LALENGOEN LALAKAW 27
RADIW 73 Nanay Patimoloen Kami
Todongen ci Catok, Paihkal to Timolo
‘Timoloay a kapah ci Catok.’—1 RAYRAY 12:28.
KALIMLAAN NO LALAKAW
Todongen ko taˈarawan ni Catok, wa ngaˈay mala timoloay kita maemin.
1-2. O cima ci Catok? (1 Rayray 12:22, 26-28)
HARATENGEN hena, maedeng 34 efan ko masaˈopoay a tamdaw, midopo ci Tafitian mala hongti no Israil. Itini lotok no Hipron, toloay romiˈad miwaho cangra a mahemek, romadiwho a pakahemek ci Yihofaan. (1 Rayray 12:39) Ilalomaˈ nangra iraay ko cecay kapah ci Catok, cowa ka mikiriwiˈ nengnengen cingra. Kawra misinanotay ci Yihofa cingranan, nanay mamafanaˈ kita ci Catokan. (ˈOsien ko 1 Rayray 12:22, 26-28.) O cima ci Catok hani?
2 O saysi ci Catok, kalacafayay to Sakakaay Saysi ci Apiyataran a matayal. O pairasolay ci Catok, pafelian ni Yihofa cingra to taneng, ho cipinang to araaw no Kawas. Mansa, ano ira ko pasangar no finawlan i, wa milicay cingranan. (2 Samuil 15:27) O roma i, tada o timoloay a tamdaw cingra. Oniya lalakaw mamilengo to capeling ningra.
3. (1) Hano misaali to timolo ko finawlan no Kawas hani? (2) Onini lalakaw mamilengo to manan?
3 Itini toniya salikoray a lintad, pakidem pakidemay ko sapiˈodis ni Satan to finawlan no Kawas. (1 Pitiro 5:8) Mansa, ˈayaw no papalaˈafoen ni Yihofa ci Satan ato mariˈangay hekal i, misaaliay kita to timolo. (ˈOlic 31:24) Dotoc, mamilengo kita, toloay ko hapakayraan toha papadama kitanan mitodong ci Catokan.
DAMAEN KO KITAKIT NO KAWAS
4. O finawlan no Kawas hano ira ko timolo ngaˈ, ngaˈay midama to Kitakit no Kawas? (Nengnengen ko coka.)
4 O finawlan no Kawas kita maemin, misarocoday kita midama to Kitakit no Kawas. I kalo a pakayraan, timolo kita ngaˈ ngaˈay midopo to Kawas. (Matay 6:33) Tinakoen itini toniya mariˈangay a hekal, ira ko timolo ngaˈ, mitoor to palinian no Kawas a maˈorip, ato milasil to ngaˈayay lihaf no Kitakit no Kawas i tamdamdaw. (1 Tisalonika 2:2) Nohatini palidlid sa a mafodifod koniya hekal, mansa tada misaaliay to timolo kita, ho eca ka micapid to demak no sifo. (Yohani 18:36) ˈAlomanay finawlan no Kawas, cowa ka mala sofitay, cowa picapid to demak no sifo, mansa mafiyoray ko sakaˈorip nangra, masamsamay maroero no tao, mapalitayho.
Ano midopoay ko tao to cecay yofayof anca sasingkiwen a tamdaw i, wa samaan ko pidemak iso? (Nengnengen ko saka 4 fatac)
5. Hano timolo ci Catok ngaˈ, ngaˈay midama ci Tafitian hani?
5 Tayra i Hipron ci Catok, cowa ko pidama aca ci Tafitian a mala hongti. Miˈorongayho cingra to sapilood a lalosidan, toha sapipadamaaw ci Tafitian a milood. (1 Rayray 12:38) Makalimay cingra mihakelong ci Tafitian a miˈodis to ˈada, midipot to Israil tamdaw. Alatek cangoˈotay ko nalifetan ni Catok, kawra o timolo ningra padamaay cingranan a milood.
6. O nalifetan ni Tafiti, samaanay padama ci Catokan a timolo? (ˈOlic 138:3)
6 O saysi ci Catok, hano o timoloay hani? Samanen, i taliyok ningra ˈalomanay ko tanektekay timoloay a tamdaw. O taˈarawan nangra pakalalokay ci Catokan. Tinakoen, timoloay ci Tafiti ‘mikerid to Israil a tamdaw a milood,’ mansa misacoroday midama ko polong a Israil tamdaw cingranan. (1 Rayray 11:1, 2) Samanen masiˈayaw ni Tafiti ko ˈada i, mitiˈeray ci Yihofaan, mansa timoloay cingra a milood. (ˈOlic 28:7; ˈosien ko ˈOlic 138:3.) Iraayho ko romaroma ngaˈayay taˈarawan i tatihi ni Catok, tinakoen, ci Yihoyata ato timoloay ningra a wawa ci Pinaya, ato ngasaw ningra a 22 a ˈaˈideman. (1 Rayray 11:22-25; 12:26-28) Tada timoloay cangra midopo ci Tafitian a mala hongti.
7. (1) Anini iraay ko manan timoloay a taˈarawan toha ngangaˈay todongen ita? (2) Mikitini i ikaay salikaka ci Ayong Silu, o manan ko mananamay iso?
7 ˈAlomanay ko timoloay a tamdaw midopo to mikowanay a fadangalan ni Yihofa, ano sinanoten ita ko taˈarawan nangra, wa mapakalalok kita a timolo. O Hongti ita ci Yis Kristo, pakasoˈlinay a mitiˈer ci Yihofaan, mansa ira ko ˈicel. Mihaenay, itiniho cingra i fafekang no sera i, saka timolo ningra micoˈay to saroero, cowa picapid to demak no hekal ni Satan. (Matay 4:8-11; Yohani 6:14, 15) Anini ˈalomanay kapah salikaka, cowa ka kahi mala sofitay, anca cowa picapid to demak no sifo. O ngaˈayay taˈarawan ita cangra. Ngaˈayay ˈosien iso ko nalifetan nangra i jw.org a wangcan.a
PADAMAEN KO SALIKAKA
8. I masamaanay a pakayraan, o malohemay malitengay ira ko timolo ngaˈ, ngaˈay padama to salikaka?
8 Makalimay ko finawlan no Kawas malapadama. (2 Korinto 8:4) Nolatekay, mihaen to demak misaaliay to timolo. Tinakoen, ano mafekad ko lalood i, mafanaˈay ko malohemay malitengay, wa misaali ko salikaka to sapakalalok ato sadama, mahawpay ko sakaˈorip a dafong, ato sapahaled to pakasoˈlinay falocoˈ a kakaenen. Tada ciharatengay ko malohemay malitengay to salikaka, ano o katalawan a pakayraan ko masiˈayaway, makalimay padama to salikaka. (Yohani 15:12, 13) Mitodongay cangra to taˈarawan ni Catok paihkal to timolo.
9. Mikitini i 2 Samuil 15:27-29, miocoran ni Tafiti ci Catok to manan a demak hani? (Nengnengen ko coka.)
9 Wawa ni Tafiti ci Apsalom sapiˈafasaw to saaroˈan no hongti, mihaenay i, katalawanto ko ˈorip ni Tafiti. (2 Samuil 15:12, 13) Wa tangsol a miliyas ci Tatifi to Yirusalim wa ngaˈ, pasowal cingra to sikawdan: ‘Tata, milaliw kita! Ho eca ka malepel mapatay ni Apsalom.’ (2 Samuil 15:14) Malingad cangra i, mahapinang ni Tafiti to aaira ko materekay a tamdaw ngaˈ, ho paratoh i cangranan to demak ni Apsalom. Mansa, ocoran ningra ci Catok ato roma saysi minokay i Yirusalim a misolap. (ˈOsien ko 2 Samuil 15:27-29.) Minaˈon cangra wangaˈ, samanen o tada katalawan a demak koni, anoca wa mapatay no ˈada alatek. Tada mariˈangay ci Apsalom, haratengen hena, ano mafanaˈay cingra to ‘o sopay ni Tafiti’ ci Catok ato roma saysi i, wa samaan ko teloc nangra?
Miocoran ni Tafiti ci Catok to katalawan a ˈinorong (Nengnengen ko saka 9 fatac)
10. Samaanay ci Catok ato roma tamdaw midipot to ˈorip ni Tafiti?
10 Maharatengay ni Tafiti ko cecay mihalakaan, ocor sa ci Catok ato widang ningra ci Husay, misao mihakelongay ci Apsaloman. (2 Samuil 15:32-37) Toor han ni Husay ko halaka ni Tafiti, mipaini ci Apsaloman, ˈarawhan oniya sapaini, wa panayar paira to hatoki ni Tafiti a milaliw. Mihayi ci Apsalom ikor i, tangsol sa a paratoh ci Husay ci Catokan aci Apiyataran. (2 Samuil 17:8-16) Dotoc, ocoran nangra ko roma sikawdan a paratoh ci Tafitian. (2 Samuil 17:17) Itini i sapadama ni Yihofa, midipotay ci Catok ato roma saysi to ˈorip ni Tafiti.—2 Samuil 17:21, 22.
11. Ano padama to salikaka i, samaan mitodong to taˈarawan ni Catok paihkal to timolo?
11 Ano masiˈayaw no salikaka ko katalawan a pakayraan, misaali to sapadama no mita i, wa misamaan kita mitodong ci Catokan paihkal to timolo? (1) Dofdofen ko sakayat. Doedoen ko sakayat no fenpo, ano mafekad ko macalohay a demak i, wa makakedec malacecay kita. (Hipray 13:17) Ano macerid a milomal ko malohemay malitengay to sakayat no likakawa i, wa mafanaˈ i ˈayaw ato ikor mifekad ko pades i, sasamaan misaday ko hademak. (1 Korinto 14:33, 40) (2) Ka timoloen a misinanot. (Taneng 22:3) Sakadademaken ko mihapinangay a inaneng. Aka caloh sa midemak. (3) Tiˈeren ci Yihofa. Aka mapawan, ciharatengay ci Yihofa to finawlan Ningra, wa padamaen Ningra kiso, tano matatodongay a pakayraan padama to salikaka.
12-13. Mikitini i nalifetan ni Wiketo aci Witali, mananamay iso ko manan? (Nengnengen ko coka.)
12 Nengnengen ko nalifetan no salikaka ci Wiketo aci Witali, i Okeran, misaˈicelay cangra mipawsa to kakaenen ato nanom patayra i salikaka. Sanay ci Wiketo: “Tayraay icowacowa kami a mikilim to kakaenen, maceriday a matengil ko honi no kowang. Kinacecayay, pakiyahoay ko cecay salikaka to manaˈengay ningra a kakaenen. Oniya sapakiyaho a kakaenen, wa padama to ˈalomanay salikaka to cecay a liyad. Ya mionpang kami to dafong i tolako i, fahal sanay matefad ko fakotang i ngata niyam (maedeng 20 kongce), ngaˈayay i, cowaho ka mafakohac. Toya romiˈad micangacangay ci Yihofaan pafeli to timolo takowanan, ho ngaˈay padadotoc a padama to salikaka.”
13 Sanay ci Witali: “Mihaen to demak, misaaliay to timolo. Sakina cecay kako mipawsa to kakaenen i, 12 ko tatokian ko halafin ngaˈ malahci ko tayal, padadotocay kako mitolon ci Yihofaan.” Tada timoloay ci Witali, minaˈonay cingra. Saan cingra: “Padadotocay kako a micangacang ci Yihofaan pafeli to taneng, padamaayho takowanan mitawmec to misapoeneray. Oyanan mihayian no sifo a lalan ko mirakatan ako, itiya, maˈaraway ako ko makakedecay ko salikaka a miwanik to saconaˈ i lalan, misolimet to kakaenen a mipawsa, mionpang to dafong, milimasmasayho to pipahanhanan a kitiraan, tada matemeray ko falocoˈ ako!”
Ano tahalifa ko salikaka to katalawan pakayraan i, ka timoloen a padama, sinanoten a midemak (Nengnengen ko saka 12-13 fatac)
PADADOTOCEN MADIMADI CI YIHOFA
14. Ano miliyas ko kaolahan ita a tamdaw ci Yihofaan i, samaan ko harateng no mita hani?
14 Ano ira ko salawina, widang miliyas ci Yihofaan i, masomaday ko falocoˈ ita. (ˈOlic 78:40; Taneng 24:10) Ano ngaˈayay ko kalalaˈed ita cingranan i, pasangaray nanay misiˈayaw toniya demak. Ano ira ko mahaenay nalifetan iso, haharatengen ko nalifetan ni Catok, wa mapaˈicel kiso.
15. Misamaanay hano misaali to timolo ci Catok ngaˈ, padadotoc madimadi ci Yihofaan hani? (1 Hongti 1:5-8)
15 ˈAyaw mapatay ci Tafiti i, ya cafay ni Catok ci Apiyatar mitowakangay ci Yihofaan, kawra kamayan timolo ci Catok a paihkal to madimadi. Soˈlin pasowalayto ci Yihofa, wa ‘o ci Solomonto ko hongti,’ kawra o roma wawa ni Tafiti ci Atoniya, sapiˈafasaw to saaroˈan no hongti. (1 Rayray 22:9, 10) Itiya midamaay ci Apiyatar ci Atoniyaan! (ˈOsien ko 1 Hongti 1:5-8.) Mihaen ko demak ningra i, cowa ka madimadi ci Tafitian aci Yihofaan. Haratengen hena, samaanay ko falocoˈ ni Catok hani? Maedengay 40 miheca, malacafayay cingra aci Apiyatar mala saysi. (2 Samuil 8:17) Na malacafayayho cangra mililid to ‘katatelekan a lipaˈ no Kawas.’ (2 Samuil 15:29) Mikotoday cangra ci Tafitian, midama cingranan mala hongti, halafinay cangra a malacafay matayal. Ya mitowakang ci Apiyatar itiya i, tada makesemay ko falocoˈ ni Catok.—2 Samuil 19:11-14.
16. O manan ko padamaay ci Catok padadotoc madimadi hani?
16 Ci Catok cowa kalacafay ci Apiyatar a mitowakang ci Yihofaan, cowa ka cisasa ci Tafiti to kamadimadi ni Catok. Ya mafanaˈ ci Tafiti to mamitowakang ci Atoniya i, micorcoran ci Catok, Natan, aci Pinaya minilnil ci Solomonan a mala hongti. (1 Hongti 1:32-34) I katihi ni Catok, iraay ci Natan ato romaroma widang, madimadiay ci Yihofaan aci Tafitian cangra, wa mikitini cangranan micada to taˈangayay a ˈicel ato sapakalalok. (1 Hongti 1:38, 39) Mala hongti ci Solomon ikor i, ‘minilnilay cingra to saysi ci Catok mikotay to tayal ni Apiyatar.’—1 Hongti 2:35.
17. Ano miliyas ko paro no lomaˈ ato widang iso ci Yihofaan i, samaanen iso a mitodong ci Catok hani?
17 Sasamaan kiso mitodong ci Catokan hani? Ano paro no lomaˈ ato sangaˈayay a widang iso, miliyas ci Yihofaan i, wa ngaˈay tano waywayan iso, paihkal to madimadi ci Yihofaan. (Yosuwa 24:15) Papaˈicelen ni Yihofa kiso a timolo. Mihaenay, padadotocen a mitiˈer Cingra ato mitolon, ceriden a macacawmaˈ to madimadiay a salikaka. Tada masemeray Cingra to madimadi iso, makalim a palifon tisowanan.—2 Samuil 22:26.
18. Mikitini i nalifetan ni Maleko aci Sitaysu, o manan ko mananamay iso?
18 Nengnengen ko nalifetan ni Maleko aci Sitaysu. Lomahad ko tatosa fafahiyan wawa i, miliyasay ci Yihofaan. Sanay ci Maleko: “Hofoc han ko wawa i, maolahay kami cangranan, misarocoday kami midipot cangranan, ho eca ka dokaˈ pikariˈang no tao. Ya miliyas cangra ci Yihofaan i, tada mararomay kami. Kawra, i tatihiay niyam ci Yihofa. Padama tamiyanan mapakalalolalok, malonay kako i, ciˈicelay ko fafahi ako a pakalalok takowanan. Ano malonay cingra i, kakoto ko mihinomay cingranan.” Sanay ci Sitaysu: “Ano cato pitiˈer to ˈicel ni Yihofa, cowato ko pakafilo kami. Marariday a miroroh kako to niyah, o mako a raraw sanay ko harateng ako. Oraanto i, mihaeminan ako a pasowal ci Yihofa. Ikor, o halafinay caka ˈaraw a salikaka milisoˈ takowanan. Miˈafang cingra minengneng takowanan a pasowal: “Sitaysu, cowa ko miso a raraw konini!” Ono pakayniay i sapadama ni Yihofa, toha ngangaˈay kako padadotoc mahemek midoko ci Yihofaan.”
19. Mamisetek kiso to falocoˈ misamaan ko pidemak hani?
19 Halamhamay ci Yihofa to polong midokoay Cingranan a tamdaw, mitodong to timolo ni Catok. (2 Timoti 1:7) Kawra cowa ko niyah ko tiˈeren, ao Cingra ko tatiˈeren, sanay ci Yihofa. Ano cangoˈotay ko timolo iso i, cangacangen ko sadama ni Yihofa. Aka mapawan, pahecaden ni Yihofa kiso ci Catokan, ira ko tanoktokay a timolo!—1 Pitiro 5:10.
RADIW 126 Kapalal ko Falocoˈ a Tanektek