Pinengnengan to Lalakaw no Mitosilay ato Nikaˈorip Rayray no Saˈopo
SAKA 11 FOLAD 2-8 ROMIˈAD
O ODOˈ KO KIMAD NO KAWAS | KASADAKAN 39-40
“Doedoen ni Mosi ko Sapalimoˈot a Midemak”
(Kasadakan 39:32) Doedoen no Israil tamdaw a mihaen ko demak. Palimoˈotan ni Yihofa ci Mosian, lahecian nangra a midemak. Mipatirengay to fangcalay kopang a demak, malaheciayto maemin.
w11 9/15 27 fiedac 13 fatac
O Kafanaˈan Tamdaw ni Yihofa Kiso Han?
13 Caay ka lecad ci Korah ci Mosian. “Itini i polong no tamdamdaw i, awaay ko milecaday to nika damsay ni Mosi.” (Saˈosi 12:3) Misetekay ko falocoˈ a mitengil to sapalimoˈot ni Yihofa, patalahkalay to nika damsay ningra. (Kasadakan 7:6; 40:16) Awaay ko maamaan a demakan to cisasaay cingra to pakayraan ni Yihofa, anoca maketeren to nika pitoor to sakayat ni Yihofa. Patinakoen, pakayni i pisangaˈ to fangcalay kopang, misaheciay ko sapalimoˈot ni Yihofa, mahawpay ko tano maanan kodong a keliw a misangaˈ to ciˈdap no kopang, hakowaen ko pikafitan a kadang. (Kasadakan 26:1-6) Itini i likakawa no Kawas, alatek sapatorod no kantok tada misaheciay, maˈfangen kiso alatek. Kawra o malefotay a kantok ci Yihofa, pakasoˈlinay to sikawdan no Niyah, mahemekay patorod to tayal i cangranan. Ano adihayay ko misaheciay a sapalimoˈot Ningra i, maedeng iraay ko lalangian Ningra a mihaen. Sinanoten, soˈlin masaheciay ko pipalimoˈot ni Yihofa, cowa ka naˈayen ci Mosi, misalaenoay to inaneng no mako ci Yihofa, cowa ka saan a miharateng ci Mosi. ˈArawhan, kihcod a sapalimoˈot ni Yihofa, patorodan ni Mosi ko matayalay a “midoedo a midemak”. (Kasadakan 39:32) Tada misapoeneray ci Mosi! O tayal ni Yihofa konini, o matayalay aca ko niyah sanay cingra.
(Kasadakan 39:43) Minengneng ci Mosi to kahacecacecay a nitayalan nangra i, masongilaˈ nangra a midoedo ko limoˈot ni Yihofa a misangaˈ. Saka pakalemeden ni Mosi cangra.
(Kasadakan 40:1, 2) Pasowal ci Yihofa ci Mosian: 2 “Isaka cecay a romiˈad no saka cecay a folad i, pipatireng kiso to fangcalay kopang.
(Kasadakan 40:16) Madoedo ni Mosi a maemin ko sowal ni Yihofa a misangaˈ.
w05 7/15 26 fiedac 3 fatac
Itini i Maamaan a Demak Madimadiay Kiso Han?
3 Itini i Hipray 3:5 somowal ci Mosian o madimadiay a matayalay cingra sanay. Samaanay patalahkal ci Mosi to nika madimadi hani? Ocoren ni Yihofa papisangaˈ to fangcalay kopang i, “madoedo ni Mosi a maemin ko sowal ni Yihofa a misangaˈ,” sanay. (Kasadakan 40:16) Hay, o midokoay ci Yihofaan kita, oha mamidofdof to sapalimoˈot Ningra, madimadi a midoko Cingranan. Soˈlinto tahasiˈayaw to pakidemay a sapalifet, cowa ka aeca madimadi ci Yihofaan. Nikawrira, madimadi kita hokira, cowa aca ko papakataˈlif to taˈangayay a sapalifet. Sowal ni Yis: “Itini i mimingay a demak madimadi ko tamdaw, itini i adihayay a demak mamadimadi cingra; itini i mimingay a demak caay ka moecel ko tamdaw, itini i adihayay a demak cowa ko mamoecel cingra.” (Luka 16:10) Ano itinito i caay ka hapinang a demakan, mamitafo to madimadi kita ngaˈ.
Kadkaden ko Odoˈ no Sinael
(Kasadakan 39:34) nisakahengangan a micengel a katol no siri to safadahong ato katol no lokedaw no riyar to safadahong ato sapalaˈed a kopang;
it-1 565 fiedac 6 fatac
Lokedaw no Riyar
Samaanay Miala ko Israil Tamdaw. Ora nisowalan no Fangcalay Cudad a taʹchash hananay, ano o lokedaw no riyar kora, na samaanay a miala ko Israil tamdaw tora katol no lokedaw no riyar hani? Tohatiniay, o lokedaw no riyar itiniay i Tolas no Kaˈamis no Cikiw ato Tolas no Katimol no cikiw a malengaw, o romaroma lokedaw no riyar maolahay i dihekoay a pala. Anini iraayho ko lokedaw no riyar maˈorip itini i Ticonghay ato romaroma dihekoay a riyar. Toniya pina a hahekalan, miˈadopan no tamdaw ko adihayay a lokedaw no riyar, hato taˈangayayto ko kalowan nangra, kawra itini i lintad no Fangcalay Cudad, adihayayho ko lokedaw no riyar i Ticonghay ato Kahengangay a riyar. Tangasa isaka 1832 miheca, mitilidan a Fangcalay Cudad a Citing ni Kalmet, sanay ko sowal: “Adihayay maˈaraw ko lokedaw no riyar i potipot no Kahengangay riyar ato italiyokay potipot no Sinay,” sanay.—Nengnengen ko The Tabernacleˈs Typical Teaching, mitilidan ni A. J. Pollock, London, p. 47.
(Kasadakan 40:34) Itiya i, tahepoen no toˈem koya fangcalay kopang. Matomes ko ˈdil ni Yihofa i lalomaˈ noya fangcalay kopang.
w15 7/15 21 fiedac 2 fatac
Cima ko Pakaˈaraway to Nitayalan Iso, Tada Kalimlaan Kora Han?
Ta mapatirengto ko fangcalay kopang, “itiya i, tahepoen no toˈem koya fangcalay kopang. Matomes ko ˈdil ni Yihofa i lalomaˈ noya fangcalay kopang.” (Kasadakan 40:34) Patalahkalay koni to nika hemek ni Yihofa tora fangcalay kopang. Haratengen iso hena itiya, samaanay ko falocoˈ ni Picali aci Aholiyap hani? Soˈlina caay matilid ko ngangan no niyah itira tora lalosidan, kawra maˈaraw ko nika palemed ni Yihofa, maedeng marenecay ko falocoˈ nangra. (Taneng 10:22) Ikor a pina mamihecaan, padadotocay a kalasaka dademaken kora lalosidan a midoko ci Yihofaan, maedeng mahemekan nanay cangra. Ano ikor, patikol maˈorip i Lakoing cangra, mamafanaˈ to 500 a mihecaan a kalasaka dademaken i fangcalay kopang i, hakowa ko nika hemek nangra saw!
Miˈosi to Sinael
(Kasadakan 39:1-21) Sangaˈen nangra to langdaway ato tarangitangay ato kahengangay a fanoh a walay ko sasarikoˈen no matayalay i fangcalay kopang a tamdaw. Sangaˈenho nangra ko sakakaay saysi a rikoˈ ni Aron, matira to palimoˈotan ni Yihofa ci Mosian. 2 Tano ekiman a walay, kangdaway walay, tarangitangay fanoh no siri, ato kahengangay a fanoh a walay ato keliw misangaˈ to fangcalay a rikoˈ. 3 Toktoken nangra a misakohepic ko ekim, keriten nangra a misakieming a misawalay, ta pacamolen nangra i keliw ato langdaway ato tarangitangay ato kahengangay a fanoh a walay a mitenooy. Teselen nangra konini a fangcalay rikoˈ. 4 Taˈisen nangra i makolawac no fangcalay a rikoˈ ko tosa a kawes, ta mangaˈay a mikedec. 5 Oya sapakakafit to fangcalay rikoˈ a sakedec a kawes i, o malecaday a walay ko sapisangaˈ nangra, o sano ekimay ko cengel ato langdaway ato tarangitangay ato kahengangay a fanoh a walay ato keliw ko nitenooyan nangra. Matira to sapalimoˈot ni Yihofa ci Mosian. 6 Paketemen nangra i ekim ko tosa a kahengangay a odoˈ, sakapahen nangra a mitoˈtoˈ itira ko ngangan no tosa ko safaw a ngasaw no Israil. 7 Taˈisen nangra konini a tosa a tadamaanay a fakeloh i tosa a kawes no fangcalay rikoˈ, o todong no tosa ko safaw a ngasaw no Israil konini, matira to sapalimoˈot ni Yihofa ci Mosian. 8 O matiyaay o ekim ko cengel a walay ato langdaway ato tarangitangay ato kahengangay a fanoh a walay ato keliw ko sapisangaˈ nangra to sakifalohang a paya. Teselen nangra konini a palecad to pisangaˈ to fangcalay rikoˈ. 9 Salipaen nangra ko pisangaˈ tonini tepiken nangra a patataˈdip, o kakayaˈ nira i, 22.2 a kongfen, o kakahad nira i, 22.2 a kongfen. 10 Paketingen nangra ko tadamaanay a fakeloh. O saka cecay a rayaray i, o kahengangay a tadamaanay a fakeloh ato topac a fakeloh ato imirarto a fakeloh. 11 O saka tosa a rayaray i, o torko a fakeloh ato safaya a fakeloh ato tayamont a fakeloh, 12 saka tolo a rayaray i, o [lisim (leshʹem) a odoˈ] ato kohecalay a odoˈ ato tarangitangay tingalaway a fakeloh, 13 o saka sepat a rayaray i, o langdaway a fakeloh ato kahengangay a odoˈ ato folalacay a tingalaway a fakeloh, o ekim ko pikafitan nira a maemin. 14 Kahacecay a odoˈ mitaypiyaway to cecay wawa ni Yakop, haenen o mitoˈtoˈan, mitoˈtoˈ to ngangan no tosa ko safaw a ngasaw. 15 O ekim ko sapisangaˈ nangra to safet no sakifalohang paya. Samatiyaen nangra o niˈopiran a kaered ko pisangaˈ. 16 Sangaˈen nangra ko tosa a ekim to paketeman ato tosa a ekim a kadang, paketingen nangra i kafaed i makolawac no sakifalohang a paya konini. 17 Ta soˈoten nangra koya kadang i sakifalohang a paya atoya tosa a niˈopiran a ekim a safet. 18 O roma a teloc noya safet i, soˈoten i tosa a ekim a kadang ta makakafit konini to saˈalay i kaˈayaw no fangcalay rikoˈ. 19 Sangaˈen nangra ko tosa a ekim a kadang, soˈoten nangra i salaenoan no sakifalohang i makolawac i lalomaˈay a lilis no fangcalay rikoˈ. 20 Sangaˈen haca nangra ko tosa a ekim a kadang, paketingen nangra i kaˈayaw no fangcalay rikoˈ i salaenoan no tosa a saˈalay, i tatihi no kararekepan i kafekang no nitenooyan a telec. 21 O kangdaway a kawes ko sapisoˈot nangra to kadang no sakifalohang ta caay ka tefad. Matira to sapalimoˈot ni Yihofa ci Mosian.
SAKA 11 FOLAD 9-15 ROMIˈAD
O ODOˈ KO KIMAD NO KAWAS | LIFI 1-3
“Araaw no Mipatoˈayaay”
(Lifi 1:3) “‘Ano mipacakat cingra to nisakimoodan a mitodoh a kolong i, kao awaay ko samoˈ a okang a kolong ko sapatoˈaya, alaen a patayra i fawahan no fangcalay kopang, itini i kaˈayaw ni Yihofa misarocod ko falocoˈ a mipacakat.
(Lifi 2:1) “‘Ano ira ko pacakatay ci Yihofaan to emi i, kao sangaˈayay a nitifekan a palaaped a emi ko sapacakat, fasfasen to simal ato sapafangsis i fafekang.
(Lifi 2:12) “‘Oniniya dafong o mamalo saˈayaway a nilitodan to papacakaten ci Yihofaan, kawra aka pacakaten a malafangsisay a sapatoˈaya.
it-1 690 fiedac 8 fatac
Sapatoˈaya
Nisakimoodan mitodoh a sapatoˈaya. Ano pacakat to nisakimoodan mitodoh a sapatoˈaya i, o sasakimooden a pacakat, aka a tereken ko maamaan nira. (Palalinien to Kakitaan 11:30, 31, 39, 40.) Nolatekay o nisakimoodan mitodoh a sapatoˈaya palecadan pacakat ato sakahepol no raraw a sapatoˈaya, paihkalay to mingitangitay ci Yihofaan a micada tora pacakatan a sakahepol no raraw a sapatoˈaya. Ci Yis Kristo mihaeminan ko niyah a pacakat a malo “nisakimoodan mitodoh a sapatoˈaya.
it-1 693 fedac 4 fatac
Sapatoˈaya
Sapatoˈaya no Emi. Sapatoˈaya no emi ngaˈayay palecaden to sakarihaday a sapatoˈaya, nisakimoodan a sapatoˈaya ato sakahepol no raraw a sapatoˈaya a mipacakat, malo “saˈayaway a nilitodan” a sapatoˈaya, nolatek ngaˈayay hacecay han a pacakat. (Kasadakan 29:40-42; Lifi 23:10-13, 15-18; Saˈosi 15:8, 9, 22-24; 28:9, 10, 20, 26-28; 29 fedengan) O araaw pacakat to emi i, o sapiakoˈidaw, paihkal to pihayi to hinapaladaˈ no Kawas, miakoˈid to sapalemed ato pakadofa Ningra. Marariday pacamolen to simal ato sapafangsis. Ngaˈayay alaen ko pacamolan to simal a caay patamoden a epang, ato pasimalan a kohepicay a epang, ato nipacamodan to simal ko safangcalay a aped no emi a ˈapelad no epang. O romaroma sapatoˈaya no emi mitodohan, o ˈosawto i, pafelien ko saysi a komaen. Ano o sakarihaday a sapatoˈaya, o pacakatay a tamdaw ngaˈayay a komaen. (Lifi 6:14-23; 7:11-13; Saˈosi 18:8-11) Ora mipacakatan a sapatoˈaya no emi cowa ko ngangaˈay patamoden anoca pacamoren to matamodayto a ˈodal (nengnengen o ˈodal no sokon a losay).—Lifi 2:1-16.
(Lifi 3:1) “Ano ira ko pacakatay to sakarihaday a sapatoˈaya i, o papiliˈen ningra ko awaay ko samoˈ a okang ano eca i, o tawinaan a kolong, pacakat ci Yihofaan.
it-1 691 fiedac 2 fatac
Sapatoˈaya
Sakarihaday a sapatoˈaya. Ano pacakat to micadaan ni Yihofa a sakarihaday a sapatoˈaya i, paihkalay to sakarihadayaw ato Kawas. O paro no lomaˈ ningra ato cingra o kakomaen to titi noya sapatoˈaya (Itini i putal no fangcalay kopang a komaen; o sowal no litengan, itini i putal iraay ko taloˈan mitaliyok tora fangcalay kopang, itini i fangcalay sefi iraay ko kakomaenan a kitiraan, sanay.) Pina a setel pafelien koya mipacakatay tora sapatoˈaya a saysi, romaroma setel pafelien koya matayalay tora romiˈad a saysi. Todohen ko simal nora sapatoˈaya, patalafekang to ˈacefel, o sakahemek ni Yihofa a hanek. O remes mitaypiyaway to ˈorip, ono Kawas kora, mankora o papanokayen ko remes i Kawasan. Mihaen i, o saysi, o midokoay a tamdaw ato ci Yihofa malecaday malacafay mitahka, patalahkal to ngaˈayay noka lalaˈed nangra. Ano caay ka korac ko cima (madenga no nisowalan no rikec a maamaan a kaacekan a demak), nawhani komaen to sapatoˈaya a titi, anca komaen to halafinayto (faedet ko romiˈad satapangto ˈangeliw) a titi, o papatayen cingra. Ano caay ka korac ko tireng a milayap a komaen, anca komaen to maponiˈayto hananay ni Yihofa a minengneng i, caay pisakareteng to fangcalay dafong, mipakaditay to nika pitahka to tangidaf no Kawas.—Lifi 7:16-21; 19:5-8.
Kadkaden ko Odoˈ no Sinael
(Lifi 2:13) “‘O nipacakatan iso a maamaan a sapatoˈaya i, pacinahen a maemin, o mitaypiyaway ko cinah to sakatatelek ato Kawas. Maamaan a sapatoˈaya pacinahen maemin.
(Icikil 43:24) Kitingen ko kolong ato siri patayni i kaˈayaw ni Yihofa. Folesaken no saysi ko cinah i tireng nangra, pacakaten ci Yihofaan malo sakimoodan a mitodoh a sapatoˈaya.
w04 5/15 22 fiedac 3 fatac
Kalimlaan no Lifi Cudad
2:13—Maamaan a sapatoˈaya hano “cinahen” no saysi a mipacakat? Mihaen cowa ko sapisaˈaredetaw tora sapatoˈaya. O cinah hananay i, o sakaecaaw ka maponiˈ no titi. Pacinahen ko sapatoˈaya, mitaypiyaway to caay ka manahor a maponiˈ.
(Lifi 3:17) “‘Aka ka komaen to simal ato remes. ano icowato ko aroˈ namo i, o dadoedoen namo konini a limoˈot a tahadaˈoc.’”
w04 5/15 22 fiedac 3 fatac
Kalimlaan no Lifi Cudad
3:17. Tona o safangcalay ko simal, mikeceng to tamdaw a komaen to simal o sapisaˈicelaw pasowal to Israil tamdaw, oni Yihofa ko sangaˈayay o sanay. (Satapangan 45:18) Patalipaˈelalay kitanan o papafelien ita to sangaˈayay ci Yihofa o sanay.—Taneng 3:9, 10; Kolosay 3:23, 24.
Miˈosi to Sinael
(Lifi 1:1-17) Tahidangen ni Yihofa ci Mosi nai fangcalay kopang a pasowal i cingranan: 2 “Pasowalen ko finawlan no Israil. Pasowal i cangranan: ‘Ano ira ko cima namo to papacakat a patoˈaya ci Yihofaan i, kao kolong ano eca i, o siri ko sapacakat. 3 “‘Ano mipacakat cingra to nisakimoodan a mitodoh a kolong i, kao awaay ko samoˈ a okang a kolong ko sapatoˈaya, alaen a patayra i fawahan no fangcalay kopang, itini i kaˈayaw ni Yihofa misarocod ko falocoˈ a mipacakat. 4 O kakapaen ningra ko fongoh noya sapatoˈay, ta malayap konini a nisakimoodan a mitodoh a sapatoˈaya, o patodongay to sakahepol no raraw ningra konini. 5 “‘O papacoken ningra i kaˈayaw ni Yihofa konini a okang a kolong, o aalaen no wawa ni Aron to malosaysiay ko remes nonini a sapatoˈaya a pacakat, ta farasiˈen konini a remes i taliyok no pipatoˈayaan i fawahan no fangcalay kopang. 6 O papodacen nangra ko katol noya sapatoˈaya, o kakeriten nangra ko heci a misaeked. 7 O tatelien no wawa ni Aron to malosaysiay ko kasoy i kafekang no pipatoˈayaan, ta likaten nangra ko namal. 8 Telien nangra koya titi ato fongoh ato simal i pipatoˈayaan a mitodoh. 9 O sasawsawen to nanom ko kemod ato waˈay no sapatoˈaya. O papatelien no saysi konini a maemin i pipatoˈayaan a pacakat a mitodoh. O kaolahan ni Yihofa ko fangsis nonini a nitodohan a sapatoˈaya. 10 “‘Ano o lalifanohen a siri ano eca o siri ko sasakimooden ningra a mitodoh a patoˈaya i, kao awaay ko samoˈ a okang a siri ko sapatoˈaya. 11 Ka i kaˈamis no pipatoˈayaan a mipacok toya okang a siri i kaˈayaw ni Yihofa, ta alaen no wawa ni Aron to malosaysiay ko remes no sapatoˈaya a mifarasiˈ i taliyok no pipatoˈayaan. 12 Cikciken ko titi, halo fongoh ato simal telien i kafekang no maromromay a kasoy. 13 O sasawsawen to nanom ko kemod ato waˈay no sapatoˈaya. O papatelien no saysi konini a maemin i pipatoˈayaan a pacakat a mitodoh. O kaolahan ni Yihofa ko fangsis nonini a nitodohan a sapatoˈaya. 14 “‘Ano o ˈayam ko sapacakat ningra a misakimood a mitodoh a patoˈaya i, kao topi no lotok ano eca i, o topi no lomaˈ ko sapatoˈaya. 15 Ta alaen no saysi konini a ˈayam a patayra i pipatoˈayaan, wileten ningra a miketon ko fongoh noya ˈayam, ta telien i pipatoˈayaan a mitodoh, hetecen ningra i tatihi no pipatoˈayaan ko remes nira. 16 Oya patelian no ˈayam to nikaenan nira i takolaw ato nikaenan nira i, pahakelong han a mikerit a mifalah i kawali no pipatoˈayaan i pifalahan to ˈafo. 17 Tatoyen ningra ko tosa a sapikpik noya ˈayam a mipelaˈ ko falohang nira, nikawrira, aka cinasen, ta telien i pipatoˈayaan a maemin ko sapatoˈaya a mitodoh a pacakat. O kaolahan ni Yihofa ko fangsis no nitodohan a sapatoˈaya.
SAKA 11 FOLAD 16-22 ROMIˈAD
O ODOˈ KO KIMAD NO KAWAS | LIFI 4-5
“Pafelien to Sangaˈayay ko Kawas”
(Lifi 5:5, 6) “‘Ano ciraraw ko tamdaw i, patalahkalen ko raraw. 6 O papatefoc cingra to nika ciraraw ningra a patayra to cecay a tawinaan a lalifanohen a siri, ano eca i, o tawinaan a siri a pacakat ci Yihofaan to sakahepol no raraw a sapatoˈaya. O mamisalisin ko saysi to sakahepol no raraw ningra.
it-1 692 fiedac 9 fatac
Sapatoˈaya
Sakahepol no patelac a sapatoˈaya. Sakahepol no patelac a sapatoˈaya o sapihepol to raraw, samanen kahacecay a patelac milingatay to raraw. Kawra sakahepol no patelac a sapatoˈaya iraay ko miming a kasasiromaan to sakahepol no raraw a sapatoˈaya, tona cowa ko padetengan a raraw kora, mihaen cingra oha sapafeliaw to sapatefoc tora demak anca sapatatikolaw to fadangalan. Alatek pakararaway cingra to fadangalan ni Yihofa, anoca mirepatay to fadangalan no niyah a malo fangcalay a finacadan, mihaenay, papacakat to sakahepol no patelac to sapatefoc to nika pakararaw to fadangalan ni Yihofa, ato sapiliyawaw to fadangalan no niyah ilaeno no Katatelekan Rikec, hanaca mihepol to mamacada a pitefoc cingranan.—Palalinien to Isaya 53:10.
(Lifi 5:7) “‘Ano ira ko caay pakaˈaca a tamdaw to cecay a siri to sapatefoc ningra to nika ciraraw ningra i, alaen ko tosa a topi no lotok ano eca i, tosa a topi no lomaˈ a patayra i kaˈayaw ni Yihofa, o cecay i, o sakahepol no raraw a sapatoˈaya, o cecay i, o sasakimooden a mitodoh a sapatoˈaya.
w09 6/1 26 fiedac 3 fatac
Ciharatengay Cingra to Nika Cangoˈot Ita
O saˈosi no Rikec patalahkalay to sidaˈit ato kaciharateng ni Yihofa, sanay ko sinael: “Ano ira ko caay pakaˈaca a tamdaw to cecay a siri to sapatefoc ningra to nika ciraraw ningra i, alaen ko tosa a topi no lotok ano eca i, tosa a topi no lomaˈ a patayra i kaˈayaw ni Yihofa.” (saka 7 sinael) “Ano ira ko caay pakaˈaca a tamdaw” oniniya sowal ngaˈayay hongyaken to “caay pakadangar ko kamay” sanay. Ano tada manikaway ko cima Israil tamdaw, awaay ko ˈicel pacakat to siri i, ngaˈayay pacakat cingra to macakayay ningra a sapatoˈaya, o tosa topi no lotok anoca tosa topi no lomaˈ. Matiniay a sapatoˈaya o kahemekan no Kawas a micada.
(Lifi 5:11) “‘Ano ira ko caay pakaˈaca a tamdaw to tosa a topi no lotok ano eca i, topi no lomaˈ i, mangaˈay cingra a mipacakat to cecay a kongcin no aped no emi to malo sakahepol no raraw ningra a sapatoˈaya, nikawrira, aka pacamolen to simal no olif ano eca i, o sapafangsis, nawhani o sakahepol no raraw a sapatoˈaya konini.
w09 6/1 26 fiedac 4 fatac
Ciharatengay Cingra to Nika Cangoˈot Ita
Ano oninito tosa topi caayho pakafilo cingra i, sasamaanto aki? O saˈosi no Rikec ni Mosi i: “Mangaˈay cingra a mipacakat to cecay a kongcin no aped no emi to malo sakahepol no raraw ningra a sapatoˈaya.” (saka 11 sinael) Siniˈadaay ci Yihofa to tada manikaway tamdaw, mihayda cangranan pacakat to cowa ciremes a sakahepol no raraw a sapatoˈaya. Itini i Israil, awaay ko cimacima to nika nikaw no niyah caay ka ngaˈay mihepol to raraw, caay ko papakayni toninian a malahedaw ko sakangaˈayaw ato Kawas.
Kadkaden ko Odoˈ no Sinael
(Lifi 5:1) “‘Ano ira ko matahidangay a tamdaw a mapatayra i pisawkitan a papipawacay to maˈaraway ato kafanaˈan ningra a demak, ano caay kakahi a somowal a pawacay cingra i, o ciraraway cingra, o mamatefoc cingra.
w16.02 29 fiedac 14 fatac
Minanam Nai Madimadiay Sikawdan ni Yihofa
14 Saka madimadiaw to tao, isalakaten a madimadi ci Yihofaan cowa ko madoloay. Patinakoen, alatek mafanaˈay kita to cimaan salikaka pakidemay ko raraw ningra, ano o salawina anca ngaˈayay a widang ita cingra i, sapihimedaw kita to raraw ningra. Nikawrira, mihaen to demak cowa ko madimadiay ci Yihofaan, wa sasalakaten ita madimadi ko Kawas ngaˈ. Haenen ci Natanan, patalahkal to sidaˈitay hanaca fanekfek ko pakayraan, misaˈicel palimoˈot tora tamdaw misaali to sapadama no malohemay malitengay. Ano aeca sa pikilim to malohemay malitengay i, tona madimadiay kita to Kawas, pasowalen ita ko malohemay malitengay. O rarihadayen no malohemay malitengay padama cingra pasasiyor a mifalic. Mihaenay haw i, pasowalen ko malohemay malitengay tora demak, o madimadiay ci Yihofaan kora, hanaca o sidaˈitay to salawina ato widang kora.—ˈOsien ko Lifi 5:1; Kalatiya 6:1.
(Lifi 5:15, 16) “Ano ira ko caay pipacakat to papafelien ci Yihofaan a fangcalay a maamaan, ano caacaay ko nipadetengan ningra i, o papatefoc cingra to nika patelac ningra to cecay a caay ka cisamoˈ a lalifanohen a okang a siri a patayra ci Yihofaan a pacakat to sakahepol no raraw a sapatoˈaya. O ˈaca no siri i, o niketonan no fangcalay a kaitiraan ko piˈarawan. 16 O papasadak cingra to caay ka pasadaken ningra a fangcalay a maamaan, o papatongal cingra to cecay no limaay a pafeli to saysi tonini, ta o papacakaten no saysi ko okang a lalifanohen a siri to sakahepol no patelac ningra a sapatoˈaya, ta mahepol ko raraw ningra.
it-2 189 fiedac 2 fatac
O Fangcalay a Maamaan
O Pinaˈorip ato Saˈayaway a Nilitodan. Itini i pinengneng ni Yihofa, o fisac a wawa to okangan kolong ato siri o fangcalay, o papacakaten a patoˈaya ci Yihofa, pinapina titi o papafelien ko makoracay a saysi. (Saˈosi 18:17-19) O saˈayaway a nilitodan ato cecay no moetepay a nilitodan o fangcalay, malecaday to kihecod to mipacakatan a sapatoˈaya a fangcalay. (Kasadakan 28:38) O fangcalay hananay ni Yihofa a dafong sahtoay o makoracay, caay kangaˈay a sakahemawen, pakaditen, caay ka ngaˈay kalasaka dademaken i kalo a demakan. Patinakoen to cecay no moetepay a sapatoˈaya, ano iraay ko tamdaw miala to sapacakat a cecay no moetepay ko emi, ano mararaw a maala ko paro no lomaˈ a misangaˈ to epang i, o micicihayto to saˈosi no Rikec. Oha papacakat cingra to cecay awaay ko samoˈ a lalifanohen a okangan a tofor a siri malo sakahepol no patelac, oha papatefocho to nika ciraraw, papatongal cingra to cecay no limaay a pafeli. Orira Rikec pasifanaˈay to tamdaw to kalimlaan a kimad: O tamdamdaw oha mamisakareteng to papafelien i ci Yihofaan a maamaan a fangcalay dafong.—Lifi 5:14-16.
Miˈosi to Sinael
(Lifi 4:27–5:4) “‘Ano ciraraw ko kalotamdaw to caay ko nipadetengan a nikaciraraw a miliyang to limoˈot ni Yihofa i, 28 ano mahapinang ningra ko nika ciraraw ningra i, o papacakat cingra to cecay a caay ka cisamoˈ a tawinaan a siri to sapatoˈaya. 29 Ta kapaen ningra ko fongoh noya sapatoˈaya, itini pitodohan to sakimoodan a mitodoh a kitiraan a mipacok tora sapatoˈaya to sapihepol to raraw ningra. 30 Cenoˈen no saysi ko tarodoˈ ningra i remes, renafen ningra toya remes ko sepat a waˈa i kasaciko no pipatoˈayaan, ta o ˈosawto a remes i, taktaken ningra i paranaan no pipatoˈayaan. 31 Ta alaen no saysi a maemin ko simal noya siri a matiya o piala ningra to simal no sakarihaday a sapatoˈaya. Telien i kafekang no pipatoˈayaan a mitodoh, pacakat to ˈacefel, pasadak to fangsisay a hanek pahemek ci Yihofaan. Patadoen no saysi to sakahepol no raraw ningra, ta masododto cingra. 32 “‘Ano pacakat cingra to lalifanohen a tofor a siri to malo sakahepol no raraw a sapatoˈaya i, kao awaay ko samoˈ a lalifanohen a tawinaan a siri ko sapacakat. 33 Ta kapaen ningra ko fongoh noya sakahepol no raraw a sapatoˈaya, ta itini i pisakimoodan mitodoh a kitiraan a mipacok to siri, pacakat to sakahepol no raraw. 34 Cenoˈen no saysi ko tarodoˈ ningra i remes, renafen ningra toya remes ko sepat a waˈa i kasaciko no pipatoˈayaan, ta o ˈosawto a remes i, taktaken ningra i paranaan no pipatoˈayaan. 35 Ta alaen no saysi a maemin ko simal noya siri a matiya o piala to simal no lalifanohen a tofor a siri to sakarihaday a sapatoˈaya. Ta palacecay han ningra a mitodoh to romaroma a sapacakat a patoˈaya ci Yihofaan. Mitodoh i pipatoˈayaan, pacakat to ˈacefel. Patado ko saysi to sakahepol no raraw ningra, ta masododto cingra.
5 “‘Ano ira ko matahidangay a tamdaw a mapatayra i pisawkitan a papipawacay to maˈaraway ato kafanaˈan ningra a demak, ano caay kakahi a somowal a pawacay cingra i, o ciraraway cingra, o mamatefoc cingra. 2 “‘Ano ira ko pakatefingay to kaacekan hananay no lisin a maamaan. Tinako sa ano matefing ningra ko mapatayay a ˈaˈadopen ato mapatayay a pinaˈorip ato mapatayay a manafoyay a fao i, o kaacekan cingra. Ano caacaay ko nipadetengan ningra a mitefing ano mahapinang ningra i, o ciraraway cingra. 3 Ano ira ko pakatefingay to nani tirengay no tamdaw a kaacekan a maamaan, ano o maamaanto i, ano matefing ningra i, o kaacekan cingra. Ano caacaay ko nipadetengan ningra a mitefing ano mahapinang ningra i, o ciraraway cingra 4 “‘Ano ira ko pacefa sanay a miketon to sowal a tamdaw, ano o ngaˈayayto ano o tatiihayto i, ano caacaay ko nipadetengan ningra a miketon a somowal, ano mahapinang ningra konini a demak ningra i, o ciraraway cingra.
SAKA 11 FOLAD 23-29 ROMIˈAD
O ODOˈ KO KIMAD NO KAWAS | LIFI 6-7
“Paihekal to Miakoˈiday a Falocoˈ”
(Lifi 7:11, 12) “‘O rikec a patoˈaya to sakarihaday aci Yihofa: 12 Ano ira ko miakoˈiday a pacakat to sapatoˈaya i, alaen ko pacamolan to simal a caay patamoden a epang, ato pasimalan a kohepicay a caay patamoden a epang ato nipacamodan to simal ko safangcalay a aped no emi a ˈapelad no epang, pahakelongen tora sapiakoˈid a sapatoˈaya a mipacakat.
Mananamay Sifanaˈ Nai Lifi a Cudad
9 Saka 2 sifanaˈ: Matayal kita saki Yihofaan pakayniay piakoˈid Cingranan. Nengnengen ita ko sapacakat nolitengan a Israil to Kawas a sakarihaday a sapatoˈaya, cacipinang to kalimlaan ko miakoˈiday a falocoˈ. Mikitini i Lifi cudad mananamay ita, pacakat to sakarihaday sapatoˈaya ko Israil i, ‘pakayniay piakoˈid.’ (Lifi 7:11-13, 16-18) Pacakat ko Israil tamdaw to hatiniay sapatoˈaya cowa ko mikitiniay i ˈinorong, o mikitiniay piakoˈid, o niyah a harateng pacakat to sakarihaday sapatoˈaya pakayniay kaolah ci Yihofaan. O pacakatay to sakarihaday sapatoˈaya a tamdaw malacafayay to paro no lomaˈ ato saysi komaen to titi no sapatoˈaya, kawra o romaroma a titi no sapatoˈaya edengan o hani Yihofa, cowa ka ngaˈay kaenen. O maamaan hani?
(Lifi 7:13-15) Caay konini a cecay, o mamipacakat haca cingra to citamoday a epang, pahakelong tora sakarihaday a sapatoˈaya a mipacakat. 14 O aalaen ningra nai tonini a epang ko alacecay to micidekay a sakangodo ci Yihofaan. Onini a sakangodo i, papafelien koya nifarasiˈay to remes no sakarihaday a sapatoˈaya a saysi. 15 O sapatoˈaya a titi i, emin han a komaen toya pipacakatan a romiˈad, aka ˈosawen ko maamaan a tahadafak.
w00 8/15 15 fiedac 15 fatac
Pakahemekay to Kawas a Sapatoˈaya
15 O roma mipacakatan a sapatoˈaya i, o sakarihaday a sapatoˈaya, matiliday i Lifi saka 3 fedengan. Itini no Hipray sowal, “rihaday” hananay cowa ko nika awa aca no lalood. Mikingkiway to Rikec ni Mosi sanay a cudad somowalay: “Itini i Fangcalay Cudad, o rihaday hananay, cowa ko nika awa aca no lalood, mahawpay ko nika rarihaday ato Kawas, ira ko ngaˈayay noka lalaˈed Cingranan, kadofa ato lipahak.” Mankora, pacakat ko tamdaw to sakarihaday a sapatoˈaya, cowa ko saka rarihaday aca ato Kawas, ao sapilifokaw to hemek no Kawas, ngaˈay ko nika lalaˈed Cingranan, paihkal to lipahak ato piakoˈid. Mapacakato ko remes ato simal ci Yihofaan i, o saysi atoya mipatoˈayaay a tamdaw o kakomaen tora titi. (Lifi 3:17; 7:16-21; 19:5-8) Mihaen i, o patoˈayaay tamdaw, saysi aci Yihofa hato malacafayay a komaen, patalahkalay to rihadayay a kalalaˈed nangra.
(Lifi 7:20) “‘O caay ka korac a tamdaw hananay no lisin, ano komaen cingra tonini a sakarihaday a titi i, o papatayen cingra.
w00 8/15 19 fiedac 8 fatac
Pakahemekay to Kawas a Sapatoˈaya
8 O pacakatay to sapatoˈaya a tamdaw wa mamisamaan hani? O saˈosi no Rikec i, o tayniayho ikaˈayaw ni Yihofa a tamdaw o mamakorac awa ko patelac ngaˈ. Ano o mananto a lalangian a pakatefing cingra to kaacekan i, salakat papacakat to sakahepol no raraw anoca sakahepol no patelac a sapatoˈaya, patikol miliyaw ko makoracay saaroˈan ikaˈayaw ni Yihofa, ikor ngaˈ lalayapen no Kawas ko sakarihaday a sapatoˈaya ningra. (Lifi 5:1-6, 15, 17) Mihaenay haw i, mararid a makorac ko saaroˈan ikaˈayaw ni Yihofa, tada o masaka limlaan a demak han? Ano miharatengay kita to sakahemekaw no Kawas i, kakaliki kita misalof to miliyasay to rikec no Kawas a raraw. Kalikien ita micada ko sapadama no Kawas, mahawpay ko sapadama no malohemay malitengay atoya “paˈadingay to raraw ita a pikinafalah” ni Yis Kristo.—Yakop 5:14; 1 Yohani 2:1, 2.
Kadkaden ko Odoˈ no Sinael
(Lifi 6:13) Aka padengen ko namal i pipatoˈayaan pararid han a milikat to romiˈad to dadaya.
it-1 633 fiedac 7 fatac
Namal
Sakadademakan i fangcalay kopang ato fangcalay sefi a namal. Itini i fangcalay kopang ato iikoray a fangcalay sefi itini i pidoko to Kawas, kalasaka dademakan ko namal. To romiˈamiˈad dafak ato dadaya, o lalikaten no sakakaay saysi ko sapafangsis a exiw. (Kasadakan 30:7, 8) O saˈosi no rikec, ano pacakat to sakimoodan mitodoh a pipatoˈayaan, cowa ko papadengen ko likat no namal. (Lifi 6:12, 13) O sowal no litengan no Yutaya tamdaw, ora namal i pipatoˈayaan saˈayaw o Kawas ko milikatay sanay, matiniay a sowal micadaan no ˈalomanay, nikawrira awaay ko sowal no Fangcalay Cudad. Ano doedoen ko sapalimoˈot ni Yihofa ci Mosian isaˈayaw, o wawa ni Aron “lalikaten ko namal i pipatoˈayaan, telien ko kasoy i fafekang no namal”, oraanto telien i fafekang ko sapatoˈaya. (Lifi 1:7, 8) Ci Aron ato wawa ningra itini i pipatirengan to saysi a demak maharekto ikor, tiya mapacakatto ko sapatoˈaya ikor, iraay ko namal nai ci Yihofaan a matefad (ora namal naitiraay ifafekang no fangcalay kopang a toˈem a matefad), mihaemin a mitodoh tora sapatoˈaya. Mihaenay haw i, mitefadan no Kawas ko namal, cowa ko milikatay tora kilang, ao “milaetoay tora sakimoodan mitodoh a sapatoˈaya ato simal.” Manaokaniw, ora padadotocay a malikat a namal, alatek oya matefaday nai Kawas a namal, anoca o irairaayto a namal tora pipatoˈayaan. (Lifi 8:14–9:24) Malecaday, tiya malaheci mitolon ci Solomon i pipacakatan to fangcalay sefi ikor, ira sanay ko namal nai ci Yihofaan a matefad, milaeto a mitodoh toya sapatoˈaya.—2 Rayray 7:1; nengnengen ko Kakitaan 6:21; 1 Hongti 18:21-39; 1 Rayray 21:26, o romaroma tinakoan to tano namal a micada ci Yihofa tora sapatoˈaya no sikawdan Ningra.
(Lifi 6:25) “Pasowalen ci Aron ato teloc ningra: ‘To pakayniay to rikec a patoˈaya to sakahepol no raraw: Kaitira i pipacokan to sasakimooden a mitodoh a mipacok to sakahepol no raraw a sapatoˈaya. O safangcalay a sapatoˈaya konini.
si 27 fiedac 15 fatac
SAKA Tolo Cudad no Fangcalay Cudad—Lifi
15 (3) O tamdaw ano caay ko mipadetengan a mararaw, o papacakat to sapihepol to raraw a sapatoˈaya. Ora papacakaten a sapatoˈaya orira sapihepolaw to raraw a tamdaw ko piˈarawan—o saysi, polong a finawlan, kakitaan anca o kalo a tamdaw. Cowa ka lecad toya niyah kalim a pacakatan a sakimoodan mitodoh ato sakarihaday a sapatoˈaya, o nisaˈosian no rikec a sapatoˈaya ko papacakaten itiya.—4:1-35; 6:24-30.
Miˈosi to Sinael
(Lifi 6:1-18) Pasowal ci Yihofa ci Mosian: 2 “Ano ira ko tamdaw to caay patiko to nicaliwan ato nitelian no fiyaw ato nipatampoan, ano eca i, mitakaway to maamaan no tao, 3 ano eca i, milihiway to tao, ano eca i, masidayay koya dafong sanay a misamangah, o romasato, o misamangahay a miketon to sowal to matamaay ningra a dafong: O mamihaen to demak cingra: 4 Ano soˈlinay ciraraw, o mamitamorong to raraw ningra, patikoen ko mitakawan a dafong, misamangahan a dafong, misimawan a dafong, ato matamaay a dafong, 5 ano eca misamangahay a miketon to sowal a maalaay a maamaan dafong, o papatikoen a maemin, o papatongal cingra to cecay no limaay, patikoen ko cidafongay tamdaw toya piwacayan to kacirarawan ningra a romiˈad. 6 O papatefoc cingra to nisaˈosian a ˈaca, piliˈen ko cecay caay ka samoˈ a milifanohan a okangan a siri patayra i saysi, pacakat ci Yihofaan to sapihepol to raraw a sapatoˈaya. 7 O mamidemak ko saysi to sakahepol no raraw a lisin. Mihaen i, ano o maananto ko nidemakan ningra, mitamorongay to maanan a raraw, ta mahepol ko raraw ningra.” 8 Pasowal ci Yihofa ci Mosian: 9 “Palimoˈoten ci Aron ato teloc ningra: “O pakayniay to mikimoodan a mitodoh a sapatoˈaya a rikec mahaenay: Telien i kafekang no pipatoˈayaan ko sasakimooden a mitodoh a sapatoˈaya, nai dadaya tangasa i dafak salafii han a mitodoh. 10 O cacirikoˈ ko saysi to keliw a kafafang ato mamokoˈay a kafer, ta itira cangra i pipatoˈayaan a mitodoh to nisakimoodan a sapatoˈaya, saˈopoen nangra ko ˈafo a mitaktak i tatihi no pipatoˈayaan. 11 Doedo i, falicen nangra ko rikoˈ nangra, ta patayraen nangra koya ˈafo i makoracay hananay no lisin a pala. 12 Aka padengen ko namal i pipatoˈayaan pararid han a palikat ko namal. To dafadafak o tatongalen no saysi ko kasoy i pipatoˈayaan, ta parayarayen nangra ko sasakimooden a mitodoh i kafekang nonini, o romasato todohen nangra ko simal to sakarihaday a sapatoˈaya, pacakat to ˈacefel. 13 Aka padengen ko namal i pipatoˈayaan pararid han a milikat to romiˈad to dadaya. 14 “‘O rikec a mipatoˈaya to emi mahaenay: Kamo o teloc ni Aron i kaˈayaw ni Yihofa pacakat to emi a patoˈaya. 15 Alaen no cecay saysi ko cecay a kahot a nipasimalan safangcalay aped no emi, pahakelongen to sapafangsis a pateli i kafekang no pipatoˈayaan a mitodoh to todong no polong no sapacakat ci Yihofaan, pacakat to ˈacefel, masadak ko kaolahan a fangsis. 16 O ˈosaw a sapatoˈaya sangaˈen to caay patamodan a epang malo kakaenen ni Aron ato teloc ningra. O aitini i fangcalay a kitiraan a komaen, oyanan putal no fangcalay kopang a kamaen. 17 O midohdohan a epang aka patamoden. O paˈisal ni Yihofa konini a nitodohan a sapatoˈaya, o safangcalay konini, malecaday to sakahepol no raraw a sapatoˈaya ato sakahepol no patelac a sapatoˈaya. 18 Mangaˈay a komaen ko faˈinayan a teloc ni Aron a maemin tonini a nitodohan a sapatoˈaya, o lalayalayapen aca nangra konini a tahadaˈoc. Ano cima ko mitefingay tonini a fangcalay i, o mamalo fangcalay a maemin.’”
SAKA 11 FOLAD 30 –12 FOLAD 6 ROMIˈAD
O ODOˈ KO KIMAD NO KAWAS | LIFI 8-9
“O Wacay to Pipalemed ni Yihofa”
(Lifi 8:6-9) Saka keriden ni Mosi ci Aron ato faˈinayan a wawa ningra a patalaˈayaw, papingingoyen ningra cangra. 7 Ta parikoˈen ningra ci Aron to saki lalomaˈ a rikoˈ ato kafafang, fakeden ningra to telec. Pacaˈdongen ningra ci Aron to ifot, telecen ningra to makapahay a nitenooyan a safaked ko ifot. 8 Pacaˈdongen ni Mosi ci Aron to sakifalohang a paya, telien ko “Urim” ato Tumim” ilalomaˈ no sakifalohang a paya. 9 Ta pakafongen ningra ko fongoh ni Aron, oya tadamaanay tatodong o sapatafang a fangcalay paya fakecen i tamohong, matiya o nipalimoˈotan ni Yihofa ci Mosian.
(Lifi 8:12) Saikor, palosoˈen ningra to fangcalay simal ko fongoh ni Aron, minilnil cingranan, pafangcal cingranan.
it-1 813 fiedac
Patirengay to Saysi a Lisin
Ci Mosi naitiniay i paputal a fodawan a miala to nanom pafelien ci Aron ato wawa ni Aron ci Natap, Apiw, Iliaca aci Itama a papingingoy cangranan, ikor parikoˈen ci Aron to rikoˈ no sakakaay saysi. (Saˈosi 3:2, 3) Oniniya makapahay a fangcalay rikoˈ, mitaypiyaway to capeling ato tayal no sakakaay a saysi. Dotoc i, tano simalan ni Mosi milosoˈ ko fangcalay kopang ato lalosidan nira, ato pipacakatan to sakimoodan a mitodoh a pipatoˈayaan, kamonanawan ato romaroma lalosidan, mipafangcal tonini a kihcod, o sakadademaken i pidokoan to Kawas a demakan. Saikor, losoˈen ni Mosi i fongoh ni Aron ko simal, minilnil cingranan.—Lifi 8:6-12; Kasadakan 30:22-33; ˈOlic 133:2.
(Lifi 9:1-5) Tangasa i saka falo a romiˈad i, saˈopoen ni Mosi ci Aron ato faˈinayan a wawa ningra ato malohemay malitengay no Israil. 2 Pasowalen ni Mosi ci Aron: “Pataynien ko cecay a caay ka cisamoˈ a tofor a okang a kolong to sakahepol no raraw a sapatoˈaya ato cecay a caay ka cisamoˈ a lalifanohen a okang a siri to malo sasakimooden a mitodoh a sapatoˈaya a pacakat ci Yihofaan. 3 Pasowalen iso ko Israil finawlan, ‘Alaen namo ko cecay okangan a siri malo sakahepol no raraw a sapatoˈaya; ato cecayayho ko mihecaan a caay ka cisamoˈ a cecay a tofor a kolong ato cecay a lalifanohen a tofor a siri, to malo sasakimooden a mitodoh a sapatoˈaya; 4 ato cecay a tofor a okang a kolong ato cecay a lalifanohen a okang a siri to malo sakararihaday a sapatoˈaya. O papacakaten i kaˈayaw ni Yihofa pacakatenho ko mipacamolan to simal a aped no emi a sapatoˈaya, samanen o papaˈaraw ci Yihofa i tamowanan anini.’” 5 Saka patayraen nangra a maemin i kaˈayaw no fangcalay kopang. Talaˈayawto maemin ko finawlan, tomireng i kaˈayaw ni Yihofa.
it-1 814 fiedac 5 fatac
Patirengay to Saysi a Lisin
Saka 8 romiˈad, malafato ko saysi, misatapang a matayal (caay padangen ni Mosi), mihepol to raraw no Israil. Itiya, o Israil tamdaw cowa aca ira ko mirocokan a raraw, hanaca ˈayaw to cowaho kahalafin mitaˈongay to faco no ekim a kolong, misafelit ci Yihofaan, paketer Cingranan, mankora tada misaaliay to sasododen ko raraw nangra. (Lifi 9:1-7; Kasadakan 32:1-10) Ta maharek a matayal koya mipatirengan a saysi i, iraay ko namal nai ci Yihofaan, maedeng o naitiniay i fafekang no fangcalay kopang a toˈem, matefad a mitodoh toya ˈosaw a sapatoˈaya, patalahkalay to mahemekay a micada ci Yihofa to katayal nangra, mihayi to saysi a saaroˈan nangra.—Lifi 9:23, 24.
(Lifi 9:23, 24) Saikor, micomod ci Mosi aci Aron i fangcalay kopang. Ta masadakto cangra i, palemedan ko finawlan. 24 Itiya i, ira ko namal nai ci Yihofaan a mitodoh to nisakimoodan a mitodoh a sapatoˈaya ato i kafekangay no pipatoˈayaan a simal. Minengneng ko finawlan tonini a demak i, lekal sa a maemin a mihinokop i sera.
Mananamay Sifanaˈ Nai Lifi a Cudad
13 Saka sepat: Midamaay ci Yihofa to iseraay a likakawa Ningra. Nengnengen ko tinakoan isaka 1512 mihecaan to ˈayaw ni Yis, itiya patirengay ko Israil to fangcalay kopang i laeno no Sinay a lotok. (Kasadakan 40:17) Ci Mosi ko misikayay to patirengay to saysi a lisin, minilnil ci Aronan ato wawa ningra. Itiya mapolongay ko Israil a malisopsop, minengneng to faelohay a saysi sakina cecay a pacakat to sapatoˈaya. (Lifi 9:1-5) Samaanay patalahkal ci Yihofa to nika pihayi tora saysi hani? Tiya palemed ci Mosi aci Aron to finawlan i, matefaday ko namal nai ci Yihofaan, mihaemin a mitodoh toya mipacakatan a sapatoˈaya.—ˈOsien ko Lifi 9:23, 24.
Kadkaden ko Odoˈ no Sinael
(Lifi 8:6) Saka keriden ni Mosi ci Aron ato faˈinayan a wawa ningra a patalaˈayaw, papingingoyen ningra cangra.
w14 11/15 9 fiedac 6 fatac
Misamaanay Hano Mamalo Fangcalay Kita
6 O masakapotay a saysi no Israil o mamitafo to makoracay, pakayni to aniniay a tamdaw no Kawas tada taˈangayay ko tatodong noni. O pacekiwan to Fangcalay Cudad a tamdaw marariday mahapinang nangra, o pidokoan a kitiraan no mita tada makoracay a malosimet, o caˈedong ita makoracay. O nolitengan a masakapotay a saysi, oha mamitafo to makoracay, pasifanaˈay kitanan konini, ano o macokacokayho i lotok ni Yihofa a midokoay Cingranan a tamdaw, o papairaen ko makoracay a falocoˈ. (ˈOsien ko ˈOlic 24:3, 4; Isaya 2:2, 3.) Midoko kita to Kawas, o harateng, kemod no falocoˈ ato tatirengan ita o mamakorac. Mihaenay haw i, mararid kita mikingsa to niyah. O romaroma tamdaw alatek o mamifalic, hongaˈ matafo ko makoracay. (2 Korinto 13:5) Patinakoen, ano micadato to paputisem ko tamdaw i, kamayan a minengneng to makakalonaay a lalakaw, licayen ko niyah: “Misaˈicelay kako malo makoracay tamdaw han?” Oha tatayni i malohemay malitengay cingra misaali to sapadama, hongaˈ masawad ningra kora tatiihay a nanaman.—Yakop 5:14.
(Lifi 8:14-17) Kitingen ni Mosi ko tofor a okang a kolong to sakahepol no raraw a sapatoˈaya, kapaen ni Aron ato faˈinayan a wawa ningra ko fongoh noya okang a kolong. 15 Pacoken ni Mosi koya kolong, cidoˈen ningra ko tarodoˈ i remes a misipasip to sepat a waˈa i kasaciko no pipatoˈayaan a mikorac. Ta o ˈosawto a remes i, taktaken ningra i paranaan no pipatoˈayaan. Haenen ningra ko pikorac a pala fangcalay to pipatoˈayaan. 16 Ta alaen ni Mosi ko mikafitay i kemod a simal ato sangaˈayay no ˈatay ato tosa a fowaˈ ato mikafitay i fowaˈ a simal a miteli i kafekang no pipatoˈayaan a mitodoh a maemin, macakat ko ˈacefel. 17 Ta o ˈosawto a katol ato titi ato tinaˈi noya kolong i, alaen ningra a maemin a patayra i paputal no kamaroˈan nangra a mitodoh. Matira o nipalimoˈotan ni Yihofa ci Mosian.
it-1 1126 fiedac 6 fatac
Mosi
Matatelekay ko Kawas ato Israil tamdaw, ci Mosi malo pakayakayay tamdaw to Rikec a katatelekan. Edengan ci Yis ya faelohay katatelekan a pakayakayay, awaay ko matiraay ci Mosian ira ko mingataay to Kawas a tayal. Farasiˈen ni Mosi ko remes no sapatoˈaya i Rikec a cudad, mitaypiyaway ci Yihofaan to cecay no matatelekay, o roma i, farasiˈen ko finawlan (o malohemay malitengay ko mitaypiyaway), o roma cecay nora matatelekay. ˈOsien ni Mosi patengil ko finawlan tora katatelekan a cudad, pacaˈof sa cangra: “O dadoedoen niyam ko nano sowal ni Yihofa a maemin,” saan cangra. (Kasadakan 24:3-8; Hipray 9:19) Ci Mosi nao pakayakayay to katatelekan a Rikec, iraay ko fadangalan ningra mikantok to misangaˈay to fangcalay kopang a demak, (midoedo to palimoˈotan no Kawas i cingranan a misafaco) misangaˈ to lalosidan, misikay to patirengay to saysi a lisin, tano mikiriwiˈay a fangsiyay a simal misipasip to fangcalay kopang ato minilnil ci Aronan ya sakakaay saysi, ato minilnil to ikoikoran a faelohay saysi mitamorong to ˈinorong nangra.—Kasadakan saka 25-29 fedengan; Lifi saka 8, 9 fedengan.
Miˈosi to Sinael
(Lifi 8:31–9:7) Pasowalen ni Mosi ci Aron ato faˈinayan a wawa ningra: “Ka itira i fawahan no fangcalay kopang a mitangtang to titi, ka itira a komaen, ka itira a komaen to nano sapatireng tamowanan a ifakaray a epang, doedoen ko macadaay ako a sapalimoˈot: ‘Ci Aron ato faˈinayan a wawa ningra ka komaen tora kakaenen.’ 32 O ˈosaw a komaen a titi ato epang i, todoh han a maemin. 33 Kaitira kamo i fawahan no fangcalay kopang to pito a romiˈad, aka piliyas tangasa i paherekan a patireng tamowanan, samanen o patirengay to saysi a lisin pitoay a romiˈad. 34 O nidemakan niyam anini i, o pidoedo niyam to limoˈot ni Yihofa a midemak to saka hepol no raraw namo. 35 Aka ka eca ka itira kamo i fawahan no fangcalay kopang to pito a romiˈad, o romiˈad o dadaya i, ka itira kamo a maemin a midoedo to limoˈot ni Yihofa. Ano caay ka hatira i, mapatay kamo. O sapalimoˈot ni Yihofa i takowanan konini.” 36 Saka doedo han ni Aron ato faˈinayan a wawa ningra ko nano limoˈot ni Yihofa ci Mosian a midemak.
9 Tangasa i saka falo a romiˈad i, saˈopoen ni Mosi ci Aron ato faˈinayan a wawa ningra ato malohemay malitengay no Israil. 2 Pasowalen ni Mosi ci Aron: “Pataynien ko cecay a caay ka cisamoˈ a tofor a okang a kolong to sakahepol no raraw a sapatoˈaya ato cecay a caay ka cisamoˈ a lalifanohen a okang a siri to malo sasakimooden a mitodoh a sapatoˈaya a pacakat ci Yihofaan. 3 Pasowalen iso ko finawlan no Israil: ‘Pataynien namo ko cecay a okang a siri to malo saka hepol no raraw a sapatoˈaya ato cecayayho ko mihecaan a caay ka cisamoˈ a cecay a tofor a kolong ato cecay a lalifanohen a tofor a siri, to malo sasakimooden a mitodoh a sapatoˈaya, 4 ato cecay a tofor a okang a kolong ato cecay a lalifanohen a okang a siri to malo sakarihaday a sapatoˈaya, pacakaten i kaˈayaw ni Yihofa, pacakatenho ko nipacamolan to simal a aped no emi a sapatoˈaya, samanen o papaˈaraw ci Yihofa i tamowanan anini.’” 5 Saka patayraen nangra a maemin i kaˈayaw no fangcalay kopang ko nisowalan ni Mosi, polong no finawlan talaˈayaway cangra, tomireng i kaˈayaw ni Yihofa. 6 Sowal sa ci Mosi: “Palimoˈot ci Yihofa i tamowanan a papidemak tonini a maemin to sapatalahkalaw ni Yihofa i tamowanan to ˈdil Ningra.” 7 Pasowalen ni Mosi ci Aron: “Katayra kiso i kaˈayaw no pipatoˈayaan a pacakat to sakahepol no raraw a sapatoˈaya ato nisakimoodan a mitodoh a sapatoˈaya to sakahepol no raraw iso ato paro no lomaˈ iso, ato raraw no finawlan, matira to sapalimoˈot ni Yihofa.”