LALENGOEN LALAKAW 31
RADIW 12 Tadamaanay a Kawas ci Yihofa
Sapilidongaw to Polong Ciraraway a Tamdaw, Midemakan ni Yihofa ko Maanan Hani?
‘Tada tangongolay maolah ko Kawas to tamdamdaw, mangalef pafeliayho to foseniˈan a Wawa no Niyah.’—YOHANI 3:16.
KALIMLAAN NO LALAKAW
Nengnengen ita, talaˈayaway ci Yihofa midemak to maanan padama kitaanan miˈodot to raraw, ho ira ko midaˈocay a ˈorip no mita, palahdaw to pisemsem no raraw.
1-2. (1) O manan ko raraw? Sasamaan kita ngaˈ pakalowid to raraw? (Nengnengen ko “Sapitadtad a Sowal.”) (2) Oniya lalakaw wa milengo to manan? Oniya folad a Mikecolay, mamilengo to maanan? (Nengnengen ko “Sapaini to Miˈosiay” noniya lalakaw.)
HAKOWAAY ko olah ni Yihofa tisowanan, mafanaˈay kiso han? Sakafanaˈaw kiso to caˈof i, hapinangen ko na midemakan ni Yihofa to maanan sapilidongaw tisowanan. O rarawa hananay i, tada o katalawan a ˈada ita, mansa caka filo iso mitiˈer to niyah a pakalowid. Mararaway kita to romiˈamiˈad, pakayni i raraw, mamapatay kita. (Loma 5:12) Kawra, o ngaˈayay a lihaf i, mitiˈer kita to sapadama ni Yihofa wa ngaˈay pakalowid to raraw. Hay! Papakalowid kita!
2 Mikitini ˈayaw no 6,000 miheca tahanini, padadotocay ci Yihofa padama to tamdaw miˈodot to raraw, misamaanay hani? Samanen maolahay Cingra kitaanan. Irato ko tamdaw i, tada tangongolay ko olah Ningra to tamdaw, mihaenay i, misaˈicelay Cingra padama kitaanan micoˈay to raraw. Mafanaˈ Cingra papaira to patay ko raraw, kawra, cowa ka olah Cingra mapatay kita, ao midaˈocay ko ˈorip ita. (Loma 6:23) Onini o sapafeli no Kawas i tisowanan a hatokel noikor. Oniya lalakaw mamilengo to tolo a salicay: (1) Pafeliay ci Yihofa to maanan a hatokel i ciraraway a tamdaw hani? (2) Itini i lintad no Fangcalay Cudad, sasamaanen no ciraraway a tamdaw milifok ko pihayda ni Yihofa? (3) Sapilidongaw to ciraraway a tamdaw, midemakay ci Yis to maanan?
PAFELIAY CI YIHOFA TO MAANAN A HATOKEL I CIRARAWAY A TAMDAW HANI?
3. Misamaanay hano malo mararaway a tamdaw ci Atam aci Ifa hani?
3 Ya misangaˈ ci Yihofa to saka cecay faˈinayan ato fafahiyan i, nanay rihaked ko kaˈorip nangra. Pairaan ni Yihofa cangra itini i makapahay a kitiraan, pacafayan cangranan mala raramod, iraayho ko kahemekan a tayal. Mamahofoc cangra to wawa a pasifanaˈ, mipamatang to sera, pala lakoing ko polong no cikiw mahecad to Itin. Pafelian Ningra ko cecay aca madoloay a sapalimoˈot, tano olah a patalipaˈelal cangranan, ano caka pidofdof toniya sapalimoˈot, padeteng sa misatowakang Cingraan i, wa mapatay cangra sanay. Mafanaˈayto kita mafekaday ko maanan a demak. O cecay cowa ka olah to tamdaw ato Kawas a mariˈangay coyoh, mikayhiday ci Ataman aci Ifa a misafelit to Kawas, makefongay ci Atam aci Ifa to talakal ningra, cato ka pakasoˈlin to ciolahay a kakarayan Wama, telocto, mararawayto cangra. Ya mararaw cangra toya romiˈad a misatapang, wa tahasiˈayaw cangra to padadotocay a pasangar, mamaliteng ato mamapatay. Malaˈosiayto ko sowal ni Yihofa.—Satapangan 1:28, 29; 2:8, 9, 16-18; 3:1-6, 17-19, 24; 5:5.
4. Hano tada ˈintehay ci Yihofa to raraw, hanaca padama kitaanan pakalowid to raraw hani? (Loma 8:20, 21)
4 Saka ciepocaw no mita, miˈoningan ni Yihofa koniya demak i Fangcalay Cudad. Oniya maˈoningay padama kitaanan mihapinang, hano tada ˈintehay ci Yihofa to raraw, samanen pakayni i raraw, pakalacinowasay kitanan, pairaho to patay. (Isaya 59:2) Mansa, tada maolahay ci Satan to raraw. Mikayhidan ningra ci Atam aci Ifa isaˈayaw, nohatini i, padadotocay cingra misaˈicel mikayhid to tamdamdaw a mararaw. Ya mitowakang misafelit ci Atam aci Ifa ikor, o harateng ni Satan i, hato cowato ka ngaˈay palaˈosi ci Yihofa to araaw Ningra, kawra cowa ka mahapinang ningra to o tada ciolahay a Kawas ci Yihofa. Mikitiya tahanini, cowa ka falic ko araaw ni Yihofa to tamdamdaw. Tangongolay ko olah Ningra i kitanan, mansa tangsolay Cingra a milimasmas ho ira ko hatokel no mita. (ˈOsien ko Loma 8:20, 21.) Mafanaˈay ci Yihofa, mamipiliˈ ko tamdaw maolah Cingranan, halo micangacang to sapadama Ningra miˈodot to raraw. Malo kakarayan a Wama ato Misangaˈay a Tatapangan ci Yihofa, makalimay Cingra padama cangranan eca ka mafiyor no raraw, ngaˈayay miingid Cingranan. Mihaenay i, o manan ko milimasmasan ni Yihofa hani?
5. I hacowa ira ko ˈodingaray a hatokel hani? Tadtaden hena. (Satapangan 3:15)
5 ˈOsien ko Satapangan 3:15. Ya milasil ci Yihofa to sasawkit ci Satanan itiya i, irato ko ˈodingaray a hatokel. Talaˈayaway ci Yihofa a milasil, oniya hatokel milingatay to cecay a “teloc”. Salikor i, oniya teloc oha papalaˈafo ci Satanan, palahdaw to pasangaray a demak maemin nai Itin. (1 Yohani 3:8) Kawra, oha mamisemsem koniya teloc. Mamidokaˈ ci Satan a mipatay cingranan. Oniya demak mapakararomay ci Yihofaan, kawra, makahiay ci Yihofa a miemem, samanen mafanaˈay Cingra, ikor ˈalomanay tamdaw wa pakayni toniya limasmas a malidong, cowato ka mafiyor no raraw ato patay tahadaˈoc.
ITINI I LINTAD NO FANGCALAY CUDAD, SASAMAANEN NO CIRARAWAY A TAMDAW MILIFOK KO PIHAYDA NI YIHOFA?
6. Sapiingidaw ci Yihofaan, ci Apil aci Nowa ato romaroma ira ko pakasoˈlinay falocoˈ a tamdaw, midemakay cangra to maanan hani?
6 Mitowakang misafelit ci Atam aci Ifa ikor, palidlid sa ci Yihofa pakafanaˈ to ciraraway a tamdaw, sasamaan ko demak ngaˈ, ngaˈay miingid Cingranan. Ya mafekad ko mitowakangay a demak ikor, saka tosa wawa ni Atam aci Ifa ci Apil, o saka cecay paihkal to pakasoˈlinay falocoˈ ci Yihofaan a tamdaw. Tada maolahay cingra ci Yihofaan, sapiingidaw milifok to pihayda Ningra, mihaenay i, patafangay ci Apil to sapatoˈaya. O pakaenay to siri a tamdaw cingra, mipiliˈan ningra ko pina tofor a siri, patafangan ningra ci Yihofa malo sapatoˈaya. Samanay ko harateng ni Yihofa hani? Sowal no Fangcalay Cudad: ‘Tada maolahy ci Yihofa ci Apilan ato sapatoˈaya ningra.’ (Satapangan 4:4) Ikor, ci Nowa ato romaroma maolahay pakasoˈlinay ci Yihofaan a tamdaw, ano patafang to mahecaday a sapatoˈaya i, paihkalay ci Yihofa to pihayda Ningra. (Satapangan 8:20, 21) Micadaay ci Yihofa toniya sapatoˈaya, paihkal to ciraraway a tamdaw wa ngaˈayho milifok to pihayda Ningra a miingid Cingranan.b
7. Makalimay ci Apraham patafang to wawa no niyah malo sapatoˈaya, mikitini toniya demak o manan ko mananamay ita?
7 Tada o pakasoˈlinay to Kawas a tamdaw ci Apraham. O cecay romiˈad, palimoˈotan ni Yihofa cingra midemak to tada pasangaray a demak—patafang to niyah a wawa ci Isak malo sapatoˈaya. Midemak toniya demak wa pakararom ci Aprahaman, kawra, hayi sa cingra midofdof to sowal ni Yihofa. ˈArawhan i, ˈayaw mamitokad ci Isakan i, tangsolay miconged ci Yihofa cingranan. Polong pakasoˈlinay to Kawas a tamdaw, mikitini toniya demak mananamay ko cecay kalimlaan a kimad: Makalimay ci Yihofa patafang to ˈorip no kanonoˈan a Wawa no Niyah. Soˈlinayto, tada tangongolay ko olah ni Yihofa to tamdamdaw!—Satapangan 22:1-18.
8. O Sarikec ni Mosi, oya patafangan a sapatoˈaya mitaypiyaway to manan hani? (Lifi 4:27-29; 17:11)
8 Ya milasil ci Yihofa to sarikec i Israil tamdaw i, palimoˈotan cangra patafangen ko pinaˈorip malo sapatoˈaya, ho masodod ko raraw no niyah. (ˈOsien ko Lifi 4:27-29; 17:11.) Oniya sapatoˈaya mitaypiyaway to cecay sakakaay a sapatoˈaya, wa ngaˈay palahdaw to raraw no tamdamdaw. Mikayatan no Kawas ko pairasolay a milasil, o mikiˈokan no Kawas a teloc, o cecay tada mikiriwiˈay a Wawa Ningra, wa masamsam cingra, mahecad o sapatoˈaya a siri a mapatay. (Isaya 53:1-12) Sapalahdawaw to pidokaˈ no raraw ato patay no tamdaw, makalimay ci Yihofa kinafalah to kanonoˈan a Wawa. Tada taˈangayay ko kinafalah ni Yihofa. Oniya kasemeran a demak—o saki tisowanan—a midemak.
SAPILIDONGAW TO CIRARAWAY A TAMDAW, MIDEMAKAY CI YIS TO MAANAN?
9. Pakayni ci Yisan, man sanay ko sowal no Mipaputisemay ci Yohani? (Hipray 9:22; 10:1-4,12)
9 Isaka 1 hahekalan, oya Mipaputisemay a tamdaw ci Yohani, maˈaraway ningra ci Yis o Nacali a tamdaw, sanay: ‘Nengnengen, onini o tofor a siri no Kawas, o sapalahdawaw to raraw no tamdamdaw!’ (Yohani 1:29) Mikayatan no Kawas ci Yohani a somowal, o mikiˈokan no Kawas a teloc ci Yis. Wa kinafalah cingra to ˈorip no niyah, mala sapatoˈaya milidong to ˈorip no tamdamdaw. Pakayni to ciraraway a tamdaw i, matediay ko pafelian no Kawas a hatokel. Papadamaen ni Yis cangra pakalowid to raraw!—ˈOsien ko Hipray 9:22; 10:1-4, 12.
10. Samaanay ci Yis paihkal to o ‘mamitahidang to ciraraway a tamdaw’?
10 Mafanaˈay ci Yis, o pipowaran no roray ato semsem ko raraw no tamdaw, mansa, ano ira ko tamdaw pakayni i raraw no niyah a mararom i, tada ciharatengay ci Yis cangranan, mitahidangayho cingra to hatiniay a tamdaw, malo nisawawaan ningra. Pakayni toniya demak, somowalay cingra to cecay sapatinako: ‘O tanoktokay ko tireng a tamdaw, cowa ka pisaali to ising, edeng o adadaay ko papaisingen.’ Dotoc sanayho cingra: ‘Tayni kako i, cowa ko mamitahidang to moecelay ko falocoˈ a tamdaw, o mitahidang kako to ciraraway a tamdaw.’ (Matay 9:12, 13) Mahaenay ko demak ni Yis. Padamaay cingra to kafanaˈan no ˈalomanay a ciraraway a tamdaw, o cecay i, oya tano losaˈ ningra a misawsaw to ooˈ ni Yis a fafahiyan. Siniˈadaay ci Yis cingranan, misododayho to raraw ningra. (Luka 7:37-50) Itini tatihi no tefong, malitemohay ci Yis to cecay Samariya fafahiyan. Soˈin, maˈodangay ko kaˈorip noniya fafahiyan, pasifanaˈanho ni Yis to pina masakalimlaan a kimad. (Yohani 4:7, 17-19, 25, 26) Pakayni i sapafeli ni Yihofa a ˈicel, palahdawan ni Yis ko pairaan no raraw a katalawan a demak—o patay. Patikolan ni Yis a paˈorip ko roma mapatayay a tamdaw, mahawpay ko faˈinayan, fafahiyan ato wawa.—Matay 11:5.
11. Ciraraway a tamdaw hano o masolotay ni Yis hani?
11 Ano pakidem ko raraw no tamdaw, masolotay ni Yis cangra, misamaanay hani? Samanen cipinangay a siniˈada ci Yis cangranan. Malacafay cangra ci Yisan i, lipahakay awaay ko saroero. (Luka 15:1, 2) Ano paihkal cangra to pakasoˈlinay falocoˈ i, wa makalim ci Yis pakahemek ato palifon cangranan. (Luka 19:1-10) Mitodongay ci Yis to malefotay a taˈarawan no kakarayan Wama. (Yohani 14:9) Tano waywayan ningra pakahapinang to tamdaw, cisiniˈadaay tada tangongolay ko olah ni Yihofa, sapipadamaaw to kaha cecacecay tamdaw pakalowid to raraw. Ano padama ci Yis to ciraraway a tamdaw i, paˈicelayho cangranan, ho ngaˈay nai falocoˈ a pasasiyor, malo nisawawaan ningra.—Luka 5:27, 28.
12. Pakayni i kapatay no niyah, fanaˈan ni Yis ko nisawawaan to maanan?
12 Mafanaˈay ci Yis to hamamilifet to maanan no ikor. Cowa ko kinacecay aca cingra mifanaˈ to nisawawaan, wa mapaˈaca no tao cingra, mamapatayho itini hecek no kilang. (Matay 17:22; 20:18, 19) Mafanaˈay cingra o kapatay ningra wa palahdaw to raraw no tamdaw, mahecad to sowal ni Mipaputisemay ci Yohani ato romaroma pairasolay. Mifanaˈho ci Yis to nisawawaan, kinafalah cingra to ˈorip ikor, wa ‘misolot to masakenakenaay a tamdaw’ pakasoˈlin cingranan. (Yohani 12:32) Ciraraway a tamdaw ano mihayi to o Tapang ci Yis i, hanaca mitodongho to taˈarawan ningra, wa milifok to pihayda ni Yihofa, ikor wa ‘matedal’ a malahdaw ko raraw nangra. (Loma 6:14, 18, 22; Yohani 8:32) Mihaenay i, soˈlin mafanaˈayto ci Yis wa mapatay cingra itini pisemseman a hecek, makalimay timoloay a misiˈayaw toniya demak.—Yohani 10:17, 18.
13. Tahalifaay ci Yis to maanan a demak? Pakayni toniya demak, o manan ko mananamay ita nai ci Yihofaan? (Nengnengen ko coka.)
13 Ci Yis mapaˈacaay no cecay kanonoˈan a widang, ikor malepelay no ˈada, masamsamho a masakaniw no ˈada pakokot. Ya misawkit ko ˈada to raraw ningra i, misetiˈanho a mironican cingra. Ikor, mipacekan no sofitay ci Yis i hecek a mipatay. Tahacada ci Yis toniya kihcod i, iraayho ko Cecay tada mararomay ko falocoˈ—o Kawas ci Yihofa. Soˈlin ano sapicongedaw ci Yihofa toniya demak i, o madoloay koni, kawra, cowa ka haenen Ningra, misamaanay hani? Hano pasalat han ni Yihofa ci Yis masamsam a mapatay, caka paˈoripen hani? O pakayniay i tangongolay a olah Ningra kitanan. Sowal sanay ci Yis: ‘Tada tangongolay ko olah no Kawas to tamdamdaw, mangalef pafeliayho to foseniˈan a Wawa no Niyah, hongaˈ eca ka mapalaˈafo ko polong pakasoˈlinay Cingranan a tamdaw, wa milifok to midaˈocay a ˈorip.’—Yohani 3:16.
Sapilidongaw kitaanan caka mafiyor no raraw ato patay, makalimay ci Yihofa miemem to pakidemay a rarom, nengneng sa Cingra to kanonoˈan a Wawa Ningra a mapatay (Nengnengen ko saka 13 fatac)
14. Mikitini to kinafalah ni Yis mahapinang iso ko manan hani?
14 O kinafalah ni Yis o sakakaay a wacay, misawacayay to tada tangongolay ko olah ni Yihofa to ciraraway a tamdaw. Mahapinangay iso tada maolahay ci Yihofa tisowanan han? Tada taˈangayay ko kinafalah Ningra, miememho to pakidemay a rarom, o araaw i, oha sapilidongaw tisowanan ho eca ka mafiyor no raraw ato patay. (1 Yohani 4:9, 10) Sapipadamaaw Cingra tisowanan a pakalowid to raraw!
15. Sapilifokaw to haepoc no sapatefoc i, mamidemak kita to maanan hani?
15 Pafelian ni Yihofa ko sakakaay a sapatelong o ˈorip no foseniˈan Wawa no Niyah i kitaanan, ho masodod ko raraw ita. Kawra sapilifokaw to pisodod no Kawas, mamidemakho kita to manan hani? Mahecaday to sapacaˈof ni Mipaputisemay ci Yohani aci Yis: ‘Ka pasasiyor kamo, samanen maraodayto ko Kitakit no Kawas i kakarayan.’ (Matay 3:1, 2; 4:17) Ano pasasiyor kiso i, wa pakalowid to raraw a miingid ci Yihofaan. Kawra, pakayni i pasasiyor o manan ko tatodong hani? “Sapipalowidaw to raraw ka pasasiyor ngaˈ”, o manan ko tatodong hani? Dotoc wa milengo toniya salicay.
RADIW 18 Akoˈiday ko Sapatefoc a Sidaˈit
a SAPITADTAD A SOWAL: Itini Fangcalay Cudad, i pinengneng ni Yihofa, o “raraw” hananay, o mararaway ko waywayan, anca cowa ka pitoor to palinian ni Yihofa a maˈorip, sanay. O roma i, o mirocokan ita a “raraw” ni Atam sanay, o cowa ka lefot. Pakayni i mirocokan a raraw, wa mamapatay kita maemin.
b ˈAyaw tatayni ci Yis i fafekang no sera i, micadaay ci Yihofa to patafangan a sapatoˈaya no madimadiay a tamdaw, samanen milimasmasayto Cingra, miocor ci Yisan tayni i sera a mifalah to ˈorip no niyah, milidong to tamdamdaw—Loma 3:25.