LALENGOEN LALAKAW 28
RADIW 123 Madimadi Midofdof to Limasmas no Kawas
Mafanaˈ Kiso Pafafidaˈ to Soˈlinay Kimad ato Mangah Han?
‘Ka tomireng caka ngiyangi. Fakecen i taterecan ko soˈlinay kimad.’—IFISO 6:14.
KALIMLAAN NO LALAKAW
Pahatatanamen ko pafafidaˈay a inaneng, mafanaˈ pafafidaˈ to o manan ko soˈlinay a kimad, o manan ko naitiniay ci Satanan ato misafelitay a mangah.
1. Samaanay ko harateng iso to soˈlinay kimad?
O FINAWLAN ni Yihofa sahtoay maolahay to soˈlinay kimad, mapatireng ko pakasoˈlinay falocoˈ a mihakelong. (Loma 10:17) Pakasoˈlinayho kita, patireng ci Yihofa to kasakopang oha ‘mamidama to soˈlinay kimad.’ (1 Timoti 3:15) O roma i, wa mahemek kita midofdof to ‘mikeriday kitanan a tamdaw,’ samanen misalalangiay cangra to Fangcalay Cudad a pakafanaˈ kitanan, pafeliayho to matatodongay to araaw ni Yihofa a sakayat.—Hipray 13:17.
2. Pakayni i Yakop 5:19, micadato to soˈlinay kimad kita ikor, wa masiˈayawho ko manan a pasangar hani?
2 Soˈlin, micadaayto kita to soˈlinay kimad, halo pakasoˈlin to likakawa no Kawas paira to ngaˈayay tiˈeren a sakayat, alatek mamakayhid no mararaway kimad kita, miliyas to soˈlinay kimad. (ˈOsien ko Yakop 5:19.) Ano cisasa ko harateng ita, eca ka pakasoˈlin to kimad no Fangcalay Cudad ato sakayat no likakawa no Kawas i, o kahemekan ni Satan koni.—Ifiso 4:14.
3. Hano mitawmec kita to soˈlinay kimad hani? (Ifiso 6:13, 14)
3 ˈOsien ko Ifiso 6:13, 14. Mafanaˈayto kita, cato ka halafin, sakadademakan ni Satan ko makaniway ato mararaway a kimad, mikaliorat to kasakitakit a micoˈay to Kawas. (Paˈarawan 16:13, 14) Mafanaˈayho kita, wa mangalef mangalef ko pikaliorat to finawlan no Kawas. (Paˈarawan 12:9) Mihaenay i, pahatatanamen ita ko pafafidaˈay a inaneng, oha ngangaˈay pafafidaˈ to soˈlinay kimad ato mangah, hanaca padadotoc madimadi a midofdof to soˈlinay kimad. (Loma 6:17; 1 Pitiro 1:22) Mihaen to demak a midofdof to soˈlinay kimad o masakalimlaan, samanen milingatay koni to hasakapilakowit ita to taˈangayay a padiing!
4. Oniya lalakaw mamilengo to manan hani?
4 Oniya lalakaw mamilengo, ano sakacipinangaw to soˈlinay kimad no Fangcalay Cudad, halo sapadadotocaw midofdof to sakayat no likakawa no Kawas, o manan ko hapapalahaden ita a tosa capeling hani? Wa milengoho to toloay a hadademaken ita, padama kitanan padadotoc mitawmec to soˈlinay kimad.
O MANAN A CAPELING PADAMA KITAANAN CIPINANG TO SOˈLINAY KIMAD
5. Hano palahaden ita ko mikangodoay ci Yihofaan a falocoˈ hani?
5 Mikangodoay ci Yihofaan a falocoˈ. Ano mikangodo kita ci Yihofaan i, wa pakayni tangongolay a olah ita Cingranan, caka pidemak to cowa ko ka hemekan Ningra. Manonoˈay to sapihaydaaw Ningra kitanan, mansa wa misaˈicel pafafidaˈ to ngaˈayay tatiihay, cipinang to o manan ko soˈlinay kimad ato mararaway. (Taneng 2:3-6; Hipray 5:14) O olah ita ci Yihofaan ikakaen to kaciˈangi to tamdaw, anoca wa ono tamdaw a harateng ko hademak ita, kawra o misafelitay to harateng ni Yihofa kora.
6. O ciˈanigiay a falocoˈ, samaanay mifiyor toya moetep a ˈaˈideman a misakaniw?
6 Mikangodo kita ci Yihofaan, kawra ano o tamdaw ko katalawan ita i, alatek palidlid sato miliyas to soˈlinay kimad. Nengnengen ita i nolitengan a tinakoan, 12 ngangasaw a ˈaˈideman no Israil, maocor misolap to mikiˈokan a sapafeli ni Yihofa cangranan a pala. Minokay cangra i, moetepay a ˈaˈideman matalawayto Kanan a tamdaw, o ˈangi nangra mikikakaay to olah nangra ci Yihofaan. Hananay nangra ko ˈalomanay Israil a tamdaw: ‘Cowa ka ngaˈay miˈodis to itiraay a tamdaw, samanen ikakaay ko ˈicel nangra kitanan.’ (Saˈosi 13:27-31) O pinengneng no tamdaw i, soˈlinayto ikakaay ko ˈicel no Kanan to Israil a tamdaw. Kawra sanay cangra cowa ko papakalowid ko Israil to ˈada, paihkalayto matawalay nangra to o ciˈicelay ko Kawas. Oniya mamoetep a ˈaˈideman o haharatengen nangra ko saali ni Yihofa to Israil. Misaharaterateng to na demakan ni Yihofa i cangranan. Ano mihaen i, wa mahapinang no ˈaˈideman, i pinengneng ni Yihofa cowa ka samaan ko ˈicel no Kanan a tamdaw. Kawra, cowa ka lecad toya cangoˈotay to pakasoˈlinay falocoˈ a ˈaˈideman, ci Yosuwa aci Kalip manonoˈay cangra to pihayda ni Yihofa, hananay nangra ko roma Israil a tamdaw: ‘Ano maolahay ci Yihofa kitanan i, wa keriden Ningra kita tayra tora cihacolay ciˈodalay a pala.’—Saˈosi 14:6-9.
7. Sasamaan kita paˈicel to mikangodoay ci Yihofaan a falocoˈ? (Nengnengen ko coka.)
7 Sapaˈicelaw to pikangodo ita ci Yihofaan a falocoˈ i, ano hamamisaˈosi kita i, saharateratengenho misamaan ko demak ngaˈ o kaolahan ni Yihofa. (ˈOlic 16:8) Ano miˈosi kita to Fangcalay Cudad i, licayen ko niyah: “Ano itiraay kako itiya i, wa misamaan ko pisaˈosi ako hani?” Tinakoen, ano tahatengil kiso to katoledan a lihaf no moetepay a ˈaˈideman i, wa pakasoˈlin kiso a matalaw talalikor han? Anca pakayni olah iso ci Yihofaan, sapidemakaw to kaolahan Ningra a tanoktok ko falocoˈ han? Oya lintad ni Yosuwa aci Kalip a Israil tamdaw, cowa ka hapinang nangra to o soˈlinay ko sowal ni Yosuwa aci Kalip. Telocto i, awaayto ko tatodong nangra micomod i mikiˈokan no Kawas a pala.—Saˈosi 14:10, 22, 23.
Ano itiraay kiso, cima ko papakasoˈlinen iso? (Nengnengen ko saka 7 fatac)
8. Mamisaˈicel kita palahad to manan a capeling? Misamaanay?
8 Misapoeneray a falocoˈ. Pakacipinangan ni Yihofa ko misapoeneray a tamdaw to soˈlinay kimad. (Matay 11:25) O sakafanaˈ ita to soˈlinay kimad, o pakayniay i sapoeneray a falocoˈ, makalim a micada to sapadama. (Dmak 8:30, 31) Kawra misinanot ngaˈ, caka pisatakaraw. Ano misatakaraw kita i, o falocoˈ ato pinengneng no niyah matatodongay to safalod no Fangcalay Cudad ato sakayat no likakawa wasa.
9. Sasamaan kita padadotoc misapoener ko falocoˈ?
9 Sapadadotocaw to misapoeneray falocoˈ i, haratengen palinien to tadamaanay ni Yihofa, o kaˈemingay kita. (ˈOlic 8:3, 4) Ngaˈayay tolonen ci Yihofa padama kitanan a misapoener to falocoˈ, makahi a micada to sapakafanaˈ Ningra. Papacaˈofen ni Yihofa ko satolon no mita, padama kitanan misakareteng to harateng Ningra, misinanot to pakaynian Ningra i Fangcalay Cudad ato likakawa a pakafanaˈ kitanan a demak, cowa ko o misao niyahay sa a harateng. Ano miˈosi to Fangcalay Cudad i, sinanoten ko mitadtadan to misamaanay ci Yihofa maolah to misapoeneray, ˈinteh to misatakaraway. O roma i, o ˈinorong iso o kafanaˈan no ˈalomanay i likakawa, mansa misaˈicelay paihkal to misapoeneray.
MISAMAAN KITA MITAWMEC TO SOˈLINAY KIMAD
10. O cimacima ko minilnilan ni Yihofa a milasil to sakayat i finawlan Ningra?
10 Pakasoˈlinen ko sakayat no likakawa no Kawas. I nolitengan, minilnilan ni Yihofa ci Mosi aci Yosuwa milasil to Israil to sakayat Ningra. (Yosuwa 1:16, 17) Ano pakasoˈlin ko Israil toniya minilnilan no Kawas a tatosa tamdaw i, mamilifok to sapalemed cangra. Ikor no 1,000 miheca, patirengayto ko kasakopang no Krisciyang, itiya manilnilay ni Yihofa ko mimingay a ˈopo a madimadiay faˈinayan milasil to sakayat, saˈayaway ko 12 tarokos, ikor mahawpay ko i Yirusalim a malohemay malitengay. Kahacecay a kasakopang midofdofay to sakayat nangra, mansa ‘mapaˈicelayto ko pakasoˈlinay falocoˈ, to romiˈamiˈad matongalayto ko tamdaw.’ (Dmak 16:4, 5; 8:14, 15) Anini, midofdofay kita to sakayat no likakawa no Kawas, mansa macadaay ita ko adihayay a sapalemed. Kawra, ano eca ka pakasoˈlin kita to minilnilan no Kawas a tamdaw i, sasamaan ko harateng Ningra hani? Nengnengen ita hena, ya mitaˈlif ko Israil a tamdaw to kohkoh i, mifekaday ko manan a demakan.
11. Oya mikafoday to fadangalan ni Mosi a tamdaw samaanay ko teloc nangra? (Nengnengen ko coka.)
11 Kinacecayay, cisasaay ko roma ˈaˈideman ci Mosian, mikafod to sapafeli ni Yihofa ci Mosian a ˈinorong. Sanay cangra: ‘Sahtoay finawlan [coko Mosi aca] o makoracay, masalalomaˈay ci Yihofa itira.’ (Saˈosi 16:1-3) Soˈliˈlin o ˈalomanay finawlan i pinengneng ni Yihofa o makoracay, kawra ci Mosi ko minilnilan ni Yihofa to mikeriday to finawlan Ningra. (Saˈosi 16:28) Mihaenay, oniya misafelitay mitongangan ci Mosian mahecaday mitongangan ci Yihofaan. Cowa pikihar to araaw ni Yihofa, o ˈanof no niyah ko miharatengan, oya fadangalan saaroˈan ko kaolahan nangra. Telocto i, mihadefekan ni Yihofa maemin koya micoliay Cingranan a tamdaw, ato midamaay cangranan a masaefanay a tamdaw. (Saˈosi 16:30-35, 41, 49) Aninito i, ano misakahmaw to sakayat no likakawa no Kawas i, cowa ko mamicada to pihayda no Kawas.
Ano itiraay kiso, cima ko dadamaen iso? (Nengnengen ko saka 11 fatac)
12. O manan ko lalangian ita pakasoˈlin to likakawa ni Yihofa?
12 Adihayay ko lalangian ita padadotoc pakasoˈlin to likakawa ni Yihofa. Pakahemek ci Yihofaan o misakaretengan no mikeriday a salikaka i Congpo, mansa ano mahapinang to sasalofen ko pitadtad to Fangcalay Cudad anca tayal ni Yihofa i, wa kaliki a misalof. (Taneng 4:18) O roma i, wa misaˈicel cangra midofdof to Kimad no Kawas a misaˈosi, mafanaˈay cangra, o finawlan no Kawas wa midofdof to palinian no Fangcalay Cudad wangaˈ.
13. O ‘marocekay a sowal’ a ‘palinian’ o manan ko mitoroˈan? Samaan ko demak ita?
13 Mitawmec to ‘palinian’ no ‘marocekay a sowal.’ (2 Timoti 1:13) O mitoroˈan to ‘marocekay a sowal’ a ‘palinian’ i, oya maˈoningay no Fangcalay Cudad a kimad, o taˈenengan no pihakelongan ita. (Yohani 17:17) O likakawa ni Yihofa pakafanaˈay kitaanan mitawmec toniya palinian, mihaen to demak i, wa macada ita ko sapalemed ni Yihofa.
14. Saka 1 hahekalan a Krisciyang samaanay miliyas to ‘palinian no marocekay a sowal?’
14 Ano miliyas kita ‘toniya marocekay a sowal a palinian’ i, misamaan ko teloc hani? Nengnengen ko cecay a tinakoan, saka 1 hahekalan, ilalomaˈ no Krisciyang iraay ko makaniway a lihaf, pasowal to maraodayto ko romiˈad ni Yihofa sanay. Samanen, iraay ko hato naitiniay ci Pawloan a tikami sanay ko sowal. I Tisalonika a kasakopang a Krisciyang cowaho ka cipinang tora demak i, pakasoˈlinayto, hanaca mayakayakayho koniya makaniway a lihaf. Ano maharatengayho nangra ko nano sapakafanaˈ ni Pawlo a demak i, cowato ko mamasakaniw. (2 Tisalonika 2:1-5) Mirikecan ni Pawlo cangra, hamaan a pakasoˈlin han maemin. Sapipadamaaw cangranan caka masakaniw, patikami ci Pawlo to Tisalonika kasakopang saka 2 tikami, saan ko tolec a sowal: ‘O mitiliday tonini a salicay i, kako ci Pawlo. O tikamiho ako i iraay ko hatiniay a tahapinangan. Oniya miˈoningan ako koni.’—2 Tisalonika 3:17.
15. Sasamaan ko demak ita ngaˈ ho caka masakaniw ko hato soˈlinay a lihaf? Patinakoen hena. (Nengnengen ko coka.)
15 Mikitini to mitilidan ni Pawlo a tikami i kasakopang no Tisalonika, o manan ko mananamay ita? Ano matengil ita ko cowa ka tatodong to Fangcalay Cudad a sowal, anca sapikidataw to tamdaw a lihaf i, sakadademaken ita ko pafafidaˈay a inaneng. I Suwiay a kitakit, iraay ko misafelitay kitanan a tamdaw, naitiniay i congpo a tikami sanay a misakaniw. Oniya tikami pakalalokay to roma a faˈinayan salikaka, patireng to roma misatekeday a lekakawa sanay. Hato soˈlinay naitiniay i congpo nengnengen, kawra cowa ka masakaniw koniya madimadiay a salikaka. Mahapinangay nangra oniya tikami cowa ka lecad to isaˈayaway mananamay nangra a kimad. Anini, oya misafelitay kitanan a tamdaw misaka dademak to wanglo a misakaniw mikaliorat kitanan. Ka pisinanot “aka a mangiyangi, malahdaw ko pafafidaˈay a inaneng,” songilaˈen a miharateng, ora matengilay maˈosiay ita mahecaday to mananamay ita a soˈlinay kimad han? Mihaen ngaˈ madipot kita.—2 Tisalonika 2:2; 1 Yohani 4:1.
Aka masakaniw to hato soˈlinay a lihaf (Nengnengen ko saka 15 fatac)a
16. I Loma 16:17, 18, ano ira ko tamdaw miyakayakay to misafelitay to soˈlinay kimad a lihaf i, wa misamaan ko demak ngaˈ?
16 Makakedec to madimadiay ci Yihofaan a tamdaw. Makalimay ko Kawas makakedec kita a midoko Cingranan. Ano mahaen ko demak i, mamidoedo to soˈlinay kimad i kaˈorip ita wangaˈ. I kasakopang ano ira ko tamdaw miyakayakay to misafelitay to soˈlinay kimad a lihaf i, wa malaliposak ko kasakopang. Mansa patalipaˈelalay ko Kawas kitanan ‘liyasen cangra’ sanay, ho eca ka masakaniw no kimad nangra.—ˈOsien ko Loma 16:17, 18.
17. Ano pafafidaˈ kita to soˈlinay kimad padadotoc a mitawmec, wa ira ko manan a epoc hani?
17 Ano mafanaˈ kita pafafidaˈ to soˈlinay kimad halo misongilaˈ a mitawmec, oha ngangaˈay kita a miingid ci Yihofaan, tanoktok tanotok ko pakasoˈlinay falocoˈ. (Ifiso 4:15, 16) Ora mitenakan ni Satan a lihaf cowa ka mamasakaniw kita, itini taˈangayay a padiing wa madipot madimokos ni Yihofa kita. Nanay padadotoc kita mitawmec to soˈlinay kimad, mihaen o ‘pafeliay to rihaday a Kawas’ wa kalacafayen Ningra kita.—Filip 4:8, 9.
RADIW 122 Katanektek a Tomireng, Aka Mangiyangi!
a TATODONG NO COKA: ˈAyaw no pina poloˈ miheca, itini i Suwiay a salikaka macadaay ko tikami hato naitiniay i congpo, ˈarawhan i, o misafelitay a tamdaw ko mitiliday toniya tikami. (I kawiliay a sasing o miliyawan misasing.) Anini, o misafelitay kitanan a tamdaw tano wanglo a milasil mitongangan to Misawacayay Tamdaw ni Yihofa a lihaf.