LALENGOEN LALAKAW 29
RADIW 121 Ka ˈImeren ko Niyah
Ka Padadotoc a Talipaˈelal, Micoˈay to Sakayhid
‘Ka padadotoc kamo a talipaˈelal, padadotoc a mitolon, ho eca ka makayhid.’—MATAY 26:41.
KALIMLAAN NO LALAKAW
Wa misaˈicel kita ngaˈ eca ka mararaw, wa liyasen ita ko pakararaway pakayraan.
1-2. (1) O manan ko sapatalipaˈelal ni Yis to nisawawaan hani? (2) Hano miliyas cangra ci Yisan a milaliw hani? (Nengnengen ko coka.)
‘FANEKFEKAY ko falocoˈ, kawra malonayay ko tireng.’a (Matay 26:41b) Mihaen ci Yis to sowal i, paihkalay to sidaˈitay cingra to cowa ka lefot no mita. Kawra patalipaˈelalayho cingra hamaan pakidem pakasoˈlin to niyah. ˈAyaw no pasowal ci Yis toninian a sowal to pina tatokian i, tada pakasoˈlinay ko nisawawaan to niyah, wa mikotod ci Yisan sanay. (Matay 26:35) Tada ngaˈayay ko harateng no nisawawaan, kawra cowa ka mahaen a tanoktok cangra. ˈArawhan, irato ko saroero i, malonayayto. Mansa, patalipaˈelalan ni Yis cangra: ‘Ka padadotoc kamo a talipaˈelal, padadotoc a mitolon, ho eca ka makayhid.’—Matay 26:41a.
2 Padadotocay talipaˈelal ko nisawawaan han? Na malepel ci Yis i, mikedecay a mikotod cangra ci Yisan han? Anca ciˈangiay a milaliw han? Kaadayayan i, cowa ka padadotoc cangra talipaˈelal, cowa ka toor nangra ko sowal no niyah, telocto i, miliyasay cangra ci Yisan.—Matay 26:56.
Padadotocen a milaoc hananay ni Yis ko nisawawaan, padadotoc talipaˈelal, ho caka makefong i sakayhid, kawra, ikor miliyasay a milaliw ko nisawawaan cingranan (Nengnengen ko saka 1-2 fatac)
3. (1) Saka madimadiaw kita ci Yihofaan, aka a pakidem pakasoˈlin to niyah, misamaanay? (2) Oniya lalakaw mamilengo to manan?
3 Cowa ko sapidemakaw kita to cowa ka hemekan no Kawas a demak. Kawra cowa ka lefot kita, kahnayay a makayhid. (Loma 5:12; 7:21-23) Mihaenay, hamaan pakidem a pakasoˈlin to niyah. Ano caka pisinanot kita i, fahal sa a makayhid alatek. Saka madimadiaw ci Yihofaan aci Yisan, oniya lalakaw wa padama kitanan, tooren ko sowal ni Yis a talipaˈelal, miconged to sakayhid. Wa milengo kita, i masamaanay a pakayraan a misinanot. Wa milengoho, samaan kita misongilaˈ a talipaˈelal a misiˈayaw to sakayhid, salikor, mamilengo to misamaan padadotoc a talipaˈelal?
I MASAMAANAY A PAKAYRAAN PADADOTOC A TALIPAˈELAL HANI?
4-5. Soˈlin cowa ko pakidemay a raraw nengnengen, hano kamayan kita padadotoc a talipaˈelal hani?
4 O roma raraw, hato cowa ka pakidem nengnengen, kawra wa milingat to kalalaˈed no mita aci Yihofaan, mamangalef ko pidemak to pakidemay a raraw.
5 Tahasiˈayaw kita maemin to sakayhid, kawra cowa ka hecahecad ko dangoc no tamdaw. O roma tamdaw pakidemay ko coos no harateng, sapidemakaw to mararaway a demak, tinakoen o maˈodangay; o roma, maceriday miharateng to kaacekan a demak, tinakoen mipohpoh a misalama to taisiˈan no niyah, minengnengho to kaacekan maˈodangay a lalakaw ato ika; o roma tamdaw, mamicoˈay to harateng noniya hekal, tinakoen o misaidahidahiay a harateng, ciˈangi to tamdaw anca kaliketer. Mahecad to sowal ni Yakop: ‘Soˈlin mapalifet no tamdaw, o makayhiday no coos no niyah.’—Yakop 1:14.
6. Wa mihayi kita to manan a demak hani?
6 Mafanaˈay kiso o manan a demakan ko mamikayhid to niyah hani? Ano cowa pihayi kita to dangoc no niyah i, anca tanoktokay ko niyah cowa ko mamararaw sa i, o misakaniway to niyah. (1 Yohani 1:8) Sowal ni Pawlo i, ano cowa ka pisinanot, o ‘matenesayto a Krisciyang,’ alatek wa matalakal i sakayhid. (Kalatiya 6:1) Aka sakaniwen ko niyah, wa mihayi kita to iraay ko dangoc no niyah.—2 Korinto 13:5.
7. O manan ko sasaˈicelen ita a misinanot hani? Tano tinakoen a mitadtad.
7 Ano mafanaˈ kita i masamaanay a pakayraan kahnay a makayhid i, mamisamaan ko demak hani? I mahaenay a demak a misaˈicel micoˈay to sakayhid. Tinakoen, i lintad no Fangcalay Cudad, o ˈadipel no niyaroˈ a ˈadawang, kahnayay a ˈodisen, mansa ˈalomanay ko sofitay a milaoc. Mahecaday toni, wa misaˈicel kita misinanot to dangoc no niyah.—1 Korinto 9:27.
SAMAAN MISONGILAˈ A TALIPAˈELAL HANI?
8-9. Masowalay no Taneng saka 7 fedengan a kapah, misamaan ko demak ngaˈ, eca ka pakidem ko raraw hani? (Taneng 7:8, 9, 13, 14, 21)
8 Samaan kita misongilaˈ a misinanot hani? ˈOsien ko Taneng saka 7 fedengan, masowalay to cecay a kapah malacafayay to pacopiyaway a fafahiyanan a maˈodang. Sanay ko saka 22 sinael, ‘fahal’ sanay koniya kapah mihakelong toniya pacopiyaway. Kawra, isaˈayaway a sinael paihkalayto, palidlid sanay cingra makefong i sakayhid.
9 Mahaenay i, oniya kapah a tamdaw misamaanay palidlid sa a makefong i sakayhid? Salakat, misakerekereng ko romiˈad i, ‘rakat sanay cingra a miraod tora lomaˈ no pacopiyaway.’ (ˈOsien ko Taneng 7:8, 9.) Ikor, tangsol sanay cingra pasayra tora lomaˈ no pacopiyaway. Dotoc, maˈaraway ningra kora pacopiyaway, kawra cowa ka piliyas cingra. Mihangotan nora pacopiyaway cingra, hai sanay papihangoten. Oniya pacopiyaway sapipaihkalaw to cowa ko tatiihay ko niyah, o kaherekho ako a patafang to sapatoˈaya sanay, kawra terep sanay kora kapah a mitengil to mioratay a sowal nora fafahiyan. (ˈOsien ko Taneng 7:13, 14, 21.) Ano caka raraw ko pahawang noniya kapah i, wa maliyas ningra ko sakayhid caka raraw.
10. Mahecad toya misowalan no Taneng a kapah, o Krisciyang samaanay palidlid sa pakidem ko raraw hani?
10 O mahaenay a demak wa mifekad i midokoay ci Yihofaan a tamdaw. Pakidem ko raraw no tamdaw ikor i, alatek “fahal” sa mafekad koniya demak sanay ko harateng ningra, saan cingra alatek: “Mahaenayto ko demak i, cowa ka harateng ako!” Ano songilaˈen ningra mitikol miharateng i, wa mahapinangto ningra, samanen mararawayto ko pipiliˈ to demak, mansa pakidemayto ko raraw no niyah, oniya demak mahawpay ko: Micawmaˈ to cowa ka olah ci Yihofaan a tamdaw, mipiliˈ to cowa ka tatodong a lawla a pisalama, anca maceriday tayra i mikayhiday toha sakararawaw a kitiraan, minengnengho to kaacekan a wangcan. Cowato ka pitolon cingra alatek, cowato ka piˈosi to Fangcalay Cudad, mirienang to saˈopo, ato mitosilay a demak. Mahecaday toya misowalan no Taneng a kapah, cowa ka “fahal” sanay cingra a mararaw.
11. Ano cowa ko sakararawaw kita, o manan ko laliyasen hani?
11 O manan ko mananamay ita hani? Cowa ko piliyas aca to sakararawaw, raayenho ko mikidatay to sakararawaw a demak. Pasowal ci Solomon toya kapah atoya pacopiyaway a sapatinako ikor, sanay cingra: ‘Aka makaliorat makefong i sakayhid ningra.’ (Taneng 7:25) Pakayni toniya pacopiyaway a fafahiyan, sanayho ko sowal ni Solomon: ‘Liyasen iso cingra, aka ingiden ko fawahan no lomaˈ ningra.’ (Taneng 5:3, 8) Cowa ko sakararawaw kita, mansa laliyasen ko kihcod a sakararawaw a demak. bTatodong i, o katayraan ita ato midemakan, soˈlin cowa ko pisafelit to safalod no Kawas, kamayan kita misongilaˈ a misinanot. Ano mafanaˈay kita to hamamakayhid i, aka a sapiingidaw anca midemak.—Matay 5:29, 30.
12. Samaanay ko pisetek no falocoˈ ni Yopu? Oniya demak samaanay padama cingranan miliyas to sakayhid? (Yopu 31:1)
12 Ano sapiliyasaw to sakararawaw a pakayraan, wa seteken ita ko falocoˈ. Mahaenay ko demak ni Yopu. ‘Mataterekay cingra to mata,’ aka pamotek sa minengneng to fafahiyan a sakaˈodangaw ko harateng. (ˈOsien ko Yopu 31:1.) Misetekayto ko falocoˈ ningra, mansa maliyasayto ningra ko sakaˈodangaw a waywayan. Wa mahaen misetek ko falocoˈ ita, miliyas to kihcod mikayhiday a pakayraan.
13. Hano dadipoten ita ko harateng no niyah? (Nengnengen ko coka.)
13 Oha dadipoten ita ko harateng no niyah. (Kasadakan 20:17) O roma tamdaw, o piharateng aca to mararaway cowa ka samaan, ano cowa ka pidemak i, ngaˈayayto sanay. Kawra, mahaenay harateng i, o mararaway kora. Ano haharateng sa to mararaway a demak i, wa palahad to mararaway a coos. Pairaay to sakayhid no niyah konini, pasangarayto matatodong ko demak. Nolatekay, i ponoˈ i falocoˈ ita, iraay aca ko mararaway harateng. Ano mahaen i, tangsolen ita mifalah ko hatiniay a harateng, ao makoracay makapahay a demak ko haharatengen. Ano mihaen i, mararaway a harateng cowa ko mala pasangaray coˈayen a coos, ho caka pidemak kita to pakidemay a raraw.—Filipi 4:8; Kolosay 3:2; Yakop 1:13-15.
Liyasen ita ko kihcod sakararawaw a demak (Nengnengen ko saka 13 fatac)
14. Wa misamaanho kita midipot to niyah, miliyas to sakayhid hani?
14 Misamaan kita midipot to niyah a miliyas to sakayhid hani? Wa pakasoˈlinen ita ko midofdof to sarikec ni Yihofa o sakaciepoc no mita. Nolatekay, o harateng ato kalim no falocoˈ no niyah pasangaran nanay patatodong to harateng ni Yihofa. Kawra, ano misaˈicel kita midofdof i, o ciepocay konini, samanen wa milifok kita to rihaday no falocoˈ.
15. Palahad to matatodongay kalim no falocoˈ, hano padama kitaanan miconged to sakayhid?
15 Palahadenho ita ko matatodongay a kalim no falocoˈ. Ano mafanaˈ kita ‘ˈinteh to mararaway, maolah to ngaˈayay,’ wa ira ko ˈicel midemak to matatodongay a miliyas to sakararawaw a pakayraan. (Amos 5:15) Roma i, ano fahal sa masiˈayaw ko sakayhid i, anca pasangaray liyasen a pakayraan, wa mangalef ko tanoktok no falocoˈ no mita.
16. Mirienang to midokoay a demak, misamaan a padama kitanan palahad to matatodongay a kalim no falocoˈ? (Nengnengen ko coka.)
16 Mihaenay, misamaan palahad kita to matatodongay kalim no falocoˈ hani? Sarocoden misaˈicel mirienang to midokoay a demak. Mirienang to saˈopo ato mitosilay ho ngaˈay padama kitanan makalim midemak to kaolahan ni Yihofa, hanaca mirienang toniya demak i, cowa kahenay makayhid midemak to tatiihay. (Matay 28:19, 20; Hipray 10:24, 25) Miˈosi kita to Kimad no Kawas halo misongilaˈho midotim, wa matongal ko olah to ngaˈayay, ciˈinteh to tatiihay. (Yosuwa 1:8; ˈOlic 1:2, 3; 119:97, 101) Haratengen, na palimoˈotan ni Yis ko nisawawaan ‘padadotoc mitolon, ho eca ka makayhid.’ (Matay 26:41) Ano pairaen ita ko toki mitolon to i kakarayan a Wama, mamilifok kita to sapadama Ningra, wa ciˈicelto ko falocoˈ pakahemek Cingranan.—Yakop 4:8.
Padadotocen ko ngaˈayay nanaman i pidokoan, wa ciˈicelto kita micoˈay to sakayhid (Nengnengen ko saka 16 fatac)c
PADADOTOC A TALIPAˈELAL
17. Iraay ko masamaanay a dangoc ni Pitiro to hasaka piliyawaw a mararaw?
17 Latek wa pakaremo kita to roma a dangoc no niyah, kawra o roma dangoc padadotocay a micariraw kitaanan. Nengnengen ko nalifetan ni Pitiro. Na ciˈangiay cingra to tamdaw, kinatoloay eca pihayda ci Yisan. (Matay 26:69-75) Ikor, itini Lomaocay ci Pitiro a timolo cingra misawacay ci Yisan, itiya hato pakaremoayto cingra toniya dangoc. (Dmak 5:27-29) Kawra ikor no pina miheca, ‘matalaway ci Pitiro toya micadaay to kerit a tamdaw,’ cowa to kalacafay to ˈalafang a Krisciyang a komaen. (Kalatiya 2:11, 12) Ciˈangiay to tamdaw a harateng miliyaway aca pakapolin ci Pitiroan. Alatek tahira kapatayan ningra cowa pakaremo toniya dangoc.
18. O roma a dangoc misamaan a milingat kitaanan?
18 Mahecad ci Pitiroan, alatek maremoayto ita ko kadangocan no niyah, ikor miliyawayho sakararawaw. Nengnengen ita ko nalifetan no cecay salikaka, sanay cingra: “Moetepayto a miheca cowa ka pinengneng kako to kaacekan a lalakaw, mansa pakaremoayto kako toniya dangoc sanay kako. Kawra, oniya dangoc mahecadayto a ˈaˈadopen mihiningay takowanan, ano cowa ka pisinanot i, wa mataˈemodto ningra kako.” Kawra oniya salikaka cowa ka pisawad. Itini sapadama no fafahi ato malohemay malitengay, mangalef ko pisaˈicel ningra miliyas to kaacekan a lalakaw. Mafanaˈay cingra to romiˈamiˈad wa misaˈicel micoˈay to sakayhid, mafanaˈayho cingra ˈayaw no haaira ko faelohay a hekal, wa padadotoc cingra a miremo to dangoc.
19. Samaanen ita micoˈay ko pasangaray remoen a dangoc hani?
19 Samaanen ita micoˈay ko pasangaray remoen a dangoc, eca ka pisaliyaliyaw a mararaw hani? Oha tatengilen ita ko sapirikec ni Yis, sanay cingra: ‘Ka padadotoc a talipaˈelal.’ Soˈlin hato tanoktokay ko falocoˈ no niyah i, ka padadotoc a miliyas to mikayhiday tisowanan a pakayraan. (1 Korinto 10:12) Ano o roma sapiconged to sakayhid a pakayraan, tada ciepocay tisowanan, padadotocen a midemak koni. Taneng 28:14 saan: ‘O miceriday talipaˈelal a tamdaw i, mamilifok to sapalemed.’—2 Pitiro 3:14.
PADADOTOC TALIPAˈELAL, WA KADOFAH KO MAMACADA A SAPALEMED
20-21. (1) Ano padadotoc kita talipaˈelal, micoˈay to sakayhid, wa milifok to masamaanay a sapalemed? (2) Ano misongilaˈay kita misaˈicel i, wa misamaan ko demak ni Yihofa? (2 Korinto 4:7)
20 Ano padadotoc kita talipaˈelal, misaˈicel micoˈay to sakayhid, o tada ciepocay koni. Midemak to mararaway a hemek cecayay aca a liyad. Edengan midofdof kita to palinian ni Yihofa a maˈorip ngaˈ, wa tahadaˈoc ko lipahak. (Hipray 11:25; ˈOlic 19:8) Samanen mahaenay ko pisafaco no Kawas a misangaˈ kitaanan a maˈorip. (Satapangan 1:27) Midofdof kita to palinian ni Yihofa a midemak, nohatini ira ko tingalaway a falocoˈ, ano ikor mamilifok to tahadaˈocay a ˈorip.—1 Timoti 6:12; 2 Timoti 1:3; Yuta 20, 21.
21 Soˈlin o malonayay ko tireng ita, kawra, awaay ko ˈicel ita micoˈay to kalonay, cowa ka saan. Ano hacowato i, wa makahi ci Yihofa pafeli kitaanan to ˈicel. (ˈOsien ko 2 Korinto 4:7.) Haratengen, soˈlin wa pafeli ko Kawas to ‘tadamaanay a ˈicel kitaanan, kawra talaˈayaw kita a midemak, to romiˈamiˈad misaˈicel micoˈay to sakayhid. Ano misongilaˈayto kita a misaˈicel i, wa pakasoˈlin to hapapacaˈofen ni Yihofa kita, papatongalen Ningra ko ˈicel itini pisaali no mita. (1 Korinto 10:13) Tiˈeren ko sapadama ni Yihofa, oha ngangaˈay kita padadotoc a talipaˈelal, malaˈosi ko picoˈay to sakayhid.
RADIW 47 To Romiˈamiˈad Mitolon ci Yihofaan
a SAPITADTAD A SOWAL: I Matay 26:41, o ‘falocoˈ’ hananay, o micikelohay to falocoˈ ita a ˈicel ko mitoroˈan, oniya ˈicel mamidofdof to roma a pakayraan misimsim ato midemak. O ‘tireng’ hananay mitoroˈan i, ciraraway kita cowa ko malefotay. Alatek makalimay kita midemak to matatodongay, kawra ano cowa ka pisinanot i, wa makayhid a mapolin, midemak to mararaway.
b Oniya lalakaw pakayni to pakidemay mararaway a Krisciyang tada ciepocay: Layapen ko Midaˈocay ˈOrip! saka 57 fedengan saka 1-3, ato “Pasiˈayaw ko Pinengneng, Misaˈimer to Hanoikor” Mikecolay, Saka 11 Folad 2020, saka 27-29 fiedac, 12-17 fatac.
c TATODONG NO COKA: O cecay faˈinayan salikaka, to papacepacem miˈosiay to pakaromiˈaday a sinael, i pahanhanan no kalahokan miˈosiay to Fangcalay Cudad, to dadaya mirienangay to saˈopo.