Mikecolay 線上書庫
Mikecolay
線上書庫
阿美語
  • 聖經
  • 出版物
  • 聚會
  • w25 8 folad 14-19 fiedac
  • Pakasoˈlinen to Misododanto ni Yihofa Kiso

你選擇的內容沒有影片。

抱歉,載入影片時出現錯誤。

  • Pakasoˈlinen to Misododanto ni Yihofa Kiso
  • Mikecolay Tenaken ko Kitakit ni Yihofa (Lalengoen Lalakaw)—2025
  • 小標題
  • 相似資料
  • HANO PAKASOˈLIN TO MISODODANTO NI YIHOFA KITA HANI?
  • SASAMAAN KO DEMAK NGAˈ PAKASOˈLIN TO MISODODANTO NI YIHOFA KITA HANI?
  • AKA A MATAWAL TO SAMAANAY MINENGNENG CI YIHOFA TISOWANAN ATO NANO RARAW ISO
  • PADADOTOC ‘MIKAYAT TO FALOCOˈ NO NIYAH’
  • Misododan ni Yihofa ko Tamdaw—o Manan ko Milingatay Kitanan
    Mikecolay Tenaken ko Kitakit ni Yihofa (Lalengoen Lalakaw)—2025
  • Itini Pisodod to Tamdaw a Demakan, o Saˈakawangay Taˈarawan ci Yihofa
    Mikecolay Tenaken ko Kitakit ni Yihofa (Cacekiwen Lalakaw)—2022
  • Aka Mapawan o ‘Soˈlinay Materek Maˈoripay’ a Kawas ci Yihofa!
    Mikecolay Tenaken ko Kitakit ni Yihofa (Cacekiwen Lalakaw)—2024
  • Halamhamay ci Yihofa to Polong a Tamdaw Pasasiyor ko Falocoˈ
    Mikecolay Tenaken ko Kitakit ni Yihofa (Cacekiwen Lalakaw)—2024
查看更多
Mikecolay Tenaken ko Kitakit ni Yihofa (Lalengoen Lalakaw)—2025
w25 8 folad 14-19 fiedac

LALENGOEN LALAKAW 34

RADIW 3 Tadiˈecen ko Kawas, O Nonoˈ, O ˈIcel

Pakasoˈlinen to Misododanto ni Yihofa Kiso

‘Misododanto Iso ko raraw no mako.’—ˈOLIC 32:5.

KALIMLAAN NO LALAKAW

Nengnengen hano pakasoˈlin kita to misododanto ni Yihofa kita, ato samaanay ko sowal no Fangcalay Cudad ci Yihofa makalimay misodod to mikifalocoˈay pasasiyor a tamdaw.

1-2. Mikifalocoˈay pasasiyor a mararaway tamdaw milifok to sasodod ni Yihofa ikor, wa ira ko masamaanay a harateng hani? (Nengnengen ko coka.)

O HONGTI ci Tafiti na pakidemay ko raraw, mansa cipinangay cingra macariraw makesem no raraw tada marorayay ko falocoˈ. (ˈOlic 40:12; 51:3 ato lalangian a sowal) Ikor mikifalocoˈ pasasiyor cingra, misododanto ni Yihofa cingra. (2 Samuil 12:13) Mansa mafanaˈay ci Tafiti, ano milifok ko cecay tamdaw to sasodod ni Yihofa ikor, hato sakahmaw sanayto ko ˈinorong tada ngaˈayan nanay.—ˈOlic 32:1.

2 Mahecad ci Tafitian, siniˈadaay ci Yihofa kitanan, misodod kitanan ikor, mamatinako ita ko sakahmaw wa sato ko ˈinorong. Soˈlin pakidem ko raraw ita, kawra ano mikifalocoˈ pasasiyor, mihayi to raraw no niyah, halo misaˈicel ecato ka miliyaw mararaw, wa makahi ci Yihofa a misodod. (Taneng 28:13; Dmak 26:20; 1 Yohani 1:9) O roma i, ano misaˈosi ci Yihofa misodod kitanan, mamisongilaˈ a misodod to raraw no mita, hato cowa ka mararaw kita. (Icikil 33:16) Mafanaˈ tonini pakayni ci Yihofaan a soˈlinay kimad, tada parihadayay kitanan!

Maroˈay ko Hongti ci Tafiti i hangaro, midatokay a romadiw.

Adihayay ko mitilidan ni Tafiti a ˈolic, pakahemek ci Yihofaan makalimay misodod to tamdaw (Nengnengen ko saka 1-2 fatac)


3-4. (1) O cecay fafahiyan salikaka micada to paputisem ikor i, iraayho ko masamaanay a harateng hani? (2) Oniya lalakaw mamilengo to manan?

3 Kawra o roma tamdaw pasangaray pakasoˈlin to misododanto ni Yihofa cangra, ci Cenifo o mahaenay. Mimingho o wama wina ningra pakafanaˈay cingranan to soˈlinay kimad no Fangcalay Cudad, kawra lomahadto ikor, mihimeday cingra to wama wina ningra midemak to adihayay mararaway a demak. Halafinto a mihecaan ikor, mafalicayto cingra, citatodongayto a micada to paputisem, kawra sanay cingra: “Isaˈayaw misarocoday kako sapietanaw to payci, maceriday malasang, madadiˈi to tao, mariˈangay ko waywayan. Soˈlin mafanaˈay kako, ano mikifalocoˈ a pasasiyor, micangacang to sasodod ni Yihofa, o sapatefoc ni Yis mamikorac takowanan, kawra i falocoˈ no mako pasangaray a pakasoˈlin to soˈlinay misodod ci Yihofa takowanan.”

4 Nolatekay, pasangaran nanay kiso pakasoˈlin to misododanto ni Yihofa kiso han? Haratengen, o siniˈadaay to tamdaw a Kawas ci Yihofa, makalimay Cingra mahecad kita ci Tafitian, pakasoˈlin to misododanto Ningra kita, halo rihadayen ko falocoˈ. Oniya lalakaw mamilengo, hano pakasoˈlin kita to misododanto ni Yihofa kita, ato o manan ko papadama kitanan pakasoˈlin tonini.

HANO PAKASOˈLIN TO MISODODANTO NI YIHOFA KITA HANI?

5. Makalimay ci Satan pakasoˈlin kita to manan? Tano tinakoen a mitadtad.

5 Pakasoˈlinayto kita to misododanto ni Yihofa kita, wa cato ka makefong i talakal ni Satan. Misaˈicelay ci Satan to hasakaecaaw no mita midoko ci Yihofaan. Tinakoen, sapipakasoˈlinaw no mita ci Satan to cowa ko mamisodod ci Yihofa kitanan. Nengnengen ko cecay tinakoan, i Korintoay a kasakopang iraay ko maˈodangay a tamdaw, telocto mapadengay ko ngangan nai kasakopang. (1 Korinto 5:1, 5, 13) Ikor, oniya tamdaw mikifalocoˈay a pasasiyor. Kawra makalimay ci Satan o Korinto a kasakopang a salikaka cowa ko mamisodod cingranan, cowa ka mihamham cingranan patatikol i kasakopang. Roma i, makalimay ci Satan oniya pasasiyoray tamdaw cowa ka citatodong masodod ko niyah sanay miharateng, ‘pakidem a masomad, cato ka sapiliyaw a tanoktok,’ cowato ka midoko ci Yihofaan. Wa mihalaka ci Satan to sapitalakalaw kitanan, makalimay cingra kitanan to cowa ko mamisodod ci Yihofa kitanan saan a miharateng, kawra ‘mafanaˈay kita to tatiihay halaka ningra.’—2 Korinto 2:5-11.

6. Sasamaan ko demak no mita ngaˈ mahepol ko macariraway makesemay a falocoˈ hani?

6 Pakasoˈlinayto kita to misododanto ni Yihofa kita, mamaliyas ko pisemsem no macariraway makesemay a falocoˈ? Ano mararaw kita ikor, wa miroroh to niyah. (ˈOlic 51:17) O ngaˈayay koni, samanen pakayni i makapahay falocoˈ no mita, mansa tatalaˈayaw kita misalof to mararaway no niyah. (2 Korinto 7:10, 11) Kawra, ano pasasiyorto kita ikor kamayan padadotoc miroroh to niyah, alatek wa matoled ko falocoˈ, cowato ka sapipadadotocaw midoko to Kawas. Nikawrira, ano pakasoˈlin kita to misododanto ni Yihofa kita i, wa mahepolto ko macariraway makesemay a falocoˈ, irato ko tingalaway makapahay falocoˈ lipahak a midoko Cingranan. Makalimay ci Yihofa ira ko mahaenay a harateng no mita, makalim mihaen kita midoko Cingranan! (Kolosay 1:10, 11; 2 Timoti 1:3) Mansa, sasamaan ko demak no mita ngaˈ mikifalocoˈ a pakasoˈlin to misododanto ni Yihofa kita hani?

SASAMAAN KO DEMAK NGAˈ PAKASOˈLIN TO MISODODANTO NI YIHOFA KITA HANI?

7-8. Pasowalan ni Yihofa ci Mosi to o masamaanay a Kawas ko Niyah? Onini papipakasoˈlinay kitanan to manan hani? (Kasadakan 34:6, 7)

7 Haratengen samaanay ci Yihofa pasowal to Niyah. Tinakoen, ci Yihofa itini i Sinay a Lotok a pasowal ci Mosian.a (ˈOsien ko Kasadakan 34:6, 7.) Adihayay ko makapahay capeling ni Yihofa, kawra mikiriwiˈay Cingra pasowal ci Mosian, o ‘siniˈadaay to tamdaw, sidaˈitay to tamdaw a Kawas’ Cingra. Soˈlin mahaen, o cecay maolahay Cingranan, midokoay Cingranan a tamdaw ano mikifalocoˈ a pasasiyorto i, cowa ko mamisodod ci Yihofa toniya tamdaw han? Ano mahaenay i, o ˈatekakay ko falocoˈ a Kawas ci Yihofa. Kawra cowa ko mahaenay Cingra.

8 Soˈlin pasowal ci Yihofa to Niyah to o siniˈadaay to tamdaw a Kawas, ngaˈayayto pakasoˈlin kita tonini, samanen o mitooray to soˈlinay kimad a Kawas Cingra, o sowal Ningra ngaˈayay pakasoˈlinen. (ˈOlic 31:5 ato roma pihongyak.) Ano maceriday kiso pakayni i raraw isaˈayaw a miroroh to niyah i, ngaˈayay licayen ko niyah: “Pakasoˈlinay kako to siniˈadaay to tamdaw ci Yihofa, sidaˈitay to tamdaw a Kawas han? Pakasoˈlinay kako to mamisodod Cingra to kahacecay mikifalocoˈay pasasiyor a tamdaw han? Ano pakasoˈlinay kako i, oha papakasoˈlin kako to misododanto Ningra kako han?”

9. Pakayni i sasodod ni Yihofa, mikitini ˈOlic 32:5 mananamay ita ko manan?

9 Harateratengen o miˈoningay to Fangcalay Cudad itiniay i sakayat no Kawas, samaanay a mitadtad to makalimay misodod to tamdaw a Kawas. Tinakoen, nengnengen ko sowal ni Tafiti. (ˈOsien ko ˈOlic 32:5.) O sowal Ningra, misododanto ni Yihofa ko raraw ningra. O pihongyak to “misododay” ono Hipray a sowal a tatodong i, “mikowad” “miala” anca “miˈorong” sanay. Mihaenay, misodod ci Yihofa ci Tafitian i, mahecadayto mikowaday to raraw ningra, ikor mialaanto. Mihaenay i, cowato ka mitamorong ci Tafiti to karetengay macariraway makesemay a falocoˈ. (ˈOlic 32:2-4) Mahecadayto, ano mikifalocoˈ kita a pasasiyor i, cowato ko mamitamorong to karetengay macariraway makesemay a falocoˈ, samanen ci Yihofa mikowadanto Ningra miala ko raraw no mita.

10-11. Itini ˈOlic 86:5 ci Yihofa ‘makalimay misodod to tamdaw’ sanay, o manan ko tatodong hani?

10 ˈOsien ko ˈOlic 86:5. Pasowal ci Tafiti ci Yihofaan to ‘makalimay misodod to tamdaw.’ Pakayni tonini, o cecay milengoay to Fangcalay Cudad a cudad sanay, makalimay misodod o masalalomaˈay no capeling ni Yihofa. Hano ira ko mahaenay a capeling Ningra hani? Dotoc a sowal ni Tafiti, ci Yihofa pakayni to polong micangacangay Cingranan a tamdaw ‘matomesay ko madimadiay a olah.’ Mahecad to mananamay ita isaˈayaw a fedengan a lalakaw, o madimadiay a olah o tangongolay halafinay a olah. Samanen ci Yihofa pakayni to madimadiay midoko Cingranan a tamdaw iraay ko mahaenay a olah, mansa soˈlin mararaw cangra, cowa ka sapiliyasaw ci Yihofa cangranan. Ano mikifalocoˈ cangra pasasiyor ‘mamikifalocoˈ ci Yihofa misodod’ cangranan. (Isaya 55:7 ato roma pihongyak.) Ano pasangaran kiso a pakasoˈlin to soˈlinay ci Yihofa misodod tisowanan, ngaˈayay licayen ko niyah: “Pakasoˈlinay kako ano cimato mikifalocoˈ a pasasiyor, halo picangacang to siniˈada ni Yihofa, wa makalim ci Yihofa misodod cingranan han? Ano pakasoˈlinay i, wa pakasoˈlin kako to ano micangacang kako to siniˈada ni Yihofa, mamisodod Cingra takowanan han?”

11 Tada cipinangay ci Yihofa kitanan, mafanaˈto o cowa ko malefotay a tamdaw kita, mafanaˈ tonini parihadayay to falocoˈ ita. (ˈOlic 139:1, 2) Dotoc, wa manengneng ita ko sowal ni Tafiti i roma ˈolic a sowal ningra, sasamaan padama kitanan pakasoˈlin to makalimay ci Yihofa misodod kitanan.

AKA A MATAWAL TO SAMAANAY MINENGNENG CI YIHOFA TISOWANAN ATO NANO RARAW ISO

12-13. Mikitini i ˈOlic 103:14, maharatengay ni Yihofa ko manan? Sasamaan ko demak ni Yihofa hani?

12 ˈOsien ko ˈOlic 103:14. ‘Maharatengay ni Yihofa to nano sera kita,’ sanay ci Tafiti. Paihkalay ko sowal ni Tafiti to makalimay ci Yihofa misodod to madimadiay sikawdan Ningra a roma lalangian, misinanotay Cingra to kacangoˈotan no mita, ihkalay a mafanaˈ hofoc han kita madoloay a mararaw. Folfolen ita ko sowal ni Tafiti iraay ko manan a tatodong.

13 O sowal ni Tafiti ci Yihofa ‘mafanaˈay kitanan,’ samanen ci Yihofa isalakat ‘tano aped no sera’ misangaˈ ci Ataman. (Satapangan 2:7) Ihkalay mafanaˈ ci Yihofa to saali no tamdaw, tinakoen kakomaen ko tamdaw, mafotiˈ ato saselaˈ. Ano o malefotayto a tamdaw i, wa mihaen to demak ngaˈ padadotoc a maˈorip. Kawra mararaw ci Atam aci Ifa ikor, nano o sera kita a tamdaw mangalefayto a malonay, hofoc han kita iraayto ko raraw, madoloay mararaw ko demak. Sanay ci Tafiti, mafanaˈay ci Yihofa to cowa ka lefot kita, “maharatengayho” konini. O pihongyak itini to “maharatengay” no Hipray a sowal malalitingay to talaˈayaw tawlik a midemak. Mihaenay, ngaˈayay hatinien ita a milahci ko sowal ni Tafiti: Ihkalay mafanaˈ ci Yihofa to mararaway kita; ano soˈlin mararaw kita i, mikifalocoˈ a pasasiyor, mamakahi ci Yihofa misodod kitanan, paihkal to siniˈada kitanan.—ˈOlic 78:38, 39.

14. (1) Pakayni to pisodod ni Yihofa, masowalayho ni Tafiti ko maanan? (ˈOlic 103:12) (2) O tinakoan ni Tafiti samaanay a mitadtad, malaˈosiay ko pisodod ni Yihofa maemin? (Nengnengen ko sapatongal lalakaw “Makalimay Misodod ci Yihofa, Cowa Piroroh to Nano Raraw no Mita.”)

14 Pakayni to pisodod ni Yihofa, mikitini kita i ˈOlic 103 fedengan mananam ko manan hani? (ˈOsien ko ˈOlic 103:12.) Sowal ni Tafiti: ‘Ano hakowaay ko kararaay no kawali ato kaetip i, hatiraay ko pipaliyas Ningra to raraw ita i kitanan.’ O kawali o samara:ayay no kaetip, o kawali ato kaetip mafafidaˈay cowa ka malalitemoh. O manan ko tatodong hani? O cecay milengoay a cudad sanay: “Ano itiraan ni Yihofa ko raraw i samara:ayay a kitiraan, wa pakasoˈlinto kita, oya hanek no raraw, kadit ato kihcod milingatay a harateng, malahdawayto maemin.” Haratengen hena, o hanek mikidatay to harateng, kawra ano misododanto ni Yihofa kita ikor i, paraayanto ko raraw no mita, ano o mimimimingto a hanek i, awaayto maemin. Cowa ka papikidaten Ningra to maamaan a demak papiharateng to raraw no mita, cowa ko mamiroroh to nano raraw no mita.—Icikil 18:21, 22; Dmak 3:19.

Coka: Saka1: Hongti ci Tafiti i fadahongay no lomaˈ mitapal ci Patsipaan a mainoˈ. Saka 2: Mikifalocoˈay ci Tafiti micangacang mitolon. Saka 3: Misimsimay ci Tafiti a mitilid.

Makalimay Misodod ci Yihofa, Cowa Piroroh to Nano Raraw no Mita

Sowal no Fangcalay Cudad, misododanto ni Yihofa kita, cowato ka piharateng to raraw no mita. Tatodong i, cowa pakayni ci Yihofa to nano raraw ita a mirikec mitefoc kitanan. (Isaya 43:25) O ngaˈayay a tinakoan ci Tafiti, o nalifetan ningra paihkalay, soˈlin pakidem ko raraw, o hakelong no ˈorip ita iraayho ko hatokel, kamayan kita patatikol ko kalawidang ita aci Yihofa.

Na maˈodangay ato mipatayay to tamdaw ci Tafiti a pakidemay ko raraw, kawra ikor mikifalocoˈ cingra pasasiyor, mansa misododanto ni Yihofa cingra. Micadaay ci Tafiti to saparikec, mafalicto ikor, padadotocay madimadi midoko ci Yihofaan.—2 Samuil 11:1-27; 12:13.

Pakayniay ci Yihofa i madimadiay ni Tafiti a misangaˈay palifon cingranan. (ˈOlic 13:6) Mapatay ci Tafiti ikor, pakalalokan ni Yihofa ci Solomon pahecad to wama ci Tafitian, ‘tano makoracay moecelay a falocoˈ midoko’ Cingranan. (1 Hongti 9:4, 5) Mikitini i sowal ni Yihofa mahapinang ita ko pinengneng Ningra ci Tafitian. Cowa ka piliyaw ci Yihofa somowal to nano raraw ni Tafiti, edengan ko sowal to hakelong no ˈorip ni Tafiti o makoracay moecelay sanay.

O manan ko mananamay ita? Misodod ci Yihofa kitanan ikor, cowato ko mamiharateng to raraw ita, ao misinanot to makapahay a waywayan ita, halo palifon kitanan. (Hipray 11:6) Mapawanay ci Yihofa to nano raraw ita, hamaanto piliyaw kita miharateng toniya raraw.

15. Ano padadotoc kita a miroroh to nano raraw i, sasamaan ko demak ita hani?

15 Ano padadotoc kita a miroroh to nano raraw i, o sowal ni Tafiti i ˈOlic 103 fedengan sasamaan padama kitanan hani? Ngaˈayay licayen ita ko niyah: “Mapawanayto ako ko maharatengay ni Yihofa a demak han? Mapawanay ako to maharatengay Ningra ko cowa ko malefatay a tamdaw, ano mikifalocoˈ kako a pasasiyor, oha mamisodod Cingra takowanan han? Oya mapawanayto ni Yihofa a demak padadotoc sanay a maharateng ako han? Soˈlin misododanto ni Yihofa ko raraw ako, hanaca cowa ko papakayni a mitefoc takowanan, misamaanay hano haharateng han ako ko isaˈayaway a raraw hani?” Cowa ka padadotoc sa ci Yihofa a miharateng to nano raraw no mita, cowa ko mamihaen kita. (ˈOlic 130:3) Ano pakasoˈlin kita to misododayto ci Yihofa kitanan, oha hepolen ita koya macariraway makesemay a falocoˈ, padadotoc lipahak matayal saki ci Yihofaan.

16. Caka pihepol to macariraway makesemay a falocoˈ hano o katalawan koni hani? Tano tinakoen a mitadtad. (Nengnengen ko coka.)

16 Haratengen ko cecay sapatinako. Cowa ka hepolen ko macariraway makesemay a falocoˈ, mahecaday to parakatay to tosiya i, padadotocay a minengneng to pakomiya. Parakat to tosiya i, nolatekay minengneng to pakomiya o matatodongayto, mihaen wa masinanotto iso ko lalikor no tosiya, kawra ano sakadipayalaw tahira i katayraan, cowa ka ngaˈay nanengneng sa kiso to pakomiya, ao kaˈayaway a lalan ko nanengnengen iso. Mahecadayto, nolatekay mitikol miharateng to nano raraw no niyah o ngaˈayay koni, samanen ano mihaen oha ngangaˈay kita maharateng ko sapakafanaˈ, eca ka piliyaw mararaw. Kawra ano caka pihepol kita to macariraway makesemay a falocoˈ i, alatek wa awato ko lipahak ita, awato ko pakayraan patafang to sangaˈayay ci Yihofaan. Mihaenay, mamisarocod kita midoko ci Yihofaan, ceriden a miharateng to mikiˈokan ni Yihofa pafeli kitanan a makapahay noikoran, itiyato i, oya tatiihay a maharatengay a demak ‘oha mamatawalto maemin.’—Isaya 65:17; Taneng 4:25.

O cecay faˈinayan i masaikongikongay a lalan parakat to tosiya, minengnengay cingra to pakomiya.

O parakatay cowa ka ngaˈay nanengneng sa to pakomiya, ao maminengneng to kaˈayaway a lalan. Mahecaday, aka haharateng sa kita to nano raraw isaˈayaw, ao mamiharateng to hanoikoran a sapalemed (Nengnengen ko saka 16 fatac)


PADADOTOC ‘MIKAYAT TO FALOCOˈ NO NIYAH’

17. Hano padadotocen ita misaˈicel, pakasoˈlin to maolahay ci Yihofa kitanan, makalimay misodod kitanan hani?

17 Padadotocen ita misaˈicel, pakasoˈlin to maolahay ci Yihofa kitanan, hanaca makalim misodod kitanan. (1 Yohani 3:19 ato roma pihongyak.) Misamaanay hani? Samanen misaˈicelay ci Satan miorat kitanan, papiharateng to pakidemay ko raraw no niyah, cowa ka citatodong tahacada to olah ni Yihofa, ato sasodod Ningra. Cecayay ko patosokan ni Satan, ho caka pidoko kita ci Yihofaan. Mafanaˈay cingra to cowa to ka hakowa ko toki no niyah, mansa wa pakidem pakidem ko sapiˈodis ningra kitanan. (Paˈarawan 12:12) Aka a papipalaˈosien cingra!

18. Ano sapipakasoˈlinaw to maolahay ci Yihofa tisowanan, hanaca misododanto ko raraw iso, sasamaan ko demak hani?

18 Ano sapipaˈicelaw to pakasoˈlinay a falocoˈ, pakasoˈlin ci Yihofaan to maolahay tisowanan, mamitoor to sapaini no isaˈayaway a fedengan a midemak. Ano sapipakasoˈlinaw to misododanto ni Yihofa kiso i, o haharatengen ko samaanay ci Yihofa pasowal to Niyah, haratengenho i sakayat Ningra to miˈoningay to Fangcalay Cudad, samaanay somowal to makahiay Cingra misodod to tamdaw. Haratengen, mafanaˈay ci Yihofa to cowa ko malefotay a tamdaw kiso, wa paihkal to siniˈada tisowanan. Haratengenho, ano misodod Cingra tisowanan i, mamisongilaˈ Cingra a misodod. Mihaen wa pakasoˈlinto kiso, soˈlinay siniˈada ci Yihofa tisowanan, soˈlinay misodod tisowanan. Ngaˈayay mahecad kiso ci Tafitian mikifalocoˈ a miakoˈid a pasowal: ‘Akoˈiday Yihofa, akoˈidayto ko “pisodod Iso to raraw no mako.”’—ˈOlic 32:5.

SASAMAAN KO CAˈOF ISO?

  • Hano pakasoˈlinen to misododanto ni Yihofa kita hani?

  • Misamaan ko demak ngaˈ pakasoˈlin to misododanto ni Yihofa kita hani?

  • Hano padadotocen ita mikayat ko falocoˈ no niyah hani?

RADIW 1 Fangcalay Capeling ni Yihofa

a Nengnengen ko Mikecolay Saka 5 Folad 1, 2009, “Miingid to Kawas—Samaanay ci Yihofa Somowal to Niyah.”

    Amis Mitepangan Cudad (2013-2025)
    登出
    登入
    • 阿美語
    • 分享
    • 設定
    • Copyright © 2025 Watch Tower Bible and Tract Society of Pennsylvania
    • 使用條款
    • 隱私權政策
    • 隱私設定
    • JW.ORG
    • 登入
    分享