LALENGOEN LALAKAW 7
RADIW 15 Pahemeken ko Foseniˈan Wawa ni Yihofa!
Misododan ni Yihofa ko Tamdaw—o Manan ko Milingatay Kitanan?
‘Soˈliˈlinay misodod to tamdaw Kiso.’—ˈOLIC 130:4.
KALIMLAAN NO LALAKAW
Nengnengen ko sapatinako no Fangcalay Cudad, cipinang to samaanay ci Yihofa misasoˈliˈlin misodod to tamdaw, wa miakoˈid kita Cingranan.
1. Ano “misododanto ako kiso” sa ko tamdaw i, hano cowa ka dolo cipinang kita to soˈliˈlinay a harateng ningra?
ANO midokaˈ to tao ko sowal ato demak iso, “misododanto ako kiso” sa cingra i, wa mahemek kiso. Kawra o manan ko tatodong no sowal ningra hani? O malakangaˈayayto kamo han? Anca o cowato ka sapitikolaw tonini a demak cingra han? Cowa ka dolo cipinang kiso to soˈliˈlinay a harateng ningra.
2. Samaanay ko sowal no Fangcalay Cudad to pisodod ni Yihofa to tamdaw? (Nengnengen ko ilaenoay safanaˈ.)
2 Kawra, cowa ka lecad ci Yihofa to tamdaw. Pakayni ci Yihofaan, sanay ko ˈOlic: ‘O soˈliˈlinay misodod to tamdaw Kiso, ho midoko ko tamdaw Tisowanan.’a (ˈOlic 130:4) I pisodod, o mikiriwiˈay ci Yihofa, ‘o soˈliˈlinay misodod to tamdaw’ Cingra. O roma miˈoningay to Fangcalay Cudad tano mikiriwiˈay a sasowalen no Hipray a mitadtad to pisodod ni Yihofa to tamdaw, oniya sasowalen cowa ka masowal ko tamdaw ato tamdaw a malasasodod. Patirengan ni Yihofa ko saˈakawangay a taˈarawan, pakacipinang kitanan to tatodong no misododay.
3. O pisodod ni Yihofa to tamdaw iraay ko manan mikiriwiˈay hani? (Isaya 55:6, 7)
3 Ano misododan ni Yihofa ko tamdaw i, wa mapalahdaw ko raraw nora tamdaw, hanaca malakangaˈayayto cingranan. Misaliyaliyaway ci Yihofa misodod kitanan, onini ko piakoˈid ita Cingranan.—ˈOsien ko Isaya 55:6, 7.
4. Samaanay padama ci Yihofa kitanan cipinang to soˈliˈlinay misodod to tamdaw a tatodong?
4 O pisodod ni Yihofa to tamdaw cowa ka lecad to kasasodod no tamdaw, cowa ka lefot a tamdaw pasangaray cipinang to soˈliˈlinay misodod to tamdaw a tatodong. Mansa, tano adihayay ko sapatinako ni Yihofa padama kitanan. Onini a lalakaw mamilengo to pina. Folfolen ita koniya sapatinako wa mahapinang, ano pasasiyor kita, papalahdawen ni Yihofa ko raraw ita a miliyaw mala widang Cingranan. Maˈaraw ita ko cisidaˈitay a Wama tano adihayay a pakayraan, paihkal to makalimay misodod kitanan, wa matongal ko piakoˈid a maolah Cingranan.
ALAAN NI YIHOFA KO RARAW ITA
5. Sododen ni Yihofa ko raraw ita o manan ko tatodong?
5 Marariday masowal no Fangcalay Cudad ko karetengay ˈinorong ko raraw. Sanay ko Hongti ci Tafiti: ‘Maˈedefay ko raraw i fongoh no mako, mahecaday to karetengay a ˈinorong ako.’ (ˈOlic 38:4) Kawra, ano pasasiyor ko mararaway i, wa ‘sododen’ ni Yihofa ko raraw nangra. (ˈOlic 25:18; 32:5) Tatodong no ‘sododen’ sanay a sowal no Hipray i, o ‘alaan’ anca ‘ˈorongan.’ Haratengen ita ci Yihofa hato o ciˈicelay a tamdaw, mialaay to karetengay a ˈinorong no mita a miˈorong.
‘Sodod’ (ˈOlic 32:5)
6. Hakowaay ko raay no piˈorong ni Yihofa to raraw ita hani?
6 O roma sapatinako mitadtaday, tahacowaan ni Yihofa miˈorong ko raraw ita. Sanay ko ˈOlic 103:12: ‘Ano hakowaay ko kararaay no kawali ato kaetip i, hatiraay ko pipaliyas Ningra to raraw ita i kitanan.’ O kawali samara:ayay no kaetip, mansa o kawali ato kaetip cowa ka malangata. Mihaenay, hato para:ayan ni Yihofa paliyas koya raraw no mita. Mahaenay ko pitadtad to pisodod ni Yihofa to raraw ita, parihadayay kitanan!
‘Mahecaday to i ra:ayay no kawali ato kaetip’ (ˈOlic 103:12)
7. Sowal no Fangcalay Cudad samaanay ci Yihofa misaysay to raraw ita hani? (Mika 7:18, 19)
7 Tahiraay i raay ko piˈorong ni Yihofa to raraw ita ikor, wa metmetenho Ningra koya raraw han? Cowa. Pakayni ci Yihofaan, masowalay ni Hicikiya sanay: ‘Falahanto ilalikor no Miso ko raraw ako.’ O roma pihongyak sanay: ‘Alaan Iso ko raraw no mako i kaˈayaw Iso.’ (Isaya 38:9, 17 ato roma pihongyak.) Oniya sapatinako mitadtaday, ano pasasiyor ko mararaway, wa falahen ni Yihofa ko raraw ningra, cowato ko mamitikol minengneng. O roma pihongyak sanay: ‘O pinengneng no Miso to raraw ako hato cowa ka mifekad.’ I Mika 7:18, 19 tano roma a sapatinako a mitadtad. (ˈOsien.) Sanay ko sinael, falahan ni Yihofa i riyar ko raraw ita. I nolitengan, ano mafalah ko dafong i riyar i, cowato ko mamakilim.
‘Falahanto ilalikor no Miso ko raraw ako’ (Isaya 38:17)
‘Mifalahan Iso ko raraw niyam i riyar’ (Mika 7:19)
8. O manan ko mananamay ita?
8 Oniya sapatinako papadama kitanan a cipinang, ano misodod ci Yihofa kitanan, cowato ko caciˈinorong to raraw kita. Mahecad to sowal ni Tafiti: ‘O mararaway a waywayan masododayto, milifokay to satahepo to raraw i, tada malemeday! I pinengneng ni Yihofa cowa ko mararaway a tamdaw, o malemeday sanay!’ (Loma 4:6-8) O soˈliˈlinay pisodod koni!
PALAHDAWAN NI YIHOFA KO RARAW ITA
9. Tano manan a sapatinako ci Yihofa a mitadtad, misongilaˈ a misodod to tamdaw Cingra?
9 Pakaynian ni Yihofa i sapatefoc a palahdaw ko raraw ita, tano o sapatinako ko Fangcalay Cudad pakacipinang kitanan. Tinakoen, sanay ko Fangcalay Cudad wa sawsawen a misisit ni Yihofa ko raraw, patikol a makorac ko mararaway tamdaw. (ˈOlic 51:7; Isaya 4:4; Yirimiya 33:8) Pakayni tonini, sanay ci Yihofa: ‘Mahecad o macengelay a kahngangay ko raraw namo, wa sano soeda sa kohcal a makorac, soˈlin kahngang sa sano macengelay a kiradom, wa kohcal sa sano fanoh no siri.’ (Isaya 1:18) Ano macengel to kahngangay a kadit ko kiradom, pasangaray patikol a makorac. Kawra, tanonini a sapatinako ci Yihofa a mikiˈok, o raraw ita ngangaˈay a patikol makorac, ecato ka ˈaraw koya kadit.
‘Mahecad o macengelay a kahngang ko raraw namo, wa sano soeda sa kohcal a makorac’ (Isaya 1:18)
10. O manan sapatinako mitadtaday to tangongolay ko sidaˈit a misodod ci Yihofa kitanan?
10 Mahecad to ya masowalay isaˈayaw a lalakaw, o kiyam hananay no Fangcalay Cudad ko raraw. (Nengnengen ko 精讀本注釋: Matay 6:12 ‘Raraw’; Luka 11:4 ‘Pakararaway kitanan a tamdaw’.) Mararaw kita i, pakararaway ci Yihofaan, mahecad to cikiyamay Cingranan. Halafinto i, adihayayto ko kiyam ita Cingranan. Kawra misodod ci Yihofa to raraw ita, mahecaday to palakisawayto to kiyam, cowato ka pisaali to sapipatikolaw. Oniya sapatinako pakacipinang kitanan, o pisodod ni Yihofa tada parihadayay kitanan!
‘Nanay sododen Iso ko raraw niyam’ (Matay 6:12)
11. Sowal no Fangcalay Cudad ‘masisitay palahdaw’ ko raraw ita, o manan ko tatodong hani? (Dmak 3:19)
11 Cowa ko pipalakisaw aca ci Yihofa to raraw a kiyam no mita, masongilaˈay Ningra misisit a palahdaw. (ˈOsien ko Dmak 3:19.) O kiyam no raraw maharatengay ita ko maˈoningay i powa a kiyam mipalakisawanto, kawra maˈarawayho ko na mitilidan. O roma, misisit to kiyam no raraw sa i, cowa ka hecad. O nolitengan a sapitilid tano falah a miˈoning, pacamolan to ˈadeteng no kilang ato nanom a misangaˈ, ano cepaˈ han to nanom misisit mapadengayto ko tilid. Mansa, ano masisitay ko kiyam i powa i, malahdawayto ko mitilidan, cowato ka hapinang to manan ko matiliday, oniya kiyam hato na cowa ka matilid. Mafanaˈ to palakisawan ni Yihofa ko kiyam no raraw ita, halo ‘misisit palahdaw,’ tada mitemeray to falocoˈ ita!—ˈOlic 51:9.
‘Wa masisit ko raraw namo’ (Dmak 3:19)
12. I sapatinako ni Isaya 44:22 mananamay ita ko manan?
12 Tano o roma a sapatinako ci Yihofa pasowal to palakisaway a misodod to raraw ita. Sanay Cingra: ‘Tano ˈoˈolen Ako a mitahepo ko raraw no miso, tano kifetolay a toˈem a misongilaˈ mitahepo to raraw no miso.’ (Isaya 44:22) Misodod ci Yihofa kitanan, mahecaday to pihimed ni Yihofa to raraw i kifetolay a toˈem, cowato ka ˈaraw ita aci Yihofa koya raraw.
‘Wa tano oˈolen Ako a mitahepo ko raraw iso’ (Isaya 44:22)
13. O pisodod ni Yihofa to raraw ita, samaanay ko harateng no mita?
13 O manan ko tatodong noniya sapatinako i kitanan hani? Ano misododanto ni Yihofa ko raraw ita, awaayto koya kadit i hakelong no ˈorip ita a micariraw a makesem ko falocoˈ ita. Tano remes ni Yis Kristo, palakisawanto ni Yihofa ko raraw ita a maemin, mangalefay ya maˈoningay a raraw masongilaˈay a malahdaw. Ano mikifalocoˈ a pasasiyor kita i raraw no niyah, wa mihaen ci Yihofa misasoˈlin a misodod kitanan.
MALAKANGAˈAYAY CI YIHOFA KITANAN
Soˈlinay misodod ci Yihofa to tamdaw, mansa malakangaˈay kita Cingranan (Nengnengen ko saka 14 fatac)
14. Ano misododanto sa ci Yihofa, hano pakasoˈlin kita hani? (Nengnengen ko coka.)
14 Misasoˈlinay ci Yihofa misodod to tamdaw, mansa malakangaˈayay kita Cingranan. Masodod ni Yihofa kita, cowato ka macariraw a makesem ko falocoˈ, cowato ka matalaw to kaciˈinteh Ningra, toha sapisayfangaw kitanan. Cowa ko mamihaen ci Yihofa to demak. Ano misododanto sa ci Yihofa, hano pakasoˈlinen ita hani? Pasowalan ni Yihofa ci Yirimiya: ‘Wa sododen Ako ko raraw nangra, cowato ko mamaharateng.’ (Yirimiya 31:34) Masowal no tarokos ci Pawlo ko mahecaday a sowal ni Yihofa i: ‘Cowato ko tatikolen a miharateng Ako ko raraw nangra.’ (Hipray 8:12) O manan ko tatodong no sowal ni Yihofa hani?
‘Cowato ko mamaharateng Ako ko raraw nangra’ (Yirimiya 31:34)
15. Cowato ko mamaharateng ni Yihofa ko nano raraw ita, o manan ko tatodong hani?
15 I Fangcalay Cudad ‘maharateng’ sanay a tilid, cowa ko pitikol aca to isaˈayaway a demak, o talaˈayaway a midemak ko tatodong. Nengnengen ko kalacafayay mapatay i tatihi ni Yis a mararaway a picangacang ningra, sanay cingra: ‘Yisaw, micada kiso to fadangalan no Hongti i, nanay haratengen kako.’ (Luka 23:42, 43) Tatodong i, coko picangacang aca ci Yisan miharateng cingranan. O caˈof ni Yis paihkalay, wa talaˈayaw cingra a patikol paˈorip toya mararaway. Mansa, cowato ko mamaharateng ko raraw ita sa ci Yihofa i, tatodong i, misodod to raraw ita Cingra, o cowato ko mamikihar to nano raraw ita, ano ikorto i, cowato ko mamisayfang to nano raraw ita.
16. Tano manan a sapatinako ko Fangcalay Cudad, pakacipinang kitanan to masododay ni Yihofa kita a mapasalat?
16 Tano roma a sapatinako ko Fangcalay Cudad a mitadtad, o pisodod ni Yihofa pairaay to pasalat kitanan. Samanen o ciraraway kita maemin, mafaloday no raraw, o ‘koli no raraw’ kita hananay no Fangcalay Cudad a patinako. Kawra misododanto ni Yihofa kita, ‘matedalayto a miliyas to raraw’ kita. (Loma 6:17, 18; Paˈarawan 1:5) Mafanaˈ to masododayto ni Yihofa kita, mahecaday toya mapasalatayto a koli a mahemek kita.
‘Matedalayto a miliyas to raraw’ (Loma 6:18)
17. O pisodod ni Yihofa samaanay a mapaadah kita hani? (Isaya 53:5)
17 ˈOsien ko Isaya 53:5. Nengnengen ita konini a sapatinako, ciraraway mahecaday to ciadadaay to ekang a tamdaw. Mararaw kita, mapalakay ko kalalaˈed aci Yihofa, mahecad to adadaay. Pakaynian ni Yihofa i kanonoˈan a Wawa Ningra malo sapatefoc, mahecaday to maadahay ko adada ita, malakangaˈayayto ko kalalaˈed ita aci Yihofaan. (1 Pitiro 2:24) Ciadadaay a tamdaw ano maadah i, mahemekay cingra. Malecaday, masodod ni Yihofa kita, malakangaˈay Cingranan, milifok to pihayda Ningra, o kahemekan koni.
‘O kadokaˈ ningra, miadahay kitanan’ (Isaya 53:5)
O PISODOD NI YIHOFA O MANAN KO TATODONG I KITANAN HANI?
18. Pakayni i sasodod ni Yihofa, mikitini i sapatinako noniya lalakaw mananamay ita ko manan? (Nengnengen ko sapatongal lalakaw “Samaanay Misodod ci Yihofa Kitanan.”)
18 Pakayni i sasodod ni Yihofa, mikitini i sapatinako noniya lalakaw mananamay ita ko manan? Masongilaˈ ko pisodod ni Yihofa, ano misodod ci Yihofa kitanan, cowato ko mamitikol. Mansa, ngangaˈay malakangaˈay kita aci Yihofaan. Kawra haharatengen, o sasodod ni Yihofa cowa ko nano kiyam Ningra kitanan, ao sapafeli Ningra kitanan a kalimlaan sapatelong. O sasodod ni Yihofa i, o sidaˈitay ato tangongolay a olah Ningra kitanan.—Loma 3:24.
19. (1) Hano miakoˈid kita ci Yihofaan hani? (Loma 4:8) (2) Dotoc a lalakaw mamilengo to manan hani?
19 ˈOsien ko Loma 4:8. ‘Misasoˈlin misodod to tamdaw’ ci Yihofa, miakoˈiday kita Cingranan! (ˈOlic 130:4) Kawra, mamacada ita ko sasodod ni Yihofa hokira, milingatayho to kalimlaan a lalangian. Sanay ci Yis: ‘Ano cowa ka pisodod kamo to raraw no tao i, cowa ko sasododen no Wama ko raraw namo.’ (Matay 6:14, 15) Mansa, mamitodong kita ci Yihofaan a misodod to tao. Sasamaan ko demak hani? Dotoc a lalakaw mamilengo toniya salicay.
RADIW 46 Akoˈidayto Yihofa
a ‘Soˈlinay misodod’ sanay Hipray sowal a tatodong i, o mikiriwiˈay awaay ko hamamikotay, cowa ka hecad to kalo a pisodod. Mihongyak to ˈOlic 130:4 i, ˈalomanay mihongyakay malawaay nangra ko kalimlaan a tatodong noniya sinael, kawra o Faelohay Hekal Mihongyakan Fangcalay Cudad mahapinangay ko mihongyakan a tatodong noniya sinael.