Pinengnengan to Lalakaw no Mitosilay ato Nikaˈorip Rayray no Saˈopo
SAKA 8 FOLAD 3-9 ROMIˈAD
O ODOˈ KO KIMAD NO KAWAS | KASADAKAN 13-14
“Tanetketen a Tomireng, o Mamaˈaraw Namo Anini ko Nipilidong ni Yihofa i Tamowanan”
(Kasadakan 14:13, 14) Pasowal ci Mosi to finawlan: “Aka ka talaw! Tanekteken a tomireng, o mamaˈaraw namo anini ko nipilidong ni Yihofa i tamowanan. Oniya maˈaraway namo a Icip tamdaw, caayto ko mamaˈaraw namo ano ikor. 14 O papatadoen ni Yihofa kamo a milood, sapater sa tomireng kamo.”
w13 2/1 4 fiedac
Ci Mosi— Tanektekay ko Pasoˈlinay no Falocoˈ
Ci Mosi cowa ka fanaˈ to papalicinowas ko Kawas to Kahngangay a Riyar, palalan to sakaˈoripaw no Israil tamdaw, kawra o pakasoˈlinay cingra to mamidemak ko Kawas midipot to finawlan Ningra. Manonoˈay ci Mosi to finawlan ira ko matiniay a noka pakasoˈlin no falocoˈ. Sanay ko Fangcalay Cudad: “Aka ka talaw! Tanekteken a tomireng, o mamaˈaraw namo anini ko nipilidong ni Yihofa i tamowanan.” (Kasadakan 14:13) Onini a sowal ningra paˈicelay to falocoˈ no Israil tamdaw han? Iraay, samanen o sowal no Fangcalay Cudad: “Israil tamdaw (cowa ko ci Mosi aca) to nika pasoˈlin no falocoˈ, milakowitay to Kahngangay a Riyar, romakat i maˈicangay a sera cangra.” (Hipray 11:29) O nika pakasoˈlin ni Mosi cowa ka ciepoc to niyah aca, halo padamaay to roma tamdaw mihapinang to nika pitiˈer ci Yihofaan tada o citanengay a demak.
(Kasadakan 14:21, 22) Layaˈ sa ci Mosi to kamay a pasayra i fafaed no riyar, palowaden ni Yihofa a papifiyok to riyar ko ciˈicelay a fadat a fali a misalafii. Lacinowas sato ko riyar, malo maˈicangayto a sera. 22 Saka, pakayra sato ko Israil a romakat toya maˈicangay a sera a mitaˈlif, masapatih i makofatiˈiyan ko namon.
Malefotay ko ˈIcel a Kawas Patadoay to Tamdaw a Miharateng
13 ˈOsien ko Kasadakan 14:19-22. Haratengen ilalomaˈay no miliyasay to Icip a tamdaw kiso, maˈaraw iso milepelay i kaikor ko sufitay ni Falaw, o Kahngangay a Riyar ko kaˈayaw, awaayto ko pilaliwan iso. Toniya toki, misatapang ko demak no Kawas, milinah to toˈem tayra kaikor no ˈalomanay, miˈteng to sufitay no Icip. Patoˈemanan ni Yihofa ko Icip a tamdaw, kawra patedilan kiso ato Israil tamdaw. Dotoc i, milayap ci Mosi to kamay mitoroˈ to riyar, miiyof ko ciˈicelay a fali to riyar, lalicinowas sanay ko riyar, ira ko kakahaday a lalan karomakatan no ˈalomanay talaˈayaw. Orato, kiso ato paro no lomaˈ ato pinaloma romakat i malicinowasay a riyar, malacafay to Israil tamdaw masierod a talaˈayaw. Padotoc kiso a talaˈayaw, fahkaˈay kiso cowa ka kohnac koniya lalan, cowa ka kocinaˈ, o maˈicangay, ngaˈayay a rakaten, ano matayoay ko rakat a tamdaw dipayalay a mitaˈlif.
(Kasadakan 14:26-28) Pasowal han ni Yihofa ci Mosi: “Layaˈen ko kamay iso a pasayra i riyar, ta patatikol ko nanom a miˈalol to Icip a tamdaw ato sapilood a paliding ato pakaefaay a sufitay nangra.” 27 Layaˈ hanto ni Mosi ko kamay ningra a pasayra i riyar. Yo saka taengadanto ko romiˈad i, patatikolto ko nanom a marayas. Sapilaliwan ko Icip a tamdaw itiya, nikawrira, pakefoˈen ni Yihofa i riyar cangra. 28 Patatikol ko riyar miˈalol to sapilood a paliding, pakaefaay sufitay ato maemin a milepelay to Israil a sufitay ni Falaw, awaayto ko cecacecay aca a fadoc.
w09 3/15 7 fiedac 2-3 fatac
Aka Mapawan ci Yihofaan
Tiya misakiemel ko sufitay no Icip miparakat toya masamoayto a sapilood a paliding i, polong a Israil tamdaw tangasaay to i lawac no Kahngangay a Riyar. Oraanto i, milayaˈ haca to kamay ci Mosi pasayra i Kahngangay a Riyar, patatikolen ni Yihofa ko nanom a matefad, miˈalol ci Falawan ato sufitay ningra, mahidefek ko polong a sufitay, malidongto ko Israil tamdaw!—Kasadakan 14:26-28; ˈOlic 136:13-15.
O taliyokay a finacadan pakatengilay tonini a demak, halafinay ko nika talaw nangra. (Kasadakan 15:14-16) Ikor no 40 miheca, Yirikoay a Rahapan pasowal to tatosaay a Israil a faˈinayan: “Tada matalaw kami tamowanan . . . matengil niyam ko nika sadak namo nai Icip i, miˈicangan ni Yihofa ko nanom no Kahngangay Riyar.” (Yosuwa 2:9, 10) Ano oyato mitaˈongay to makaniway kawas a finacadan, cowa ka pawan to nika pilidong ni Yihofa to finawlan Ningra, coko mamangalef ko Israil tamdaw paifalocoˈen ci Yihofa hokira?
Kadkaden ko Odoˈ no Sinael
(Kasadakan 13:17) Yo papiliyasen ni Falaw ko Israil a finawlan i, soˈliˈlin o mangataay a lalan pakayra i kitakit no Filistin. Kawra cowa ka keriden no Kawas cangra a romakat tora lalan. Sowal no Kawas: “Maˈaraw no finawlan to mamilood i, masasiyor ko falocoˈ sapinokayaw i Icip, saan.”
it-1 300 fiedac
Lalan
Nai nolitenganho, itini i Palestan iraay ko militingay to kalo kitakit kalo niyaroˈ a lalan, ilalomaˈ iraay ko pina kalimlaan a sapisasingdi a lalan. (Saˈosi 20:17-19; 21:21, 22; 22:5, 21-23; Yosuwa 2:22; Kakitaan 21:19; 1 Samuil 6:9, 12; 13:17, 18; nengnengen ko LALAN NO HONGTI.) O cecay kalimlaan a lalan i, misatapangay nai Icip, sakatayra i Kaca ato Askilon, palidlid sa pasiwali pasiˈamis, mitaˈlif to Mikito tangasa i Hacor, kaˈamis no Kalili a riyar, tahira i Tamaskus. Onini a mitaˈlifay to Filistin a lalan, o sangataay a lalan nai Icip tangasa i mikiˈokan a pala, nikawrira sidaˈitay ci Yihofa mikerid to Israil tamdaw romakat to roma a lalan, toha saka ecaaw malood no Filistin tamdaw a matalawen cangra.—Kasadakan 13:17.
(Kasadakan 14:2) “Pasowalen iso ko Israil tamdaw, patatikolen cangra, itini i kalalaˈed no Miktol ato riyar i kaˈayaw no Pihahirot, misiˈayaw to Palcofon patireng to kopang a taloˈan. Siˈayawen namo ko Palcofon, ingata no riyar a patireng to kopang a taloˈan.
it-1 237 fiedac 2-3 fatac
Masadak Nai Icip
Icowaay a malicinowas ko Kahngangay Riyar, itira a romakat ko Israil tamdaw?
Tangasa ko Israil i “lawac no kohkohan” no Itam ikor, o saka tosa a pahiceraan nangra kora, palimoˈotan no Kawas ci Mosi “patikol, itini i ˈaˈayaw no Pihahirot i lawac no riyar a misataloˈan a milafin.” Mihaen ko Israil mifalic to lalan, toha sapiharatengaw ni Falaw to “masiwalaay a misarakarakat” cangra. (Kasadakan 13:20; 14:1-3) O sowal no mikakingkiway tamdaw, ora mirakatan no Israil o Ihaci hananay a lalan alatek, ora “patikol” hananay a tilid no Hipray, tatodong i, cowa ko nika pasasiyor aca, patahkalay to mamikoniyor cangra a romakat, tangasa i saka ˈamis no Suis ikor i, misafelitay cangra mikoniyor tangasa i katimol no Atakay, itiniay i kaetip no Suis. Ano itiniay toni pala ko Israil i, ano pasiˈamis ko ˈada a milepel cangranan i, cowa ko mamahela nangra ko kasadakan a lalan a milaliw, o mamaˈateng no Kahngangay Riyar, awato ko kasadakan a lalan nangra, sanay ko tamdaw a miharateng.
Isaka 1 hahekalan nolitengan no Yutaya a sowal i, matepiˈay tora nisowalan i sawni. (Nengnengen ko PIHAHIROT.) Ora kalimlaan i, o matiniay a sowal malecaday to matiliday i Fangcalay Cudad. (Kasadakan 14:9-16) Ano nengnengen, ora pitaˈlifan no Israil to Kahngangay Riyar i, miraayay to Suis (i pakaetip no Kahngangay Riyar), mihaenay o sufitay ni Falaw mikoniyor to lalan cowa ko mamalepel koya mitaˈlifayto to riyar a Israil tamdaw.—Kasadakan 14:22, 23.
Miˈosi to Sinael
(Kasadakan 13:1-20) Pasowalen ni Yihofa ci Mosi: 2 “Ilalomaˈ no Israil tamdaw, polong a fisac a wawa patafangen i Takowanan. Ano o faˈinayan wawa anca okangan pinaˈorip, ono Mako a maemin.” 3 Pasowalen ni Mosi ko finawlan: “Haratengen konini a romiˈad o piliyasan namo to Icip, oya kalakulian namo a pala. Samanen tano tadamaanay a ˈicel Ningra ko pikerid i tamowanan a paliyas naitini. Maamaan citamoday a epang aka komaen kamo. 4 O piliyasan namo a romiˈad i, itiniay i Apip a folad. 5 Maharekto ci Yihofa a miketon to sowal i tatoˈasan namo, toya o papafelien to sera no Kanan ato Hiti ato Amori ato Hifi ato Ipus a tamdaw sanay. Ano keridento Ningra a pacomod tora cihacolay ato ciwanengay no ˈodal a mamatangay a sera i, o mamisalisin kamo i saka cecay a folad no mihecahecaan tonini a lisin. 6 O kakomaen kamo to caay ka citamod a epang to pito a romiˈad. O saka pito a romiˈad i, o pisalisinan ci Yihofaan a romiˈad. 7 O kakomaen kamo to caay ka citamod a epang i lalomaˈ no pito a romiˈad, aka ka ira i tamowanan ko tamod, anca o citamoday a epang. 8 Toya romiˈad, pasowalen iso ko wawa: ‘Onini i, o sapiharatengaw to nipikerid ni Yihofa nai Icip, kihcod a nidemakan saki takowanan.’ 9 Ci Yihofa tano ciˈicelay a kamay a mikerid tisowanan a miliyas to Icip, onini romiˈad matiraay mitilidan i kamay ato pising iso a kacipinangan, mipalal tisowanan tonini a demak, mihaen i, malengo iso ko rikec ni Yihofa. 10 To mihecahecaan toniya romiˈad, haenen namo a midoedo konini sapalimoˈot. 11 “Namiketonan ni Yihofa kiso ato tatoˈasan iso, to papafelien kiso to Kanan a sera. Ikor ano keriden Ningra kamo micomod tora pala i, 12 o polong fisac wawa, ato polong fisac wawa no pinaˈorip, papacakaten namo ci Yihofaan. O faˈinayan wawa ato okangan a pinaˈorip oni Yihofa. 13 Kahacecay fisac wawa no lofa patisoden to tofor a siri, ano caay haenen namo i, o papiteken ko liˈel noya lofa. O fisac a faˈinayan wawa iso, haenen a mipatisod. 14 “Ikor nonini ano milicay ko wawa namo, o manan ko tatodong nonini a demak, ano saan i, pasowalen cingra: ‘Pakaynian ni Yihofa i tadamaanay a ˈicel Ningra mikerid kitanan nai Icip, miliyas to kalakulian ita a pala. 15 Itiya i, ˈatekak ko falocoˈ ni Falaw, caay kakahi pasadak kitanan, saka patayen ni Yihofa ko polong a fisac wawa no Icip, o fisac wawa no tamdaw tangasa fisac wawa no pinaˈorip, awaay ko cecacecay fadoc. Mankora, o fisac a okangan wawa, o papacakaten ako ci Yihofa, o fisac a wawa no tamdaw i, o papatisoden.’ 16 Tano tadamaanay ˈicel ci Yihofa mikerid kitanan a miliyas to Icip, mankora onini a romiˈad matiraay mitilidan i kamay iso a kacipinangan ato matiraay o safedfed to fongoh iso, papiharateng i tisowanan tonini a demak.” 17 Yo papiliyasen ni Falaw ko Israil a finawlan i, soˈliˈlin o mangataay a lalan pakayra i kitakit no Filistin. Kawra cowa ka keriden no Kawas cangra a romakat tora lalan. Sowal no Kawas: “Maˈaraw no finawlan to mamilood i, masasiyor ko falocoˈ sapinokayaw i Icip, saan.” 18 Orasaka, pakoniyoren no Kawas cangra a pakayra i kohkohan a pasayra i Kahngangay a Riyar. Itiya i, masieloday cangra a miliyas to Icip, matira o masarayrayay a sufitay cangra. 19 Alaen ni Mosi ko ˈokak ni Yosif, samanen papiketonan ni Yosif to sowal ko fofofofo no Israil, pasowal cangranan: “O papadamaen no Kawas kamo. Alaen namo naitini ko ˈokak ako.” 20 Naitira i Sukot cangra a lomowad, tangasa i lawac no kohkohan, itira i Itam patireng cangra to taloˈan a milafin.
SAKA 8 FOLAD 10-16 ROMIˈAD
O ODOˈ KO KIMAD NO KAWAS | KASADAKAN 15-16
“Pahemeken a Romadiw ci Yihofa”
(Kasadakan 15:1, 2) Itiya i, ci Mosi ato Israil tamdaw paˈolic tora ilaenoay a radiw, pahemek ci Yihofaan: “Pahemek kako a romadiw ci Yihofaan, samanen pakalowiday Cingra. O sufitay ato efa fahkolan Ningra i riyar. 2 Ci Yihofa o ˈicel no mako, cicediay Cingra, samanen paˈoripay Cingra i takowanan. O Kawas no mako Cingra, papahemeken ako Cingra, o Kawas no wama ako Cingra, sasaˈakawangen ako Cingra.
w95 10/15 11 fiedac 11 fatac
Misamanay Hano Katalawen ko Kawas Nohatini Hani?
11 Ci Yihofa misahecian a mipalaˈafo ko sufitay no Icip, misaˈakawang to saaroˈan no Niyah ikaˈayaw no midokaay Cingranan a tamdaw, mapalosiyang ko ngangan no Niyah. (Yosuwa 2:9, 10; 4:23, 24) Hay, masaˈakawangay ko ngangan no Kawas, mikikakaay toya malonayay awaay ko ˈicel a makaniway a kawas no Icip, ora makaniway a kawas cowa pakalidong to mitaˈongay cingranan a tamdaw. O Icip a tamdaw pasoˈlinay to adihayay a kawas, mitiˈeray to mamapatay a kalo tamdaw ato sufitay nangra, teloc i, matoras ko falocoˈ cangra. (ˈOlic 146:3) Mankora, tada masemer ko falocoˈ no Israil tamdaw misataˈangay a romadiw to Kawas, patahkal ko nika ngodo nangra to midaˈocay a Kawas. Midemakay ci Yihofa to kasapaan a ˈicel milidong cangranan!
(Kasadakan 15:11) Yihofaaw, cima ko pakalecaday Tisowanan a kawakawas saw? Cima ko pakalecaday Tisowanan, fangcal ato kasenengan, midemak to kafahkaˈan a demak saw?
(Kasadakan 15:18) Ci Yihofa o mamala hongti tahadaˈoc.
w95 10/15 11-12 fiedac 15-16 fatac
Misamanay Hano Katalawen ko Kawas Nohatini Hani?
15 Ano tomirengay kita i tatihi ni Mosi, maedeng masemer ko falocoˈ, romadiw a pakahemek Cingranan: “Yihofaaw, cima ko pakalecaday Tisowanan a kawakawas saw? Cima ko pakalecaday Tisowanan, fangcal ato kasenengan, midemak to kafahkaˈan a demak saw?” (Kasadakan 15:11) Naitiniay a misatapang, pinaay a hahekalan, o mahaenay a radiw cowa ka tomerep, itini saikoray a cudad no Fangcalay Cudad, sanay ci Yohani somowal to madimdiay a mapasimalay a sikawdan: “Romadiway cangra to radiw no kuli no Kawas ci Mosi ato radiw no Tofor a Siri.” O manan konini tadamaanay a radiw hani? “Ciˈicelay a Kawas ci Yihofa, tadamaanay kafahkaˈan ko demak Iso! Kiso o hongti no kasakitakit, tada o moecelay o soˈlinay ko demak Iso! Tapangaw, cima ko caay pitaˈong Tisowanan? Cima ko caay ka hemek to nika tadamaan Iso? Edengan Kiso a cecay ko Fangcalay.”—Paˈarawan 15:2-4.
16 Malecaday, anini pasalatay a midokoay a tamdaw cowa ko nika masemer to nisangaˈan no Kawas a maamaan, masemeran nanayho to rikec Ningra. O naitiniay i kasakitakit a tamdaw, tona mafanaˈay to moecelay rikec no Kawas, kalasaka dademaken i nokaˈorip, hato mapasalatay i noˈadingoan cangra, misiwatikay toni cikaditay a hekal, to mihecahecaan masaˈofaday ko kaˈaloman a tamdaw miliyasay toni manaholay a hekal, minokay tayni i makoracay moecelay a likakawa ni Yihofa. Mangataayto mamidemak ko Kawas to sano namalay a sasawkit Ningra, palaˈafo toni tatiihay a lekakawa no makaniway a pidoyongan. O midokoay ci Yihofaan a tamdaw i, mamidaˈoc a maˈorip i moecelay faelohay a hekal.
(Kasadakan 15:20, 21) O fafahiyan kaka ni Aron ci Miriyam oya mipairasolay mitatoy to tayko, polong fafahiyan mikihatiya cingranan, mikongkong a masakero. 21 Paˈolic a romadiw ci Miriyam micada to radiw no faˈinayan, saan a romadiw: “Radiwen a pahemek ci Yihofa, samanen pakalowiday Cingra. O sufitay ato efa fahekolan Ningra i riyar.”
it-1 1228 fiedac
Radiw
Ano mapolong a romadiw ko Israil tamdaw i, macacadaay a romadiw, anca cecay ko midiˈciway romaroma micadaay a romadiw, mahaen o nisowalan no Fangcalay Cudad a “paˈolicay” hananay. (Kasadakan 15:21; 1 Samuil 18:6, 7) Itini ˈOlic (ˈOlic 136 fedengan) o mahaenay paˈolicay a macacada a romadiw. O maˈoningay i Fangcalay Cudad, tiya patafang a pacakat ci Nihimiya to adipel no Yirusalim i, tatosaay ko kapot a macacada a romadiw.—Nihimiya 12:31, 38, 40-42; nengnengen ko RADIW.
it-2 971 fiedac 2 fatac
Fafahiyan a Pairasolay
Masowalay no Fangcalay Cudad a saka cecay a fafahiyan a pairasolay i, o ci Miriyam. Kalasaka dademakan no Kawas cingra mitenak to lihaf, alatek tano fangcalay saocor a mitemer cingranan, paˈolic to nipatemeran a sowal no Kawas. (Kasadakan 15:20, 21) Mankora hato mihaenay pasowal ci Miriyam aci Aron ci Mosian: “Coko pakayniay ci Yihofa tamiyanan a pasowal hakiya?” (Saˈosi 12:2) Pakaynian ni Yihofa ci Mikaan paihkal koni demak, to miocoran Ningra “ci Mosi, ci Aron aci Miriyam.” Itini kaˈayaw no Israil tamdaw mikayatay cangra, naitini i Icip a pasadak cangranan. (Mika 6:4) Soˈlin iraay ko fadangalan ni Miriyam mitaypiyaw to Kawas, patenak to lihaf Ningra, kawra o safa ningra ci Mosi o makedecay ko kalalaˈed ato Kawas. Ikor, tona pakidemay ko waywayan ni Miriyam hato mitefocan no Kawas cingra.—Saˈosi 12:1-15.
Kadkaden ko Odoˈ no Sinael
(Kasadakan 16:13) Kalafian sato i, ira a maefer ko tikolac a miedef to kamaroˈan no finawlan. Dafak sato i, ciˈoˈol ko taliyok no kamaroˈan nangra.
w11 9/1 14 fiedac
Mafanaˈay Kiso Han?
Tiya malafel i kohkohan ko Israil tamdaw i, misamanay hano o tikolac ao cowa ko romaroma ˈayam ko sapakaen no Kawas cangranan hani?
Miliyasto ko Israil tamdaw to Icip i, kinatosaay ko Kawas a pafeli to masaferengay a tikolac a pakaen cangranan.—Kasadakan 16:13; Saˈosi 11:31.
O tikolac hananay i, mimingay ko tatirengan 18 kongfen ko koedaw no tireng, 100 kongke ko areteng. Itiniay i Iwropa ato Asiya a marenak, o misalinalinahay a ˈayam, tohatiniay itiniay i kaˈamis a Afrika ato Arapiya to kasienawan. Ano maraod ko kalinahan nangra i, masaferengay ko tikolac mitaˈlif to Tenokay a Riyar ato Sinay Lotok.
O Cecay a Citing no Fangcalay Cudad (no Padaka) somowalay, o tikolac “kalikiay a maefer, mafanaˈay patoor to fali a maefer. Nikawrira, ano mafalic ko rakat no fali anca malotay to nika efer cangra i, safereng sanay ko tikolac a mapehel a mapasetaˈ matefad i sera.” Cecay tosa romiˈad pahanhan cangra ngaˈ padadotocay a malinah, mihaenay a madolo no tamdaw a micepet. Itini saka 20 hahekalan, o Icip to mihecahecean pacakayay to maedeng 300 ˈofad a tikolac to kakaenen no tamdaw.
Kina tosaay itini i kacanglahan ko Israil komaen to tikolac. Soˈliˈlin marariday cangra i kacanglahan mitaelif to Sinay, kawra o sowal no Fangcalay Cudad, papifiyoran ni Yihofa ko fali, paefer to tikolac tayni i pisakopangan no Israil tamdaw sanay.—Saˈosi 11:31
(Kasadakan 16:32-34) Pasowal sa ci Mosi: “O sowal ni Yihofa i: ‘ˈOsawen ko cecay a ficing no mana, naˈengen konini to malo sapatiriˈ i teloteloc namo. Mihaen i, maˈaraw nangra, yo mikerid Kako i tamowanan a pasadak nai Icip i, onini ko sapakaen Ako i tamowanan i kohkohan.’” 33 Pasowalen ni Mosi ci Aron: “Alaen ko cecay a kapowa, paroen tora kapowa ko cecay a ficing a mana. Ta telien konini i kaˈayaw ni Yihofa.” 34 Doedo han ni Aron ko nano sowal ni Yihofa ci Mosian. Alaen ningra koya kapowa a miteli i kaˈayaw no katatelekan ato Kawas a hako a minaˈeng.
w06 1/15 31 fiedac
Salicay no Miˈosiay
Caho ka halafin miliyas ko Israil tamdaw i, satapangayto ngaliwngiw to awaay ko kakaenen. Hato tefadan ni Yihofa ko mana pakaen cangranan. (Kasadakan 12:17, 18; 16:1-5) Itiya palimoˈotan ni Mosi ci Aron: “Alaen ko cecay a kapowa, paroen tora kapowa ko tosa a ficing a mana. Ta telien konini i kaˈayaw ni Yihofa.” Sowal no Fangcalay Cudad: “Doedo han ni Aron ko nano sowal ni Yihofa ci Mosian. Alaen ningra koya kapowa a miteli i kaˈayaw no katatelekan ato Kawas a hako a minaˈeng.” (Kasadakan 16:33, 34) Itiya i, midoedoan ni Aron ko sapalimoˈot minaˈeng to mana i kapowa, maharek a masangaˈ ko pitelian to katatelekan a hako i, telian ikaˈayaw nora hako kora kapowa a mana.
Miˈosi to Sinael
(Kasadakan 16:1-18) Liyasento no finawlan no Israil ko Ilim. Na miliyas cangra to Icip to saka 15 a romiˈad no saka 2 folad, tahira cangra i kalalaˈed no Ilim ato Sinay i Sin hananay a kohkohan. 2 Itira toya kohkohan a ngaliwngiw ci Mosian aci Aronan ko polong no Israil a finawlan. 3 Cowa ka tomerep a sowal cangra: “Ya itiraho i Icip kami i, i tatihi niyam ko ciparoay a sioy to nitangtangan a titi ato adihayay a maamaan a kakaenen. O nika itira niyam ko ngaˈay a patayen ni Yihofa. ˈArawhan i, keriden namo kami a patayni i kohkohan a micahiw to sapipatayaw i tamiyanan.” 4 Pasowal han ni Yihofa ci Mosi: “O tatefaden Ako nai kakarayan ko kakaenen a pafeli i tamowanan. O mamasadak to romiˈamiˈad ko finawlan a mipodpod to malo kakaenen nangra toya romiˈad. Pakaynien Ako tonini ko nipilifet i cangranan a mihapinang to nipidoedo nangra to rikec Ako. 5 Tangasa i saka enem a romiˈad i, ono tosaay a romiˈad ko papodpoden nangra a mipatala to saki cila.” 6 Sowal sa ci Mosi aci Aron i finawlan no Israil a maemin: “Anini a dadaya a mafanaˈ kamo to nika o ci Yihofa ko mikeriday i tamowanan a pasadak nai Icip. 7 Ano dafak i, o mamaˈaraw namo ko ˈdil ni Yihofa, samanen matengil ni Yihofa ko ngaliwngiw namo i Cingranan. Cima kami saw? Ngaliwngiw kamo i tamiyanan?” 8 Pasowal haca ci Mosi: “To dadaya pafelien ni Yihofa kamo to titi, to dafak ira ko epang to mamafecol kamo. Itiya i, mamafanaˈ kamo to matengilayto ni Yihofa ko ngaliwngiw namo. Cima kami saw? Cowa ko kami ko ngaliwngiwan namo, ao ci Yihofa ko ngaliwngiwan namo.” 9 Sowal sa ci Mosi ci Aronan: “Pasowalen ko polong no finawlan no Israil: ‘Ka tayni kamo i kaˈayaw ni Yihofa, matengilay Ningra ko ngaliwngiw namo.’” 10 Maharekto pasowal ci Aron to finawlan i, pasayra cangra i kohkohan a minengneng, maˈaraw nangra ko ˈdil ni Yihofa masadak nai toˈem. 11 Pasowal sa ci Yihofa ci Mosian: 12 “Matengilto Ako ko ngaliwngiw no finawlan no Israil. Pasowalen cangra: ‘Ano kalafian i, o kakomaen kamo to titi. Ano dafak i, o mamafecol kamo to epang. Ta itiyato kamo a mafanaˈ to ci Yihofa a Kawas namo Kako.’” 13 Kalafian sato i, ira a maefer ko tikolac a miedef to kamaroˈan no finawlan. Dafak sato i, ciˈoˈol ko taliyok no kamaroˈan nangra. 14 Yo maˈicangto ko ˈarsing noya ˈoˈol i, ira itira i kohkohan ko kohepicay a matiyaay o tahoper, matiya o kohepicay a soeda konini. 15 Maˈaraw no Israil konini i, cowa kafanaˈ to maanan kora, “o manan konini” saan cangra a masasowasowal. Sowal sa ci Mosi i cangranan: “Onini ko sapafeli ni Yihofa i tamowanan a kakaenen. 16 Pasowalay ci Yihofa: ‘Ano miala kamo i, patatodong han ko kakaenen namo a mipodpod. Ano papinaay ko paro no lomaˈ namo i, cecay a tamdaw tosa a ficing.’” 17 Saka, doedo han no Israil konini a sowal a miala. O roma a tamdaw i, adihay ko nialaan. O roma a tamdaw i, miming ko nialaan. 18 Yo milatang cangra i, oya adihayay ko nialaan i, awaay ko rafas, oya mimingay ko nialaan i, awaay ko cangoˈot. O kahacecay tatodong sa a kaenen nangra ko nialaan nangra.
SAKA 8 FOLAD 17-23 ROMIˈAD
O ODOˈ KO KIMAD NO KAWAS | KASADAKAN 17-18
“Misapoener ko Falocoˈ a Pahatatanam, Ikor Patoroden to ˈInorong”
(Kasadakan 18:17, 18) Sowal sa ci Yitro ci Mosian: “Caay ka ngaˈay kora demak iso. 18 O sakaroray iso ato finawlan iso konini, caay ka ngaˈay a teked han iso a cecay konini a adihayay a demak.
w13 2/1 6 fiedac
Ci Mosi—Matomesay ko Olah
Maolahay ci Mosi to finawlan. Mafanaˈay ko Israil tamdaw to kalasaka dademakan ni Yihofa ci Mosi mikerid cangranan, mankora, ano ira ko manan a pasangar nangra tayraay mikilim ci Mosian. Sowal sa ko Fangcalay Cudad: “Nano dafak tahira i dadaya, tomirengay i kaˈayaw ni Mosi ko finawlan.” (Kasadakan 18:13-16) Saromiˈad sanay ci Mosi mitengil to pasangar no finawlan, maedeng malotayay cingra. ˈArawhan i, makalimayho cingra a matayal saki finawlan.
(Kasadakan 18:21, 22) Kawra itini kiso i lalomaˈ no finawlan a mipiliˈ to matanengay, midokoay to Kawas, ngaˈayay tiˈeren, caay ka olah to sapaˈalofo a payci a tamdaw, nilnilen cangra malo kakeridan no cecay a patek (1,000) a tamdaw, ato kakeridan no cecay a soˈot (100) a tamdaw, ato kakeridan no lima a poloˈ a tamdaw, ato kakeridan no mamoetepay a tamdaw, mikowan to finawlan. 22 Ano iraay ko manan fangafang i, cangra sa ko mamisawkit to finawlan. O pasangaray a fangafang i, pataynien i tisowanan, o mimingay a demak, cangra sa ko misawkit. Patoroden cangra to ˈinorong, hongaˈ malowan ko ˈinorong iso.
w03 11/1 6 fiedac 2 fatac
Mitiˈer to Kawas Ngaˈ Ira ko Lipahak
ˈAyaw no mapatorod to aretengay a ˈinorong cangra i, patalahkalayto cangra to mangodoay to Kawas a capeling. Patahkalay cangra itini i waywayan, matalaw to saka keteraw no Kawas. Mafanaˈay ko ˈalomanay tamdaw to mikedecay a mitafo cangra to palinian no Kawas. ˈIntehay cangra to maˈanofay falocoˈ, patalahkalay to cowa ko mamanahol no fadangalan. Cowa ko mamisaloyaˈ to nika pitiˈer no tao cangranan, saka dademak to fadangalan a milifok to sakangaˈay no niyah ato sakangaˈay no salawina.
(Kasadakan 18:24, 25) Tangsol sa ci Mosi mitengil to sapaini a sowal ni Yitro, midoedo a midemak. 25 Piliˈen ni Mosi nai Israil tamdaw ko matanengay tamdaw, nilnilen cangra malo kakeridan no patek a tamdaw, somoˈot a tamdaw, lima poloˈ a tamdaw ato mamoetep a tamdaw, mikowan to finawlan cangra.
w02 5/15 25 fiedac 5 fatac
Madimadiay a Falocoˈ Mikayatay to Moecelay Tamdaw
Ci Mosi o misapoeneray ko falocoˈ a tamdaw. ˈIfowaay cingra padama to tao misaysay to pasangar, teloc i, tada malotayay cingra. O wama no fafahi ci Yitro, pasowalay to ciepocay a sapaini: Paladaˈen ko citatodongay a tamdaw milowan to ˈinorong iso sanay cingra. Mafanaˈay ci Mosi to citolasay ko ˈicel no niyah, hato makahiyay a micada toniniya sapaini. (Kasadakan 18:17-26; Saˈosi 12:3) O misapoeneray ko falocoˈ a tamdaw i, cowa ka kahot saan mikoramet to fadangalan, hanaca cowa ka talaw to aawato ko ˈicel a miˈimer to tao, sawad saan a paladaˈ to tayal toya citatodongay a tamdaw. (Saˈosi 11:16, 17, 26-29) Nawhani, mangalayay cangra padama to tao macakat i noˈadingoan. (1 Timoti 4:15) Coko mamihaen kita to demak han?
Kadkaden ko Odoˈ no sinael
(Kasadakan 17:11-13) Talafekangen ni Mosi ko tosa kamay i, ciˈicel ko Israil a milood. 12 Ano mafiyalto ko tosa kamay i, alaen nangra ko fakeloh, pakamaroˈen cingra. Ci Aron aci Hur maka itatihi ni Mosi, midama to kamay ni Mosi, tangasa i piceleman no cidal. 13 Mahaenay saka, malowidto na Yosuwa ko Amalik a tamdaw.
w16.09 6 fiedac 14 fatac
Aka Salomaingen ko Kamay Iso
14 Ta malalood ko Israil tamdaw ato Amalik i, ci Aron aci Hur mipadangay ci Mosian. Wa ngaˈay kita mihapinang to manan ko saali no tao a milayaˈ to kamay a mipadang cangranan. Cima ko papadangen ita hani? O misiˈayaway to pasangar a salikaka, patinakoen matoˈasto ko mihecaan, adadaay, misafelitan no paro no lomaˈ, matoˈolan nanay, mapatay ko salawina, cangra i, misaaliay to sapadang ita. O roma i, ngaˈayay kita mipadama to kaemangay tamdaw, patanektek cangranan, samanen taharoeroay cangra a papidemak to cowa ko kaolahan no Kawas a demak, anca makayhid to sapicangacangaw to ˈakawangay a picudadan, ˈakawangay a tayal, anca saka cihafayaw. (1 Tisalonika 3:1-3; 5:11, 14) O kakiemel kita mikihar to salikaka itini i kasaˈopoan, pitosilan, malacafay a komaen anca patingwaen cangra a mikihar.
(Kasadakan 17:14) Pasowal ci Yihofa ci Mosian: “‘O tatekopen Ako ko Amalik naitini toni hekal, awato ko papakaharateng i cangranan.’ Tiliden iso i cudad konini a sowal, ta eca ka mapawan, pasowalenho iso ci Yosuwa.’”
it-2 1145 fiedac
Tadacudad
Oniya mitilidan ni Mosi o mipatemeran no Kawas a tadacudad, o palinian no soˈlinay a pidoyongan. Awaay ko sasa toninian, samanen, mahelaay ko wacay ilalomaˈ no Fangcalay Cudad. Cowa ci Mosi ko minilnilay to niyahan malo kakeridan no Israil, ˈarawhan salakat cowa kakahi cingra a micada tonini a karetengay a ˈinorong. (Kasadakan 3:10, 11; 4:10-14) O Kawas ko minilnilay ci Mosian, pafeli to ˈicel midemak to kafahkaˈan, ano oyato misakawasay ni Falaw mihayay to o miocoran no Kawas ci Mosi. (Kasadakan 4:1-9; 8:16-19) Soˈlinay haw i, isaˈayaw awaay ko timolo ningra a caciyaw. Tona iraay ko sapalimoˈot no Kawas, hanaca midamaan no fangcalay saocor no Kawas, saka timolo ci Mosi a mitaypiyaw to Kawas, ikor mitilid to Fangcalay Cudad.—Kasadakan 17:14.
Miˈosi to Sinael
(Kasadakan 17:1-16) Doedoen no finawlan no Israil a maemin ko sowal ni Yihofa, naitini i Sin a kohkohan a palowad, panirnir a romakat a malinah. Tahira cangra i Rifitim a patireng to kopang a taloˈan i, mahapinang nangra to awaay ko nanom itira. 2 Saka, ngaliwngiw ko finawlan ci Mosian a somowal: “Pafelien kami to nanom.” Pasowal sa ci Mosi cangranan: “Nawiro ngaliwngiw kamo i takowanan saw? Nawiro pakaketer kamo ci Yihofaan saw?” 3 Tona tadamasoˈawto ko finawlan, sapinanomaw. Caayto ka tomerep cangra a ngaliwngiw ci Mosian: “Nawiro keriden iso kami pasadak nai Icip, mipatay tamiyanan ato fofofofo niyam ato pinaˈorip niyam to nika soˈaw saw?” 4 Saka, mingitangit sa ci Mosi ci Yihofaan: “Samaanen ako konini a finawlan? Sapitekolan sa cangra i takowanan to fakeloh a mipatay!” 5 Sowal sa ci Yihofa ci Mosian: “Keriden iso ko papina malohemay malitengay, tatoyen a mihawikid koya nao sapisetiˈ iso to Nayil a ˈalo a cokor, romakat i kaˈayaw no finawlan. Tatoyen i kamay ko cokor a talaˈayaw a romakat. 6 O aitini i kaˈayaw iso Kako, tomireng i tatihi no ˈongcoy i Horip a lotok. Setiˈen iso koya ˈongcoy i, aira ko nanom a masadak nai ˈongcoy, pananomen ko finawlan.” Haenen ni Mosi i kaˈayaw no malohemay malitengay no Israil a midemak. 7 Orasaka, o Masa han ningra pangangan kora kitiraan, hanaca o Miripa hananay pangangan, tona malacongisay ko Israil, cisasa ci Yihofaan a somowal: “Soˈlinay mikapot ci Yihofa i kitaanan han?” 8 Itiya i, ira a miraod ko Amalik tamdaw a milood to Israil tamdaw i Rifitim. 9 Pasowal sa ci Mosi ci Yosuwaan: “Piliˈen iso ko papinapina tamdaw, milood to Amalik tamdaw. Ano dafak mamitatoy kako to cokor no Kawas, tomireng i taporo no lotok.” 10 Doedo han ni Yosuwa ko sowal ni Mosi, malalood to Amalik tamdaw. Ci Mosi, ci Aron aci Hur tayra i satakaraway no taporo. 11 Talafekangen ni Mosi ko tosa kamay i, ciˈicel ko Israil a milood. 12 Ano mafiyalto ko tosa kamay i, alaen nangra ko fakeloh, pakamaroˈen cingra. Ci Aron aci Hur maka itatihi ni Mosi, midama to kamay ni Mosi, tangasa i piceleman no cidal. 13 Mahaenay saka, malowidto na Yosuwa ko Amalik a tamdaw. 14 Pasowal ci Yihofa ci Mosian: “‘O tatekopen Ako ko Amalik naitini toni hekal, awato ko papakaharateng i cangranan.’ Tiliden iso i cudad konini a sowal, ta eca ka mapawan, pasowalenho iso ci Yosuwa.’” 15 Patirengen ni Mosi ko cecay pipacakatan, o Yihofa Nisi han a pangangan kora pacakatan, 16 sowal sa: “Milooday ko Amalik tamdaw to kamaroˈan ni Yihofa, o mamararid ci Yihofa a milood cangranan.”
SAKA 8 FOLAD 24-30 ROMIˈAD
O ODOˈ KO KIMAD NO KAWAS | KASADAKAN 19-20
“Moetepay a Rikec Samaanay a Milingat Tisowanan”
(Kasadakan 20:3-7) Edeng Kako cecay, aka ira ko roma a kawas iso. 4 “Aka pitoˈto to samiyay, aka pitodong to faco no i kakarayanay, i seraay ato i nanomay a maamaan a dafong. 5 Aka nipitoros a mitaˈong to samiyay, aka makayhid a midoko to samiyay, samanen Kako ci Yihofa ko Kawas iso, o misaaliay to sasarocoden a mikaolah a Kawas. ˈIntehay Takowanan i, o papakaynien Ako i raraw nangra a mitefoc. Mararaw ko wama i, o mamitamorong to tatiihay teloc ko fofofofo, tahira i saka tolo saka sepat a kadadoedo no teloc. 6 Maolahay Takowanan halo midoedo to limoˈot Ako i, o papatalahkalen Ako to madimadiay a olah, tangasa i pinapina a patek a kadadoedo no teloc nangra. 7 “Aka pacefa kiso a misaka dademak to ngangan ni Yihofa o Kawas iso, samanen mipacefaay misaka dademak to ngangan Ningra a tamdaw, o tatefocen ni Yihofa.
it-2 225 fiedac 5-8 fatac
Moetepay a Rikec
Saka cecay Rikec i, paisaˈayawan ci Yihofa: “Edeng Kako cecay, aka ira ko roma a kawas iso.” (Kasadakan 20:3) Onini rikec milingatay to saˈakawangay a saaroˈan ni Yihofa: Tadaciˈicelay a Kawas, Satakaraway, Saˈakawangay a Tapang. Patalahkalay koni Rikec to edengan ci Yihofa, cowa ko ngangaˈay mitaˈong to roma a Kawas ko Israil.
Saka tosa Rikec i: “Aka pitoˈto to samiyay, aka pitodong to faco no i kakarayanay, i seraay ato i nanomay a maamaan a dafong. Aka nipitoros a mitaˈong to samiyay, aka makayhid a midoko to samiyay.” O Israil tamdaw cowa ko ngangaˈay tano maamaanan a pakayraan mitaˈong to samiyay, aka pakadit to ˈdil ni Yihofa. “Samanen Kako ci Yihofa ko Kawas iso, o misaaliay to sasarocoden a mikaolah a Kawas.”—Kasadakan 20:4-6.
Saka tolo a Rikec i, “Aka pacefa kiso a misaka dademak to ngangan ni Yihofa o Kawas iso.” (Kasadakan 20:7) Itini Hipray Maloloday a Fangcalay Cudad misaheciay a misafangcal to ngangan ni Yihofa (Oni ngangan itini i NWT kina 6,973 a mahadak; nengnengen ko “YIHOFA” ato [Masaka limlaan a Ngangan]). Itini i Moetepay Rikec a sinael (Kasadakan 20:2-17) kina faloay a masadak ko ngangan no Kawas. “Aka pacefa kiso a misaka dademak”, tatodong nora o tada masaka limlaan ko ngangan no Kawas sanay. Iraay ko fadangalan no Israil malo misawacayay tamdaw ni Yihofa, ano misafelit cangra, miliyas to Kawas i, malecaday o pacefaay a kalasaka dademak to ngangan no Kawas.—Isaya 43:10; Icikil 36:20, 21.
Saka sepat Rikec i: “O dadoedoen iso ko paselaˈan a romiˈad, kaˈimeren ko nika fangcal nonini a romiˈad. Enem a romiˈad matayal, midemak to tayal maemin, kawra saka pito a romiˈad o paselaˈan, pisarocodan a miharateng ci Yihofaan a romiˈad. Kiso ato wawa iso, matayalay iso, pinaˈorip, ato i niyaroˈay a roma finacadan a tamdaw, aka a matayal to maamaan a demak.” (Kasadakan 20:8-10) O fangcalay romiˈad ni Yihofa hananay no Israil minengneng koni paselaˈan a romiˈad, rarihaday ko tamdamdaw, mahawpay ko kuli ato pinaˈorip nangra. Roma sa i, onini a paselaˈan a romiˈad pairaay to toki nangra a misarocod to noˈadingoan a demak.
(Kasadakan 20:8-11) “O dadoedoen iso ko paselaˈan a romiˈad, kaˈimeren ko nika fangcal nonini a romiˈad. 9 Enem a romiˈad matayal, midemak to tayal maemin, 10 kawra saka pito a romiˈad o paselaˈan, pisarocodan a miharateng ci Yihofaan a romiˈad. Kiso ato wawa iso, matayalay iso, pinaˈorip, ato i niyaroˈay a roma finacadan a tamdaw, aka a matayal to maamaan a demak. 11 Enem a romiˈad ci Yihofa misangaˈ to kakarayan, to sera, to riyar ato ilalomaˈay a maamaan, saka pito a romiˈad misatapangay a paselaˈ, mansa palemedan ni Yihofa ko paselaˈan a romiˈad, malo fangcalay a romiˈad.
(Kasadakan 20:12-17) “Kangodoen ko wama ato wina, mihaen kiso ngaˈ palemeden ni Yihofa Kawas iso itini i sera halafin ko kaˈorip. 13 “Aka a pipatay to tamdaw. 14 “Aka ka ˈodang. 15 “Aka pitakaw. 16 “Aka pisamangah a pawacay a mikariˈang to tamdaw. 17 “Aka ka ˈanof to lomaˈ no tao, ato fafahi no tao, kuli, kolong lofa ato maamaan a dafong no tao.”
it-1 997 fiedac 3 fatac
Rikec
“Moetepay a Rikec” (Kasadakan 34:28) o taenengan no sarikec no Kawas, masalalomaˈay noya 600 a limoˈot no Kawas; orira limoˈot malecaday ko nika masaka limlaan, malecaday ira ko ˈicel miˈimer to Israil tamdaw. (Yakop 2:10) Oya saˈayaw a sepat a Rikec no Moetepay a Rikec i, somowalay to kalalaˈed no tamdaw ato Kawas; saka lima a Rikec somowalay to kalalaˈed no tamdaw ato Kawas ato wama wina; ora saikoray a lima a Rikec somowalay to kalalaˈed no tamdaw ato tamdaw, o kadadoedo nora saikoray a lima Rikec i: Mipatay to tamdaw, maˈodang, mitakaw, misamangah misawacay, ato maˈanof. Oni saka moetep a Rikec, mikecengay to maˈanofay falocoˈ, ano palalinien to rikec no roma a finacadan, tada mikiriwiˈay, awaay ko sakahahecad, samanen edengan o Kawas ko ngangaˈay mitefoc to matiniay a raraw. Soˈlinay haw i, oniniya saka moetep a Rikec patodicekay a mitoroˈ to lamit no mararaway a demak.—Kasadakan 20:2-17; Taniil 5:6-21; palalinien ko Ifiso 5:5; Kolosay 3:5; Yakop 1:14, 15; 1 Yohani 2:15-17.
it-2 225 fiedac 9 fatac-226 fiedac 2 fatac
Rikec
Saka lima Rikec i: “Kangodoen ko wama ato wina”, milingatay koni toya saˈayaway a sepat Rikec, somowalay to ˈinorong no tamdaw to Kawas. Tona o mitaypiyaway to Kawas ko wama wina, o malo wawaay midoedo toni saka lima Rikec, malecaday to misakaretengay to misangaˈay a Tatapangan ato minilnilan Ningra a tamdaw. Lalomaˈ noni Moetep a Rikec edengan oni saka lima Rikec iraay ko mihaydaan no Kawas a sakiˈok: “Palemeden ni Yihofa Kawas iso itini i sera halafin ko kaˈorip.”—Kasadakan 20:12; Limoˈot 5:16; Ifiso 6:2, 3.
Dotoc a pina Rikec i: Saka enem, “Aka a pipatay to tamdaw”; saka pito, “Aka ka ˈodang”; saka falo, “Aka pitakaw.” (Kasadakan 20:13-15) O Masoritik a cudad mihaenay ko pisilsil: “Aka a pipatay to tamdaw, aka ka ˈodang, aka pitakaw.” Ono Krisiya a Fangcalay Cudad (Codex Alexandrinus, Codex Ambrosianus) mihaenay ko pisilsil: “Aka pipatay to tamdaw, aka pitakaw, aka ka ˈodang. Filo a Fangcalay Cudad (The Decalogue, XII, 51) mihaenay ko pisilsil: “Aka ka ˈodang; aka pipatay to tamdaw; aka pitakaw”; ono Fatikanus a Fangcalay Cudad mihaenay ko pisilsil: “Aka ka ˈodang, aka pitakaw; aka pipatay to tamdaw.” Saka siwa Rikec, pakayni i sasowalen: “Aka pisamangah a pawacay a mikariˈang to tamdaw.”—Kasadakan 20:16.
Saka moetep Rikec i (Kasadakan 20:17), Aka ka ˈanof (maˈanof to dafong ato hafay no tao, mahawpay ko fafahi no tao), tada o mikiriwiˈay a rikec koni. Ono tamdaw a parikecay cowa ko mamipatireng to hatiniay a sarikec, samanen awaay ko pakayraan nangra a sakadademak to mahaenay a sarikec. ˈArawhan ci Yihofa cowa ka lecad, mafanaˈay Cingra mihapinang to falocoˈ no tamdaw, ihekalay ko nika fanaˈ to ikemoday a harateng no tamdaw, mankora pakaynian Ningra saka moetep a Rikec, papitamorong to tamdaw tora ˈinorong i kaˈayaw no Kawas.—1 Samuil 16:7; Taneng 21:2; Yirimiya 17:10.
Kadkaden ko Odoˈ no sinael
(Kasadakan 19:5, 6) Ono Mako a maemin ko polong no kasafinacadan, kawra ano misaheci kamo a mitengil to sowal Ako, midoedo to katatelekan Ako i, o mamalo kalimlaan Ako a hafay kamo nai kasafinacadan. 6 O mamalo no Mako kamo, mala cisaysiay a kitakit, o fangcalay a finacadan.’ Haenen iso pasowal ko Israil tamdaw.”
it-1 698 fiedac 6-7 fatac
Saysi
Malo Saysiay a Krisciyang. Mikiˈokay ci Yihofa, ano midofdof ko Israil tamdaw to katatelekan Ningra i, o mamala “cisaysiay a kitakit, o fangcalay a finacadan” cangra. (Kasadakan 19:6) Nikawrira o naitiniay i lalomaˈan ni Aron a masakapotay a saysi, o sapasamo aca, o mitaypiyaway to aira a tadamaanay a masakapotay a saysi, mankora mitalaay tora kairaan noni masakapotay a saysi. (Hipray 8:4, 5) Oniniya sapasamo mamaterek tahira kahererekan no Rikec a katatelekan, mapatirengto ko faelohay a katatelekan, itiya malaˈosi. (Hipray 7:11-14; 8:6, 7, 13) Paisalakatan ni Yihofa ko Israil tamdaw malo saysi itira i Hongti Kitakit no Kawas, ikor ngaˈ o ˈalafangto a tamdaw o ngangaˈay mala saysi.—Dmak 10:34, 35; 15:14; Loma 10:21.
Tona cowa ka ˈaloman ko makahiyay micada ci Kristoan a Yutaya tamdaw, mansa ano o Yutaya aca tamdaw, cowa ko mamalepon koniya soˈlinay a cisaysiay a kitakit, ato fangcalay a finacadan. (Loma 11:7, 20) Cowa ka madimadi to Kawas ko Israil tamdaw, ˈayaw no pina hahekalan pakaynian no Kawas ci Hosiyaan a paliˈayaw a mirikec cangranan: “Tona mifalahay kamo to sifanaˈ Ako, o fafalahen Ako kamo, cowa ko mamala saysi Ako kamo. Tona matawalay namo ko sarikec no Kawas, o tatawalen Ako ko teloteloc namo.” (Hosiya 4:6) Malecaday, pasowalan ni Yis ko ˈaˈideman no Yutaya: “O Hongti Kitakit no Kawas o ˈaˈafasen kamo, pafeli toyanan ciminaroˈay a finacadan.” (Matay 21:43) Nikawrira tiya i hekalho ci Yis Kristo i, kamayanay cingra a midoedo to Rikec ni Mosi, kamayanay mihayi to fadangalan no lalomaˈan ni Aron a saysi, mankora palimoˈotan ningra koya ciadadaay to fanges a tamdaw tayra i saysi a patiriˈ, pasowal cangranan papidoedo to saˈosi no Rikec a pacakat to sapatoˈaya.—Matay 8:4; Marko 1:44; Luka 17:14.
(Kasadakan 20:4, 5) “Aka pitoˈto to samiyay, aka pitodong to faco no i kakarayanay, i seraay ato i nanomay a maamaan a dafong. 5 Aka nipitoros a mitaˈong to samiyay, aka makayhid a midoko to samiyay, samanen Kako ci Yihofa ko Kawas iso, o misaaliay to sasarocoden a mikaolah a Kawas. ˈIntehay Takowanan i, o papakaynien Ako i raraw nangra a mitefoc. Mararaw ko wama i, o mamitamorong to tatiihay a teloc ko fofofofo, tahira i saka tolo saka sepat a kadadoedo no teloc,
w04 3/15 27 fiedac 1 fatac
Kalimlaan no Kasadakan a Cudad
20:5—“Ano mararaw ko wama i, o mamitamorong to tatiihay a teloc ko fofofofo, tahira i saka tolo saka sepat a kadadoedo no teloc,” samaanen ni Yihofa midemak koni hani? Ano lomahadto ko tamdaw ngaˈayto a mitamorong to ˈinorong i, o papakayni to waywayan ato pakayraan no niyah a micada to sasawkit. Tiya mapolong ko Israil kitakit mitaˈong to samiyay i, o teloteloc nangra micadaay to tatiihay a teloc. Ano oyato a madimadiay a Israil tamdaw mafiyoray cangra, samanen polong a kitakit manaholayto ko pidoyongan, hato mamisaˈicel cangra ngaˈ matafo ko madimadiay.
Miˈosi to Sinael
(Kasadakan 19:1-19) Miliyasto ko Israil tamdaw to Icip to saka tolo a folad, toya romiˈad tangasato i Sinay a kohkohan. 2 Naitira i Rifitim a malingad cangra, tangasa i kohkohan no Sinay, itira i kohkohan a patireng to taloˈan. Itiraay i kaˈayaw nora lotok ko Israil a patireng to taloˈan. 3 Tayra ci Mosi i Kawasan, nai lotok ci Yihofa miowaw cingranan: “Pasowalen iso ko teloc ni Yakop, pasowalen ko Israil tamdaw, 4 ‘Maˈarawto namo ko pidemak Ako to Icip tamdaw, matiya o ˈalilis a micelak to sapikpik a mifafa tamowanan, mikerid tamowanan minokay i Takowanan. 5 Ono Mako a maemin ko polong no kasafinacadan, kawra ano misaheci kamo a mitengil to sowal Ako, midoedo to katatelekan Ako i, o mamalo kalimlaan Ako a hafay kamo nai kasafinacadan. 6 O mamalo no Mako kamo, mala cisaysiay a kitakit, o fangcalay a finacadan.’ Haenen iso pasowal ko Israil tamdaw.” 7 Saka, likelon sato ci Mosi, mitahidang to malohemay malitengay no finawlan, tadtaden cangra to kihcod a sowal ni Yihofa. 8 Pacaˈof sa ko finawlan a maemin: “O nano sowal ni Yihofa i, o makakahi kami a midemak.” Tangsol tayra ci Mosi ci Yihofaan a pasowal to sowal no finawlan. 9 Pasowalen ni Yihofa ci Mosi: “Nengnengen! Pakayni i toˈem Kako tayni i tisowanan, ta matengil no finawlan ko sowal Ako i tisowanan, mihaen i, o papakasoˈlin cangra i tisowanan.” Haenen ni Mosi pasowal ci Yihofa to sowal no finawlan. 10 Pasowalen ni Yihofa ci Mosi: “Katayra kiso i finawlan, pasowalen cangra anini ato dafak mikorac to niyah, mikorac to rikoˈ. 11 Mipatala a misaday cangra to saka tolo a romiˈad, samanen toya romiˈad ikaˈayaw no polong a finawlan maepod ci Yihofa i Sinay a lotok. 12 Konisen iso i taliyok no lotok palalaˈed to finawlan, pasowalen cangra: ‘Ka pisinanot kamo, aka tayni i lotok, aka pingata to salawacan. O miraoday tonini a lotok i, o papatayen. 13 Aka tefingen kora tamdaw, o tatekolen to fakeloh cingra a mipatay, anca panaˈen cingra a mipatay, ano o tamdaw anca pinaˈorip, cowa ko papaˈoripen.’ Ano milaepato a pasoni ngaˈ, ngaˈay cangra tayra i lotok.” 14 Malikelonto ci Mosi tayra i finawlan, mikorac cangrnan, mifacaˈ ko finawlan to rikoˈ. 15 Pasowalen ni Mosi ko finawlan: “Mipatala a misaday to saka tolo a romiˈad. Aka pidiˈi to fafahi.” 16 Saka tolo a romiˈad i, mafitiliˈ ira ko lapiyat, tahepoen no kifetolay toˈem ko lotok, matengil ko taˈangayay a soni no laepa. Mamirmir ko finawlan a maemin a matalaw. 17 Keriden ni Mosi ko finawlan militemoh to Kawas, tayni cangra i laeno no lotok. 18 Pakanamal ci Yihofa a patefo i Sinay a lotok. Oraanto, tahidangen ni Yihofa ci Mosi tayra i satakaraway no lotok. 19 Taˈangay taˈangay ko soni no laepa, itiya i, pasowal ci Mosi, pangihaˈ ko Kawas a pacaˈof cingranan.
SAKA 8 FOLAD 31 –9 FOLAD 6 ROMIˈAD
O ODOˈ KO KIMAD NO KAWAS | KASADAKAN 21-22
“O Pinengneng ni Yihofa to ˈOrip”
(Kasadakan 21:20) “Ano o kilang ko sapisetiˈ no nima to kuli, tangsol a mapatay i kamay ningra kora kuli i, o tatefocen cingra.
it-2 1105 fiedac
Misetiˈ
O saˈosi no rikec, o kuli (ano faˈinayanto fafahiyanto) ano caka pidofdof to tawki anca mitowakang to sapalimoˈot i, iraay ko fadangalan no tawki tano kilang a misetiˈ cangranan. Ano tangsol sa mapatay ko kuli i, o tatefocen ko tawki. Ano mataˈlif ko cecay tosa a romiˈad mapatay ko kuli i, o wacay koni to cowa ko sapipatayaw ko tawki tora kuli, tona o hafay no tawki ko kuli, iraay ko fadangalan mitefoc to kuli. O karetengay a hafay no tawki ko kuli, cowa ka ciharateng ko tawki to sapipalahdawaw to dafong no niyah. Hanaca, ano mataˈlif ko cecay tosa romiˈad ngaˈ mapatay ko kuli, awaay ko pinang to nika mapakidemay a misetiˈ hokira anca o roma lalangian ko sakapatay. Mihaenay, cowa ko tatefocen ko tawki.—Kasadakan 21:20, 21.
(Kasadakan 21:22, 23) “Ano malaˈodot ko tatosa tamdaw ano masetol nangra ko cipuyapuyay a fafahiyan, ta pakapesiˈ cingranan, kawra cowa ka mamaan ko ˈorip, o papatefoc koya misetolay. Mangaˈay a milongoc ko faˈinay noya cipuyapuyay to sapatefoc, nikawrira, o misawkitay ko citodongay a miketon tonini. 23 Ano mapatay ko tamdaw i, o ˈorip ko sapatiko to ˈorip,
lvs 95 fiedac 16 fatac
Mitiya to Kawas Misalimla to ˈOrip
16 O ˈorip no kahacecay tamdaw, misalimlaan ni Yihofa. Ano oyato a caayho ka hofocen a wawa, misalimlaan no Kawas. Itini i Rikec ni Mosi, ano caay ko mipadetengan a masekong ko cipuyapuyay a fafahiyan, mapatay cingra anca oya i puyapuyay a wawa i, itini pinengneng ni Yihofa, o mamitamorong kora tamdaw to mipatayay a raraw. Tatodong nora sowal i, soˈliˈlin cowa ko mipadetengan, kawra iraay ko mapatayay, mansa oha papatefoc to ˈorip. (ˈOsien ko Kasadakan 21:22, 23.) O ˈorip hananayto no Kawas ko cowaho ka hofocen a tamdaw. Mafanaˈ toninian i, samaanay ko pinengneng no Kawas to padeteng sanay pasadak to puyapuy hani? To mihecahecaan iraay ko pinaay soˈot a walwalan ko mipatayan a puyapuy, samaanay ko harateng no Kawas hani?
(Kasadakan 21:28, 29) “Ano ira ko micoraˈay a kolong a mipatay to tamdaw i, o papaloen to fakeloh a mipatay koya kolong, aka kaenen ko titi ningra. Nikawrira, aka tefocen koya cikolongay. 29 Nikawrira, ano pinangan noya kolong a micacoraˈ a padokaˈ to tamdaw, ano kinapinapinato a sowalen koya cikolongay, ano caay songilaˈen ningra a paketing koya kolong, ta micoraˈ to tamdaw a mipatay i, o papaloen to fakeloh a mipatay koya kolong ato haloya cikolongay a tamdaw a patayen.
w10 4/15 29 fiedac 4 fatac
Manonoˈay ci Yihofa Rihaday Kiso
O sarikec no Kawas aka pisakahemaw to katalawan no ˈorip sanay, o matiniay a saˈosi matatodongay i pinaˈorip, patinakoen, ano masongtol no kolong ko tamdaw a mapatay, o papatayen no tawki kora kolong, toha saka ecaaw miliyaw mipatay to roma tamdaw. Tona cowa ko ngangaˈay a kaenen anca paliwalen ko titi nora kolong, tada mamasipon ko tawki. Ano madokaˈ ko tamdaw to nika masongtol no kolong, kawra caayho ka dimokosen konini a kolong, sasamaan ko teloc hani? Ano miliyaw haca misongtol a mipatay to tamdaw koniya kolong i, o papatayen kora tawki atora kolong. Ano mararid ko tamdaw caka pisongilaˈ midimokos to kolong, o hatiniay a sarikec o papatalipaˈelal cangranan misinanot to demak.—Kasadakan 21:28, 29.
Kadkaden ko Odoˈ no Sinael
(Kasadakan 21:5, 6) Ano fanekfek ko sowal no kuli “Maolahay kako to tawki, to fafahi ako ato wawa ako caay ka ciharateng kako to sapiliyasaw” ano saan cingra i, 6 o kakeriden no tawki cingra tayra i kaˈayaw no Kawas, papitadiˈecen to fawahan cingra anca cacafiˈan no fawahan, ofangen to lilit ko tangila ningra. Mihaen i, o tatahadaˈoc a malakuli no tawki cingra.
w10 1/15 4 fiedac 4-5 fatac
Misamaanay Hano Patafang to Tireng Kiso ci Yihofaan?
4 O Krisciyang patafang to tireng o karetengay a demak, cowa ko nipihayda aca. Patafang to tireng i Kawas o manan ko epoc kitanan hani? Nengnengen ita, ano mihayda ko tamdaw itini noka lalaˈed ato tao pairaay to manan a epoc. Itini kalalaˈed no widang hananay, ano ciharatengay kiso sawidangen no tao i, misawidangho kiso cingranan wangaˈ, mitamorong to ˈinorong no malo widangay hananay. Tatodong i, ano mihayda ko falocoˈ iso, iraayto ko ˈinorong iso a ciharateng to widang. Itini i Fangcalay Cudad o masowalay a mala widangay i, ci Tafiti aci Yonatan. Tada misalimlaan nangra kora kalawidang nangra, pakayni toninian matatelekay cangra tatosa. (ˈOsien ko 1 Samuil 17:57; 18:1, 3.) O matiniay a fangcalay no kalawidang tada mikiriwiˈay. Nikawrira, ano mihaydaayto i falocoˈ ko mala widangay tamdaw, iraayto ko ˈinorong nangra, mitoor tora mihaydaan nangra, hongaˈ tangongol tangongol kora kalalaˈed.—Taneng 17:17; 18:24.
5 Somowalay ko Rikec no Kawas to roma mihaydaan a kalalaˈed, papairato epoc. Ngaˈayay ko tawki ako ano saan ko kuli a miharateng, sapidaˈocaw a malakuli no tawki i, o ngangaˈay a matatelek ato tawki. Sowal no rikec i: “Ano fanekfek ko sowal no kuli ‘Maolahay kako to tawki, to fafahi ako ato wawa ako caay ka ciharateng kako to sapiliyasaw’ ano saan cingra i, o kakeriden no tawki cingra tayra i kaˈayaw no Kawas, papitadiˈecen to fawahan cingra anca cacafiˈan no fawahan, ofangen to lilit ko tangila ningra. Mihaen i, o tatahadaˈoc a malakuli no tawki cingra.”—Kasadakan 21:5, 6.
(Kasadakan 21:14) Ano ira ko mangolaway to cimaan i, padeteng sa mipatay tora tamdaw, soˈlina milaliw cingra tayra i kaˈayaw no pipatoˈayaan i Takowanan i, o tatatengtengen a mipatay cingra.
it-1 574 fiedac
Laepa, Waˈa
Kasadakan 21:14, tosaay ko tatodong alatek, saka cecay i, o misahalakaay mipatay to tamdaw, o papatayen cingra, ano o saysito i, papatayen cingra; saka tosa i, cowa ko mipadetengan a mapatay ko tamdaw, soˈlina tayra i kaˈayaw no pipatoˈayaan a mimetmet to waˈa no patoˈayaan, cowa ko mamahepol ko raraw ningra.—Palalinien ko 1 Hongti 2:28-34.
Miˈosi to Sinael
(Kasadakan 21:1-21) “Pasowalen ko Israil a finawlan tonini a rikec: 2 “Ano micakay kiso to cecay a Hipray a tamdaw a palakuli i, enem a mihecaan ko katayal ningra i tisowanan, saka pito a mihecaan i, mangaˈayto a mapasalat cingra, aka piala to manan sapatefoc a ˈaca cingranan. 3 Ano cecayay cingra tayra itiya, papiliyas han cecay cingra. Ano cifafahiyayto cingra itiya i, o mamihakelong ko fafahi ningra a miliyas. 4 Ano mipafafahiyan no tawki cingra, ciwawa ko fafahi ningra i, o fafahi ato wawa ono tawki cangra, cecay aca cingra a miliyas. 5 Ano fanekfek ko sowal no kuli ‘Maolahay kako to tawki, to fafahi ako ato wawa ako caay ka ciharateng kako to sapiliyasaw’ ano saan cingra i, 6 o kakeriden no tawki cingra tayra i kaˈayaw no Kawas, papitadiˈecen to fawahan cingra anca cacafiˈan no fawahan, ofangen to lilit ko tangila ningra. Mihaen i, o tatahadaˈoc a malakuli no tawki cingra. 7 “Ano ira ko pacakayay to fafahiyan a wawa a palakuli i, caay ka ngaˈay a matiya o faˈinayan a kuli a mapasalat cingra a miliyas. 8 Ano caka olah ko tawki cingranan malo fafahi ningra i, sapipacakayaw cingranan i tao i, awaay ko fadangalan ningra a pacakay i ˈalafang a tamdaw, samanen o cingra ko maˈosiay toya fafahiyan. 9 Ano sapafeliaw ko tawki to wawa no niyah a malo fafahi ningra i, o sasamatiyaen ningra to fafahiyan wawa no niyah ko piharateng cingranan. 10 Ora faˈinayan wawa ano cifafahi to roma i, aka lowanen ko pipafeli to kakaenen ato rikoˈ ato pidiˈi cingranan. 11 Ano caay ka pafelien cingra toni tolo i, mangaˈay cingra a pasalat a miliyas, hamaanto a pafeli to sapatefoc cingra. 12 “O mipatayay to tamdaw i, o papatayen cingra. 13 Nikawrira ano cowa ko mipadetengan a mipatay, nao mipakoniraan no Kawas a mafekad i, mangaˈay cingra tayra i misaˈosian a kitiraan a milaliw. 14 Ano ira ko mangolaway to cimaan i, padeteng sa mipatay tora tamdaw, soˈlina milaliw cingra tayra i kaˈayaw no pipatoˈayan i Takowanan i, o tatatengtengen a mipatay cingra. 15 O misetiˈay to wama wina a tamdaw, o papatayen cingra. 16 “O milihiway a mipalit to tamdaw i, ano mipacakayan kora tamdaw anca miterekan i kamay no niyah i, o papatayen cingra. 17 “O miˈkakay to wama wina i, o papatayen cingra. 18 “Ano malacongis ko tatosa tamdaw, o cecay miala to fakeloh anca tano sakemo a misekong cingranan, cowa ka patay, kawra roˈenef sa mafotiˈ to nika adada, 19 ikor ngaˈayto cicokor a masadak a romakat i, ora misetiˈay a tamdaw cowa ka ciraraw, edeng o papatodongen ko sipon noka caay ka tayal ningra, tangasa i kaadahan ningra. 20 “Ano o kilang ko sapisetiˈ no nima to kuli, tangsol a mapatay i kamay ningra kora kuli i, o tatefocen cingra. 21 Ano caayho ka patay to cecay tosa a romiˈad koya kuli i, caayto ko tatefocen koya tawki, samanen tano paycian no tawki micakay kora kuli.