Misododan ni Yihofa ko Tamdaw—Misamaanay Hano Aakoˈiden Ita Hani?

1-2. O pakayraan noya kapah, hano mahecad to tamdamdaw nohatini?

SAHARATERATENGEN hena, cihafayay ko kaˈoripan no cecay a kapah. To cecay romiˈad, fahal sanay mapatay ko wama wina ningra, pakararomay koniya lihaf cingranan. Dotoc, matengil ningra ko kacekidan a lihaf. Palahdawan no wama wina ko hafay maemin, adihayayho ko kiyam. Mansa, o micadaan ningra cowa ko hafay, ao adihayay a kiyam. Sa romiˈamiˈad sanay ko tao misaali to kiyam, cowa ko mamaemin ningra i hakelong no ˈorip a patikol koniya kiyam.

² O pakayraan no mita mahecaday toniya kapah. Isalakat, o malefotay a tamdaw ko lalitengan ita ci Atam aci Ifa, maˈoripay i makapahay a lakoing. (Satapangan 1:27; 2:7-9) Wa ngaˈay tahadaˈoc raheker a maˈorip. ˈArawhan mafalicayto maemin, malahdaway ko makapahay kaˈoripan, cato ka ngaˈay tahadaˈoc a maˈorip. O manan ko miterekan nangra to teloteloc hani? Sanay ko Fangcalay Cudad: ‘O raraw pakayniay i cecay tamdaw [ci Atam] tayni i hekal, o patay nai raraw aira, mansa mamapatay ko tamdamdaw maemin, samanen ciraraway ko tamdamdaw maemin.’ (Loma 5:12) O miterekan ni Atam kitaanan edengan ko raraw ato patay. O mirocokan ita a raraw i, mahecaday to adihayay a kiyam, awaay ko cimacima to papalakisaw to mahaenay a raraw.—ˈOlic 49:8.

3. Hano mahecaday to ‘kiyam’ han ko raraw hani?

³ O ‘kiyam’ hananay ni Yis patinako ko raraw. (精讀本注釋 no Matay 6:12 ‘Raraw’; Luka 11:4 ‘Pakararaway kitanan a tamdaw’) Pakararaway kita ci Yihofaan, mahecaday to cikiyamay Cingranan. Papatikolen ita ko kiyam ngaˈ. Ano caka patikolen i, mapatayto kita ngaˈ malahdaw koniya kiyam.—Loma 6:7, 23.

4. (1) Ano awa ko sapadama i, sasamaan ko teloc no ciraraway a tamdaw hani? (ˈOlic 49:7-9) (2) Itini Fangcalay Cudad, o “raraw” o manan ko tatodong hani? (Nengnengen ko sapatongal lalakaw: “Raraw.”)

⁴ Wa milifok kita to malahdaway ni Atam aci Ifa a kihcod han? Tano niyah sa a ˈicel, cowa ko mamalaˈosi. (ˈOsien ko ˈOlic 49:7-9.) Ano awaay ko padamaay i, wa mahecad kita to ˈaˈadopen, cowato ko papatikol a maˈorip.—Patnakay 3:19; 2 Pitiro 2:12.

5. O sidaˈitay a Wama ita ci Yihofa, samaanay palahdaw to kiyam no mita? (Nengnengen ko coka.)

⁵ Haratengen, ya masowalay a kapah. Ano iraay ko cihafayay patikol to kihcod a kiyam ningra, wa samaan ko harateng ningra hani? Wa miakoˈid cingra to sidaˈit nora cihafayay. Cisidaˈitay ko Wama ita ci Yihofa, mahecaday toya hinapaladaˈay a cihafayay, pafeliay Cingra to sapatelong no hasapatikol to kiyam ni Atam. Pakayni tonini, sanay ci Yis: ‘Tangongolay ko olah no Kawas to tamdaw, hai sanay pafeli to foseniˈan a Wawa no Niyah, padama to polong mihakelongay Cingranan a tamdaw eca ka malaˈafo, ao milifok to midaˈocay a ˈorip.’ (Yohani 3:16) Roma i, oniya sapatelong pairaay to ngaˈayay kalalaˈed ita aci Yihofaan.

6. Oniya lalakaw wa milengo to manan? Hano minanam kita to mahaenay a lalakaw hani?

⁶ O sapatelong ni Yihofa kitanan i, wa misodod to raraw ita, mihaen i, sasamaan ko demak ita ngaˈ, milifok to haepoc hani? Sapacaˈofaw tonini a salicay, nengnengen ita ko sowal no Fangcalay Cudad, mahawpay ko malakangaˈay, mihepol to raraw, misaali to sidaˈit, sapatefoc, sapaˈoripaw, mao moecelay. Oniya lalakaw mamilengo to kahacecay tatodong noniya sowal. Minanam kita toniya lalakaw, songilaˈen a midotim ko midemakan ni Yihofa to hasapisododaw kitanan, mihaen wa matongal matongal ko piakoˈid Cingranan.

PATOSOKAN: MALAKANGAˈAY

7. (1) O mananho ko malahdaway ni Atam aci Ifa hani? (2) O teloc ni Atam aci Ifa kita, o manan ko mikiriwiˈay a hasaali ita hani? (Loma 5:10, 11)

⁷ Malahdaway ni Atam aci Ifa ko midaˈocay a ˈorip, malahdawayho ko kalangaˈay ci Yihofaan. Isalakat i, o taˈangayay paro no lomaˈ ni Yihofa ci Atam aci Ifa. (Luka 3:38) Kawra mitowakangay cangra ci Yihofaan, mansa malaplapay cangra, itiyaayto cangra a ciwawa. (Satapangan 3:23, 24; 4:1) Tona o teloteloc ni Atam aci Ifa kita, marocokay ita ko raraw nangra. Cowato ko taˈangayay paro no lomaˈ ni Yihofa kita, mansa misaaliay to malakangaˈay ita aci Yihofa, oha patireng to ngaˈayay kalalaˈed Cingranan. (ˈOsien ko Loma 5:10, 11.) O sowal no cecay a cudad, masowalay i Loma a sinael, ‘malakangaˈay’ sanay a tatodong no Krisiya a sowal i, paihkalay to “mala widang to ˈada” sanay. O kasemeran i, o ci Yihofa ko talaˈayaway mihaen to demak, mansa malakangaˈay kita Cingranan. Samaanay ko demak Ningra hani?

LIMASMAS: MIHEPOL TO RARAW

8. Mihepol to raraw ato misaali to sidaˈit, o manan ko mitoroˈan?

⁸ Mihepol to raraw o limasmas ni Yihofa, ho sakalangaˈay no ciraraway a tamdaw ci Yihofaan. Oniya limasmas milingatay to tano dafong a mikotay to roma a dafong, oniya tatosa i, maroyaroy ngaˈ. Mihaen, wa mapatikolto kora malahdaway, mapalakay i, ngaˈayay safaelohen. I no Krisiya a Fangcalay Cudad i, iraay ko mahecaday to ‘mihepol to raraw’ a tilid, o misaali to sidaˈit. (Loma 3:25 ato roma pihongyak.) O misaali to sidaˈit hananay, o sapatikolaw no tamdaw to sakalangaˈay to Kawas, ira ko ngaˈayay noka kalalaˈed.

9. Sapisododaw to raraw no Israil, na patirengay ci Yihofa to manan cecayay liyad a limasmas hani?

⁹ Na patirengay ci Yihofa to cecay liyad a limasmas, sapisododaw to raraw no Israil, mihaen i, sakalangaˈayaw no kalalaˈed nangra ato Kawas. Itini mihecahecaan a Pihepolan to Raraw a Romiˈad, wa patafang ko sakakaay saysi to ˈaˈadopen. Kawra, oniya sapatoˈaya cowa ko papalahdaw to raraw no tamdaw, samanen masafaay ko pinaˈorip to tamdaw. Kawra, ano pasasiyor ko Israil, mitoor to Rikec ni Yihofa patafang to sapatoˈaya, wa makahi a misodod ci Yihofa cangranan. (Hipray 10:1-4) Roma i, o limasmas no Pihepolan to Raraw a Romiˈad, ato pipatafangan i kalo a romiˈad, papiharatengay to Israil tamdaw to ciraraway ko niyah, misaaliayho cangra to sangaˈayay a limasmas, ho ngaˈay midaˈoc a mihepol to raraw nangra.

10. Sapipalahdawaw to raraw no tamdaw, samaanay ko limasmas ni Yihofa hani?

¹⁰ Nao miharatenganto ni Yihofa ko hamamidaˈoc palahdaw to raraw no tamdaw a limasmas. Ocoran Ningra ko Wawa ci Yis patafang to niyah, ‘mitamorong to raraw no tamdamdaw,’ ‘kinacecayay aca’ mihaen ko demak malaˈosiayto. (Hipray 9:28) Tayni ci Yis i fafekang no sera ikor, kinafalah to ˈorip no niyah ‘malo sapatefoc no tamdamdaw.’ (Matay 20:28 ato roma pihongyak.) O manan ko sapatefoc hani?

ˈACA: SAPATEFOC

11. (1) I Fangcalay Cudad, o sapatefoc o manan hani? (2) O cima ko hangangaˈay mihadak to mahaenay a sapatefoc hani?

¹¹ I Fangcalay Cudad, o sapatefoc o mamihepol to raraw, to sakalangaˈayaw ko kalalaˈed no tamdaw aci Yihofa a mihadakan a ˈaca. Mikitini tonini a limasmas, o mihadakan a sapatefoc, wa ngaˈay maˈaca ko palahdawan ni Atam aci Ifa a kihcod. Haratengen, o palahdawan nangra mahawpay ko malefotay a ˈorip ato midaˈocay a maˈorip a hatokel, oniya sapatefoc mahecaday to maroyaroyay a ˈaca. (1 Timoti 2:6) Mansa, oniya sapatefoc edengan o mahecaday ci Ataman a faˈinayan ko mihadakan, (1) o malefotay cingra, (2) ira ko midaˈocay ˈorip, (3) makalimay cingra kinafalah to niyah. Mihaen ngaˈ, ngaˈay maˈaca ko mapalahdaway ni Atam a ˈorip.

12. Misamaanay hano ngaˈay ci Yis malo sapatefoc hani?

¹² Nengnengen ko hano ngaˈayay ci Yis malo sapatefoc a tolo a lalangian. (1) O malefotay cingra, ‘cowa ko mararaway cingra.’ (1 Pitiro 2:22) (2) Tona awaay ko raraw, wa ngaˈay cingra midaˈoc a maˈorip i fafekang no sera. (3) Makalimay cingra kinafalah to ˈorip i kitanan. (Hipray 10:9, 10) Mahecaday ci Yis to malefotayho ni Atam, o malefotay a tamdaw. (1 Korinto 15:45) Mansa, wa ngaˈay maˈaca ningra ko mapalahdaway ni Atam a kihcod. (Loma 5:19) Mihaen, mala o ‘salikorayto a Ataman’ ci Yis, cowato ka pisaali to sakatosa malefotay a tamdaw. ‘Kinacecayay aca’ ci Yis patafang to niyah, midaˈocayto a palahdaw to raraw.—Hipray 7:27; 10:12.

13. Mihepol to raraw ato sapatefoc icowaay ko kasasiroma?

¹³ Ihkalen ko sowal i, mihepol to raraw ato sapatefoc, icowaay ko kasasiroma? Mihepol to raraw i, o sakalangaˈayaw ni Yihofa to tamdaw a limasmas. O sapatefoc, o sapipalahdaw to raraw no tamdaw a mihadakan a ˈaca, o palakisan ni Yis a remes ko mitoroˈan.—Ifiso 1:7; Hipray 9:14.

O MINAROˈAN I: SAPAˈORIPAW ATO MAO MOECELAY

14. Dotoc o manan ko mamanengneng ita? Misamaanay?

¹⁴ Tano cowa ka lecad a sowal ko Fangcalay Cudad, mitadtad to minaroˈan no sapihepol to raraw a limasmas. Soˈlin oniya sowal hato matataˈedipay ko tatodong, kawra o misakaretengan no kahacecay a sowal cowa ka lecad. Dotoc wa mitadtad kita to tatodong noniya tosa a sowal, mikitini i sapatefoc a limasmas ni Yihofa mamilifok kita to maanan a epoc.

15-16. (1) I Fangcalay Cudad, milifok to sapaˈoripaw o manan ko mitoroˈan? (2) O manan ko epoc i kitanan hani?

¹⁵ I Fangcalay Cudad, micada to sapaˈoripaw a tatodong i, o pakayni i sapatefoc a matedal. Sanay ci Pitiro: ‘Isalakat todongen namo ko pinangan no lalitengan a maˈorip, awaay ko epoc, nohatini milifokayto to mapasalatay [tatodong i, “pakayniay i sapatefoc a matedal” anca “o sapaˈoripaw” hananay,] maliyasayto ko hatiraay a kaˈorip. Mafanaˈay kamo, cowa ko pakayniay i mamapalak a dafong, cowa ko hafay, ao pakayniay i remes ni Kristo, mahecaday to awaay ko dangoc a remes no tofor a siri.’—1 Pitiro 1:18, 19 ato roma pihongyak.

¹⁶ Pakayniay i sapatefoc, mapasalatayto kita, maliyas ko raraw ato patay. (Loma 5:21) Milifok kita to sapaˈoripaw, pakayniay i kinafalahan ni Yihofa to ˈorip no kaolahan a Wawa Ningra a malakisay a remes no ˈorip ningra. Onini ko piakoˈid ita Cangranan!—1 Korinto 15:22.

17-18. (1) Mao moecelay o manan ko tatodong? (2) O manan ko tatodong i kitanan hani?

¹⁷ Mao moecelay kita, malo o moecelayto a tamdaw, o tatodong i, malahdawayto ko sapakokot kitanan, o raraw ita malahdawayto maemin. Malo o moecelayto a tamdaw hananay ni Yihofa kita, cowa ka pisafelit to moecelay a palinian no Niyah. Mihaen ko demak Ningra malefotayto awaay ko raraw ita cowa ka saan. Mao moecelay kita hananay ni Yihofa, cecay lalangian i, pakasoˈlinay kita to sapihepol to raraw a limasmas ato sapatefoc.—Loma 3:24; Kalatiya 2:16.

¹⁸ O manan ko epoc i kitanan maemin hani? Oya mipiliˈan malacafay ci Yisan tayra i kakarayan mala hongti a tamdaw, nohatini malo o moecelayto a tamdaw, mala o wawaayto no Kawas. (Titus 3:7; 1 Yohani 3:1) Masododayto ko raraw nangra. Hato cowa ka raraw cangra nengnengen, mansa ngaˈayayto milifok to Kitakit no Kawas. (Loma 8:1, 2, 30) Oya iraay ko hatokel midaˈoc maˈorip i fafekang no sera a tamdaw, mala o moecelayto a tamdaw, o widangto no Kawas cangra. Masododayho ko raraw nangra. (Yakop 2:21-23) Mamilakowit to Armakiton a taˈangayay ˈopo a tamdaw, wa ira ko hatokel nangra midaˈoc a caka tahalifa to patay. (Yohani 11:26) Ano mapatayto ko ‘moecelay’ ato ‘cowa ka moecel a tamdaw,’ wa patikol maˈorip noikor. (Dmak 24:15; Yohani 5:28, 29) Salikorto, sahto madimadiay sikawdan ni Yihofa, wa ‘milifok to malo wawa ni Yihofa a ˈdil ato pasalat.’ (Loma 8:21) Pakayni to sapatefoc a limasmas, wa malakangaˈayto kita ato kakarayan a Wama ci Yihofa, kasemeran koniya sapalemed!

19. O pakayraan ita nohatini hano caka hecad to isaˈayaway hani? (Nengnengen ko sapatongal lalakaw “Misodod ci Yihofa Kitanan.”)

¹⁹ I saka cecay fatac masowalay a kapah, malahdaway ko kihcod ningra, pakayni i wama wina ningra, ciˈinorongay to cowa ko mamapatikol ningra a kiyam i hakelong no ˈorip. O isalakatay ita a pakayraan mahecaday cingranan. Samanen pakayni i sapadama ni Yihofa i, milimasmasay Cingra mihepol to raraw no tamdaw, hanaca pasadak to sapatefoc, mansa cowato ka hecad ko pakayraan ita to isaˈayaway. Ano pakasoˈlin kita ci Yisan i, wa milifok to sapaˈorip, maliyas ko mala koliay no raraw ato patay. Oya raraw no mita wa malahdawto maemin, oya maˈoningay a kiyam no raraw mahecadayto. Kalimlaan i, nohatiniho ngaˈayayto kita mala o ngaˈayay a widang ni Yihofa!

20. Dotoc a lalakaw mamilengo to manan?

²⁰ Ano awaay ko sapadama ni Yihofa aci Yis, awaayto ko hatokel no mita. Midotim kita to na demakan Nangra, wa mikifalocoˈ a miakoˈid! (2 Korinto 5:15) Dotoc a lalakaw mamilengo to pina sapatinako, o pisodod ni Yihofa to tamdaw o manan ko epoc i kitanan.