‘Papatikol Maˈorip ko Salikaka Iso’

1. O cecay faˈinayan a wawa samaanay paihkal to pakasoˈlin no niyah to patikolay maˈorip?

CECAY ci Masiw hananay faˈinayan a wawa samanen pakidemay ko adada, mansa kinapinaay a tokaden. 7 ko mihecaan ningra, kinacecayay malacafayay to paro no lomaˈ minengneng to JW Tilifi a kamok. Tiya mamaherek ko kamok i, maˈaraway nangra ko cecay kamotoˈay no radiw a ika, ora lalakaw itiniay faelohay hekal militemohay to patikolay maˈorip a salawina.b Maherek a minengneng ikor i, tayra i tatihi no wama wina ci Masiw, mitatiw to kamay nangra a pasowal: “Ama ina, nengnengen namo, soˈlin mapatay kako, o papatikol a maˈorip. Aka pakidem a masomad, talaen kako haw.” Maˈaraw no wama wina ni Masiw to pakasoˈlinay cingra to papatikol a maˈorip, haratengen iso hakowaay ko pitemer to falocoˈ nangra hani?

2-3. Miharateng to papatikol maˈorip ko tamdaw a sakiˈok, hano tada o ciepocay?

² Micerid kita miharateng to patikolay maˈorip a mikiˈokan no Fangcalay Cudad, tada ciepocay konini. (Yohani 5:28, 29) Misamaanay hani? Samanen cowa ka fanaˈ kita to hahacowa pakidem ko adada no niyah alatek, anca mapatay ko kanonoˈan a salawina. (Patnakay 9:11; Yakop 4:13, 14) Ano tahalifa kita to hatiniay a sapalifet i, o patikolay maˈorip a hatokel papadama kitaanan padadotoc a mihadidi. (1 Tisalonika 4:13) Roma i, mikitini i Fangcalay Cudad mafanaˈayto kita, cipinangay ko kakarayan Wama kitaanan, tangongolay ko olah kitaanan. (Luka 12:7) Ano dotimen ita ko patikolay maˈorip a hatokel, tatangongolto ko kacipinang tonini. Patikol maˈorip kita i, mamahecad to isalakatay ko pinangan ato miharatengan, samanen ci Yihofa a Kawas tada ihkalay ko kacipinang kitaanan; ira ko toki ita tahadaˈoc a maˈorip, soˈlinto mapatay o papatikolen a paˈorip, samanen ci Yihofa tada maolahay kitaanan.

³ Isalakat mamilengo konini a lalakaw, misamaanay hano pakasoˈlin kita to patikolay maˈorip a sakiˈok. Dotoc i, nengnengen ita ko cecay papaˈicel to pakasoˈlinay falocoˈ ita a maˈoningay i Fangcalay Cudad, o lalangian a sinael nonini a lalakaw i, ‘papatikol maˈorip ko salikaka iso’ sanay, o naitiniay tonini maˈoningay. (Yohani 11:23) Saikor mamananam ita, mamisamaan ko pidemak ita ngaˈ, matongal ko pakasoˈlin to mamalaˈosi konini patikolay maˈorip a tokel.

HANO NGAˈAY PAKASOˈLINEN TO MAMALAˈOSI KO SAKIˈOK PATIKOL MAˈORIP

4. O mamafanaˈ kita to maanan hongaˈ, pakasoˈlin to cecay sakiˈok? Tano tinakoen a mitadtad.

⁴ Sapakasoˈlinaw kita to cecay a sakiˈok i, o mamafanaˈ tonini a mikiˈokay tamdaw iraay ko kalim iraayho ko ˈicel palaˈosi tonini a sakiˈok. Tinakoen, mapalakay no faliyos ko lomaˈ iso, mikiˈokay ko cecay widang iso, saan ko sowal: “Papadamaen ako kiso mitomadaw to lomaˈ.” Soˈliˈlinay ko harateng ningra, mansa pakasoˈlinay kiso iraay ko kalim ningra padama tisowanan. Iraayho ko inaneng ningra ato sakadademak a lalosidan mitomadaw to lomaˈ, hato mafanaˈay kiso iraay ko ˈicel ningra padama tisowanan. Mihaenay, pakasoˈlinay kiso to sakiˈok ningra. Pakayni sakiˈok no Kawas patikol paˈorip samaanay hani? Soˈlinay ira ko kalim Ningra ato ˈicel milahci toniya sakiˈok han?

5-6. Hano papakasoˈlin kita, iraay ko kalim ni Yihofa patikol a paˈorip to mapatayay tamdaw hani?

⁵ Iraay ko kalim ni Yihofa patikol paˈorip to mapatayay tamdaw han? Iraay. Mikayatan Ningra ko pina a tamdaw mitilid i Fangcalay Cudad to pakayniay patikol maˈorip a sakiˈok. (Isaya 26:19; Hosiya 13:14; Paˈarawan 20:11-13) Roma i, ano mikiˈokho ci Yihofa i, o lalahcien Ningra a midemak. (Yosuwa 23:14) Soˈlinay haw i, makalimay ci Yihofa patikol paˈorip to mapatayay a tamdaw, hano mafanaˈ kita hani?

⁶ Mikitini i sowal ni Yopu mamahapinang ita, mafanaˈay cingra ano mapatayto cingra i, ciharatengay ci Yihofa to sapiliyawaw a minengneng cingranan. (Yopu 14:14, 15) Pakayni to polong a madimadiay mapatayay a sikawdan i, iraay ko mahaenay a harateng ni Yihofa, tada makalimay Cingra patikol a paˈorip cangranan maemin, tanoktokto ko tireng nangra, lipahak ko kaˈorip. Nikawrira, ˈayaw no patay caayho ka fanaˈ ci Yihofaan a masaˈofaday a tamdaw, wa misamaanto hani? Ciharatengay ko ciolahay a Kawas to sapatatikolaw cangranan a paˈorip. (Dmak 24:15) Halamhamay cangranan mala widang Ningra cangra, hanaca midaˈoc a maˈorip i fafekang no sera. (Yohani 3:16) Tada ihkalay, iraay ko kalim ni Yihofa patikol paˈorip to mapatayay a tamdaw.

7-8. Hano papakasoˈlin kita to iraay ko ˈicel ni Yihofa patikol paˈorip to mapatayay tamdaw?

⁷ Iraay ko ˈicel ni Yihofa patikol paˈorip to mapatayay tamdaw han? Iraay! Samanen ‘Malefotay ko ˈIcel’ Ningra. (Paˈarawan 1:8) Iraay ko ˈicel Ningra mipadik to kihcod a ˈada, mahawpay ko patay. (1 Korinto 15:26) Mafanaˈ tonini tada mihinomay ato pakalalokay kitaanan. Nengnengen ko nalifetan no fafahiyan salikaka ci Aima Anot. Itini Saka Tosa Lalood no Hekal, o pakasoˈlinay falocoˈ ningra ato paro no lomaˈ tahalifaay to pakidemay a sapalifet. O papina salawina ningra mapatayay i kapalitan no Naci, mihinoman ningra ko fafahiyan wawa saan ko sowal: “O tamdaw ano tahadaˈoc eca pakaliyas to patay, coko masafaayto no patay ko Kawas han? Cowa ko mamahaen.” Awaay ko hasasa, awaay ko mikikakaay to ˈicel ni Yihofa! Malefotay ko ˈicel a Kawas ano ngaˈayay misangaˈ to ˈorip, oha ngangaˈay miliyaw pafeli to ˈorip i tamdaw.

⁸ O nika pakasoˈlin ita to Kawas to ngangaˈay patikol paˈorip to mapatayay tamdaw a roma lalangian i, samanen awaay ko tolas no piharateng Ningra. Panganganan Ningra ko kahacecay a foˈifoˈis. (Isaya 40:26) Maharatengayho Ningra ko polong a mapatayay tamdaw. (Yopu 14:13; Luka 20:37, 38) Pakayni i papatikolen Ningra paˈorip a kahacecay tamdaw i, maharatengay Ningra ko polong a demak, mahawpay ko DNA, nalifetan ato niharatengan nonini a tamdaw.

9. Misamaanay hano pakasoˈlin kiso ci Yihofaan to papatikol paˈorip Cingra to mapatayay tamdaw anoikor hani?

⁹ Ano komoden a somowal kora ifafekangay i, tangongolay ko nika pakasoˈlin ita to papatikolen ni Yihofa paˈorip ko mapatayay tamdaw, samanen iraay ko kalim iraay ko ˈicel Ningra milahci tonini a sakiˈok. Papakasoˈlin kita tonini sakiˈok a roma a lalangian i, samanen na mihaenayto to demak ci Yihofa. Itini nolitengan, pakaynian Ningra to madimadiay sikawdan ato kanonoˈan Wawa Ningra ci Yis patikol paˈorip to mapatayay tamdaw. Dotoc i, lalengoen ita ko cecay nidemakan ni Yis a kafahkaˈan patikol paˈorip to mapatayay, itiniay i Yohani saka 11 fedengan a maˈoning konini demak.

MAPATAYAY KO TADAWIDANG NI YIS

10. Mitosil ci Yis i ngata no Yortan ˈAlo i, mifekaday ko maanan a demak i Pitani? Samaanay ko pidemak ni Yis hani? (Yohani 11:1-3)

¹⁰ ˈOsien ko Yohani 11:1-3. Mafekaday koniya demak itini hererekan no Kongyen 32 miheca, o kitiraan itiniay i Pitani. O ngaˈayay a widang ni Yis ci Lacarus ato tatosa fafahiyan salikaka ci Mariya aci Marta itiraay ko lomaˈ. (Luka 10:38-42) Adadaay ci Lacarus, calemcemay ko safa ningra, oranto i, miocoray to tamdaw pasowal ci Yisan toniya lihaf. Itiya itiniay i ngata no Yortan ˈAlo ci Yis, o raay to Pitani maedeng tosa a romiˈad ko rarakaten a lalan. (Yohani 10:40) Kaadayayan i, tiya mahela no paratohay a tamdaw ci Yis i, mapatayayto ci Lacarus. Soˈliˈlin mafanaˈ ci Yis toniya demak, kamayan cingra materek to tosa romiˈad itira, dotoc ngaˈ tayraay i Pitani. Mihaenay, tahira ci Yis i, mapatayayto ci Lacarus to sepat a romiˈad. Itiya, sapidemakaw ci Yis pakayni i widang ningra to cecay a demak, oniya demak o papaˈdil to Kawas.—Yohani 11:4, 6, 11, 17.

11. Pakayni kalawidang, mikitini toniya maˈoningay mananamay ita ko maanan kalimlaan a kimad hani?

¹¹ Pakayni kalawidang, mikitini toniya maˈoningay mananamay ita ko cecay kalimlaan a kimad. Haratengen hena, soˈliˈlin miocoran ni Marta aci Mariya ko tamdaw paratoh ci Yisan, kawra cowa ka tahidangen nangra ci Yis tayra i Pitani, o pipasowal aca ci Yisan, adadaay ko ngaˈayay widang ningra. (Yohani 11:3) Mapatay ci Lacarus ikor, na ngangaˈay ci Yis mikitini maraayay a kitiraan patikol paˈorip ci Lacarusan, kawra tayraay ci Yis i Pitani, malacafay to widang ci Martaan aci Mariyaan. I tatihi iso iraay ko cecay widang, cowa ka pitala to kasomowal iso misaaliayto to sadama iso han? Ano iraay i, o ngaˈayay malacafay cingra tisowanan misiˈayaw to pades a soˈlinay widang, mafanaˈay kiso o ngangaˈay tadiˈecen cingra. (Taneng 17:17) Nanay todongen ita ci Yis, malo soˈlinay widang no tao. Nohatini, nengnengen ita dotoc mifekaday ko maanan a demak.

12. Pafeliay ci Yis ci Martaan to maanan sakiˈok? Hano cowa ko mamalahorac a sakiˈok konini? (Yohani 11:23-26)

¹² ˈOsien ko Yohani 11:23-26. Matengil ni Marta kakalikito ci Yis tahini i Pitani, tangsol sa tayra minengneng cingranan. Pasowalay ci Marta cingranan: “Tapangaw, ano ranikayay kiso a tahini i, kona caay ka patay ko salikaka ako.” (Yohani 11:21) Soˈlin ngaˈayay ci Yis miadah ci Lacarusan, kawra sapidemakaw cingra to cecay kasapaan a demak. Sanay cingra mikiˈok: ‘Papatikol maˈorip ko salikaka iso.’ Roma i, sapadamaaw ci Martaan mitongal to pakasoˈlinay falocoˈ toniya sakiˈok, pasowalanho ni Yis cingra: ‘O patikolay paˈorip ato o ˈorip kako.’ Ci Yis iraay ko sapafeli no Kawas a ˈicel, ngaˈay patikol paˈorip to mapatayay a tamdaw. Na patikolan ningra paˈorip ko cecay patay sanayho a fafahiyan wawa, patikolho paˈorip to cecay kapah a tamdaw, oniya kapah patay sanayho toya romiˈad, patikolanto ningra paˈorip. (Luka 7:11-15; 8:49-55) Kawra sepatayto romiˈad mapatay ci Lacarus, hanaca misatapangayto maponiˈ ko tireng. O mahaenay a tamdaw wa ngaˈayho patikolen ni Yis paˈorip han?

‘LACARUS, KASADAK!’

13. Mikitini Yohani 11:32-35, maˈaraw ni Yis ci Mariya ato roma tamdaw masomad a tomangic i, samaanay ko harateng hani? (Nengnengen ko coka.)

¹³ ˈOsien ko Yohani 11:32-35. Haratengen ko pakayraan itiya, o roma safa ni Lacarus ci Mariya masadakay miˈaraw ci Yisan, malecaday ko sowal ningra toni Marta: “Tapangaw, ano ranikayay kiso a tahini i, kona caay ka patay ko salikaka ako.” Masomaday ko falocoˈ ni Mariya ato roma tamdaw. Maˈaraw ato matengil ni Yis masomad a tomangic cangra i, tada mararomay ko falocoˈ. Siniˈadaay cingra tonini a widang, rowis sanayto ko losaˈ. Cipinangay cingra o mapatayay ko salawina a tamdaw hakowaay ko adada no falocoˈ. Maedeng makalimay cingra padama cangranan miliyas toniya kararoman, ho ecato ka tomangic a cilosaˈ cangra!

14. Mikitini waywayan ni Yis, o mamafanaˈ kita o masamaanay a Kawas ci Yihofa?

¹⁴ Mikitini i waywayan ni Yis wa ngaˈay mafanaˈ kita, o matomesay to damsayay a Kawas ci Yihofa. Hano haenen ko sowal hani? Masowalay no i fafekangay a lalakaw, o harateng ato nafalocoˈan ni Yis malecaday to kakarayan a Wama. (Yohani 12:45) Maˈaraw ni Yis masomad mararom ko widang, tada siniˈadaay cangranan, rowis sanayto ko losaˈ a tomangic. Pasifanaˈay koni kitaanan, maˈaraw ni Yihofa masomad a tomangic kita, caay ka rihaday ko falocoˈ Ningra. (ˈOlic 56:8) Mafanaˈ tonini, coko sapitongalaw kiso miingid to matomesay ko damsay a Kawas hokira?

15. Mikitini Yohani 11:41-44, itini kaˈayaw no pitademan ci Lacarusan mifekaday ko maanan a demak? (Nengnengen ko coka.)

¹⁵ ˈOsien ko Yohani 11:41-44. Tayraay ci Yis i kaˈayaw no tadem ni Lacarus, papilinah to tamdaw to fakeloh i kaˈayaw no tadem. Cowa ka kahi ci Marta, maedeng ˈantohayto kora tireng no mapatayay sanay. Pasowalan ni Yis cingra: ‘Na pasowalanto ako kiso, ano pakasoˈlin kiso, coko papakaˈaraw to ˈdil no Kawas saw?’ (Yohani 11:39, 40) Dotoc micaˈengaw ci Yis to kakarayan, pasayra ci Yihofaan mitolon itini kaˈayaw no ˈalomanay, samanen sapakafanaˈaw cingra to tamdaw, dotoc o dademaken ningra a demak sahtoay o mitadiˈecay ci Yihofaan a midemak. Taˈangayay ko ngihaˈ ni Yis miowaw: ‘Lacarus, kasadak!’ Mikitini pitademan romakatay a masadak ci Lacarus! Itini pinengneng no ˈalomanay tamdaw caay ko mamalaˈosi koniya demak, kawra madangarayto ni Yis.c

16. O maˈoningay i Yohani saka 11 fedengan, hano papatongal to pakasoˈlin ita to patikolay maˈorip a hatokel?

¹⁶ O maˈoningay i Yohani saka 11 fedengan patongalay to pakasoˈlin ita, patikolay maˈorip a tokel o mamalaˈosi. Misamaanay hani? Na mikiˈokan ni Yis ci Marta saan: ‘Papatikol maˈorip ko salikaka iso.’ (Yohani 11:23) Malecad to kakarayan a Wama, iraay ko kalim ato ˈicel ni Yis midemak tonini a sakiˈok. Mikitini cilosaˈ a tomangic cingra ngaˈay mahapinang ita, mikifalocoˈay a makalim cingra palahdaw to patay ato pairaan no patay a kihcod a somad. Itini kasadakan ni Lacarus i tadem a tatokian, miliyaway ci Yis misawacay iraay ko ˈicel ningra patikol paˈorip to mapatayay. Roma i, haratengen ko sapatalipaˈelal ni Yis ci Martaan: ‘Na pasowalanto ako kiso, ano pakasoˈlin kiso, coko papakaˈaraw to ˈdil no Kawas saw?’ (Yohani 11:40) Iraay ko adihayay a lalangian ita pakasoˈlin, o pakayniay patikolay maˈorip a sakiˈok no Kawas o mamalaˈosi. Sasamaan ko pidemak ita, o mamatongal ko tanektekay a pakasoˈlin tonini a hatokel hani?

SASAMAAN MATONGAL KO PAKASOˈLIN TO PATIKOLAY MAˈORIP A HATOKEL

17. Ano micekiw to pakayniay i patikol maˈorip a maˈoningay haharatengen ko maanan?

¹⁷ Micekiw ato midotim to pakayniay i patikol maˈorip a maˈoningay. Masowalay no Fangcalay Cudad faloay ko tamdaw patikolay maˈorip i fafekang no sera.d Ngangaˈay kiso misongilaˈ miasip to kahacecay a maˈoningay han? Ano miasip i haratengen, o soˈliˈlinay materek koniya tamdaw. Iraay ko faˈinayan fafahiyan, matoˈasay ato wawa. Haratengen o maanan ko mananamay iso kalimlaan a kimad, ato sasamaan misawacay koniya maˈoningay, iraay ko kalim ato ˈicel no Kawas patikol paˈorip to mapatayay tamdaw. Mamisongilaˈho micekiw to milingatay ci Yisan patikolay maˈorip a maˈoningay, samanen o masakalimlaan a patikolay maˈorip konini. Haratengen na iraay ko pina soˈot a tamdaw pakaˈaraway tonini a demak, hanaca oniya demak o kalimlaan lalangian ita pakasoˈlin to papatikol maˈorip ko mapatayay.—1 Korinto 15:3-6, 20-22.

18. Sasamaan kiso tano sapidoko to Kawas a radiw paˈicel to pakasoˈlin to patikol maˈorip hani? (Nengnengen ko ilaenoay safanaˈ.)

¹⁸ Tano ‘sapidoko to Kawas a radiw’ paˈicel to pakasoˈlin to patikol maˈorip.e (Ifiso 5:19) O hatiniay a radiw papadama kitaanan matongal ko pakasoˈlin to patikolay maˈorip a hatokel. Ka picerid kita mitengil toniya radiw, itini pakalomaˈay a pidoko mihatatanam toniya radiw ato milengo to tatodong nonini a radiw, naˈengen konini a radiw i ponoˈ ato falocoˈ. Mihaen to demak, ano tahalifa kiso to katalawan a sapalifet, anca malahdaw ko kanonoˈan a salawina i, o fangcalay saocor ni Yihofa papadama tisowanan miharateng toniya radiw, hanaca mikitini milifok to sahinom ato ˈicel.

19. Pakayni patikol maˈorip, ngaˈayay kita miharateng to maanan hani? (Nengnengen ko sapatongal lalakaw “Wa Licayen Iso Cangra to Maanan a Salicay?”)

¹⁹ Misaka dademak to sapiharateng a inaneng. Pafeliay ci Yihofa kitaanan to sapiharateng a inaneng miharateng to kaˈorip i faelohay hekal. O cecay fafahiyan salikaka sanay a pasowal: “Miceriday kako miharateng to itiniay i faelohay hekal a maˈorip kako. Hato mahanekay ako ko fangsisay a hana i lakoing.” Ngaˈayay kiso miharateng maˈaraway ko nolitengan a madimadiay sikawdan. Mikiriwiˈay sakafanaˈaw kiso cimaanan hani? Wa licayen iso cingra to maanan a salicay hani? Ngaˈayho kiso miharateng miliyaw malacafay to mapatayay a salawina, misongilaˈ ko piharateng wa ikaka ko kangaˈay. Satapang aca o manan ko hasowal namo hani? Wa makelec ko katatakec namo han? Cowa ko papakaˈemet to falocoˈ marowis ko losaˈ namo han?

20. Mamisetek kita to falocoˈ samaan ko pidemak?

²⁰ Mikiˈokay ci Yihofa, miliyaw paˈorip to mapatayay a tamdaw, tada miakoˈiday kita Cingraanan! Pakasoˈlinay kita to mamalaˈosi konini a sakiˈok, samanen iraay ko kalim ato ˈicel ni Yihofa mihaen to demak. Nanay misetek kita to falocoˈ, padadotoc mihadak to ˈicel, matongal matongal to pakasoˈlin tonini patikolay maˈorip a hatokel. Ano mihaen i, mamatongal ko piingid ita to Kawas ci Yihofaan. Haratengen ko sakiˈok Ningra tisowanan: “O kaolahan iso a tamdaw papatikol maˈorip!”