Pinengnengan to Lalakaw no Mitosilay ato Nikaˈorip Rayray no Saˈopo
© 2025 Watch Tower Bible and Tract Society of Pennsylvania
SAKA 11 FOLAD 3-9 ROMIˈAD
O ODOˈ KO KIMAD NO KAWAS RADIW NI SOLOMON 1-2
O Manan ko Soˈliˈlinay a Kasasiolah
w15-CH 1/15 30 fiedac 9-10 fatac
O Ngangaˈay Tahadaˈoc ko Olah Han?
9 O raramod hananay i, cowa ka lecad to kalo katatelek, aira ko olah no mararamoday wangaˈ. O tahapinangan no raramod no Krisciyang i, o olah. O masamaanay a olah konini hani? (1 Yohani 4:8) O mahaenay a olah iraay ko paro no lomaˈ a olah, no widang a olah, kaolah no faˈinayan ato fafahiyan hokira? (Yohani 11:3; Taneng 5:15-20) Soˈlinay haw i, o olah no mararamoday mahawpay maemin ko masowalay itini a olah. Patalahkalen ko olah tada misemeray to falocoˈ. Aka pasalaten ko fangafang a demak i nokaˈorip a micona tisowanan patalahkal to olah i ramod! Mihaen wangaˈ mitongal to lipahak namo, patanoktok to raramod namo. Itini i romaroma a serangawan, ˈayaw no mararamod ko tamdaw cowa makakafanaˈ cangra, cowa ka masasoˈaraw cangra. Mararamodto cangra ikor, ano mararid a patalahkal to olah no falocoˈ i, mamapalahad ko kakaolah nangra, makakedec ko kalalaˈed nangra.
10 Maloka patalahkal ko mararamoday to olah, iraay ko roma a epoc. Sanay ko sowal ni Solomon, ‘sangaˈen ko ekim a cangaw, pakafiten ko linkim’ pafeli to Sulam a limocedan, pakahemek cingranan ‘matira o folad a makapah, matira o cidal a malikat.’ (Radiw ni Solomon 1:9-11; 6:10) Kawra, edengan koya pakaenay to siri a kapah ko ifalocoˈay noya Sulam a limocedan. Mapacieci a malaliyas to mikaolahan ningra a faˈinayan i, mikicowaay cingra milifok to ˈicel ato sahinom hani? Itira i sowal noya limocedan mahela ko caˈof. (ˈOsien ko Radiw ni Solomon 1:2, 3.) Cowa ka walawal noya kaying ko olah noya pakaenay to siri, o sowal ningra ‘ikakaay to fangsisay a epah’ sanay, o makapahay ngangan noya kapah hato o mitaktakan i fongoh a sataˈos, misayar to falocoˈ sanay. (ˈOlic 23:5; 104:15) Mahapinangay itini, o olah a sowal no kaolahan tamdaw palipahakay to falocoˈ, midaˈocay a materek. Ano mararid ko mararamoday patalahkal to olah tada o masakalimlaan!
Odoˈ no Sinael
w15-CH 1/15 31 fiedac 11 fatac
O Ngangaˈay Tahadaˈoc ko Olah Han?
11 O caayho ka ciraramod a Krisciyang, mangalefay koya saka ciraramodaw a Krisciyang, ngangaˈay mikitini i Radiw ni Solomon a milifok to epoc. Oya Sulam a limocedan awaay ko olah ci Solomonan, papiketonan ningra to sowal ko Yirusalimay a fafahiyan, sowal sa cangranan: ‘Aka parawraw to olah no falocoˈ ako, aka kidaten, pakomira han.’ (Radiw ni Solomon 2:7; 3:5) Misamaanay hano saan ko sowal ningra hani? Samanen kasimaan saan a maolah to tao cowa ko matanengay. O Krisciyang soˈliˈlin mangalay to saka ciraramodaw, citaneng ko falocoˈ ngaˈ, pakahadidi a mitala to soˈlinay a olah.
SAKA 11 FOLAD 10-16 ROMIˈAD
O ODOˈ KO KIMAD NO KAWAS RADIW NI SOLOMON 3-5
Masakalimlaan ko Ikemoday a Makapahay
w15-CH 1/15 30 fiedac 8 fatac
O Ngangaˈay Tahadaˈoc ko Olah Han?
8 Itini i Radiw ni Solomon, o patalahkalan a olah a sowal cowa ka sahto sa o pahemekay to papotal a kapah. Nengnengen to samaanay somowal koya pakaenay a kapah to Sulam a limocedan. (ˈOsien ko Radiw ni Solomon 4:7, 11.) Sanay ko sowal ningra toya limocedan: “Mato waneng no ˈodal ko filfil iso.” Misamaanay hani? Samanen ikakaay ko nika fangsis ato koesan no faelohay materaˈ a waneng. Sowal noya pakaenay kapah “mato ˈodal ato hacol ko sema iso” sanay toya limocedan, tatodong i, damsay ko sowal ningra misayaray to falocoˈ o sanay. ‘Tada makapah kiso, awa ko dangoc iso’ sako sowal no pakaenay toya limocedan i, o makapahay a capeling no falocoˈ ningra ko misowalan.
w00-CH 11/1 11 fiedac 17 fatac
Tano Kawas a Pinengneng to Makoracay Waywayan
17 Saka tolo a mitawmecay to madimadi a tamdaw i, oya Sulamay a limocedan. O makapahay a limocedan cingra, maolahay ko cecay pakaenay kapah cingranan, ano oyato cihafayay a hongti no Israil ci Solomon maolahay i cingranan. Mahaen o sapaˈolic a sowal no Radiw ni Solomon, padadotocay a makorac ko waywayan noya Sulamay a limocedan sanay, telocto i, malifokay ningra ko pikangodo no taliyokay a tamdaw. Soˈliˈlin minaˈayan ko olah ni Solomon, kawra itini i sapatemer no fangcalay saocor miˈoningan ningra ko nalifetan nonini limocedan. Ano oyato maolahay cingranan a pakaenay kapah tada mikangodoay to nika madimadi no waywayan ningra. Somowalay cingra a patatinako tora limocedan, o ‘masimeday maˈadipelay a pahanaan’ kiso sanay. (Radiw ni Solomon 4:12) Itini i nolitengan a Israil, o makapahay a pahanaan iraay ko kahirahiraay a hana ato pinaloma, fangsisay a hana ato takaraway a kilang. O mahaenay a pahanaan iraay ko ˈadipel i taliyok, edengan papakayni i mitaˈtaan a fawahan a micomod ko tamdaw. (Isaya 5:5) Itini i pinengneng noya pakaenay kapah, o nika kapah noya Sulamay limocedan, mahecaday oya tada makapahay a pahanaan. O fangcalay noka korac no waywayan ningra, tada maimah koya mamalo faˈinay ningra a kapah.
g05-CH 1/8 9 fiedac 1-4 fatac
Tada o Soˈlinay a Noka Kapah
O makapahay a capeling no falocoˈ misolotay to tamdaw han? Moetepayto ko mihecaan a ciramod ci Ciyawcena sanay ko sowal ningra: “Halafinayto a mihecaan, ˈangongolayho ko olah ako to faˈinay, samanen o madimadiay a tamdaw cingra, misasoˈlinay ko falocoˈ i takowanan. O salimlaay a demak i nokaˈorip ningra i, sapahemekaw to Kawas, mansa sidaˈitay cingra takowanan. Ano o mananto ko saˈosi ningra, ciharatengayto takowanan, pasifanaˈ takowanan to o masakalimlaan no mira kako sanay. Matinakoay ako ko tangongolay a olah ningra.”
Ci Taniil itiniay i 1987 miheca a ciraramod. Sanay ko sowal ningra: “Itini falocoˈ ako, tada makapahay ko fafahi ako, kawra o soˈlinay misolot takowanan i, o makapahay a capeling no falocoˈ ningra. Marariday cingra ciharateng to tao, talaˈayaway a mipadang to tao, pahemek cangranan. Adihayay ko kalimlaan a capeling no Krisciyang, ira cingra malo tihi ako tada rahekeray kako.”
Aniniay a hekal, o papotal aca ko minengnengan no ˈalomanay tamdaw to demak ato tamdaw, kawra aka mafiyor kita to harateng no hekal, o papotal aca ko minengnengan. Mafanaˈay kita, sakakapahaw ko tatirengan o pasangaray, hanaca cowa ko mamadangar, soˈlin malifok, citolasayho ko epoc. Kawra, palahad to makapahay a capeling, o kahacecay tamdaw ngaˈayay micangacang. Sowal no Fangcalay Cudad: ‘O nika sanengseng no fafahiyan i, o mangah, o nika kapah ningra i, awaay ko epoc, edeng o mangodoay ci Yihofaan a fafahiyan ko pakahemeken.’ Patalipaˈelalay ko Fangcalay Cudad to tamdaw: “Ano makapakapah ko fafahiyan ano caay ka fanaˈ to maan aca i, matiya o cikadangay to ekim ko ngosoˈ a diyong cingra.”—Taneng 11:22; 31:30.
O sowal no Kawas padamaay kitanan misalimla to ‘i kemoday no falocoˈ a waywayan, tano damsayay ato masinanotay a falocoˈ ko sapaeres namo to tireng. Itini pinengneng no Kawas o masakalimlaan.’ (1 Pitiro 3:4) O makapahay a capeling no falocoˈ mikikakaay to makapahay a tatirengan, o kahacecay tamdaw ngaˈayay misaˈicel a palahad.
Odoˈ no Sinael
w06-CH 11/15 18 fiedac 4 fatac
Kalimlaan no Radiw ni Solomon a Cudad
2:7; 3:5— Hano misaali ko limocedan to “kaying no Yirusalim” mitoroˈ to “kacil a siri ato tawinaan a malonem a miketon to sowal”? O kacil a siri ato tawinaan a malonem sahtoay o makapahay ko kawing a pinaˈorip. Mihaenay, o limocedan no Sulam misaaliay to kaying no Yirusalim mitoroˈ to kihcod makapahay a dafong a miketon to sowal, aka parawrawen namo ko kasasiolah ningra sanay.
SAKA 11 FOLAD 17-23 ROMIˈAD
O ODOˈ KO KIMAD NO KAWAS RADIW NI SOLOMON 6-8
O ˈAdipel Kiso Ha? Anca o Fawahan?
it-CH “Radiw ni Solomon” 11 fatac
Radiw ni Solomon
Ikor nonini a demak, panokayan ni Solomon koya limocedan no Sulam. Maˈaraway no kaka ningra miraod cingra, milicayay: “Cima kora malakayatay to kamay a malangohahay, a romakat nai kohkohan a tayni saw?” (Radiw ni Solomon 8:5a) O kaka no limocedan no Sulam cowa ka hapinang to misamacayay a malangohah ko safa no niyah. Na sanay ko cecay kaka ningra somowal: “Ira i lomaˈ niyam ko cecay a sasafaay a fafahiyan, caho ka lomahad ko coco ningra. Ira a tayni ko maolahay i cingraan a kapah, o sasamaanen niyam saw?” (8:8) Pacaˈof ko cecay kaka i: ‘Ano o ˈadipel cingra i, patirengen niyam ko ekim a pikacawan i tongroh nira, ano o fawahan cingra i, o sapad no fidengal ko sapiˈadipel to taliyok ningra.’ (8:9) Misawacayay ko demak, o limocedan no Sulam soˈlinay a kiemel a miconged to kihcod a sakayhid, marenec to fadisosoˈan no niyah, kamayan a tangongol ko olah to faˈinayan a widang ningra, madimadi tahadaˈoc (8:6, 7, 11, 12), mankora irato ko halalangian ningra a somowal: ‘O ˈadipel kako, o tosaay a coco ako matiyaay o pikacawan i tongroh no ˈadipel. Minengneng cingra takowanan matiyaay o rihadayay ko falocoˈ a tamdaw.’—8:10.
yp-CH 188 fiedac 1 fatac
ˈAyaw no Raramod Madadiˈito, Samaanto Aki?
Nikawrira, padadotoc makorac cowa ko pipadama aca to kaemangay a tamdaw maliyas ko masakenakenaay katalawan a teloc. Militosay ko Fangcalay Cudad to cecay a limocedan, soˈlin maolah cingra to faˈinayan a widang, kawra padadotocay a makorac. Ikorto i, malikoan nanay cingra somowal: ‘O ˈadipel kako, o tosaay a coco ako matiyaay o pikacawan i tongroh no ˈadipel.’ Cowa ko ‘malilengay a saedef cingra,’ ano maroero no saka ˈodangaw i, mamadoloto a ‘mafawah no tamdaw.’ ˈArawhan, itini i makoracay a waywayan cowa ka ngiyangi cingra, matiyaay toya caay ko mamakodapol a lowil ato caay ko mamapelal a pikacawan! Wa ngaˈayto a “o makoracay” tamdaw cingra han ko sowal, hanaca iraay ko tatodong ningra pasowal to hafaˈinay ningra, ‘itini pinengneng ningra o rihadayay a tamdaw kako’ wa saan. O rihadayay a falocoˈ ningra padamaay cangranan ira ko marenecay a falocoˈ nangra.—Radiw ni Solomon 6:9, 10; 8:9, 10.
yp2-CH 33 fiedac
Ngaˈayay Taˈarawan—Limocedan no Sulam
Mafanaˈay ko limocedan no Sulam, aitini no makakaolahay a demakan padadotoc a talipaˈelal, caay pitoor to nofalocoˈ a midemak. Pasowalan ningra ko cafay: ‘Papiketonen ako kamo: Aka parawraw to olah no falocoˈ ako, aka kidaten, pakomira han.’ Mafanaˈay cingra narikayay a malowid no olah ko taneng. Tinakoen, cipinangay cingra itiniay i saroero ko niyah, alatek mamicada to pikaolah no tao, soˈlin cowa ko hatatodong cingraanan, cipinangay cingra mamaapoh no olah ko niyah alatek, caayto ka matatodong ko pisaˈosi. Mihaenay, o limocedan no Sulam tanektekay ko harateng, malecad ‘o ˈadipel.’—Radiw ni Solomon 8:4, 10.
O pinengneng no miso to makakaolahay, coko malecaday to limocedan no Sulam a matenes han? Wa ngaˈay kiso pakayni i taneng a midemak, caay ka toor han ko harateng a midemak han? (Taneng 2:10, 11) Nolatekay, soˈlin caho ka tatodong kiso ciraramod, kawra paroeroen no tao kiso, ngaˈayto kiso cimamaolah saan. Alatek kiso ko mamiroero to niyah. Tinakoen, ano maˈaraw iso ko malakayatay a faˈinayan fafahiyan, malacafay romakat i, coko makalimay kiso ira ko pacafayay i tatihi han? O caay ka lecad ko pihakelongan a tamdaw maolah tisowanan, mamicada kiso han? O limocedan no Sulam itini makakaolahay a demakan iraay ko matenesay a pinengneng, wa ngaˈay malecad kiso cingraanan!
Odoˈ no Sinael
w15-CH 1/15 29 fiedac 3 fatac
O Ngangaˈay Tahadaˈoc ko Olah Han?
3 ˈOsien ko Radiw ni Solomon 8:6. O ‘marengrengay a namal ni Yihofa’ sanay a sowal marariday somowal to taˈangayay ko ˈicel no olah. O soˈlinay a olah o ‘marengrengay a namal ni Yihofa,’ samanen o hatiniay a olah mikitiniay Cingraanan a masadak. Paringian Ningra to Niyah a misangaˈ ko tamdaw, hato iraay ko inaneng no tamdaw maolah. (Satapangan 1:26, 27) Mikeridan no Kawas ko saka cecay fafahiyan ci Ifa, patayra i kaˈayaw no saka cecay faˈinayan ci Ataman, sano ˈolicay a pasowal ci Atam. Ci Ifa o nai tireng ni Atam a ‘sadaken,’ maedeng o ngaˈayay ingiden koni faˈinayan saan miharateng. (Satapangan 2:21-23) Pairaen ni Yihofa ko inaneng no tamdaw paihkal to olah, mihaen kalalaˈed no faˈinayan ato fafahiyan iraay ko tahadaˈocay a soˈlinay olah.
SAKA 11 FOLAD 24-30 ROMIˈAD
O ODOˈ KO KIMAD NO KAWAS ISAYA 1-2
O “Pakidemay ko Raraw” a Tamdaw Iraayho ko Hatokel
ip-1-CH 14 fiedac 8 fatac
Sidaˈitay a Wama ato Mitowakangay a Wawa
8 Padadotocay ci Isaya pasayra i Yuta kitakit mihadak to ciˈicelay a sapirikec: ‘Kamo o ciraraway a kitakit, o tatiihay o ˈantolay a finawlan, matefad kamo i raraw, miliyas kamo ci Yihofaan, misakahmaw to fangcalay Kawas no Israil, misiikor Cingranan.’ (Isaya 1:4) Adihayay ko raraw no Yuta kitakit, hato mapaekelay no karetengay a ˈinorong, itini romiˈad ni Apraham, masowalay ni Yihofa ko ‘pakidemay raraw’ no Sotom ato Komora. (Satapangan 18:20) Nohatini mahecaday ko pakayraan no finawlan no Yuta kitakit, samanen sowal ni Isaya ‘pakidemay ko raraw’ nangra sanay, “o tatiihay o ˈantolay a finawlan, matefad i raraw cangra.” Soˈlinayto, o finawlan no Yuta kitakit, mahecaday o wawa no ciraraway a tamdaw. ‘Misiikoran’ nangra ko Kawas, matira o pihongyak no Misalofan Faelohay Mihongyakan Fangcalay Cudad no Padaka. Cangra atoya sidaˈitay a Wama ‘masahciay ko kalaliyas’ nangra sanay.
ip-1-CH 28-29 fiedac 15-17 fatac
‘Masasaysay Kita to Pasangar i Kalalaˈed’
15 Ci Yihofa tano damsayay siniˈadaay a ngihaˈ a somowal. ‘Sowal ni Yihofa: “Ka tayni kamo masasaysay kita to pasangar no kalalaˈed, o pakidemay a raraw namo soˈlin matiya o macengelay no kahngangay, ngangaˈay matiya o soeda a kohcal; soˈlin samatiya sa o kahngangay ko cengel no kiradom, wa ngaˈay matiya o fanoh no siri a kohcal.”’ (Isaya 1:18) O satapangan a sowal nonini a sinael, mararaway ko pitadtad no tamdaw. Tinakoen, ‘macacoliˈ kita tatosa’ sanay ko roma pihongyak, hato o malecaday ko saaroˈan a tatosa macacoliˈ. ˈArawhan cowa ka haen! Awaay ko raraw ni Yihofa, pakayra toya misamangahay misafelitay a Israil tamdaw soˈlinay sidaˈitayto ci Yihofa cangranan. (Limoˈot 32:4, 5) O misowalan nonini a sinael i, patirengay ci Yihofa to masadafdafay pisawkit, hato tayniay ko Israil i hoing mitengil to sasawkit ni Yihofa.
16 Tengilen koniya demak alatek masakatalawan, aka mapawan, ci Yihofa o cisidaˈitay ato iraay ko siniˈadaay a hankang. Awaay ko mahaenay Cingraanan a makahi misodod to tamdaw. (ˈOlic 86:5) Edengan Cingra ngaˈ, ngaˈay mikorac to macengelay no kahngangay a raraw no Israil, malo o sano soedaay a kohcal. Ano samaamaanto ko tamdaw misaˈicel, micerid midemak to ngaˈayay, pacakat to sapatoˈaya, mitolon, cowa ko ngangaˈay pakafalah to kadit no raraw. Edengan tadiˈecen ko sasodod ni Yihofa, ngaˈ makorac ko raraw. Tooren no tamdaw ko misaˈosian no Kawas a palinian, naifalocoˈ a pasasiyor, ngaˈ ngaˈay tahacada to sasodod Ningra.
17 Tada kalimlaan konini a kimad, mansa tano mitemeray a sasowalen ci Yihofa miliyaw mitadtad tonini a demak: ‘Malecaday to macengelay no kahngangay a kiradom’ a raraw wa ngaˈay malo kohcalay fanoh no siri. Sapasifanaˈaw ci Yihofa kitaanan, ano mahapinang Ningra to mikifalocoˈay kita pasasiyor, soˈliˈlin o pakidemay a raraw ko midemakan ita, makahiay Cingra misodod. O cima ano pasangaray pakasoˈlin tonini a demak, ngaˈayay haratengen ko tinakoan ni Manasi. Halafinay a midemak cingra to kateliˈian no tamdaw a raraw. Nikawrira, ikor pasasiyoray cingra, misododanto no Kawas cingra. (2 Rayray 33:9-16) Sapifanaˈaw ci Yihofa to polong a tamdaw, mahawpay ko pakidemay ko raraw, iraay ko hatoki nohatini, ngaˈayho ‘masasaysay to pasangar nangra ato Kawas.’
Odoˈ no Sinael
ip-1-CH 39 fiedac 9 fatac
O Sefi ni Yihofa Kangodoen a Midama
9 Anini, o finawlan no Kawas cowa ka malisopsop i lotok. Itini tano fakelohan a patirengan a sefi midoko to Kawas. O fangcalay sefi ni Yihofa i Yirusalim itini Kongyen 70 miheca mapalaˈafoayto no sofitay no Loma. Roma i, ihkalay ko tarokos ci Pawlo a somowal, o fangcalay sefi i Yirusalim ato isalakatay a fangcalay kopang, o sapatinako aca kora. Mitaypiyaway to tadamaanay a midokoay a limasmas, oyanan ‘soˈlinay fangcalay kopang’ ko mitoroˈan, ‘o mipatirengan ni Yihofa konini cowa ko tamdaw ko mipatirengay.’ (Hipray 8:2) Onini pidokoan a fangcalay kopang, o pidokoan ci Yihofaan a limasmas, o pakayniay sapatefoc ni Yis Kristo a patirengen. (Hipray 9:2-10, 23) Mihaenay i, o mitoroˈan i Isaya 2:2 ‘o lotok no sefi ni Yihofa’ hananay i, mitaypiyaway to lintad no mita, o nika pisasoˈlin no tamdaw a midoko ci Yihofaan, o hatiniay a pidoko o mamacakat, o kakangodoen. O midopoay to soˈlinay pidoko a tamdaw malisopsopay to cecay kitiraan cowa ka saan, ao pakayniay i midokoay a pakayraan nangra a malacecay.
SAKA 12 FOLAD 1-7 ROMIˈAD
O ODOˈ KO KIMAD NO KAWAS ISAYA 3-5
Hamaan Saloyaen ko Pipahatatanam ni Yihofa
ip-1-CH 73-74 fiedac 3-5 fatac
Iraay ko Padiing no Caay ka Madimadi a Palosayan no Fadisosoˈ!
3 Tano radiw hananay ni Isaya paˈolic konini sapatinako hokira, onini sapatinako maedeng mikidatay to piharateng no tamdaw. Mafanaˈay ko ˈalomanay to mipalomaay to fadisosoˈ a tayal. Mahaenay to aniniay mipalomaay to fadisosoˈ, onini sapatinako a palosayan no fadisosoˈ, cowa tano sapal a mipaloma to fadisosoˈ, tano caˈangan a micoenek to “sangaˈayay” kilang no fadisosoˈ. Itiniay cingra i mapamatangay a taporo mipaloma to fadisosoˈ.
4 Mamisaˈicel wangaˈ adihay ko malitoday a fadisosoˈ. Somowal ci Isaya o tawki no palosayan no fadisosoˈ “karkaren ningra ko sera, falahen ningra ko fakeloh,” tada o karorayan a tayal! Tano taˈangayay a fakeloh “patireng to pikacawan.” Nolitenganho o pikacawan no misimaway tamdaw kora, milaoc to mitakaway ato mamasaksak no ˈaˈadopen. Tano fakelohan a miˈadipel, misafacal to palosayan. (Isaya 5:5) Ho caka mariˈriˈ no nanom.
5 Cowa ka rorayen ko tawki no palosayan no fadisosoˈ, halamhamay to aadihay ko heci no fadisosoˈ. Misangaˈayho cingra to pihetecan to fadisosoˈ, malaˈosiay kora pitala ningra han? Cowa, samanen o ˈacicimay ko heci nora fadisosoˈ.
ip-1-CH 76 fiedac 8-9 fatac
Iraay ko Padiing no Caay ka Madimadi a Palosayan no Fadisosoˈ!
8 ‘O kanonoˈan ako Tapang’ hananay ni Isaya ci Yihofa, oya tawki no palosayan no fadisosoˈ. (Isaya 5:1) Iraay ko ngaˈayay noka lalaˈed ni Isaya ato Kawas, mansa o kanonoˈan ako han ningra ko Kawas. (Nengnengen ko Yopu 29:4; ˈOlic 25:14.) Nikawrira, o Kawas pakayra to “palosayan no fadisosoˈ” Ningra, orira “mipalahadan” Ningra a kitakit,” o nika olah Ningra cangranan ikakaay ko nika olah no pairasolay to Kawasan.—Nengnengen ko Kasadakan 15:17; ˈOlic 80:8, 9.
9 Ci Yihofa itiniay i Kanan a “mipalahad” to kitakit Ningra, pafelien cangra to rikec Ningra. Onini rikec mahecaday o ˈadipel a misimaw cangranan caka manahol no kasakitakit. (Kasadakan 19:5, 6; ˈOlic 147:19, 20; Ifiso 2:14) Roma sa i, patirengan ni Yihofa ko kakitaan, saysi ato pairasolay a mipasifanaˈ cangranan. (2 Hongti 17:13; Malaki 2:7; Dmak 13:20) Ano malood no ˈada ko Israil i, palowadan ni Yihofa ko milidongay tamdaw. (Hipray 11:32, 33) Ngangaˈay ci Yihofa a patodicek a mihaen a milicay: ‘Pakayni to fadisosoˈ a palosayan no Mako, iraayho ko manan to caay ka demak Ako saw?’
w06-CH 6/15 18 fiedac 1 fatac
‘Midimokos Tonini Fadisosoˈ a Kilang’!
Palinian ni Isaya ko ‘Israil’ to palosayan no fadisosoˈ, onini a omah ciheciay to ‘ˈacicimay a fadisosoˈ,’ maponiˈay a heci. (Isaya 5:2, 7) O ˈacicimay a fadisosoˈ mimingay ko heci, sahtoay o palok cowa ka ngaˈay kaenen, cowa ka ngaˈay saepahen. Mihaenay i, mitaypiyaway ko ˈacicimay a fadisosoˈ to mitowakangay a Israil kitakit. O mararaway a demak ko heci nangra, awaay ko moecelay a demak. Awaay ko epoc noka ciheci no Israil kitakit, cowa ko raraw noya palahaday a Yihofa konini. To saka iraaw no ngaˈayay a heci nonini kitakit, misaˈicelayto ci Yihofa midemak. Hato mihaenay Cingra misalalicay: ‘Pakayni to palosayan no fadisosoˈ Ako, iraayho ko maanan caay ka mademak Ako saw?’—Isaya 5:4.
w06-CH 6/15 18 fiedac 2 fatac
‘Midimokos Tonini Fadisosoˈ a Kilang’!
Onini Israil, o awaay ko ngaˈayay heci a fadisosoˈ a kilang, mankora mirikecan ni Yihofa cangra: Papelaˈen ni Yihofa ko fakeloh a ˈadipel, tatodong i, caayto ko dadipoten cangra; caayto ka madimokos no Kawas ko Israil, matira o caay ka mahadimel a fadisosoˈ, awaay ko mipamatangay. Caayto ka tefad ko ˈorad, marengawayto ko cisemotay a lengos.—Isaya 5:5, 6.
Odoˈ no Sinael
ip-1-CH 80 fiedac 18-19 fatac
Iraay ko Padiing no Caay ka Madimadi a Fadisosoꞌ a Kilang!
18 O sera no nolitengan Israil sahtoay oni Yihofa. Kahacecay a paro no lomaˈ mikitiniay ci Yihofaan a milayap to sera, malo hafay nangra. Ngaˈayay pacaliwen nangra ko sera, kawra caay ka ngaˈay ‘paliwalen.’ (Lifi 25:23) Onini sarikec mikecengay a mipaliwal to sera, sapidipotaw to paro no lomaˈ caka manikaw. ˈArawhan o romaroma Yutaya tamdaw awaay ko tolas no ˈanof, misafelitay tonini pakayniay i hafay a sarikec no Kawas. Sanay ci Mika: ‘Ano mangalay cangra to omah i, ˈafas han nangra. Ano mangalay cangra to lomaˈ i, ˈafas han nangra a maroˈ. Misaˈfitay to tamdaw cangra ato paro no lomaˈ, misakaniway cangra to tamdaw ato hafay nangra.’ (Mika 2:2) Sanay mirikec ko Taneng 20:21: “O rahodayay a mirocokan a dafong i, caay ko sakalemed a tahatolas.”
19 Onini maˈanofay a tamdaw tano mararaway a pakayraan milipalaw to hafay, o papatikolen ni Yihofa miˈafas. O miˈafasan nangra a lomaˈ ‘awaay ko tamdaw mikilomaˈ.’ O nano ˈanof nangra a mialaan a sera wa miming ko kina ira no pinaloma. Onini a saˈkak sasamaan ato hacowa a malaˈosi, caka somowal ko sinael, kawra awaawa sa i, itini kalaholiw no Israil tamdaw tayra i Papilon wa itiya malaˈosi.—Isaya 27:10.
SAKA 12 FOLAD 8-14 ROMIˈAD
O ODOˈ KO KIMAD NO KAWAS ISAYA 6-8
‘Ini Kako! Ocoren Kako!’
ip-1-CH 93-94 fiedac 13-14 fatac
Iraay Tayni i Fangcalay Sefi ci Yihofa
13 Kalacafayen ita ci Isaya mitengil. ‘Matengil ako ko ngihaˈ ni Yihofa, sowal sa:“Cima ko aocoren Ako? Cima ko mamakahi patado tamiyanan tayra hani?” Pacaˈof kako: “Ini kako! Ocoren kako!”’ (Isaya 6:8) Tona awaay ko romaroma pairasolay itira i mapolosi, mankora ci Yihofa ko milicayay ci Isayaan, minengneng to sasamaan ko pipacaˈof ningra. Mingitangitan ni Yihofa mitahidang ci Isaya malo tarokos Ningra. Kawra hano milicay ci Yihofa: ‘Cima makahi patado tamiyanan aki?’ Aeca ka Kako saan hani? Paihkalay konini to iraay ko roma i tatihi Ningra. Cima cingra hani? Cowa koya foseniˈan Wawa Ningra hokira? Onini Wawa ikor malo tamdaway, ci Yis cingra. Soˈlinay haw i, na pasowalan no Kawas koya Wawa: ‘Paringien ita i kitanan a misangaˈ to tamdaw.’ (Satapangan 1:26; Taneng 8:30, 31) Hayi, ora foseniˈan a Wawa ni Yihofa mikalacafayay Cingranan itini i kakarayan.—Yohani 1:14.
14 Cowa ka pinayar ci Isaya eca ka pacaˈof! Caay ka pisaharaterateng tora lihaf, tangsolay a pacaˈof: ‘Ini kako! Ocoren kako!’ Cowa ka pilicay cingra, micada toniya ˈinorong wa ira ko maanan a halifon. O hatiniay mikifalocoˈay makahi a harateng patirengay to ngaˈayay taˈarawan no aniniay sikawdan no Kawas. Micadaay cangra to limoˈot milasil to ‘ngaˈayay lihaf no Hongti Kitakit, mitenak i paro no kakarayan.’ (Matay 24:14) Soˈlin caka olah ko ˈalomanay tamdaw mitengil, mitodongay cangra ci Isayaan, madimadi milahci to ˈinorong no niyah, misetek to falocoˈ ‘milahci to misawacayay i kalo kitakit’ a tayal. Malecaday cangra ci Isayaan, iraay ko pakasoˈlinay falocoˈ timolo talaˈayaw, mafanaˈay o mikitiniay saˈakawangay ko fadangalan a ˈinorong konini.
ip-1-CH 95 fiedac 15-16 fatac
Iraay Tayni i Fangcalay Sefi ci Yihofa
15 Nohatini pasowalan ni Yihofa ci Isaya tora lihaf ato piharateng no tamdaw: ‘Olili, pasowalen ko finawlan: “Ano mitengitengil kamo i, caay ko mamafanaˈ kamo a mitengil, ano samaamaanen namo ko pinengneng i, caay ko mamahapinang namo ko minengnengan namo han a somowal.” Apaen ko falocoˈ nonini a finawlan ta caay ka fanaˈ cangra a miharateng, doˈengen ko tangila nangra ta caay pakatengil cangra, pohawen ko mata nangra ta caay pakaˈaraw cangra, cowa ka fanaˈ ko falocoˈ nangra, caay pasasiyor cangra, caay ko mamaadah.’ (Isaya 6:9, 10) Tatodong nonini sowal i, milokesay ato patodicek sanay ko sowal ni Isaya, mapiliˈ to Yutaya tamdaw, papikariˈang to kalalaˈed nangra aci Yihofaan han? Co:wa! O finawlan ni Isaya cangra, o salikaka ako hananay ni Isaya minengneng cangra. Kawrira paliˈayaway ci Yihofa somowal, ano samaanto madimadi ci Isaya milahci to ˈinorong, cowa ko mamikihar ko finawlan tora lihaf.
16 O raraw no finawlan konini. Saliyaliyaw hananay ni Isaya pasowal cangra, caay ka kahi cangra micada tonini lihaf, caay ka sakacipinangaw to tatodong nonini a lihaf. Saˈatekak sanay maapa ko falocoˈ no ˈalomanay, malecaday o madoˈengay. Saliyaliyaw sa ci Isaya miˈaraw cangranan, kawra caay pitemer ko falocoˈ ‘nonini finacadan,’ paihkalay to caay ka kahi cangra to sakacipinangaw. Miˈedefan nangra ko ponoˈ ato falocoˈ no niyah, caay ka kahi micada to lihaf ni Isaya.—Soˈlinay haw i, o lihaf no Kawas konini. O aniniay tamdaw coko mahaenay han? Padotocay milasil ko Misawacayay Tamdaw ni Yihofa to airato ko Hongti Kitakit no Kawas a lihaf, ˈarawhan manaˈayay mitengil ko ˈalomanay tamdaw.
ip-1-CH 99 fiedac 23 fatac
Iraay Tayni i Fangcalay Sefi ci Yihofa
23 Sakadademakan ni Yis ko sowal ni Isaya, paihkal to mamalaˈosi ko sapairasol ni Isaya i romiˈad ningra. O falocoˈ no itiyaay tamdaw malecaday to i lintaday ni Isaya a Yutaya tamdaw. Mahaenay o madoˈengay tamdaw cangra, caay pikihar to lihaf ni Yis, mansa citodongay to papalaˈafoen cangra. (Matay 23:35-38; 24:1, 2) Kongyen isaka 70 miheca, ci Titus tapang no sofitay no Loma iraayto milood to Yirusalim, misapayan a palaˈafo ko niyaroˈ ato fangcalay sefi. Kawrira, iraay ko mitengilay to sapasifanaˈ ni Yis, malo nisawawaan ningra. O ‘malemeday’ tamdaw cangra sanay ci Yis. (Matay 13:16-23, 51) Pasowalan ningra cangra, ano maˈaraw nangra ‘maˈalikot no sofitay ko Yirusalim’ i, kapilaliw cangra ‘tayra i lotok a milimek.’ (Luka 21:20-22) Mihaenay haw i, onini ‘makoracay a teloc’ mamalidongto. Mitawmecay to pasoˈlinay falocoˈ cangra. Malikakawa malo noˈadingoan a kitakit cangra, oyanan ‘Israil no Kawas’ cangra.—Kalatiya 6:16.
Odoˈ no Sinael
w06-CH 12/1 9 fiedac 4 fatac
Kalimlaan no Isaya Cudad—Saka 1
7:3, 4—Hano lidongen ni Yihofa koya mariˈangay a Hongti ci Ahac? O hongti no Siriya ato hongti no Israil misahalakaay to sapifelihaw to Hongti no Yuta ci Ahac, patireng to roma a wawa ci Tapiil mikowan to Yuta kitakit, cowa ko teloc ni Tafiti konini tamdaw. Onini misahalakaan ni Akoma Satan mamiconged to sakalaˈosiaw no katatelek no Kawas aci Tafiti a sakiˈok no Hongti Kitakit. Sakalidongen ni Yihofa ci Ahac sa i, sapiterekaw to lalomaˈan ningra, hongaˈ oya mikiˈokan a ‘dipayalay ˈaˈideman’ ngaˈayto a masadak.—Isaya 9:6.
SAKA 12 FOLAD 15-21 ROMIˈAD
O ODOˈ KO KIMAD NO KAWAS ISAYA 9-10
Wa Ira ko ‘Tadamaanay a Likat’ Masadak!
ip-1-CH 125-126 fiedac 16-17 fatac
Dipayalay ˈAˈideman
16 O paliˈayawan ni Isaya a ‘noikoran’ o mitoroˈan i, ya itini fafekang no sera ci Yis midemak to mitosilay a tayal a tatokian kora. O kaˈorip ni Yis i fafekang no sera, adihayay a toki materekay i Kalili. Itini Kalili misatapang cingra to mitosilay a tayal, itiraay a milasil cingra ‘mangataayto ko ikakarayanay a Hongti kitakit.’ (Matay 4:17) Itiniay cingra i Kalili mihadak to Sapasifanaˈ i Lotok, mipiliˈ to tarokos, midemak to sakacecay kafahkaˈan a demak, ikor no patikol maˈorip paˈaraw to 500 nisawawaan. (Matay 5:1–7:27; 28:16-20; Marko 3:13, 14; Yohani 2:8-11; 1 Korinto 15:6) Pairaan ni Yis ko ˈdil no Cipulun ato Naftali a pala, malaˈosiayto ko sapairasol ni Isaya. Manaokaniw, cowa aca ko Kalili a tamdaw ko mitosilan ni Yis, miˈdefan ni Yis milasil ko ngaˈayay lihaf itini Palestan, ho malifok no polong a Israil tamdaw ko ˈdil, ano Yutayato malifokay ko ˈdil.
17 Masowalay ni Matay ko ‘tadamaanay a likat’ no Kalili, o manan ko mitoroˈan nonini hani? Onini a sowal naitiniay i sapairasol ni Isaya. Sanay ko sowal ni Isaya: ‘Oya romakatay i toˈemanay a finawlan i, pakaˈarawto to tadamaanay a likat. Oya maroˈay i lidong a tamdamdaw i, mapaˈdilto cangra anini.’ (Isaya 9:2) Tahinito saka 1 hahekalan, o tadamaanay a likat no soˈlinay kimad matahepoayto no mararaway a sasowalen no kalodoyongan. Mitongalay to nika pakidem no pasangar i, o ˈaˈideman no Yutayakiyo kiemelay to pinangan no pihakelongan nangra, ‘mipalasawad to sowal no Kawas.’ (Matay 15:6) O kalo a finawlan mikotoday to ‘mapohaway a mikeriday,’ tada maroeroay cangra, cowa konini aca, marariday a maorat no tamdaw cangra. (Matay 23:2-4, 16) Irato masadak ci Misiya Yis i, o nafalocoˈan no ˈalomanay finawlan fahal sanayto mafohat. (Yohani 1:9, 12) O sapairasol ni Isaya tano ‘tadamaanay a likat’ hananay a somowal to nano demak ni Yis i fafekang no sera, ato mipairaan a sapalemed no pikinafalah ningra, tada matatodongay konini.—Yohani 8:12.
ip-1-CH 126-128 fiedac 18-19 fatac
Dipayalay ˈAˈideman
18 O maolahay toniya tadamaanay a likat a tamdaw, iraay ko lalangian a lipahak. Padotocay pasowal ci Isaya: ‘Paˈalomanan Iso ko tamdaw nonini kitakit, lipahakayto ko polong a tamdaw. Lipahak cangra itini kaˈayaw Iso, matiya o lipahak no mipanayay ato lipahak no misakilacay to niˈafasan nangra i kalaloodan a dafong.’ (Isaya 9:3) O mitosilay a tayal ni Yis ato mikotoday cingranan a tamdaw, masolotay ko soˈliˈlinay ko falocoˈ a tamdaw, oniya tamdaw makalimay mikifalocoˈ midoedo to soˈlinay kimad a midoko ci Yihofaan. (Yohani 4:24) Lalomaˈ no sepat miheca, ˈalomanayto ko mihakelongay to Kristokiyo a tamdaw. Kongyen isaka 33 miheca a Kocinsic, toloay caˈol ko micadaay to paputisem a tamdaw. Caka halafin, pakasoˈlinay a faˈinayan aca, maedeng ‘limaay a caˈol’ ko kaˈaloman. (Dmak 2:41; 4:4) Fanekfekay ko nisawawaan milasil to ˈdil no soˈlinay kimad, telocto i, ‘ˈalomanayto ko nisawawaan i Yirusalim, o ˈalomanay saysi midofdofay tonini pihakelongan.’—Dmak 6:7.
19 Maˈaraw no mikotoday ci Yisan ko katongal no pakasoˈlinay a tamdaw, maedeng lipahakay ko falocoˈ, matiya o kalipahak no kadofahay ko mipanayan a tamdaw, anca malowidto ko pilood, mililam to matekesay a dafong a lipahaken. (Dmak 2:46, 47) Maraod ko toki, wa patedien ni Yihofa ko roma finacadan a tamdaw. (Dmak 14:27) Oranto i, o kalo kitakit kalo finacadan a tamdaw o lalipahakto, samanen wa ngaˈayto cangra miingid ci Yihofaan.—Dmak 13:48.
ip-1-CH 128-129 fiedac 20-21 fatac
Dipayalay ˈAˈideman
20 Malecad o nano sowal ni Isaya, o midemakan ni Misiya iraay ko midaˈocay a noka pifiyor: “Nawhani mapelpelto Iso ko nano niˈorongan nangra a taloˈodan. Mapitekto Iso ko sasetiˈ no misetiˈay i cangraan. Malowidto Iso ko mipaekelay to finawlan Iso a ˈada, a matiya o pilowid Iso i ˈa:yaw to sofitay no Mitiyan.” (Isaya 9:4) ˈAyaw no romiˈad ni Isaya to pina hahekalan, o Mitiyan tamdaw ato Moap tamdaw malacafayay a mihalaka tano misaˈfitay a pakayraan mikayhid to Israil tamdaw a mararaw. (Saˈosi 25:1-9, 14-18; 31:15, 16) Ikor, itini pito miheca a tatokian, marariday ko Mitiyan a tamdaw miˈafas to niyaroˈ ato omah no Israil tamdaw, macariraway to romiˈamiˈad cangra. (Kakitaan 6:1-6) Kawra, misakadademakan ni Yihofa ko sikawdan Ningra ci Kitiyon mipeleng to sofitay no Mitiyan. Ikor no ‘mapeleng ko Mitiyan,’ o finawlan ni Yihofa cowato picada to roray naitini i Mitiyan a tamdaw. (Kakitaan 6:7-16; 8:28) Cato ka halafin, ci Yis Kristo o mamidemak to kafahkaˈan a demak, palahdaw to polong a ˈada no finawlan ni Yihofa anini. (Paˈarawan 17:14; 19:11-21) Mihaenay i, matiya o ‘pipeleng to Mitiyan a tamdaw,’ mitiˈeray ci Kristo to taˈangayay ˈicel ni Yihofa, ao cowa ka pitiˈer to ˈicel no tamdaw, masahciay ko nika pakalowid. (Kakitaan 7:2-22) O finawlan no Kawas tahadaˈoc cowato ko mamaroero no ˈada!
21 Itini toniya lalood paihkalay ko Kawas to ˈicel Ningra, kawra cowa ko miowingay to lalood. Patikol maˈorip ci Yis o dipayalay a ˈaˈideman, papalaˈafoen ningra ko ˈada, patireng to midaˈocay a dipayal. Sowal ni Isaya, o kihcod sapilood a lalosidan tatano namalen a mitodoh: ‘Romakat ko sofitay mingerngeray to sera a cokap, macengelay no remes a sapilood a rikoˈ, mamatiya o kasoy a matodoh.’ (Isaya 9:5) Ano romakat ko sofitay pairaan no cokap a ngernger wa awato. Oya macengelay no remes a rikoˈ i kalalood, awato maˈaraw. Aawato ko lalood itini toniya hekal!—ˈOlic 46:9.
Odoˈ no Sinael
ip-1-CH 130 fiedac 23-24 fatac
Dipayalay ˈAˈideman
23 O citanengay a palimoˈotay a tamdaw hananay i, o mihadakay to sapaini ato saparikec a tamdaw. Itiniho i fafekang no sera ci Yis i, o sapalimoˈot ningra to tamdaw tada mikiriwiˈay. Sowal no Fangcalay Cudad: ‘Safahkaˈ sa ko finawlan a mitengil to sapasifanaˈ ningra.’ (Matay 7:28) Citanengay ato iraay ko siniˈada ningra palimoˈot a pasifanaˈ to tamdaw, pafeselay ko nika cipinang ningra to pinangan no tamdaw. Ano palimoˈot cingra to tamdaw i, cowa ka sahto sa o mirikecay ato mikapoˈiay to tamdaw. Itini adihayay tinakoan, mihadakay cingra to sapasifanaˈ ato sidaˈitay a sapalimoˈot. O sapalimoˈot ni Yis tada mikiriwiˈay, samanen o sapalimoˈot ningra o citanengay, matatodongay, ngaˈayay tiˈeren. Ano tengilen no tamdaw midofdof ko limoˈot ningra, o mamilayap to midaˈocay ˈorip.—Yohani 6:68.
24 O sapalimoˈot ni Yis cowa ko nika citaneng no tangal ningra. Sanay cingra: “O sowal ako a pasifanaˈ i tamowanan i, caay ko no mako, o no miocoray i takowanan a Kawas.” (Yohani 7:16) Matiya ci Solomonan ci Yis, o taneng ningra mikitiniay i Kawas ci Yihofaan. (1 Hongti 3:7-14; Matay 12:42) I kasakopang no Krisciyang, o pasifanaˈay anca palimoˈotay a tamdaw oha mamakowad no taˈarawan ni Yis, mamitoor to kimad no Kawas a pasifanaˈ.—Taneng 21:30.
SAKA 12 FOLAD 22-28 ROMIˈAD
O ODOˈ KO KIMAD NO KAWAS ISAYA 11-13
Pakayni ci Misiyaan, Samaanay ko Sowal no Fangcalay Cudad?
ip-1-CH 159 fiedac 4-5 fatac
Itini Pikowan ni Misiya Milifok to Salidong ato Lipahak
4 ˈAyaw ni Isaya to pina hahekalan, o mitiliday to Fangcalay Cudad paliˈayawto a somowal wa ira ci Misiya a tayni, hanaca wa ocoren ni Yihofa koniya soˈlinay a ˈaˈideman tayra i Israil. (Satapangan 49:10; Limoˈot 18:18; ˈOlic 118:22, 26) Nohatini pakaynien ni Yihofa ci Isayaan mihadak to adihayay sapitadtad. Mitiliday ci Isaya: ‘O niletekan a kilang ni Yisi mamasadak ko cengoˈ, o masadakay i fafekang no lamit ningra a faelohay cengoˈ o caciheci to losay.’ (Isaya 11:1; nengnengen ko ˈOlic 132:11.) “Cengoˈ” ato “faelohay a cengoˈ” oniya tosa sowal pahapinangay, ci Misiya wa pakayni i wawa ni Yisi ci Tafitian a mihofocan a teloc. Ci Tafiti o mapasimalay a hongti no Israil. (1 Samuil 16:13; Yirimiya 23:5; Paˈarawan 22:16) Ano irato ko soˈlinay a Misiya i, onini pakayniay i lalomaˈan ni Tafiti hofocen a “faelohay a cengoˈ” oha caciheci to makapahay a losay.
5 Ci Yis o mikiˈokan a Misiya. O mitiliday to Ratoh a Cudad ci Matay somowalay to malaˈosiayto ko sowal no pairasolay i ci Yisan, o “Nacali a tamdaw” hananay cingra. Misowalan itira no pairasolay, o Isaya 11:1 a sowal. Tona itiniay ci Yis i Nacali a lomahad, o “Nacali a tamdaw” han cingra, o matatodongay konini. O “faelohay a cengoˈ” sanay a Hipray sowal milingatay to Isaya 11:1.—Matay 2:23; Luka 2:39, 40.
ip-1-CH 159 fiedac 6 fatac
Itini Pikowan ni Misiya Milifok to Salidong ato Lipahak
6 O mamalo masamaanay a hongti ci Misiya hani? Wa malecad cingra toya palaˈafoay to mamoetep a ngasaw no Israil a hongti no Asiriya, mariˈang awa ko olah, sao haratengay sa ko pidemak han? Cowa ka hatira. Pakayni ci Misiyaan, sanay ko sowal ni Isaya: ‘O fangcalay saocor ni Yihofa padotocay i tireng ningra, ira to taneng ato sakacipinang ningra, mafanaˈay palimoˈot, taˈangayay ko ˈicel, iraay ko kadofahay a sifanaˈ, tangongol ko nika ngodo ci Yihofaan. O sakalipahak ningra ko nika ngodo ci Yihofaan.’ (Isaya 11:2, 3a) Ci Misiya cowa ka tano simalen a minilnil, ao tano fangcalay saocor no Kawas a nilnilen cingra. Micada ci Yis to paputisem i, maˈaraway no mipaputisemay a Yohanian, sano topiay ko fangcalay saocor no Kawas matefed i tireng ni Yis. (Luka 3:22) Iraay ko taneng ato sakacipinang a inaneng ni Yis, mafanaˈay palimoˈot pasifanaˈ to tamdaw, taˈangayay ko ˈicel, kadofahay ko sifanaˈ. Onini a mikiriwiˈay capeling ningra misawacayay soˈlinay ‘materek i tireng ningra’ ko fangcalay saocor ni Yihofa. O tadamaanay a hongti aira ko mahaenay a capeling wangaˈ!
ip-1-CH 160 fiedac 8 fatac
Itini Pikowan ni Misiya Milifok to Salidong ato Lipahak
8 Misamaanay ci Misiya mikangodo ci Yihofaan hani? Cowa ka kokiˈ ci Yis to Kawas, matalaw to sapirikec Ningra. Oya mangodoay a falocoˈ ni Misiya to Kawas i, o pakayniay i ciolahay falocoˈ mikangodo. Mangodo ko tamdaw to Kawas, malecad ci Yisan, ano hacowato a toki ‘mamidemak to kahemekan no Kawas a demak.’ (Yohani 8:29) O sowal ato waywayan ni Yis paihkalay, to romiˈamiˈad mikangodo ci Yihofaan a dademak, o sakalipahak no tamdaw konini a demak.
ip-1-CH 161 fiedac 9 fatac
Itini Pikowan ni Misiya Milifok to Salidong ato Lipahak
9 Paliˈayaway ci Isaya somowal pakayni ci Misiyaan: ‘Misawkit cingra caay pakayni i maˈaraway, mirikec to tamdaw caay pakayni i matengilay aca.’ (Isaya 11:3b) Ano itini kiso i hoing mitengil to sasawkit i, coko mamahemek kiso to iraay ko mahaenay a hankang moecel ko pisawkit tisowanan han? O misayfangay ci Misiya to polong a tamdamdaw, cowa ko mamasawi no awaay ko wacay a demak, cowa ko mamasaˈfit no misafakofakoay a mipakokotay. Cowa ko papakayni i matengilay aca sowal a misaˈosi, cowa pikihar to cipayciay a tamdaw. Mataˈeselay a mahapinang ningra ko misaˈfitay a demak, cowa ko mamisakakinih to tadancaay a tamdaw. Micalepay mihapinang to ‘ikemoday a waywayan no tamdaw.’ (1 Pitiro 3:4) Patirengay ci Yis to tadamaanay a taˈarawan no ciˈinorongay misawkit i kasakopang no Krisciyang a tamdaw.—1 Korinto 6:1-4.
ip-1-CH 161 fiedac 11 fatac
Itini Pikowan ni Misiya Milifok to Salidong ato Lipahak
11 Ano misalof a parikec ci Yis to nisawawaan i, oya saka ciepocaw no nisawawaan ko maharatengay. Malohemay malitengay no kasakopang mamitodong tonini makapahay a taˈarawan. Kawrira, oya mananamay midemak to mararaway i, mamicada to pakidemay a sasawkit. Ano micihi ko Kawas to raraw nonini a lekakawa i, ci Misiya o ‘tatano marad mipeleng cangranan,’ pasayra toya mararaway a tamdaw milasil to sakalaˈafo a sasawkit. (ˈOlic 2:9; nengnengen ko Paˈarawan 19:15.) Wa palahdawen ko mararaway a tamdaw, cowato ko mamipalak to dipayal no tamdaw. (ˈOlic 37:10, 11) O moecelay ko sapifakec ni Yis to tatelecan, o madimadiay ko hatelec, mansa o aira ko ˈicel milahci tonini a ˈinorong.—ˈOlic 45:3-7.
Odoˈ no Sinael
ip-1-CH 165-166 fiedac 16-18 fatac
Itini Pikowan ni Misiya Milifok to Salidong ato Lipahak
16 Malaˈosiay ko pikayhid ni Satan ci Atam aci Ifaan mitowakang ci Yihofaan, telocto i, saˈayaw itiniay i Itin maˈodis ko matatodongay a pidoko. Tahanini, caay ka sapisawadaw ci Satan. O patosokan ningra o sapaliyasaw to ˈalomanay tamdaw i Kawas. Nikawrira cowa ko papakomira han ni Yihofa malahdaw ko matatodongay noka pidoko i fafekang no sera. Milingatay to fangcalay ngangan Ningra konini a demak, hanaca ciharatengay Cingra to midokoay Cingranan a tamdaw. Mihaenay i, pakaynian Ningra ci Isayaan a mikiˈok ko misemeray to falocoˈ no tamdaw a sakiˈok, sanay: ‘Ano maraodto koya romiˈad i, lalomowad ko lamit ni Yisi, malo sapitahidang to tamdamdaw a tektek. Kasakitakit a tamdaw misalalicayay cingranan, o pipaselaˈan ningra a kitiraan wa ira ko ˈdil.’ (Isaya 11:10) ˈAyaw no Kongyen isaka 537 miheca, o mipatirengan ni Tafiti a Yirusalim niyaroˈ malo sapitahidang to tamdamdaw a hecek, palisopsop to maliwasakay a madimadiay a Yutaya tamdaw minokay i nalacolan, miliyaw patireng to fangcalay sefi.
17 Nikawrira, o mitoroˈan no sapairasol o ikakaay masakalimlaan a demak. Mikitini i sawni malengoay a lalakaw, maˈaraway ita, onini sapairasol wa mamalaˈosi itini pikowan no soˈlinay a ˈaˈideman ci Misiya a tatokian, misaka dademakan ni Pawlo ko Isaya 11:10 paihkal, itini romiˈad ningra, o kalo kitakit a tamdaw wa ira ko saaroˈan i kasakopang no Krisciyang. Misakadademakan ningra ko Mihongyakan no 70 a Tamdaw a sinael: ‘Sanay ko sowal ni Isaya: “Noikor wa ira ko lamit ni Yisi, mamikowan to kalo kitakit cingra. O kalo kitakit a tamdaw halamhamay mitala cingranan.”’ (Loma 15:12) Cowa konini aca, iraayho ko mamalaˈosi a sapairasol. Anini, o kalo kitakit a tamdaw mikifalocoˈay maolah ci Yihofaan, misarocoday midama to manilnilay no fangcalay saocor a salikaka ni Misiya, pakayni ko pipaihkal to malaˈosiay ko sapairasol ni Isaya i romiˈad no mita.—Isaya 61:5-9; Matay 25:31-40.
18 Itini no aniniay a kalaˈosi, misowalan ni Isaya a ‘oya romiˈad,’ mitoroˈan i, mikitini 1914 miheca, mala Hongtiayto ci Misiya i kakarayanay a Hongti Kitakit no Kawas. (Luka 21:10; 2 Timoti 3:1-5; Paˈarawan 12:10) Mikitiya misatapang i, ci Yis Kristo malo tahapinangan a hecek, o ihkalay a tahapinangan, palisopsop to noˈadingoan a Israil tamdaw atoya hinatalaay to moecelay mirikecay a sifo a kasakitakit a tamdaw. Itini i sakayat ni Misiya, mapatenakayto i kasakitakit kasafinacadan ko ngaˈayay lihaf no Hongti Kitakit no Kawas, matiraay to mipaliˈayawan ni Yis a sowal. (Matay 24:14; Marko 13:10) Tada ciˈicelay koniya ngaˈayay lihaf. Mikitini kasakitakit kasafinacadan, iraay ko taˈangayay ˈopo ‘caay ko mamasaˈosi’ ko kaˈaloman a tamdaw pasayra ci Misiyaan a minokay, kalacafay toya maˈosaway a mapanilnilay no fangcalay saocor a tamdaw misaˈicel a micowat to soˈlinay pidoko. (Paˈarawan 7:9) ˈAloman ˈalomanayto ko faelohay tamdaw micawmaˈ to maˈosaway a mapanilnilay no fangcalay saocor a tamdaw, micomod i noˈadingoan ‘pitolonan a sefi’ ni Yihofa, telocto i, oya ‘paselaˈan kitiraan’ ni Misiya, tadamaanay a noˈadingoan a fangcalay sefi no Kawas, matongal matongalayto ko ˈdil.—Isaya 56:7; Hakay 2:7.
SAKA 12 FOLAD 29–1 FOLAD 4 ROMIˈAD
O ODOˈ KO KIMAD NO KAWAS ISAYA 14-16
Misaadaˈ to Finawlan no Kawas, Oha Mamasayfang
ip-1-CH 180 fiedac 16 fatac
Mipadikan ni Yihofa ko Misatakaraway a Niyaroˈ
16 O Papilon itini ˈAyaw no Kongyen 539 miheca cowa ka tangsol sa malahorac. Soˈlin mahaen, kamayan ihkal a mahapinang ita anini, o misowalan ni Isaya pakayni i Papilon a sapairasol malaˈosiay maemin. O cecay mitadtaday to Fangcalay Cudad sanay ko sowal: “Halafinayto a hahekalan, tahanini, kamayan mahorac ko Papilon, icowacowa sahtoay o mapelalay a patipatih.” Sanayho ko sowal ningra: “Maˈaraw konini i, maharatengay no tamdaw ko sapairasol ni Isaya aci Yirimiya, soˈlinayto malaˈosi maemin.” Itini romiˈad ni Isaya, awaay ko tamdaw to talaˈayaway a pakaˈaraw to kalaˈafo ato kahorac no Papilon. Hanaca, maherek mitilid to Isaya cudad ikor no 200 miheca, itiya sanayho maˈafas no Mitiya tamdaw ato Pirsiya a tamdaw ko Papilon! O kasongilaˈ nira malahorac ikor no pina hahekalan ngaˈ mafekaday. Onini a kihcod coko paˈicelay to pakasoˈlinay falocoˈ no mita, padama kitanan pakasoˈlin to, o patemeran no Kawas ko Fangcalay Cudad han? (2 Timoti 3:16) Ano palaˈosianto ni Yihofa ko adihayay i ˈayaway a sapairasol, o tatanektek ko pakasoˈlin ita, o cowaho ka laˈosi a sapairasol no Fangcalay Cudad wa itini misaˈosian no Kawas a tatokian malaˈosi maemin.
ip-1-CH 184 fiedac 24 fatac
Mipadikan ni Yihofa ko Misatakaraway a Niyaroˈ
24 O hongti i rayray no lalomaˈan ni Tafiti, o foˈis hananay no Fangcalay Cudad a patinako. (Saˈosi 24:17) Mikitini ci Tafitian misatapang, oniya “foˈis” itiniay i Cion a Lotok a mikowan. Mapatireng ni Solomon ko fangcalay sefi i Yirusalim ikor, oniya Cion sanay a ngangan mitaypiyaway to polong Yirusalim a niyaroˈ. O saˈosi no Rikec, polong a faˈinayan no Israil to mihecahecaan kinatolo tayra i Cion. Mankora, o Cion malo “kasaˈopoan a lotok.” Misetekay to falocoˈ ci Nipukatnicar to sapiloodaw to hongti no Yuta, mikitini i Cion a Lotok milaplap cangranan, o pidemak ningra o sapisalaenoaw to “foˈis” no Kawas. Mipadikan ningra ko hongti no Israil, cowa panokayen ningra ko ˈdil ci Yihofaan, tada misatakaraway cingra caay pisikor to Kawas, sapilecadaw to saaroˈan ni Yihofa.
ip-1-CH 189 fiedac 1 fatac
O Saˈosi ni Yihofa wa ˈOdisen ko Kasakitakit
SAKADADEMAKAN ni Yihofa ko kasakitakit mirikec to mararaway a finawlan Ningra. Kawrira, soˈlin hatira, o pikariˈang no kasakitakit, pisaˈada to soˈlinay a pidoko, cowa ko papakoniraen Ningra. ˈAyaw no mamitefoc to Papilon, paliˈayawayto Cingra patemer ci Isayaan papitilid ‘pakayni to lihaf i Papilon.’ (Isaya 13:1) Kawra, itiya caayho ka piˈodis ko Papilon to Yuta kitakit. Toya lintad ni Isaya, oya katatelekan no Kawas a finawlan miroeroan no Asiriya. Palaˈafoan no Asiriya ko kaˈamisan a Israil kitakit, misakasakanho ko pala no Yuta kitakit. ˈArawhan, citolasay ko pilowid no Asiriya. Sanay ko sowal ni Isaya: ‘O kakeridan no ikakarayanay a sofitay ci Yihofa sanay ko sowal: “Caay ka eca ka lahcien Ako ko nisahalakaan Ako a demak, lahcien Ako ko dademaken Ako. O tatekopen Ako a palasawad i sera Ako ko Asiriya a tamdaw, o sasakasaken Ako cangra i lotolotokan Ako. O tatedalen Ako ko sapalit no Asiriya to finawlan Ako a lonayiˈ, o mamatefadto ko karetengay a ˈinorong nangra.”’ (Isaya 14:24, 25) Somowal ci Isaya to ifafekangay a sapairasol ikor, malahdawayto ko piˈodis no Asiriya to Yuta kitakit.
ip-1-CH 194 fiedac 12 fatac
O Saˈosi ni Yihofa wa ˈOdisen ko Kasakitakit
12 Onini a sapairasol hahacowa malaˈosi hani? Wa halikito malaˈosi ko sapairasol. ‘O itiyaayho a sowal ni Yihofa to pakayniay i Moap konini. Nohatini sanayto ko sowal ni Yihofa: “Irato ko tolo a mihecaan i, o mamafodifod ko Moap, mamalasawadto ko ˈdil nira, caayto ka hakowa ko mamaˈosaw a tamdaw, sahtoay o tadancaay a tamdaw cangra.’ (Isaya 16:13, 14) O makorkoray dafong misawacayay to soˈlinay a malaˈafo ko Moap itini ˈAyaw no Kongyen 8 hahekalan, malowanayto ko tamdaw no niyaroˈ, matiya o sapairasol ni Isaya. Hongti ci Tikerapilis somowalay to patayraay to dafong a hongtingti, masalalomaˈay ko Moap a hongti ci Salamanu. Hongti no Moap ci Kamusunapi patayraay to dafong ci Sinakiripan. Hongti no Asiriya ci Isarhaton aci Asupanipal na somowalay, hongti no Moap ci Musuri aci Kamasatu o sikawdan nangra sanay. ˈAyaw no pina hahekalan malaˈafoayto ko Moap a tamdaw. Toniya ngata a mihecaan, mikakorkoray to nolitengan a dafong a tamdaw mahelaay ko malahoracayto a pala, o niyaroˈ no Moap kora pala, kawra o makorkoray a dafong nonini saciˈicelay ato misaˈadaay to Israil a kitakit, mimingay aca ko makadkaday.
Odoˈ no Sinael
w06-CH 12/1 11 fiedac 1 fatac
Kalimlaan no Isaya Cudad—Saka 1
14:1, 2—Finawlan ni Yihofa samaanay ‘miholiw toya na miholiway cangranan a tamdaw, mikowan toya na mikowanay cangranan a tamdaw’ hani? Itini i pikowan no Mitiya ato Pirsiya to Papilon i, saˈakawangay ko saaroˈan ni Taniil i kitakit, ci Istir malo fafahi no hongti no Pirsiya, malo tapangayto no Pirsiya ci Mortikay. Onini sapairasol malaˈosiayto i cangranan.