Mananamayto Iso ko Marenecay a Pakayraan Han?

1. O marenecay o manan ko tatodong hani? Cowa ka hecad to manan hani?

O MARENECAY a tamdaw kiso han? O marenecay a tamdaw wa misamacay to macadaayto a sapalemed, pakayni tonini a mahemeken a marenec. Cowa pakayni i cangoˈot to manan a dafong a maketer cingra. Kawra, o marenecay ato cowa ka sakacakataw o masasiromaay a demak. Tinakoen, pakalalokay ko Fangcalay Cudad to Krisciyang saˈicelen a micangacang ko itini pidokoan a patosokan, sarocoden a matayal saki ci Yihofaan. (Loma 12:1; 1 Timoti 3:1) Kawra, soˈlin caka cada ita ko sakatayalaw no niyah, o marenecay a Krisciyang cowa ko mamalahdaw ko lipahak.

2. Cowa ka cinarenecen a waywayan alatek pairaay to masamaanay a pasangar hani?

² Ano caka renec kita i, alatek mamararaw ko pisaˈosi no mita, pairaay to pakidemay tatiihay a minaroˈan. Tinakoen, o roma tamdaw ano hakowato ko dafong, sapiˈacaawho to adihayay, telocto i, kinasoˈot sato mietan to payci. O roma Krisciyang sapicadaaw to kaolahan a dafong i, mitakawayto to dafong, tada kaadayayan konini! Alatek saan ko harateng nangra: “O mamacada ako konini.” “Ira nohatini ngaˈ, cowato ka sapitalaaw kako.” “Patikol hanto noikor da.” Kawra ano masamaanto ko pakayraan a mitakaw i, o pakararaway ci Yihofaan, pakangodoayho Cingranan. (Taneng 30:9) Roma i, o roma tamdaw cowa ka cada ko kaciharatengan ningra a tayal, malonayto a matoled, hanaca sawad sanayto a midoko to Kawas. (Kalatiya 6:9) O mipatafangayto to tireng ci Yihofaan a tamdaw, hano mahaen ko demak ningra hani? Alatek o lalangian i, cowa ka cinarenecen ko falocoˈ ningra.

3. Mikitini i Filipi 4:11, 12 o manan ko mahapinangay ita?

³ Kita kahacecay ngangaˈay palahad to marenecay waywayan. Mikitini tarokos ci Pawloan mahapinangayto koniya demak, sanay i tikami ningra miˈoning: ‘Mananamayto ako, ano tahalifato to manan i, ngangaˈay a marenecen.’ (ˈOsien ko Filipi 4:11, 12.) Onini a sowal miˈoning ni Pawlo itini kapalitan. Soˈlin pasangar ko pakayraan, cowa ka lahdaw ko lipahak ningra, samanen ‘mananamayto ningra ko [marenecay] a pakayraan.’ Ano pasangaran nanay kita to marenecay, ngaˈayay haratengen ko nalifetan ato sowal ni Pawlo. Soˈlinay i awaay ko hofoc han cinarenecanto. Mahecad ci Pawloan, maminanam kita to hatiniay a waywayan. Oniya lalakaw mamilengo, o manan ko papadama kitanan minanam to marenecay.

PALAHAD TO MIAKOˈIDAY A FALOCOˈ

4. Miakoˈiday a falocoˈ misamaanay padama kitanan cinarenecen? (1 Tisalonika 5:18)

⁴ Miakoˈiday a tamdaw madoloay a marenecen. (ˈOsien ko 1 Tisalonika 5:18.) Ano miakoˈiday kita to iraayto a dafong i, cowato ka haharateng sa to awaay a dafong. Pakayni to katayalan ita i ci Yihofaan nohatini, ano paihkal kita to miakoˈiday, cowato ka haharateng sa to roma a katayalan, ao misaˈicel a milahci to ˈinorong no niyah. Mansa pakalalokay ko Fangcalay Cudad kitanan, ka itinien i satolon miakoˈid ci Yihofaan! Ira ko miakoˈiday ita a falocoˈ i, wa madolo a milifet to ‘ikakaay ko kacipinang no tamdaw a rihaday.’—Filipi 4:6, 7.

5. O manan ko lalangian no Israil tamdaw a miakoˈid ci Yihofaan? (Nengnengen ko coka.)

⁵ Saharateratengen ko nalifetan no Israil tamdaw. Itini kohkoh cangra i, samanen cowa ka komaen to i Icipay a kakaenen, mansa kinapinapinaay a ngaliwngiw ci Yihofaan. (Saˈosi 11:4-6) Manaokaniw, cowa ko madoloay i kohkoh ko kaˈorip. Kawra ano ira ko miakoˈiday falocoˈ nangra, miharateng to nano demak ni Yihofa cangranan i, mamarenecen cangra. Ya mala koli ko Israil tamdaw i Icip i, maceriday a masamsam cangra, tefadan ni Yihofa ko Moetepay a Padiing a paˈorip cangranan. Miliyas ko Israil to Icip i, papilifokan ni Yihofa cangra to mikitini i Icip a ekim ato rikoˈ. (Kasadakan 12:35, 36) Itini lawac no Kahngangay Riyar mamalepelto no sofitay ni Falaw i, midemakay ci Yihofa to kasapaan, palacinowas to riyar, ho ngaˈay cangra midoedo a romakat. Mitaˈlif cangra to kohkoh i, to romiˈamiˈad mitefadan ni Yihofa ko mana a pakaen cangra. Kawra kaadayayan i, cowa ka i falocoˈan nangra kora demak. Mahapinangay itini, cowa ka marenecen ko Israil tamdaw, cowa pakayni noka awa no kakaenen, ao cangoˈotay ko miakoˈiday a falocoˈ.

6. O manan a pakayraan toha papadama kitanan paihkal to miakoˈiday a falocoˈ?

⁶ Mihaenay, sasamaan kita palahad to miakoˈiday a falocoˈ hani? Saka cecay, palaken ko toki to romiˈamiˈad a miharateng, iraay ko masamaanay a sapalemed to niyah. Wa ngaˈay tiliden iso koriranan. (Radiw no mararomay 3:22, 23) Saka tosa, paihkalen ko miakoˈiday a falocoˈ. Ano iraay ko tamdaw pakayni tisowanan a dademak i, tatalaˈayaw a miakoˈid cangranan. Masakalimlaan i, ceriden miakoˈid ci Yihofa. (ˈOlic 75:1) Saka tolo, ceriden a micawmaˈ to iraay ko miakoˈiday falocoˈ a tamdaw. Haratengen, midengaay ko miakoˈiday a falocoˈ, cowa ka renec a waywayan mahecaday toni. (Limoˈot 1:26-28; 2 Timoti 3:1, 2, 5) Ano micerid kita paihkal to miakoˈiday i, wa marenecen ko niyah.

7. Salikaka ci Aci samaanay palahad to miakoˈiday a falocoˈ hani? Samaanayto ko ngaˈayay a minaroˈan?

⁷ Nengnengen ita ko itiniay i Intonisiya salikaka ci Aci a nalifetan. Sanay cingra: “Kalifongan i, palaliniay to pakayraan ako ato salikaka, telocto i, cowa ka rahekeren to niyah a pakayraan.” (Kalatiya 6:4) Samaanay cingra misalof ko falocoˈ hani? Sanay cingra: “To romiˈamiˈad midotimay kako to macadaay a sapalemed, misongilaˈay misaharaterateng to nano likakawa ni Yihofa o kahemekan konini. Ikor itiniay kako i satolon pakayniay toniya demak a miakoˈid ci Yihofaan. Palidlid sato lipahakayto kako, marenecayto kako.” Masofaway a harateng wa maˈemekto kiso han? Tanamen a mihaen ko demak, miliyaw pakahela to miakoˈiday a falocoˈ.

PADADOTOC A MISAPOENER

8. Samaanay ko nalifetan ni Paluk?

⁸ Saharateratengen ko nalifetan no mitatiliday ni Yirimiya ci Paluk. Miocoran ni Yihofa ci Yirimiya toya cowa ka madimadi a Israil milasil to misawkitay a lihaf, o tayal ni Paluk midamaay ci Yirimiyaan, pasangaray konini a ˈinorong. To cecay liyad, cowa pisarocod ci Paluk to sapatorod ni Yihofa cingranan a tayal, alatek isalakatay misakareteng minengneng to niyah ato sapidemakaw to niyah a demak. Orato i, pakaynian ni Yihofa ci Yirimiyaan a patalipaˈelal ci Paluk: ‘Sapihalakaawho kiso to taˈangayay a demak han? Hamaanto a mihalaka toniya demak.’ (Yirimiya 45:3-5) O tatodong no sowal ni Yihofa i: “Cinarenecen to nohatiniay nokaˈorip.” Micadaan ni Paluk ko sasalof halo mifalic to niyah, salikorto i, cowa ka lahdaw ko pihayda ni Yihofa cingranan.

9. Mikitini 1 Korinto 4:6, 7 o manan ko mananamay ita hani? (Nengnengen ko coka.)

⁹ Nolatekay, o cecay Krisciyang saan a miharateng, tatahacada ko niyah to cecay a katayalan. Alatek ciinanengay cingra, malalokay a matayal, anca adihayay ko nalifetan, hanaca iraay maemin. Kawra o taoto ko micadaay tora kaciharatengan ningra a tayal. Ano pasangaran nanay cingra micada toniya demak, samaanto hani? Ngaˈayay haratengen ningra ko sowal ni Pawlo itini 1 Korinto 4:6, 7. (ˈOsien.) Soˈlinay i, o iraay ita a inaneng, macadaay a dademaken i, cowa ko niyah a mietanan koni, cowa ko iraay ko tatodong ita a micada, ao sapatelong ni Yihofa koni, o mikiriwiˈay a sidaˈit Ningra koni!—Loma 12:3, 6; Ifiso 2:8, 9.

10. Sasamaan kita palahad to misapoeneray a falocoˈ hani?

¹⁰ Ano sapalahadaw to misapoeneray a waywayan i, songilaˈen a misimsim ko miterekan ni Yis a taˈarawan. Tinakoen, soˈlin o Wawa no Kawas cingra, iraay ko taˈangayay a fadangalan, kawra talaˈayaway cingra minanaw to ooˈ no nisawawaan. Mahecad to sowal no tarokos ci Yohani, ‘mafanaˈay ci Yis maherekayto ko Wama patorod to kihcod i cingranan, mafanaˈayho to naitiniay cingra i Kawas a ira, wa tayra cingra i Kawas,’ kawra kamayan cingra ‘pananaw to ooˈ no nisawawaan.’ (Yohani 13:3-5) Ano misatakaraw ko falocoˈ ni Yis i, alatek saan ko harateng, mapananaw no nisawawaan ko ooˈ ningra, kawra cowa ka pihaen cingra miharateng. Soˈlinay i, cowa pakayni to o Wawa no Kawas cingra, micada to mikiriwiˈay sapilitemoh no tao, sinoway ko kaˈorip. (Luka 9:58) Ci Yis misapoeneray a cinarenecan, tada o ngaˈayay taˈarawan no mita!—Yohani 13:15.

11. O manan ko padamaay ci Tannisan padadotoc a marenec?

¹¹ Naitiniay i Helan a faˈinayan salikaka ci Tannis sapitodongaw ci Yisan padadotoc a misapoener, kawra pakayni cingranan cowa ko madoloay. Sanay cingra: “Nolatekay, maˈaraway ako ko macadaay no tao ko kaolahan ako a tayal, cowa ka hemek kako, oha no mako kora katayalan, saan ko harateng ako. Ano mahaenay i, mikiriwiˈay kako a mikingkiw to milingatay to misapoeneray a lalakaw. Misangaˈay kako i JW Library^® app to tahapinangan, halo mitongal to milingatay to misapoeneray a sinael i tahapinangan. Mihaen kakalikito a mahela koni sinael, misongilaˈ a miˈosi. Misiyacayan ako ko milingatay to misapoeneray a kimad i soci, misaliyaliyaw a mitengil.a Mananamay ako, ano o mananto ko demak ita, o araaw i, sapaˈdilaw ci Yihofaan, cowa ko niyah. O midemakan no mita a demak itini tadamaanay araaw no Kawas i, o mimingayho koni.” Ano mahapinang iso to cowa ko matatodongay a harateng i falocoˈ i, mamisaˈicel a malo misapoeneray a tamdaw. Ano mihaen i, mamahemekto a marenec kiso, wa ngaˈayto ko kalalaˈed ato Kawas.—Yakop 4:6, 8.

MIDOTIM TO HANOIKOR A HATOKEL

12. Haratengen ita ko masamaanay a hatokel ngaˈ cinarenecen kita? (Isaya 65:21-25)

¹² Ano midotim kita to hanoikor makapahay a hatokel mamarenecto. O sowal ni Yihofa itini Isaya padama kitanan mihapinang, ihkalay ko kacipinang Ningra o kaˈorip ita cowa ko madoloay, kawra mikiˈokay Cingra papalahdawen Ningra ko kihcod masiˈayaway ita a pasangar. (ˈOsien ko Isaya 65:21-25.) Anoikor, wa mikilomaˈ kita to makapahay sinowayay a lomaˈ, to romiˈamiˈad wa tahkaen to cihaleday a kakaenen. Mamatomes ko ciepocay hatayal no mita, mikitini micada to marenecay. Roma i, cowato ka calemcem kita to sakarihaday no niyah ato wawa. (Isaya 32:17, 18; Icikil 34:25) O hatiniay a hatokel o makapahay, mamalaˈosi koni!

13. Itini cowa ka hecad a pakayraan, midotim to hanoikor a hatokel, sasamaan padama kitanan?

¹³ Nohatini, ikakaay to isaˈayaway ko pisaali ita a pamotek to hanoikor a hatokel. Misamaanay hani? Samanen itiniayto kita i ‘salikorayto a romiˈad,’ iraay ko ‘pasangaray sasiˈayawen’ ita a demak. (2 Timoti 3:1) Kawra to romiˈamiˈad midamaan ni Yihofa kita, pafelian Ningra kita to sakayat, ˈicel ato sapadama. (ˈOlic 145:14) Tahalifa kita to pasangar i, pafeliay Cingra to hatokel mangalefay ko pihinom kitanan, padadotoc kita a kodait. Nohatini, paririˈ to paro no lomaˈ a ˈinorong alatek taˈangayay ko saroero iso to romiˈamiˈad. Kawra pakayni sakaˈorip tahadaˈocay kiso maroray a matayal han? Cowa! Sanay ci Yihofa mikiˈok, itini Lakoing paparenecen Ningra kiso ato paro no lomaˈ a kihcod a saali, o pafelian Ningra wa ikaka to micangacangan miharatengan no miso! (ˈOlic 9:18; 72:12-14) Nohatini, alatek to romiˈamiˈad miemem kiso to adada anca katoled no falocoˈ. Kawra wa padadotoc kiso a miemem, tahadaˈoc cowa ko mamasaysay han? Cowa! I faelohay hekal no Kawas i, o adada ato patay mamalahdawto. (Paˈarawan 21:3, 4) Nohatini ano o mananto ko masiˈayaway ita, o adada, cowa ka sadafdaf a demak, mapatay ko salawina, hanaca o roma a sapalifet, hanoikor a hatokel ngangaˈay padama kitanan a marenec, cowa ko ngaliwngiw a maketer. Samanen mafanaˈay kita, nohatiniay a pades ano pakidemto o ‘cecayay aca a liyad’ koni, irato ko faelohay a hekal i, mamisaysayto ko kihcod a pasangar.—2 Korinto 4:17, 18.

14. Sasamaanen ita ko pidemak ngaˈ soˈlin ko noka pinengneng to hanoikor a hatokel?

¹⁴ Sapafeli no Kawas a hatokel i, padamaay kitanan padadotoc a marenec, mihaenay, sasamaan ko pidemak ita ngaˈ soˈlin ko nika pinengneng toniya hatokel? Mahecad to maapohay ko mata a tamdaw sakahapinangaw to maraayay a tataparan i, citamataan ngaˈ, sapihapinangaw kita to hanoikor a hatokel misaaliay to hamamidemak, wa misongilaˈ a misaharaterateng to itini i Lakoing a maˈorip ko niyah. Ano pakayniay kita i kaˈorip a cariraw i, ngaˈay haratengen, ikor oniya hekal awaayto ko payci, awato ko manikaway cihafayay tamdaw, awato ko kiyam ita. Ano pakayniay kita to cowa ka cada ko hakatayalan a matoled i, haratengenho, anoikor wa patikolto kita a malefot, adihayay ko hatoki ita matayal saki ci Yihofaan. Ikorto no pina caˈol miheca i, ano tikolen ita miharateng i, nohatini kacarirawan ita a demak awaayto ko manan. (1 Timoti 6:19) I satapang, dotimen ko hanoikor a hatokel alatek cowa ko madoloay. Tahalifa to pasangar i, alatek ira ko nanaman ita a carirawen. Kawra ano kamayan padadotoc a misaˈicel i, ikor no cecay a liyad, wa irato ko nanaman ita midotim to sapafeli no Kawas a hatokel.

15. Mikitini nalifetan ni Krista mananamay iso ko maanan?

¹⁵ Nengnengen ita ko nalifetan no fafahiyan salikaka ci Krista, na misowalan isaˈayaw ci Tannis o faˈinay ningra. Sanay cingra: “Pakidemay ko adada ako, awaay ko ˈicel no tireng. Cowa ka ngaˈay a romakat, maroˈayto i cikalilengay a hakenan, adihayay a toki matiˈenang i takal. To romiˈamiˈad alemˈemay ko tireng. Toniya ngata sanay ko ising, pasangaray maadah ko adada ako. Matengil ko mahaenay sowal ningra i, tangsolay maharateng ako, ‘Maˈaraway ningra ko hanoikor cowa ka hecad to maˈaraway ako.’ O maˈaraway ako i, o hatokel, oniya hatokel rihadayay ko falocoˈ ako. Soˈlin nohatini ketem sato wadis kako a maˈorip to romiˈamiˈad, kawra ikor itini faelohay a hekal, to romiˈamiˈad milayap kako to makapahay nokaˈorip.”

MIKANGODOAY CI YIHOFAAN A TAMDAW ‘AWAAY KO KACANGOˈOTAN’

16. Mikangodoay ci Yihofaan a tamdaw ‘awaay ko kacangoˈotan,’ hano mahaen ko sowal no Hongti ci Tafiti hani?

¹⁶ Marenecay ko midokoay ci Yihofaan a tamdaw, cowa ko nika awa no kihar ko nikaˈorip. Haratengen ko tinakoan no Hongti ci Tafiti. Na makokot no tao cingra, misafelitan no widang, sapipatayaw ci Sawlo cingranan to pina miheca, malahdaway ko tatoloay wawa. Soˈlin a mahaen i, kamayan marenec ci Tafiti, sanayho cingra, mikangodoay ci Yihofaan a tamdaw ‘awaay ko kacangoˈotan.’ (ˈOlic 34:9, 10) Misamaanay hano mahaen ko sowal ningra? Samanen mafanaˈay cingra, soˈlin cowa ka falahen ni Yihofa ko kihcod a pasangar itini nokaˈorip ningra, kawra o misaalianho ningra pafelianto Cingra. (ˈOlic 145:16) Mahecad ci Tafitian, wa ngaˈay pakasoˈlinen ita to papadamaen ni Yihofa kita miremo to kihcod a sapalifet. Ano o mananto ko mafekaday itini nokaˈorip, oha ngangaˈay marenec kita.

17. Misamaanay hano sapinanamaw kita to marenecay a pakayraan?

¹⁷ Makalimay ci Yihofa marenec ko kaˈorip iso. (ˈOlic 131:1, 2) Mansa mamisaˈicel a minanam to marenecay a pakayraan. Ano misaˈicel kiso palahad to miakoˈiday a falocoˈ, padadotoc a misapoener, halo midotim to hanoikor a hatokel, ho ngaˈay mikifalocoˈ a pasowal kiso: ‘Marenecay ko falocoˈ ako!’—ˈOlic 16:5, 6.