Sasamaan Pakalowid to Mararaway a Coos

1. O polong cowa ka lefot a tamdaw oha mamiˈodot to manan?

NA IRAAY ko mahaenay a nalifetan iso han? Mafanaˈ to o manan ko kateliiyan ni Yihofa a demak, kawra kamayan sapidemakaw kiso. Ano mahaenay i, hamaan a matoled. Sowal no Fangcalay Cudad: ‘Tahalifa kamo to sakayhid i, nao malifaayto no romaroma a tamdaw.’ (1 Korinto 10:13)a Ano o mananto ko miˈodotan iso a mararaway coos, haratengen, itini toniya hekal iraay ko roma tamdaw tahasiˈayaway to hatiniay a pasangar. Mansa, cowa ka matoˈol kiso. Ano tiˈeren ko sapadama ni Yihofa, ngangaˈay kiso pakalowid to mararaway a coos!

2. O roma Krisciyang ato pakingkiwan macadaay ko manan a sakayhid? (Nengnengen ko coka.)

² O roma i, saan ko Fangcalay Cudad: ‘Soˈlin mapalifet ko tamdaw, o makayhiday no coos no niyah.’ (Yakop 1:14) Mihaenay, iraay ko kalonayan no kahacecay a tamdaw. O roma a demak pakayni toniya tamdaw cowa ko sakayhid, kawra pakayni roma a tamdaw i, o taˈangayay a sakayhid. Tinakoen, o roma a tamdaw na haliepahay, miselip to etok anca minengneng to maˈodangay a lalakaw, soˈlin nohatini mifalahanto ko hatiniay a tatiihay nanaman, kawra nolatekay sapidemakawho to hatiniay a demak. Roma i, o roma tamdaw sapidemakaw to maˈodangay a waywayan, hanaca o faˈinayan ato faˈinayan, o fafahiyan ato fafahiyan maˈaˈodangay. O Krisciyang ato pakingkiwan alatek tatahasiˈayaw to masakenakenay a sakayhid, oninian o pina aca tinakoan. Kita kahacecay a tamdaw alatek mahecaday to harateng ni Pawlo, sanay cingra: ‘Ano sapidemakaw kako to matatodongay demak i, iraayto ko tatiihay a harateng mifedfed takowanan.’—Loma 7:21.

3. O cecay a tamdaw ano padadotoc a malaˈodot to mararaway a coos, alatek iraay ko masamaanay a harateng?

³ Ano padadotocay kiso malaˈodot to mararaway a coos, alatek awato ko saloˈingaw, awaay ko hapakayraan micoˈay to sakayhid no niyah. Alatek awaayto ko hatokel saan kiso, ano ira ko mararaway a coos no niyah mamalahdaw ko pihayda ni Yihofa ato tahadaˈocay a ˈorip. Kawra oniya tosa a harateng cowa ko matatodongay! Misamaanay hano mahaen ko sowal hani? Folfolen ita hena: (1) Awaay ko saloˈingaw ato awaay ko hatokel a harateng naicowaay aira hani? (2) Samaanen iso pakalowid to mararaway a coos hani?

O TATIIHAY HALAKA NI SATAN

4. (1) Hano makalimay ci Satan kitanan awa ko saloˈingaw? (2) Misamaanay hano ngangaˈay kita micoˈay to sakayhid hani?

⁴ Makalimay ci Satan ano tahalifa kita to sakayhid i, awato ko saloˈingaw sanay, oniya demak mikitini i sowal ni Yis a mahapinang. Pakafanaˈ ci Yis to nisawawaan to mitolon i sanay: ‘Hamaan a pakefongen kami i sakayhid, nanay paˈoripen Iso kami maliyas kora mariˈangay.’ (Matay 6:13) Tahalifa ko tamdaw to sakayhid cowato ka pidofdof to Kawas, saan ci Satan. (Yopu 2:4, 5) Tada milokesay koni! O mahaenay ci Satan, mapadikay i mararaway a coos cingra, cowa ka padadotoc madimadi ci Yihofaan. O harateng ningra i, mamahecad kita cingranan awa ko ˈicel micoˈay to sakayhid. Saanho ko harateng ningra, malefotay a wawa no Kawas ci Yis mamapadik i sakayhid. (Matay 4:8, 9) Kawra tahasiˈayaw kita to sakayhid i, soˈlinay awa ko ˈicel a micoˈay han? Cowa! Mahecad to sowal ni Pawlo: ‘Mitadiˈec kako to pafeliay to ˈicel a Tatapangan, maremoayto ko kihcod a demak.’—Filip 4:13.

5. Hano mafanaˈ kita, pakasoˈlinay ci Yihofa kitanan papakalowid to mararaway a coos hani?

⁵ Cowa ka hecad ci Satanan, pakasoˈlinay ci Yihofa kitanan, wa pakalowid to mararaway a coos. Hano mafanaˈ kita hani? Pairasolay ci Yihofa wa ira ko taˈangayay ˈopo a tamdaw madimadi tahatolas, milakowit to taˈangayay a padiing. Saharateratengen o manan ko tatodong nonini. Cowa ko mimingay aca a tamdaw saan ko sowal ni Yihofa, ao ˈalomanay a tamdaw ko mamicomod i faelohay a hekal, oniya tamdaw ‘tano remesan no tofor a siri a mikorac to rikoˈ no niyah,’ malo makoracay a tamdaw i pinengneng no Kawas. (Paˈarawan 7:9, 13, 14) Cowa ko misamangahay a Kawas ci Yihofa. Mansa, pakasoˈlinay Cingra to papakalowid kita to sakayhid.

6-7. Hano papiharateng ci Satan kitanan to awaay ko hatokel hani?

⁶ O roma i, papiharatengay ci Satan kitanan to awaay ko hatokel sanay. Papiharatengay cingra kitanan, ano ira ko mararaway a coos, wa tefocen ni Yihofa, malahdaw ko midaˈocay a ˈorip. Saharateratengen hena, tada milokesay koniya demak! Ci Satan ngaˈ awaay ko hatokel, samanen masaˈosiayto ni Yihofa ko raraw ningra, cowato ko mamidaˈoc a maˈorip. (Satapangan 3:15; Paˈarawan 20:10) Mafanaˈay ci Satan to iraay ko hatokel no mita tahadaˈoc a maˈorip, tada maˈinapay cingra, tano masakenakenaay a pakayraan papiharateng kitanan to awaayto ko hatokel no niyah. Kawra soˈlinay awato ko hatokel ita han? Cowa! Ihkalay ko Fangcalay Cudad a somowal, cowa ko sapitefocaw ci Yihofa kitanan, ao sapadamaaw kitanan. ‘Cowa ka kahi Cingra malaˈafo ko kahacecay a tamdaw, ao papasasiyor ko tamdamdaw.’—2 Pitiro 3:9.

⁷ Micoˈay to mararaway coos i, ano awa ko ˈicel anca awa ko hatokel ita saan ko miharateng i, mamahemek ci Satan, makalimay cingra mahaen ko harateng ita. Cipinang toniya demak i, ngaˈayay paˈicel to pisetek no falocoˈ ita, ho caka ngiyangi tanoktok ko falocoˈ ita, micoˈay ci Satanan.—1 Pitiro 5:8, 9.

O PIFIYOR NO RARAW

8. Itini i Fangcalay Cudad, o “raraw” o mitoroˈan i midemakan a raraw, iraayho ko manan a tatodong? (ˈOlic 51:5) (Nengnengen ko “Sapitadtad a Sowal.”)

⁸ Coko ci Satan aca, iraayho ko cecay a lalangian itini picoˈay to mararaway a coos i, alatek papiharateng kitanan awaay ko haˈicel ato hatokel, o manan hani? O mirocokan ita ci Ataman aci Ifaan a raraw.b—Yopu 14:4; ˈosien ko ˈOlic 51:5.

9-10. (1) O raraw samaanay mifiyor ci Ataman aci Ifaan hani? (Nengnengen ko coka.) (2) O raraw samaanay mifiyor kitanan hani?

⁹ Saharateratengen o raraw samaanay mifiyor ci Ataman aci Ifaan. Misafelit cangra ci Yihofaan ikor, milimekay tayra i kilakilangan, mitahepoanho nangra ko tireng. Pakayni to harateng nangra i, sanay ko《洞悉聖經》: “Mararaw cangra ikor mirorohay to niyah, cariraway, cowa ka rihaday ko falocoˈ, cinangodoen.” Oniya sepat a maharatengay mahecaday to sepat a lalomaˈan. Mararaw ci Atam aci Ifa ikor i, hato mapalitay toniya lomaˈ. Edengan cangra mikitini i cecay lalomaˈan tayra i roma a lalomaˈan, kawra cowato pakahadak toniya lomaˈ. Cato ka pakaliyas to raraw cangra tahadaˈoc.

¹⁰ Manaokaniw, o pakayraan ita ato ni Atam aci Ifa cowa ka hecad maemin. Cowa ka ngaˈay cangra mikitini i sapatefoc milifok to epoc, kawra wa ngaˈay kita. O sapatefoc mamikorac to raraw no mita, ho ira ko tingalaway makapahay a falocoˈ no mita. (1 Korinto 6:11) Soˈlin mahaen i, kamayan kita mafiyor no mirocokan a raraw a miroroh to niyah, cariraw, cowa ka rihaday ko falocoˈ, cinangodoen. Saan ko Fangcalay Cudad, ‘soˈlin o raraw no hekal a tamdaw cowa ka hecad to midemakan ni Atam,’ kamayan makowan no raraw to hekal a tamdaw. (Loma 5:14) Mahaenay a pakayraan hato toˈemanay awato ko tediˈ, kawra cowa ka awaay ko saloˈingaw ato hatokel ita. Ngangaˈay kita micoˈay to hatiniay tatiihay a harateng. Samaanen ita ko demak hani?

11. Ano awaay ko ˈicel saan kita i, haratengen ita ko manan? Misamaanay? (Loma 6:12)

¹¹ Ano awaayto ko ˈicel ita, cowa pakalowid to mararaway a coos saan kita i, patalipaˈelalen ko niyah, o “pasowalay” ko raraw kitanan, hamaan mitengil kita to mararaway a ngihaˈ. Misamaanay hani? Samanen paihkalay ko Fangcalay Cudad, hamaan ‘padadotocen ko raraw mahecad to hongti mikowan’ kitanan. (ˈOsien ko Loma 6:12.) Tatodong i, ngaˈay kita mipiliˈ eca ka pidofdof to mararaway a coos a midemak. (Kalatiya 5:16) Pakasoˈlinay ci Yihofa kitanan ngangaˈay kita micoˈay to sakayhid, ano caka pakasoˈlin Cingra kitanan, cowa ko mamihaen a misaali kitanan. (Limoˈot 30:11-14; Loma 6:6; 1 Tisalonika 4:3) Mahapinangay, ano tahasiˈayaw to sakayhid i, iraay ko ˈicel ita micoˈay.

12. Ano awaay ko hatokel saan kita i, o manan ko haharatengen hani? Misamaanay?

¹² Mahecadayto, ano awaayto ko hatokel saan kita, papakayni i mararaway a coos a mitefoc ci Yihofa kitanan sanay miharateng i, patalipaˈelalen ko niyah, o raraw ko “pasowalay” kitanan tonini, hamaan tengilen ita ko mararaway a ngihaˈ. Misamaanay hani? Samanen paihkalay ko Fangcalay Cudad, cipinangay ci Yihofa hofoc hanho kita iraayto ko raraw. (ˈOlic 103:13, 14) ‘Mafanaˈay to kihcod’ Cingra, ihkalay cipinang to samaanay mifiyor ko mirocokan ita a raraw. (1 Yohani 3:19, 20) Ano misaˈicel kita micoˈay to sakayhid, caka midofdof to mararaway a coos a midemak, o makoracay han ni Yihofa ko pinengneng kitanan. Misamaanay hano pakasoˈlin kita toninian a demak hani?

13-14. Ano o mararaway aca a coos, wa malahdawto ko pihaday no Kawas han? Tadtaden.

¹³ Paihkalay ko Fangcalay Cudad, mararaway a coos ato mararaway a waywayan cowa ka hecad. Mahadak ko mararaway a harateng soˈlin cowa ka ngaˈay congeden no mita, kawra wa ngaˈay ˈimeren ita, hamaan a mararaw. Nengnengen ko cecay a tinakoan. Saka 1 hahekalan a Korinto a kasakopang o roma a tamdaw ˈayaw no mala Krisciyang i, o tongsinlien, o mitilidan ni Pawlo a tikami sanay: “Kamo o roma a tamdaw . . . na mahaenay isaˈayaw.” O tatodong no sowal ni Pawlo i, awaayto ko mahaenay a coos nangra han? Cowa ka hatira, samanen o mahaenay a coos pasangaray misongilaˈ a mifalah. Kawra, oniya Krisciyang misaˈicelay a miˈimer to niyah, cowa palawaywayan nangra ko mararaway a harateng, telocto i, macadaay nangra ko pihayda ni Yihofa. Itini pinengneng ni Yihofa i, ‘makoracayto’ cangra. (1 Korinto 6:9-11) Ngaˈayay kiso pahecad cangranan, milifok to pihayda no Kawas.

¹⁴ Ano malaˈodot kiso to maanan a mararaway coos, wa malaˈosi maemin. Alatek awaay ko pakayraan iso misongilaˈ a mifalah to mararaway a coos, kawra ngaˈayay ˈimeren iso ko niyah, caka pidemak to ‘midemakan no ciraraway a tireng ato mararaway harateng.’ (Ifiso 2:3) Mihaenay, iraay ko manan a pakayraan papadama tisowanan pakalowid to mararaway coos hani?

MALAˈOSIAY A PAKAYRAAN

15. Sapakalowidaw to mararaway coos i, hano caka ngaˈay sakaniwen ko niyah?

¹⁵ Sapakalowidaw to mararaway coos, hamaan sakaniwen ko niyah, songilaˈen minengneng ko kadangocan no niyah. Hamaan tano ‘mararaway a kimad’ misakaniw to niyah. (Yakop 1:22) O maamaan ko mararaway a sasowalen hani? Tinakoen, o roma tamdaw misakaniway to niyah saan: “Cowa ka adihay ko miˈinipan ako a epah, ono tao ko adihayay miˈowakan!” O roma tamdaw alatek mirorohay to tao sanay: “Ano lopayˈay ko fafahi takowanan, cowa ko sapinengnengaw to maˈodangay a lalakaw.” Ano mahaenay ko harateng iso i, wa madoloto a mapadik no sakayhid. Mansa, hamaan adihayen ko sasowalen to mararaway a waywayan, o piharateng aca no falocoˈ cowa ka ngaˈay! Wa ciˈinorong kiso to midemakan no niyah.—Kalatiya 6:7.

16. O manan ko papadama tisowanan misetek to falocoˈ ho eca ka mapadik no sakayhid hani?

¹⁶ Aka pisakaniw to niyah, hanaca misetek kiso to falocoˈ aka mapadik no sakayhid. (1 Korinto 9:26, 27; 1 Tisalonika 4:4; 1 Pitiro 1:15, 16) Sapidemakaw toniya demak, mamisinanot kiso to niyah o manan ko madoloay mikayhid tisowanan, ato ihacowaay madolo a makayhid kiso. Tinakoen haratengen, to lafii anca marorayay i, pasangaran kiso micoˈay to sakayhid han? Ngaˈayay haratengen iso, alatek tatahasiˈayaw to manan a sakayhid, hanaca talaˈayaw a miharateng to sasamaan a misiˈayaw. Aihacowa mihaen to demak o citanengay hani? I ˈayaw no makayhid kiso.—Taneng 22:3.

17. Mikitini taˈarawan ni Yosif o manan ko mananamay ita hani? (Satapangan 39:7-9) (Nengnengen ko coka.)

¹⁷ Haratengen ko tinakoan ni Yosif. O fafahi ni Potifar kinapinapinaay mikayhid cingranan, to sapidiˈiaw cingranan, kawra tangsolay cingra a milalang. (ˈOsien ko Satapangan 39:7-9.) O harateng ni Yosif paihkalay to manan hani? ˈAyaw no pikayhid no fafahi ni Potifar i, misongilaˈay cingra a miharateng, cowa ko mamidemak toniya tatiihay a demak a pakararaw to Kawas. Ngaˈay mitodong kiso to taˈarawan ni Yosif, ˈayaw no sakayhid misetek to falocoˈ midemak to kaolahan ni Yihofa a demak. Mihaen, soˈlinto makayhid kiso i, madoloto kiso misiˈayaw, samanen midoedoan iso ko misaˈosianto a demak.

‘KA PADADOTOCEN MIKINSA KO NIYAH’

18. Sapakalowidaw to mararaway coos, sasamaanho ko pidemak iso hani? (2 Korinto 13:5)

¹⁸ Sapakalowidaw to mararaway coos, ‘ka padadotocho mikinsa to niyah’ kiso, micerid a mitiwca to niyah. (ˈOsien ko 2 Korinto 13:5.) Ceriden a mitikol mihapinang ko harateng ato waywayan no niyah, halo misalof to kadangocan no niyah. Tinakoen, to cecay a liyad cowa ka mapadik no sakayhid kiso, kawra ngaˈay salalicayen ko niyah: “Tahalifa to sakayhid i, hakowa ko halafin ngaˈ pakalalang kako hani?” Ano mahapinang iso ko niyah to maosoyay a milalang, hamaan a pakidem miroroh to niyah, o sangaˈayay a pakayraan i, haratengen sasamaan a misalof. Salalicayen ko niyah: “Wa ngaˈay kako tangsol sa a milalang, kaliki a palahdaw to tatiihay a harateng han? O mipiliˈan ako a lawla pasangaran nanay kako a micoˈay to sakayhid han? Manengneng ko maˈaˈodangay a demak i, tangsolay kako caka pinengneng han? Cipinangay kako, midofdof to palinian ni Yihofa o sakaciepoc ako han? Soˈlin mamisaˈicel a miˈimer ko niyah, kamayan pakasoˈlin kako toniya demak han?—ˈOlic 101:3.

19. Misakahmaw to mimingay a demak wa pasangar micoˈay to mararaway coos, hano mahaen ko sowal hani?

¹⁹ O roma i, hamaan o matatodongay a demak han ko mararaway. Sanay ko Fangcalay Cudad: ‘Ikaka no maamaan ko pisamangah no falocoˈ no tamdaw, sano haratengay sanay a midemak.’ (Yirimiya 17:9) Sanayho ci Yis, naitiniay falocoˈ iraay ko masakenakenaay a ‘tatiihay a harateng.’ (Matay 15:19) Tinakoen, o cecay tamdaw cowa ka pinengneng to maˈodangay lalakaw to cecay liyad, alatek saan ko harateng, minengnengay to mikidatay to mararaway coos a sasing cowa ka samaan sanay, i sasingay a tamdaw cirikoˈayto. Sanay cingra miharateng, o piharateng aca to cowa ka korac a demak cowa ka samaan, ano caka soˈlin midemak ngaˈayayto. Kawra mahaenay ko harateng ningra, soˈlinay i, ‘mihalakaay to sapirenecaw to ciraraway a coos.’ (Loma 13:14) Mihaenay, samaanen iso ngaˈ eca ka makefong to hatiniay a talakal hani? Haratengen: O mimingay a raraw wa palidlid sato malo taˈangayayto a raraw, mansa i mimingay a demak hamaan a misakahmaw.c Falahen ko kihcod a ‘tatiihay a harateng,’ hamaan pakayni i maamaan a mararaway demak adihay ko sasowalen.

20. Nohatini mamilifok kita to masamaanay a sapadama? Iraay ko manan a hatokel noikor?

²⁰ Mananamay ita, papafelien ni Yihofa kita to ˈicel micoˈay to sakayhid. Pakaynien Ningra i sapatefoc, ho ira ko hatokel ita tahadaˈoc maˈorip i faelohay hekal. Itiyato i, o ponoˈ ato falocoˈ ita papatatikolto a makorac, cowato ko malaˈodot kita to mararaway a coos, tada o makapahay koni! ˈAyaw nonini i, ngangaˈay pakasoˈlin kita, misiˈayaw to sakayhid i, cowa ko awaay ko ˈicel, awaay ko hatokel ita. Misarocod kita misaˈicel, mamilifok to sapalemed ni Yihofa, pakalowid toniya kalaˈodot!