Pinengnengan to lalakaw no Mitosilay ato Nikaˈorip Rayray no Saˈopo
SAKA 9 FOLAD 7-13 ROMIˈAD
O ODOˈ KO KIMAD NO KAWAS | KASADAKAN 23-24
“Aka Mikihatiya to ˈAlomanay”
(Kasadakan 23:1) “Aka piyakayak to caay ko soˈlinay a sowal. Aka mikihatiya to tatiihay tamdaw, misamangah pawacay a mikariˈang to tamdaw.
Mafanaˈay Kiso to Soˈlinay Demak Han?
7 Maolahay kiso tano soci a tikami paladaˈ to lihaf i widang han? Ano hatiraay i, ano maˈaraw iso ko sinpong anca matengilay a nalifetan i, mahecaday o milasilay to sinpong a tamdaw, tangsol a milasil han? Nikawrira, ˈayaw no paparakat kiso tora tikami i, licayenho ko niyah: “O soˈlinay koni lihaf han? Soˈlinay mafanaˈ kako to kihcod a demak han?” Ano caho ka cipinang kiso pasowalento ko tao i, miyakayakayto kiso to mararaway a lihaf. Mihaenay haw i, ano cisasaay kiso tora lihaf, keniˈen a mipadeng ao cowa ko paparakaten kora lihaf.
8 Caho ka pisaharaterateng parakatento ko tikami iraay ko katalawan. Itini i romaroma kilac, makecengay ko mitosilay a demak ita. Itini i matiniay kilac, o misafelitay tamdaw alatek padeteng wa saan a miyakayak to mararaway a lihaf, araaw to sapatalawaw kitanan. Patinakoen itiniay i Rowasiya, miyakayakay ko dimeng to mangah lihaf somowal to misafelitay ko mikayatay a salikaka sanay. ˈAlomanay salikaka pakasoˈlinay tora mangah a lihaf, teloc i, miliyasay to likakawa no Kawas, tada kadayayan! Kahemekan i, ikor patikolay minokay ko ˈalomanay salikaka, kawrira iraay ko romaroma cowa ka patikol i likakawa no Kawas, samanen malahedawayto ko pakasoˈlin no falocoˈ nangra. (1 Timoti 1:19) Misamaan kita ngaˈ caka ira ko matiniay a kadayayan a teloc hani? Aka a miyakayak to tatiihay anca awaayho ko pinang a lihaf, aka a tangsol saan pakasoˈlin to macadaay a lihaf. Songilaˈen ita mihapinang to soˈinay kora lihaf hokira.
(Kasadakan 23:2) Aka mikihatiya to ˈalomanay midemak to mararaway. Aka mikihatiya to ˈalomanay miˈakong to moecalay.
it-2 703 fiedac 1 fatac
Aron
Sasinanoten i, ci Aron kina toloay a mararaw, kawra ano nengnengen cowa ko kakeridan nora raraw cingra, ao pasalatan ko niyah mafiyor no tao a miliyas to moecelay lalan. Mangalefay toya sakina cecay a raraw, nao ngangaˈay a miˈimer ci Aron caka “mikihatiya to ˈalomanay”, patoor cangranan. (Kasadakan 23:2) Nikawrira, kamayan tano mangodoay a somowal to ngangan ni Aron ko Fangcalay Cudad. Tiya itiniho i sera ci Yis i, mihayay to malo saysiay a ˈinorong ni Aron.—ˈOlic 115:10, 12; 118:3; 133:1, 2; 135:19; Matay 5:17-19; 8:4.
(Kasadakan 23:3) Aka paˈading to manikaway itini i kalacongisan.
it-1 1061 fiedac 5 fatac
Mapohaway
Mapohaway ko mata hananay, ngaˈayay mitaypiyaw to nika nahor no mirikecay caka sadafdaf ko pisawkit; Rikec ni Mosi kinapinapinaay a palimoˈot aka piala to sapaˈalofo, misakakinih to tamdaw, samanen mihaen to demak mipohaway to mata no misawkitay, miwilet to masadafdafay a noka pisawkit. “O mapohaway to mata no tamdaw ko sapaˈalofo.” (Kasadakan 23:8) “Mapohaw to mata no citanengay ko sapaˈalofo.” (Limoˈot 16:19) Misawkitay tamdaw ano citanetaneng cingra, kawra ano mialaho to sapaˈalofo no tao i, mafiyorayto ko pisawkit ningra. O sarikec no Kawas cowa ka somowal aca to nika tatiih no paˈalofoay a demak, somowalayho to nika pifiyor no olah to tao, sowal sa: “Aka pisakakinih kamo to pakosiya ato tadamaanay a tamdaw.” (Lifi 19:15) Mihaenay haw i, o misawkitay tamdaw aka a sao falocoˈan saan ko demak anoca mikihatiya to harateng no ˈalomanay, tona o cipayciay tamdaw hato masakakinih ko pisawkit.—Kasadakan 23:2, 3.
Kadkaden ko Odoˈ no Sinael
(Kasadakan 23:9) “Aka pipaekel to roma finacadan, samanen itini i Icip nao roma a finacadan kamo, matanamayto namo ko roray itini i roma a kitakit.
w16.10 9 fiedac 4 fatac
Aka Mapawan to Hinalafangay a Demak
4 Mikidatay to siniˈadaay a falocoˈ no Israil tamdaw ci Yihofa, papisakareteng to roma finacadan a tamdaw. (ˈOsien ko Kasadakan 23:9.) O Israil tamdaw ‘mafanaˈay to falocoˈ no pacarcaray i roma a pala’, tiya ˈayaw no mala kuli cangra i Icip i, mahapinangayto ko pilikaf no Icip tamdaw, miliyas cangranan, hanaca misalaeno to pihakelongan nangra. (Satapangan 43:32; 46:34; Kasadakan 1:11-14) Soˈlin tada marorayay ko kaˈorip o Israil tiya pacarcar i Icip, kawra misaaliayho ci Yihofa cangranan misangaˈay to pacarcaray tamdaw, samatiyaen “o niyah a finacadan” ko pinengneng cangranan.—Lifi 19:33, 34.
(Kasadakan 23:20, 21) “O aocoren Ako ko cecay coyoh mikerid i kaˈayaw namo, midipot tisowanan i lalan, mikerid tisowanan tayra i mipatalaan Ako a pala. 21 Songilaˈen mitengil ko sowal ningra. Pakayniay i ngangan Ako ko sakatayra ningra, caay ko mamisodod cingra to pipaculi a raraw namo.
it-1 1090 fiedac
Mikail
1. Somowalay pangangan ko Fangcalay Cudad ci Kapriilan coyoh, o roma i, ci Mikail “o sakakaay a kakeridan no coyoh” hananay cingra. (Yuta 9) Sakina cecay masadak ko ngangan ni Mikail itiniay i Taniil saka 10 fedengan, “o cecay a kakeridan no coyoh” hananay cingra. Itiya iraay ko cecay ilaenoay a coyoh matenaˈay no ‘ˈaˈideman no Pirsiya’, tayraay ci Mikail a mipadama cingranan. O “misimaway to finawlan [ni Taniil] a kakeridan no coyoh hananay ci Mikail. (Taniil 10:13, 20, 21; 12:1) Itiniay maˈaraw, o ci Mikail koya mikayatay to Israil milakowit to kohkohan a coyoh. (Kasadakan 23:20, 21, 23; 32:34; 33:2) Sowal no Fangcalay Cudad, ‘kakeridan no coyoh ci Mikail na macaculiay aci Akoma, pakayniay i mapatayay tireng ni Mosi a macaculi.’ Oniniya sowal matatepiay tora ifafekang a sowal.—Yuta 9.
Miˈosi to Sinael
(Kasadakan 23:1-19) “Aka piyakayak to caay ko soˈlinay a sowal. Aka mikihatiya to tatiihay tamdaw, misamangah pawacay a mikariˈang to tamdaw. 2 Aka mikihatiya to ˈalomanay midemak to mararaway. Aka mikihatiya to ˈalomanay miˈakong to moecalay. 3 Aka paˈading to manikaway itini i kalacongisan. 4 “Ano maˈaraw iso ko mararaway ko lalan a kolong anca lofa no ˈada i, kitingen a patayra i cingranan. 5 Ano mapaekel no ˈinorong ko lofa no ˈada iso, padamaen cingra micoloˈ to ˈinorong nora lofa. 6 “Ano mapakokot ko manikaway tamdaw i, aka piˈakong to moecelay. 7 “Aka pacefa a mipakokot, aka pipatay to moecelay awaay ko raraw a tamdaw, samanen ‘o moecelay ko demak ningra’, caay ko sasaan Kako to matiniay a mariˈangay tamdaw. 8 “Aka piala to sapaˈalofo, samanen o mipohaway to mata no tamdaw ko sapaˈalofo, hanaca miˈakongay to sowal no moecelay tamdaw. 9 “Aka pipaekel to roma finacadan, samanen nao roma a finacadan kamo itini i Icip, matanamayto namo ko roray itini i roma a kitakit. 10 “Katayal to enem a mihecaan a mipaloma i omah a misoped to kinaira. 11 Saka pito a mihecaan i, paselaˈen ko omah iso. O manikaway ilalomaˈ namo ngaˈayay komaen to lengaw sanay i omah a kinaira, o ˈosaw i, pakaenen ko ˈaˈadopen. Haenen ko demak to pisafadisosoˈan ato pisaolifan iso. 12 “Katayal to enem a romiˈad, saka pito a romiˈad i, paselaˈen ko kolong ato lofa iso, ano o kuli iso ato roma finacadan tamdaw ngangaˈay a paselaˈ. 13 “O nano sowal Ako i tamowanan, ˈimeren a midemak. Romaroma a kawas, aka pikidat to ngangan nangra, aka pasadak nai ngoyos namo. 14 “Cecay a miheca kina tolo, doedoen iso ko lisin to saki Takowanan. 15 Doedoen ko Kaecaan Patamod to Epang a Lisin. Itini i misaˈosian a romiˈad no Apip a folad, tooren ko sapalimoˈot Ako a komaen to caay citamod a epang to pito a romiˈad, tona itiyaay kiso masadak nai Icip. Aka wakawak sa tayni i kaˈayaw Ako. 16 O roma i, maroray kiso a mipaloma to omah, rihaked to saˈayaway a kinaira i, doedoen ko Pilitodan a Lisin. Ta milisopsop kamo to nilitodan i omah to saikoray no mihecaan i, doedoen ko Pinaˈengan a Lisin. 17 Cecay miheca kina tolo, o polong a faˈinayan tatayni i kaˈayaw no Tapang ci Yihofaan. 18 “Ano mipacakat to sapatoˈaya i Takowanan i, aka palamlamen to remes no sapatoˈaya ko citamoday a epang. O mipacakatan i pisalisinan a simal no sapatoˈaya, aka sidayen itira tahadafak. 19 “Itira tora isaˈayaway a nilitodan iso, piliˈen ko sangaˈayay a kinaira, patayraen i sefi no Kawas iso ci Yihofaan. “Aka sapitangtangen to titi no tofor a siri ko hacol no tawinaan a siri.
SAKA 9 FOLAD 14-20 ROMIˈAD
O ODOˈ KO KIMAD NO KAWAS | KASADAKAN 25-26
“O Masaka Limlaan Lalosidan no Fangcalay Kopang”
(Kasadakan 25:9) Sahecien a midoedo to nipatiriˈan Ako tisowanan a safaco, misangaˈ to fangcalay kopang ato maamaan lalosidan no fangcalay kopang.
it-2 1050 fiedac
Katatelekan a Lipa
Misafacoan a Misangaˈ. Palimoˈotan ni Yihofa ci Mosi papipatireng to fangcalay kopang, salakat pasowalan cingra to pisafaco tora Katatelekan a Lipa, samanen o masaka limlaan a lalosidan no fangcalay kopang kora Katatelekan a Lipa. O kakayaˈ nora lipa i, 111.25 kongfen, o kakahad 66.75 kongfen, o takaraw 66.75 kongfen, tano akasiya a kilang a misangaˈ, pataˈdipen to ekim ko lalomaˈ ato papotal nira, paeresen to ekim ko taliyok. O satahaf nora Lipa i, kakayaˈ ato kakahad nira palecaden tora Lipa, tano ekimen a misangaˈ, ao cowa ko mitaˈdipan to ekim a kilang. Toktoken a misangaˈ to ekim ko tosa a kirupin, ala cecay ko makolawac no satahaf, pasasiˈayawen koya tosa a kirupim, celaken ko sapikpik nira a papitahpo to satahaf noya Lipa. (Kasadakan 25:10, 11, 17-22; 37:6-9) O “pihepolan to raraw” hananay kora satahaf.—Kasadakan 25:17; Hipray 9:5; nengnengen ko PIHEPOLAN TO RARAW A SATAFAH.
(Kasadakan 25:21) Tahafen koya Lipa. Paroen i Lipa koya Sapalimoˈot a Sapad.
it-2 1050 fiedac 7 fatac
Katatelekan a Lipa
O sapinaˈangenan to fangcalay dafong ko Katatelekan a Lipa, miparoan koya tosa “masasapaday a fakeloh”, nitilidan ko 10 a Rikec. (Kasadakan 25:16) Ilaloma no Lipa “iraay ko cipinaroay to mana a ekim a kapowa” ato “cicoˈongay a cokor ni Aron”, kawra tiya mapatireng ko fangcalay sefi ni Solomon i, awaayto a maala no tamdaw kora. (Hipray 9:4; Kasadakan 16:32-34; Saˈosi 17:10; 1 Hongti 8:9; 2 Rayray 5:10) ˈAyaw no mamapatay ci Mosi, alaan ko cecay “rikec a cudad” pafeli ko malo saysiay a Lifi tamdaw, palimoˈot cangranan. “Alaen konini a nitilidan a rikec no Kawas. Patelien [i tatihi no Katatelekan] ato Kawas ita a Lipa. Ta ira itira konini to malo wacay no ciraraway a finawlan to sakapasetek nangra i raraw.”—Limoˈot 31:24-26.
(Kasadakan 25:22) Itira Kako i satahaf noya Lipa, i kafekang no Lipa i kalalaˈed noya tosa a kirupim, masasoˈaraw tisowanan, pasowal tisowanan to papasowalen iso to Israil tamdaw a kihcod a demak.
it-2 1050 fiedac 8 fatac
Katatelekan a Lipa
O nika itira no Kawas. O Katatelekan Lipa milingatay to nika itira no Kawas. Mikiˈokan ni Yihofa ci Mosi: “Itira Kako i satahaf noya Lipa, i kafekang no Lipa i kalalaˈed noya tosa a kirupim, masasoˈaraw tisowanan, pasowal tisowanan to papasowalen iso to Israil tamdaw a kihcod a demak. “O aitini Kako i kafekang no Lipa, i toem a patalahkal.” (Kasadakan 25:22; Lifi 16:2) O sowal ni Samuil pakayni ci Yihofaan “maroˈay i kalalaˈed no kirupim coyoh Cingra” sanay (1 Samuil 4:4), mihaenay haw i, onini tatosa kirupim coyoh “mitaypiyaway to sapilood paliding ni Yihofa.” (1 Rayray 28:18) “Yo micomod ci Mosi i fangcalay kopang a masasowal ato Kawas i, matengil ningra ko sowal nai laˈed no tosaay a kirupim i kafekang no satahaf no Katatelekan a Lipa a pasowal i cingraan.” (Saˈosi 7:89) Ci Yosuwa ato sakakaay saysi ci Finihas na itiniay i kaˈayaw nora Katatelekan Lipa a milicay ci Yihofaan. (Yosuwa 7:6-10; Kakitaan 20:27, 28) Nikawrira, tohatiniay edengan ko sakakaay saysi ko ngaˈayay cecay miheca kina cecay a micomod i safangcalay kitiraan, itiyaay pakaˈaraw tora Katatelekan Lipa, tayra a midemak to pihepolan to raraw a lisin.—Lifi 16:2, 3, 13, 15, 17; Hipray 9:7.
Kadkaden ko Odoˈ no Sinael
(Kasadakan 25:20) Celaken ko tosa a sapikpik noya kirupim, mitahpo to Lipa. Masasiˈayaw koya tatosa kirupim, pasayni i Lipa ko pising nangra.
it-1 658 fiedac 15 fatac
Kirupim
Ya patireng ko Israil tamdaw to fangcalay kopang i kohkohan i, iraay ko tatosaay kirupim a coyoh, tano ekiman mitoˈtoˈ, telian i kafekang no satahaf no Lipa. Masasiˈayaw ko pising nora coyoh, sao mitaˈongay a mihinokop, celaken ko tosa a sapikpik miˈading to satahaf no Lipa. (Kasadakan 25:10-21; 37:7-9) O roma i, ilalomaˈay a kiradom ato sapilaˈed to safangcalay kitiraan a kiradom, iraay matesel ko faco no kirupim.—Kasadakan 26:1, 31; 36:8, 35.
(Kasadakan 25:30) Parariden a miteli i cukuwi ko sapacakat a epang, itini i kaˈayaw Ako.
it-1 217 fiedac
Sapacakat a Epang
12 kora epang, mitelian i cukuwi no fangcalay kopang, itini i paselaˈan a romiˈad mifalican to faelohay a midohdohan a epang. (Kasadakan 35:13; 39:36; 1 Hongti 7:48; 2 Rayray 13:11; Nihimiya 10:32, 33) Ono Hipray sowal tora sapacakat epang, tatodong i, “o pising nora epang” sanay. O “pising” hananay a Hipray sowal nolatekay “ikaˈayaway” sanay ko tatodong. (2 Hongti 13:23) Mankora ora sapacakat a epang miraridan a miteli i kaˈayaw ni Yihofa a sapatoˈaya. (Kasadakan 25:30) O roma a sowal tora sapacakat a epang “mitinglohan a epang” hananay (2 Rayray 2:4), ato “sapatafang a epang” hananay, “nipacakatan i Kawas a epang“ (Marko 2:26), ato “sapacakat i Kawas a epang“ (Hipray 9:2).
Miˈosi to Sinael
(Kasadakan 25:23-40) “O akasiya a kilang ko sapisangaˈ to cecay a cukuwi, 89 kongfen ko kakayaˈ, 44.5 kongfen ko kakahad, 66.75 kongfen ko takaraw, 24 pataˈdipen to ekim, paeresen to ekim ko taliyok nira. 25 Pataliyoken to masakapalay a kilang ko taliyok nira, paeresen to ekim konini. 26 Sangaˈen to ekim ko sepat a masakadangay to paˈonocan a miˈorong, paketingen i sepat a kasaciko no waˈay noya cukuwi konini. 27 I lawacen no cukuwi a paketing koya ekim a kadang, ta mangaˈay a micocok to ˈonoc a miˈorong toya cukuwi. 28 O akasiya a kilang ko sapisanga’ to ˈonoc, tafoen to ekim, sapiˈorong to cukuwi. 29 O ekim ko sapisangaˈ to tipid, takid ato sapatakid a totoˈ ato kaysing. 30 Parariden a miteli i cukuwi ko sapacakat a epang, itini i kaˈayaw Ako. 31 Sangaˈen to ekim ko cecay a padawdawan. Toktoken konini a misangaˈ to padawdawan ato kamaroˈan nira ato waˈay nira, pasacaˈacaˈangen, pasapokopokohen, pasahanahanaen a paeres konini. 32 Pasadaken ko enem a caˈang i padawdawan, makaha tolo ko fatiˈiyan nira. 33 Cecay a caˈang i, tolo ko hana, papokohen, papilingen konini. 34 Sepaten ko hana no waˈay noya padawdawan, papokohen, papilingen. 35 Cipokoh i kalaeno ko makaha cecay noya tolo a caˈang. 36 O kimooday a ekim ko tatoktoken a misangaˈ to pokoh ato caˈang ato padawdawan a maemin. 37 Sangaˈen ko pito a tipid no dawdaw, likaten a mipatedi ko kaˈayaw. 38 O ekim ko sapisangaˈ to sapikerit to timsim no dawdaw ato tipid no dawdaw. 39 Tano 34.2 a kongcin a ekim ko sapisangaˈ to padawdawan ato polong no lalosidan. 40 Songilaˈen iso midoedo ko nipatiriˈan Ako i tisowanan i lotok a faco a misangaˈ.
SAKA 9 FOLAD 21-27 ROMIˈAD
O ODOˈ KO KIMAD NO KAWAS | KASADAKAN 27-28
“Pakayni to Caˈedong no Saysi, O Manan ko Mamananam Ita?”
(Kasadakan 28:30) Paroen i sakifalohang a sapisawkit a paya ko Urim ato Tumim, ano tayni ci Aron i kaˈayaw ni Yihofa i, caˈdongen i falohang ningra. Ci Aron itini i kaˈayaw ni Yihofa i, o cacaˈdongen ningra a mararid ko sakifalohang a sapisawkit a paya misawkit to Israil.
it-2 450 fiedac 1 fatac
Urim ato Tumim
O ˈalomanay mitatadtaday to Fangcalay Cudad a tamdaw somowal, ora “Urim” ato “Tumim” o sapiˈedaw sanay. Mankora o mihongyakan ni Canmos Mofat a Kasadakan 28:30 o “sapiˈedaw no kawas” hananay ningra. O romaroma mikakingkiway somowal ora “Urim” ato “Tumim” hananay, o toloay a fakeloh, o cecay mitoˈtoˈan to “hay”, o roma mitoˈtoˈan to “cowa”, oya saka tolo fakeloh awaay matoˈtoˈ ko manan. Itiraay tora mahodocay a sapiˈedaw ko caˈof, ano awaay ko manan matiliday, o awaay ko caˈof. O roma a sowal no tamdaw, ora “Urim” ato “Tumim”, o tosaay kingpiay a fakeloh, o cecay mikodongan to kohtingay, ora cecay o kohcalay. Ano fahkolen kora fakeloh ano kohcalay tosa, patahkalay to “hayi”, ano o kohtingay tosa i, patahkalay to “cowa”, ano kohtinay ko cecay kohcalay ko cecay i, patahkalay to awaay ko caˈof. Kina cecayay papilicayan ni Sawlo ko saysi to papadotoc cingra a milepel to Filistin hokira, cowa pacaˈofen no Kawas. Miharateng ci Sawlo iraay ko mararaway no sufitay na saan cingra, licay sa to Kawas: “Kawas no Israil, ngitangiten Kiso pakaynien i Tumim a pacaˈof kami!” Teloc i, ci Sawlo aci Yonatan ko mapiliˈay, mitoroˈ to mararaway ko cecay nangra. Tora sinael pasowal ci Sawlo ci Yihofaan “ngitangiten Kiso pakaynien i Tumim a pacaˈof kami”, o matiraay a sapiˈedaw masasiromaay to mifahkolan a sapiˈedaw, nikawrira iraay ko kalalecadan nangra.—1 Samuil 14:36-42.
(Kasadakan 28:36) “Sangaˈen to ekim ko cecay a paya, toˈtoˈen itira a mitilid ko ‘O fangcalay i, oni Yihofa’.
it-1 390 fiedac 6 fatac
Saˈayawan no Fongoh
Saysi no Israil. Papengecen no sakakaay saysi ko ekim a paya i kaˈayaw no tamohong ningra, malo “sapatafang a fangcalay paya”. I fafekang nora paya, toˈtoˈen ko: “O fangcalay i, oni Yihofa”. (Kasadakan 28:36-38; 39:30) O sakakaay saysi hananay i, o taypiyaw no Israil itini i midokoay ci Yihofaan a demak, o mamitafo to makoracay cangra, ora mitoˈtoˈan i paya a tilid, o papatalapaˈelal to polong no finawlan, ano mihodop cangra ci Yihofaan i, o mamitafo to makoracay. Oya sakakaay saysi no Israil mitaypiyaway toya tadamaanay a sakakaay saysi ci Yis Kristo, tada matatodongay kora. Ci Yihofa ko minilnilay cingranan, patalahkalay to nika fangcal no Kawas.—Hipray 7:26.
(Kasadakan 28:42, 43) Tano keliwen a misangaˈ ko kafer nangra, satahepo to laeno nangra. Ora kafer nani tatelecan tangasa i cepiˈ ko kakayaˈ. 43 Ano micomod ci Aron ato faˈinayan a wawa ningra i fangcalay taloˈan, anca tayni i kaˈayaw no pipacakatan, matayal i fangcalay kitiraan i, caˈedongen koni kafer, to saka ecaaw ka ciraraw a mapatay. O rikec to saki ci Aronan ato teloc ningra a tahadaˈoc konini.
w08 8/15 15 fiedac 17 fatac
O Waywayan Paihkal to Matenesay Mipaˈdil ci Yihofan
17 Ano midoko kita ci Yihofaan i, sasasinanoten ita, to papaihkal to mangodoay to Kawas a noka matenes. Patnakay 5:1 sanay ko sowal: “Ano tayra kiso i sefi i, pinaˈon to rakat iso.” Ci Mosi aci Yosuwa mitengilay toni sapalimoˈot, mihelong ko cokap, samanen ora katomirengan nangra o fangcalay a sera. (Kasadakan 3:5; Yosuwa 5:15) Mihaen cangra, o paihkalay to nika ngodo to Kawas. O saysi no Israil o mamicaˈedong to tano keliwan misangaˈ a kafer, “to sapatahpo to laeno.” (Kasadakan 28:42, 43) Doedoen no saysi koni saˈosi, ano matayal cangra i patoˈayaan i, caay ka maˈaraw ko laeno nangra. Ano paroto no lomaˈ no saysi o waywayan nangra mamitoor to palinian no Kawas, midama to nika matenes no saysi.
Kadkaden ko Odoˈ no Sinael
(Kasadakan 28:15-21) “Papisangaˈen ko miteselay tamdaw to sakifalohang a sapisawkit a paya. Haenen to pisangaˈ to fangcalay rikoˈ, tano matiyaay o ekim ko cengel a walay ato langdaway ato tarangitangay ato kahngahengangay a fanoh a walay ko sapisangaˈ a mitesel tonini. 16 Salipaen ko pisangaˈ tonini, tepiken a patataˈdip. O kakayaˈ i, 22.2 a kongfen, o kakahad nira i, 22.2 a kongfen. 17 Paketingen itira i sakifalohang a sapisawkit a paya ko tadamaanay a fakeloh, sepaten a rayaray konini. O saka cecay a rayaray i, o kahngangay a tadamaanay a fakeloh ato topac a fakeloh ato imirarto a fakeloh. 18 O saka tosa a rayaray i, o torko a fakeloh ato tayamont a fakeloh ato tingalaway maliemiay a kangdaway a fakeloh, 19 saka tolo a rayaray i, o tarangitangay a odoˈ ato kohcalay a odoˈ ato tarangitangay tingalaway a fakeloh, 20 saka sepat a rayaray i, o langdaway a fakeloh ato kahngangay a odoˈ ato folalacay tingalaway a fakeloh. O ekim ko pikafitan nira. 21 O kahacecay a odoˈ mitaypiway to cecay wawa ni Israil, haenen o mitoˈtoˈan a mitilid, tiliden ko ngangan no 12 a ngasaw.
w12 8/1 26 fiedac 1-3 fatac
Mafanaˈay Kiso Han?
Sowal no Fangcalay Cudad, o sakifalohang a sapisawkit a paya paketingan ko odoˈ sa i, o naicowaay kora ˈodo hani?
Ta miliyas ko Israil to Icip, micomod i kohkohan i, palimoˈotan no Kawas cangra misangaˈ to sakifalohang no saysi a sapisawkit a paya. (Kasadakan 28:15-21) Oniya sakifalohang a paya, mipaketingan ko kahngangay odoˈ, topac a odoˈ, imirarto a odoˈ, torko a odoˈ, tayamont odoˈ, tingalaway maliemiay a kangdaway odoˈ, tarangitangay a odoˈ, kohcalay odoˈ, langdaway odoˈ, kahngangay odoˈ, folalacay tinaglaway odoˈ. Icowaay a miala ko Israil tonini odoˈ hani?
Itini i lintad no Fangcalay Cudad, o ˈaca no odoˈ tada matekesay, marariday sapisasingdi. O Icip a tamdaw pakayniay i pisadingdi a milifok to odoˈ, o romaroma naitiniay i ra:ay a pala, patinakoen, naitiniay i Iran, Afohan, nolatek naitiniay i Into. Adihayay ko masakenakenaay odoˈ i Icip, kawra maˈimeray no hongti ko pikorkor to odoˈ. Itini i lintad ni Yopu, mikorkoray to tefon ato lalinkay no sera a lalan, mikilim to odoˈ. Cowa ko naitiniay aca i lalinik no sera a odoˈ, somowalay ci Yopu to tayamont ato topac a odoˈ.—Yopu 28:1-11, 19.
Sowal i Kasadakan, tiya miliyas ko Israil to Icip i, “mialaan ko dafong no Icip” sanay. (Kasadakan 12:35, 36) Mihaenay, ora odoˈ i sakifalohang a paya no sakakaay saysi, o naitiniay i Icip a alaen no Israil alatek.
(Kasadakan 28:38) Oniya paya pengecen i tamohong ni Aron, mamitamorong ci Aron to pipatelac no tamdaw to fangcalay a sapacakat. Ora fangcalay a sapacakat hananay i, o pahadakan no Israil a kihcod a fangcalay a sapakaolah a dafong. Pengecen i tamohong ni Aron kora paya, ta layapen ni Yihofa a micada cangra.
it-2 189 fiedac 2 fatac
Makorac
Pinaˈorip ato Nilitodan Pinaloma. Itini pinengneng ni Yihofa, o fisac wawa no okangan kolong, lalifanohen siri ato siri sahtoay o makoracay, cowa ko ngangaˈay alaen no tamdaw, o papacakaten patoˈaya, oyato a malo makoracay a titi papafelien ko saysi. (Saˈosi 18:17-19) Oya saˈayaway a nilitodan a pinaloma ato cecay no moetepay a sapakiyaho o fangcalay a dafong, malecaday to romaroma sapacakat a sapatoˈaya a fangcalay dafong. (Kasadakan 28:38) O misafangcalan ni Yihofa a dafong sahtoay o makoracay, cowa ko ngangaˈay sakahemawen, cowa ko ngangaˈay pakaditen, hanaca cowa ko ngangaˈay kalasaka dademaken i kalo demakan. Patinakoen, o kinaira no cecay no moetepay a nilitodan a emi, nao papakiyahoen, kawra alaen a misangaˈ to epang i, o micicihay to rikec pakayni i fangcalay dafong kora. Ano doedoen ko saˈosi, o papacakaten ningra ko cecay tanoktokay a okangan a lalifanohen a siri malo sapihepol to raraw, hanaca o papatongal cingra to cecay no limaay a mipafeli. Oriraan rikec mamafanaˈ ko tamdaw to kalimlaan a kimad, kahacecacecay a tamdaw o mamisakareteng to kihcod to papacakaten ci Yihofaan a fangcalay dafong.—Lifi 5:14-16.
Miˈosi to Sinael
(Kasadakan 27:1-21) “O akasiya a kilang ko sapisangaˈ to pipatoˈayaan, salipaen ko pisangaˈ, 2.23 kongce ko kakayaˈ nira, 2.23 kongce ko kakahad nira, 1.34 kongce ko takaraw nira. 2 Paketingen i sepat a ciko no pipatoˈayaan ko waˈa, tafoen to fodawan konini. 3 Sangaˈen ko patelian to ˈafo a kapowa ato tepi ato kaysing ato ˈitis ato tipid no namal. Tano fodawan a misangaˈ tonini a lalosidan a maemin. 4 Sangaˈen ko saki pipatoˈayaan a lasa, sangaˈen a paketing i sepat a ciko no fodawan a lasa ko sepat a fodawan a kadang to paˈonocan. 5 Celaken a pataliyok i salaenoan noya pipatoˈayaan koya fodawan a lasa, tangasa i fatad noya pipatoˈayaan ko takaraw nira. 6 Sangaˈen to akasiya a kilang ko ˈonoc no pipatoˈayaan, tafoen to fodawan konini. 7 Ano miˈorong i, pacocoken koya ˈonoc i makofatiˈiyan a kadang. 8 O sapad ko sapisangaˈ to pipatoˈayaan, pakongkong han ko lalomaˈ nira. Doedoen koya nisowalan Ako i tisowanan i lotok a faco a misangaˈ. 9 “O keliw ko tatenooyen a misangaˈ to kopang to malo sapiˈadipel to taliyok no fangcalay a taloˈan to maloputal nira. O kakayaˈ no sakatimol a kopang i, 44.5 a kongce. 10 Tosa a poloˈ ko hecek, tosa a poloˈ ko fodawan to paranaan nira, o lingkim ko pakafitan ato falat nira. 11 Malecad ko sakaˈamis a fatiˈiyan, o kakayaˈ no kopang i, 44.5 a kongce, tosa a poloˈ ko hecek, tosa a poloˈ ko fodawan to paranaan nira, o lingkim ko pakafitan ato falat nira. 12 O sakaetip a fatiˈiyan i, 22.25 kongce ko kakahad no kopang, moetep ko hecek, moetep ko paranaan nira. 13 O sakawali a fatiˈiyan to pasayraay kasadakan no cidal i, 22.25 kongce ko kakahad no kopang. 14 Itiniay ko sacomod no fawahan, sakawanan a fatiˈiyan i, 6.68 kongce ko kakahad no kopang, tolo ko hecek tolo ko paranaan nira. 15 I sakawili iraay ko 6.68 kongce ko kakahad a kopang, tolo ko hecek tolo ko paranaan nira. 16 “I fawahan no putal i, 8.9 kongce ko kakayaˈ no sapaˈading to fawahan, o keliw ato langdaway, ato tarangitangay ato kahngahengangay a fanoh a walay ko tatenooyen a misanga’ to sapaˈading, teselen konini. Sepat ko hecek sepat ko paranaan nira. 17 O lingkim a falat ko sapakakafit to hecek i taliyok no putal, o lingkim ko sapisangaˈ to pakafitan i hecek, o fodawan ko sapisangaˈ to paranaan no hecek. 18 O kakayaˈ no ˈadipel no putal i, 44.5 kongce, o kakahad i, 22.25 a kongce, o takaraw i, 2.23 a kongcen. O keliw ko sapisangaˈ to kopang, o fodawan ko sapisangaˈ to paranaan no hecek. 19 O lalosidan no fangcalay a kopang ato tektek no ˈadipel no putal a maemin i, o fodawan ko sapisangaˈ. 20 “Palimoˈoten ko Israil a finawlan a papipatayni to sangaˈayay a olif a simal to malo dawdaw, ta mararid a malikat ko dawdaw. 21 Ci Aron ato teloc ningra i, o ailalomaˈ no fangcalay taloˈan i kaˈayaw no katatelekan a Lipa i paputal no sapalaˈed a kopang a padawdaw cangra. Onini a dawdaw i, o mamararid a malikat i kaˈayaw ni Yihofa nai dadaya tangasa i dafak a malikat. O dadoedoen no Israil a finawlan ato teloc nangra a tahadaˈoc konini a limoˈot.”
SAKA 9 FOLAD 28 –10 FOLAD 4 ROMIˈAD
O ODOˈ KO KIMAD NO KAWAS | KASADAKAN 29-30
“Sapacakat ci Yihofaan a Sapakaolah”
(Kasadakan 30:11, 12) Pasowalen ni Yihofa ci Mosi: 12 “Ano misaˈosi kiso to tamdaw no Israil i, papipacakaten ko kahacecacecay nangra to sapatefoc to ˈorip no niyah, matingkito ko ngangan nangra i, caay ka cilafo cangra.
it-2 51-52 fiedac
Misaˈosi to Tamdaw
Itini i Sinay a kohkoh. Ta masadak to Icip ko Israil to saka tosa miheca saka tosa folad, itiniay i Sanay a kohkohan a mipataloˈan cangra, palimoˈotan ni Yihofa ci Mosi midemak to sakina cecay a pisaˈosi to tamdaw. Kahacecay ngasaw papiliˈen ko cecay kakeridan padama ci Mosian, mikayat to misaˈosiay a demak. O tosaayto a poloˈ ko mihecaan, mamaedeng a milood a faˈinayan tatingkien. O roma sa, rikec ni Mosi misaˈosiay, o matingkiayto a tamdaw o papateli to 5.5 ke a lingkim, malo saka dademak i fangcalay kopang. (Kasadakan 30:11-16; Saˈosi 1:1-16, 18, 19) Komodan no matigkiay i, 603,550 a tatamdawan, awaay ko todong no Lifi a rarocoken a omah, cowa ka saˈosien cangra, cowa ko papateli cangra to sapasata to fangcalay kopang, cowa ko mamala sufitay cangra.—Saˈosi 1:44-47; 2:32, 33; 18:20, 24.
(Kasadakan 30:13-15) O matingkiayto a tamdaw o papateli to 5.7 ke a lingkim, dadoedoen ningra ko saˈosi no fangcalay a kaitiraan a pasadak, to malo sapacakat saki ci Yihofaan. 14 Kahacecay mareponayto ko 20 mihecaan a matingkiay a tamdaw, o papasadak to lingkim pafeli ci Yihofaan. 15 Aka adihayen kono cidafongay, aka mamangen kono manikaway, malecad a pateli to 5.7 ke a lingkim ci Yihofaan, malo sapatefoc to ˈorip no niyah.
it-1 434 fiedac 3 fatac
Sapakiyaho, Sapasorot
O saˈosi no Rikec no Kawas i, o papakiyaho ko Israil tamdaw. Tiya misaˈosi to Israil tamdaw ci Mosi palimoˈotan cangra, kahacecay mareponayto ko 20 mihecaan a faˈinayan o papateli to malo sapatefoc to ˈorip no niyah a lingkim, pateli to 5.7 ke a lingkim, “pafeli ci Yihofaan”, hanaca sapidama to demak no fangcalay kopang. (Kasadakan 30:11-16) O sowal no mitatiliday to likisi a tamdaw ci Yosifos (The Jewish War, VII, 218 [vi, 6]), ikor nonini, to mihecahecaan o papasorot ko Yutaya tamdaw to matiniay a “sapasorot to saki sefi” sanay.—2 Rayray 24:6-10; Matay 17:24; nengnengen ko MISOROT TO SAPASATA A PAYCI.
(Kasadakan 30:16) Alaen iso ko sapateli no Israil tamdaw to malo sapatefoc a lingkim, sakadademaken i demak no fangcalay taloˈan. Oniya lingkim o mamaharateng ni Yihofa, maharekayto ko Israil tamdaw pateli to sapatefoc to ˈorip nangra.”
w11 11/1 12 fiedac 1-2 fatac
Mafanaˈay Kiso Han?
O fangcalay sefi i Yirusalim icowaay miala to sakadademak a payci hani?
O sakadademak no fangcalay sefi a payci, o naitiniay i sapakiyaho no tamdaw. Nolitengan Israil tamdaw o papakiyaho anca papateli to cecay no moetep no kinaira pafeli to fangcalay sefi, o sakadademak no fangcalay sefi konini. O roma sa i, pateliay to romaroma a sapasorot ko Israil midama to fangcalay sefi. Patinakoen, ˈayaw no patireng ko Israil to fangcalay kopang i, palimoˈotan ni Yihofa ci Mosi misorot toya matingkiayto a tamdaw to 5.7 ke a lingkim, toha “sapafeli ci Yihofaan.”—Kasadakan 30:12-16.
Ikorto i, to mihecahecaan pateliay ko Yutaya tamdaw to payci malo sapasorot saki fangcalay sefi. Ya palimoˈoten ni Yis ci Pitiro towaˈen ko foting miala nai ngoyos nira to sapasata a payci, orira mipafelian nangra oranan sapasata to saki fangcalay sefi.—Matay 17:24-27.
Kadkaden ko Odoˈ no Sinael
(Kasadakan 29:10) “Kitingen iso ko okangan a kolong a patayra i kaˈayaw no fangcalay kopang, ci Aron ato faˈinayan a wawa ningra o mamikapa to fongoh noya kolong.
it-2 275 fiedac 4 fatac
Kamay
Mikapa to Fongoh. O Israil tamdaw cowa aca tano kamay a midemak to tayal, hanaca tano kamayay a mikapa i tireng anca ifafekang no dafong. Itiniay i pinilnilan ato mipatoˈaya a demakan a mikapa, patalahkal to tahacadaay ko cima tamdaw anoca maanan dafong to nipihayda. Itini i nipipatireng to saysi a lisinan, ci Aron ato wawa ningra mikapaay to fongoh no cecay okangan kolong ato tosa okangan siri, patalahkalay ora pinaˈorip a sapatoˈaya o sapinilnilaw cangranan a malo saysi ni Yihofa. (Kasadakan 29:10, 15, 19; Lifi 8:14, 18, 22) Palimoˈotan ni Yihofa ci Mosi papikapa i fongoh ni Yosuwa, minilnil cingranan mikotay ci Mosian, oraanto, “matomes to citanengay ˈicel” ci Yosuwa, pakadangar to mikayatay to Israil a demak. (Limoˈot 34:9) Mikapa to fongoh no tamdaw, patalahkalay to nipipalemed tora tamdaw. (Satapangan 48:14; Marko 10:15) Ci Yis Kristo mikapaay ko kamay to romaroma tamdaw, miadah to adada nangra. (Matay 8:3; Marko 6:5; Luka 13:13) Iraay to kinapina, o tarokos mikapaay i tireng no tao, tahacadato cangra to fangcalay saocor.—Dmak 8:14-20; 19:6.
(Kasadakan 30:31-33) ‘Onini a simal i, o fangcalay a simal hananay Ako. 32 Aka sapasimal to kalo a tamdaw, aka pitodong a misangaˈ a palecad tonini a simal. O fangcalay konini. O fangcalay a simal konini o hahaenen namo. 33 Ano ira ko cima a tamdaw to mitodongay a misangaˈ a palecad tonini a simal, anca taktaken a pasimal ko caay ka citatodong a tamdaw i, o papatayen cingra.’
it-2 280 fiedac 3 fatac
Mipasimal, Mipanilnil
Ya sapafeli ni Yihofa ci Mosian a Rikec, ihekalay a misilsil to tatano maanan lalakaw a misangaˈ ko simal. Tatano “sangaˈayay fangsisay a lalakaw” a misangaˈ, mahawpay ko malananomay a sapaiyo, fangsisay a podac no kilang, fangsisay a talod, fangsisay a tolak no kilang, olif a simal. (Kasadakan 30:22-25) Ano ira ko cima a tamdaw to mitodongay a misangaˈ a palecad tonini a simal, caka haydaen a misangaˈ i, o papatayen cingra. (Kasadakan 30:31-33) O matiniay a saˈosi misaˈicelay pasowal, ano mapasimal ko tamdaw ikor, o manilnilay a mitamorong to ˈinorong, o tadamaanay kora pinilnil, cowa ko sasakahemawen.
Miˈosi ko Sinael
(Kasadakan 29:31-46) Oya sapatireng to minilnilan a titi no okangan siri, tangtangen i fangcalay a kaitiraan. 32 Ci Aron ato faˈinayan wawa ningra o aitini i kaˈayaw no fangcalay taloˈan a komaen tora titi no okangan siri ato i cinaway a epang. 33 Onini sapihepol to raraw a sapatoˈaya o papafangcal cangranan, ira ko tatodong a malo saysi. O kakomaen cangra tonini sapatoˈaya, awaay ko tatodong a tamdaw aka komaen, samanen o fangcalay a kakaenen konini. 34 Ora sapatireng to minilnilan a sapatoˈaya a titi ato epang, ano ciˈosaw tahadafak i, tano namalen a mitodoh, aka kaenen, samanen o fangcalay a kakaenen konini. 35 “Doedoen iso ko sapalimoˈot Ako tisowanan, pakayni ci Aronan ato faˈinayan a wawa ningra misikay to sapatireng to minilnilan, minilnil cangranan malo saysi. 36 To romiˈamiˈad pacakaten ko cecay sapihepol to raraw a okangan a kolong. Sapihepol to raraw no pipatoˈayaan, mikorac to pipatoˈayaan. Halo fasfasen ko simal i fafaed no pipatoˈayaan, mikorac to pipatoˈayaan. 37 Pito a romiˈad a mihepol to raraw no pipatoˈayaan. Cima ano mitefingay toni pipatoˈayaan i, o mamikorac cingra. 38 “To romiˈamiˈad pacakaten iso ko cecayayho ko mihecaan a tosa tofor a siri, aka pitolas. 39 O cecay tofor siri pacakaten to papacem, o roma cecay a tofor siri pacakaten to dadaya. 40 Ano pacakat to saka cecay a siri i, pahakelongen a pacakat ko 2.2 kongsen a emi, pacamolen to 0.92 kongsen a simal, o roma sato pacakaten ko cecay 0.92 kongsen a epah to malo sapalosoˈ. 41 Ano pacakat toya saka tosa a siri to dadaya i, haenen toya i dafakay a pacakat ko emi ato sapalosoˈ a simal. Todohen konini a pacakat i ci Yihofaan, pasadak to rihadayay a fangsis. 42 O tatahadaˈocen konini a nisakimoodan a mitodoh a sapatoˈaya a pacakat i kaˈayaw ni Yihofa, itira i fawahan no fangcalay taloˈan. O aitira Kako patalahkal i tomowanan, itira a pasowal tamowanan. 43 “Itira Kako a patalahkal to Israil tamdaw, o sasafangcalen no ˈdil Ako kora sera. 44 O sasafangcalen Ako ko fangcalay taloˈan ato pipatoˈayaan, o sasafangcalen ci Aron ato faˈinayan wawa ningra, malo saysi Ako. 45 O mamaroˈ Kako i finawlan no Israil a mala Kawas nangra. 46 O mamafanaˈ cangra to nika o ci Yihofa Kako o Kawas nangra, o saka pikerid Ako i cangranan a pasadak nai Icip i, o sapikapotaw Ako i cangranan a maroˈ, o ci Yihofa Kako o Kawas nangra.”