Pinengnengan to lalakaw no Mitosilay ato Nikaˈorip Rayray no Saˈopo

SAKA 5 FOLAD 4-10 ROMIˈAD

O ODOˈ KO KIMAD NO KAWAS | SATAPANGAN 36-37

“Maˈinapay ko Salikaka a ˈInteh ci Yosifan”

(Satapangan 37:3, 4) Itini i polong a wawawawa, ikaka ko olah ni Yakop ci Yosifan, tona o tatoˈasanto ningra a wawa ci Yosif. Sangaˈen ni Yakop ko cecay makapahay a kafafang pafeli ci Yosifan. ⁴ Maˈaraw no kakakaka ko pisaolah no wama ci Yosifan i, ˈintehto cangra ci Yosifan, caayto pisangaˈay cangra a somowal cingranan.

w14 8/1 12-13 fiedac

“Cinitiihay Kako”

Sowal no Fangcalay Cudad: “Maˈaraw no kakakaka ko pisaolah no wama ci Yosifan i, ˈintehto cangra ci Yosifan, caayto pisangaˈay cangra a somowal cingranan.” (Satapangan 37:4) Iraay ko lalangian nangra maˈinap ci Yosifan, kawra cowa ko hangangaˈay cangra a palahad to tatiihay a harateng i falocoˈ. (Taneng 14:30; 27:4) Kiso i, na milifetayto kiso to kaciharatengan iso a maanan nao tao ko milifokay han? Haratengen ko salikaka ni Yosif. Ora ˈinap nangra ko saka pidemak to kasomadan, toha tatiihento ko falocoˈ nangra ikor. O nalifetan nangra patalipaˈelalay to Krisciyang, o sangaˈayay i, ‘kalacafay to lipahakay a tamdaw a lipahak’.—Loma 12:15.

Ci Yosif mafanaˈay to nika ˈinap no salikaka cingranan. Ano ingata ko salikaka i, mihimedan ni Yosif kora makapahay kafafang ningra hokira? Kawra, haharatengen, pafeli ci Yakop toniya kafafang, o sapaihkalaw to nonoˈ ci Yosifan. Ci Yosif cowa ka pakasomod to wamaan, orasaka caˈedongen ningra koniya kafafang. Mananamay ita ko manan hani? Soˈliˈlin, cowa ka pisakakinih ko kakarayanay Wama, kawra latekay mikiriwiˈay pafeliayto madimadiay sikawdan Ningra, paihkalay to maolahay cangranan. O roma i, palimoˈotan no Kawas ko sikawdan ningra, hamaan pahecad toniya manaholay a hekal. O makapahay a waywayan no Krisciyang mahecaday o makapahay a kafafang ni Yosif, cowa ka lecad cangra to tao. Kawra, o roma a tamdaw maˈinapay ato misaˈadaay to Krisciyang. (1 Pitiro 4:4) Pakayni toninian, o Krisciyang mamihimed to o soˈlinay a sikawdan no Kawas cangra hokira? Mahaen ci Yosifan cowa pisimed to kafafang no niyah, o Krisciyang cowa ko hamamisimed to saaroˈan no niyah.—Luka 11:33.

(Satapangan 37:5-9) Ikor, cinitiih ci Yosif to cecay nitiih, pasowalen ningra ko salikaka ningra, saka, mangalef ko piˈinteh nangra cingranan. ⁶ Pasowal sa ci Yosif cangranan: “Talatiihay kako, tengilenho namo: ⁷ Maˈaraw ako i omah kita mirorong to emi, o nirorongan ako a emi i, tomirengay itira, o nirorongan namo italiyok no mako a mitaˈong.” ⁸ Pasowal ko salikaka i cingranan: “Mangalay kiso a malahongti a mikowan i tamiyanan haw?” Pakayniay toniya nitiih ni Yosif ato sowal ningra, mangalefto ko piˈinteh nangra cingranan. ⁹ Nanoya, cinitiih haca ci Yosif. Sowalen ningra ko salikaka ningra, “Cinitiihay haca kako, maˈaraw ako ko cidal ato folad ato safaw cecay a fuˈis, pasayni i takowanan a mitaˈong a maemin.”

(Satapangan 37:11) Tada maˈinapto ko salikaka ningra, nikawrira, pakifalocoˈ han no wama konini a demak.

w14 8/1 13 fiedac 2-4 fatac

“Cinitiihay Kako”

Oniya tosa a nitiih sahtoay o naitiniay ci Yihofaan a sapairasol. Mitokelay ko Kawas ci Yosifan pasowal toniya tosa nitiih to sakafanaˈaw no romaroma a tamdaw toniya lihaf. Ano nengnengen, o demak ni Yosif o sapaliˈayaw to misawkitay lihaf no Kawas to maliyangay a tamdaw Ningra.

Ci Yosif sadamsayay a somowal to kaka: “Talatiihay kako, tengilenho namo.” Matengil no kaka ikor, mafanaˈay to tatodong noniya nitiih, tada maketeray. Pasowalay cangra ci Yosifan: “Mangalay kiso a malahongti a mikowan i tamiyanan haw?” Sowal no Fangcalay Cudad: “Pakayniay toniya nitiih ni Yosif ato sowal ningra, mangalefto ko piˈinteh nangra cingranan.” Ta pasowalen ni Yosif ko wama ato salikaka toya saka tosa nitiih ningra i, tatiihan nanay cangra a mitengil. Kaketeran ni Yakop cingra, sowal sa: ‘O manan ko tatodong noniya nitiih iso hani? Kako ato ina iso, ato salikaka iso maemin a mikitoros mitaˈong han?’ Soˈlin mahaen ko sowal ni Yakop, misaharateratengay toniya tatodong no nitiih. Alatek harateng sa cingra, ‘oniya nitiih o naitiniay i ci Yihofaan hokira?’—Satapangan 37:6, 8, 10, 11.

Cowa ko ci Yosif aca, tona pakayniay i pipaliˈayaw to lihaf ni Yihofa, hato mroeroay no tao. Ci Yis mahaenay a paliˈayaw pasowal to lihaf no Kawas, saan a pasowal to nisawawaan: “Ano makariˈang no tamdaw kako i, o mamakariˈang nangra kamo.” (Yohani 15:20) O Krisciyang a maemin ano pinaayto ko mihecaan nangra, ngaˈayay minanam to pakasoˈlin ato timolo ni Yosif.

(Satapangan 37:23, 24) Tahira ci Yosif i salikaka ningra i, helong han nangra koya kafafang ni Yosif, oya makapahay a kafafang i tireng ningra. ²⁴ Ikor, repeten nangra cingra, fahkol han nangra i awaay ko nanom a tefon cingra.

(Satapangan 37:28) Ira ko mitaˈlifay a paliwalay a Mitiyan a tamdaw, pasadak han nangra ci Yosif nai tefon, pacakayen ko Ismail a tamdaw to tosa poloˈ a rimood no linkim. Ala hanto nonini a tamdaw ci Yosif patayra i Icip.

Kadkaden ko Odoˈ no Sinael

(Satapangan 36:1) O teloc ni Isau konini a matiliday, o roma a ngangan ni Isau i, ci Itom.

it-2 875 fiedac

Itom

(Eʹdom) [Kahngangay], Itom a tamdaw (Eʹdom·ites)

Ci Itom o cimir a ngangan no ˈapi a kaka ni Isau. (Satapangan 36:1) Ci Isau pakayniay i cecay a kahngangay a raˈraˈ a paˈaca to fadangalan no fisac, orasaka cingangan to Itom a cimir no ngangan. (Satapangan 25:30-34) Tatodong sanay, mahofoc ci Isau kahngangay ko tireng ningra. (Satapangan 25:25) O kamaroˈan a pala ningra ato fofo ningra, iraay ko kahngangay a sera.

(Satapangan 37:29-32) Yo patikol ci Riupin a tayra i tefon i, awaayto a maˈaraw ningra ci Yosif. Saka, cinas sato cingra to rikoˈ a mararom. ³⁰ Tayra sato cingra i safasafaan ningra, milekal a somowal: “Awaayto koya wawa, samaan sato?” ³¹ Itiya i, alaan nangra ko kafafang ni Yosif, ta pacoken nangra ko cecay a siri, paremesen nangra koya kafafang. ³² Oraanto, ocoren nangra ko tamdaw miala tora kafafang patayra i wamaan, somowal: “Mahelaay niyam konini kafafang. Nengnengen hena, ono wawa iso koni hakiya.”

it-1 94 fiedac

Milosimed; Midipot

Pakaenay a tamdaw ano makahi cingra patado to tao pakaen to kolong ato siri i, o makahiyayto cingra mitamorong to pakayniay i pakaenay a sikining no sarikec. Mihaydaay cingra tora tawki no pinaˈorip, mamipakaen to pinaˈorip ningra ato caka takaw no tao, ano masamaan i, o papatefoc cingra. Nikawrira, ano makaen no ˈaˈadopen ko pinaˈorip i, cowa ko mamitamorong tora ˈinorong cingra. Kawra, o pakaenay a tamdaw mamihadak to hawacay, paˈaraw to tawki, tinakoen, o kina cicih a tireng no kolong anca siri, hongaˈ awato ko sikining ningra. Makinsato no tawki ikor, mapasawadto ko raraw no pakaenay a tamdaw.

Mahecaday a safalod ngaˈayay kalasaka dademaken to pipatorod no tao to maamaan, itini i kalalaˈed no paro no lomaˈ, tinakoen, o sakakaay a wawa iraay ko sikining midipot to safasafa. Mihaenay haw i, mafanaˈayto kita hano ciharateng ci Riupin o sakakaay a wawa ciˈinorong to ˈorip ni Yosif, mahaen to maˈoningay i Satapangan 37:18-30, tiya sapipatayaw ko romaroma salikaka ci Yosifan i, sowal sa cingra: “Hamaan patayen cingra, hamaan pasadak to ˈirang, hamaan mariˈang cingranan.” O sakasaan ni Riupin i, o sapipaˈoripaw ci Yosifan to papanokayen i ciwamaan. Cowa ka halafin, mahapinang ni Riupin awa maˈaraw ci Yosif i, macariraw ko harateng ningra, ‘cinas han ningra ko rikoˈ’, owaw sa: ‘Awaay maˈaraw koya wawa! O tatalacowa kako ko ngaˈay hokini?’ Mafanaˈay cingra oha mamitamorong to kaawa ni Yosif. Kawra, oya romaroma salikaka mirorohay to ˈaˈadopen ko mipatayay ci Yosifan. Mankora mipaˈirangan nangra ko kafafang ni Yosif. Oraanto i, patayraan nangra ci Yakopan, o wama nangra ato misawkitay a kakitaan no lomaˈ, hato cowato ko caciˈinorong ci Riupin pakayni toniya demak, maˈaraw ni Yakop kora kafafang ni Yosif i, pakasoˈlinay to mapatayay no ˈaˈadopen cingra.—Satapangan 37:31-33.

Miˈosi to Sinael

(Satapangan 36:1-19) O teloc ni Isau konini a matiliday, o roma a ngangan ni Isau i, ci Itom. ² Ciramod ci Isau to papinapina a fafahiyan no Kanan, cifafahi cingra ci Ataan o wawa ni Ilon o Hifi a tamdaw. O roma sato, cifafahi cingra ci Oholipamahan o wawa ni Ana o fafahiyan a fufu ni Cipiyon. ³ Cifafahiho cingra ci Pasimatan o safa ni Nipayot o wawa ni Ismail. ⁴ O nihofocan ni Ata ci Ilifac, o nihofocan ni Pasimat ci Riuil. ⁵ O nihofocan ni Oholipamah ci Yius, ci Yalam aci Kora. Onini a wawa ni Isau a maemin i, o nihofocan i Kanan. ⁶ IKor, keriden ningra ko fafahi ato kapikapi ato wawa ato polong no paro no lomaˈ ningra, alaen ningra ko polong no kolong ato siri ato dafong ningra i Kanan a miliyas, malinah a miraay to safaan ci Yakop. ⁷ Tona ˈaloman ko kolong ato siri ato adihay ko dafong nangra, caayto ka edeng koya kamaroˈan nangra a sera a maroˈ cangra. ⁸ Oni ko saka tayra ningra i lotolotokan no Itom a maroˈ. ⁹ Onini i, o tatoˈasan no Itom a tamdaw o teloc ni Isau. ¹⁰ O fufufufu ni Isau koni: Mahofoc ko fafahi ni Isau ci Atah to cecay a faˈinayan a wawa ci Ilifac, fafahi ni Isau ci Pasimat mahofoc to faˈinayan wawa ci Riuil. ¹¹ Wawa ni Ilifac ci Timan, ci Omar, ci Cifo, ci Katam, ci Kinac. ¹² Mahofoc ko kapi ni Ilifac ci Timna to cecay a faˈinayan a wawa, ci Amalik ko ngangan ningra. Cangra o teloc no fafahi ni Isau ci Atah. ¹³ Wawa ni Riuil ci Nahat, ci Cirah, ci Samah aci Micah. O teloc no fafahi ni Isau ci Pasimat cangra. ¹⁴ Fafahi ni Isau, ci Oholipamah, wawa ni Anah, fufu ni Cipiyon, mahofocay to tatolo faˈinayan wawa ni Isau, ci Yius, ci Yalam, ci Kora cangra. ¹⁵ O kakeridan no kasangasaw no teloc ni Isau. O fisac a wawa ni Isau ci Ilifac, ilalomaˈ no wawa ni Ilifac i, ci Timan, ci Omar, ci Cifo, ci Kinac, ¹⁶ ci Kora, ci Katam aci Amalik ko tatoˈasan no kasangasaw nangra. Onini a kasangasaw a maemin i, o teloc ni Atah o fafahi ni Isau. ¹⁷ O wawa ni Isau ci Riuil, ilalomaˈ no wawa ni Riuil i, ci Nahat, ci Cirah, ci Samah aci Micah ko tatoˈasan no kasangasaw nangra. Onini a kasangasaw a maemin i, o tloc ni Pasimat o fafahi ni Isau. ¹⁸ O Yius, o Yalam ato Kora a kasangasaw i, o teloc no fafahi ni Isau ci Oholipamah, o fafahiyan a wawa ni Anah. ¹⁹ Onini a kasangasaw i, o teloc ni Isau a maemin. Ci Isau i, ci Itom cingra.   

SAKA 5 FOLAD 11-17 ROMIˈAD

O ODOˈ KO KIMAD NO KAWAS | SATAPANGAN 38-39

“Cowa Pihawad ci Yihofa ci Yosifan”

(Satapangan 39:1) Keriden noya Ismail a tamdaw ci Yosif a patayra i Icip, pacakayen nangra i cecay a tapang ci Potifaran o kakeridan no misimaway to hongti no Icip

w14 11/1 12 fiedac 4-5 fatac

“Maanen Ako ko Pidemak to Matiniay a Tatiihay a Ciraraw i Kaˈayaw no Kawas Saw?”

“Keriden noya Ismail a tamdaw ci Yosif [mapatayra] i Icip, pacakayen nangra i cecay a tapang ci Potifaran o kakeridan no misimaway to hongti no Icip.” (Satapangan 39:1) Mikitini toniya pina a sowal no Fangcalay Cudad, mafanaˈay kita to nika masamsam cingra, miliyaw haca mapacakay, o dafong a nimaan cingra. Haratengen hena, tiya tooren ni Yosif ko faelohay tawki ningra, oya tapang no Icip romakat i lalan i, pasayra maemin ko mata no tamdaw, minengneng cingranan.

Tangasaayto i lomaˈ no tawki, oniniya lomaˈ tada taˈangayay ko kasasiroma to nano lomaˈ ni Yosif itiyaho. Nano kaemangho cingra o pakaenay to siri a lalomaˈan, misalinalinahay ko aroˈ a misataloˈan cangra. Itini i Icip, o cihafayay tamdaw matira ci Potifaran, tada makapahay masaditay ko lomaˈ. O mikingkiway to nolitengan a tamdaw sanay ko sowal, o nolitengan a Icip tamdaw, maolahay to maˈadipelay a palosayan, adihay ko kilang, ira ko laku malengaw ko hana. Matatingrohay ko lomaˈ, iraay ko adihayay a kafotiˈan, ˈakawangay ko sasingalan ngaˈay micomod ko siemelay fali, ˈalomanay ko misatofangay.

(Satapangan 39:12-14) Repet han noya fafahiyan ko kafafang ni Yosif, sowal sa: “Ati, madadiˈi kita!” Liyas han ni Yosif cingra a milaliw a talapaputal, matatoy ningra koya kafafang ni Yosif. ¹³ Minengneng cingra to pilaliw ni Yosif a talapaputal a misiday to kafafang ningra i, ¹⁴ lekal sa cingra a mitahidang to matayalay no lomaˈ ningra, sowal sa: “Nengnengen! Oya nialaan no faˈinay ako a patayni i lomaˈ a Hipray a tamdaw i, misamsam i titaanan. Micomod cingra i kafotiˈan ako a sapiˈodangan takowanan. Saka, lekal han ako.

(Satapangan 39:20) Saka, papirepet hanto ningra ko tamdaw ci Yosifan a pacomod i pirofoan no hongti, saka, itira sato ci Yosif a marofo.

w14 11/1 14-15 fiedac

“Maanen Ako ko Pidemak to Matiniay a Tatiihay a Ciraraw i Kaˈayaw no Kawas Saw?”

Pakayni to kapalitan no litengan a Icip, cowa ka hakowa ko kafanaˈ ita. Mahelaay no mikingkiway tamdaw ko mafalahayto a kapalitan. Itira tora kapalitan iraay ko ilaenoay no sera a pipalitan. Somowalay ci Yosif to itiniay i laeno no sera a refong cingra, awaay ko likat, awaay ko hatokel a kitiraan. (Satapangan 40:15) O sowal no ˈOlic, somowalay to nika pisemsem ni Yosif a marofo. Sowal sa ko sinael: “Mapalit to lonayiˈ ko tosa a waˈay ningra, mapacaˈedong ko liˈel ningra to marad a sapalit.” (ˈOlic 105:17, 18) O Icip a tamdaw nolatekay pasasolikoran ko kamay no tamdaw a mipalit, latekay i, tano marad a sapalit to liˈel nangra. Awaay ko manan a raraw ni Yosif, ˈarawhan, hatini ko pisemsem ningra, maedeng taˈangangay ko rarom no falocoˈ ningra.

Ci Yosif cowa ka pina aca romiˈad a mapalit. Sanay ko sowal no Fangcalay Cudad, ‘halafinay ci Yosif i tapalitan.’ Halafinay cingra materek itira tora kakokiˈan a kitiraan! Cowa ka fanaˈ ci Yosif to hahacowa matedal cingra. Haratengen hena, hakowa ko kasomad ni Yosif aki?

O sowal no Fangcaylay Cudad: Mikapot ci Yihofa ci Yosifan, patalahkal to madimadiay a olah i cingranan. (Satapangan 39:21) O patih no kapalitan, sapikadang to ”o a marad, o toˈeman no refong, cowa ko mamiconged to olah ni Yihofa milawis to sikawdan Ningra. (Loma 8:38, 39) Itini kapalitan, ci Yosif mifowahay to kanonoˈan a Wama itini i satolon, macadato ningra ko sapafeli no Kawas a rihaday no falocoˈ. (1 Korinto 1:3, 4; Filipi 4:6, 7) Ci Yihofa pafeliayho ci Yosifan to manan a sadama hani? O sowal no Fangcalay Cudad palemedan no Kawas cingra hato maolahay cingranan ko tapang no pirofoan.

(Satapangan 39:21-23) Nikawrira, mikapot ci Yihofa ci Yosifan, patalahkal to madimadiay a olah i cingranan, saka, maolah cingranan ko tapang no pirofoan. ²² Patirengen ningra ci Yosif a papikowan to romaroma a marofoay, cingrato ko citodongay a misangaˈ to polong no demak i pirofoan. ²³ Ano o ci Yosifho ko citodongay to demak i, awaayto ko kihar noya tapang no pirofoan, samanen mikapot ci Yihofa ci Yosifan, palaˈosien ni Yihofa a malaheci a maemin ko nidemakan ningra.

w14 11/1 15 fiedac 2 fatac

“Maanen Ako ko Pidemak to Matiniay a Tatiihay a Ciraraw i Kaˈayaw no Kawas Saw?”

O sowal no Fangcaylay Cudad: “Mikapot ci Yihofa ci Yosifan, patalahkal to madimadiay a olah i cingranan.” (Satapangan 39:21) O patih no kapalitan, sapikadang to ˈoˈo a marad, o toˈeman no refong, cowa ko mamiconged to olah ni Yihofa milawis to sikawdan Ningra. (Loma 8:38, 39) Itini kapalitan, ci Yosif mifowahay to kanonoˈan a Wama itini i satolon, macadato ningra ko sapafeli no Kawas a rihaday no falocoˈ. (1 Korinto 1:3, 4; Filipi 4:6, 7) Ci Yihofa pafeliayho ci Yosifan to manan a sadama hani? O sowal no Fangcalay Cudad palemedan no Kawas cingra hato “maolahay cingranan ko tapang no pirofoan.”

Kadkaden ko Odoˈ no Sinael

(Satapangan 38:9, 10) Nikawrira, mafanaˈ ci Onan to nika o nihofocan a wawa i, caay ko malo ningra a wawa, saka, ano tayra cingra a midiˈi to ˈali ningra i, padeteng han ningra a misadak i sera ko soloy ningra to sakaecaaw patado ningra a pawawa to kaka ningra. ¹⁰ Onini a demak ningra i, o ciraraway i kaˈayaw ni Yihofa, saka, patayen no Kawas cingra.

it-1 388-389 fiedac

Onan

(Oʹnan) [tatodong noniya sowal i: O ˈicel a cisofoc; matomesay ko ˈicel]

Saka tosa a wawa ni Yuta to faˈinayan, o mihofocan noya Kanan a tamdaw ci Suwa a fafahiyan. (Satapangan 38:2-4; 1 Rayray 2:3) Mapatay koya awaay ko wawa a kakaan ci Ir i, pasowalan ni Yuta ci Onan papidiˈi to ˈali ci Tamaran, patado to kaka a pateloc. Ano ciwawa to faˈinayan ci Tamar i, oniniya wawa o malo wawa ni Ir a milayap to hafay no lomaˈ ningra, ao cowa ko wawa ni Onan. Ano awaay ko wawa ni Ir to mamilayap to hafay no lomaˈ i, ao ci Onanto ko mamilayap to hafay no fisac a wawa. Ta madadiˈi ci Onan aci Tamar i, “padeteng han ningra a misadak i sera ko soloy ningra,” caka papuyapuy ci Tamaran. Sowal no Fangcalay Cudad i, “midiˈi to ˈali ningra i,” padeteng hananay ningra a misadak i sera ko soloy. Mihaenay a patayen no Kawas cingra, samanen cowa ka pitengil to sapalimoˈot no wama a maˈanofay ko falocoˈ, hanaca misafelitay to saˈosi no Kawas pakayni to mararamoday. Mapatayto cingra i, awaay ko wawa.—Satapangan 38:6-10; 46:12; Saˈosi 26:19.

(Satapangan 38:15-18) Yo maˈaraw ni Yuta cingra i, mitahepoan ningra ko pising ningra, nao tasalamaan a fafahiyan cingra saan. ¹⁶ Tayra sa cingra i lawac no lalan a milicay cingranan, “Madadiˈi kita.” han ningra. Caay ka fanaˈ ci Yuta to nika o kadafo ningra cingra. Sowal sa ci Tamar: “Ano midiˈi kiso i takowanan i, o maan ko sapafeli iso i takowanan saw?” ¹⁷ Pacaˈof sa ci Yuta: “Alaen ako nai masafelaway a siri ako ko cecay a toforho a siri a pafeli i tisowanan.” Sowal sa ci Tamar: “Ano hatira i, iˈayaw no pipatayni iso toya siri i, ngaˈay sidayen itini ko sapatampo iso a lalosidan han?” ¹⁸ Sowal sa ci Yuta: “O maan ko kangalayan iso a sapatampo ako saw?” Pacaˈof sa ci Tamar: “O sarinaˈ iso ato kaos nira ato cokor iso.” Saka, pafeli hanto ni Yuta ci Tamar tonini a lalosidan a maemin. Madadiˈito cangra, ta cipuyapuyto cingra to wawa ni Yuta.

w04 1/15 30 fiedac 4-5 fatac

Salicay no Miˈosiay Tamdaw

Soˈlinay haw i, mararaway ko demak ni Yuta, samanen cowa ka pitoor cingra to nano sowal ningra, cowa papisafafahiyen ci Sila ci Tamaran. O roma sa i, o edengan o fafahi no niyah ko dadiˈiyen sanay ko saˈosi no Kawas, ˈarawhan misafelitay ci Yuta toniniya saˈosi no Kawas a midiˈi to nao talasamaan a fafahiyan sanay a haratengen ningra. (Satapangan 2:24) ˈArawhan, cowa ko tasalamaan a fafahiyan kora kaying. Mihaenay i, cowa ko kafanaˈan ni Yuta a patado ci Silaan a pateloc to wawa.

Pakayni ci Tamaran, midiˈi cingra ci Yutaan, cowa ko maˈodangay a demak, ora mihofocan ningra a maˈapiay wawa, cowa ko naitiniay i maˈodangay a hofocen. Oya Pilihim a tamdaw ci Powac, ciramoday ci Rucuan, o mapatayay ko faˈinay ningra. Itiya i, o malohemay malitengay i Pilihim pakahemekay ci Powacan a somowal to wawa ni Tamar ci Pirican: “Nanay pakaynien ni Yihofa toniya fafahiyan pafeli tisowanan to teloc iso, nanay o lomaˈ iso matira to nihofocan ni Tamar to wawa ni Yuta to lalomaˈan ni Piric.” (Rucu 4:12) O roma sa i, itiniay i rayray no tatoˈasan ni Yis Kristo ci Piric.—Matay 1:1-3; Luka 3:23-33.

Miˈosi to Sinael

(Satapangan 38:1-19) Itiya i, miliyas ci Yuta to salikaka ningra a tayra ci Hiraan o Atulam a tamdaw a mipataloˈan a maroˈ itira. ² Maˈaraw ni Yuta itira ko kaying a wawa ni Suwa o Kanan a tamdaw, saka, mararamod cangra. ³ Cipuyapuy cingra ta mahofoc to cecay a faˈinayan a wawa, ci Ir han ni Yuta a pangangan koya wawa. ⁴ Cipuyapuy haca cingra ta mahofoc to saka tosa a faˈinayan a wawa, ci Onan han ningra a pangangan. ⁵ Mahofoc cingra to roma a faˈinayan a wawa, ci Sila han ningra a pangangan, yo mahofoc cingra ci Silaan i, itira i Akcip ci Yuta. ⁶ Pafafahiyen ni Yuta ci Ir o fisac a wawa ningra ci Tamaran. ⁷ Tatiih ko demak ni Ir, tada maketer ci Yihofa, saka, patayen ni Yihofa cingra. ⁸ Itiya i, sowalen ni Yuta ko safa ni Ir ci Onan: “Katayra kiso a midiˈi to ˈali iso, lahecien ko dademaken iso o safa i cingranan, ta mapatado iso ko kaka iso a pateloc.” ⁹ Nikawrira, mafanaˈ ci Onan to nika o nihofocan a wawa i, caay ko malo ningra a wawa, saka, ano tayra cingra a midiˈi to ˈali ningra i, padeteng han ningra a misadak i sera ko soloy ningra to sakaecaaw patado ningra a pawawa to kaka ningra. ¹⁰ Onini a demak ningra i, o ciraraway i kaˈayaw ni Yihofa, saka, patayen no Kawas cingra. ¹¹ Itiya i, miharateng ci Yuta, “Matalaw to pilecadan ni Sila a matiya oya tatosa a kaka ningra a mapatay”, sowal han ningra ko kadafo ci Tamar: “Pinokayho kiso i lomaˈ no wama iso a maponeng, talaenho ko nika lakapah no wawa ako ci Sila.” Itiya i, nokay sato ci Tamar i lomaˈ no wama ningra. ¹² Nanoya, caho ka halafin mapatayto ko fafahi ni Yuta, ya wawa ni Suwa. Yo mataˈlifto ko kadaponohan ningra a romiˈad i, malahakelong cingra ato widang ningra ci Hira o Atulam a tamdaw a tayra i Timna, tayra toya matayal a misayit to fanoh no siri ningra a tamdaw. ¹³ Ira ko pasowalay ci Tamaran to “iraay ko wama no faˈinay iso i Timna a misayit to fanoh no siri,” saan. ¹⁴ Saka, helong han ningra kono maponengay a rikoˈ, taepoen ningra to tapodo ko pising ningra, maroˈ cingra i sakatayra i Timna a ˈadawang no Inaim a niyaroˈ, samanen mafanaˈto cingra to nika malakapahto ni Sila, ˈarawhan caayho patayraen no wama ci Sila a miala cingraan a palafafahi ningra. ¹⁵ Yo maˈaraw ni Yuta cingra i, mitahepoan ningra ko pising ningra, nao tasalamaan a fafahiyan cingra saan. ¹⁶ Tayra sa cingra i lawac no lalan a milicay cingranan, “Madadiˈi kita,” han ningra. Caay ka fanaˈ ci Yuta to nika o kadafo ningra cingra. Sowal sa ci Tamar: “Ano midiˈi kiso i takowanan i, o maan ko sapafeli iso i takowanan saw?” ¹⁷ Pacaˈof sa ci Yuta: “Alaen ako nai masafelaway a siri ako ko cecay a toforho a siri a pafeli i tisowanan.” Sowal sa ci Tamar: “Ano hatira i, iˈayaw no pipatayni iso toya siri i, ngaˈay sidayen itini ko sapatampo iso a lalosidan han?” ¹⁸ Sowal sa ci Yuta: “O maan ko kangalayan iso a sapatampo ako saw?” Pacaˈof sa ci Tamar: “O sarinaˈ iso ato kaos nira ato cokor iso.” Saka, pafeli hanto ni Yuta ci Tamar tonini a lalosidan a maemin. Madadiˈito cangra, ta cipuyapuyto cingra to wawa ni Yuta. ¹⁹ Ikorto i, miliyasto cingra, helongento ningra koya satahepo ningra to pising a tapodo, ta cirikoˈ haca cingra tono maponengay a rikoˈ.

SAKA 5 FOLAD 18-24 ROMIˈAD

O ODOˈ KO KIMAD NO KAWAS | SATAPANGAN 40-41

“Milidongan ni Yihofa ci Yosif”

(Satapangan 41:9-13) Itiya i, sowal sa ci Falawan koya kakeridan no patakiday: “Maharatengto ako anini ko patelac ako. ¹⁰ Iˈayaw yo maketer kiso Falaw i takowanan o matayalay iso, rofoen kako ato kakeridan no patahkaay i pirofoan i lomaˈ no misimaway to hongti. ¹¹ Yo cecay a dadaya cinitiih kami a tatosa, caay ka lecad ko tatodong no nitiih niyam. ¹² Itiya i, ira ko cecay a marofoay a kapot niyam a Hipray a kapah, nano matayalay no kakeridan no misimaway to hongti cingra. Pasowalen niyam cingra to nitiih niyam, tadtadan ningra ko tatodong no nitiih niyam. ¹³ Soˈlinay, madoedo a malaheci koya nitadtadan ningra a nitiih, mapatikol kako a pakatayal, caˈiten iso a mipatay koya kakeridan no patahkaay.”

w15 2/1 14 fiedac 4-5 fatac

“O Pitadtad to Tatodong no Nitiih i, Coko Nai Kawasay Saw?”

Soˈliˈlin matawalay noya kakeridan no patakiday ci Yosif, kawra cowa ka tawal ci Yihofa. To cecay dadaya, panitiihan no Kawas ci Falaw to tosa kafahkaˈan a nitiih. Itini saka cecay nitiih, maˈaraw ni Falaw ko papito masoesoay a tawinaan a kolong, masadak nai Nayil a ˈalo, ikor i, iraay ko papito mangiriway tadancaay a tawinaan a kolong, ora tadancaay a tawinaan a kolong mitaˈmoday toya masoesoay a tawinaan a kolong. Itini saka tosa nitiih i, cinitiih ci Falaw to cecay tapangan no emi, pito ko minaroˈan nira, doedo sa i, taˈmoden noya pito a matepesay a minaroˈan koya pito a kimoolay ko heci a minaroˈan. Dafak sato i, marawraw ko falocoˈ noya hongti a caay ka rihaday, saka, ocoren ningra ko tamdaw a papisaˈopo to polong no cikawasay no Icip ato mafanaˈay a miˈdaw to fuˈis a tamdaw a patayni i kaˈayaw ningra, kawra cowa pakatadtad cangra. (Satapangan 41:1-8) Haratengen hena, samaamaanen, cowa ko papakatadtad cangra tora nitiih. Nengneng han ni Falaw cangra, tada matoled ko falocoˈ ningra, nanay kaliki ira ko tamdaw mamitadtad toniya nitiih saan.

Itiya, maharatengay noya kakeridan no patakiday ci Yosif! Talipaˈelalay ko falocoˈ ningra, pasowal hanto ningra ci Falaw, ta marofo cingra ˈayaw no tosa miheca i, iraay ko matanengay a kapah misaheciay a mitadtad to nitiih ningra ato nitiih noya kakeridan no patahkaay. Maharek ci Falaw mitengil, tangsolay miocor to tamdaw tayni i kapalitan mitelay ci Yosifan.—Satapangan 41:9-13.

(Satapangan 41:16) Pacaˈof sa ci Yosif ci Falawan: “Hongtiaw, caay ka fanaˈ kako a misaheci to nitiih! O Kawas ko sasomowal to pakayniay i tisowanan a demak.”

(Satapangan 41:29-32) O aira ko pito a kadofahay a mihecaan itini i polong no kitakit no Icip. ³⁰ Doedo sa i, o aira ko pito a makedalay a mihecaan. O mamapalahorac no kedal ko polong no kitakit no Icip, ta matawalto no tamdaw ko nika kadofah no mihecaan iˈayaw. ³¹ Tona tataˈang ko kedal saka, caayto ko mamaharateng no tamdaw ko nika kadofah no mihecaan iˈayaw. ³² O matiniay a nitiih kinatosaay ci Falaw a talatiih, o pahapinang no Kawas to nipiketon Ningra to falocoˈ a milaheci to nisahalakaan Ningra, o kakalamkam Cingra a midemak tonini.

w15 2/1 14-15 fiedac

“O Pitadtad to Tatodong no Nitiih i, Coko Nai Kawasay Saw?”

Ci Yihofa tangongolay ko nika olah ningra to misapoeneray mitadiˈecay Cingranan a tamdaw. Mihaenay papakaynien ci Yosifan, ao cowa koyanan cikawasay no Icip ato saysi no Icip, papitadtad to nitiih. Pasowalan ni Yosif ci Falaw, ora tosa nitiihan ningra, soˈlinay a tatodong i, o cecayay. Pitoay a masoesoay a tawinaan a kolong ato pitoay a kasasolsol no ˈakawangay a ˈemi mitaypiyaway to Icip, wa ira ko pitoay a miheca to kadofahay a ˈorip. Pitoay a mangiriway a tawinaan a kolong ato pito masolsolay, mayofay no fali maˈicangayto a ˈemi, mitaypiyaway to ikor, wa ira ko pito a miheca to makedalay a mihecaan. Oniya taˈangayay a makedalay maedengay a maemin mataˈmod nira ko sera. Ci Yihofa pakacinitiihen ci Falaw to tosa a nitiih, o pahapinang no Kawas to nipiketon to falocoˈ a milaheci to nisahalakaan Ningra.—Satapangan 41:25-32.

(Satapangan 41:38-40) Saka, sowal sa ci Falaw toya matayalay ningra tapatapang: “O ˈicel no Kawas iraay i cingranan, icowaho kita a mikilim to malecaday cingranan a tamdaw saw? ³⁹ Sowal sa ci Falaw ci Yosifan: “Tona o nipasifanaˈan no Kawas kiso to polong nonini a demak saka, caay ka eca ka ikaka no nimanima ko nika citaneng ato nika fanaˈ iso. ⁴⁰ Patirengen ako kiso a papikowan to kitakit ako, papihakelongen ako ko polong no finawlan to limoˈot iso. Itini i polong no kitakit i, edeng kako a cecay ko ikakaay iso ko sakowan.”

w15 2/1 15 fiedac 3 fatac

“O Pitadtad to Tatodong no Nitiih i, Coko Nai Kawasay Saw?”

Matooray ni Falaw ko sowal ningra, tangsol pacaˈedongen to safangcalay a nisangaˈan to keliw a kafafang, pacangawen to ekim ko liˈel ato pafatien cingra, pakamaroˈen ningra ci Yosif i saka tosa a paliding no hongti, patoroden ci Yosif papikowan to polong no Icip. (Satapangan 41:42-44) To dafak nao marofoayho ci Yosif, tahadadayato i, malo tapangayto i salaeno ni Falaw. Ilalomaˈ no cecay a romiˈad ci Yosif naitini i pirofoan malinah tayra i lomaˈ no hongti, oniniya teloc ihekalay misawacay, mitiˈer ci Yosif ci Yihofaan coko tada o matatodongay a demak han? Pinaayto miheca tahacada ci Yosif to cowa ka sadafdaf a demak, ˈarawhan cipinangay to demak ci Yihofa, itiniay i matatodongay a tatokian tano sangaˈayay a pakayraan palifon ci Yosifan. Ora maharatengay Ningra cowa ko sapipadamaaw ci Yosifan aca miliyas to pasangar, hanaca miharatengayho Cingra to sapidipotaw to teloteloc ni Israil, padama cangranan malo taˈangayay a kitakit. Toha sakafanaˈaw to ikor a noka lingad no demak, padadotocen miˈosi koni lalakaw.

Kadkaden ko Odoˈ no Sinael

(Satapangan 41:14) Saka, tahidangen ni Falaw ci Yosif a patayra. Caloh sato cangra a pasadak ci Yosifan nai pirofoan. ˈIsˈisen ni Yosif ko ngisngis, falicen ningra ko rikoˈ ningra, ta tayra i kaˈayaw ni Falaw.

w15 11/1 9 fiedac 1-3 fatac

Mafanaˈay Kiso Han?

Ci Yosif ˈayawho mamisoˈaraw ci Falawan i, hano ˈisˈisen ningra ko ngisngis ato mipaylaw to fongoh hani?

O matiliday i Satapangan, marawraway ci Falaw to nitiih ningra, saka corcoren ko tamdaw tangsol miala ci Yosifan, nai pirofoan tayra i kaˈayaw ningra, papitadtad to nitiih ningra. Itiya i, pinaayto a mihecaan mapalit i pirofoan ci Yosif. Soˈlin macalohay ko satahidang ni Falaw, kawra mipalakayho to toki ci Yosif mipaylaw ato miˈisˈis. (Satapangan 39:20-23; 41:1, 14) Oniniya matiliday hato cowa ko maanan, ˈarawhan mikitini mahapinangay to tada mafanaˈay to pinangan no Icip kora mitiliday toni demak.

O ˈalomanay nolitengan kitakit, iraay ko nanaman no faˈinayan cingisngis, ano Hipray tamdaw mahaenay. Nikawrira, o cecay cudad (Mitilidan ni Maykelintok aci Strong a Hakak Cudad no Fangcalay Cudad) somowalay, “o nolitengan a Icip itini i kawali no Iwropa a kitakit, edengan o cowa ka cingisngis a fanacadan.”

Misoˈaraw ci Yosif ci Falawan, o piˈisˈis aca to ngisngis han? Oya Mikakingkiway to Likisi no Fangcalay Cudad somowalay, itni i nolitengan a Icip, o faˈinayan ano misoˈaraw ci Falawan, ˈayaw nora oha mamidoedo to lisin ato pinangan, mahecaday toha mamicomod i sefi nangra. Mankora, ta tayra ci Yosif i kaˈayaw ni Falaw, cowa ko mamipaylaw ato miˈisˈis aca cingra, oha mamiˈisˈisho to fanoh no tireng sanay.

(Satapangan 41:33) “Nohatini, o papiliˈen iso Falaw ko matanengay mafanaˈay a tamdaw, patirengen cingra a papikowan to Icip.”

w09 11/15 28 fiedac 14 fatac

O Sikawdan no Kawas Iraay ko Mikangodoay ato Fangcalay a Waywayan

¹⁴ Itini i lintad no Fangcalay Cudad, o midokoay to Kawas a wama wina, itini i lomaˈho pasifanaˈay to wawa minanam to mikangodoay a waywayan. Itini i Satapangan 22:7, maˈosiay ita ci Apraham ato wawa ci Isak, ano caciyaw cangra patahkalay to mikangodoay. Macadaay ni Yosif ko ngaˈayay a pipananam no wama wina. Tiya marofo ci Yosif i, patahkalay to mikangodoay to romaroma a marofoay tamdaw. (Satapangan 40:8, 14) Ora kasasowal ningra aci Falaw patahkalay, to mafanaˈay cingra misamaann a masasowal ato ˈakawangay ko saaroˈan a tamdaw.—Satapangan 41:16, 33, 34.

Miˈosi to Sinael

(Satapangan 40:1-23) Nanoya, ciraraw ko kakeridan no patakiday ato kakeridan no patahkaay no hongti no Icip. ² Maketer ko hongti toya kakeridan no patakiday ato kakeridan no patahkaay, ³ saka, rofo hanto cangra i lomaˈ no kakeridan no misimaway to hongti, mapakapot cangra ci Yosifan a marofo. ⁴ Papidipoten noya kakeridan no misimaway to hongti ci Yosif toya tatosaay a tapang, halafin cangra a marofo itira. ⁵ Yo cecay a dadaya cinitiih koya kakeridan no patakiday ato kakeridan no patahkaay i pirofoan, caay ka lecad ko tatodong noya nitiih nangra a tatosa. ⁶ Dafak sato tayra ci Yosif a minengneng cangranan i, mahapinang ningra ko nika kesem no falocoˈ nangra. ⁷ Saka, licayen ningra koni tatosa marofoay a tapang ni Falaw: “Nawiro makesem kamo anini saw?” ⁸ Pacaˈof sa cangra: “Cinitiihay kami a tatosa, nikawrira, awaay ko mafanaˈay a mitadtad to tatodong no nitiih niyam.” Sowal sa ci Yosif i cangranan: “O pitadtad to tatodong no nitiih i, coko nai Kawasay saw? Dada, pasowalen kako toya nitiih namo.” ⁹ Saka, sowal sa koya kakeridan no patakiday ci Yosifan: “Maˈaraw ako i nitiih ko cecay a tapangan no fadisosoˈ a kilang i kaˈayaw ako, ¹⁰ tolo ko caˈang noya kilang. Cicoˈong koya caˈang i, tangsol cifalo, ta tangsol a marohem ko heci nira. ¹¹ Mitatoy kako to takid ni Falaw, alaen ako koya fadisosoˈ a mihetec ko salang a miparo i takid, ta patakiden ako ci Falaw.” ¹² Sowal sa ci Yosif cingranan: “O tatodong nonini a nitiih iso i, oya tolo a caˈang i, o todong no tolo a romiˈad. ¹³ Ikor no tolo a romiˈad i, o tatedalen ni Falaw kiso a pasadak, ta palololen ningra kiso a pakatayal, matiyato toya iˈayaway a malakakeridan no patakiday ni Falaw kiso. ¹⁴ Ano malaheci i tisowanan konini a demak a maemin i, nanay haratengen kako, patahkal to madimadiay a olah i takowanan, patadoen kako a somowal i kaˈayaw ni Falaw, padangen kako to sakasadakaw ako tonini a pirofoan. ¹⁵ Nawhani, o nirepetan kako i kitakit no Hipray a tamdaw a patayni, ano itinito i Icip i, awaay ko maan aca a tatiihay a demak ako to sakarofo ako.” ¹⁶ Mahapinang noya kakeridan no patahkaay ko nika ngaˈay no pitadtad ni Yosif, sowal sa ci Yosifan: “Kako ko roma a cinitiihay. Ira ko tolo a katapar a epang i fongoh ako, ¹⁷ oya pakafaed a katapar i, o nidohdohan a masamaamaanay a epang to malo kakaenen ni Falaw, ira ko maeferay a ˈayam a komaen toya epang.” ¹⁸ Sowal sa ci Yosif, “O tatodong nonini a nitiih iso i: Oya tolo a katapar todong no tolo a romiˈad. ¹⁹ Ikor no tolo a romiˈad i, o lalifongohen ni Falaw kiso, ta caˈiten ningra i kilang ko tireng iso, o tatayni ko maeferay a ˈayam a komaen to tireng iso.” ²⁰ Irato ko tolo a romiˈad, ta o kahofocan ni Falaw. Patahkaen ningra maˈacang ko polong a matayalay a tapang ningra, itini i kaˈayaw nangra pasadaken ningra koya kakeridan no patakiday ato kakeridan no patahkaay. ²¹ Palololen ningra ko tayal noya kakeridan no patakiday, matira i ˈayaway a patakid ci Falawan. ²² Oyato a kakeridan no patahkaay mahaen o pitadtad ni Yosif, caˈitan ni Falaw a mipatay. ²³ Nikawrira, caayto ka harateng noya patakiday ci Yosif, matawalto ningra cingra.

SAKA 5 FOLAD 25-31 ROMIˈAD

O ODOˈ KO KIMAD NO KAWAS | SATAPANGAN 42-43

“Patahkalay ci Yosif to Taˈangayay a Noka Piˈimer”

(Satapangan 42:5-7) Saka, tayra sato ko wawa ni Yakop ato romaroma a tamdaw a micakay to kakaenen, samanen tangasaayto ko kedal i Kanan. ⁶ Tona o ci Yosif ko mikowanay to Icip, saka, cingrato ko citodongay a pacakay to kakaenen to tayniay a naicowacowaay a tamdaw. Tayra ko salikaka ni Yosif i kaˈayaw ningra, hinokop sa cangra i sera a mitaˈong. ⁷ Maˈaraw ni Yosif ko kaka i, mahapinang ningra cangra. Kawrira, satalifokifokil han ningra cangra, sacaedes han ningra a milicay cangra: “O nani cowaay kamo?” Pacaˈof sa cangra: “O nani tiraay i Kanan kami a tayni a micakay to kakaenen.”

w15 5/1 13 fiedac 5 fatac

“Mangaˈay Kako Mitisod to Kawas Saw?”

Samaanay ci Yosif hani? Tangsolay mahapinang ningra ko kaka! Tiya mitaˈong cangra i cingranan i, “maharateng ni Yosif koya nitiih ningra isaˈayaw”. Kaemangho cingra i, panitiihan ni Yihofa cingra maˈaraw ko kaka a mitaˈong cingranan, nohatini sato, malaˈosiay kora nitiih! (Satapangan 37:2, 5-9; 42:7, 9) Sasamaan ko demak ni Yosif hani? O papatalahkalen ningra to cima cingra han? Anca papaˈodisen ningra cangra han?

w15 5/1 13 fiedac 7 fatac

“Mangaˈay Kako Mitisod to Kawas Saw?”

Itini i kaˈorip ita, latek cowa ka tahalifa kiso to matiniay mikiriwiˈy a pakayraan. Kawra, o paro no lomaˈ anini o masasontolay ato malacinowasay demak tada matenakay. Ano tahasiˈayaw kita to hatiniay a pakayraan i, madoloay a maˈimer no keter, saolatekay sato ko demak. Ano todongen ita ci Yosif, misahapinapinang to papisamaanay ko Kawas kitanan a misalof to demak i, coko citanengay han? (Taneng 14:12) Aka a mapawan, o kararihaday ita to paro no lomaˈ manaokaniw masaka limlaan, kawra o nika lalaˈed ita aci Yihofa aci Yisan mikikakaay ko nika masaka limlaan.—Matay 10:37.

(Satapangan 42:14-17) Pasowal ci Yosif i cangranan: “Mato o sowal ako i honi, soˈlinay o sepay kamo! ¹⁵ Lifeten ako kamo. Toroˈen ako ko ngangan ni Falaw a miketon to sowal, ano caay pataynien namo koya sasafaay a safa namo i, caay papiliyasen ako kamo. ¹⁶ Ocoren ko cecay namo a papiala cingranan a patayni, o romaroma i, kaitinito i pirofoan, talaenho ako ko nika soˈlin no nisowalan namo. Ano caay i, toroˈen ako ko ˈorip ni Falaw a miketon to sowal, o sepay kamo a maemin,” ¹⁷ Saka, rofoen ningra cangra to tolo a romiˈad.

w15 5/1 14 fiedac 1 fatac

“Mangaˈay Kako Mitisod to Kawas Saw?”

Misatapang ci Yosif a mipalifet to salikaka, minengneng to samaanayto ko falocoˈ nangra. Satapang i, celiˈ han ningra ko kaka, tano micoyakay a tamdaw, pakokot cangranan to naitiniay i roma kitakit a sepay cangra. Toha sapaihkalaw to o ngaˈayay tamdaw cangra, papipasowalan to paro no lomaˈ nangra, pasowal cangra to iraayho ko sasafaay nangra i lomaˈ. Miemetan ni Yosif ko hemek no falocoˈ, maˈoripayh ko safa ako saan a miharateng! Oraanto i, mafanaˈayto to sasamaanen ningra cangra. sowal sa cingra: “Lifeten ako kamo”, alaen patayni koya safafaay namo. Ikor, mihayay ci Yosif masiday ko cecay nangra, papipanokay to romaroma, miala to sasafafay nangra.—Satapangan 42:9-20.

(Satapangan 42:21, 22) Sasowasowal sa cangra: “O ˈilo ita konini, kariˈangen ita ko safa ita iˈayaw, maˈaraw ita ko pisemsem ningra, mingitangit cingra i titaanan i, caay pikihar kita i cingranan. Orasaka, o lafo ita konini a pades.” ²² Sowal sa ci Riupin: “Aka pikariˈang tora wawa han ako kamo i, caay pitengil kamo, anini o papatikolen ita konini a tadah to nipipatay ita cingranan.”

it-2 1077 fiedac 4 fatac

Yosif

Pakayni to nika lingad no demak, maˈarawto no salikaka ni Yosif, mipacakay cangra to safa malakuli, nohatini maedeng milepelay ko Kawas to tadah no pipatay nangra ci Yosifan sato. Cowaho pakahapinang ci Yosifan, saka itini sa ikaˈayaw ningra somowal to raraw no niyah. Mikitini i sakasasowal nangra mahapinangay ni Yosif ko pipasasiyor nangra, masemer ko falocoˈ ni Yosif, hato liyas saan cangranan a tomangic. Ta patikolto cingra palimoˈoten ko tamdaw papipalit ci Simiyonan, tangsa mapatayra nangra ko sasafafa nangra.—Satapangan 42:21-24.

Kadkaden ko Odoˈ no Sinael

(Satapangan 42:22) Sowal sa ci Riupin, “Aka pikariˈang tora wawa han ako kamo i, caay pitengil kamo, anini o papatikolen ita konini a tadah to nipipatay ita cingraan.”

(Satapangan 42:37) Sowal sa ci Riupin ciwamaan ningra: “Ano caay panokayen ako ci Pinyamin i, ngaˈayto a patayen iso koya tatosa a wawa ako. Patorod han i takowanan ko safa ako a papidipot, caay ka eca ka alaen ako a panokay cingra.”

it-1 991 fiedac

Riupin

Sapipatayaw ko kaka ci Yosifan, tekol han ita toni maˈicangay a tefon han ni Riupin koya sasiwa safa ningra. Tikolen ako miala paˈorip ci Yosif na saan ko harateng ni Riupin. Itini toniya demak, patahkalay ci Riupin to ngaˈayay a capeling.” (Satapangan 37:18-30) Ikor no 20 miheca, tayra i Icip kora malikakaay, pakokoten ni Yosif to o tayraay a misolap cangra, nao lafo nangra tona pikariˈang ci Yosifan saanto a miharateng cangra. Pasowalen ni Riupin to cowa pikihatiya cingra i cangranan a mikariˈang ci Yosifan. (Satapangan 42:9-14, 21, 22) Ikorto i, cowa ka kahi ci Yakop papihakelong ci Pinyaminan tayra i Icip, ci Riupinto i, tano tatosa wawa ningra a miketon to sowal, sowal sa: “Ano caay panokayen ci Pinyamin i, ngaˈayto a patayen iso koya tatosa a wawa ako.”—Satapangan 42:37.

(Satapangan 43:32) Cecay koni Yosif a kamaroˈan a tahka, cecay kono salikaka ningra a kamaroˈan a tahka. Cecay kono mikapotay a Icip a tamdaw a tahka. Itiya o Icip a tamdaw cowa ka kahi mikapot to Hipray tamdaw a mitahka, samanen manaˈayay ko Icip a tamdaw toni.

w04 1/15 29 fiedac 1 fatac

Kalimlaan no Satapangan—II

43:32—Misamaanay hano manaˈay ko Icip mikapot a mitahka ato Israil tamdaw hani? Ora sakakaay lalangian i, tona misakakinihay to pihakelongan ato finacadan alatek. O romasa i, manaˈayay to pakaenay to siri ko Icip tamdaw. (Satapangan 46:34) Misamaanay hani? Samanen tada masalaenoay ko saaroˈan no mipakaenay to siri a tamdaw itini i Icip. Hanaca, ngaˈayay pamatangen a sera i Icip cowa ka adihay, hato malikafay ko Icip tamdaw to milesapay a mikilim to rengorengos a tamdaw.   

Miˈosi to Sinael

(Satapangan 42:1-20) Matengil ni Yakop ko nika ira i Icip ko kakaenen, saka, sowal sa cingra to wawa ningra, “Nawiro caay pisaharaterateng kamo saw?” ² O katengilan a sowal i, ira i Icip ko kakaenen saan, katayra kamo a micakay to kakaenen, ta caay ka patay kita to cahiw.” ³ Saka, tayra i Icip a micakay to kakaenen koya mamoetepay a salikaka ni Yosif. ⁴ Nikawrira, caay papitooren ni Yakop koya tada safa ni Yosif ci Pinyamin a papihakelong cangranan. Somowal ci Yakop: “Matalaw kako to pikariˈang no tao cingranan a mapatay.” ⁵ Saka, tayra sato ko wawa ni Yakop ato romaroma a tamdaw a micakay to kakaenen, samanen tangasaayto ko kedal i Kanan. ⁶ Tona o ci Yosif ko mikowanay to Icip, saka, cingrato ko citodongay a pacakay to kakaenen to tayniay a naicowacowaay a tamdaw. Tayra ko salikaka ni Yosif i kaˈayaw ningra, hinokop sa cangra i sera a mitaˈong. ⁷ Maˈaraw ni Yosif ko kaka i, mahapinang ningra cangra. Kawrira, satalifokifokil han ningra cangra, sacaedes han ningra a milicay cangra: “O nani cowaay kamo?” Pacaˈof sa cangra: “O nani tiraay i Kanan kami a tayni a micakay to kakaenen.” ⁸ Mafanaˈ ci Yosif to salikaka ningra, nikawrira, caay ka fanaˈ ko salikaka ningra i cingranan. ⁹ Tangsol maharateng ni Yosif koya nitiih ningra pakayni cangranan: “O spay kamo, o misolapay kamo a mihapinang to kitakit ako!” ¹⁰ Pacaˈof sa cangra: “Tapangaw, caay ko spay kami, o mamicakay to kakaenen ko saka tayni niyam.” ¹¹ O malikakaay kami a maemin, caay ko misamangahay a tamdaw kami, caay ko spay kami!” ¹² Pasowal han ni Yosif cangra: “Caay! O misolapay kamo a mihapinang to kitakit niyam!” ¹³ Sowal sa cangra: “Tapangaw, nao tosaay ko safaw kami a malikaka, o cecayay ko wama niyam, ira i Kanan a maroˈ cingra. Ira ko cecay a safa niyam to mapatayayto, iraho ko sasafaay a safa niyam, ira i ciwamaan niyam.” ¹⁴ Pasowal haca ci Yosif cangranan: “Caay! Mato sowal ako i honi, soˈlinay o spay kamo! ¹⁵ Lifeten ako kamo. Toroˈen ako ko ngangan ni Falaw a miketon to sowal, ano caay pataynien namo koya sasafaay a safa namo i, caay papiliyasen ako kamo. ¹⁶ Ocoren ko cecay namo a papiala cingranan a patayni, o romaroma i, kaitinito i pirofoan, talaenho ako ko nika soˈlin no nisowalan namo. Ano caay i, toroˈen ako ko ˈorip ni Falaw a miketon to sowal, o spay kamo a maemin,” ¹⁷ Saka, rofoen ningra cangra to tolo a romiˈad. ¹⁸ Saka tolo a romiˈad i, sowalen ni Yosif cangra: “O mangodoay kako to Kawas, ano midoedo kamo to sowal ako i, caay pipatay kako i tamowanan. ¹⁹ Ano soˈlinay cowa pisamangah a tamdaw kamo, sidayen ko cecay namo to malo tatefocen, o romaroma i, ngaˈayto a minokay, alaen a panokay koya nicakayan namo a kakaenen a pafeli toya macahiwayto a paro no lomaˈ namo. ²⁰ Ta alaen a patayni i takowanan koya sasafaay a safa namo. Ano haenen namo i, mahapinangto ako ko nika soˈlin no sowal namo, ta caayto ka patay kamo.” Saka, hai sato cangra tonini a sowal.