Mamakahi Kiso Patafang to Tireng ci Yihofaan Han?

1-2. ˈAyaw no micada to paputisem ko cecay tamdaw sasamaan ko pidemak?

ITINI mataˈlifayto 5 mihecaan, mataˈlifay ko 100 ˈofad micadaay to paputisem malo Misawacayay Tamdaw ni Yihofa. Ilalomaˈ nangra ˈalomanay tamdaw malecaday to saka 1 hahekalan a Timotian, ‘nano ˈengaengaho mafanaˈayto to Fangcalay Cudad.’ (2 Timoti 3:​14, 15) O romaroma tamdaw lomahadto ikor, anca matoˈasto fanaˈ sanayho to soˈlinay kimad. ˈAyaw no pina miheca, o cecay matoˈasay a fofo ikor no minanam to Fangcalay Cudad malo Misawacayay Tamdaw ni Yihofa, micada to paputisem cingra i, 97 ko mihecaan!

² Minanamay kiso nohatini to Fangcalay Cudad han? Anca nano kaemangho itiniayto kiso i soˈlinay kimad a lomahad hokira? Misimsimay kiso to sapicadaaw to paputisem han? O ngaˈayay a patosokan konini, kawra ˈayaw no micada kiso to paputisem, aisalakatho patafang to tireng ci Yihofaan. Onini a lalakaw mamitadtad, o manan ko tatodong no patafangay to tireng, papadamaho tisowanan mihapinang, ano makalimay kiso patafang to tireng micada to paputisem, hano cowa ko mamatalaw kiso mihawang a talaˈayaw.

O MANAN KO TATODONG NO PATAFANGAY TO TIRENG?

3. Patinakoen mitadtad, o cimacima ko patafangan ci Yihofaan a tamdaw.

³ Itini Fangcalay Cudad, mitoroˈan to ‘patafang to tireng’ pakayniay i fangcalay a araaw a pafafidaˈen sanay ko tatodong. Nolitengan polong a Israil ngasaw sahtoay o patafangay to tireng ci Yihofaan, nikawrira o papina nangra tano mikiriwiˈay a pakayraan patafang to niyahan a midoko ci Yihofaan. Tinakoen, sapitafo ni Aron to fongoh a pahok paketingan ko ‘tahapinangan to patafangay to tireng a paya’ sanay, o matediay ekim a paya konini, tahapinangan to pafafidaˈan ci Aron, itini mikiriwiˈay a saaroˈan matayal, malo sakakaay saysi no Israil. (Lifi 8:9) O Micidekay a tamdaw patafangay to niyahan, tano mikiriwiˈay a pakayraan midoko ci Yihofaan. ‘Micidekay a tamdaw’ sanay a sowal mikitiniay i no Hipray a sowal ‘nacir’ hananay, tatodong i, ‘Mipafafidaˈan a tamdaw’ anca ‘Mipatafangan a tamdaw.’ O mamidofdof cangra to pina mikiriwiˈay a saˈosi no Rikec ni Mosi.​​—⁠Saˈosi 6:​2-8.

4. (1) Patafang to tireng kiso ci Yihofaan ikor, iraay ko maanan mikiriwiˈay a araaw no kaˈorip hani? (2) O maanan ko tatodong no ‘caayto kono niyah ko tireng’ hani? (Nengnengen ko coka.)

⁴ Patafang kiso to tireng ci Yihofaan, mipiliˈay to mamikotod ci Yis Kristoan, hanaca paisalakat to araaw ni Yihofa i nokaˈorip no niyah. O manan ko tatodong nonini hani? Sowal ni Yis: ‘O cima sapikotodaw takowanan, mamihayi caayto kono niyah ko tireng.’ (Matay 16:24) ‘Mamihayi caayto kono niyah ko tireng’ onini a sowal no Krisiya mihongyakan to “pasowal to niyahan ‘akato’ ” sanay. Ikor no patafang ko tamdaw to tireng ci Yihofaan, ano mahapinang ko cecay a demak cowa ka tatodong to araaw ni Yihofa i, papasowal to “akato” saan. (2 Korinto 5:​14, 15) Tinakoen, mamifalah to kihcod ‘mitooray to ciraraway a waywayan,’ mahawpay ko malafoay a madadiˈiyay. (Kalatiya 5:​19-​21; 1 Korinto 6:​18) Midoedo to sapalimoˈot no Kawas a midemak, pakarorayay tisowanan han? Ano maolahay kiso ci Yihofaan, hanaca pakasoˈlin midofdof to sarikec Ningra o sakaciepoc no miso, o sapalimoˈot Ningra cowato ko karetengay a ˈinorong. (ˈOlic 119:97; Isaya 48:​17, 18) Faˈinayan salikaka ci Nikolas sanay ko sowal, “Haenen iso a miharateng, o palinian ni Yihofa cowa ko mirofoay tisowanan a tapalitan, ao marad a pirofoan to layong, o palinian Ningra cowa ko papalahdaw to pasalat iso, ao mamidipot tisowanan eca ka madokaˈ.”

5. (1) Sasamaan kiso patafang to tireng ci Yihofaan hani? (2) Patafang to tireng ato micada to paputisem iraay ko maanan a kasasiroma hani? (Nengnengen ko coka.)

⁵ Sasamaan kiso patafang to tireng ci Yihofaan hani? Itini satolon pasayra ci Yihofaan miketon to sowal, mamisamacay kiso midoko Cingranan, hanaca paisalakaten ko araaw Ningra i nokaˈorip. Mihaen o miketonay kiso to sowal ci Yihofaan, papadadotoc kiso ‘misarocod to falocoˈ, harateng, ˈicel, tano polong a ˈorip’ maolah Cingranan. (Marko 12:30) Patafangay to tireng o notekedan iso a demak, edengan kiso aci Yihofa ko mafanaˈay. Micadaay to paputisem o pakapapotalay a demak konini, ngaˈayay mafanaˈ ko romaroma tamdaw maherekayto kiso patafang to tireng ci Yihofaan. Ano mikifalocoˈay kiso miketon to sowal patafang to tireng, o dadoedoen ko miketonan a sowal, makalimay ci Yihofa mihaen ko pidemak iso.​​—⁠Patnakay 5:​4, 5.

HANO PATAFANGEN KO TIRENG CI YIHOFAAN?

6. Ciharateng ko tamdaw sapatafangaw to tireng ci Yihofaan, o kalimlaan a lalangian o maanan hani?

⁶ Patafang kiso to tireng ci Yihofaan sakakaay lalangian i, tada maolahay kiso Cingranan. O olah iso ci Yihofaan cowa kono haratengan aca, o mikitiniay i ‘matatodongay a sifanaˈ.’ Matongalay ko kafanaˈ iso ci Yihofaan ato araaw Ningra, mansa matongal ko olah iso Cingranan. (Kolosay 1:9) Minanam kiso to Fangcalay Cudad ikor pakasoˈlinay (1) o soˈliˈlinay materek ci Yihofa, (2) o Fangcalay Cudad mikayatan Ningra ko tamdaw mitilid, o Kimad Ningra, (3) misaka dademakan Ningra ko likakawa Ningra palaˈosi to araaw no Niyah.

7. ˈAyaw no patafang kita to tireng ci Yihofaan salakat mamidemakho to maanan a demak hani?

⁷ ˈAyaw no patafang to tireng ko tamdaw ci Yihofaan sasalakatho midemak to maanan a demakan hani? Aisalakatho cingra cipinang to taˈeneran a kimad no Fangcalay Cudad, hanaca midoedoay to palinian no Fangcalay Cudad maˈorip, misarocodho mitosil i tamdaw. (Matay 28:​19, 20) Samanen matongalay ko olah ningra ci Yihofaan, mansa makalimay sapisamacayaw midoko ci Yihofaan. Mahaenay ko demak iso han? Ano hatiraay i, patafang kiso to tireng micada to paputisem, cowato ko pakayniay sapakahemekaw to wama wina anca pakingkiway a singsi, cowaho ko pakayniay i widang a micada to paputisem.

8. O miakoˈiday a falocoˈ sasamaan pakalalok tisowanan patafang to tireng ci Yihofaan? (ˈOlic 116:​12-​14)

⁸ Haratengen ko kihcod midemakan ni Yihofa pakayni tisowanan, makalimayto kiso sapatafangaw to tireng ci Yihofaan. (ˈOsien ko ˈOlic 116:​12-​14.) Sowal no Fangcalay Cudad, ‘masakenakenaay a fangcalay a sapatelong, masakenakenaay a malefotay a sapalifon’ sahtoay mikitiniay ci Yihofaan. (Yakop 1:​17) Itini sapafeli ni Yihofa tisowanan a sapatelong, sakakaay kalimlaan i, o sapatefoc. Kinafalahan Ningra ko Wawa Ningra ci Yis, padama tisowanan ngaˈay mala widang Ningra, iraho ko tokel tahadaˈoc maˈorip. (1 Yohani 4:​9, 10, 19) Pakaynian ni Yihofa i sapatefoc paihkal to kasapaan a olah tisowanan, pafeliayho tisowanan to romaroma sapalemed. Miakoˈiday kiso Cingranan, mansa makalim patafang to tireng Cingranan. (Limoˈot 16:17; 2 Korinto 5:​15) Pakayni toninian, ngaˈayay nengnengen iso ko Layapen ko Midaˈocay ˈOrip! saka 46 fedengan saka 4 kalimlaan ato 3 ehon kamotoˈay a ika Pafelien ci Yihofa to Sapakaolah Ita.

MAHEREKAYTO KISO MISADAY PATAFANG TO TIRENG MICADA TO PAPUTISEM HAN?

9. Hano cowa ka ngaˈay kiso pakayni i saroero a patafang to tireng ci Yihofaan hani?

⁹ Cowaho ka herek misaday ko niyah patafang to tireng micada to paputisem saan kiso miharateng alatek. O lalangian i, iraayho ko fafalicen iso i nokaˈorip alatek, hongaˈ matoor ko palinian ni Yihofa. Misaaliayho kiso to toki paˈicel to pakasoˈlinay falocoˈ alatek. (Kolosay 2:​6, 7) Aka mapawan o kacakat no kahacecay tamdaw cowa ka lecalecad, o kaemangay tamdaw cowa ka itini malecaday a mihecaan maherek a misaday patafang to tireng micada to paputisem. Itini pihapinang to kacakat no niyah i, simsimen ko pakayraan no niyah, aka palalinien ko tao.​​—⁠Kalatiya 6:​4, 5.

10. Ano mahapinang iso to cowaho ka harek ko niyah misaday patafang to tireng micada to paputisem, sasamaan ko pidemak hani? (Nengnengen ko sapatongal lalakaw “Sapafeli to Itiniay Soˈlinay Kimad Lomahad a Tamdaw.”)

¹⁰ Soˈlin mahapinang iso caayho ka herek misaday ko niyah patafang to tireng ci Yihofaan, aka pisawad tonini a patosokan. Tolonen ci Yihofa micangacang to sapadama Ningra tisowanan a misalof to sasalofen. (Filipi 2:​13; 3:​16) Ngaˈay pakasoˈlinen iso, cowa ko pitengil aca ni Yihofa to satolon iso, ao papacaˈofen Ningra kiso.​​—⁠1 Yohani 5:​14.

HANO CISASA KO HARATENG NO ROMAROMA TAMDAW?

11. Sasamaan ci Yihofa padama kitanan madimadi Cingranan?

¹¹ Romaroma tamdaw iraay ko tatodong patafang to tireng micada to paputisem, kawra manayaray eca ka pidemak. Alatek matalaway cangra ikor no micada to paputisem pakayni kapakidem no raraw a mafalah no kasakopang. Ano iraay ko mahaenay a sasa no harateng iso, aka calemcem, papafelien ni Yihofa ko kihcod a saali iso, padama tisowanan ‘matatodong ko waywayan i falocoˈ [Ningra], maamaan a demakan palipahak Cingranan.’ (Kolosay 1:​10) Papafeliho Cingra to ˈicel tisowanan, ho ngaˈay kiso midemak to matatodongay a demak. O nalifetan no ˈalomanay tamdaw misawacayay mamihaen ko demak ni Yihofa. (1 Korinto 10:13) Soˈlinay haw i, o mafalahay a tamdaw cowa ka ˈaloman. Ira ko sapadama ni Yihofa, o ngangaˈay madimadi ko finawlan Ningra i Cingranan.

12. Sasamaan ko pidemak ita ngaˈ eca ka pidemak to pakidemay a raraw?

¹² O kahacecay coka lefot a tamdaw iraay ko macadaay a sakayhid. (Yakop 1:​14) Nikawrira mamarefong i sakayhid hokira o ngangaˈay kiso ko mipiliˈ. Sakoniya sowal, edengan kiso ko mamisaˈosi sasamaan ko kaˈorip no niyah. Sowal no romaroma tamdaw cowa pakaˈimer to macalohay harateng sanay, kawra oha ngangaˈay kiso minanam miˈimer to coos no harateng. Soˈlin sadak sa ko pina mararaway harateng, o ngangaˈay maˈimer iso ko niyah, eca ka pitoor to coos midemak to mararaway a demak. Sapiremoaw tonini, mitolon to romiˈamiˈad, palahaden ko nanaman miasip to Fangcalay Cudad, mirienang to saˈopo no Krisciyang, mitosilho i tamdaw. Kiemel ko pidemak iso tonini a demak, papaira to ˈicel midofdof to miketonan a sowal patafang to tireng. Roma i, aka mapawan o papadamaen ni Yihofa kiso.​​—⁠Kalatiya 5:​16.

13. Patirengay ci Yosif i kitanan to maanan ngaˈayay taˈarawan?

¹³ Ano talaˈayaw kiso miharateng misiˈayaw to sakayhid i, sasamaan ko pidemak, mamadoloto a madimadi ci Yihofaan, midofdof to miketonan a sowal no niyah patafang to tireng. Itini Fangcalay Cudad mihaenay ko demak no romaroma tamdaw. Soˈlin cowa ko malefotay a tamdaw cangra, kawra patirengay cangra to ngaˈayay taˈarawan no mita. O ngaˈayay a tinakoan ci Yosif, soˈliˈlin misaliyaliyaway mikayhid ko fafahi ni Potifar cingranan, kawra caay ka makayhid cingra. Sowal no Fangcalay Cudad kitanan, ‘minaˈayan ningra ko fafahi no tawki,’ hanaca sanay ko sowal: ‘Mana ngaˈay kako midemak to hatiniay tatiihay a demak, pakararaw to Kawas hani?’ (Satapangan 39:​8-​10) Ihkalay mahapinang, ˈayaw no makayhid ci Yosif maherekayto miharateng sasamaan ko pidemak no niyah, mansa tiya soˈlin a makayhid cingra i, tangsolay midemak to matatodongay a demak.

14. Sasamaan ko pidemak ita ngaˈ tanoktok micoˈay to sakayhid hani?

¹⁴ Sasamaan kiso mitodong ci Yosifan, misetek to falocoˈ madimadi ci Yihofaan hani? Nohatiniho ngaˈayto kiso miharateng ano micada to sakayhid i, sasamaan ko pidemak. Ka padadotoc misaˈicel, minanam tangsol minaˈay to sakayhid, eca ka pidemak to kapiliˈan ni Yihofa a demak, ano o piharateng aca caay ka ngaˈay. (ˈOlic 97:10; 119:165) Ano mihaen, tahacada kiso to sakayhid cowato ko mamangiyangi, samanen mafanaˈayto kiso sasamaan ko demak, hanaca maherekayto misetek ko falocoˈ mihaen ko demak.

15. O cecay tamdaw sasamaan paihkal to ‘mikifalocoˈay micangacang’ ko niyah ci Yihofaan hani? (Hipray 11:6)

¹⁵ Mafanaˈayto kiso mahelaay no niyah ko soˈlinay kimad alatek, hanaca makalim sapisarocodaw midoko ci Yihofaan, kawra matalawayho kiso patafang to tireng micada to paputisem. Ano mahaenay i, todongen ko Hongti ci Tafiti, micangacang ci Yihofaan: ‘Kawasaw, nanay kinsaen kako, cipinang to nafalocoˈan ako, nanay palifeten kako, cipinang to cariraw ako. Nanay hapinangen ko falocoˈ ako iraay ko mararaway a harateng hokira, nanay kayaten kako romakat to midaˈocay a lalan.’ (ˈOlic 139:​23, 24) Pasayra kiso i patafangay to tireng micada to paputisem a patosokan padadotoc misaˈicel, paihkalay koni to ‘mikifalocoˈay kiso micangacang’ ci Yihofaan. O papalifonen ni Yihofa ko mahaenay a tamdaw.​​—⁠ˈOsien ko Hipray 11:6.

PADADOTOC MIINGID CI YIHOFAAN

16-17. Misolotan ni Yihofa ko itiniay i soˈlinay kimad lomahad a kaemangay tamdaw, hano saan ko sowal hani? (Yohani 6:​44)

¹⁶ Sowal ni Yis, o nisawawaan ningra sahtoay o ci Yihofa ko misolotay. (ˈOsien ko Yohani 6:​44.) Haratengen konini kalimlaan a kimad pakayni tisowanan iraay ko maanan a tatodong? O misolotanho ni Yihofa a tamdaw, sahtoay o ngaˈayay ningra ko manengnengay ni Yihofa, o ‘kalimlaan a hafay’ anca o ‘mikiriwiˈay a hafay’ saan ko pinengneng cingranan. (Limoˈot 7:6 ato roma pihongyak.) Mahaenay ko pinengneng ni Yihofa tisowanan.

¹⁷ Kawra, ano itiniay kiso i soˈlinay kimad lomahad a kaemangay a tamdaw, o niyah o wama wina ko mikeriday midoko ci Yihofaan, cowa ko ci Yihofa ko misolotay to niyah saan kiso miharateng alatek. Kawra aka mapawan, itini pinengneng ni Yihofa o mikiriwiˈay kiso, cowa ko wawa aca no nima kiso. Misolotan Ningra ko kahacecay tamdaw, mahawpay ko kahacecay no itiniay i soˈlinay kimad lomahad a kaemangay tamdaw. Roma i, sanay ko Fangcalay Cudad: ‘Ka piingid kamo to Kawas, aingiden no Kawas kamo.’ (Yakop 4:8; 1 Rayray 28:9) Mihaenay, ano talaˈayaw kiso miingid ci Yihofaan i, o mamahaen Cingra o misowalan i Yakop 4:8 miingid tisowanan.​​—⁠Nengnengen ko 2 Tisalonika 2:​13.

18. Dotoc a lalakaw mamilengo to maanan? (ˈOlic 40:8)

¹⁸ Salo sanay ko falocoˈ ni Yis patafang to niyah i kakarayan Wama, ano maananto ko saali no Wama cingranan midemak to maanan, makahiay cingra midemak. (ˈOsien ko ˈOlic 40:8; Hipray 10:7) Ano patafang kiso to tireng ci Yihofaan hanaca micada to paputisem, o mitodongay to ngaˈayay taˈarawan ni Yis. Dotoc a lalakaw mamilengo, o manan ko papadama tisowanan ikor no micada to paputisem padadotoc madimadi midoko ci Yihofaan.