kitakit, miforfor to misamaanay hano caka pilifok cangra to paselaˈan no Kawas.
(Hipray 4:9-11) Ano hatira i, iraho ko roma a masongilaˈay a malopaselaˈan no finawlan no Kawas. Malecad to paselaˈan no Kawas konini. 10 Nawhani matiya o nipipaselaˈ no Kawas to tayal Ningra ko micomoday to nisowalan no Kawas a paselaˈan a paselaˈ to tayal ningra. 11 Orasaka, saˈicelen no mita a micomod to nisowalan no Kawas a paselaˈan. Ta caay ka matiya oya paculiay to Kawas a tamdaw ko cimacima ita a eca pakacomod.
w11 7/15 28 fiedac 16-17 fatac
Hapinangen to Manan ko Tatodong no Paselaˈan a Romiˈad no Kawas
16 Anini, iraayho ko papina Krisciyang to sapidofdofawho to saˈosi no Rikec ni Mosi, nao miharateng cangra mitafo to Rikec ngaˈ malidong ko ˈorip sanay. O sapatemer no fangcalay saocor ci Pawloan ihekalay a somowal: “O nano siniˈada no Kawas ato nipitiˈer namo ci Kristoan ko saka mapaˈorip kamo.” (Ifiso 2:8, 9) Hay, wa misamaan ko Krisciyang ngaˈ milifok to paselaˈan no Kawas hani? Misaˈosian ni Yihofa ko saka pito romiˈad to paselaˈan Ningra, milaheci to araaw Ningra toni cikiw. Ano mihakelong kita ci Yihofaan, mitoor to pakaynian i likakawa Ningra a palidlid hananay a patahkal a araaw i, o mamilifokto to paselaˈan no Kawas, milecad Cingranan a pahanhan.
17 O roma sato, ano sakahemawen ita ko pakaynian no Kawas i madimadiay kuli a sapalimoˈot no Fangcalay Cudad, misao niyahan sa ko demak i, o misafelitayto to palidlid sanay a mapatalahkal a araaw no Kawas. Mihaen o mamirepat to kalalaˈed aci Yihofa. Ilaenoay lalakaw mamilengo to mamifiyor to tamdaw no Kawas a marariday maˈaraw a pakayraan. O mamilifok kita to paselaˈan no Kawas ha, kita ko piˈarawan, to mamidofdof kita ci Yihofaan hokira.
Kadkaden ko Noˈadingoan Odoˈ
(Hipray 4:12) O maˈoripay, o ciˈicelay ko sowal no Kawas. Ikakaay no matalemay a matatapalay a sinang no funus ko nika talem nira. Pakacocokay to falocoˈ ato [ˈorip] ita ato ilalomaˈay no tireng ita halo doˈes no ˈokak. O mihapinangay to harateng ato kangalayan no falocoˈ ita konini.
w16.09 folad 13 fiedac
Salicay No Miˈosiay Tamdaw
Itini i Hipray 4:12 to “maˈoripay, o ciˈicelay” sa i, o manan kora “sowal no Kawas” hananay hani?
▪ Ano nengnengen ko fafekangay ato laenoay a sowal nora sinael, o araaw no Kawas ko mitoroˈan ni Pawlo.
Marariday ko cudad ita kalasaka dademak to Hipray 4:12, mitadtad to ciˈicelay ko Fangcalay Cudad mifalic to kaˈorip no tamdaw, matatodongay koni sowal. Nikawrira, ano sinanoten ita ko fafekangay ato laenoay sowal no Hipray 4:12 i, o mamatongal ko nika cipinang toni sinael. Pakalalokan ni Pawlo ko Hipray Krisciyang papidofdof to araaw no Kawas, pakayni toni araaw, ihekalay a somowal ko Fangcalay Cudad to maanan kora. Somowalay ci Pawlo to pilidong no Kawas to Israil miliyas to Icip, papicomoden cangra tayni i mikiˈokan a ‘cihacolay ato ciwanengay a pala’, to aitira cangra a paselaˈ.—Kasadakan 3:8; Limoˈot 12:9, 10.
Soˈlinay a fangcalay a sakiˈok to nipafelian no Kawas to Israil tamdaw koni, ˈarawhan i, cangoˈotay ko pakasoˈlinay falocoˈ nangra, misaˈatekak to falocoˈ, telocto i, cowa picomod cangra tora mikiˈokan pala a pahanhan, milifok to paselaˈan no Kawas. (Saˈosi 14:30; Yosuwa 14:6-10) Nikawrira, pasowalay ci Pawlo: ‘Kamayanayho ko Kawas mikiˈok to ngangaˈay ko tamdaw a milifok to paselaˈan Ningra.’ (Hipray 3:16-19; 4:1) Onini ‘sakiˈok’ masalalomaˈay itini i araaw no Kawas. Kalasaka dademakan ni Pawlo ko Satapangan 2:2 ato ˈOlic 95:11, somowal to malacecayay to araaw no Kawas koni sakiˈok. Anini, malecaday kita to i Hiprayay a Krisciyang, ngaˈayay maˈosi ita koni araaw, halo midofdof.
Sowal sa ko Fangcalay Cudad: ‘Kamayanayho ko Kawas mikiˈok to ngangaˈay ko tamdaw a milifok to paselaˈan Ningra.’ Masemeray ko falocoˈ ita pakayni toninian, pasoˈlinay to iraay to tokel ita milifok to mikiˈokan no Kawas a paselaˈan, mankora, padadotocen ita misaˈicel a midofdof ko araaw no Kawas. Cowa ko nika pidofdof to Rikec ni Mosi, anca romaroma a pakayraan a micada to hemek ni Yihofa. Tona iraay ko pasoˈlinay a falocoˈ ita, makalim a madimadi midofdof to araaw no Kawas ko sakahaen. Anini, paro no kakarayan ˈalomanay ko tamdaw minanam to Fangcalay Cudad, mafanaˈto to kimad no Kawas i, mifalic to kaˈorip, patafang to tireng halo micada to inoˈ mala Krisciyang. Ora noka falic nangra misawacayay to “maˈoripay, o ciˈicelay ko sowal no Kawas.” O araaw no Kawas maharekayto matilid i Fangcalay Cudad, taˈangayay ko pifiyor to ˈorip ita nohatiniho, ano ikorto i, o papadadotoc a ciepoc i noka ˈorip ita.
(Hipray 6:17, 18) Mahaen ko demak no Kawas. O sapahapinangaw Ningra i mamilayap to nisowalan Ningra a demak to nika caay ko mamafalic ko nafalocoˈan Ningra saka, pakaynien Ningra i niketonan Ningra a falocoˈ ko nipipahapinang to niketonan Ningra a sowal. 18 Onini a caay ko mamafalic a niketonan no Kawas a falocoˈ ato sowal Ningra i, o pahapinangay i titaanan to nika caay ko misamangahay ko Kawas. Saka, kita o pakatamaay to papaˈading titaanan i, malatadamaanay a sapaˈicel to falocoˈ ita konini. O sakacaaw pisawad ita a miharateng to kacifalocoˈan ita.
it-2 552 fiedac 4 fatac
Hatokel
‘Matahidangay tayra kakarayan’ a Krisciyang. (Hipray 3:1) O mamilifok to caay ka nahol a ˈorip, o matiniay tokel iraay ko pisalalangian, ngaˈayay pakasoˈlinen. Tano tosaay demak ko Kawas a misawacay toni, patahkal to cowa pisamangah Cingra, o cecay i, ora sakiˈok Ningra, sako tosa i, ora miketonan a sowal Ningra. O romasa i, oniya tokel milingatay ci Kristoan, nao itiniayto i kakarayan milifok to caay ka nahol a ˈorip ci Kristo. Mahaen o sowal no Fangcalay Cudad, oniniya tokel ‘matiraay o ˈenor no ˈorip, o masongilaˈay, o tanektekay, mitaˈelif to sapalaˈed a kiradom micomod talaloma [mahaen o sakakaay saysi i Pihepolan to Raraw a romiˈad a micomod i safangcalay a kaitiraan]. O midoedoay cingra ci Milkicitikan a midaˈoc a malasakakaay a saysi.’—Hipray 6:17-20.
Miˈosi to Sinael
(Hipray 5:1-14) O nipiliˈan nai tamdamdaw ko sakakaay a citodongay to taˈong hananay. O nipatirengan cingra to mamalataypiyaw no tamdamdaw a matayal tono Kawas. O papacakat cingra to sapatoˈaya to sakahepol no raraw. 2 Tona o tadancaay cingra saka, mafanaˈ cingra a paˈayaw to mafokilay ato moraraway a tamdaw. 3 Saka, o papatoˈayaˈaya aca cingra. Onini i, caay ko sakahepol no raraw no finawlan a cecay. O sakahepol no raraw no tireng ningra ko roma. 4 Caay kono tireng a harateng ko sakacingangan no tamdaw tono sakakaay a citodongay to taˈong. Deng o nano pitahidang no Kawas ko sakacingangan no tamdaw tonini a matiya oni Aron. 5 Mahaenay ito ci Kristo. Caay ka cingra ko pacakatay to tireng a palasakakaay a citodongay to taˈong. O Kawas ko pasowalay cingraan, “O wawa Ako kiso. Aninito Kako a ciwawa i tisowanan,” saan. 6 O roma a sowal Ningra a matilid i Fangcalay Cudad i, “O mamidoedo kiso ci Milkicitikan a midaˈoc a mala citodongay to taˈong,” saan. 7 Yo itiniho i hekal ci Yis i, satataˈang sa cingra to ngihaˈ a talalosaˈ a mitolon a mingitangit i pakapaˈoripay cingraan nai patay a Kawas. O misapoeneray cingra to falocoˈ i kaˈayaw no Kawas. Saka, tengilen no Kawas ko pitolon ningra. 8 Talacowa o wawa no Kawas cingra nikawrira, pakayni i nipisemsem ningra ko sakafanaˈ ningra a mihakelong to falocoˈ no Kawas. 9 Yo masongilaˈto ci Yis i, malamidaˈocay a paˈoripay cingra a paˈorip to polong no mihakelongay i cingraan. 10 Orasaka, o midoedoay ci Yis ci Milkicitikan a malasakakaay a citodongay to taˈong han no Kawas cingra. 11 Adihayho ko sasowalen niyam i tamowanan to pakayniay tonini a demak. Nikawrira, maorat ko falocoˈ namo. Saka, maroray kami a misaheci a mipakafanaˈ i tamowanan. 12 Ano pakaynien i nika halafin namo a mitoor i, maedengto kamo a malapasifanaˈay. Nikawrira, o laliyawenho no nima kamo a misatapang a mipasifanaˈ to sowal no Kawas. Caayho ka ngaˈay kamo a komaen to ˈatekakay. O hacolho ko malokakaenen namo. 13 O komaenayho to hacol i, o molaˈayho a wawa. Caayho ka fanaˈ cingra to ngaˈayay ato tatiihay. 14 O ˈatekakay a kakaenen i, o kakaenen no matoˈasay, oya mafanaˈayto a mihapinang to ngaˈayay ato tatiihay a matanengayto a tamdaw.