Pinengnengan to Lalakaw no Mitosilay ato Nikaˈorip Rayray no Saˈopo
© 2025 Watch Tower Bible and Tract Society of Pennsylvania
SAKA 9 FOLAD 1-7 ROMIˈAD
O ODOˈ KO KIMAD NO KAWAS | TANENG 29
Minaˈay to Misafelitay to Fangcalay Cudad a Pihakelongan ato Nanaman Nangra
wp16.06-CH 6 fiedac sapatongal lalakaw
Cima ko Maroˈay i Caay ka ˈAraw a Kakarayan?
Tona matalaway to kaloykoy ko ˈalomanay tamdaw, macapiday a mapalit ko kaˈorip no tamdaw, matira o makadangay to lonayiˈ a mapalitay tamdaw. Halamhamay cangra tano misakawasay a dafong midipot to niyah. Kawra cowa ko mamihaen kiso, samanen mikiˈokay ko Fangacay Cudad: ‘O mata ni Yihofa mitaliyokay a minengneng to hekal, sapipadamaaw to misarocoday ko falocoˈ a minokay i Cingranan a tamdaw.’ (2 Rayray 16:9) O soˈlinay Kawas ci Yihofa, ikakaay ko ˈicel ci Satanan, edeng ano mitiˈer kiso Cingranan i, o mamadipot kiso.
Ano sapilifokaw to sadipot ni Yihofa, aisalakat kita cipinang to saali Ningra halo tooren ko pidemak. Tinakoen, isaka cecay hahekalan a Ifiso a Krisciyang, misaˈopoan nangra a mitaling ko misakawasay a cudad nangra, mitodohan i ˈaˈayaw no ˈalomanay. (Dmak 19:19, 20) Malecaday, ano sapilifokaw kita to sadipot no Kawas i, falahen ko kihcod misakawasay a dafong ato cudad, ato romaroma milingatay to misakawasay a maamaan.
Cipinang to Samaanay ko Mapatayay
13 Ano caka cipinang kiso to cecay demak anca nanaman to misafelitay to palinian no Fangcalay Cudad hokira, tolonen ci Yihofa, pakasoˈlin a micangacang Cingranan papafeli to taneng tisowanan. (ˈOsien ko Yakop 1:5.) Dotoc, mikitini cudad no Fangcalay Cudad mikilim to milingatay a lalakaw, ano misaaliay kiso to roma sadama, tahidangen ko malohemay malitengay no kasakopang padama tisowanan. Soˈlin cowa ko papasowal cangra tisowanan to sasamaan ko demak, kawra wa ngaˈay cangra pasowal to milingatay a safalod no Fangcalay Cudad, tinakoen o malengoay noniya lalakaw. Mihaen ko demak iso, o pahatatanamay to ‘sapihapinang a inaneng,’ o hatiniay a inaneng wa padama tisowanan ‘pafafidaˈ to ngaˈayay tatiihay.’—Hipray 5:14.
Wa Midoedo Kako to Soˈlinay Kimad Iso a Midemak
12 Misafelitay to Fangcalay Cudad a nanaman ato demak. Paro no lomaˈ, cafay matayal, cafay micudad, wa mitahidang kitaanan mirienang to misalisinay a demak alatek. Misiˈayaw kita to hatiniay saroero i, samaan ngaˈ eca ka kalacafay cangraanan midofdof to mararaway a nanaman, anca misalisin to misafelitay to palinian no Kawas a lisin hani? Sasinanoten ko pinengneng ni Yihofa toniya nanaman ato lisin. Ngaˈayay lomalen ita ko milengoay toniya lisin i mitepangan a cudad. Micerid kita patalipaˈelal to niyah, o lalangian eca ka pirienang toniya lisin, mihaen wa ngaˈay pasoˈlin to midoedoay ko niyah to ‘kahemekan no Tatapangan’ a pakayraan a midemak. (Ifiso 5:10) Mitiˈer kita ci Yihofaan ato kimad Ningra, ecato ‘makokiˈ to tamdaw.’—Taneng 29:25.
Odoˈ no Sinael
it-1-CH 210 fiedac
Misangaˈangaˈay a Misamangah to Sowal
Misangaˈangaˈay a misamangah to sowal. O sapirenecaw aca to mahoracay falocoˈ no niyah, awaay ko epoc i tamdaw; mihalakaay to sapatikoaw no tao a ciepoc ko niyah. Misangaˈangaˈay a misamangah to sowal to tao matiyaay o satalakal. (Taneng 29:5) O mahaenay a tamdaw awaay ko naitiniay i fafaed a taneng, o patahkalay tono hekal a taneng kora, o misatekeday o misakaniway. (Yakop 3:17) O mahaenay a demak cowa ka hemek ko Kawas.—2Korinto 1:12; Kalatiya 1:10; Ifiso 4:25; Kolosay 3:9; Paˈarawan 21:8.
SAKA 9 FOLAD 8-14 ROMIˈAD
O ODOˈ KO KIMAD NO KAWAS | TANENG 30
‘Nanay Padamaen Iso Kako Caay ka Nikaw Caay ka Cihafay’
w18.01 24-25 fiedac 10-12 fatac
Masamaanay a Olah Papaira to Soˈlinay Lipahak?
10 Manaokaniw, misaaliay to payso kita, samanen iraay ko pidipot no payso kitaanan. (Patnakay 7:12) Kawra, o payso no tamdaw ano kalo a saali aca ningra ko mamarenec, o lalipahak cingra han? Hayi, o lalipahak. (ˈOsien ko Patnakay 5:12.) Sanay mitolon ci Akur o wawa ni Yaki: “Aka padafongen kako, patatodong han ko sakaˈorip aca ako a kakaenen.” Mitadtad ci Akur, cowa ka ciharateng cingra to nika nikaw a mitakaw, teloc mapakangodo ko ngangan no Kawas. Kawra hano mingitangit to Kawas aka padafongen kako saan hani? Sanay ko sowal ningra: “Ano cirafas kako i, latek manaˈay kako i Tisowanan, ‘somowal to “cima ci Yihofa?” Wa saan.’” (Taneng 30:8, 9) Anini, o roma tamdaw mahaenay nisowalan ni Akur, o hafay no niyah ko mitiˈeran ao cowa ko Kawas.
11 O maolahay to payso a tamdaw, cowa pakahemek to Kawas. Sanay ci Yis: “Caay ka ngaˈay a tosa ko tapang no cecay a matayalay a koli. Nawhani ano haenen ningra i, kaˈosien ningra ko cecay, kaolahen ningra ko cecay. Ano eca i, kangodoen ningra ko cecay, epecen ningra ko cecay. Orasaka, ano palecaden namo ko harateng to saki Kawas ato saki dafong i, caay ka ngaˈay. Aka pinaˈang itini i hekal to malodafong namo. Nawhani ano haenen namo i, ira ko aayad a mikaen, o mamalatayiˈ a mapohed. O romasato, o mamatakaw no mitakaway a tamdaw. Naˈangen i kakarayan ko malodafong namo. Nawhani awaay ko aayad a mikaen. Caay ko mamatayiˈ a mapohed, awaay ko mamitakaw a tamdaw itira.”—Matay 6:19, 20, 24.
12 Mahapinangay no ˈalomanay, misadolo to kaˈorip palipahakay cangranan, adihayto ko toki nangra midoko ci Yihofaan. Tinakoen, itiniay i Padaka ci Ciyak toha sapipacafayaw to fafahi a mala misakafahay, milahcian ningra ko singdi ningra, paliwalan ko taˈangayay lomaˈ. Sanay milomal cingra: “Mifalah kami to makapahay a lomaˈ niyam ato sera, cowa ko madoloay. Itiya pinaay miheca, pakayniay i tayal minokay tahalomaˈ maˈefangay ko falocoˈ. O fafahi ako o miceriday a misakafahay, marariday a lipahak cingra. ‘Iraay ko sangaˈayay a tawki ako!’ Sanay ko sowal ningra. Nohatini misatapangayto kako mala miceriday misakafahay, mala cafayay kami matayal to sangaˈayay a tawki ci Yihofa.”
w87-CH 5/15 23 fiedac 8 fatac
Mangodo ci Yihofaan, Lalipahak Kiso
◆ 30:15, 16—O manan ko tatodong nonini sapatinako?
Onini sapatinako somowalay, awaay ko tolas no maˈanofay. Padadotocay cangra misaali to adihayay hafay ato fadangalan, matira o dadintaˈ micopcop to remes no tamdaw. Malecaday, o tadem cowa ka renecen, miceriday mafohat mitaˈemod to mapatayay. O maasicay sawawaan ‘sasaali’ sanay to wawa. (Satapangan 30:1) O maˈicangay sera haemin han nira mirecep ko ˈorad, kawra sahosaho maˈicangayto a mapelaˈ ko sera. O namal i, tangsolay a milanto to mifahkolan a maamaan, mitodoh to italiyokay a dafong. Mahaenay ko maˈanofay tamdaw. Nikawrira, o makayatay no taneng no Kawas a tamdaw cowa ko mamihayi to mahaenay macoosay harateng, awa ko tolas a miowing to niyahan.
w11-CH 6/1 10 fiedac 4 fatac
Misamaan Ngaˈ Caka Cangoˈot ko Payci?
Tengil han konini safalod hato mataˈlifayto, ˈarawhan taˈangayay ko pipadama to tamdaw caka cangoˈot ko payci. O ˈalomanay tamdaw mitooran konini pakayraan, caayto ka picaliw to payci, hanaca awaayto ko cariraw to nika citadah to payci, tinakoen pateli to ˈakawangay a wawa no payci. O ˈalomanay tamdaw micaliw to payci a patikol haca to wawa nira, matekesayto ko piˈaca tora dafong. Citanengay ko kakonah sa ko Fangcalay Cudad, samanen ‘mafanaˈ a misoped to kakaenen i kacidalan.’—Taneng 6:6-8; 30:24, 25.
Tahadaˈoc Malo Lafang ni Yihofa!
18 Songilaˈen ita a mifolfol samaanay ko pinengneng no niyah to payci, o masakalimlaan konini. Saharateratengen ita: “Marariday kako miharateng to payci anca sapicakayaw to maanan han? Ano micaliway kako to payci no tao i, hato cowa ka pisaali cingra toniya payci nengnengen, nayar hanto ita eca ka patikol han? Pakayni noka adihay no payci ako, misaidahidahi ko niyah han? Pasangaray kako paihkal to hinapaladaˈay i taowanan han? Ano cihafayay ko roma salikaka, misaaretengay cangra to pakadafongay, wa saan ko harateng ako han? O cihafayay aca a tamdaw ko misawidangan ako, kawra caay ka pikihar to manikaway a tamdaw han?” Ira ko tatodong ita micada to satahidang ni Yihofa, misalafang itini pakopangan Ningra, tada o kalikoan konini, mansa falahen ita ko maˈanofay to payci a harateng. Ano mihaen i, ngangaˈayto kita padadotoc materek i pakopangan ni Yihofa, ano Cingrato co:wa ko mamifalah kitaanan!—ˈOsien ko Hipray 13:5.
Odoˈ no Sinael
w09-CH 4/15 17 fiedac 11-13 fatac
Nisangaˈan a Maamaan Patalahkalay to Taneng ni Yihofa
11 Nohatini nengnengen ita ko cecay mimingay pinaˈorip, o takolil (koyo,) mikitira camiraan mahapinangay ita ko kalimlaan a demak. (ˈOsien ko Taneng 30:26.) Onini mimingay pinaˈorip mafanaˈay misangaˈ to lomaˈ i ˈongcongcoyan, o tatirengan malecaday to takolil, ˈapotoay ko tangila, limoloay ko tireng, ˈapotoay ko ooˈ. Maesolay ko pinengneng no mata. Itiniay i ofang no ˈongcoy a milimek to ˈada. Maolahay ko takolil masapolopolong, makakedecay matateko, mihaen camira ngaˈ tanoktok a lomahad. Makakedec a masapolong ko takolil madipotay, ecato ka maˈadop no miˈadopay. Itini i kasienawan macacoˈcoay a misadiheko.
12 Mikitini i takolil mananamay ita ko manan hani? Sinanoten: O mahaenay pinaˈorip cowa ka itini i katalawan a kitiraan, madoloto a maˈadop no ˈada. Maesolay ko mata no takolil ira sa ko maan karihkihay, tangsolay mimomok i dihif anca i ofang no fakeloh a milimek. Malecaday, kita ira ko maesolay a noka pinengneng i noˈadingoan, wangaˈ pakahapinang to katalawan i hekal ni Satan. Tarokos ci Pitiro palimoˈotay to Krisciyang: ‘Ka palalto kamo. O ˈada namo ci Akoma matiya o miletohay a layong, misataliyoliyok mikilim to mamataˈmod nira a tamdaw.’ (1 Pitiro 5:8) Ya itiniho i fafekang no sera ci Yis marariday a talipaˈelal, mipatala to piˈodis ni Satan, sapitawmecaw to madimadi to Kawas. (Matay 4:1-11) Miterekay ci Yis to fangcalay a hataˈarawan no nisawawaan!
13 Ka palal a talipaˈelal, o cecay hapakayraan i, sakadademaken ko kihcod sapafeli ni Yihofa, midipot to noˈadingoan no niyah eca ka mapalak. Mikingkiw to Kimad no Kawas, mirienang to saˈopo no Krisciyang tada o masakalimlaan, aka a pilawa. (Luka 4:4; Hipray 10:24, 25) O roma sa i, o makakedecay mapolong a takolil ngaˈ tanoktokay a lomahad, ano kitato i, makakedec a malacafay to salikaka ngaˈ, ngaˈay a ‘makakowakowad’ kita. (Loma 1:12) Sakadademaken ita ko kihcod sapafeli ni Yihofa a midipot to niyah, mihaen i, paihkalay kita to mikifalocoˈay a mihayi to sowal ni Tafiti. Sowal sa ci Tafiti: ‘O midipotay takowanan a ˈongcoy ato pisitaraan ci Yihofa, milidongay takowanan paliyas to katalawan a Tatapangan. O ˈongcoy no mako ko Kawas, pasayra kako i Cingranan mikilim to sadipot.’—ˈOlic 18:2.
SAKA 9 FOLAD 15-21 ROMIˈAD
O ODOˈ KO KIMAD NO KAWAS | TANENG 31
O Sapasifanaˈ no Cecay Wina to Faˈinayan Wawa, Patirengay to Taˈarawan no Wama Wina
w11-CH 2/1 19 fiedac 7-8 fatac
Padamaen ko Wawa Palahad to Matatodongay Pinengneng to Waywayan
Patatodongen milengo ko madadiˈiyay demak. Manaokaniw, pasifanaˈen ko wawa to tatiihay teloc no maˈodangay. (1 Korinto 6:18; Yakop 1:14, 15) Itini i Fangcalay Cudad, tohati:niay o sidaˈitay a sapafeli no Kawas sanay somowal to madadiˈiyay a demak, ao cowa ko satalakal ni Satan. (Taneng 5:18, 19; Radiw ni Solomon 1:2) Ano tano masofaway aca a sasowalen milengo to madadiˈiyay a demak i, alatek ira ko mararaway a pinengneng no wawa to madadiˈiyay, awa kono Fangcalay Cudad noka pinengneng. Ci Kolinna o kaemangay fafahiyan i Frans, sowal sa cingra: “Ano somowal saho ko wama wina to madadiˈiyay, somowalayto to katatiihan nira, hato iraayto ko tatiihay noka pinengnengn ako tora demak.”
Mankora, padamaen iso ko wawa ira ko matatodongay noka pinengneng to madadiˈiyay. Itini i Mosiko, o cecay ci Natiya hananay a wina, sanay ko sowal: “Marariday kako pasifanaˈ to moetepayho ira ko pina ko mihecaan a fafahiyan wawa: O makapahay demak ko madadiˈiyay, o pinangan, o sapafeli ni Yihofa to tamdaw konini, toha sakarahekeraw no tamdaw. Kawra, edengan ilalomaˈ no mararamoday ngaˈ, o matatodongay ko madadiˈiyay. O mahaenay demak papaira to lipahak ha anoca papaira to roray ha, kita ko piˈarawan to sasamaan a misakadademak.”
ijwhf-CH saka 4 fedengan 11-13 fatac
O Wama Wina Sasamaan Milengo i Wawa to Pakayniay Epah a Demak
Talaˈayaw a milengo to wawa pakayni tonini demak. Ci Marko o cecay wama i Ikok, sanay ko sowal ningra: “O wawa cowa ka fanaˈ to sasamaan ira ko matatodongay pisaˈosi to pakayniay i kakomaen to epah. O faˈinayan wawa ako faloay ko mihecaan. Komaen to epah o ngaˈayay ha tatiihay ha han ako a milicay i, sasinowayan ako ko kasasowal i cingranan, mihaen madoloto cingra mihadak to nafalocoˈan a sowal.”
Ngaˈayay kilimen iso ko matatodongay tatokian a milengo to pakayniay i epah a demak, o ciepocay konini pakayraan. Ngaˈayay kiso mikitini i mihecaan ningra a somowal to mamisamaan mifiyor ko epah i nokaˈorip ningra, tinakoen itini piparakat to paliding ato madadiˈiyay a demak.
Patirengen ko taˈarawan nangra. O wawa i, mahaenay o siponci mihelip to nanom, madoloay a mafiyor no i taliyokay demak. ˈAngongolay ko pifiyor no wama wina to wawa sanay ko makingkiway no tamdaw. Kiso ano marariday a komaen to epah a misayar to roray i, o ngaˈayay mihaen misaysay to rawraw nokaˈorip wa saanto ko wawa a miharateng. Ano komaen kiso to epah patatodongen ko kakomaen, patireng to taˈarawan nangra.
g17.6-CH 9 fiedac 5 fatac
Padamaen ko Wawa Palahad to Misapoeneray
Pakalaloken ko wawa kiemel a misaˈicel. Tano demaken a misawacay ko wawa ‘o mipafeliay ikakaay ko hemek to micadaay.’ (Dmak 20:35) Mamisamaan ko pidemak hani? Kalacafayen ko wawa misaharaterateng o cima ko cisaaliay to sapadama halo tiliden ko ngangan nangra. O papadangen no tao a micakay to dafong han? Misaaliay cangra to cacadaen pakalic han? Iraay ko tatomadawen a dafong no lomaˈ nangra han? Hawikiden ko wawa a tayra, ano mihaen i, mamaˈaraw nangra ano mipadang kiso to tao, hakowaay ko kahemek, hakowaay ko karenec no falocoˈ iso. O sangaˈayay pakayraan mipasifanaˈ to wawa a misapoener i, patirengen no wama wina ko ngaˈayay taˈarawan.—Safalod no Fangcalay Cudad: Luka 6:38.
Odoˈ no Sinael
w92-CH 11/1 11 fiedac 7-8 fatac
O Sapasifanaˈ i Lintad no Fangcalay Cudad
7 Itini i Israil, nano kaemanganho ko wawa mipasifanaˈanto no wama wina. (Limoˈot 11:18, 19; Taneng 1:8; 31:26) O matanengay to Fangcalay Cudad a tamdaw ci Mangrenot sanay mitilid i Citing no Fangcalay Cudad: Mafanaˈho caciyaw ko wawa i, satapangayto minanam to sowal no Rikec. Saliyaliyaw han no wina ko cecay a sinael; mafanaˈto ko wawa i, pafelian to roma a sinael. Ikor i, tilidanto no wama wina kora paifalocoˈan a miharateng a sinael. Mihaen i, mafanaˈayto cangra miˈosi to tilid; lomahad lomahadto cangra i, ngaˈayto pakayni i piasip ato pisimsim to rikec no Kawas a padadotoc micada to sapasifanaˈ no pihakelongan.
8 Mahapinangay itini, ora pakayraan nangra a mipasifanaˈ i, paifalocoˈan a miharateng. Pakayni to sarikec ni Yihofa ato nika cacawmaˈ Ningra to finawlan, o mananamay no wawa a sifanaˈ cacalepen i falocoˈ nangra. (Limoˈot 6:6, 7) O sasasimsimen nangra konini demak. (ˈOlic 77:11, 12) Toha sapadamaaw to kaemangay ato matoˈasay paifalocoˈen a miharateng kora lalakaw, sakadademakan nangra ko masakenakenaay pakayraan padama to tamdaw pakaharateng: Itini i pahemekay a ˈolic, tooran ko kadadoedo no tilid misatapang a paˈolic; (Taneng 31:10-31 o tinakoan); iraayho ko romaroma pakayraan, padama to tamdaw; o hatiniay a pakayraan o sapadama to wawa pakaharateng to minanaman a lalakaw.
SAKA 9 FOLAD 22-28 ROMIˈAD
O ODOˈ KO KIMAD NO KAWAS | PATNAKAY 1-2
Saˈicelen a Pahatatanam ko Kapah Tamdaw
w17.01-CH 27-28 fiedac 3-4 fatac
Patoroden ko Tayal i Madimadiay Tamdaw
3 Tada maolahay kita alatek to mipatorodan no Kawas a tayal i kitanan, sapadadotocaw a midemak tahatolas. Nikawrira, mikitini ci Ataman misatapang, mataˈlif ko cecay lintad i, ira haca ko cecay lintad. (Patnakay 1:4) Toniya pina a mamihecaan, o mahaenay pakayraan pairaay to sapalifet to finawlan no Kawas. Anini o mitosilay demak padadotocay a macowat, adihayay ko nika falic, o finawlan no Kawas ano sapilahciaw to cecay faelohay demak i, misakadademakay to faelohay a hapakayraan, tano aniniay kakaku a pakayraan. O romaroma matoˈasay Krisciyang cowa ka dolo mitoor to aniniay kakaku a pakayraan, latek o kananaman a matelangay a pakayraan ko ngaˈayay wa saan. (Luka 5:39) Soˈlinto papakaremo ko matoˈasay to faelohay pakayraan i, kawra o ˈicel no tireng cowa ka hatira o kaemangay a tariktik. (Taneng 20:29) Mihaenay haw i, o matoˈasay Krisciyang, tano sidaˈitay ato matatodongay a pakayraan ko pidemak i, o padamaay to kaemangay Krisciyang mitamorong to karetengay a ˈinorong.—ˈOsien ko ˈOlic 71:18.
4 O romaroma ciˈinorongay a faˈinayan salikaka alatek pakayni to papatoroden ko kaemangay to tayal iraay ko sasa no falocoˈ. Cowa ka sakalahdawaw no kaolahan no niyah a tayal alatek, anoca calemcemay ano caay ka ilaeno no sakayat no niyah i, caay ko mamadangar no kaemangay wa saan. O roma a tamdaw tada matayalay kako, awaay ko toki a mipahatatanam to tao sanay. O roma sa i, mamisinanot ko kaemangay tamdaw, aka pakayni eca pakatala to adihayay toki a matayal a matoleden a malahdaw ko mihadidiay a falocoˈ.
Odoˈ no Sinael
it-1-CH 245 fiedac
Patnakay Cudad
Onini maloloday cudad o ngangan i Hipray sowal i, (o Qo-heˈleth hananay, tatodong o palisopsopay a tamdaw, misikayay to taykay a tamdaw sanay) Ora tatodong nora tilid matepiˈay to mitamorongan a ˈinorong no hongti no Israil. (Patnakay 1:1, 12) O finawlan no Kawas i, o mipatafangay to tireng a midokoay i Cingranan a tamdaw; mankora iraay ko ˈinorong no mikowanay a palisopsop to tamdaw, pasifanaˈ to tamdaw madimadi a midoko to Kawas. (1 Hongti 8:1-5, 41-43, 66) Mankora, o sakangaˈay anoca sakatatiih no kitakit ko pikowan no hongti hokira, o nika mikeriday cingra to finawlan madimadi midoko ci Yihofaan ko piˈarawan. (2 Hongti 16:1-4; 18:1-6) Oya palisopsopay a Solomonan na misaˈicelay a mihaen to demak, palisopsop to Israil tamdaw ato pacarcaray i lalomaˈ no kitakit a tamdaw masaˈopo tayni fangcalay sefi a mitaˈong to Kawas. Itini i Patnakay cudad misaˈicelay ci Solomon palisopsop to finawlan no Kawas, palimoˈot cangranan miliyas to masakenakenaay awaay ko epoc a tayal, midemak to mihaydaan no Kawas a ciepocay a demak. Tona o mipatafangay to Kawas cangra, mihaen ko demak tada o matatodongay. O Krisiya sowal a 70 tamdaw a mihongyakan cudad o Ek.kle.si.a.stes hananay a pangangan, tatodong i, ‘o masalalomaˈay no kasakopang a tamdaw’ sanay. Tano ninian a Krisiya a tilid kono Padaka Fangcalay Cudad a pangangan to Patnakay cudad.
SAKA 9 FOLAD 29–10 FOLAD 5 ROMIˈAD
O ODOˈ KO KIMAD NO KAWAS | PATNAKAY 3-4
Satoloen a Mikaˈered ko Towaso
ijwhf-CH 10 fedengan 2-8 fatac
Aka Papipalaken ko Lalosidan no Tingki to Raramod Iso
● O lalosidan no tingki ngangaˈay patanoktok to kalalaˈed no raramod. Tinakoen, to romiˈad ano cowa kalacafay ko mararamoday i, ngaˈayay tano lalosidan no tingki a malarinnak.
“O kantangay a cecay sowal ‘maolahay kako tisowanan’ anoca ‘maˈilolay kako tisowanan’ sanay a sowal, taˈangayay ko pipadama.”—Ciyawnasen.
● Ano caay ka pinaˈon i, o lalosidan no tingki mamipalak to raramod iso. Tinakoen, o roma tamdaw mitatiwho to soci ato pingpan i, cowato pakasawad, telocto i, awaayto ko toki ato ˈicel a ciharateng to ramod.
“Ano lowanen ako ko pinengneng to soci i, o faˈinay ako mamakahito masasowal i takowanan.”—Colisa.
● O sowal no roma tamdaw, ngaˈayay kami misakadademak to soci, hanaca ngaˈayay a ˈangongol ko kacaciyaw sanay. Pakayni toninian “cecay tatokian milahci to adihayay a demak” sanay ko sowal ni Tokele, ˈarawhan cowa ko ngaˈayay pakayraan konini. Sanay ko sowal ningra: “Ano matongal matongalto ko demak i, malowanay ko epoc no midemakan.”
“Maolahay kako caciyaw to faˈinay, kawra caciyaw takowanan a minengneng haca to soci cingra, miharateng kako ano irato awato kako i, pakayra cingranan awaay ko kasasiromaan.”—Sara.
Haratengen: O lalosidan no tingki ngangaˈay padama tisowanan patanoktok to raramod, kawra ngangaˈay mipalak to raramod iso, ora kalimlaan i, itiraay to samaanay kiso misakadademak tora lalosidan.
w23.05 23-24 fiedac 12-14 fatac
Aka Padengen ko ‘Marengrengay Namal ni Yihofa’
12 O ciramodayto a tamdaw ngaˈayay misamaan mitodong ci Akuila aci Priskilaan hani? Saharateratengen o maanan ko dademaken namo tatosa. O romaroma tayal ngaˈayay kamo malacafay a midemak, hamaan misiwatik a dademak? Tinakoen, malacafayay ci Akuila aci Priskila a mitosil, kamo ngangaˈay malacafay milimasmas to toki mihaen to demak han? Ci Akuila aci Priskila malacafayayto a matayal, soˈliˈlin o tayal no miso caay ka lecad tono ramod alatek, kawra ngaˈayay kamo malacafay dademak tono lomaˈ a tayal han? (Patnakay 4:9) Ano madadama kamo i, malecaday o makakapotay kamo, irato ko toki misacaciyaw to tihi. Ci Lopote aci Linta mataˈlifayto ko 50 miheca mararamod. Sanay ko sowal ni Lopote: “Cowa ka adihay ko toki niyam malacafay misalama. Ano mifanaw kako to kaysing i, misisitay a miˈicang to kaysing ko fafahi ako, anoca itini kako i pahanaan mifaenot to semot i, iraay cingra mikalacafay takowanan. Rahekeran nanay kako. Malacafay a matayal makedecayto ko kalalaˈed niyam, matongal matongalayto ko kaolah niyam to tihi.”
13 Kawra haratengen, ano malacafayho ko mararamoday tatosa, matongalayto ko kakedec nangra sai, awaay ko pinang. Sanay ko sowal no cecay fafahiyan salikaka i Pracil: “Aniniay a lintad a nokaˈorip adihayay ko mikalisangaˈay to falocoˈ a demak. Mahapinangay ako, ano itiniho i cecay a lalomaˈan i, o malacafayayto sanay cangra miharateng. ˈArawhan mafanaˈay kako, o mararamoday cowa ko nika lacafay aca, caciharatengho to saali no tihi wangaˈ.” Pakayni toninian, nengnengen ci Polono ato fafahi ci Taysi samaanay ko demak nangra. Sanay ci Polono: “Ano pahanhan kami i, cowa ka pinengneng to soci, soˈlinay a rihakedan kami tatosa aca.”
14 Nikawrira, alatek cowa ka olah kiso mipalak to toki malacafay to ramod. Awaay ko kalecadan namo a kahemekan a demak alatek, anca malacafayho kamo i, cowa ka hemek ko tihi. Samaan ko pidemak namo hani? Haratengen ko satapangan nonini a lalakaw masowalay a sapatinako no mataringay a namal. O namal cowa ka tangsol sa marengrengto, ao nanaˈonen iso a mitongal ko taˈangayay a kasoy. Malecaday, to romiˈamiˈad palaken namo ko pina ehon a malacafay, halo midemak to pina kaolahan namo tatosa a demak, ao cowa ko mamikidat to sakalacongis a demak. (Yakop 3:18) Tanamen namo a mihaen ko demak, alatek wa miliyawto a malikat ko olah namo a tatosa.
Aka Padengen ko ‘Marengrengay Namal ni Yihofa’
3 Toha sakacaaw ka mapadeng ko ‘marengrengay namal ni Yihofa,’ o faˈinay ato fafahi oha mamisaˈicel patanektek to kalalaˈed aci Yihofa. Onini iraay ko maanan a sapadama to raramod nangra hani? Ano misakareteng a minengneng ko mararamoday tamdaw to kalawidang nangra aci Yihofa, o mamakalimto cangra kalasaka dademak to safalod no Fangcalay Cudad. Papadama cangranan miliyas ato miremo to pasangar, ho eca ka mafasaw ko olah nangra tatosa. (ˈOsien ko Patnakay 4:12.) O roma i, ano tanektekay ko kalawidang no mararamoday aci Yihofa i, o mamisaˈicelto cangra mitodong ci Yihofaan, palahad to makapahay capeling ni Yihofa, tinakoen o sidaˈitay, mihadidiay ato makahiay misodod a waywayan. (Ifiso 4:32–5:1) O faˈinay ato fafahi ano patalahkal cangra to mahaenay a makapahay capeling i, o mamadoloto cangra makakaolah. Fafahiyan salikaka ci Lina mataˈlifayto ko 25 miheca a ciraramod, sowal ningra: “Ano tanektek ko kalawidang aci Yihofa, o mamadoloto kiso maolah ato mikangodo to ramod.”
Odoˈ no Sinael
it-1-CH 49 fiedac 9 fatac
“Olah”
‘Ira ko tatokian a maolah.’ Tatano maolahay falocoˈ micada kita to polong a tamdaw, edengan koya cowa ka olah ci Yihofaan ato midemakay to tatiihay demak a tamdaw, cowa ko ngangaˈay a kaolahen ita. Ci Yihofa aci Yis Kristo maolahay to moecelay, ˈintehay to mararaway. (ˈOlic 45:7; Hipray 1:9) O ˈintehayho to moecelay ato Kawas a tamdaw, manaokaniw cowa ko kakaolahen no mita, padadotoc a mikaolah cangranan awaay ko epoc, samanen cowa ka masemer cangra to olah no Kawas. (ˈOlic 139:21, 22; Isaya 26:10) Mihaenay haw i, iraay ko lalangian no Kawas a ˈinteh to matiniay a tamdaw, aitini i matatodongay tatokian a mitefoc cangranan.—ˈOlic 21:8, 9; Patnakay 3:1, 8.
SAKA 10 FOLAD 6-12 ROMIˈAD
O ODOˈ KO KIMAD NO KAWAS | PATNAKAY 5-6
Sasamaan ko Hademak Ngaˈ o Mikangodoay ci Yihofaan
w08-CH 8/15 15-16 fiedac 17-18 fatac
Tariˈangen a Paˈodingar ci Yihofa
17 Ano midoko kita ci Yihofaan i, o sasinanoten ita ko cecay demak, o pipatalahkalen ita ko mangodoay to Kawas a maseneng. Patnakay 5:1 sanay ko sowal: ‘Tayni kamo i fangcalay sefi no Kawas i, ka pinaˈon to rakat.’ Ci Mosi aci Yosuwa mitengilay to sapalimoˈot ni Yihofa, mihelong to cokap, samanen o fangcalay kitiraan kora katomirengan nangra. (Kasadakan 3:5; Yosuwa 5:15) Mihaen ko demak nangra, paihkalay to nika ngodo to Kawas. O saysi no Israil sangaˈen ko keliw to malo kafer nangra, to sapitahepo to laeno no tireng.’ (Kasadakan 28:42, 43) Ano tooren no saysi konini sarikec, matayal cangra i kaˈayaw no pipatoˈayaan i, caayto ka maˈaraw ko kalaeno no tireng. O kahacecay lalomaˈan no saysi mamidofdof tonini palinian no Kawas, mitawmec to nika maseneng no saysi.
18 Itini i midokoay a demak sapatalahkalaw to mangodoay to Kawas a masengen i, o misakaretengay a waywayan cowa ko aawa. Ano sapilifokaw to pikangodo no tao, kitaho ko saˈayaw a mikangodo to tao wangaˈ. O waywayan ita ira ko masenengay, cowa ko sapaˈarawaw aca to tamdaw, cowa ko sapaihkalaw to saaroˈan no niyah. O patalahkalan ita a masenengay cowa ko saki papotal aca, o miˈarawan no Kawas o nai kemoday no falocoˈ. (1 Samuil 16:7; Taneng 21:2) O waywayan ita, pakayraan ita, kalalaˈed ato tao, ato pinengneng to niyahan, papatalahkal to iraay ko kasenengan a tamdaw kita. Ano hacowato, o manan ko sowal o manan ko demak, papatalahkal to masenengay. Pakayni to sasowalen, caˈedong, o pilafa to niyah, o haharatengen ita ko sowal no tarokos ci Pawlo: ‘Itini i kihcod a demak aka pakapolin to tamdaw, ho eca ka malikaf no tao ko mitosilay tayal ita. Itini i maamaan demak patalahkalen ita to o sikawdan no Kawas ko niyah.’ (2 Korinto 6:3, 4) ‘Itini i kihcod a demak paˈodingaren ko sapasifanaˈ no Kawas.’—Titus 2:10.
w09 11/15 11 fiedac 21 fatac
Micekiw to Fangcalay Cudad wa Macakat ko Epoc no Pitolon
21 Ci Yis mitawmecay to mangodoay falocoˈ ato pakasoˈlinay falocoˈ a mitolon to Kawas. ˈAyaw no papalowad ci Lacarusan nai patay i, micaˈa pasikakarayan cingra, sowal sa: ‘Wamaaw, akoˈiden ako Kiso mitengil to pitolon ako. Mafanaˈay kako to marariday Kiso mitengil to satolon ako.’ (Yohani 11:41, 42) Kiso i, mahaenay ci Yisan a mitawmec to mangodoay falocoˈ ato pakasoˈlinay falocoˈ a mitolon to Kawas han? Ano sinanoten iso miˈosi ko satolon ni Yis i, mamahapinang to maanan ko misakaretengan ni Yis: Mipafangcal to ngangan ni Yihofa, o nika ira no Hongti Kitakit no Kawas, malaˈosi ko araaw no Kawas. (Matay 6:9, 10) Sinanoten a miharateng ko satolon iso. O satolon iso patalahkalay to ˈifowaay kiso mitala to kaira no Hongti Kitakit ni Yihofa, makalim a midofdof to araaw Ningra, makalim a mipafangcal to ngangan ni Yihofa han? O mamahaen ko lalakaw no satolon iso wa ngaˈ.
w17.04-CH 6 fiedac 12 fatac
Lahcien Iso Mitoor ko Nisetekan no Falocoꞌ
12 ˈArawhan, o satapangan aca ko micadaay to paputisem. Ikor no paputisem i, papadadotoc kita madimadi matayal saki Kawas, milahci to patafangay to tireng a miketonan a sowal iso. Licayen ko niyah: Maharek kako mipaputisem i, itini i noˈadingoan padadotocay macakat han? Kamayan kako misarocod a midoko to Kawas han? (Kolosay 3:23) Marariday kako mitolon, micekiw to Fangcalay Cudad, mirienang to saˈopo ato mitosilay han? Anoca malowanayto ko toki a mirienang tono ˈadingoan a demak han? Somowlay ci Pitiro, ano padadotoc kita palahad to pasoˈlinay falocoˈ, pacakat to sifanaˈ, mihadidi ato mangodoay to Kawas a capeling i, caayto ko mamafasaw ko falocoˈ i midokoay to Kawas a demakan.—ˈOsien ko 2 Pitiro 1:5-8.
Odoˈ no Sinael
Salicay No Miˈosiay Tamdaw
Sowal i Patnakay 5:8 sanay, iraay ko cecay tapang cowa ka sadafdaf ko demak, miroeroay to manikaway tamdaw. Kawra o mamiharateng cingra, itini fafekang ningra iraayho ko takaraway ko saaroˈan, fadangalan mikantokay cingranan, hanaca itini fafekang nangra iraayho ko mikikakaay ko takaraw ko saaroˈan. Ka adayayan i, o cifadangalay no sifo ano samaanto ko ˈakawang no saaroˈan o mamanahol alatek, tangongolay ko pidokaˈ to finawlan.
Kawra, ano samaanto a tatiih ko pakayraan, wa ngaˈay rihaday ko falocoˈ ita, samanen mikantokan ni Yihofa ko tapang no sifo, ano samaanto ko malifaay a pasangaray, ngaˈayay pasayra kita i Kawas micangacang to sadama, mihepol to ˈinorong Cingranan. (ˈOlic 55:22; Filipi 4:6, 7) Mafanaˈay kita, ‘misongilaˈay ci Yihofa mihapinang to polong no hekal, sapidemakaw to ˈicel padama to misarocoday madimadi Cingranan a tamdaw.’—2 Rayray 16:9.
Mihaenay, o Patnakay 5:8 mitadtaday to soˈlinay a pakayraan no sifo no tamdaw: I fafekang no tapang iraayho ko mikikakaay ko takaraw ko saaroˈan mikantokay cingranan. Kalimlaan i, patalipaˈelalay koniya sinael kitaanan, o saˈakawangay ko saaroˈan ni Yihofa, iraay ko saˈakawangay a fadangalan Ningra. Nohatini, pakaynian ni Yihofa i Wawa Ningra ci Yis Kristoan, oya Hongti no Hongti Kitakit no Kawas a mikowan. O malefotay ko ˈicel no Kawas, mihapinangay to polong no hekal. Malefotay a masadafdaf Cingra, cowa pisateked, malecaday ko Wawa Ningra.
SAKA 10 FOLAD 13-19 ROMIˈAD
O ODOˈ KO KIMAD NO KAWAS | PATNAKAY 7-8
Ciharateng to Mapatayay ko Salawina a Tamdaw
it-1-CH 25 fiedac 6 fatac
“Mararom”
Iraay ko Kararoman a Romiˈad. Patnakay 3:1, 4, sanay ko sowal: ‘Iraay ko katomangican a romiˈad, iraay ko kalipahakan a romiˈad, iraay ko kararoman a romiˈad, iraay ko pisakeroan a romiˈad.’ O sowal no Fangcalay Cudad o patay ko hererekan no tamdaw sanay, mansa o citanengay tamdaw ‘itiniay ko falocoˈ i iraay ko mapatayay a lomaˈ,’ cowa ka itini i maacangay a lomaˈ. (Patnakay 7:2, 4; nengnengen ko Taneng 14:13.) Ano falicen ko sowal i, o citanengay a tamdaw tatayra i iraay ko mapatayay a lomaˈ mihinom cangranan, cowa ko sakaacangaw aca, caay pikihar to tamdaw. Mihaen i, cowa ko mamatawal ningra ko nika apotoˈ a maroray ko ˈorip, mamisetek to falocoˈ tano matatodongay a pakayraan mihodop to Misangaˈay a Tatapangan.
Padama to Tao Misiˈayaw to Saroero
15 ˈAyaw no pina miheca mapatayay ko fafahi ni Wilim, sanay cingra: “Maolahay kako pakahemek ko tao to fafahi ako, mafanaˈ to maolahay ko tao cingranan, mikangodo cingranan. O kalimlaan i nokaˈorip ako ko fafahi, Mansa mihaen cangra tada masayaray ko falocoˈ ako.” Mapatayay ko faˈinay ni Pianka, sanay cingra: “Malacafayay ko salikaka takowanan a mitolon, paˈaraw to pina sinael, misayaray takowanan. Milengoay cangra to faˈinay ako, makahiyay mitengil to pilomal ako to demak ningra, mihaen misayaray to harateng ako.”
“Kihatiyaen a Tomangic ko Tomangicay a Tamdaw”
16 Aka misakahemaw to ˈicel no mitolonay. Pacafayen ita ko mapatayay ko salawina a tamdaw a mitolon, anca patado mitolon saki cangranan. Itiya, alatek masomad kiso, fokil saan to sowal, ano soˈlinto tomangic a mitolon kiso caka sadak ko sowal, ora mikifalocoˈay iso a satolon, o mamihinom cangranan. Sanay milomal ci Talin: “Tayni ko fafahiyan salikaka mihinom i, licayen ako cangra makahi mitolon saki takowanan hokira. Nolatek naˈemetan nangra ko somad ngaˈ, masadakay ko sowal, kawra ikor fanekfekayto ko sowal, o satolon nangra mitemeray to falocoˈ ako. O nika pasoˈlin no falocoˈ no salikaka, o olah ato kaciharateng nangra padamaay takowanan matongal ko pitadiˈec ci Yihofaan.”
“Kihatiyaen a Tomangic ko Tomangicay a Tamdaw”
17 O kahacecay a tamdaw pakayni kapatay no salawina cowa ka hecad ko toki a maadah ko somad no falocoˈ. Saˈayaˈayaw ˈalomanay ko salawinawina anca widang tayra mipadang, kawra ikor no pina folad awaayto ko mikiharay a tamdaw. Sanay ko sowal no Fangcalay Cudad: ‘O soˈlinay widang marariday patahekal to olah, matira o salikaka no tireng a mipadang i kapadesan.’ (Taneng 17:17) Mihaenay haw i, pakayni kapatay no salawina ano caho ka masaysay ko falocoˈ nangra i, o papadotoc kita mihinom cangranan.—ˈOsien ko 1 Tisalonika 3:7.
18 Adihayay a demakan mamikidat to somad no mapatayay ko salawina a tamdaw, patinakoen, o sasing, kararamodan a romiˈad, radiw, anca hanek no manan, ngihaˈ, madodemay anca maˈoraday a romiˈad. Ikor no patay no raramod, sakina cecay a mirienang to taykay anca piharatengan to patay ni Yis a saˈopo, tada o mamasomad ko tamdaw. O sowal no cecay faˈinayan salikaka: “O harateng ako i, ikor no patay no fafahi, toya kararamodan a romiˈad, o mamararom kako sa kako. ˈArawhan, iraay ko papina kangaˈayan ako salikaka mipohay takowanan macacawmaˈ, hato cowato ka tada matoˈol kako.”
19 Nikawrira, mapatayay ko salawina a tamdaw cowa ko aitini aca i mikiriwiˈay a romiˈad, ngaˈ misaali to sahinom. O sowal ni Yuniya: “Cowa ka itiya aca mikiriwiˈay piharatengan a romiˈad, to kalo a romiˈad ano iraay ko pacafayay takowanan i, tada paˈicelay takowanan. Ano mikiˈayaw ko tao mikihar takowanan, soˈlinay masayar ko falocoˈ ako.” Soˈlina cowa ko mamapadeng ita ko somad no mapatayay ko salawina a tamdaw, miadah to tafihaw no falocoˈ nangra, kawra ngaˈayay tano demaken ita mipadang ato mihinom cangranan. (1 Yohani 3:18) Sanay milomal ci Kapi: “Miakoˈiday kako pafeli ci Yihofa to malohemay malitengay, mihadidi cangra pacafay takowanan, mitaˈlif toya kasomadan a romiˈad. O kaciharateng no Malohemay Malitengay mahapinangay ako ko olah ni Yihofa a mitakec takowanan.”
Odoˈ no Sinael
‘Pakayni Toninian Mafanaˈ ko Polong a Tamdaw to Nisawawaan Ako Kamo’
18 Ano mapakararaw no salikaka kita, latek kakilimen ita cingra masasowal. Kawra o sangaˈayay i, licayenho ko niyah: “Cipinangay kako to emin a demak han?” (Taneng 18:13) “Latek cowa ko mipadetengan nora salikaka han?” (Patnakay 7:20) “Itiyaho kako iraay ko mahecaday a raraw han?” (Patnakay 7:21, 22) “Ano tayra kako mikilim cingranan i, mamangalef a tatiih kora demak han?” (ˈOsien ko Taneng 26:20.) Ano songilaˈen ita miharateng konini salicay, latek mamahapinang to mamitawmec kita to olah a misodod tora salikaka.
SAKA 10 FOLAD 20-26 ROMIˈAD
O ODOˈ KO KIMAD NO KAWAS | PATNAKAY 9-10
Matatodong ko Pinengneng to Sapalifet
w13 8/15 14 fiedac 20-21 fatac
Aka a ‘Piloloh ci Yihofaan’
20 Hatatengen o nima a ˈinorong. Misamaanay hani? Samanen ora pasangar latek ono mita a raraw. Ano mahaenay i, o kita ko mamitamorong to ˈinorong, aka piloloh ci Yihofaan. (Kalatiya 6:7) Misamaanay hano miloloh to Kawas cowa ko matatodongay? Patinakoen ita: O cecay ngaˈayay a tosiya, kalikiay ko cikay. Oya mipalakatay a tamdaw itini i piˈikongan no lalan, pakinaliay ko cikay, mataˈlifay to misaˈosian no misangaˈay tora paliding a kosi, oraanto masongtolto ko tosiya. Ono kosi a ˈinorong kora kasongtol nora tosiya han? Co:wa! Malecaday tora demak, misangaˈ ci Yihofa kitanan i, pafeliay to pasalatay a piharateng no mita, hanaca mikayatay kitanan, pasifanaˈ kitanan to sasamaan a citaneng ko pisaˈosi. Cowa ko ngangaˈay kita miloloh to Misangaˈay Tatapangan to nika raraw no niyah.
21 Manaokaniw, tahalifa kita to pasangar, latek cowa kono mita a raraw, saka mafekad ko maan a demakan, pakayniay i ‘talifahal sanay a mafekaday ato caay ka saˈosi a tatokian.’ (Patnakay 9:11) Kawra aka mapawan, o lamit no lalangian i, ci Akoma Satan ko lalengawan no tatiihay demak. (1 Yohani 5:19; Paˈarawan 12:9) O ˈada ita ci Satan, ao cowa ko ci Yihofa!—1 Pitiro 5:8.
Misalimlaay ci Yihofa to Misapoeneray a Tamdaw
10 Ano iraay ko misapoeneray a capeling ita i, wa madolo a misaysay to pasangaray. Itini kaˈorip ita, adihayay ko cowa ka sadafdaf a demak, nolatekay malitemohay ita ko hatiniay a demak. Sanay ko sowal ni Solomon: “Maˈaraw ako ko nipidakaw no kuli to efa, o hongtito ko romakatay a matiya o kuli.” (Patnakay 10:7) Soˈlinay, iraay ko inaneng a tamdaw cowa ka itini i matatodongay a saaroˈan alatek, kawra oya awaay ko inaneng a tamdaw i, micadaay to adihayay a sapahemek. Somowalayho ci Solomon, citanengay a pakayraan i, wa micada anca misiˈayaw to cowa ka masadafdaf a demak, cowa ko haharateng sa to mahaenay a pakayraan a mararid a ngaliwngiw. (Patnakay 6:9) Ano malo misapoeneray a tamdaw i, soˈlin o kaˈorip ita adihayay ko pasangaray, cowa ko tatatiih ko falocoˈ.
w11-CH 10/15 8 fiedac 1-2 fatac
O Mipiliˈan Iso a Lawla Ciepocay Han?
MISAHCIAY a pasowal ko Fangcalay Cudad, ci Yihofa i, halamhamay kitanan a maˈorip, cowa koranan aca, halamhamayho raheker ko kaˈorip ita. Tinakoen sanay ko sowal no ˈOlic 104:14, 15: ‘Parengawen no Kawas ko sera to kakaenen, ira ko epah sakalipahak no tamdaw, ira ko simal sakakoˈped no pising, ira ko kakaenen sakatanektek no tireng.’ Parengawen ni Yihofa ko pinaloma, ira ko epah, simal ato panay to sakaˈorip no tamdaw. O epah i, soˈliˈlin cowa ko sakaˈorip a dafong, kawra pahemekay to tamdaw, lipahaken ko falocoˈ. (Patnakay 9:7; 10:19) Mahapinangay itini, halamhamay ci Yihofa kitanan a ‘matomes ko lipahak no falocoˈ.’—Dmak 14:16, 17.
2 Mihaenay haw i, latelatek sadaken ita ko toki ‘minengneng to maeferay ˈayam’ ato ‘i palapalaan a yolinohana,’ anoca midemak to mihepolay to roray no tireng ato falocoˈ a demak, parihaked to ˈorip. (Matay 6:26, 28; ˈOlic 8:3, 4) O lipahakay a tanoktok ko tireng o sidaˈit no Kawas. (Patnakay 3:12, 13) Tona o sapalemed no Kawas ko sinowayay a nokaˈorip, ano mipiliˈ kita to sakasinoway a demak i, pahemeken ko Kawas wangaˈ.
Odoˈ no Sinael
it-2-CH 582 fiedac 2, 6 fatac
Miyakayakan, Mitonganganay a Sowal
Hatiratiraay sanay a kalo sowal sahtoay o tatiihay cowa ka saan (kawra nolatek malo mitonganganayto ko sowal); O mitonganganay a sowal soˈlinay o tatiihay, mikidatay to lacongis, pairaay to taˈangayay a noka pipalak. Ano mitongangan to tao i, mipakaditay to ngangan no niyah ikaˈayaw no Kawas, samanen ˈintehay ko Kawas to ‘miyakayakay to lacongis i lalomaˈ no salikaka.’ (Taneng 6:16-19) Ono Krisiya sowal to ‘mitonganganay’ sanay i, o di.aˈbo.los hananay a mihongyak. Pangangan no Fangcalay Cudad ko sakakaay ˈada no Kawas ci Akoma, ci Satan o ˈdi.aˈbo.los hananay. (Yohani 8:44; Paˈarawan 12:9, 10; Satapangan 3:2-5) Mahapinangay itini, o mitonganganay mikitiniay ci Akomaan.
SAKA 10 FOLAD 27–SAKA 11 FOLAD 2 ROMIˈAD
O ODOˈ KO KIMAD NO KAWAS | PATNAKAY 11-12
Tanektek ko Tireng, Lipahak ko Kaˈorip
g-CH 3/15 13 fiedac 6-7 fatac
Tingalaway Fali ato Tediˈ no Cidal—O Ngaˈayay Sapaiyo Mipatay to Cirekay Han?
O tediˈ no cidal o ngaˈayay sapaiyo mipatayay to cirekay. Madengaay adada i pipaisingan no Padaka casi, sanay ko sowal: “Mikitiniay i fali a midengaay to adada a cirekay cowa pakacoˈay to tedi no cidal.”
Sasamaan kiso mikitini i tedi no cidal ato fali a milifok to haepoc hani? Talapotal a romakat, mikicangcang to cidal, mihelip to tingalaway a fali, kawra aka sahalafin sa a misacidalan. Mihaen to demak iraay ko epoc i tisowanan.
Salimlaen ko Sapafeli no Kawas Kitaanan a ˈOrip
6 O Fangcalay Cudad cowa ko misamacayay milengo to sakatanoktok no tireng ato pakayniay i kakaenen a cudad, kawra mikitini ngaˈay mahapinang ita ko pinengneng ni Yihofa pakayni toniya demak. Tinakoen, palimoˈotay ci Yihofa kitaanan ka ‘piliyas to midokaˈay to tireng a demak’ sanay. (Patnakay 11:10) Macoosay to kakaenen, malasangay hananay midokaˈay to ˈorip a demak, sahtoay o mirikecan no Fangcalay Cudad. (Taneng 23:20) Pakayni mipiliˈ to komaen to maanan, minanom to maanan, ato hakowa ko mikaenan, hakowa ko minanoman, makalimay ci Yihofa kitaanan mafanaˈ miˈimer.—1 Korinto 6:12; 9:25.
7 Misaka dademak kita to inaneng a miharateng citaneng ko pisaˈosi, paihkal to misalimlaay kita to sapafeli no Kawas a ˈorip kitaanan. (ˈOlic 119:99, 100; ˈosien ko Taneng 2:11.) Tinakoen, misongilaˈ kita pafafidaˈ to ngaˈayay anca caay ka ngaˈay a kaenen. Ano maolahay kita to cecay kakaenen, kawra mafanaˈay to aadada ano kaenen i, cowato ko kakomaen kita. Roma i, o citanengay a tamdaw papairaen ko ngaˈayay kafotiˈ, padadotoc mionto to tireng mikorac to tireng ato taliyok no lomaˈ.
‘Sakadademaken ko Kimad no Kawas’
2 Malo finawlan ni Yihofa, adihayay ko lalangian ita a lipahak. O cecay masakalimlaan lalangian i, micerid kita miˈosi to Kimad no Kawas, halo misaˈicel misakadademak to mananamay ita.—ˈOsien ko Yakop 1:22-25.
3 ‘Misakadademak to Kimad no Kawas,’ wa milifok kita to kadofahay a epoc. Tinakoen, mihaen kita to demak wa pakahemek ci Yihofaan, lipahakho ko niyah. (Patnakay 12:13) Na milifetayto kita, ano sakadademaken ko sapaini no Fangcalay Cudad, wa malangaˈay ko kalalaˈed ita to paro no lomaˈ ato salikaka. Roma i, wa maliyas ko adihayay pasangar, eca ka sano cowa ka pidoko ci Yihofaan a tamdaw malifet ko roray. Masowal ni Tafiti ko rikec, limoˈot ato safalod ni Yihofa ikor, sanay cingra: ‘Midofdofayho a tamdaw wa milifok to kadofahay a sapalifon.’ (ˈOlic 19:7-11) Mikifalocoˈay kita mihayda to sowal ningra!
Odoˈ no Sinael
it-2-CH 206 fiedac 7 fatac
Sapatemer no Fangcalay Saocor
O mipatemeran no Kawas to fangcalay saocor papitilid to Fangcalay Cudad a tamdaw, cowa ka hatira to cirot a ˈayam (mafanaˈay mitodong to ngihaˈ a ˈayam) haemin han mitilid ko cecacecay a sowal. O sowal no Fangcalay Cudad, oya mipatemeran no Kawas a mitilidan a Paˈarawan cudad, nao pakaynian i coyoh a patiriˈ ko tarokos ci Yohani sanay. Ikor, ‘misawacayay ci Yohani to kihcod maˈaraway ningra, somowal to sapafeli a sowal no Kawas ato misawacayan ni Yis Kristo a demak.’ (Paˈarawan 1:1,2) Tona iraay matefad ko fangcalay saocor, hato itiniay i romiˈad no Tapang ci Yohani, matengil ko ngihaˈ a pasowal: “Tiliden i cudad ko maˈaraway iso.” (Paˈarawan 1:10, 11) Mihaenay haw i, pasalatan no Kawas ko mitiliday to Fangcalay Cudad tano ponoˈ no niyah mikilim to hasowal a mitilid to maˈaraway ningra a mapolosi. (Hapakuk 2:2) Nikawrira, mikayatan ni Yihofa ko mitiliday, hongaˈ o soˈlinay matatodongay ko mitilidan nangra, hanaca mitooray to araaw Ningra. (Taneng 30:5, 6) Patnakay 12:9, 10 paihkalay, ora mitiliday tamdaw oha mamisaˈicel a misaharaterateng, misolap ato misolimet, wangaˈ tano ‘kalipahakan a sowal’ ato ‘matatodongay a tilid mitilid to soˈlinay kimad.’—Nengnengen ko Luka 1:1-4.