‘O Misawkitay to Hekal a Tatapangan’ Kadofahay ko Siniˈada, o Papakasoˈlinen Ita Cingra!

1. Mananamay ni Apraham ko maanan misayaray to falocoˈ a soˈlinay kimad hani?

CI APRAHAM cowa ko mamatawal ningra ko kasasowal ningra aci Yihofa. Itiya i, pakaynian no Kawas to cecay coyoh pasowal ci Aprahaman, papalaˈafoen Ningra ko Sotom ato Komora onini tosa niyaroˈ. Caay ka rihaday ko falocoˈ ni Apraham, saka licay sa ci Yihofaan: ‘Soˈlinay Kiso papalecad sa palaˈafo to moecelay tamdaw ato tatiihay a tamdaw han? . . . O Misawkitay to hekal a Tatapangan coko mamasadafdaf ko pidemak han?’ Mihadidiay ci Yihofa pacaˈof to sasa no harateng ni Apraham, hanaca padama cingranan cipinang to cecay a demak, ci Yihofa i, co:wa ko papalaˈafo to moecelay tamdaw. Mafanaˈ tonini masakalimlaan a soˈlinay kimad, taˈangayay ko epoc kitaanan anini, masayaray ko falocoˈ.—Satapangan 18:23-33.

2. Hano ngaˈay kita pakasoˈlin, ano misawkit ci Yihofa i, sahtoay o moecelay ato siniˈadaay hani?

² Hano ngaˈay kita pakasoˈlin, ano misawkit ci Yihofa i, sahtoay o moecelay ato siniˈadaay hani? Samanen mafanaˈay kita ‘o kemod no falocoˈ ko minengnengan ni Yihofa,’ hanaca ‘cipinangay to kemoday falocoˈ no kahacecay tamdaw.’ (1 Samuil 16:7; 1 Hongti 8:39; 1 Rayray 28:9) Tada kasapaanto konini! Ano iraay ko hatiniay a ˈicel Ningra i, o kafanaˈan Ningra a demak ikakaay to mita ko kaadihay, mihaenay cowa ko mamasahci ko kacipinang ita to hano mahaen ko pisawkit Ningra to pina a demak. Pakayni tonini, itini sakayat no fangcalay saocor to tarokos ci Pawloan sanay ko sowal: ‘Cima ko papakahapinang a mafanaˈ to pisawkit Ningra!’—Loma 11:33.

3-4. (1) Alatek iraay ko maanan sasa no harateng no mita? (2) Onini lalakaw mamilengo to maanan? (Yohani 5:28, 29)

³ Nikawrira, nolatekay mahecaday kita ci Aprahaman ira ko sasa no harateng. Saan ko harateng no mita alatek: “Isaˈayaw palaˈafoan ni Yihofa a tamdaw, tinakoen o finawlan no Sotom ato Komora, wa iraho ko tokel patikol maˈorip han? Noikor, patikolen ni Yihofa paˈorip ko cowa ka moecel a tamdaw i, o papinapina a tamdaw no Sotom ato Komora wa patikolho maˈorip han?”—Dmak 24:15.

⁴ Haratengen ko kacipinang ita to patikolay maˈorip. Caho ka halafin, o pakayniay i ‘patikolay maˈorip mamilfok to ˈorip’ ato ‘patikolay maˈorip mamicada to sasawkit,’ misalofanto ita ko isaˈayaway a pitadtad.a (ˈOsien ko Yohani 5:28, 29.) Padamaay koni kitaanan mihapinang to romaroma a pitadtad misaaliay to sasalofen, onini a lalakaw ato ilaenoay a lalakaw mamilengo tonini noka pisalof. Onini a lalakaw aisalakat a milengo to pakayniay i moecelay pisawkit ni Yihofa, caay ka fanaˈ kita to maanan, dotoc mamilengo mafanaˈay kita to maanan.

CAAY KA FANAˈ KITA TO MAANAN

5. Pakayni i finawlan no Sotom ato Komora, o iti:yaay mitepangan a cudad no mita samaanay ko sowal hani?

⁵ O iti:yaay mitepangan a cudad no mita, o mapalaˈafoay ni Yihofa a tamdaw, tinakoen o finawlan no Sotom ato Komora, awaay ko hatokel patikol maˈorip sanay. Kawra songilaˈen a mitolon ato calepen a micekiw ikor i, mahapinangay ita o haharatengenho konini a demak: O ngangaˈay a patodicek sa kita mihaen ko sowal han?

6. Iraayho ko maanan maˈoningay somowalay to na misawkitan ni Yihofa ko romaroma caay ka moecel a tamdaw? Pakayni tonini maˈoningay caay ka fanaˈ kita to maanan hani?

⁶ Cowa ko pakayniay aca i Sotom ato Komora a maˈoningay, itini i Fangcalay Cudad iraayho ko roma maˈoningay somowalay to na misawkitan ni Yihofa ko romaroma caay ka moecel a tamdaw. Tinakoen, itini i Lenlen a tatokian ˈalomanay ko mipatayan Ningra a tamdaw. O roma tinakoan i, palimoˈotan Ningra ko Israil tamdaw palaˈafo to pitoay kakitakitan a tamdaw no Kanan. Roma i, miocoran Ningra ko cecay coyoh, i cecay dadaya mipatay to 185,000 a sofitay no Asiriya. (Satapangan 7:23; Limoˈot 7:1-3; Isaya 37:36, 37) Mihaenay, ihkalay pasowal ko Fangcalay Cudad, oniya misawkitan ni Yihofa a tamdaw sahtoay o tatahadaˈoc malaˈafo, awato ko hatokel patikol maˈorip sanay han? Cowa ka ihkal ko Fangcalay Cudad a somowal tonini.

7. Pakayni to mapalaˈafoay no Taˈangayay Lenlen a tamdaw ato mapalaˈafoay a finawlan no Kanan, caay ka fanaˈ kita to maanan hani? (Nengnengen ko coka.)

⁷ Pakayni toya mipalaˈafoan ni Yihofa a tamdaw, cowa ka fanaˈ kita to samaanay ci Yihofa misawkit to kahacecay nangra, cowaho ka fanaˈ ˈayawho mapalaˈafo cangra iraay ko toki mafanaˈ ci Yihofaan hanaca pasasiyor hokira. Pakayni to Lenlen a lintad, ihkalay ko sowal no Fangcalay Cudad ci Nowa na ‘milasilay to moecelay.’ (2 Pitiro 2:5) Kawra cowa ka somowal ko Fangcalay Cudad misangaˈ to taˈangayay a tamina ci Nowa i, misaˈicelay pasifanaˈ to kahacecay a tamdaw to aira ko Taˈangayay Lenlen. Mahecaday, pakayni to pito a kakitakitan a Kanan a tamdaw, cowa ka fanaˈ kita polong tatiihay a tamdaw iraay ko toki mafanaˈ ci Yihofaan hokira, hanaca makahi a mifalic.

8. Pakayni i finawlan no Sotom ato Komora, caay ka fanaˈ kita to maanan hani?

⁸ O finawlan no Sotom ato Komora samaanay hani? O sowal no Fangcalay Cudad, oya moecelay a Lotoan ilalomaˈay nangra ko aroˈ. Kawra na mitosilan ni Loto ko kahacecay nangra han? Cowa ka fanaˈ kita. Tada tatiihay cangra, kawra polong a tamdaw mafanaˈay cangra to ngaˈayay ato tatiihay han? Haratengen hena, ˈalomanay a faˈinayan tamdaw no Sotom sapiˈodangaw to lafang ni Loto, sowal no Fangcalay Cudad ilalomaˈ nangra iraay ko mamangayho ko mihecaan a tamdaw. (Satapangan 19:4; 2 Pitiro 2:7) Kadofahay ko siniˈada a Kawas ci Yihofa soˈlinay misawkit to aawa ko hatokel no kahacecay nangra patikol maˈorip han? Caay ka fanaˈ kita. Sanay ko sowal ni Yihofa ci Aprahaman, awaay ko 10 aca moecelay a tamdaw tora niyaroˈ. (Satapangan 18:32) Mahapinangay, ora mapalaˈafoay a tamdaw sahtoay o caay ka moecel a tamdaw, pakayni i waywayan no niyah mihaen ko pisawkit ni Yihofa cangranan o masadafdafay. Kawra ngaˈayay kita misaˈosi to sowal, noikor patikolen ni Yihofa paˈorip ko ‘caay ka moecel a tamdaw’ i, o finawlan no Sotom ato Komora awaay ko cecacecay aca to papatikol maˈorip han? Cowa ko ngangaˈay kita misaˈosi!

9. Pakayni ci Solomonan, caay ka fanaˈ kita to maanan hani?

⁹ Itini roma pakayraan, maˈosiay ita i Fangcalay Cudad, o romaroma tamdaw nao moecelay cingra, kawra ikor malo cowato ka moecel. O cecay tinakoan o Hongti ci Solomon. Mafanaˈay cingra ci Yihofaan, mafanaˈayho sasamaan midoko ci Yihofaan o matatodongay, hanaca na adihayay ko sapalemed ni Yihofa cingraanan. Nikawrira, ikor pasayraay i makaniway kawas midoko ci Solomon. O raraw ningra tada maketeray ci Yihofa, o tatiihay a teloc mifiyoray to Israil kitakit to pina soˈot miheca. Isalakat halafinay a mihecaan papatikol maˈorip ci Solomon sanay kita miharateng, samanen sowal no Fangcalay Cudad mitooray cingra to ‘lalitengan a mafotiˈ,’ o Fangcalay Cudad na mahaenay ko kasomowal to malecaday ci Tafitian madimadi a sikawdan. (1 Hongti 11:5-9, 43; 2 Hongti 23:13) Nikawrira, mihaen ko sowal o paihkalay to papatikolen ni Yihofa paˈorip ci Solomon han? Cowa ka pihaen ko sowal no Fangcalay Cudad. Kawra, saan ko harateng no roma tamdaw alatek, coko na somowalay ko Fangcalay Cudad ‘mapatayay tamdaw matedalayto, mahepolayto ko raraw’ han? (Loma 6:7) Soˈlinay mihaen ko sowal no Fangcalay Cudad, nikawrira polong mapatayay o papatikol maˈorip cowa ka saan. Aka mapawan, o mapatayay a tamdaw cowa ka lonok sa aira ko fadangalan miliyaw maˈorip. Samanen o patikolay maˈorip o mikitiniay i olah ni Yihofa a sapatelong to tamdaw, makalimay Cingra ira ko toki no cecay tamdaw tahadaˈoc midoko Cingraanan, mihaen ngaˈ pafelien Ningra konini a tamdaw tonini a sapatelong. (Yopu 14:13, 14; Yohani 6:44) O mamalifok ni Solomon konini a sapatelong han? Edengan ci Yihofa ko mafanaˈay, cowa ka fanaˈ kita. O kafanaˈan ita i, o misaˈosian ni Yihofa sahtoay o matatodongay.

MAFANAˈAY KITA TO MAANAN

10. Pakayni papalaˈafoen ko cecay tamdaw hokira, samaanay ko nafalocoˈan ni Yihofa hani? (Icikil 33:11) (Nengnengen ko coka.)

¹⁰ ˈOsien ko Icikil 33:11. Pakayni i misawkitay, pasowalan ni Yihofa kita to nafalocoˈan Ningra. Malecaday to nisowalan ni Icikil, tarokos ci Pitiro itini i sakayat no Kawas sanay ko sowal: ‘Ci Yihofa . . . cowa ka halamham to sakalaˈafoaw no cecacecay a tamdaw.’ (2 Pitiro 3:9) Onini padihekoay to falocoˈ no tamdaw a soˈlinay kimad pasifanaˈay kitaanan, ci Yihofa cowa ka saolatekay saan midaˈoc a palaˈafo to tamdaw. Kadofahay ko siniˈadaay Ningra, ano iraho ko kangaˈayan siniˈadaayto Cingra to tamdaw.

11. O cima ko cowa papatikol maˈorip hani? Hano mafanaˈ kita hani?

¹¹ Pakayni to cima ko caay patikol maˈorip, mafanaˈay kita to maanan hani? Cowa ka adihay ko ihkalay mihadakan no Fangcalay Cudad a tinakoan, pinaay aca.b O sowal ni Yis paihkalay cowa ko papatikol maˈorip koya Iskariyot tamdaw ci Yuta. (Marko 14:21; nengnengen ko pitadtad no Sapicekiw a Fangcalay Cudad no Yohani 17:12.) Mafanaˈay ci Yuta to mararaway kora demak, padeteng sanay misafelit ci Yihofaan ato kanonoˈan Wawa Ningra ci Yis. (Nengnengen ko pitadtad no Sapicekiw a Fangcalay Cudad no Marko 3:29.) Na somowalay ci Yis, oya misafelitay cingranan a pina ˈaˈideman no pidoyongan mapatay ikor awaay ko hatokel patikol maˈorip sanay. (Matay 23:33; nengnengen ko pitadtad no Sapicekiw a Fangcalay Cudad no Yohani 19:11 “tamdaw.”) Roma i, mirikecay ko tarokos ci Pawlo, o caay pasasiyor a mitowakangay to kimad a tamdaw cowa ko papatikol maˈorip.—Hipray 6:4-8; 10:29.

12. Pakayni i siniˈada ni Yihofa, mafanaˈay kita to maanan hani? Hadaken ko tinakoan.

¹² Roma pakayraan i, pakayni i siniˈada ni Yihofa, mafanaˈay kita to maanan hani? Iraay ko maanan a tinakoan misawacayay to soˈlinay Cingra ‘cowa ka halamham malaˈafo ko cecacecay tamdaw’ hani? Nengnengen samaanay Cingra siniˈada to papina pakidemay ko raraw a tamdaw. Midemakay ko Hongti ci Tafiti to adihayay pakidemay a raraw, mahawpay ko maˈaˈodangay ato mipatayay to tamdaw. Kawra pasasiyor ci Tafiti ikor, paihkalay ci Yihofa to siniˈada cingranan, misodod cingranan. (2 Samuil 12:1-13) Hongti ci Manasi hakelong no kaˈorip adihayay ko tatiihay a demak. Soˈliˈlin pakidemay ko raraw ningra, kawra mikifalocoˈ cingra pasasiyor ikor, kamayan ci Yihofa sidaˈit a misodod cingranan. (2 Rayray 33:9-16) Onini a tinakoan paihkalay, ano iraay ko lalangian saan ci Yihofa o sasiniˈada to tamdaw. Soˈlin pakidem ko raraw no cecay tamdaw, ano mihayi cingra to raraw hanaca mikifalocoˈ pasasiyor, o papatikolen ni Yihofa paˈorip cingra.

13. (1) Hano siniˈada ci Yihofa to Ninifi a tamdaw hani? (2) Pakayni i Ninifi a tamdaw, ikor somowalay ci Yis to maanan hani?

¹³ Mafanaˈay kita siniˈadaay ci Yihofa to Ninifi a tamdaw. Na pasowalan Ningra ci Yona: ‘Mahapinangto Ako ko nika tati:ih nangra.’ Nikawrira, pasasiyor ko Ninifi tamdaw to raraw no niyah ikor, sododan ni Yihofa cangra. Pakayni tonini tada maketeray ci Yona, kawra patalipaˈelalan no Kawas cingra sanay, o Ninifi a tamdaw ‘cowa ka fanaˈ pafafidaˈ to ngaˈayay ato tatiihay.’ Ano palalinien i, tada ikakaay ko siniˈada ni Yihofa! (Yona 1:1, 2; 3:10; 4:9-11) Ikor i, sakadademakan ni Yis konini a tinakoan pasifanaˈ to tamdaw to nika sadafdaf ni Yihofa ato siniˈadaay to tamdaw. Sowal sa ci Yis: ‘Ano misawkitto i, o lalomowad ko Ninifi a tamdaw’ sanay.—Matay 12:41.

14. Ano ‘misawkitto i,’ o ‘lalomowad’ ko Ninifi a tamdaw sa i, o manan ko tatodong nonini sowal hani?

¹⁴ Ano ‘misawkitto i,’ o ‘lalomowad’ ko Ninifi a tamdaw sa i, o manan ko tatodong nonini sowal hani? Na somowalay ci Yis, ikor aira ko tamdaw ‘patikol maˈorip mamicada to sasawkit.’ (Yohani 5:29) Mitoroˈan ningra i, itira Comaˈol Miheca Pikowan ningra a tatokian, ‘o moecelay a tamdaw ato cowa ka moecel a tamdaw o papatikol maˈorip.’ (Dmak 24:15) O caay ka moecel a tamdaw ‘patikol maˈorip i, mamicada to sasawkit,’ mitoroˈan nonini, ci Yihofa aci Yis mamitapal a mihapinang to waywayan no caay ka moecel a tamdaw ikor no picada to sapasifanaˈ no Kawas. O patikolay maˈorip a Ninifi a tamdaw ano minaˈay a midoko ci Yihofaan i, o papaseteken ni Yihofa to ciraraway cingra, caay ko papadadotoc a maˈorip cingra. (Isaya 65:20) Kawra polong mipiliˈay madimadi midoko ci Yihofaan a tamdaw mamilifok to ciepocay a sasawkit. Ira ko tokel nangra tahadaˈoc maˈorip!—Taniil 12:2.

15. (1) Misamanay hano cowa ka ngaˈay kita misetek to sowal awaay ko papatikol maˈorip no Sotom ato Komora a tamdaw? (2) Yuta saka 7 sinael a sowal o maanan ko tatodong hani? (Nengnengen ko sapatongal lalakaw “O Manan ko Tatodong no Sowal ni Yuta?”)

¹⁵ O finawlan no Sotom ato Komora sasamaanto hani? Pakayni cangranan, ngaˈayay haratengen ita ko nano sowal ni Yis. Itini i lintad ni Yis, mifalahay ko romaroma tamdaw cingranan, caay picada to sapasifanaˈ ningra, sowal ni Yis ‘itini i Pisawkitan a Romiˈad’ o pakayraan no finawlan no Sotom ato Komora aikaka ko kangaˈay cangranan. (Matay 10:14, 15; 11:23, 24; Luka 10:12) O manan ko tatodong no sowal ni Yis hani? Harateng ita alatek cowa ka ngaˈay tooren ko mitilidan a cipinang to sowal ni Yis, tano pakinaliay a pakayraan somowal cingra, misaˈicelay mitadtad to cecay kalimlaan. Kawra ano nengnengen ko tatodong nonini a sowal ni Yis, o sasoˈlin mifekad konini a demak. Ka pisinanot, o misowalan ni Yis itini ‘Pisawkitan a Romiˈad’ sa i, oyaan na misowalan ningra to Ninifi a tamdaw to ‘pisawkitan a tatokian.’ Sowal ni Yis itini ‘pisawkitan a tatokian o lalomowad’ ko Ninifi a tamdaw sa i, mitoroˈan tonini o papatikol cangra maˈorip, ano mahaenay i, somowal ci Yis o finawlan no Sotom ato Komora wa itini i ‘Pisawkitan a Romiˈad’ micada to sasawkit, paihkalay koni o pinapina a tamdaw nonini tosa niyaroˈ wa ira ko patikolay maˈorip alatek. Roma i, soˈliˈlin tatiihay ko demak no Ninifi a tamdaw, nikawrira ˈayaw no midemak to sasawkit ci Yihofa pairaayho to toki nangra pasasiyor. Mihaenay, o tatiihay ko demak a finawlan no Sotom ato Komora papairaen ko toki pasasiyor, hanaca na somowalay ci Yis ‘o tatiihay ko demak’ i, wa ‘patikol maˈorip micada to sasawkit.’ (Yohani 5:29) Mihaenay, o finawlan no Sotom ato Komora iraayho ko miming a hatokel, ilalomaˈ nangra wa iraho ko papina a tamdaw papatikol maˈorip alatek. Wa ira ko hatoki ita pasifanaˈ cangranan mafanaˈ ci Yihofaan aci Yisan alatek.

16. Pakayni to pisaˈosi ni Yihofa to cima ko papatikolen paˈorip, mafanaˈay kita to maanan hani? (Yirimiya 17:10)

¹⁶ ˈOsien ko Yirimiya 17:10. Onini sinael papadama kitanan mihererek to maanan ko kafanaˈan no mita. Ci Yihofa i, ‘misolapay to kemod no falocoˈ no tamdaw, mikinsaay to kemod no harateng no tamdaw.’ Itini i pisaˈosi to papatikolen paˈorip ko cecay tamdaw hokira, Cingra ‘pakaynian i midemakan no kahacecay tamdaw’ palifon cangranan. Cingra tanektekay a mitoor to moecelay a palinian, ano hangangaˈay i, makahiay Cingra siniˈada to tamdaw. Mihaenay, aka pisetek kita misaˈosi to awaay ko hatokel no cecay tamdaw patikol maˈorip, edeng ano mafanaˈay kita to soˈlinay mahaenay ko sowal no Fangcalay Cudad.

‘O MISAWKITAY TO HEKAL A TATAPANGAN’ MASADAFDAFAY KO PIDEMAK

17. O mapatayay a tamdaw noikor sasamaan hani?

¹⁷ Na misafelit ci Yihofaan ci Atam, Ifa aci Satan tahanini i, mapatayayto ko masawalwalay a tamdaw. O patay soˈlinay o katalawan no tamdaw a ‘ˈada!’ (1 Korinto 15:26) Polong mapatayay a tamdaw noikor sasamaanto hani? O mimingay ˈopo a tamdaw, oya 144,000 madimadiay mikotod ci Kristoan a tamdaw, papatikol maˈorip tayra i kakarayan, milayap to caay ka pohel a ˈorip. (Paˈarawan 14:1) Iraayho ko taˈangayay ˈopo ˈayaw no patay madimadiay midoko ci Yihofaan, cangra i, o ‘moecelay tamdaw,’ noikor aitini i fafekang no sera patikol maˈorip. Itini i Comaˈol Miheca a Pikowan ni Kristo a tatokian ano padadotoc cangra midemak to moecelay a demak i, hanaca pakataˈlif to salikoray a sapalifet, o ngangaˈayto itini i fafekang no sera midaˈoc maˈorip. (Taniil 12:13; Hipray 12:1) Roma i, itini i Comaˈol Miheca Pikowan a tatokian, o ‘caay ka moecel a tamdaw,’ mahawpay koya cowaho pidoko ci Yihofaan a tamdaw, ano oyato ‘midemakay to tatiihay,’ wa ira ko hatoki pasasiyor a misafaeloh, malo madimadiay mihodop ci Yihofaan a tamdaw. Kawrira, o roma tamdaw ˈayaw no mapatay mariˈangay ko demak, padeteng sanay, mitowakang ci Yihofaan ato araaw Ningra, maherekayto ci Yihofa misawkit to caay ko papatikol maˈorip cangra.—Luka 23:42, 43; 12:4, 5.

18-19. (1) Hano ngaˈay kita pakasoˈlin to pisawkit ni Yihofa to mapatayay a tamdaw sahtoay o matatodongay hani? (Isaya 55:8, 9) (2) Ilaenoay a lalakaw mamilengo to maanan?

¹⁸ O pisawkit ni Yihofa to tamdaw ano o ngaˈayayto, anoca o tatiihayto, o ngangaˈay pakasoˈlinen ita ko pisawkit ni Yihofa to kahacecay tamdaw sahtoay o matatodongay han? Hay, ngangaˈayto! Oya ‘Misawkitay to polong a Tatapangan’ ci Yihofa, matiraay to kafanaˈan ni Apraham, o malefotay, awaay ko dangoc, mafanaˈay to kihcod, hanaca kadofahay ko siniˈada. Maharekayto ci Yihofa pahatatanam to Wawa no niyah ci Yisan, patoroden cingra to misawkitay a demak. (Yohani 5:22) Cangra mala Wama mataˈeselay ko pinengneng to falocoˈ no tamdaw. (Matay 9:4) Misawkit Cangra to kahacecay tamdaw i, tada masadafdafay ko pidemak.

¹⁹ Nanay seteken ita ko falocoˈ mitadiˈec ci Yihofaan, pakasoˈlin to kahacecay a pisaˈosi Ningra sahtoay o matatodongay. Cipinangay kita, awaay ko hatatodong ita misawkit, edengan ci Yihofa iraay ko tatodong. (ˈOsien ko Isaya 55:8, 9.) Ci Yihofa masadafdafay kadofahay ko siniˈada, o kanonoˈan a Wawa Ningra ci Yis malefotay mitodong Cingranan. Mansa, cowa ko mamisawkit kita to tamdaw, ao sarocoden pakasoˈlin ko polong a pisawkit ni Yihofa aci Yis. (Isaya 11:3, 4) Ano hatiraay i, ci Yihofa aci Yis itini i taˈangayay padiing a tatokian sasamaan misawkit to tamdaw hani? Caay ka fanaˈ kita to maanan? Mafanaˈay to maanan? Ilaenoay a lalakaw papacaˈof tonini a salicay.