Pinengnengan to lalakaw no Mitosilay ato Nikaˈorip Rayray no Saˈopo
SAKA 7 FOLAD 6-12 ROMIˈAD
O ODOˈ KO KIMAD NO KAWAS | KASADAKAN 6-7
“O Mamaˈaraw Iso ko Demak Ako ci Falawan”
(Kasadakan 6:1) Pasowal ci Yihofa ci Mosian: “Nohatini o mamaˈaraw iso ko demak Ako ci Falawan. O ciˈicelay a kamay Ako papaciecien cingra pasadak cangranan, milaplap cangranan papiliyas to kitakit ningra.”
(Kasadakan 6:6, 7) “Orasaka, pasowalen iso ko Israil tamdaw: ‘Ci Yihofa Kako. O tatedalen Ako kamo a paliyas to piroero no Icip tamdaw, naitira cangranan milidong tamowanan. O tatano ciˈicelay a kamay Ako misakareteng a mitefoc to Icip tamdaw, milidong tamowanan. 7 O cacadaen no Mako kamo malo finawlan Ako, o mamala Kawas namo Kako. O mamafanaˈ kamo to ci Yihofa Kako o Kawas namo, o Kako ko paliyasay tamowanan to piroero no Icip.
it-1 1125 fiedac 6 fatac
Mosi
Iraay ko kafalic no Israil tamdaw nohatini. Isalakat micadaayho cangra to misadakan ni Mosi a tahapinangan, kawara sakaretengen ni Falaw ko tayal nangra i, satapang cangra ngaliwngiw, miroroh ci Mosian. Tada matoleday ci Mosi, hato pasayniay ci Yihofaan a misaali to sapadama. (Kasadakan 4:29-31; 5:19-23) Mihinoman noya Satakaraway ci Mosi, paihekal to papalaoˈsien Ningra ko mitalaan ni Apraham, ni Isak aci Yakop a demak, to lalidongen ko Israil tamdaw, kakeriden cangra micomod to Mikiokan a Pala, pala taˈangayay a kitakit cangra, mihaenay a mapatalasekal ko tatodong no ngangan ni “Yihofa”. (Kasadakan 6:1-8) Tahatini i, cowaho pitengil ko Israil tamdaw to sowal ni Mosi. Kawra tayra i saka siwa a pades i, midamaayto cangra ci Mosian, mitoor to demak ningra. Telocto i, matefadto ko saka moetep a pades i, hato kalikiayto ci Mosi a milikakawa cangranan, kayaten cangra nai Icip masierod a masadak.—Kasadakan 13:18.
(Kasadakan 7:4, 5) Nikawrira, cowa ko mamitengil ci Falaw tamowanan. O lalayaˈen Ako ko kamay a miˈodis to Icip. Pakidemen Ako mitefoc ko Icip tamdaw, mikerid to masafelengay a finawlan no Mako miliyas to Icip. 5 Ano milayaˈ Kako to kamay a miˈodis to Icip, mikerid to Israil tamdaw naitira cangranan a miliyas i, o mamafanaˈto ko Icip tamdaw to ci Yihofa Kako.”
it-1 1125 fiedac 4-5 fatac
Mosi
Misiˈayaw to Hongti no Icip. Misiˈayaw ci Mosi aci Aron ci Falawan, itini toni “kalalood no kawakawas” mitamorongay cangra to kalimlaan a saaroˈan. Matahidangay tayra ko saysi no misakawasay no Icip, oya kakeridan i, halatek o “ci Yanis aci Yampris” hananay a tamdaw. (2 Timoti 3:8) Misaˈopoan ni Falaw ko polong a ˈicel no kawas no Icip, miˈodis to ciˈicelay a Yihofaan, palimoˈotan ni Mosi ci Aron midemak ko saka cecay a kafahkaˈan, misawacay to ikakaay ko ˈicel ni Yihofa to kawakawas no Icip, ˈarawhan ˈatekakayho ko falocoˈ ni Falaw. (Kasadakan 7:8-13) Ikor, tiya matefad ko saka tolo a pades i, ano o saysito no Icip mapacieciay a mihayi: “Ono Kawas a nidemakan konini!” Sanayto cangra. O pades no malifawaay a mapoces tada taˈangayay ko pisetiˈ to saysi no misakawasay, itini i kaˈayaw ni Falaw cowa ka pakalowid ci Mosian.—Kasadakan 8:16-19; 9:10-12.
O pades hananay i, pasapinangay to midofdofay anca koesitay ko tamdaw. ˈAyaw no mamafekad ko moetepay pades i, ci Mosi aci Aron paliˈayaway milasil to o manan ko aaira. Mahacecayto a mafekad ko pades i, mahaenay o nilasilan nangra, misawacay to o taypiyaw ni Yihofa ci Mosi. O fangcalay ngangan ni Yihofa, mapalosiyangay i Icip, kalasowalan no tamdaw. Oni ngangan i, papidofdofay to tamdaw, pakoesitay to romaroma tamdaw. O Israil tamdaw ato papinapina a Icip tamdaw, midofdofay mitengil, ˈarawhan ci Falaw ato matayalay ningra a tapatapang malo koesitay ko falocoˈ a tamdaw. (Kasadakan 9:16; 11:10; 12:29-39) Mafanaˈayto ko Icip a tamdaw, cowa ko kawas nangra ko mipadesay cangranan, ao ci Yihofa ko misawkitay cangranan. Matefadto ko saka siwa pades ikor, ‘ci Mosi itiniay i Icip, i kaˈayaw ni Falaw ato tapatapang matayalay ningra, malo tadamaanayto a tamdaw’ ci Mosi.—Kasadakan 11:3.
Kadkaden ko Odoˈ no Sinael
(Kasadakan 6:3) Itiya:ho tano tadaciˈicelay a Kawas a saaroˈan Kako mipaˈaraw ci Aprahaman, ci Isakan, ci Yakopan, kawra o ngangan Ako “ci Yihofa”, caayho ka fanaˈ cangra.
it-2 45 fiedac 7-8 fatac
Tadaciˈicelay a Kawas
Mikiˈokan ni Yihofa ci Apraham to mamahofoc to faˈinayan wawa, pangangan ci “Isak” han cingra, ci Apraham taˈangayay to nika pitiˈer no falocoˈ, pakasoˈlin to ˈicel no Kawas to papalaˈosi toniya sakiˈok. Itiya i, “tadaciˈicelay a Kawas” (ʼElʹ Shad·daiʹ) sanay ci Yihofa somowal to Niyahan. Ikorto i, mipiliˈan no Kawas ci Isak aci Yakop, milayap tonini katatelekan ni Apraham, tiya palemeden no Kawas cangra i, o “tadaciˈicelay a Kawas” hananay no Fangcalay Cudad somowal ci Yihofaan.—Satapangan 17:1; 28:3; 35:11; 48:3.
Saka, pakayni toniniyan, ikor pasowal ci Yihofa ci Mosian i: “Itiya:ho tano tadaciˈicelay a Kawas [beʼElʹ Shad·daiʹ] a saaroˈan Kako mipaˈaraw ci Aprahaman, ci Isakan, ci Yakopan, kawra o ngangan Ako ‘ci Yihofa’, caayho ka fanaˈ cangra.” (Kasadakan 6:3) Tatodong noniya sowal, caay ka fanaˈ ko kakitakitaan to ci “Yihofa” ko ngangan no Kawas, cowa ka saan, samanen cangra ato itiyaayho a tamdaw marariday a kalasaka dademak toniya ngangan. (Satapangan 4:1, 26; 14:22; 27:27; 28:16) Soˈlinay haw i, tiya somowal ko Satapangan to likisi noniya kakitakitaan i, “tadaciˈicelay” sanay a sowal kina enemay a masadak, kawra “Yihofa” hananay a ngangan kina 172 a masadak. Nikawrira, orira kakitakitaan soˈlin matinakoay nangra to citatodongay ko Kawas tora “tadaciˈicelay” sanay a sapangangan, kawraan cowaho ka mahapinang nangra ko tangongolay a tatodong noniya “Yihofa” hananay a ngangan. Pakayni toniniyan, o cecay Citing no Fangcalay Cudad (Vol. 1, p. 572): “Itiyaho o sapatemer no Kawas to kakitakitaan, milingatay to noikoran a sakiˈok, pakasoˈlinay cangra to o tadaciˈicelay ci “Yawi” hananay a Kawas (ʼel), iraay ko ˈicel (tatodong o sadday no Padaka hananay) palaˈosi tora sakiˈok. Tiya patalahkal ci Yawi i cekacekaan i, tada o kasemeran no falocoˈ, o ˈicel Ningra ato nika pikapot Ningra ato kakitakitaan, o wacay konini, o kafanaˈan nangra koniya ci “Yawi” hananay a Kawas.—Edited by J. D. Douglas, 1980.
(Kasadakan 7:1) Pasowal ci Yihofa ci Mosian: “Papikotayen Ako kiso i Takowanan i kaˈayaw ni Falaw, ta matiya o Kawas kiso. O kaka iso ci Aron i, papatado tisowanan a pasadak to sowal.
it-1 1125 fiedac 1 fatac
Mosi
Cowa ka fanekfeken ko falocoˈ ni Mosi to sapatorod a karetengay a ˈinorong. Cowa ka fanekfeken ci Mosi toniya ˈinorong, maomoyay kako sanay a milalang. ˈAyaw noni to 40 miheca, na paˈoripay ci Mosi to cecay Israil tamdaw, nohatini cowa ka hecad to itiyaayho cingra. Saliyaliyaw sanay milalang cingra, ikor papikotayen ko tao takowanan sanay a misaali to Kawas. Maketeran nanay ko Kawas. ˈArawhan, cowa ka piocor to roma a tamdaw ko Kawas, miocoran to kaka ni Mosi ci Aron malo ngoyos ningra, mikotay cingranan a pasowal. Tona o taypiyaw no Kawas ci Mosi, mankora o “Kawas” ni Aron hanto cingra. Ano nengnengen i, tiya misiˈayaw ci Mosi aci Aron to malohemay malitengay no Isaril, ato misiˈayaw ci Falawan i, pasowalan no Kawas ci Mosi to sapalimoˈot, oraanto i, pasowalan ni Mosi ci Aron, mansa ikaˈayaw ni Falaw, o ci Aron ko pasowalay (oniniya Falaw oyanan midotocay toya ˈayaw no 40 miheca tiya milaliw to Icip ci Mosi a Falawan). (Kasadakan 2:23; 4:10-17) Pasowal ci Yihofa, o mamikotay ci Aron ci Mosian sanay. Tatodong noniya sowal i: O taypiyaw no Kawas ci Mosi, o Kawas ko mikayatay cingranan, oraanto i, o ci Mosi ko mikayatay ci Aronan. Sowal sa ci Yihofa, ci Mosi “i kaˈayaw ni Falaw, ta matiya o Kawas” sanay, tatodong i: Papafelien no Kawas ci Mosi to ˈicel ato fadangalan, mikikakaay to ˈicel ni Falaw, mankora cowa ko kakatalawen ni Mosi kora hongti no Icip.—Kasadakan 7:1, 2.
Miˈosi to Sinael
(Kasadakan 6:1-15) Pasowal ci Yihofa ci Mosian: “Nohatini o mamaˈaraw iso ko demak Ako ci Falawan. O ciˈicelay a kamay Ako papaciecien cingra papipasadak cangranan, milaplap cangranan papiliyas to kitakit ningra.” 2 Pasowal haca ko Kawas ci Mosian: “Ci Yihofa Kaka. 3 Itiya:ho tano tadaciˈicelay a Kawas a saaroˈan Kako mipaˈaraw ci Aprahaman, ci Isakan, ci Yakopan, kawra o ngangan Ako “ci Yihofa”, caayho ka fanaˈ cangra. 4 Matatelekay Kako i cangranan, papafelien cangra tonini a pipacarcaran nangra a Kanan a pala. 5 Matengilayto Ako ko tangic no Israil tamdaw a malakuli no Icip. Cowa ka tawal Ako ko nika tatelek a sowal ato cangranan. 6 “Orasaka, pasowalen iso ko Israil tamdaw: ‘Ci Yihofa Kako. O tatedalen Ako kamo a paliyas to piroero no Icip tamdaw, naitira cangranan milidong tamowanan. O tatano ciˈicelay a kamay Ako misakareteng a mitefoc to Icip tamdaw, milidong tamowanan. 7 O cacadaen no Mako kamo malo finawlan Ako, o mamala Kawas namo Kako. O mamafanaˈ kamo to ci Yihofa Kako o Kawas namo, o Kako ko paliyasay tamowanan to piroero no Icip. 8 Oya niketonan a sowal Ako to papafelien ci Apraham, ci Isak, ci Yakop to sera, o kakeriden Ako micomod tayra, pafeli tamowanan malo hafay namo. Ci Yihofa Kako. 9 Haenen ni Mosi pasowal ko Israil tamdaw, tona mapaekelay ko pisakuli cangranan, hanaca matoleday ko falocoˈ, hato caay kakahi mitengil to sowal ni Mosi. 10 Pasowalen ni Yihofa ci Mosi: 11 “Ka tayra kiso pasowal to hongti ci Falaw, tedalen ko Israil tamdaw pasadak to kitakit.” 12 Pasowal ci Mosi ci Yihofaan: “O Israilto a tamdaw caay pitengil to sowal ako, nanima mitengil ci Falaw takowanan caay ka fanaˈ caciyaw a tamdaw saw?” 13 Nikawrira, toha sapikeridaw to Israil tamdaw miliyas to Icip, liyawan haca ni Yihofa palimoˈot ci Mosi aci Aron papipasowal to Israil tamdaw ato hongti no Icip ci Falawan. 14 Ora ilaenoay o kakeridan no kasangasaw no Israil: O sakakaay a wawa ni Israil ci Riupin i, o wawa ningra to faˈinayan, ci Hanok, ci Palu, ci Hicron aci Karmi. O ngasaw ni Riupin cangra. 15 O wawa ni Simiyon i, ci Yimuil, ci Yamin, ci Ohat, ci Yakin, ci Cohar aci Sawlo, o wina ni Sawlo o Kanan a fafahiyan. O ngasaw ni Simiyon cangra.
SAKA 7 FOLAD 13-19 ROMIˈAD
O ODOˈ KO KIMAD NO KAWAS | KASADAKAN 8-9
“Cowa ka Fanaˈ ci Falaw to Nika Pisatakaraw Ningra Palaˈosiay to Araaw no Kawas”
(Kasadakan 8:15) Maˈaraw ni Falaw ko nika masaˈsaˈto ko pades i, misaˈatekak to falocoˈ, caay kakahi mitengil to sowal ni Mosi, ni Aron, matiya nano sowal ni Yihofa.
it-2 436-437 fiedac
Misaˈatekak to Falocoˈ
Ci Yihofa kodaitay ko falocoˈ to kahacecay tamdaw anca to polong a finawlan, soˈliˈlin o papata patayen aca cangra, ˈarawhan pasalatan no Kawas a miterek. (Satapangan 15:16; 2 Pitiro 3:9) Mihaenay a masemeren ko falocoˈ no romaroma tamdaw, mitatoy to demak, teloc milifokay to siniˈada no Kawas (Yosuwa 2:8-14; 6:22, 23; 9:3-15), ˈarawhan i, romaroma tamdaw misaˈatekakay to falocoˈ, mangalefay a misafelit ci Yihofaan ato tamdaw Ningra. (Limoˈot 2:30-33; Yosuwa 11:19, 20) Sowal no Fangcalay Cudad, pakihater hananay no Kawas a misaˈatekak ko falocoˈ nangra, tatodong nora sowal i: Ano padeteng sa misaˈatekak to falocoˈ ko tamdaw i, cowa ko cacongeden ko Kawas, o sanay. Ano sawkiten no Kawas ko matiniay a tamdaw i, o papatalahkal Cingra to ˈicel, palosiyang to ngangan Ningra.—Palalinien to Kasadakan 4:21; Yohani 12:40; Loma 9:14-18.
(Kasadakan 8:18, 19) Haenen niyam ko demak nasa ko cikawasay no Icip, sapairaaw to ˈatimela, ˈarawhan i, awaay ko pakayraan nangra. Itiya i, ira i tireng no tamdaw ato tireng no pinaˈorip a maemin ko ˈatimela. 19 Oraanto i, sowal sa koya cikawasay ci Falawan: “Ono Kawas a nidemakan konini!” Nikawrira, mato sowal ni Yihofa a oyananto ko nika ˈatekak no falocoˈ ni Falaw a caay pitengil to sowal ni Mosi aci Aron.
(Kasadakan 9:15-17) Ano nilahecian Ako a mipalifong kiso ato finawlan iso i, kona o matekopayto kamo itiya aca. 16 Paˈoripenho Ako kiso tahanini i, o sapahapinangaw Ako to ˈicel Ako i tisowanan. Onini i, o sakalosiyangaw no ngangan Ako i polong no hekal. 17 ˈArawhan i, oyananto kiso a misatakaraw to falocoˈ a caay pipasadak to finawlan Ako han?
it-2 597 fiedac 3-5 fatac
Tatiihay
O roma sa i, mafanaˈay ci Yihofa kalasaka dademak to pakayraan, cowa ka harateng no tatiihay a tamdaw to palaˈosi:ay cangra to araaw no Kawas. Mafanaˈay ko Kawas miˈimer to kihcod a demak, cato ka matekop no tatiihay a tamdaw ko madimadiay a sikawdan Ningra, nawhani mapalosiyangto ko nika moecel no Kawas. (Loma 3:3-5, 23-26; 8:35-39; ˈOlic 76:10) Taneng 16:4 sanay ko sowal: ‘O misangaˈan ni Yihofa a maamaan, o sapilaheciaw to araaw Ningra, ano o nika ira no tatiihay tamdaw i, o sakipades a romiˈad ko sakaterek nangra.’
Tinakoen ko cecay hongti nolitengan a Icip. Ocoran ni Yihofa ci Mosi aci Aron miˈaraw ci Falawan, papitedal to malakuliay a Israil tamdaw. Cowa ko Kawas ko pariˈangay to falocoˈ ni Falaw, ao pakihater hananay no Kawas a materek cingra, pasalat han ko nika lingad nora demak, masapinangto ko tatiihay a falocoˈ ni Falaw, misawacayay konini to papata patayen aca ci Falaw. Kasadakan 9:16 somowalay to mamilaheci ko Kawas to araaw Ningra, sowal sa: “Paˈoripenho Ako kiso tahanini i, o sapahapinangaw Ako to ˈicel Ako i tisowanan. Onini i, o sakalosiyangaw no ngangan Ako i polong no hekal.”
Mitefad ci Yihofa to Moetapay a Pades i Icip, saikor ci Falaw ato polong a sufitay ningra matolemay i Kahngangay Riyar, tano kasemeran a pakayraan pasapinang to ˈicel Ningra. (Kasadakan 7:14–12:30; ˈOlic 78:43-51; 136:15) Ikorto to pi:na miheca, o taliyokay a kasakitakit kamayanayho a somowal tonini a demak, mahapinangay itini soˈlinay a mapalosiyang ko ngangan no Kawas i polong no hekal. (Yosuwa 2:10, 11; 1 Samuil 4:8) Ano tangsolan ni Yihofa mipatay ci Falaw i, cowa ko mamahaen a mapatalahkal ko ˈicel, mapaˈdil Cingra a milidong to finawlan no Niyah.
Kadkaden ko Odoˈ no Sinael
(Kasadakan 8:21) Ano caay pihayda kiso a pasadak to finawlan Ako i, o papasadaken Ako ko mikalatay to tamdaw a lalangaw, o mamiresap to tireng iso ato tireng no matayalay iso a tapatapang ato tireng no finawlan iso konini. O mamiresap to lomaˈ iso ato lomaˈ no Icip a maemin, o mamiedef to sera no Icip konini a lalangaw.
it-2 487 fiedac
Lalangaw
Saka sepat a pades o arupu (ʽa·rovʹ) hananay, awaayho ko pinang to o masamaanay a fao koninian. Oniniya pades cowa ka lecad to iˈayaway a tolo pades, saka sepat pades o Icip aca tamdaw ko misetiˈan, o itiniay Kosin a Israil tamdaw cowa ka mamaan. (Kasadakan 8:21, 22, 24, 29, 31; ˈOlic 78:45; 105:31) Arupu (ʽA·rovʹ) hananay, masasiromaay ko pihongyak: Mihelipay to remes a lalangaw (NW), “ˈararongac” (Yg), “lalangaw” (AS, KJ, RS), “cenget” (AT), ato “ˈatimela” (LXX).
Lalangaw hananay no Padaka a sowal (gadfly), o masasiromaay a fao. O tawinaan a lalangaw mikalatay to fanges no pinaˈorip ato fanges no tamdaw, mihelip to remes. O cacupi nora lalangaw miketingay i tireng no pinaˈorip ato tamdaw, itiniay i faedetay a pala, lomahaday i tireng no tamdaw. O matefaday i Icip a mikalatay a lalangaw i, tada masaferengay a adihay, misemsemay to tamdaw ato pinaˈorip, o roma taha patapatayay.
(Kasadakan 8:25-27) Saka, tahidang hanto ni Falaw ci Mosi aci Aron a somowal, “Olili, kaitinito i lalomaˈ no kitakit ako a mipacakat a patoˈaya to Kawas namo.” 26 Pacaˈof sa ci Mosi, “Caay ka ngaˈay a mihaen to demak, ano maˈaraw no Icip tamdaw ko pipatoˈaya niyam to Kawas, o mamanaˈay cangra. Ano itini i kaˈayaw no Icip tamdaw mipacakat tora sapatoˈaya, midemak to kanaˈayan nangra a demak i, coko mamiala to fakeloh a mipatay tamiyanan saw? 27 O dadadoedoen niyam ko sowal no Kawas a miliyas to Icip a romakat to tolo a romiˈad a tayra i kohkohan a mipacakat a mipatoˈaya ci Yihofaan a Kawas.
w04 3/15 25 fiedac 9 fatac
Kalimlaan no Kasadakan
8:26, 27—Misamaanay hano “mamanaˈay ko Icip a tamdaw” ano pacakat to sapatoˈaya ko Israil tamdaw sa ci Mosi hani? O Icip a tamdaw mitaˈongay to masasiromaromaay a pinaˈorip. Mankora, iraay ko lalangian ni Mosi papiliyas to Israil tamdaw masadak nai Icip, ngaˈ patoˈaya ci Yihofaan.
Miˈosi to Sinael
(Kasadakan 8:1-19) Pasowalen ni Yihofa ci Mosi: “Katayra ci Falawan, sowalen cingra: ‘Pasadaken ko finawlan Ako, ho midoko cangra i Takowanan, han cingra. 2 Ano eca kakahi kiso pasadak cangranan i, paedefen ako ko takoraˈ to kitakit iso, malo pades namo. 3 O mamasafereng ko takoraˈ nai Nayil a ˈalo. Mamiresap a micomod i lomaˈ iso o hongti ato kafotiˈan iso, miteloc i takar iso, micomod i lomaˈ no tapatapang a matayalay iso, miresap i tireng no finawlan iso, i parod ato sioy iso. 4 O mamiteloc i tireng iso, i tireng no finawlan iso ato tapatapang a matayalay iso.’” 5 Pasowalen ni Yihofa ci Mosi: “Sowalen ci Aron: ‘Layaen ko cokor iso, mitoroˈ to ˈalo, kengken ato fanaw ato masafitaˈoway a nanom, pasadak to takoraˈ miresap to Icip.’” 6 Layaento ni Aron mitoroˈ ko tatapangan no nanom no Icip, masadakto ko takoraˈ, miedef to Icip. 7 Kawriraan, haenen no cikawasay no Icip ko demak, masadakto ko takoraˈ miedef to Icip. 8 Tahidangen ni Falaw ci Mosi aci Aron a somowal: “Ngitangiten ci Yihofa a papilaplap tonini a takoraˈ, ta haydaen ako ko finawlan iso a pasadak, mangaˈay cangra a tayra a mipacakat a mipatoˈaya ci Yihofaan.” 9 Pacaˈof sa ci Mosi ci Falawan: “Pasowalen kako, ano hacowa kako mitolon to Kawas, papiliyas to takoraˈ tisowanan, to tapatapang a matayalay iso, to finawlan iso ato lomaˈ iso o hongti, ta edengto i Nayil a ˈalo ko citakoraˈay.” 10 Pacaˈof sa ci Falaw: “Ano dafak kiso a mitolon.” Sowal sa ci Mosi: “Hai, doedo han ako ko longoc iso, ta mafanaˈ kiso to nika awaay ko milecaday ci Yihofaan a Kawas. 11 O mamiliyas i tisowanan ato matayalay iso a tapatapang ato finawlan iso konini a takoraˈ, edengto oya i Nayilay a ˈalo a takoraˈ ko ˈosaw.” 12 Itiya i, liyas sato ci Mosi aci Aron. Mitolonto ci Mosi ci Yihofaan, mingitangit a papiliyas toya takoraˈ ci Falawan. 13 Doedo han ni Yihofa ko longoc ni Mosi. Mapatayto a maemin koya i lomaˈay, i putalay ato i omaomahan a takoraˈ. 14 Saˈopoen no tamdaw koya mapatayay a takoraˈ a mitaring, saˈantoh sato ko polong no Icip. 15 Maˈaraw ni Falaw ko nika masaˈsaˈto ko pades i, misaˈatekak to falocoˈ, caay kakahi mitengil to sowal ni Mosi, ni Aron, matiya nano sowal ni Yihofa. 16 Pasowal ci Yihofa ci Mosian: “Sowalen ci Aron: ‘Setiˈen to cokor ko sera, ta malaˈatimela ko alafoh no sera a miedef to kitakit no Icip.’” 17 Saka, toor han nangra ko demak a mihaen. Layaˈ hanto ni Aron ko cokor, misetiˈ to sera i, masadakto ko ˈatimelato, miresap to tireng no tamdaw ato tireng no pinaˈorip. Polong no Icip, malaˈatimelato ko alafoh no sera. 18 Haenen niyam ko demak nasa ko cikawasay no Icip, sapairaaw to ˈatimela, ˈarawhan i, awaay ko pakayraan nangra. Itiya i, ira i tireng no tamdaw ato tireng no pinaˈorip a maemin ko ˈatimela. 19 Oraanto i, sowal sa koya cikawasay ci Falawan: “Ono Kawas a nidemakan konini!” Nikawrira, mato sowal ni Yihofa a oyananto ko nika ˈatekak no falocoˈ ni Falaw a caay pitengil to sowal ni Mosi aci Aron.
SAKA 7 FOLAD 20-26 ROMIˈAD
O ODOˈ KO KIMAD NO KAWAS | KASADAKAN 10-11
“Ci Mosi aci Aron Paihkalay to Taˈangayay a Timolo”
(Kasadakan 10:3-6) Tayra ci Mosi aci Aron miˈaraw ci Falawan, pasowal cingranan: “O sowal no Kawas no Hipray a tamdaw i: ‘Tahacowa kiso makahi a midoedo i Takowanan saw? Haydaen ko finawlan Ako a pasadak, to sakangaˈayaw nangra a midoko i Takowanan. 4 Ano milalang haca kiso a pasadak to finawlan Ako i, ocoren Ako ano dafak ko ririˈ a papicomod i kitakit iso. 5 O mamitahepo to polong no sera ko ririˈ, caayto ko mamaˈaraw no tamdaw ko sera. Oya caay ka patay no ˈikay no soeda a pinaloma, o mamakaen noya ririˈ a maemin. Halo molengaway i palapalaan a kilang a maemin, mamakaen no ririˈ. 6 O mamicomod a mitomes to lomaˈ iso ato lomaˈ no matayalay iso a tapatapang ato lomaˈ no polong a Icip tamdaw. Awaayho a matinako no wama namo ato tatoˈasan namo ko hatiniay a demak.’” Maharek ci Mosi a somowal i, liyas sato ci Falawan.
w09 7/15 20 fiedac 6 fatac
Todongen ci Yis—Timolo a Mitosil
6 Haratengen hena, ci Mosi hakowa ko timolo ngaˈ misiˈayaw ci Falawan a pasowal. Itini falocoˈ no Icip tamdaw, ci Falaw cowa ko taypiyaw no kawakawas, ao wawa no kawas no cidal ci Ray cingra sanay, o mitaˈongan no Icip a kawas cingra. Ano ci Falawto, mitaˈongay to sasing no niyah, oya misiˈayawan ni Mosi a Falawan, mahaenay ko harateng ningra. O nano sowal ni Falaw o rikec kora, o limoˈot ningra, cowa ko ngangaˈay a misafelit ko tamdaw. Taˈangayay ko fadangalan ni Falaw, malitaˈangay koesitay cingra, awaay ko cimacima to iraay ko timolo a pasowal cingranan to sasamaanen ko demak. Oya damsayay a mipakaenay to siri a Mosian, o tatayra misiˈayaw tonini mariˈangay a Falaw! Mafanaˈay ci Mosi to cowa ka olah ci Falaw, ˈarawhan kamayan cingra misaliyaliyaw tayra ci Falawan. O lalasilen ningra ci Falaw to manan a lihaf hani? O tatefaden no Kawas ko pakidemay a pades sanay. O manan ko saali ningra ci Falawan hani? Papipatedalaw to pina:ay soˈot a ˈofad a kuli, papiliyas cangranan to Icip! Midemak to matiniay a pasangaray a ˈinorong, coko cacitimolo ci Mosi hokira? Hayi.—Saˈosi 12:3; Hipray 11:27.
(Kasadakan 10:24-26) Tahidangen ni Falaw ci Mosi, sowal sa: “Katayrato kamo a midoko ci Yihofaan. Sidayen ko kolong ato siri namo. O wawa namo ngaˈayay mitoor tamowanan a tayra.” 25 Pacaˈof sa ci Mosi: “Papafeli kiso to sapacakat niyam a sapatoˈaya ato nisakimoodan a mitodoh a pinaˈorip, pacakaten niyam ci Yihofaan a Kawas niyam. 26 O aalaen niyam ko pinaˈorip niyam, caay ko sasidayen niyam ko cecacecay aca. Kami ko mamipiliˈ to malo sapacakat niyam a patoˈaya ci Yihofaan Kawas niyam. Ano caho ka tangasa itira kami i, caho ka fanaˈ kami to nika o manan ko sapacakat niyam ci Yihofaan.”
(Kasadakan 10:28) Sowal sa ci Falaw ci Mosian: “Piliyas takowanan! Haratengen, akato piliyaw a tayni. Ano miliyaw kiso a tayni i, o mamapatay kiso toya a romiˈad.”
(Kasadakan 11:4-8) Pasowal ci Mosi: “O sowal ni Yihofa i: ‘O tatayni Kako tonini a lafii a mirakat to Icip. 5 Itini i Icip, polong a fisac a wawa o mamapatay, mikitini i mamirocok to pikowan ni Falaw a fisac faˈinayan wawa ningra tangasa i fisac a faˈinayan wawa no miilangay a kuli a fafahiyan, halo polong a fisac a wawa no pinaˈorip, mamapatay a maemin. 6 O mamilekal a tomangic ko polong no Icip. Awaayho ko hatiniay a matinakoay, wa awato iikor nonini ko matiniay. 7 Nikawrira, o Israil a tamdaw i, ano o wacoto cowa ko papasayra cangranan ato pinaˈorip nangra a misangocedis a miˈawˈaw. Mihaen i, itini a mafanaˈ kamo to papafafidaˈen no Mako ko Icip a tamdaw ato Israil a tamdaw.’ 8 O tatayni i takowanan ko matayalay iso a tapatapang a maemin, mipitoros a mingitangit takowanan, ‘kiso ato polong a mitooray tisowanan a tamdaw ka piliyasto,’ itiya sato kako a miliyas.” Maharek a pasowal i, keter sa ci Mosi a masadak a miliyas nai ci Falawan.
it-1 1126 fiedac 1 fatac
Mosi
Misiˈayaw ci Falawan ira ko timolo ato fanekfekay a falocoˈ. Edengan pakayni i ˈicel ni Yihofa ato fangcalay saocor Ningra, ci Mosi aci Aron hongaˈ pakalaheci tora pasangaray a ˈinorong. O tadaciˈicelay a kitakit ko Icip itiya, haratengen hena, itini i Hongti a lomaˈ ni Falaw: Kalakawasan no tamdaw ci Falaw, maroˈ i tano ekiman misangaˈ a ˈanengan, miˈalikotan no tapatapang, sufitay ato kuli, iraayho ko saysi no kawakawas. O ˈada ni Mosi koya saysi no makaniway kawas, o ilaenoay ni Falaw a ciˈicelay a tamdaw cangra itini i Icip. Hatini ko nika pitaliyok nangra, o sapidamaaw ci Falawan ato kawakawas no Icip. Cowa ka kina cecay aca ci Mosi aci Aron misiˈayaw ci Falawan, kinapinapina:ay, mangalef mangalefay ˈatekak ko falocoˈ ni Falaw, samanen sapiˈimeraw cingra to malakuliay a Hipray tamdaw. Soˈlinay haw i, tiya milasil to saka falo a pades ci Mosi aci Aron i, laplap hananayto ni Falaw cangra, ikor no saka siwa pades i, akato piliyaw tayni kaˈayaw ako, hananay ni Falaw cangra pasowal, ano eca i, papatayen cangra, sanay.—Kasadakan 10:11, 28.
Kadkaden ko Odoˈ no Sinael
(Kasadakan 10:1, 2) Pasowalen ni Yihofa ci Mosi: “Katayra kiso ci Falawan. Pakiyadi hananayto Ako misaˈatekak ko falocoˈ ningra ato matayalay ningra a tapatapang, mihaen i, o ngangaˈayto Kako midemak to kafahkaˈan a demak i ˈaˈayaw ningra, 2 ta mangaˈay kiso a pasowal i wawawawa iso to nika misamaanan Ako mitefoc ko Icip a tamdaw, midemak to kafahkaˈan a demak ilalomaˈ nangra. Mihaen i, o mamafanaˈ kamo to ci Yihofa Kako.”
w95 9/1 11 fiedac 11 fatac
Misawacayay ko Tamdaw to O Makaniway a Kawas
11 Ta i Icipho ko Israil tamdaw a malakuli i, miocoran ni Yihofa ci Mosi tayra ci Falawan: “Katayra kiso ci Falawan. Pakiyadi hananayto Ako misaˈatekak ko falocoˈ ningra ato matayalay ningra a tapatapang, mihaen i, o ngangaˈayto Kako midemak to kafahkaˈan a demak i ˈaˈayaw ningra, ta mangaˈay kiso a pasowal i wawawawa iso to nika misamaanan Ako mitefoc ko Icip a tamdaw, midemak to kafahkaˈan a demak ilalomaˈ nangra. Mihaen i, o mamafanaˈ kamo to ci Yihofa Kako.” (Kasadakan 10:1, 2) O midofdofay toniya sapalimoˈot a Israil tamdaw, mihaenan a pasowal ko wawawawa to nano demak ni Yihofa. Mihaen i, o mamaharateng no tamdaw ko tadamaanay a ˈicel ni Yihofa. Anini mahaenay, o wama wina iraay ko ˈinorong a mihaen a misawacay to wawa.—Limoˈot 6:4-7; Taneng 22:6.
(Kasadakan 11:7) Nikawrira, o Israil a tamdaw i, ano o wacoto cowa ko papasayra cangranan ato pinaˈorip nangra a misangocedis a miˈawˈaw. Mihaen i, itini a mafanaˈ kamo to papafafidaˈen no Mako ko Icip a tamdaw ato Israil a tamdaw.
it-1 238 fiedac 6 fatac
Kasadakan
Mihaenay tano kasapaan a pakayraan ci Yihofa pasapinang to ˈicel Ningra, palosiyang to fangcalay ngangan no Niyah, halo milidong to Israil tamdaw. Tangasato i kawali no Kahngangay a Riyar ko Israil tamdaw i, mikeridan ni Mosi ko faˈinayan romadiw a pakahemek ci Yihofaan, fafahiyan a kaka ningra ci Miriyam mitatoy to tayko, mikerid to polong a fafahiyan a mikongkong to tayko a makero, macacada a romadiw ato faˈinayan. (Kasadakan 15:1, 20, 21) Pafafidaˈan no Kawas ko Israil tamdaw ato ˈada. Tiya miliyas cangra to Icip i, cowa ka haydaen no Kawas ko tamdaw ato pinaˈorip a midokaˈ cangranan, ano o wacoto, cowa ka pisangocedis a miˈawˈaw to Israil tamdaw. (Kasadakan 11:7) O Kasadakan a cudad soˈliˈlin cowa ka somowal to mapatayay i riyar ci Falaw ato sufitay ningra, kawra ˈOlic 136:15 ihkalay a somowal, ci Yihofa, “Miˈalolan ci Falaw ato sufitay ningra i Kahngangay a Riyar,” sanay.
Miˈosi to Sinael
(Kasadakan 10:1-15) Pasowalen ni Yihofa ci Mosi: “Katayra kiso ci Falawan. Pakiyadi hananayto Ako misaˈatekak ko falocoˈ ningra ato matayalay ningra a tapatapang, mihaen i, o ngangaˈayto Kako midemak to kafahkaˈan a demak i ˈaˈayaw ningra, 2 ta mangaˈay kiso a pasowal i wawawawa iso to nika misamaanan Ako mitefoc ko Icip a tamdaw, midemak to kafahkaˈan a demak ilalomaˈ nangra. Mihaen i, o mamafanaˈ kamo to ci Yihofa Kako.” 3 Tayrato ci Mosi aci Aron miˈaraw ci Falawan, pasowal cingranan: “O sowal no Kawas no Hipray a tamdaw i: ‘Tahacowa kiso makahi a midoedo i Takowanan saw? Haydaen ko finawlan Ako a pasadak, to sakangaˈayaw nangra a midoko i Takowanan. 4 Ano milalang haca kiso a pasadak to finawlan Ako i, ocoren Ako ano dafak ko ririˈ a papicomod i kitakit iso. 5 O mamitahepo to polong no sera ko ririˈ, caayto ko mamaˈaraw no tamdaw ko sera. Oya caay ka patay no ˈikay no soeda a pinaloma, o mamakaen noya ririˈ a maemin. Halo molengaway i palapalaan a kilang a maemin, mamakaen no ririˈ. 6 O mamicomod a mitomes to lomaˈ iso ato lomaˈ no matayalay iso a tapatapang ato lomaˈ no polong a Icip tamdaw. Awaayho a matinako no wama namo ato tatoˈasan namo ko hatiniay a demak.’” Maharek ci Mosi a somowal i, liyas sato ci Falawan. 7 Sowal sa ko matayalay a tapatapang ni Falaw i cingranan: “Tahacowa ko nipipakaroray nonini a tamdaw i titaanan saw? Pasadaken cangra, hayda hanto cangra a midoko ci Yihofaan Kawas nangra mamaan. Mapelengayto ko Icip, cowaho ka fanaˈ kiso saw?” 8 Saka, tahidang hanto ni Falaw ci Mosi aci Aron. Sowal sa ci Falaw cangranan: “Ka tayra kamo midoko to Kawas namo ci Yihofaan. Nikawrira, cimacima ko tatayra saw?” 9 Pacaˈof sa ci Mosi: “O aalaen niyam ko kaemangay, matoˈasay, wawawawa, kolong ato siri niyam, samanen o mamisalisin kami, misaˈakawang ci Yihofaan.” 10 Pasowal sa ci Falaw i cangranan: “Ano haydaen ako kamo papiˈorong to wawa namo a tayra i, nao soˈlinayto mikapot ci Yihofa i tamowanan! Mahapinang to misahalakaay kamo to sapiculiaw. 11 Cowa ko ngangaˈay! Edengan o faˈinayan namo ko tatayra midoko ci Yihofaan, oninian ko nisaalian namo kiya.” Oraanto laplap han ni Falaw ca Mosi aci Aron. 12 Pasowal ci Yihofa ci Mosian: “Layaˈen ko kamay iso pasayra i Icip, ta masadak ko ririˈ a miedef to Icip. O mamakaen no ririˈ a maemin ko ˈosaw a molengaway to caay ka pelpel no soeda.” 13 Saka, tangsol han ni Mosi milayaˈ koya cokor ningra mitoroˈ to Icip. Papifiyok hanto ni Yihofa ko fadat a fali, saromiˈad salafii sa a mifiyok konini a fali. Saka, dafak sato i, saferengan sato ko ririˈ a maferfer no fadat a fali a tayni. 14 Safereng sato konini a ririˈ a maefer a miedef to polong no Icip. Sahatini sa ko nika adihay no kasafereng no ririˈ. Awaayho iˈayaw, awaayto i ikor a maˈaraw ko matiniay. 15 Miedef i polong no sera konini a ririˈ a mitahepo, sakohting sato i sera a nengnengen, kaenen nangra a mihaemin ko pinaloma no kitakit, ato polong caay ka mapelpel no soeda a losay. Itini icowacowa no Icip, ano o kilangto anca i omahay a malengaway, awaayto a maˈaraw ko kangdaway a papah materek.
SAKA 7 FOLAD 27 –8 FOLAD 2 ROMIˈAD
O ODOˈ KO KIMAD NO KAWAS | KASADAKAN 12
“O Pitaˈlifan a Lisin—O Manan ko Tatodong to Krisciyang”
(Kasadakan 12:5-7) Orira siri namo o awaay ko samoˈ cecayay ko mihecaan a tofor a siri, ngaˈayayto o siri anca o lalifanohen a siri. 6 Tangasa isaka 14 romiˈad nonini a folad. Itini i kalafian, itiya a mitokad to tofor a siri ko finawlan no Israil. 7 O aalaen namo ko remes noya mitokadan a siri, sipasipen i cacafiˈan no fawahan no kakomaenan namo a lomaˈ.
w07 1/1 20 fiedac 4 fatac
Ka Lipahak Kamo a Maemin
4 Ci Yis itiniay i saka 33 mihecaan Nisan folad no saka 14 romiˈad no Yutaya koyumi a mapatay cingra. Itini Israil, o pisalisinan to Pitaˈlifan Lisin i Nisan folad 14 romiˈad, o kalipahakan a romiˈad konini. Toniya romiˈad to mihecahecaan, kahacecay no lomaˈ malafiay to Pitaˈlifan Lisin, tora sakalafi mahawpay ko cecay awaay ko samoˈ a tofor a siri. Mihaen cangra o piharatengan toya ˈayaw ni Yis saka 1513 miheca a Nisan folad 14 romiˈad, itiya i, mipatayan no coyoh ko polong a fisac wawa no Icip ato pinaˈorip, o remes no tofor a siri paˈoripay to fisac wawa no Israil tamdaw. (Kasadakan 12:1-14) Oya tofor siri no Pitaˈlifan Lisin mitaypiyaway ci Yisan, pakayni tonini sowal no tarokos ci Pawlo: “Maharekayto ci Kristo kinafalah a mapatay to saki tofor a siri no Pitaˈlifan Lisin ita.” (1 Korinto 5:7) Oya milakisan ni Yis a remes, malecaday to remes noya tofor a siri no Pitaˈlifan a Lisin, milidong to ˈorip no ˈalomanay tamdaw.—Yohani 3:16, 36.
(Kasadakan 12:12, 13) Itiya toya dadaya i, o mamirakat Kako to Icip, mipatay to polong no fisac a faˈinayan a wawa, ano o tamdawto ano o pinaˈoripto o papatayen Ako. O sasawkiten Ako halo misetiˈ ko polong a kawakawas no Icip. O ci Yihofa Kako. 13 Ano icowaay a lomaˈan kamo, icowaay a lomaˈ ko ciremesay, o kacipinangan namo kora. Ano maˈaraw Ako konini remes i, taˈlif han Ako kamo. Ano misetiˈto Kako to Icip i, cowa ko mamatefad ko padiing i tireng namo a mitekop tamowanan.
it-2 1013 fiedac 1 fatac
Pitaˈlifan Lisin
Oya milingatay to Pitaˈlifan a Lisin a mikiriwiˈay a demak malaˈosiayto i tireng ni Yis. Ora cecay i, itini i Icip, misipasipan no Israil tamdaw ko remes i cacafiˈan no fawahan, hato cowato ka mapatay no coyoh ko fisac wawa no tamdaw ato pinaˈorip. Hananay ni Pawlo pangangan koya mapasimalay a Krisciyang to “o mipalaˈosian no fisac wawa a kasakopang,” sanay (Hipray 12:23), mikitiniay i remes ni Kristo a malidong ko ˈorip nangra. (1 Tisalonika 1:10; Ifiso 1:7) Cowa ka keton ko cecacecay a ˈokak noya tofor siri no Pitaˈlifan Lisin. Malecaday, paliˈayaway ko Fangcalay Cudad somowal awaay ko cecacecay a ˈokak ni Yis to maketonay, oninian sapairasol soˈlinay malaˈosi i tireng ni Yis. (ˈOlic 34:20; Yohani 19:36) Pinaay a hahekalan a miheca, o Yutaya tamdaw cowa ka pisawad misalisin toniya Pitaˈlifan Lisin. Oniniya romiˈad o “sapatinako” to aira a makapahay a demak no ikor, mitaypiyawan i, ci Yis Kristo oya “tofor a siri no Kawas.”—Hipray 10:1; Yohani 1:29.
(Kasadakan 12:24-27) “O mamisalisin kamo tonini a romiˈad, o dadoedoen namo ato wawawawa namo konini a romiˈad tahira i daˈoc. 25 Ano tayrato kamo toya nisowalan ni Yihofa to sapafeli Ningra a sera i, o papadotocen namo a misalisin konini a romiˈad. 26 Ano saan ko wawa namo a milicay: “O manan ko tatodong noni lisin i tamowanan saw?” 27 Haenen cangra a pasowal: “O sapatoˈaya i Pitaˈlifan Lisin ci Yihofaan koni. Ya itiniho i Icip, mipadesan no Kawas ko Icip a tamdaw, kawra mitaˈlifan ko lomaˈ no Israil tamdaw, cowa pidokaˈ to ilomaˈay a tamdaw.” Pitoros sato ko finawlan a mitaˈong.
w13 12/15 20 fiedac 13-14 fatac
Ka Piharateng Kamo Tonini a Romiˈad
13 Lomahad ko wawa i, o papasifanaˈen cangra to kalimlaan a tatodong nonini Pitaˈlifan Lisin, haenen ko demak to rayray no teloteloc. Mafanaˈ ko wawa, o dadipoten ni Yihofa ko midokoay Cingranan a tamdaw. O soˈlinay a Kawas Cingra, midaˈocay a maˈorip, ciharatengay to tamdaw no Niyah, midipotay cangranan. Tiya “mapades ko Icip a tamdaw” i, mitafoan ko ˈorip no fisac a wawa no Israil tamdaw, oninian ko wacay.
14 Aniniay, wama wina no Krisciyang cowa ko papasowalen ko wawa to mihecahecaan to tatodong noni Pitaˈlifan Lisin. Nikawrira, padamaan iso ko wawa cipinang, o dadipoten no Kawas ko tamdaw Ningra han? Pasapinangan iso ko wawa, to nika pakasoˈlin iso to Kawas han? (ˈOlic 27:11; Isaya 12:2) Ano pasifanaˈ kiso to wawa i, o sapirikec aca ko sowal han? Anca, o kahemekan a tatokian ko nika pasifanaˈ cangranan han? Padamaen ko paro no lomaˈ misapinang to sadama ni Yihofa cangranan, mihaen i, o mamikowad cangranan matongal ko pitiˈer ci Yihofaan.
Kadkaden ko Odoˈ no Sinael
(Kasadakan 12:12) Itiya toya dadaya i, o mamirakat Kako to Icip, mipatay to polong no fisac a faˈinayan a wawa, ano o tamdawto ano o pinaˈoripto o papatayen Ako. O sasawkiten Ako halo misetiˈ ko polong a kawakawas no Icip. O ci Yihofa Kako.
it-2 1011 fiedac 2 fatac
Pitaˈlifan Lisin
Oya matefaday i Icip a Moetepay Pades, o sasawkit no Kawas to polong a kawas no Icip, mangalefay oya saka moetep a pades, mipatayan ko polong a fisac wawa no Icip. (Kasadakan 12:12) Itini pinengneng no Icip a tamdaw, okangan a tofor siri mitaypiyaway to kawas nangra ci Ray, o fangcalay sanay cangra, mankora sipasipen ko remes no “tofor siri no Pitaˈlifan Lisin” i cacafiˈan no fawahan i, o milokesay a waywayan to Icip tamdaw. O roma sa i, okangan a kolong o fangcalay sanay ko Icip a tamdaw, mipatay to fisac wawa no okangan a kolong i, tada misalaenoay to kawas nangra ci Osirisan sanay. Mitaˈongan no tamdaw ci Falaw, o wawa ni Ray cingra sanay cangra. Mapatay ko fisac wawa ni Falaw i, patalahkalay to awaay ko ˈicel ni Ray aci Falaw.
(Kasadakan 12:14-16) “‘O haharatengen namo koni romiˈad, o pisalisinan romiˈad ci Yihofaan, tangasa i teloteloc namo a tahadaˈocen a mitoor koni rikec. 15 Pito a romiˈad ko nika komaen namo to caay ka citamod a epang. Isaka cecay a romiˈad i, o fafalahen namo i paputal ko tamod no epang a maemin. Mikitira saka cecay romiˈad tangasa saka pito a romiˈad, ano ira ko komaenay to citamoday a epang i, o papatayen cingra. 16 To saka cecay a romiˈad mamisikay kamo to taˈangayay a saˈopo, ato saka pito a romiˈad mihaen to demak, o mamalacecay kamo a masaˈopo saki Kawas. Tonini a tosa a romiˈad i, caay ka ngaˈay a matayal. Edeng o kakaenen a cecay ko dademaken namo.
it-1 186 fiedac 5 fatac
Taˈangayay Saˈopo
O cecay mikiriwiˈay noni “fangcalay taˈangayay saˈopo” i, cowa ko ngangaˈay ko tamdaw matayal itini toniya romiˈad. Patinakoen i, to saka cecay a romiˈad ato saka pito romiˈad no “Kaecaan Patamod to Epang a Lisin”, iraay ko fangcalay saˈopo, itiya palimoˈotay ci Yihofa: “Tonini a tosa a romiˈad i, caay ka ngaˈay a matayal. Edeng o kakaenen a cecay ko dademaken namo,” sanay. (Kasadakan 12:15, 16) Nikawrira, itini toniya “fangcalay saˈopo” matayalay ko saysi pacakat to sapatoˈaya ci Yihofaan (Lifi 23:37, 38), mihaen cangra cowa ko misafelitay to rikec. Ora fangcalay saˈopo hananay i, caay ko ngangangaˈay a matayal, cowa ka saan, ao ngangaˈay cangra midemak to saka ciepocaw noˈadingoan a tayal, sanay. To lipalipay a Paselaˈan a Romiˈad, malisopsopay ko tamdaw midoko to Kawas, micada to sapasifanaˈ. Mitengilay cangra to piˈosi to sinael, to pitadtad to tatodong no kimad no Kawas, o mahaenay pakayraan mahecaday to saka 1 hahekalan a saˈopo no Krisciyang. (Dmak 15:21) O tamdaw ano caka matayal i Paselaˈan a Romiˈad ato romaroma a fangcalay saˈopo i, o ngangaˈay a misamacay ko falocoˈ nangra mitolon, midotim to araaw no Kawas.—Nengnengen ko TAYKAY.
Miˈosi to Sinael
(Kasadakan 12:1-20) Pasowal ci Yihofa ci Mosian aci Aronan i Icip: 2 “O saka cecay a folad han namo a misaˈosi konini a folad, saka cecay a folad no mihecahecaan. 3 Palimoˈoten ko polong a finawlan no Israil: ‘To saka 10 romiˈad noni folad, kahacecay no paro no lomaˈ papiliˈen ko cecay siri, cecay ko kahacecay a lomaˈ. 4 Ano caay ka ˈaloman ko paro no lomaˈ, caay pakaemin a komaen to cecay siri i, ngaˈay mapapeciˈ ato fiyaw to cecay a siri. Pakayni han i saˈosi no ˈaloman no tamdaw namo ko nipisakilac tora siri. 5 Orira siri namo o awaay ko samoˈ cecayay ko mihecaan a tofor a siri, ngaˈayayto o siri anca o lalifanohen a siri. 6 Tangasa isaka 14 romiˈad nonini a folad. Itini i kalafian, itiya a mitokad to tofor a siri ko finawlan no Israil. 7 O aalaen namo ko remes noya mitokadan a siri, sipasipen i cacafiˈan no fawahan no kakomaenan namo a lomaˈ. 8 “‘Itiya toya dadaya a komaen tora titi nora siri. Tano namalen a midohdoh, o caay ka citamod a epang ato kadawangay ko sapasikaen namo a komaen. 9 Aka pisamantaˈ a komaen, aka pananomen a mitangtang, o sasakimooden a midohdoh koya siri, halo fongoh ato waˈay ato kemod nira a dohdohen. 10 Aka tahadafaken ko ˈosaw, ano ira ko ˈosaw i, lanto han a mitodoh. 11 Ano komaen kamo i, fakedento ko rikoˈ, kacicokapto, tatoyento ko cokor, kalamkamen a komaen. O Pitaˈlifan a Lisin ni Yihofa konini. 12 Itiya toya dadaya i, o mamirakat Kako to Icip, mipatay to polong no fisac a faˈinayan a wawa, ano o tamdawto ano o pinaˈoripto o papatayen Ako. O sasawkiten Ako halo misetiˈ ko polong a kawakawas no Icip. O ci Yihofa Kako. 13 Ano icowaay a lomaˈan kamo, icowaay a lomaˈ ko ciremesay, o kacipinangan namo kora. Ano maˈaraw Ako konini remes i, taˈlif han Ako kamo. Ano misetiˈto Kako to Icip i, cowa ko mamatefad ko padiing i tireng namo a mitekop tamowanan. 14 “‘O haharatengen namo koni romiˈad, o pisalisinan romiˈad ci Yihofaan, tangasa i teloteloc namo a tahadaˈocen a mitoor koni rikec. 15 Pito a romiˈad ko nika komaen namo to caay ka citamod a epang. Isaka cecay a romiˈad i, o fafalahen namo i paputal ko tamod no epang a maemin. Mikitira saka cecay romiˈad tangasa saka pito a romiˈad, ano ira ko komaenay to citamoday a epang i, o papatayen cingra. 16 To saka cecay a romiˈad mamisikay kamo to fangcalay a taˈangayay a saˈopo, ato saka pito a romiˈad mihaen to demak, o mamalacecay kamo a masaˈopo saki Kawas. Tonini a tosa a romiˈad i, edeng o kakaenen a cecay ko dadademaken namo, romaroma a demak caay ka ngaˈay a matayal. 17 “‘O mamisalisin kamo to Kaecaan Patamod a Romiˈad, samanen itiniay toni a romiˈad, o kakeriden Ako kamo masafereng miliyas to Icip. O haharatengen namo konini romiˈad to mihecahecaan, o midaˈocay a rikec konini. 18 Isaka 14 romiˈad no saka cecay a folad to kalafian, tangasa saka 21 romiˈad no saka cecay folad to kalafian i, komaen to caay patamoden a epang. 19 Toniya 7 a romiˈad, caay ka ngaˈay ira i lomaˈ ko patamodan a epang, ano komaen ko cima to citamoday a epang, ano o roma finacadanto tamdaw anca o itiniayto a tamdaw, o papatayen cingra. 20 Maamaan citamoday a epang aka a komaen. Kahacecay a lomaˈ o kakomaen to caay patamoden a epang.’”