Itini Kapihadidi a Mitala ci Yihofaan i, Padadotoc a Lipahak
MAEDENG halamhamay kiso to sapipalaˈafoaw ni Yihofa to kihcod tatiihay a demak, paira to faelohay a hekal. (Paˈarawan 21:1-5) Kawra sapadadotocaw a mihadidi mitala ci Yihofaan cowa ko madoloay. Ano tahasiˈayaw kita to pasangaray a pakayraan, sapisawadaw alatek. Ano nanayar sa caka laˈosi ko hatokel i, alatek sakaadada hanto ita ko cariraw no falocoˈ.—Taneng 13:12 ato roma pihongyak.
Wa itini i misaˈosian a tatokian midemak ci Yihofa. Halamhamay Cingra kitanan mihadidi a mitala, misamaanay hani? O manan ko papadama kitanan itini pitalaan a tatokian padadotoc a lipahak?
HANO HALAMHAMAY CI YIHOFA KITANAN MIHADIDI A MITALA HANI?
Sowal no Fangcalay Cudad: ‘Mihadidiay a mitala ci Yihofa, sidaˈit i tamowanan, o mamidemak Cingra, siniˈada i tamowanan, samanen o masadafdafay a Kawas ci Yihofa. O padadotocay a mihalamham Cingranan a tamdaw tada o malemeday!’ (Isaya 30:18) Ora sowal ni Isaya o maliyangay a Yutaya tamdaw ko nisowalan. (Isaya 30:1) Kawra onini a sowal pakayra toya madimadiay a Yutaya tamdaw pairaay to hatokel. O aniniay a finawlan ni Yihofa ngangaˈay mikitini tonini a milifok to hatokel.
Mihadidiay ci Yihofa a mitala, ano kitato i, mamihadidi a mitala. Maherekayto ci Yihofa misaˈosi to toki, pahererek tonini a lekakawa, mitalaay Cingra to hakairaan nonini a romiˈad. (Matay 24:36) Itiyato i, o pipakokot ni Akoma ci Yihofaan ato finawlan Ningra mamasawacayto o mararaway kora. Sasahcien ni Yihofa palaˈafo ci Satan ato mihakelongay cingranan, nikawrira mamahecad to masowalay no Isaya a siniˈada kitaanan.
ˈAyaw nonini, alatek pasalaten ni Yihofa kita misiˈayaw to sapalifet. Kawra mikiˈokay Cingra, itini kapitalaan ita a tatokian ngangaˈay a lipahak kita. Matira o sowal ni Isaya, o fanekfekay mitala ci Yihofaan a tamdaw o lipahakay. (Isaya 30:18 ato roma pihongyak.) Sasamaan a madangar konini hani? Iraay ko sepat a hapakayraan.
SASAMAAN LIPAHAK A MITALA
Sinanoten ko tawlikay a demak. Hongti ci Tafiti itini hakelong no kaˈorip adihayay ko maˈaraway tatiihay a demak. (ˈOlic 37:35) Kawra sanay cingra a mitilid: ‘Ka tomerep i kaˈayaw ni Yihofa, fanekfek a mitala Cingranan. Aka a pakayni to nika laˈosi no mihalakaan no tao a maketeren.’ (ˈOlic 37:7) Paitinian ni Tafiti i pilidong ni Yihofa ko pinengneng, hanaca fanekfek a mitala Cingranan. Misinanotay ci Tafiti to sapafeli ni Yihofa cingranan a maamaan a sapalemed. (ˈOlic 40:5) Kita aka a pakidem ciharateng to pasangar ato sapalifet, ao sinanoten ko tawlikay a demak, mihaen mamadoloto mitala ci Yihofaan.
Mameten ko toki pahemek ci Yihofaan. O ˈOlic saka 71 fedengan o ci Tafiti ko mitiliday alatek. Sanay ko sowal ningra ci Yihofaan: ‘Papadadotoc kako mitala, adihayen ako ko pipahemek Tisowanan.’ (ˈOlic 71:14) Samaanay ci Tafiti pahemek ci Yihofaan hani? Lengoan ningra ko tao pakayni ci Yihofaan, romadiw a pahemek Cingranan. (ˈOlic 71:16, 23) Matira ci Tafitian, itini kapitala ci Yihofaan i, pakaynien i mitosilay, to kalo caciyaw ato romadiw a pahemek Cingranan. Ano ikor romadiw kiso to radiw no Hongti Kitakit i, songilaˈen a misinanot kora ˈolic no radiw, nengnengen sasamaan mikitini tora ˈolic milifok to ˈicel, milifok to lipahak.
Mikitini i salikaka milifok to sapakalalok. Ci Tafiti itini kapadesan sanay pasowal ci Yihofaan: ‘Itini kaˈayaw no madimadiay finawlan Iso, o mamitapal kako to fangcalay ngangan Iso.’ (ˈOlic 52:9) Malecad ci Tafitian, malacafay kita to madimadiay midokoay ci Yihofaan a tamdaw mamilifok to sapakalalok. Cowa ko saˈopo aca ato mitosilay, mamalacafay kita cangranan rihaked to pahanhanan a toki, mihaen o papaˈicel to pakasoˈlinay falocoˈ no mita.—Loma 1:11, 12.
Patanoktoken ko nika pakasoˈlin to hatokel. ˈOlic 62:5 sanay ko sowal: ‘O tatomerep kako, misarocod a mitala to Kawas, samanen hatokel ako naitiraay Cingranan.’ Pakayni to hatokel awa ko sasa no harateng tada masakalimlaan. O pihadidi a toki ano mikikakaay ko nika koˈedaw no miharatengan ita, o mamangalef ira ko tanektekay a papakasoˈlin to hatokel. O papakasoˈlinen ita, ano hakowato ko halafin a mitala, o sakiˈok ni Yihofa o mamalaˈosi. Pakaynien ita i picekiw a paˈicel to nika pakasoˈlin no falocoˈ, tinakoen calepen ko kafanaˈ ci Yihofaan, nengnengen to samaanay malaˈosi ko sapairasol no Fangcalay Cudad, anoca haratengen to samaanay matatongotongod ko Fangcalay Cudad. (ˈOlic 1:2, 3) O papadadotoc kita ‘mitoor to sakayat no fangcalay saocor a mitolon,’ mitawmec to ngaˈayay kalalaˈed aci Yihofa, tahira i kalaˈosian no mikiˈokan ni Yihofa a midaˈocay ˈorip.—Yuta 20, 21.
Matira ci Tafitian, pakasoˈlinen to minengnengay ci Yihofa toya mitalaay Cingranan a tamdaw, paihkal to madimadiay a olah i cangranan. (ˈOlic 33:18, 22) Ka pisinanot to tawlikay a demak no kaˈorip, pahemek ci Yihofaan, mikitini i salikaka milifok to sapakalalok, padadotoc patanoktok to nika pakasoˈlin to hatokel. Mihaen i, o ngangaˈayto kiso padadotoc lipahak a mitala ci Yihofaan.