Ikor no Micada to Paputisem ‘Padadotoc Mikotod’ ci Yisan

1-2. Micada to paputisem ikor hano mala ngaˈayayto ko kaˈorip hani?

MICADA to paputisem a miteko to taˈangayay paro no lomaˈ ni Yihofa i, tada o kalipahakan a demak! Ci Tafiti itini i cecay ˈolic sanay pasowal ci Yihofaan: ‘O mipiliˈan Iso a tamdaw ngangaˈay miingid Tisowanan, o maroˈay i potal no lomaˈ Iso i, tada malemeday!’ (ˈOlic 65:4) O micadaay to paputisem a tamdaw maedeng mahecaday ko nafalocoˈan ci Tafitian.

² Ci Yihofa cowa ka saolatekay sa mitahidang to tamdaw micomod i potal no lomaˈ Ningra. Malecad to misowalan i fafekang a lalakaw, edengan o misasoˈlinay ko falocoˈ a tamdaw ko miingidan ni Yihofa malo widang Ningra. (Yakop 4:8) Mipatafang to tireng kiso ci Yihofaan halo micada to paputisem i, o ngangaˈayto ira ko makelecay a noka lalaˈed ci Yihofaan. Ikor, o ‘tataktaken ni Yihofa ko sapalemed i [tisowanan], tahira i awa ko kacangoˈotan [iso].’​​—⁠Malaki 3:​10; Yirimiya 17:​7, 8.

3. Patafang to tireng micada to paputisem ikor mamitamorong to maanan kalimlaan a ˈinorong hani? (Patnakay 5:​4, 5)

³ Haratengen, o satapangan aca ko micadaay to paputisem. Talaˈayaw kiso a mihawang tonini ikor, soˈlinto tahasiˈayaw to sakayhid anoca sapalifet, sasarocoden iso milahci ko miketonan a sowal itini pipatafang iso to tireng. (ˈOsien ko Patnakay 5:​4, 5.) Malo nisawawaan ni Yis, kedecen iso a mikotod cingra, misaˈicel a midofdof to sapalimoˈot ningra. (Matay 28:​19, 20; 1 Pitiro 2:​21) Onini lalakaw papadama tisowanan madangar konini.

TAHASIˈAYAW TO SAPALIFET ATO SAKAYHID I, KAMAYAN ‘PADADOTOC MIKOTOD’ CI YISAN

4. O nisawawaan ni Yis mamiˈorong to ‘pisemseman a hecek’ sa i, o manan ko tatodong hani? (Luka 9:​23)

⁴ Ikor no micada to paputisem i, o kaˈorip iso cowa ko sasinoway sa. Soˈlinay haw i, o nisawawaan ningra ‘mamiˈorong to romiˈamiˈad to pisemseman a hecek no niyah’ sanay ci Yis ihkal a pasowal. (ˈOsien ko Luka 9:​23.) Tatodong no sowal ni Yis, o mikotoday cingranan a tamdaw mamararid a misemsem sanay han? Cowa, o sapasowalaw cingra o micadaay to paputisem a tamdaw cowa aca ko mamicada to sapalemed, ao tatahalifaho to sapalifet. O romaroma a sapalifet latek tada karorayanto.​​—⁠2 Timoti 3:​12.

5. Mikiˈokay ci Yis mikinafalahay a tamdaw mamilifok ko maanan a sapalemed?

⁵ Alatek tatahasiˈayaw kiso to pisafelit no paro no lomaˈ, anoca pakayni to sapisalakataw micangacang to Hongti Kitakit no Kawas misawad to sakacihafayaw. (Matay 6:​33) Ano mahaenay i, ngangaˈay pakasoˈlinen iso to mafanaˈay ci Yihofa to pikinafalah iso. (Hipray 6:​10) Latek matinakoayto iso to soˈlinay ko nano sowal ni Yis, sowal sa cingra: ‘O tamdaw ano pakayni i takowanan ato ngaˈayay lihaf, misawad to lomaˈ, faˈinayan salikaka, fafahiyan salikaka, wina, wama, wawa anoca omah, ano aniniho mamicada to simoˈot a camahaw a lomaˈ, faˈinayan salikaka, fafahiyan salikaka, wina, wawa, omah, o tatahalifaho to hakokay, itini i ikoray a likakawa mamilifok to midaˈocay a ˈorip.’ (Marko 10:​29, 30) O malayapay iso a sapalemed mataˈlifay ko kinafalahan iso.​​—⁠ˈOlic 37:4.

6. Mipaputisem kiso ikor hano papadadotoc miˈodot to ‘coos no tireng’ hani?

⁶ Nikawrira, ikor no mipaputisem kiso kamayan o cowa ko malefotay a tamdaw, mansa o mamiˈodotho kiso to ‘notirengan a coos.’ (1 Yohani 2:​16) Nolatekay, matiraay kiso to tarokos ci Pawloan ira ko malecaday a falocoˈ alatek, sanay cingra: ‘Maolah ko falocoˈ ako a miharateng to rikec no Kawas, nikawrira iraay ko roma sarikec no tireng ako, o mipacoliay to kaolahan no falocoˈ ako a ngaˈayay a demak, mipalit i takowanan konini a papitoor to pinangan no raraw.’ (Loma 7:​22, 23) Padadotoc micoˈay to ciraraway a coos papatoled tisowanan alatek. Kawrira, ano haratengen ko miketonan a sowal iso a mipatafang to tireng i, irato ko misetekay a falocoˈ midemak to matatodongay a demak. Ano tahasiˈayaw to sakayhid i, haratengen ko miketonan a sowal iso patafang to tireng mamadoloto ko demak. Hano saan ko sowal hani?

7. Haratengen ko miketonan a sowal iso mipatafang to tireng, hano papadama tisowanan madimadi ci Yihofaan?

⁷ Patafang to tireng kiso ci Yihofaan i, o mihayiay to caayto kono niyah ko tireng iso. Tatodong i, misawaday kiso to notekedan a mihalakaan ato coos no falocoˈ, eca ka pidemak to kapiliˈan no Kawas a demak. (Matay 16:24) Ano tahasiˈayaw to sapalifet i, caayto ko mamipalak to toki misaharaterateng to sasamaan ko pidemak, samanen maherekayto kiso misetek to falocoˈ madimadi ci Yihofaan, pakahemek Cingranan, cowa ko mamisinanot kiso to romaroma papiliˈen. Mihaen kiso to demak o mitodongay ci Yopuan. Ci Yopu soˈlinto tahasiˈayaw to pakidemay a sapalifet i, tanektekay cingra pasowal: ‘Tahira i patay cowa ko mamisawad kako to nika madimadi to Kawas!’​​—⁠Yopu 27:5.

8. Songilaˈen miharateng ko miketonan a sowal iso mipatafang to tireng sasamaan padama tisowanan micoˈay to sakayhid?

⁸ Ano songilaˈen iso miharateng ko miketonan a sowal iso mipatafang to tireng i, caciˈicel a minaˈay to maamaan a sakayhid. Tinakoen, mamikalona kiso to ramod no tao han? Maedeng cowa ko mamahaen! Samanen maherekayto kiso miketon to sowal ci Yihofaan, “naˈayto” saan kiso somowal to tatiihay a demak. Cowato ko tatahira i kacilamitan no mararaway a coos a misafilofilo a miˈodot a mifalah to hatiniay a coos. Satapangho wa ‘palaliyoc a miliyas’ to ‘lalan no mararaway a tamdaw.’​​—⁠Taneng 4:​14, 15.

9. Songilaˈen miharateng ko miketonan a sowal iso mipatafang to tireng, hano mamadoloto paisalakat to midokoay a demak i nokaˈorip iso?

⁹ Kiso ano ira ko katayalan, cadaen iso i, caayto ka ngaˈay mararid mirienang to saˈopo, sasamaan ko pisaˈosi no falocoˈ iso hani? Cowa ko mamangiyangi ko falocoˈ iso, samanen maherekayto kiso misetek to falocoˈ a somowal “naˈayto” saan to hatiniay a katayalan. Mihaen i, caayto ka mararaw ko pisaˈosi iso, misaharateratengho to papaisalakaten ci Yihofaan i nokaˈorip iso. Tona maherekayto kiso patafang to tireng ci Yihofaan, mansa tatangsol minaˈay to kapiliˈan ni Yihofa a demak. Caay ko mamapawan kiso to taˈarawan ni Yis, misarocod midemak to kaolahan ni Yihofa a demak.​​—⁠Matay 4:​10; Yohani 8:​29.

10. Ikor no mipaputisem kiso i, sasamaan ci Yihofa padama tisowanan ‘padadotoc mikotod’ ci Yisan?

¹⁰ O sapalifet ato sakayhid o sangaˈayay a toki, ho ngaˈay kiso misawacay to makalimay ko niyah ‘padadotoc mikotod’ ci Yisan. Pakasoˈlinen iso to papadama ci Yihofa tisowanan. Sowal no Fangcalay Cudad: ‘O soˈlinay a tatiˈeren ko Kawas, caay palitemoh Cingra tamowanan to caay ko mamahadidi namo a sapalifet. Ano malitemoh namo ko sapalifet i, paˈicelen Ningra kamo a papihadidi, patalaen Ningra ko kasadakan namo a lalan.’​​—⁠1 Korinto 10:13.

SASAMAAN PADADOTOC MIKOTOD CI YISAN

11. Sapipadadotocaw mikotod ci Yisan, o cecay pakayraan o maanan hani? (Nengnengen ko coka.)

¹¹ Fanekfekay ci Yis a matayal saki Yihofaan, pakayniay i satolon a ngaˈay ko noka lalaˈed aci Yihofa. (Luka 6:​12) Ano miharatengay kiso ikor no pipaputisem padadotoc a mikotod ci Yis Kristoan i, o cecay ngaˈayay pakayraan padadotoc a misaˈangongol to olah ci Yihofaan, adihayen ko pidemak to kahemekan ni Yihofa a demak. Saan ko sowal no Fangcalay Cudad: ‘Ano hakowaay ko kacakatan ita i, doedoen kora malecaday a lalan, masolimet padadotoc a talaˈayaw.’ (Filipi 3:​16) Finawlan ni Yihofa tada makalimay a adihay ko demak saki Cingranan. Alatek matengilay iso ko nalifetan no ˈalomanay salikaka, cangra mirienangay to SKE, o roma malinahay tayra misaaliay to ˈalomanay mitosilay a pala. Ano ngangaˈay kono miso a pakayraan i, patirengen iso ko mahaenay a patosokan. (Dmak 16:9) Ano cowa ka ngaˈay kiso patireng to mahaenay a patosokan nohatini i, aka piharateng to masalaenoay ko niyah, samanen itini i cacikayen no Krisciyang, o kalimlaan i, o mihadidiay. (Matay 10:22) Ano kitinien iso i ˈicel no niyah ato pakayraan iso misaˈicel a mihodop ci Yihofaan i, aira ko taˈangayay a epoc. Mihaen kiso i, ngangaˈayto a padadotoc mikotod ci Yisan ikor no micada kiso to paputisem.​​—⁠ˈOlic 26:1.

12-13. Ano mafasaway ko faedet no falocoˈ iso i, sasamaan ko pidemak hani? (1 Korinto 9:​16, 17) (Nengnengen ko sapatongal lalakaw “Ka Terek itini Sakatahadaˈoc no ˈOrip a Cacikayen.”)

¹² Ikor no mipaputisem, latekay o pitolon iso oyananto ko sowal, o mitosilay a demak hato o nanaman aca, anoca o picekiw iso to Fangcalay Cudad cowato ka hatira i ˈayaway a adihay ko malayapay. Misiˈayaw to mahaenay a pakayraan i, aka miharateng to malahdawayto iso ko fangcalay saocor ni Yihofa. Cowa ko malefotay tamdaw kita, latekay ngaˈayay ko kalingad no demak latekay cowa ka ngaˈay. Ano mafasaway ko faedet no falocoˈ iso i, ngaˈay haratengen ko taˈarawan ni Pawlo. Soˈlinto misakiemelay cingra mitodong ci Yisan, nolatekay cangoˈotan nanay to ˈicel cingra. (ˈOsien ko 1 Korinto 9:​16, 17.) Sanay cingra: ‘Soˈlinto caay ka toor ko misahalakaan ako, kamayan mapatorod kako to misimaway a tayal.’ Ano falicen ko sowal i, ano masamaanayto ko harateng ni Pawlo itiya, misetekay to falocoˈ cingra milahci to patorodan no Kawas i cingranan a tayal.

¹³ Malecadayto, ano misaˈosi kiso i, hamaan mangiyangi ko falocoˈ. Ano masamaanayto ko harateng iso, seteken ko falocoˈ midemak to matatodongay a demak. Ano kiemel kiso mihaen to demak, alatek mamatongal ko ˈicel iso. Ano masamaanayto, ikor no mipaputisem padadotoc han a tawlik mirienang to kahirahira a midokoay demak i, o papadadotocto kiso mikotod ci Yisan, ngaˈayho a mipakalalok to romaroma salikaka.​​—⁠1 Tisalonika 5:​11.

‘PADADOTOC A MIKINSA . . . PADADOTOC A MIHAPINANG’

14. Mamararid kiso mikinsa to maanan? Misamaanay hani? (2 Korinto 13:5)

¹⁴ Ikor no mipaputisem i, rariden iso mikinsa ko niyah tada o masakalimlaan a demak. (ˈOsien ko 2 Korinto 13:5.) Latelatekay sinanoten ko kalo romiˈad a demak iso, nengnengen mitolonay kako to romiˈamiˈad ato micekiway to Fangcalay Cudad, marariday a mirienang to saˈopo ato mitosilay demak hokira. Padamaen iso ko niyah mitongal to hemek mirienang to midokoay a demak, mikitira a milifok to adihayay a epoc. Ngaˈayay licayen ko niyah: “Ngangaˈay kako mitadtad to taˈeneran no soˈlinay kimad i tao han? Ngangaˈay kako mitongal to kahemek i mitosilay a demak han? O pitolon ako patodicekay ko sowal han? O satolon ako paihkalay to misarocoday kako mitiˈer ci Yihofaan han? Marariday kako mirienang to saˈopo han? Sasamaan kako misamacay ko falocoˈ mitengil to saˈopo, tawlik a pacaˈof to salicay hani?”

15-16. Pakayni to pilalang to sakayhid, mikitini nalifetan no faˈinayan salikaka ci Lopote mananamay iso ko maanan?

¹⁵ Roma i, ngaˈayay kiso misasoˈlin mikinsa to dangoc no niyah. Tonini a pakayraan, faˈinayan salikaka ci Lopote ngaˈayay ko pidemak ningra. Milomalay to milifetan no niyah, sanay: “20 ko mihecaan ako i, iraay ko cecay tayal ako. Maherekto ko tayal ako i, cecay cafay matayal a fafahiyan mitahidangay takowanan tayra i lomaˈ ningra, awaay ko i lomaˈay, ‘misarihakedho kita’ sanay. Satapang i, mikilifay kako a pasowal, ikor patodicek hananay ako pasowal to cowa ko tatayra kako ato misamaanay hano eca ka tayra.” Milalangay ci Lopote to sakayhid, tada ngaˈayay ko pidemak ningra. Kawrira, ikor mitikol cingra miharateng tonini a demak i, mahapinangay to aikakaho ko kangaˈay no pidemak ningra itiya. Sanay cingra: “Cowa ka matira kako ci Yosifan misetek a milalang to fafahi ni Potifar. (Satapangan 39:​7-9) Cowa ka harateng ako, tada pasangaray kako milalang to sakayhid. Onini a demak mahapinangay ako, papadadotocho kako paˈicel to kalawidang aci Yihofa.”

¹⁶ Ngangaˈay kiso matira ci Lopotean misasoˈlin mikinsa to niyah, mihaen to demak o papaira to taˈangayay a epoc iso. Soˈlinto malaˈosiay kiso milalang to sakayhid, saharateratengenho, “Tiya milalang kako i, samisimisiay ko falocoˈ han?” Ano mahapinangay iso to ngangaˈayho kiso a macakat, aka matoleden. Soˈlinay haw i, mahapinang iso ko dangoc no niyah o kahemekan a demak konini. Tolonen ci Yihofa, misaali Cingranan padama tisowanan miremo to dangoc no niyah, ikorto i, kalamkamen a midemak, padama to niyahan matongal ko pisetek to falocoˈ midoedo to palinian ni Yihofa a maˈorip.​​—⁠ˈOlic 139:​23, 24.

17. Samaanay ci Lopote miˈading to fangcalay ngangan ni Yihofa?

¹⁷ Caayho ka lahci ko nalifetan ni Lopote. Sanay cingra: “Milalang kako tora cafay matayal a fafahiyan ikor, sanay cingra takowanan, ‘Pakataˈlifayto kiso to sasiking.’ Licayen ako cingra o manan ko tatodong. Pasowalay iraay ko cecay widang ningra, isaˈayaw o Misawacayay Tamdaw ni Yihofa, pasowalay cingra o kaemangay a Misawacayay Tamdaw ni Yihofa mitakaway a midemak to mikecengan no Fangcalay Cudad a demak, ano ira sako toki i, maedeng cowa ko mamilawa cangra. Oranto, ora cafay matayal a fafahiyan sapisikingaw takowanan. Mahemekay kako miˈadingan ako ko fangcalay ngangan ni Yihofa.”

18. Ikor no mipaputisem mamisetek kiso to falocoˈ midemak to maanan a demak hani? (Nengnengen ko sapatongal lalakaw “Sapaini Tisowanan.”)

¹⁸ Patafang kiso to tireng ci Yihofaan halo micada to paputisem, paihkalay kiso itini i masamaamaanay a pakayraan mamiˈading to fangcalay ngangan ni Yihofa. Aka calemcem, ano o mananto ko masiˈayaway iso a sapalifet ato sakayhid, mafanaˈay ci Yihofa. Misaˈicel kiso madimadi ci Yihofaan, papalemed Cingra tisowanan. Pakasoˈlinen ci Yihofa papafelien Ningra kiso to fangcalay saocor, padama tisowanan madimadi Cingranan. (Luka 11:​11-​13) Ikor no mipaputisem i, tiˈeren ko sapadama ni Yihofa, ngangaˈayto kiso padadotoc mikotod ci Yisan.