Pinengnengan to lalakaw no Mitosilay ato Nikaˈorip Rayray no Saˈopo
SAKA 10 FOLAD 5-11 ROMIˈAD
O ODOˈ KO KIMAD NO KAWAS | KASADAKAN 31-32
“Aka Mitaˈong to Samiyay”
(Kasadakan 32:1) Tona halafin a caay ka malikelon nai lotok ci Mosi, tayra ko finawlan ci Aronan, pasowal cingranan: “Sangaˈen ko kawas malo mikeriday kitaanan, samanen oya ci Mosi, oyanan mikeriday kitanan miliyas to Icip a tamdaw, caay ka fanaˈ kita to mamaanayto cingra.”
w09 5/15 11 fiedac 11 fatac
Mangataayto ko Taˈangayay Romiˈad ni Yihofa, Ka Macakat a Matenesto
11 Kalasaka dademaken ko mananamay sifanaˈ, nolatekay cowa ko madoloay, mangalefay ano pasangar ko pakayraan. Ta lidongento ni Yihofa ko Israil miliyas to Icip ikor, caho ka halafin, “ngaliwngiwto ci Mosian”, “pakaketer ci Yihofaan.” Hano ngaliwngiw ci Mosian cangra han? Samanen awaay ko nanom to nananomen. (Kasadakan 17:1-4) Ikor, matatelekay ato Kawas ko Israil tamdaw, mihayda to mamidoedo to kihcod a sapalimoˈot no Kawas. ˈArawhan caho pakaala to tosa folad i, micicihto cangra to rikec no Kawas, mitaˈong to samiyay. (Kasadakan 24:3, 12-18; 32:1, 2, 7-9) Tona macokacokay i Horip a lotok ci Mosi micada to sakayat no Kawas, aawa sa malikelon cingra, hato marawrawayto cangra taˈong sato to samiyay han? Marawraway cangra, ano cato kalikelon ci Mosi i, wa miliyaw haca milood ko Amalik, matira iˈayaw, ira ci Mosi itiya pakamay ngaˈ mapadikay ko Amalik tamdaw han? (Kasadakan 17:8-16) Hatiraay ko harateng no Israil alatek, kawra ano masamaamaanto, cangra i, “cowa kakahi midofdof” to Kawas. (Dmak 7:39-41) O Israil tamdaw “maliyangay a tatiih ko demak”, matalaw a micomod i Mikiˈokan a Pala. Palimoˈotay ci Pawlo to Krisciyang aka a mitodong to Israil tamdaw.—Hipray 4:3, 11.
(Kasadakan 32:4-6) Ala hanto ni Aron nai cangranan ko ekim, tano sapitoˈtoˈ a lalosidan misangaˈ ko faco no kolong. Sowal sa ko finawlan: “Israilaw, onini ko kawas namo, cingra ko mikeriday tamowanan a miliyas to Icip.” 5 Maˈaraw ni Aron i, misangaˈ cingra to pipacakatan i kaˈayaw noya faco no kolong. Milasil ci Aron: “O pisalisinan ci Yihofaan ano dafak.” 6 Cila sato i, maratar ko finawlan, patoˈaya to misakimoodan a mitodoh a sapacakat ato sakalipahak a sapatoˈaya. Ikor, mapolong ko finawlan maroˈ a komaen mitaˈowak, maacang cangra.
w12 10/15 25 fiedac 12 fatac
Dofdofen ko Kawas, Mikitira i Sakiˈok Ningra Micada to Epoc
12 Tangsolay ci Yihofa mitoor to katatelekan ato Israil, palimoˈot to tamdaw papipatireng to fangcalay kopang, milimasmas to masakapotay a saysi a matayal, to sakangaˈayaw no ciraraway tamdaw a miingid Cingranan. Soˈliˈlin na mipatafangayto ko Israil tamdaw ci Yihofaan, kawra kalikiay a misafelit to sapalimoˈot Ningra, “pakaketeren nangra Cingra o Fangcalay a Kawas no Israil.” (ˈOlic 78:41) Patinakoen, tiya tayra i Sinay lotok micada to sakayat no Kawas ci Mosi i, cato pakatala ko Israil tamdaw, hato cowato pakasoˈlin ko falocoˈ nangra, caayto ko mamikerid ci Mosi na saan, sangaˈ sato to ekim a faco no kolong, sowal sa: “Israilaw, onini ko kawas namo, cingra ko mikeriday tamowanan a miliyas to Icip.” (Kasadakan 32:1, 4) Pasayraay toya misangaˈan nangra a samiyay a mitaˈong, cisowal to “pisalisinan ci Yihofaan” saan. Maˈaraw ni Yihofa i, pasowal sa ci Mosian: “Sakalamkam saan cangra a miliyas to nisowalan Ako i cangranan a lalan.” (Kasadakan 32:5, 6, 8) Naitiya a misatapang, o Israil tamdaw soˈliˈlin kinapinapina a miketon to sowal i Kawas, ˈarawhan saliyaliyaway cangra a misafelit.—Saˈosi 30:2.
(Kasadakan 32:9, 10) Pasowal ci Yihofa ci Mosian: “Maˈarawayto Ako, tada o maliyangay konini a finawlan. 10 Nohatini aka pilalang i Takowanan, tada maketer Kako i cangranan, papalaˈafoen Ako cangra. O kiso ko mamalo tadamaanay a kitakit.”
“Cima ko Mamidopo ci Yihofaan?”
14 Na mafanaˈay ko Israil to o karetengay raraw ko mitaˈongay to samiyay, ˈarawhan nohatini misatapangto cangra a mitaˈong to ekim a faco no kolong! (Kasadakan 20:3-5) Mafanaˈay ko Israil tamdaw mihaen cangra o cowa ko midofdofay to Kawas, ˈarawhan i, ‘o midopoay kami ci Yihofaan,’ saan a misamangah, ano ci Aronto oni mitaˈongay to ekim a faco no kolong nao “lisin ni Yihofa” saan. Samaanay ko harateng ni Yihofa tora waywayan nangra hani? O mitowakangay cangra sanay. Pasowal han ni Yihofa ci Mosi, o Israil tamdaw “manaholayto”, “miliyasay to palimoˈotan i cangranan a lalan,” saan. “Maketeray canganan” ci Yihofa, sapipalaˈafoaw toniya mapatireng sanayho a kitakit.—Kasadakan 32:5-10.
Kadkaden ko Odoˈ no Sinael
(Kasadakan 31:17) O midaˈocay a kacipinangan Ako ato Israil a tamdaw konini, samanen enemay a romiˈad misangaˈ ci Yihofa to kakarayan ato sera, saka pito a romiˈad paselaˈay Cingra to tayal.’”
O Tayal ato Paselaˈan Iraay ko “Misaˈosian a Toki”
4 Ci Yihofa aci Yis malalokay a matayal, kita i, wa tatayal sa cowa ko ngangaˈay a pahanhan, o sanay han? Cowa. Cowa ka fanaˈ ci Yihofa a marorayen, cowa pisaali to sapahanhanaw Cingra, kawra sowal no Fangcalay Cudad, maharek misangaˈ to kakarayan ato sera i, “paselaˈay Cingra to tayal,” sanay. (Kasadakan 31:17) Tatodong nora sinael, pacenaˈay ci Yihofa to misangaˈay a tayal o sanay, halo mikitini i nalahecian a marenecen ko falocoˈ. Ya iseraho ci Yis malalokay a matayal, kawra mikilimayho to toki a pahanhan cingra, ato mikapot to widang a mitahka a komaen.—Matay 14:13; Luka 7:34.
(Kasadakan 32:32, 33) Nanay hepolen Iso ko raraw nangra, ano caay kakahi Kiso i, kao padengen ko ngangan ako i nitilidan Iso a cudad.” 33 Pasowal sa ci Yihofa ci Mosian: “O cima ko ciraraway, o ngangan ningra ko papadengen Ako nai nitilidan Ako a cudad.
w88 3/1 28 fiedac
Salicay no Miˈosiay Tamdaw
Mahapinangayto no Kawas ko tamdaw a mahemeken a micada (matilidayto ko ngangan i sakaciˈorip a cudad) tatodong i, o milayapto to midaˈocay ˈorip cingra, cowa ka saan, mahaen o sowal no tao to paliˈayawayto a masaˈosi ko hakelong no ˈorip iso saan. Pakayni to Israil tamdaw, licayan ni Yihofa ci Mosi: “Nanay hepolen Iso ko raraw nangra, ano caay kakahi Kiso i, kao padengen ko ngangan ako i nitilidan Iso a cudad.” Pasowal sa ci Yihofa ci Mosian: “O cima ko ciraraway, o ngangan ningra ko papadengen Ako nai nitilidan Ako a cudad.” (Kasadakan 32:32, 33) Hayi, soˈlina mahemekayto Kawas cingranan a tiliden ko ngangan ningra i “sakaciˈorip a cudad”, kawra iraayho ko mamiliyas to pihakelongan. Ano hatiraay i, o “sasipasipen ko ngangan ningra nai sakaciˈorip a cudad.” —Paˈarawan 3:5.
Miˈosi to Sinael
(Kasadakan 32:15-35) Likelon sato ci Mosi, tatoyen ningra koya pitilidan to rikec a fakeloh a sapad. Matiliday ko kafafelih nora fakeloh. 16 O nisangaˈan no Kawas konini a masasapaday, o nitilidan Ningra a mitoˈtoˈ konini. 17 Matengil ni Yosuwa ko maacangay a lekal no finawlan i, sowal sa ci Mosian: “Ira ko lekal no malalooday i taloˈan no finawlan.” 18 Sowal sa ci Mosi: “Caay kono pakalowiday, caay kono mapadikay a pilekal konini. Ono romadiway a ngihaˈ konini.” 19 Maraod ni Mosi ko taloˈan no finawlan i, maˈaraw ningra ko faco no kolong ato masakeroay a tamdamdaw i, keter sato cingra, fahkol han ningra i laeno no lotok koya nitatoyan ningra a tosaay a masasapaday a fakeloh a mipelpel. 20 Alaen ningra a mitodoh koya nisangaˈan nangra a faco no kolong, palaapeden ningra konini a mifolsak i nanom, papinanomen ko finawlan no Israil tonini. 21 Pasowal han ni Mosi ci Aron: “Nisamaanan nonini a finawlan kiso? Iro matini ko nipipakararaw iso i cangranan.” 22 Sowal sa ci Aron: “Aka ka keter i takowanan. Mafanaˈ kiso to nika masarocod ko falocoˈ nangra to tatiihay. 23 O sowal nangra i takowanan i: ‘Sangaˈen ko kawas malo mikeriday kitaanan, samanen oya ci Mosi, oyanan mikeriday kitanan miliyas to Icip a tamdaw, caay ka fanaˈ kita to mamaanayto cingra.’ 24 Saka, sowal han ako cangra: ‘Iraay ko sakaeres a ekim i, helongen a patayni i takowanan.’ Fahkol han ako koya ekim i namal i, sadak sanayto konini a faco no kolong,” 25 Maˈaraw ni Mosi ko nika pakihater han ni Aron ko finawlan, sao haratengay saan ko demak nangra, pakatawa to ˈada, 26 saka tireng sato i fawahan: “Cima ko midamaay ci Yihofaan? Katayni i takowanan!” O ngasaw no Lifi malisopsop tayra i cingranan. 27 Pasowal han ni Mosi cangra: “O sowal no Kawas no Israil ci Yihofa: ‘Kamo a maemin pifaked i tatelecan to funus namo, naitini tonini a sacomod tangasa itira a sacomod, rakaten ko polong a taloˈan. Patayen ko salikaka namo, fiyaw ato widang namo.’” 28 Doedo han no Lifi a ngasaw ko sowal ni Mosi. Toya romiˈad maedeng tolo a patek ko mapatayay a tamdaw. 29 Sowal sa ci Mosi: “Anini kinafalahay kamo, matayal saki Yihofa. Miˈodis to wawa ato salikaka namo, saka papalemeden no Kawas kamo anini.” 30 Cila sato a romiˈad, pasowal ci Mosi to finawlan: “Tataˈang ko raraw namo. O mamacokacok kako a tayra ci Yihofaan a milongoc, latek hepolen Ningra ko raraw namo.” 31 Oraanto, patikol ci Mosi i ci Yihofaan, sowal sa: “Tataˈang ko raraw noni finawlan! Sangaˈen nangra ko ekim malo kawas nangra! 32 Nanay hepolen Iso ko raraw nangra, ano caay kakahi Kiso i, kao padengen ko ngangan ako i nitilidan Iso a cudad.” 33 Pasowal sa ci Yihofa ci Mosian: “O cima ko ciraraway, o ngangan ningra ko papadengen Ako nai nitilidan Ako a cudad. 34 Olili, katayra kiso a mikerid to finawlan a patayra i nitoroˈan Ako a pala. O mamikerid ko coyoh Ako tisowanan. Ano maraodto ko pitefocan Ako a romiˈad i, o tatefocen Ako ko raraw nangra.” 35 Saka, palifongen ni Yihofa ko finawlan, samanen misangaˈay cangra to faco no kolong, oyanan nisangaˈan ni Aron a faco no kolong.
SAKA 10 FOLAD 12-18 ROMIˈAD
O ODOˈ KO KIMAD NO KAWAS | KASADAKAN 33-34
“Kasemeran a Capeling ni Yihofa”
(Kasadakan 34:5) Pakatoˈem ci Yihofa a malikelon. tayra i raringid ni Mosi, milasil to ngangan ni Yihofa.
it-1 1119-1120 fiedac
Ngangan
Soˈliˈlin o misangaˈan a maamaan misawacayay to nika ira no Kawas, kawra cowa patalahkal to ngangan no Kawas. (ˈOlic 19:1; Loma 1:20) Mafanaˈ to ngangan no Kawas cowa ko nika fanaˈ aca tora tilid no ngangan. (2 Rayray 6:33) Mafanaˈ tora ngangan i, mafanaˈ toni citirengay wangaˈ, araaw Ningra, nidemakan Ningra, o capeling Ningra. (Palalinien to 1 Hongti 8:41-43; 9:3, 7; Nihimiya 9:10.) O tinakoan ni Mosi mitadtaday tonini, itira mafanaˈay ci Yihofa to ngangan ni Mosi sanay, tatodong nora tangongolay ko nika fanaˈ ni Yihofa ci Mosian o sanay. (Kasadakan 33:12) Maˈaraway ni Mosi ko ˈodingar ni Yihofa, ‘matengil to pilasil Ningra to ngangan no Niyah.’ (Kasadakan 34:5) Oniya pilasil cowa ko pipalosiyang aca tora ngangan, mitadtadayho to capeling ato nidemakan Ningra a demak. “Ci Yihofa itiniay i kaˈayaw ni Mosi a mitaˈlif, milasil: “Ci Yihofa, ci Yihofa, o sidaˈitay to tamdaw, o siniˈadaay to tamdaw a Kawas, caay ka narikay maketer, midaˈocay ko olah, mitafoay to soˈlinay kimad, midaˈocay ko olah tangasa i pinapina a patek no kadadoedo no teloc no tamdaw, mihepol to raraw nangra. Nikawrira, ano o tatefocen i, caay ko sasamadahen a mitefoc. O raraw no mama i, tangasa i saka tolo saka sepat a kadadoedo no teloc ningra a matefoc.” (Kasadakan 34:6, 7) Mahaenay ko sowal no radiw ni Mosi, “Lasilen ko ngangan ni Yihofa,” sanay, itira milomalay to samaanay ko Kawas a micada to Israil kitakit, halo milomalto capeling no Kawas. —Limoˈot 32:3-44.
(Kasadakan 34:6) Ci Yihofa mitaˈlifay i kaˈayaw ni Mosi, sowal sa a milasil: “Ci Yihofa, ci Yihofa, o sidaˈitay to tamdaw, o siniˈadaay to tamdaw a Kawas, caay ka narikay maketer, midaˈocay ko olah, mitafoay to soˈlinay kimad,
w09 5/1 18 fiedac 3-5 fatac
Somowalay ci Yihofa to Niyahan
Salakat, sanay somowal ci Yihofa to Niyahan, “o sidaˈitay to tamdaw, o siniˈadaay to tamdaw a Kawas,” sanay. (Saka 6 sinael) O cecay micacudaday tamdaw sanay ko sowal, ora “sidaˈitay” hananay a Hipray sowal, patalahkalay to “matiraay o wama a sidaˈit to wawa ko falocoˈ no Kawas,” sanay. O siniˈadaay hananay i, “patalahkalay to misasoˈlinay to falocoˈ ko tamdaw a mipadang,” o sanay. Manonoˈay ci Yihofa mafanaˈ kita, midimokosay Cingra to midokoay i Cingranan a tamdaw, midipot cangranan, mahaen o wama wina a midipot to wawa.—ˈOlic 103:8, 13.
Ikor, somowalay ci Yihofa to “caay narikay maketer” Cingra. (Saka 6 sinael) Cingra cowa ka kaliki a mangolaw to sikawdan. Mihadidiay Cingra, misolol to dangoc nangra, ira ko toki no tamdaw a pasasiyor.—2 Pitiro 3:9.
Dotoc i, somowalay ko Kawas to “midaˈocay ko olah, tadamaanay ko nika soˈlin.” (Saka 6 sinael) Tona patalahkalay ci Yihof to midaˈocay olah, tanektekay ko kalalaˈed ato tamdaw Ningra, midaˈocay caay ka falic. (Limoˈot 7:9) O pipowaran no soˈlinay kimad ci Yihofa, cowa pisamangah, cowa ko mamasaˈfit no tamdaw. Samanen o “mitafoay to soˈlinay kimad Cingra.” Mankora o sasahecien ita pasoˈlin ko kihcod a sowal Ningra, mahawpay ko sakiˈok Ningra pakayni i ikoran.—ˈOlic 31:5.
(Kasadakan 34:7) midaˈocay ko olah, mihepol to raraw ato patelac, nikawrira cowa ko aeca pitefoc to tatefocen a tamdaw, ano mararaw ko wama, o mamicada ko teloteloc to tatiihay a minaroˈan, tangasa saka tolo saka sepat a kadadoedo no teloc ningra.”
w09 5/1 18 fiedac 6 fatac
Samaanay Milomal ci Yihofa to Niyahan
Manonoˈay ci Yihofa kitanan mafanaˈ to roma a kalimlaan a capeling, Cingra “mihepol to raraw ato patelac.” (Saka 7 sinael) Cingra “makahiyay misodod” to pasasiyoray a mararaway tamdaw. (ˈOlic 86:5) Nawhani, cowa ko papakonira to tatiihay demak ci Yihofa. O sowal no Kawas “cowa ko aeca pitefoc to tatefocen a tamdaw,” sanay. (Saka 7 sinael) O makoracay ato masadafdafay a Kawas cowa ko papasalat to padetengay a mararaw a tamdaw, o mahaenay tamdaw oha mamitamorong to teloc no raraw no niyah.
Kadkaden ko Odoˈ no Sinael
(Kasadakan 33:11) Ci Yihofa aci Mosi masasiˈayaway a masasowal, matira o nika sasowal no tamdaw ato tamdaw. Minokayto ci Mosi i taloˈan i, ya dama ningra, wawa ni Nun ci Yosuwa, materekay i fangcalay kopang.
(Kasadakan 33:20) Sowal haca: “Caay ko papatiriˈen Ako kiso to pising Ako, samanen ano maˈaraw no tamdaw Kako i, cowato ko mamaˈorip.”
w04 3/15 27 fiedac 5 fatac
Kalimlaan no Kasadakan a Cudad
33:11, 20—Samaanay “masasiˈayaw a masasowal” ko Kawas aci Mosi hani? Paihkalay koni to nika kedec noka sasowal nangra. Ci Mosi o taypiyaw no Kawas, pakaynian i cingranan a micada to sakayat ni Yihofa. Cowa ka maˈaraw ni Mosi ci Yihofa, samanen “ano maˈaraw ko Kawas i, caayto ko mamaˈorip.” Soˈlinay haw i, cowa ko Kawas ko pasowalay ci Mosian. O matiliday i Kalatiya 3:19, “o rikec pakaynian i coyoh a palimoˈot i tamdaw,” sanay.
(Kasadakan 34:23, 24) “Cecay a mihecaan kina tolo a tayni i kaˈayaw no Kawas no Israil ci Yihofaan. 24 O aiˈayaw iso Kako a milaplap toya roma a kasafinacadan, misakakahad to sera no kitakit iso. Ano tayni kamo i kaˈayaw ni Yihofa cecay miheca kina tolo i, aawa ko tamdaw to mamiˈafas to kitakit namo itiya.
w98 9/1 20 fiedac 5 fatac
Paisalakaten ko Saˈayaway a Demak!
Iraay ko saˈosi ni Yihofa, polong a faˈinayan no Israil ato mihakelongay a roma finacadan faˈinayan, cecay miheca kina tolo a misoˈaraw ci Yihofaan. Mafanaˈay ko tawki no lomaˈ, o matiniay a limasmas itini noˈadingoan tada ciepocay to paro no lomaˈ, mansa mihawikiday to fafahi wawa tayra. Kawra, ano mapolong ko paro no lomaˈ a malingad i, cima ko mamidipot to lomaˈ paˈading to ˈada hani? Sanay mikiˈok ci Yihofa: “Ano cecay miheca tayra kiso misoˈaraw ci Yihofaan, o Kawas iso i, aawa ko tamdaw to mamiˈafas to sera namo.” (Kasadakan 34:24) Taˈangayay ko nika pakasoˈlin no Israil tamdaw, hongaˈ makahi a paisalakaten ko noˈadingoan a demak, ao cowa ko mamasipon ino pakadafongay demak. Mitooran ni Yihofa ko sakiˈok Ningra han? Hay matooray Ningra.
Miˈosi to Sinael
(Kasadakan 33:1-16) Pasowalen ni Yihofa ci Mosi: “Kiso atoya nikeridan iso nai Icip a finawlan ka piliyas itini, tayra toya nisowalan Ako a sera. Na mikiˈokan Ako ci Apraham, ci Isak, ci Yakop, ‘O papafelien Ako i teloc iso konini a sera.’ 2 O aocoren Ako ko cecay a coyoh romakat i kaˈayaw namo, milaplap to Kanan ato Amori ato Hiti ato Pirici ato Hifi ato Ipus a tamdaw naitira toya pala. 3 O tatayra kamo i mamatangay a sera o kasadakan no hacol ato waneng no ˈodal. Nikawrira, cowa ko mamikapot Kako tamowanan, tona o maliyangay a finawlan kamo, latek tekopen Ako kamo i fatad no lalan. 4 Mitengil ko finawlan tonini a sowal i, mararom cangra. Saka, caayto picaˈedong cangra to sakaeres a ekim. 5 Sowal sa ci Yihofa ci Mosian: “Pasowalen iso ko Israil finawlan, ‘O maliyangay kamo a finawlan, ano mikapot Kako i tamowanan, ngangaˈay kako i cecay a melet a mitekop tamowanan. Nohatini aka micaˈedong to sakaeres a ekim, miharatengho Kako to sasamaanen kamo.’” 6 Mankora, naitiya toya demak i Horip i, cowato picaˈedong ko Israil tamdaw to sakaeres a ekim. 7 Alaen ni Mosi ko kopang ningra paliyas, patireng i raay no taloˈan no finawlan. O fangcalay kopang han ningra kora. Ano sapilicayaw ko tamdaw ci Yihofaan, tayraay tora fangcalay a kopang. 8 Ano tayra ci Mosi i fangcalay kopang i, tomirengay i fawahan no taloˈan no niyah ko polong a tamdaw, minengneng ci Mosian, tangasa micomod cingra ilalomaˈ no fangcalay kopang. 9 Ta micomodto i fangcalay kopang ci Mosi i, ira a patefo i fawahan ko toˈem, masasowal ko Kawas aci Mosi. 10 Maˈaraw no finawlan ko nika tomireng no toˈem i fawahan no fangcalay kopang i, hinokop sa cangra i fawahan no taloˈan no niyah a mitaˈong. 11 Ci Yihofa aci Mosi masasiˈayaway a masasowal, matira o nika sasowal no tamdaw ato tamdaw. Minokayto ci Mosi i taloˈan no finawlan i, ya dama ningra, wawa ni Nun ci Yosuwa, materekay i fangcalay kopang. 12 Pasowal ci Mosi ci Yihofaan: “Palimoˈoten Iso kako papikerid tonini finawlan, kawra caay pasowal Kiso cima ko aocoren Iso mikapot i takowanan. Sowal haca Kiso, ‘Mafanaˈay Kako tisowanan, mafanaˈay to ngangan iso, o karahekeran Ako kiso,’ saan. 13 Ano o karahekeran Iso kako i, nanay pasifanaˈen kako to lalan Iso, ta mafanaˈ kako Tisowanan, padadotoc a milifok to nika raheker Iso. Ngitangiten ako Kiso, onini a finacadan nao o finawlan no Miso.” 14 Sowal sa ko Kawas: “O Kako ko mamipacafay i tisowanan, pafeli to rihaday i tisowanan.” 15 Pacaˈof sa ci Mosi: “Ano caay ko papacafayen Iso kami i, aka papiliyasen kami naitini. 16 Wa misamaan a mafanaˈ ko hekal a tamdaw to nika o karahekeran Iso kako ato finawlan Iso hani? Tona pacafayay Kiso i tamiyanan, saka o masasiromaay kako ato finawlan Iso to roma a kalo finawlan no hekal?”
SAKA 10 FOLAD 19-25 ROMIˈAD
O ODOˈ KO KIMAD NO KAWAS | KASADAKAN 35-36
“Mafenekay a Midemak to Tayal ni Yihofa”
(Kasadakan 35:25, 26) O mafanaˈay a mitenooy a fafahiyan i, patayraan nangra a maemin ko nitenooyan nangra a keliw ato langdaway ato tarangitangay ato kahngahengangay a fanoh a walay. 26 O mafanaˈay mitenooy, makowaday ko falocoˈ a fafahiyan mitoliyaday cangra to fanoh no siri.
w14 12/15 4 fiedac 4 fatac
Taˈangayay ko Pipalemed ni Yihofa to Makalimay Mipakiyaho a Tamdaw
Cowa kora mipacakatan no Israil a sapakaolah ko tada kaolahan ni Yihofa, ao rira makalimay a falocoˈ nangra midama to soˈlinay a pidoyongan. Makowaday ko falocoˈ no Israil tamdaw pasadak to toki, misaˈicel itini i patirengay a tayal. Sowal no Fangcalay Cudad: “O mafanaˈay mitenooy, makowaday ko falocoˈ a fafahiyan mitoliyaday cangra to fanoh no siri.” O roma i, ci Picali “matomes no fangcalay saocor no Kawas cingra, ira ko taneng ato fanaˈ ningra, mafenek a misangaˈ to maamaan.” Pafelian ni Yihofa ci Picali aci Aholiyap to taneng, mafenek a misangaˈ to maamaan a demakan.—Kasadakan 35:25, 26, 30-35.
(Kasadakan 35:30-35) Pasowalen ni Mosi ko finawlan no Israil: “Maharekto a mipiliˈ ci Yihofa nai Yuta a ngasaw ci Picalilan o wawa ni Uri o teloc ni Hur, 31 matomes no fangcalay saocor no Kawas cingra, ira ko taneng ato fanaˈ ningra, mafenek a misangaˈ to maamaan, 32 misafaco a mifowah to ekim ato lingkim ato fodawan a maamaan a lalosidan, 33 mafenekho mitoˈtoˈ to fakeloh a paketing to odoˈ, tano kilang a misangsaˈ to maamaan lalosidan. 34 Mapafeli no Kawas cingra aci Aholiyap o wawa ni Ahisamo o Tan a ngasaw to sapasifanaˈ a taneng. 35 Mapafeliho no Kawas cangra to citanengay falocoˈ, mafanaˈ cangra misafaco, tano langdaway ato tarangitangay ato kahngahengangay a fanoh a walay mitesel ato mitenooy to kiradom, ato romarorma fanek. Mafanaˈ cangra misangaˈ to masamaamaanay a tayal, mafanaˈ a misafaco to maamaan.”
w11 12/15 19 fiedac 6 fatac
Madimadiay Tamdaw Nolitenganho —Mikayatan no Fangcalay Saocor
6 Ci Picali aci Mosi o malecaday ko lalintadan a tamdaw cangra, naitira i nalifetan ni Pacali mahapinangay ita ko fangcalay saocor no Kawas tada taˈangayay ko pidemak. (ˈOsien ko Kasadakan 35:30-35.) Ocoran no Kawas ci Picali mikerid a misangaˈ to lalosidan no fangcalay kopang. ˈAyaw no mitamorong cingra to matiniay a tayal i, mafenekayto to misangaˈay a tayal han? Hatiraay alatek. Kawrira ya salakatay a tayal ningra i Icip i, maedeng o misalingkaay aca. (Kasadakan 1:13, 14) Hay, samaanay ci Picali a milaheci tora ikemoday a tayal hani? “Matomes no fangcalay saocor no Kawas cingra, ira ko taneng ato fanaˈ ningra, mafenek a misangaˈ to maamaan . . . a lalosidan a misangsaˈ.” Ano o mananto ko taneng ni Picali, o fangcalay saocor ko pafenekay cingranan, mahaenay ci Aholiyap. Ci Picali aci Aholiyap tada kalikiay a macakat, samanen cowa aca ka madangar nangra ko tayal, hanaca pasifanaˈayho to tao cangra. Hay, pafelian no Kawas to pasifanaˈay a taneng cangra.
(Kasadakan 36:1, 2) “Ci Picalil aci Aholiyap ato romaroma a mafanaˈay a matayal a sayho makakapot cangra a matayal. Pafelianto ni Yihofa cangra to taneng ato fanaˈ, ho mafanaˈ cangra misamaan midoedo to sapalimoˈot ni Yihofa, misangaˈ to polong a lalosidan no fangcalay kopang.” 2 Oraanto i, palisopsopen ni Mosi ci Picali, ci Aholiyap, ato polong a mafanaˈay a sayho. Iraay i lalomaˈ no falocoˈ nangra ko sapafeli a taneng ni Yihofa. Mapatemer ko falocoˈ nangra, makahi tayra a matayal.
w11 12/15 19 fiedac 7 fatac
Madimadiay Tamdaw Nolitenganho —Mikayatan no Fangcalay Saocor
7 Iraayho ko roma demak to misawacayay ci Picalian aci Aholipoan to o mikayatan no fangcalay saocor no Kawas cangra, samanen oya nisangaˈan nangra a lalosidan tada kodait a sakadademaken. Maedeng ikor no 500 a miheca, kalasaka dademakanho kora nisangaˈan nangra a lalosidan. (2 Rayray 1:2-6) Ci Picali aci Aholiyap cowa ka mahaen o aniniay misasangaˈay tamdaw, maolah mitoˈtoˈ to ngangan no niyah itira tora lalosidan. Oniya kihcod sahtoay papaˈdil ci Yihofaan.—Kasadakan. 36:1, 2.
Kadkaden ko Odoˈ no Sinael
(Kasadakan 35:1-3) Ikor i, palisopsopen ni Mosi ko finawlan no Israil, pasowal cangranan: “Ora ilaenoay o limoˈot ni Yihofa to dadademaken namo: 2 Mangaˈay kamo a matayal to enem a romiˈad, saka pito a romiˈad i, o fangcalay a romiˈad, o tadamaanay a paselaˈan a romiˈad ni Yihofa, sasarocoden a paselaˈ. Ano matayal ko tamdaw itini tonini a romiˈad i, caay ka eca o papatayen. 3 I paselaˈan a romiˈad, aka pilikat to namal i lomaˈ namo.”
w05 5/15 23 fiedac 14 fatac
Mafanaˈ to Pakayraan ni Yihofa
14 O noˈadingoan a demak paisalakaten. O Israil tamdaw toha sapidimokosaw to saki kakaenen saki caˈedong a demak, cowa ko ngangaˈay milawa to noˈadingoan a demak, sakimokimor saca tono kalo romiˈad a demak. Misaˈosian ni Yihofa ko cecay a romiˈad malo fangcalay romiˈad, toha ngangaˈay ko Israil itini toni romiˈad a misamacay to midokoay a demak. (Kasadakan 35:1-3; Saˈosi 15:32-36) Roma i, iraay ko misaˈosian a romiˈad to mihecahecaan to pisalisinan, misikay to fangcalay saˈopo. (Lifi 23:4-44) Wa ngaˈay cangra itiya milomal to tadamaan ni Yihofa, mitikol a miharateng to pakayraan no Kawas a dademak, halo paihkal to piakoˈid to nika ngaˈay Ningra. Mihaen a paihkal ko Israil to nika madimadi ci Yihofaan, matongal ko kangodo ato kaolah i Cingranan, misaraocod ko falocoˈ a midofdof to lalan Ningra. (Limoˈot 10:12, 13) Adihayay a safalod ilalomaˈ no rikec, ciepocay to aniniay sikawdan ni Yihofa. —Hipray 10:24, 25.
(Kasadakan 35:21) Ikorto, o cifalocoˈay a pasadak to sapakiyaho a tamdaw maemin, mialaay to sapakaolah pacakat ci Yihofaan, to malo sapisangaˈ to fangcalay kopang, maamaan lalosidan no kahirahira tayal, halo sapisangaˈ to fangcalay rikoˈ.
w00 11/1 29 fiedac 2 fatac
Hinapaladaˈay a Pafeli Pairaay to Lipahak
Haratengen hena, samaanay ko falocoˈ no Israil tamdaw. Pina:ayto mamihecaan, misemsemay cangra to nika lakuli a cangoˈoten. Nohatini pasalatayto cangra, iraayto ko dafong no niyah. Pakayni to pakiyahoay a demak samaanay ko harateng nangra hani? Oniya dafong ono niyam a mietanan, ngaˈayay kami miterek hano niyah, wa ngangaˈay saan a miharateng cangra. ˈArawhan i, ta matengil nangra ko pisaali cangranan pakiyaho a midama to pidoyongan i, tangsolay mitoor cangra—cowa ko mipaciecian, awaay ko ˈidiˈidi nangra! Maharatengay nangra, tona o sapadama ni Yihofa ko sakaira nora dafong nangra. Mankora, adihayay ko pakiyahoan nangra a ekim, lingkim, pinaˈorip. Cangra i, “makalimay ko falocoˈ”, “masemeray ko falocoˈ”, “makahiyay ko harateng.” Orira dafong o naitiniay i “makalimay a nipafeli ci Yihofaan.”—Kasadakan 25:1-9; 35:4-9, 20-29; 36:3-7.
Miˈosi to Sinael
(Kasadakan 35:1-24) Ikor i, palisopsopen ni Mosi ko finawlan no Israil, pasowal cangranan: “Ora ilaenoay o limoˈot ni Yihofa to dadademaken namo: 2 Mangaˈay kamo a matayal to enem a romiˈad, saka pito a romiˈad i, o fangcalay a romiˈad, o tadamaanay a paselaˈan a romiˈad ni Yihofa, sasarocoden a paselaˈ. Ano matayal ko tamdaw itini tonini a romiˈad i, caay ka eca o papatayen. 3 I paselaˈan a romiˈad, aka pilikat to namal i lomaˈ namo.” 4 Pasowalen ni Mosi ko polong no finawlan no Israil: “O limoˈot ni Yihofa i, 5 ‘Pipacakat kamo ci Yihofaan to sapakaolah. O maolahay pacakat a tamdaw i, ngaˈayay pacakat tora ilaenoay a sapakaolah ci Yihofaan, mahawpay: O ekim, lingkim, fodawan, 6 langdaway walay, tarangitangay fanoh no siri, kahngahengangay a fanoh a walay, safangcalay a keliw, fanoh no siri, 7 nisakahngangan a micengel a katol no siri ato makapahay a falako ato akasiya a kilang, 8 simal no dawdaw ato sapisangaˈ to simal ato fangcalay a simal a fangsisay a talod, 9 kahngangay a odoˈ, romaroma sapaketing i ifot a rikoˈ ato sapaketing i sakifalofang a paya a odoˈ a fakeloh. 10 “‘ Katayni a maemin ko mafanaˈay namo a sayho a misangaˈ to nisowalan ni Yihofa a lalosidan a maemin, 11 oyanan fangcalay kopang ato ˈanongnongan no fangcalay kopang ato satahpo to fangcalay kopang ato sapakafit ato sapaˈokak a kilang ato sapafalat a kilang ato hecek ato paranaan no hecek; 12 katatelekan a lipa ato ˈonoc no lipa ato satahaf no lipa ato satahpo a kopang, 13 cukui ato ˈonoc no cukui ato polong no lalosidan ato sapacakat epang, 14 sapalikat a padawdawan, lalosidan no padawdawan ato dawdaw, simal no dawdaw, 15 pipaexiwan ato sapiˈorong to paexiwan a ˈonoc, fangcalay a simal ato fangsisay a exiw, sapaˈading i sacomod no fangcalay kopang a kiradom, 16 pipatoˈayaan to nisakimoodan a mitodoh, sapipatoˈayaan a fodawan a fangta, ˈonoc ato polong no lalosidan ato pinanawan a fodawan ato patelian, 17 sapiˈadipel to taliyok no putal a kopang, hecek ato paranaan no hecek ato sapaˈading to sacomod no putal a kiradom, 18 tektek no fangcalay kopang ato tektek no ˈadipel no putal ato rayic, 19 sasarikoˈen no matayalay i fangcalay kopang a tadamaanay a fangcalay a rikoˈ, ato fangcalay a rikoˈ ni Aron ato rikoˈ no faˈinayan a wawa ningra.’” 20 Liyas sato ko polong no finawlan no Israil ci Mosian. 21 Ikorto i, o cifalocoˈay a pasadak to sapakiyaho a tamdaw maemin, mialaay to sapakaolah pacakat ci Yihofaan, to sapisangaˈ to fangcalay kopang, maamaan lalosidan no kahirahira tayal, halo sapisangaˈ to fangcalay rikoˈ. 22 O cifalocoˈay a pasadak a tamdaw, ano o faˈinayan ato fafahiyan i, mihawikid to sakaeres a rinom, fiting, fati, cangaw ato masamaamaanay a sakaeres a ekim a pacakat ci Yihofaan. 23 O iraay ko langdaway walay, tarangitangay a fanoh no siri, kahngahengangay a fanoh a walay ato nitenooyan to fanoh no siri a kiradom ato nisakahngangan a micengel a katol no siri ato makapahay a falako i, patayraen nangra a maemin konini. 24 O iraay ko lingkim ato fodawan i, alaen nangra a pacakat ci Yihofaan. O iraay ko akasiya kilang a tamdaw, patayraen nangra to malo sapisangaˈ a kilang.
SAKA 10 FOLAD 26 –11 FOLAD 1 ROMIˈAD
O ODOˈ KO KIMAD NO KAWAS | KASADAKAN 37-38
“O Pipatoˈayaan no Fangcalay Kopang ato Tatodong Nira i Soˈlinay Pidoyongan”
(Kasadakan 37:25) O akasiya a kilang ko sapisangaˈ ningra to paexiwan. Salipaen ningra ko pisangaˈ, o kakayaˈ i, 44.5 kongfen, o kakahad i, 44.5 kongfen, o takaraw i, 89 kongfen. Pawaˈaen ningra ko kasaciko no paexiwan.
it-2 370 fiedac 1 fatac
Pipatoˈayaan
Pipatoˈayaan (o ekim a pipatoˈayaan hananay nolatek) tano akasiyaan kilang a misangaˈ, tafoen to ekim ko fafaed ato sepat a fatiˈiyan. Masalipaay kora pipatoˈayaan, o kakayaˈ i, 44.5 kongfen, o kakahad i, 44.5 kongfen, o takaraw i, 89 kongfen, iraay ko sepat waˈa, sangaˈen to ekim ko tosa a kadang to paˈonocan a miˈorong. (Kasadakan 30:1-5; 37:25-28) Kina tosa to cecay romiˈad, dafak ato dadaya, tatodohen no saysi ko mikiriwiˈay a sangaˈen a exiw. (Kasadakan 30:7-9, 34-38) Somowalay ko Fangcalay Cudad to parod no exiw, ora parod no exiw kalasaka dademakan i pipatoˈayaan. (Lifi 16:12, 13; Hipray 9:4; Paˈarawan 8:5; palalinien to 2 Rayray 26:16, 19.) Ora pipatoˈayaan itiniay i fangcalay a kopang, mitelian i kaˈayaw no sapalaˈed a kopang no safangcalay kaitiraan, mankora, mitelian “ikaˈayaw no katatelekan” sato maan ko Fangcalay Cudad.—Kasadakan 30:1, 6; 40:5, 26, 27.
(Kasadakan 37:29) Haenen ningra o pipacacamocamol a misangaˈ to fangsisay a sataˈos ko pisangaˈ to fangcalay a simal ato fangsisay a exiw.
it-2 586 fiedac
Fangsisay a Exiw
Oya kalasaka dademakan i fangcalay kopang a exiw i, o nipatayraan no finawlan a fangsiyay aped a sangaˈen. (Kasadakan 25:1, 2, 6; 35:4, 5, 8, 27-29) Palimoˈotan ni Yihofa ci Mosi tano 4 a aped a misangaˈ: “Alaen ko masamaamaanay a fangsisay a aped, o nataf, o silito, o hirpina ato caay ka cicamol a fangsisay a ˈadeteng no kilang, palecaden ko latang nonini. Matiya o pipacacamocamol a misangaˈ to fangsisay a sataˈos ko pisangaˈ. Tongalen to cinah ta makorac a fangcal konini. Alaen ko miming nonini a misaaped a patayra i fangcalay kopang, telien i kaˈayaw no katatelekan a lipa, itira i kasasoˈarawan Ako ato kiso. O safangcalay konini a exiw.” Ikor, misakaretengay milasil ci Yihofa to o fangcalay koni exiw, caay ka ngaˈay kalasaka dademaken i romaroma demakan, saan ko sowal: “Ano ira ko misangaˈay a palecad to malo sasaneken ningra a lipahak i, o fafalahen cingra nai finawlan Ako.”—Kasadakan 30:34-38; 37:29.
(Kasadakan 38:1) O akasiya a kilang ko sapisangaˈ ningra to pipatoˈayaan to nisakimoodan a mitodoh a sapatoˈaya. Salipaen ningra ko pisangaˈ, o kakayaˈ i, 2.23 kongce, kakahad i, 2.23 kongce, o takaraw i, 1.34 kongcen.
it-2 369 fiedac 8 fatac
Pipatoˈayaan
Pipatoˈayaan no Fangcalay Kopang. Mapatirengto ko fangcalay kopang i, doedoan no Israil tamdaw ko nipalimoˈotan no Kawas a patireng to tosa pipatoˈayaan. Misakimoodan mitodoh a pipatoˈayaan (roma “fodawan a pipatoˈayaan” hananay [Kasadakan 39:39]) tano akasiya kilang a misangaˈ, pakongkong han ko lalomaˈ nira, awaay ko satahaf ato paranaan nira. 2.2 kongfen ko kakayaˈ, 1.3 kongfen ko takaraw, paketingen ningra i sepat a ciko no pipatoˈayaan ko waˈa, tafoen to fodawan konini, sangaˈen ko saki pipatoˈayaan a fodawan a lasa. Celaken a pataliyok i “salaenoan noya pipatoˈayaan koya fodawan a lasa, tangasa i fatad noya pipatoˈayaan ko takaraw nira.” Sangaˈen ko sepat a masakadangay a fodawan to paˈonocan, paketingen i sepat a ciko no pipatoˈayaan konini. Tatodong nora, makofatiˈiyan iraay ko pipacomodan tora lasa alatek. Ora fodawan iraay ko lasa, iraay ko pitelian to ˈafo a kapowa ato tepi ato kaysing, sacica to sapicocok to titi.—Kasadakan 27:1-8; 38:1-7, 30; Saˈosi 4:14.
Kadkaden ko Odoˈ no Sinael
(Kasadakan 37:1) O akasiya a kilang ko sapisangaˈ ni Picali to katatelekan a lipa, o kakaya i, 111.25 kongfen, o kakahad i, 66.75 kongfen, o takaraw i, 66.75 kongfen.
(Kasadakan 37:10) O akasiya a kilang ko sapisangaˈ ningra to cukui, o kakayaˈ i, 89 kongfen, o kakahad i, 44.5 kongfen, o takaraw i, 66.75 kongfen.
(Kasadakan 37:25) O akasiya a kilang ko sapisangaˈ ningra to paexiwan. Salipaen ko pisangaˈ, o kakayaˈ i, 44.5 kongfen, o kakahad i, 44.5 kongfen, o takaraw i, 89 kongfen. Pawaˈaen ningra ko kasaciko no paexiwan.
it-1 791-792 fiedac
Akasiya Kilang
O akasiya kilang micelakay ko caˈang nira, iraay ko ceka tora caˈang. Marariday maˈaraw ko pina akasiya kilang mafedfeday a malaˈowap a malengaw, mankora ano somowal to akasiya kilang i, o (shit·timʹ) hananay, tona mafafedfeday ko pina a kilang. Takaraw no akasiya tangasaay i 6-8 a kongfen, macelakay pasifatiˈiyan ko papah nira, kaepeday; kolilaway ko hana, fangsisay; kohetingay ko tolak karekahay; ˈatekesay ko kilang nira, caka ngicngic no fao. Tona adihayay ko kangaˈayan no akasiya kilang, hanaca mahelaay i kohkohan, matatodongay to sapisangaˈ to fangcalay kopang ato lalosidan nira, mahawpay sapisangaˈ to katatelekan a lipa (Kasadakan 25:10; 37:1), pitelian to epang a cukui (Kasadakan 25:23; 37:10), pipatoˈayaan (Kasadakan 27:1; 37:25; 38:1), o ˈonoc to sapiˈorong to lalosidan (Kasadakan 25:13, 28; 27:6; 30:5; 37:4, 15, 28; 38:6), malo tektek to picaˈitan to sapaˈading a kopang (Kasadakan 26:32, 37; 36:36), sapaˈokak (Kasadakan 26:15; 36:20) sapafalat a kilang (Kasadakan 26:26; 36:31).
(Kasadakan 38:8) Sangaˈen ningra ko fodawan a pinanawan ato patelian nira, o dadingoan no matayalay i kaˈayaw no fawahan no fangcalay kopang a fafahiyan ko sapisangaˈ tonini.
w15 4/1 15 fiedac 4 fatac
Mafanaˈay Kiso Han?
O dadingoan no i lintaday no Fangcalay Cudad caay ka lecad tono aniniay, micadiwan ko malad a patidiˈ. Marariday o fodawan, o romaroma tano ekiman, lingkim a misangaˈ. Sakina cecay somowal ko Fangcalay Cudad to dadingoan i, itiyaay tiya patireng ko Israil tamdaw to fangcalay kopang, oya pidokoan nangra a kitiraan. Itiya iraay ko fafahiyan pakiyaho to dadingoan, to sapisangaˈ to pinanawan a fodawan ato patelian nira. (Kasadakan 38:8) Ano nengnengen orira dadingoan ngaˈayay a lasinolen, ikor sapisangaˈ to fodawan.
Miˈosi to Sinael
(Kasadakan 37:1-24) O akasiya a kilang ko sapisangaˈ ni Picalil to katatelekan a lipa, o kakaya i, 111.25 kongfen, o kakahad i, 66.75 kongfen, o takaraw i, 66.75 kongfen. 2 Pataˈdipen ningra to ekim ko lalomaˈ ato paputal nira, paeresen ningra to ekim ko taliyok nira. 3 Sangaˈen ningra to ekim ko sepat a masakadangay to paˈonocan a miˈorong, paketingen ningra i sepat a kasaciko konini, makaha tosa ko tatihi nira. 4 O akasiya a kilang ko sapisangaˈ ningra to tosa a ˈonoc, tafoen ningra to ekim. 5 Pacocoken ningra toya masakadangay i makofatiˈiyan no lipa konini, to sapiˈorong to lipa. 6 Sangaˈen ningra to ekim ko satahaf noya lipa, o kakayaˈ i, 111.25 kongfen, o kakahad i, 66.75 kongfen. 7 Toktoken ningra a misangaˈ to ekim ko tosa a kirupim, paketingen ningra konini i satahaf a palacecay. 8 Ala cecay i satahaf a mipaketing, tosaay ko misangsaˈan a kirupin. 9 Pasasiˈayawen ningra koya tosa a kirupim, macelak ko sapikpik nira a mitahepo to satahaf noya lipa. 10 O akasiya a kilang ko sapisangaˈ ningra to cukui, o kakayaˈ i, 89 kongfen, o kakahad i, 44.5 kongfen, o takaraw i, 66.75 kongfen. 11 Pataˈdipen ningra to ekim, paeresen ningra to ekim ko taliyok nira. 12 Pataliyoken ningra to 7.4 kongfen a masakapalay a kilang ko taliyok nira, ta paeresen ningra to ekim konini. 13 Sangaˈen ningra to ekim ko sepat a masakadangay to paˈonocan a miˈorong, paketingen ningra i sepat a kasaciko no waˈay no cukui. 14 I lawac no cukui a mipakting toya ekim a kadang, ta mangaˈay a micocok to ˈonoc a miˈorong toya cukui. 15 O akasiya a kilang ko sapisangaˈ ningra to ˈonoc, tafoen ningra to ekim konini. 16 O ekim ko sapisangaˈ ningra to tipid ato totoˈ ato talid ato patakidan ato takid. 17 Sangaˈen ningra to kimooday a ekim ko cecay a padawdawan, toktoken ningra konini a misangaˈ to padawdawan ato kamaroˈan nira ato waˈay nira, pasacaˈacaˈangen, pasapokopokohen, pasahanahanaen ningra a paeres konini. 18 Pasadaken ningra ko enem a caˈang i padawdawan makahatolo ko fatiˈiyan nira. 19 Cecay a caˈang i, tolo ko hana, papokohen, papilingen ningra konini. 20 Sepaten ningra ko hana no waˈay noya padawdawan, papokohen, papilingen ningra. 21 Cipokoh i kalaeno ko makahacecay noya tolo a caˈang. 22 O kimooday a ekim ko nitoktokan ningra a misangaˈ to pokoh ato caˈang ato padawdawan a maemin. 23 Sangaˈen ningra ko pito a tipid no dawdaw. O ekim ko sapisangaˈ ningra to sapikerit to timsim no dawdaw ato tipid no dawdaw. 24 Sangaˈen ningra to 34.2 kongcin a ekim ko padawdawan ato polong no lalosidan.