Aka Padengen ko ‘Marengrengay Namal ni Yihofa’

1. Samaanay somowal ko Fangcalay Cudad to soˈlinay olah?

‘MALECADAY o marengrengay namal a olah, o marengrengay namal ni Yihofa. O olah i, cowa ko mamapadeng no cedas, cowa ko mamaˈalol no ˈalo.’b (Radiw ni Solomon 8:6, 7) Tada kasemeran ko kasomowal no Fangcalay Cudad to soˈlinay olah! Onini a sowal papadama to mararamoday tamdaw pakasoˈlin, o ngangaˈay tahadaˈoc ko olah no mararamoday tamdaw.

2. Sasamaan ko pidemak no mararamoday, ho eca ka fasaw ko olah nangra i kalalaˈed?

² Sakairaaw no midaˈocay a olah no mararamoday, oha mamihadak to ˈicel. Tinakoen, ano ciharatengay kita padotoc marengreng ko mataringay a namal i, o papatongalen to kasoy. Ano pakiyadi han i, o mamapadengto ko namal. Malecaday, ano sakairaaw no midaˈocay olah no mararamoday, o papadadotoc patanektek to kalalaˈed nangra. O romaroma mararamoday mafasawayto ko olah nangra sanay miharateng, mangalef ano mapaekel no sakaˈorip, adada no tireng anca palahad to wawa, hato caayto ka ngaˈay a saselaˈ, mamadoloto ira ko mahaenay a harateng. Ano ciramodayto kiso i, sasamaan ko pidemak ho caka padeng ko ‘marengrengay a namal ni Yihofa’ i raramod hani? Oniya lalakaw mamilengo to tolo a pakayraan, padama to mararamoday patanektek to kalalaˈed nangra, milifok to lipahak marenecay a raramod.c

PADADOTOCEN A PATANEKTEK KO KALALAˈED ACI YIHOFA

3. O mararamoday a tamdaw ano tanektek ko kalawidang ci Yihofaan i, hano cowato ko mamapadeng ko olah nangra tatosa? (Patnakay 4:12) (Nengnengen ko coka.)

³ Toha sakacaaw ka mapadeng ko ‘marengrengay namal ni Yihofa,’ o faˈinay ato fafahi oha mamisaˈicel patanektek to kalalaˈed aci Yihofa. Onini iraay ko maanan a sapadama to raramod nangra hani? Ano misakareteng a minengneng ko mararamoday tamdaw to kalalaˈed nangra aci Yihofa, o mamakalimto cangra kalasaka dademak to safalod no Fangcalay Cudad. Papadama cangranan miliyas ato miremo to pasangar, ho eca ka mafasaw ko olah nangra tatosa. (ˈOsien ko Patnakay 4:12.) O roma i, ano tanektekay ko kalawidang no mararamoday aci Yihofa i, o mamisaˈicelto cangra mitodong ci Yihofaan, palahad to makapahay capeling ni Yihofa, tinakoen o sidaˈitay, mihadidiay ato makahiay misodod a waywayan. (Ifiso 4:32–5:1) O faˈinay ato fafahi ano patalahkal cangra to mahaenay a makapahay capeling i, o mamadoloto cangra makakaolah. Fafahiyan salikaka ci Lina mataˈlifayto ko 25 miheca a ciraramod, sowal ningra: “Ano tanektek ko kalawidang aci Yihofa, o mamadoloto kiso maolah ato mikangodo to ramod.”

4. Hano piliˈen ni Yihofa ci Yosif aci Mariya malo wama wina ni Misiya?

⁴ Nengnengen ko tinakoan no Fangcalay Cudad. Tiya mamipiliˈ ci Yihofa to cecay mararamoday malo wama wina ni Misiya i, mikitiniay ˈalomanay a teloteloc ni Tafiti mipiliˈ ci Yosifan aci Mariyaan. Misamaanay hani? Samanen cangra tatosa tangongolay ko kalawidang aci Yihofaan, mansa mafanaˈay ci Yihofa, ikor no mararamod cangra papaisalakat Cingranan i kaˈorip. O ciramodayto a tamdaw wa ngaˈay mikitini ci Yosifan aci Mariyaan mananam ko maanan hani?

5. O malo faˈinayay a tamdaw ngangaˈay mikitini ci Yosifan mananam ko maanan?

⁵ Makahiay midofdof ci Yosif to sakayat ni Yihofa, padamaay cingranan malo sangaˈayay a faˈinay. Kinatoloay ci Yihofa pafeli ci Yosifan to ihkalay a sakayat, pasowal cingranan mamisamaan ko demak saki paro no lomaˈ, i kahacecay tangsolay ci Yosif a mitoor to demak. Soˈlinto pairaay to taˈangayay no kafalic no kaˈorip ni Yosif konini, kamayanay cingra makahi a midofdof. (Matay 1:20, 24; 2:13-15, 19-21) Tona mitengilay to sakayat no Kawas, hato ngaˈayayto ci Yosif misongilaˈ midimokos ato midipot ci Mariyaan. Haratengen hena, maˈaraw ni Mariya ko pihaen ni Yosif a midemak, maedeng matongalay ko olah cingranan, mikangodoay cingranan! O malo faˈinayay a tamdaw, ngangaˈay kiso mitodong ci Yosifan itini pidimokos to paro no lomaˈ mikilim to sakayat no Fangcalay Cudad.d Ano misarocod kiso misaka dademak to safalod no Fangcalay Cudad, caka talaw a misalof, patalahkalay kiso to olah to fafahi, o ngangaˈayho patanoktok to raramod iso. O cecay fafahiyan salikaka i Wanato mataˈlifayto ko 20 miheca ko kacifaˈinay, sowal sa cingra: “Maˈaraw ako ko faˈinay mikilim ato midofdof to sakayat ni Yihofa i, matongalayto ko pikangodo cingranan. Tada rihadayan nanay kako, pakasoˈlinay ko falocoˈ to misaˈosian ningra a demak.”

6. O malo fafahiyay a tamdaw ngangaˈay mikitini ci Mariyaan mananam ko maanan?

⁶ Tangongolay ko kalawidang ni Mariya aci Yihofa, ira ko mahaenay noka pakasoˈlin no falocoˈ ningra cowa ko pakayniay ci Yosifan. O pakayniay noka cipinang ningra to Fangcalay Cudad. (Nengnengen ko sapitadtad no Fangcalay Cudad i Luka 1:46.) Milimasmasay cingra to toki misongilaˈ a midotim. (Luka 2:19, 51) Awaay ko sasa, o kalawidang ni Mariya aci Yihofa padamaay cingranan malo ngaˈayay a fafahi. Anini, ˈalomanay fafahi misaˈicelay a mitodong to taˈarawan ni Mariya. Tinakoen, fafahiyan salikaka ci Imiko somowalay: “Ta caayho ka cifaˈinay kako i, milimasmasay ko niyah to toki micekiw, midotim ato mitolon. Ciraramodto i, o faˈinay ko mikeriday takowanan a mitolon, mikeridayho itini pakalomaˈay noka pidoko. Mahapinangay ako hato mitiˈeray kako to faˈinay a patanektek to pakasoˈlinay falocoˈ. Talipaˈelalay kako ao niyah ko mamitamorong to ˈinorong, patanoktok to kalawidang aci Yihofaan. Nohatini sato i, o kako ko milimasmasay to toki, mitekeday a mitolon ci Yihofaan, micekiw to Kimad Ningra, halo misongilaˈ a midotim to maˈosiay a lalakaw.” (Kalatiya 6:5) O malo fafahiyay a tamdaw, padadotoc kiso mitongal to kalawidang aci Yihofa, o faˈinayto iso i, airato ko lalangian ningra maolah ato pakahemek tisowanan.—Taneng 31:30.

7. Pakayni malacafay midoko ci Yihofaan, o mararamoday tatosa mikitini ci Yosifan aci Mariyaan mananam ko maanan?

⁷ Ci Yosif aci Mariya malacafayay a misaˈicel patanektek to kalalaˈed nangra aci Yihofa. Mafanaˈay cangra, tada masakalimlaan mapolong ko paro no lomaˈ midoko ci Yihofaan. (Luka 2:22-24, 41; 4:16) Latek cowa ko madoloay mihaen to demak, mangalefay ˈaloman ˈalomanto ko wawa i, tada pasangarayto, kawra kamayan madangar nangra. Pakaynien to aniniay a mararamoday ko sowal, tada o ngaˈayay a taˈarawan cangra. Ano malecaday kiso ci Yosifan aci Mariyaan ira ko wawa, milimasmas to toki mirienang to saˈopo anca misikay to pakalomaˈay a pidoko cowa ko madoloay alatek, mamikilimho to toki ko mararamoday tatosa micekiw anoca mitolon, mangalef ko nika pasangar alatek. Nikawrira haratengen, ano malacafay kamo midoko ci Yihofaan i, o kalalaˈed namo aci Yihofa, ato kalalaˈed namo tatosa, mangalef ko nika kedec. Mansa, papaisalakaten ko midokoay to Kawas a demak itini nokaˈorip namo.

8. O kalalaˈed no mararamoday ano cowa ka tadangaˈay i, samaan ko pidemak nangra ngaˈ mikitini pakalomaˈay a pidoko milifok to adihayay haepoc?

⁸ O kalalaˈed no mararamoday ano cowa ka tadangaˈay i, ano maharatengho to mamalacafay kamo i pakalomaˈay a pidoko i, o maanan ko kapo wa saan kiso miharateng alatek. Ano mahaenay i, sasamaanto aki? Salakatho kapotoˈen masasowal to kaolahan ato kahemekan a demak namo tatosa. Ano mihaen i, palidlid sato masalofto ko kalalaˈed namo, mamakahito malacafay midoko ci Yihofaan.

PALAKEN KO TOKI MALACAFAY

9. Misamaanay hano mamipalak to toki ko mararamoday a malacafay hani?

⁹ Ano hasaka padadotocaw a malikat ko namal no olah i, palaken namo ko toki a malacafay tatosa wangaˈ. Mihaen i, mamadoloto kamo cipinang to harateng ato falocoˈ no ramod, ho cato ka palidlid sa mararaay kamo. (Satapangan 2:24) Nengnengen ko tinakoan ni Liliya aci Losolan. ˈAyaw no 15 miheca, mararamoday cangra, kawra ikor caho ka halafin mahapinangayto ko cecay a demak. Sowal sa ci Liliya: “Mahapinangay niyam, ikor no raramod cowa ka lecad to niharatengan niyam isaˈayaw. Awaay ko toki niyam malacafay tatosa, to romiˈamiˈad makamatayalay kami ato no lomaˈ a dademaken, irato ko wawa i, mangalefay awaay ko toki niyam malacafay. Ano caka padeteng han a milimasmas to sakairaaw notekedan a tatosa a toki i, wa mafasaw mafasawto ko kaolah niyam tatosa.”

10. O mararamoday ngaˈayay samaan misaka dademak to safalod no Ifiso 5:15, 16?

¹⁰ Sasamaan ko mararamoday ira ko notekedan a toki tatosa hani? Papadeteng kamo mihadak to toki malacafay alatek. (ˈOsien ko Ifiso 5:15, 16.) O sowal no faˈinayan salikaka ci Wocongto i Nayciliya: “Itini milimasmas to toki to romiˈamiˈad i, isaˈayawan ako milimasmas ko notekedan a toki malacafay to fafahi.” (Filipi 1:10) Itini i Moetowa, fafahiyan salikaka ci Anastasiya ato faˈinay malacafayay malo kasakilac milisoˈay a tayal, nengnengen to samaanay cingra misaka dademak to toki no niyah. Sanay ko sowal ningra: “ˈIfowa ko faˈinay ako a midimokos to ˈinorong ningra i, misaˈicelay kako milahci to mako dademaken. Mihaen i, ikor irato ko toki niyam malacafay dademak.” Kawra ano pasangaray kamo tatosa mahela ko toki malacafay i, sasamaanto aki?

11. Ci Akuila aci Priskila malacafayayto midemak to maanan hani?

¹¹ Itini saka 1 hahekalan, maolahay ko ˈalomanay salikaka ci Akuilaan aci Priskilaan, o ciraramoday a tamdaw ngaˈayay minanam tonini mararamoday. (Loma 16:3, 4) Soˈlin cowa pisahci ko Fangcalay Cudad somowal to samaanay ko kararamod nangra, kawra mafanaˈay kita, malacafayay cangra matayal, mitosil, malacafayayho mipadang to tao. (Dmak 18:2, 3, 24-26) Soˈlinay haw i, ano masowalho no Fangcalay Cudad konini mararamoday i, masowalayto ko ngangan nangra tatosa.

12. O mararamoday sasamaan mipalak to toki malacafay hani? (Nengnengen ko coka.)

¹² O ciramodayto a tamdaw ngaˈayay misamaan mitodong ci Akuila aci Priskilaan hani? Saharateratengen o maanan ko dademaken namo tatosa. O romaroma tayal ngaˈayay kamo malacafay a midemak, hamaan misiwatik a dademak? Tinakoen, malacafayay ci Akuila aci Priskila a mitosil, kamo ngangaˈay malacafay milimasmas to toki mihaen to demak han? Ci Akuila aci Priskila malacafayayto a matayal, soˈliˈlin o tayal no miso caay ka lecad tono ramod alatek, kawra ngaˈayay kamo malacafay dademak tono lomaˈ a tayal han? (Patnakay 4:9) Ano madadama kamo i, malecaday o makakapotay kamo, irato ko toki misacaciyaw to tihi. Ci Lopote aci Linta mataˈlifayto ko 50 miheca mararamod. Sanay ko sowal ni Lopote: “Cowa ka adihay ko toki niyam malacafay misalama. Ano mifanaw kako to kaysing i, misisitay a miˈicang to kaysing ko fafahi ako, anoca itini kako i pahanaan mifaenot to semot i, iraay cingra mikalacafay takowanan. Rahekeran nanay kako. Malacafay a matayal makedecayto ko kalalaˈed niyam, matongal matongalayto ko kaolah niyam to tihi.”

13. O mararamoday mamisamaan ngaˈ makakedec ko kalalaˈed nangra hani?

¹³ Kawra haratengen, ano malacafayho ko mararamoday tatosa, matongalayto ko kakedec nangra sai, awaay ko pinang. Sanay ko sowal no cecay fafahiyan salikaka i Pracil: “Aniniay a lintad a nokaˈorip adihayay ko mikalisangaˈay to falocoˈ a demak. Mahapinangay ako, ano itiniho i cecay a lalomaˈan i, o malacafayayto sanay cangra miharateng. ˈArawhan mafanaˈay kako, o mararamoday cowa ko nika lacafay aca, caciharatengho to saali no tihi wangaˈ.” Pakayni toninian, nengnengen ci Polono ato fafahi ci Taysi samaanay ko demak nangra. Sanay ci Polono: “Ano pahanhan kami i, cowa ka pinengneng to soci, soˈlinay a rihakedan kami tatosa aca.”

14. O mararamoday ano cowa ka olah mipalak to toki malacafay i, mamisamaanto hani?

¹⁴ Nikawrira, alatek cowa ka olah kiso mipalak to toki malacafay to ramod. Awaay ko kalecadan namo a kahemekan a demak alatek, anca malacafayho kamo i, cowa ka hemek ko tihi. Samaan ko pidemak namo hani? Haratengen ko satapangan nonini a lalakaw masowalay a sapatinako no mataringay a namal. O namal cowa ka tangsol sa marengrengto, ao nanaˈonen iso a mitongal ko taˈangayay a kasoy. Malecaday, to romiˈamiˈad palaken namo ko pina ehon a malacafay, halo midemak to pina kaolahan namo tatosa a demak, ao cowa ko mamikidat to sakalacongis a demak. (Yakop 3:18) Tanamen namo a mihaen ko demak, alatek wa miliyawto a matotom ko olah namo a tatosa.

MASASIKANGODO

15. Ano hasaka rengrengaw ko olah no mararamoday i, misamaanay hano o masasikangodo cangra hani?

¹⁵ O mikangodoay itini i raramod masakalimlaan. Ano ira ko fali marengrengay ko namal, ano awa ko fali i, kahnayay a mapadeng ko namal. Malecaday, ano caka masasikangodo i, o olah no mararamoday kahnayay a mafasaw. O mararamoday ano makamisaˈicel masasikangodo to tihi i, o mamarengreng ko olah nangra tatosa. Nikawrira haratengen, cowa ko miso aca harateng to mikangodoay kiso to ramod, ao harateng no ramod to mikangodoan cingra. Ci Peny aci Aret mataˈlifayto ko 25 mihecaan a mararamod, sowal ni Peny: “O masasikangodoay a waywayan palipahakay to paro no lomaˈ niyam. Iraay ko pasalat niyam pasowal to harateng no niyah, samanen mafanaˈay kami, misakaretengay kami to pinengneng no tihi.” Wa misamaan ko demak iso ngaˈ mikangodoan kako, saan ko ramod miharateng hani? Nengnengen ko taˈarawan ni Apraham aci Sara.

16. O malo faˈinayay sasamaan mitodong ci Aprahaman? (1 Pitiro 3:7) (Nengnengen ko coka.)

¹⁶ Tada mikangodoay ci Apraham ci Saraan. Misinanotay cingra to harateng ato nafalocoˈan ni Sara. Kinacecayay, tada masomaday ci Sara, oranto pasowalan ningra ci Apraham to roray no falocoˈ, hato mirorohay ci Aprahaman. Mangolaway ci Apraham han? Cowa, mafanaˈay cingra to o midofdofay to faˈinay a ngaˈayay tihi ci Sara. Mihaenay i, mitengilan ni Apraham ko sowal ni Sara, misaˈicel a misaysay to pasangar. (Satapangan 16:5, 6) Ngaˈayay mananam ita ko maanan hani? O malo faˈinayay, iraay ko fadangalan iso misaˈosi to demak no paro no lomaˈ. (1 Korinto 11:3) Nikawrira, ˈayaw no misaˈosi i, salakatho misinanot to harateng no fafahi, o ciolahay ko pihaen to demak. Onini a saˈosi ano mamifiyor to fafahi i, o aisalakatenho a milicay cingra, samaanay ko piharateng ningra. (1 Korinto 13:4, 5) Ano marawrawan nanay ko fafahi iso, sapikilimaw tisowanan a mifowah, sinanoten iso ko nafalocoˈan ningra, misongilaˈay kiso mitengil to sowal ningra han? (ˈOsien ko 1 Pitiro 3:7.) Ci Ancila aci Temiteli mararamod mangataayto 30 mihecaan, sanay ci Ancila mikangodoay ko faˈinay takowanan, sanay ko sowal ningra: “Ano ecato ka hemek kako, anca sapisacaciyawaw aca, makahiay a mitengil to sowal ako ci Temiteli. Soˈlinto maketer ko sowal ako, kamayan mihadidi cingra takowanan.”

17. O malo fafahiyay sasamaan mitodong ci Saraan? (1 Pitiro 3:5, 6)

¹⁷ Tada mikangodoay ci Sara ci Aprahaman, mansa midamaay cingra to pisaˈosi ni Apraham. (Satapangan 12:5) Kinacecayay, sapihamhamaw ci Apraham to papina cowa ko kafanaˈan a tamdaw, oranto ocoran ningra ci Sara papisaday to kadofahay a kakaenen mipatahka to lafang. (Satapangan 18:6) Midamaay ci Sara to saˈosi ni Apraham, tangsolay a midemak. O malo fafahiyay, ngaˈayay kiso mitodong ci Saraan, midama to saˈosi no faˈinay, mihaen i, o papatanoktok kiso to raramod namo. (ˈOsien ko 1 Pitiro 3:5, 6.) Oya masowalay i fafekangay a fatac, mikangodoay ko fafahi ako takowanan sanay ci Temiteli, sowal sa cingra: “Soˈlinto caka lecad ko piharateng niyam, misaˈicelay ci Ancila midama to misaˈosian ako, tada miakoˈiday kako cingranan. O teloc no demak soˈlinto cowa ka tadangaˈay, cowa pilikaf cingra takowanan.” Ano mikangodoay ko tamdaw tisowanan i, o mamadoloto kiso a maolah cingranan.

18. Misaˈicel ko mararamoday parengreng to olah eca ka mapadeng, wa ira ko maanan ngaˈayay a minaroˈan hani?

¹⁸ Anini, misahalakaay ci Satan sapipalakaw to raramod no Krisciyang. Samanen mafanaˈay cingra ano padengen ningra ko sano namalay a olah no mararamoday, mamisatapangto cangra miliyas ci Yihofaan. Kawrira, o soˈlinay a olah cowa ko mamapadeng! Mihaenay, nanay o olah namo mararamod malecad to nisowalan no Radiw ni Solomon. Seteken ko falocoˈ paisalakaten ci Yihofa itini i raramod namo, limasmasen ko toki a malacafay, malakangodo to harateng no tihi, sinanoten ko saali no tihi. Mihaen i, o raramod namo o papaˈdil toya Pipowaran no soˈlinay olah a Yihofaan, o olah namo mararamod mamalecad to marengrengay a namal malikat eca ka padeng, tahira i daˈoc.