Halamhamay ci Yihofa to Polong a Tamdaw Pasasiyor ko Falocoˈ

1. O manan ko tatodong no pasasiyoray?

ANO mararawto kita i, tada masakalimlaan ko pasasiyoray. Mikitini i Fangcalay Cudad, o pasasiyoray ko falocoˈ a tamdaw, wa misatapang ciˈinteh to nidemakan ningra a mararaway, tomerepto a midemak to mahaenay a raraw, halo misetek to falocoˈ caayto ko mamidemak to malecaday a raraw.—Nengnengen ko Sapitadtad a Sowal, “Pasasiyor.”

2. Hano cacipinang kita to tatodong no pasasiyoray hani? (Nihimiya 8:9-11)

² Kahacecay tamdaw oha mamafanaˈ o manan ko tatodong no pasasiyoray. Misamaanay hani? Samanen mararaway kita to romiˈamiˈad. O teloteloc ni Atam aci Ifa kita, mirocokay to raraw, salikor mamapatay, awaay ko malawaay a tamdaw. (Loma 3:23; 5:12) Ano o tarokosto ci Pawlo tanektekay ko pakasoˈlin a tamdaw, taharorayay a miˈodot to raraw. (Loma 7:21-24) Tona ciraraway kita papadadotoc a marorayen cowa ka saan ko tatodong nonini. Cisiniˈadaay a Kawas ci Yihofa, halamhamay Cingra rihaked ko kaˈorip no mita. Nengnengen ko maˈoningay i Nihimiya cudad. (ˈOsien ko Nihimiya 8:9-11.) Itini lintad ni Nihimiya, o Yutaya tamdaw pakayni i nano raraw no niyah a masomaden, kawra cowa ka olah ci Yihofa padadotoc a masomad cangra, ao halamhamay cangranan pakayni pidoko Cingranan a lipahak ko falocoˈ. Mafanaˈay ci Yihofa ano pasasiyor ko tamdaw lalipahak ko falocoˈ, mansa pakacipinang Cingra kitaanan o manan ko tatodong no pasasiyoray. Ano naifalocoˈ kita a pasasiyor i, o papakasoˈlinen o matomesay ko siniˈada a Wama, wa misodod kitaanan.

3. Oniya lalakaw mamilengo to maanan?

³ Oniya lalakaw mamilengo to tolo milingatay to pasasiyoray a demak. Saka 1, pakayni to pasasiyoray, pasifanaˈay ci Yihofa to Israil tamdaw to maanan? Saka 2, samaanay a talaˈayaw ci Yihofa padama to mararaway a tamdaw, mikayat cangranan pasasiyor? Saka 3, pakayni to pasasiyoray, mananamay no nisawawaan ni Yis ko maanan?

PAKAYNI TO PASASIYORAY, PASIFANAˈAY CI YIHOFA TO ISRAIL TAMDAW TO MAANAN?

4. Pakayni to pasasiyoray, pasifanaˈay ci Yihofa to Israil tamdaw to maanan hani?

⁴ Na mipafelian ni Yihofa ko Israil tamdaw to rikec, mihaiyay cangra to mamadimadi a midofdof. Mikiˈokay ci Yihofa, ano midofdof cangra to rikec i, o dadipoten palemeden ni Yihofa cangra. Sanayho pasowal ci Yihofa: ‘Anini palimoˈoten Ako kamo tonini a sarikec, cowa ko pasangar i tisowanan, cowa ka piraay tisowanan.’ (Limoˈot 30:11, 16) Kawra, ano misafelit ko Israil tamdaw ci Yihofaan i, tinakoen mitaˈong to roma a kawas, caayto ko papalemeden ni Yihofa, wa tahalifa cangra to adihayay roray. Soˈliˈlin a hatirato i, ‘ano miliyaw minokay ko Israil tamdaw i Kawas ci Yihofaan . . . mitengil to sowal Ningra,’ o ngangaˈayto miliyaw milifok to hemek Ningra. (Limoˈot 30:1-3, 17-20) O tatodong i, iraay ko hatoki no Israil tamdaw pasasiyor. Ano mihaen to demak cangra, laliyawen ni Yihofa a miingid cangra, palemed cangranan.

5. Samaanay ko demak ni Yihofa, patalahkal to cowa ka pisawad Cingra to finawlan no Niyah? (2 Hongti 17:13, 14)

⁵ Nikawrira, misaliyaliyaway a misafelit ko Israil tamdaw ci Yihofaan. Cowa ko pitaˈong aca to samiyay, midemakayho cangra to kaacekan a demak, telocto i, tahalifaay cangra to adihayay a roray. Kawra cowa pisawad ci Yihofa to maliyangay a finawlan Ningra. Padadotocay Cingra miocor to pairasolay mirikec cangranan pasasiyor, minokay i tatihi Ningra.—ˈOsien ko 2 Hongti 17:13, 14.

6. Samaanay ci Yihofa misakadademak to pairasolay padama to Israil tamdaw, cipinang to tada masakalimlaan ko pasasiyoray? (Nengnengen ko coka.)

⁶ Marariday ci Yihofa misakadademak to pairasolay miparikec ato misalof to finawlan Ningra. Tinakoen, papilasilen ni Yihofa ci Yirimiya: ‘O misafelitay a Israil, ka pinokay kamo . . . Cowa ko kaketeren Ako kamo, samanen o madimadiay Kako . . . Cowa ko tatahatolas ko keter Ako, nikawrira mamihayi kiso to raraw iso, samanen misafelitayto kiso to Kawas iso ci Yihofaan.’ (Yirimiya 3:12, 13) Pakaynian ni Yihofa ci Yoilan a pasowal: ‘Ka . . . pisarocod kamo to falocoˈ minokay i tatihi Ako.’ (Yoil 2:12, 13) Ocoran ni Yihofa ci Isaya pasowal to Israil tamdaw: ‘Ka . . . pikorac to niyahan, sawaden ko tatiihay waywayan namo nai kaˈayaw Ako, akato pidemak to tatiihay.’ (Isaya 1:16-19) Pakaynianho ni Yihofa ci Icikilan a pasowal: ‘O lalipahak Kako mapatay ko tatiihay a tamdaw han? Coko halamhamay Kako pasasiyor cangra a maˈorip saw? . . . Cowa ka olah Kako to nika patay no nimanima namo. Ka patatikol wangaˈ maˈorip kamo.’ (Icikil 18:23, 32) Maolahay ci Yihofa to pasasiyoray a tamdaw, samanen halamhamay Cingra padadotoc a maˈorip cangra, hanaca milifok to midaˈocay ˈorip. Kawrira, cowa ka tala saan ci Yihofa a caay pidemak to maanan, tahira noka ˈarawto a pasasiyor ko tamdaw ngaˈ padama cangranan. Nengnengen ita ko roma tinakoan.

7. Pakaynian ni Yihofa i tinakoan ni Hosiya aci Komil pasifanaˈ to Israil tamdaw to maanan?

⁷ Pakaynian ni Yihofa to nalifetan no pairasolay ci Hosiya ato fafahi ningra ci Komil a pasifanaˈ to Israil tamdaw. Maˈaˈodang ci Komil to tao ikor, miliyasay ci Hosiyaan malacafay tora faˈinayan. Awaayto ko kapo ni Komil o sanay han? Mafanaˈay mitiyawca to falocoˈ no tamdaw a Yihofaan sanay pasowal ci Hosiyaan: ‘Soˈlina padadotoc kora fafahiyan maˈaˈodang tora faˈinayan, kaolahenho iso cingra, matiya to Israil soˈlina mitaˈong to roma kawas . . . kamayan ci Yihofa maolah cangranan.’ (Hosiya 3:1; Taneng 16:2) Sinanoten hena, ci Komil padadotocayho pakidem ko raraw, ˈarawhan palimoˈotan ni Yihofa ci Hosiya talaˈayaw mikilim cingranan, misodod cingranan patikol malakangaˈay.a Pakayni tonini tinakoan, pakahapinang ci Yihofa to Israil tamdaw, samaanay ko nafalocoˈan Ningra i cangranan. Soˈlin marefongayho i raraw cangra, kamayan Cingra maolah cangranan, padadotoc miocor to pairasolay mirikec cangranan papipasasiyor. Mikitini tonini maˈoningay, ano pakidemayho mararaw ko tamdaw i, ‘mitiyawcaay to falocoˈ no tamdaw’ a Yihofa tatalaˈayaw padama cingranan halo mikayat cingranan pasasiyor han? (Taneng 17:3) Dotoc nengnengen ita hena.

SAMAANAN NI YIHOFA MIKAYAT KO MARARAWAY A TAMDAW PASASIYOR?

8. Sapikayataw ci Kainan pasasiyor, talaˈayaway ci Yihofa midemak to maanan hani? (Satapangan 4:3-7) (Nengnengen ko coka.)

⁸ Ci Kain o saka cecay a wawa ni Atam aci Ifa, mirocokay to raraw no wama wina. Roma i, somowalay ko Fangcalay Cudad ‘mariˈangay ko demak ningra’ sanay. (1 Yohani 3:12) Pakayni tonini a demakan, ci Yihofa ‘cowa ka olah ci Kainan ato sapatoˈaya ningra.’ Ci Kain cowa ka pisalof to niyahan, ‘tada mangolaway cingra.’ Dotoc samaanayto ko demak ni Yihofa hani? Talaˈayaway Cingra mikilim ci Kainan. (ˈOsien ko Satapangan 4:3-7.) Sidaˈitay ci Yihofa masasowal ci Kainan, pafeli to hatokel ningra, hanaca patalipaˈelal cingranan mararaw aira ko maanan a telocan. Sapikayataw ci Yihofa ci Kainan pasasiyor, kawra maliyangay cingra, cowa ka kahi micada to sapadama. Hati:ni ko nika pisaˈicel ni Yihofa, kawra awaay ko ngaˈayay a teloc, sawad sanayto ci Yihofa mikayat to mararaway a tamdaw pasasiyor han? Co:wa ka hatira!

9. Samaanay ci Yihofa padama ci Tafitian pasasiyor hani?

⁹ Haratengen ko tinakoan ni Tafiti. Ci Yihofa tada maolahay ci Tafitian, somowalay Cingra to o matatodongay i falocoˈ no Mako sanay ci Tafitian. (Dmak 13:22) Kawrira pakidemay ko raraw ni Tafiti, maˈodangay cingra, halo mipatay to tamdaw. Ano tooren ko Rikec ni Mosi, o papatayen ci Tafiti itiya. (Lifi 20:10; Saˈosi 35:31) Kawra, makalimay ci Yihofa padama ci Tafitian a pasasiyor.b Soˈliˈlin caayho ka patalahkal ci Tafiti to pasasiyoray ko falocoˈ, ˈarawhan miocoran ni Yihofa ci Natan masasoˈaraw cingranan. Tano ngaˈayay sapatinako ci Natan a mitadtad, sapitemeraw to falocoˈ ni Tafiti. Matengil ningra ko sowal ni Natan i, matemeray ko falocoˈ, misasoˈlinay ko falocoˈ pasasiyor. (2 Samuil 12:1-14) Pakayni toninian mitiliday ci Tafiti to cecay ˈolic, patalahkalay to mikifalocoˈay noka pasasiyor ningra ilalomaˈ. (ˈOlic saka 51 fedengan, lalangian a sowal) Oniya ˈolic misayaray tona mararaway a tamdaw, hanaca pakalalok cangranan misasoˈlin a pasasiyor. Maˈaraw ko nika ciolah ni Yihofa mikayat ci Tafitian pasasiyor, coko masemeran nanay ko falocoˈ iso saw?

10. Mafanaˈ kita to iraay ko mihadidiay ni Yihofa, makahiay misodod to tamdaw, samaanay ko piharateng iso hani?

¹⁰ Manaokaniw, ˈintehay ci Yihofa to raraw, cowa ko papakihater to masamaamaanay a raraw. (ˈOlic 5:4, 5) Samanen maolahay ci Yihofa kitaanan, ano mararaw kita i, makalimay Cingra padama kitaanan. Soˈlin pakidem ko raraw no tamdaw, misarocoday ci Yihofa mikayat cangranan pasasiyor, ho ngaˈay cangra miingid Cingranan. Mafanaˈ toninian i, tada misayaray to falocoˈ no mita! Ano songilaˈen ita miharateng to tada mihadidiay ci Yihofa makahi misodod to tamdaw, o mamapakalalokto padadotoc a madimadi Cingranan, hanaca misetek to falocoˈ ano mararaw i, kakaliki a pasasiyor. Dotoc maminengneng kita, pakayni pasasiyoray, pasifanaˈan ni Yis ko nisawawaan to maanan hani?

PAKAYNI TO PASASIYORAY, MANANAMAY NO NISAWAWAAN NI YIS KO MAANAN?

11-12. Pakayni i pisodod ni Yihofa, padamaay ci Yis kitaanan mihapinang to maanan? (Nengnengen ko coka.)

¹¹ Tahira i saka 1 hahekalan, miocoran ni Yihofa ko mipaputisemay a Yohani palimoˈot to finawlan pasasiyor. Misatapang ci Yis to mitosilay a tayal ikor, pakaynian ni Yihofa cingranan pasifanaˈ to tamdaw o masakalimlaan ko pasasiyoray.—Matay 3:1, 2; 4:17.

¹² Itiniho i fafekang no sera ci Yis, marariday pasifanaˈ to tamdaw, makalimay misodod to raraw no tamdaw ko kakarayan Wama. Kinacecayay, somowalay cingra to cecay mitemeray to falocoˈ a sapatinako. Sowal ningra, iraay ko cecay kapah miliyasay to lomaˈ, kasimelangan ko kaˈorip. Cecay laliyadan ikor, ‘talipaˈelalay’ konini a kapah, oranto i, minokayay. Samaanay ko harateng no wama ningra hani? Sowal ni Yis: ‘Ira:ayho konini a wawa, maˈaraw no wama cingra, kasiniˈadaan nengnengen, talaˈayaway comikay mitakec cingranan, mihangot cingranan.’ Milicayay koya wawa, wa ngaˈay cingra mala koli i lomaˈ no wama hokira. Cowa ko pisodod aca no wama cingranan, micadaay cingranan malo wawa. Sowal no wama: ‘Onini a wawa ako patikolay maˈorip, miliyaway minokay.’ (Luka 15:11-32) Itiniho i kakarayan ci Yis, maedeng marariday maˈaraw ko kakarayan Wama paihkal to siniˈadaay falocoˈ i pasasiyoray tamdaw, misodod cangranan. Pakayni toniya mitemeray to falocoˈ a sapatinako, pakahapinang ci Yis kitaanan, tada o siniˈadaay to tamdaw a Wama ci Yihofa!

13-14. Pakayni pasasiyoray, mananamay no tarokos ci Pitiro ko maanan? Pasifanaˈay cingra to tao to maanan a kimad hani? (Nengnengen ko coka.)

¹³ Pakayni pasasiyoray ato misododay, tarokos ci Pitiro naitini ci Yisan adihayay ko mahatatanamay. Marariday mararaw ko demak ni Pitiro, misododanto ni Yis ko raraw ningra. Patinakoen i, ci Pitiro kinatoloay a caka pihayda ci Yisan ikor, pakayni kakesem no falocoˈ saka ˈongong sa tomangic. (Matay 26:34, 35, 69-75) Patikol maˈorip ci Yis i, paˈarawan ningra ci Pitiro. Ano nengnengen i, awaay ko cimacima tamdaw itiya. (Luka 24:33, 34; 1 Korinto 15:3-5) Maedeng mihinoman ni Yis koya pasasiyorayto a Pitiro, padama ci Pitiroan mafanaˈ maherekayto ci Yis misodod cingranan.—Nengnengen ko pitadtad no Sapikingkiw a Fangcalay Cudad: Marko 16:7 “aci Pitiro.”

¹⁴ Mikitini nalifetan mananamay ni Pitiro, o manan ko tatodong no pasasiyoray ato misododay, mansa ngaˈay padama to tao cipinang tonini a kimad. Ikor no Kocinsic, pakafanaˈay ci Pitiro i masaˈopoay a Yutaya tamdaw, ci Misiya o cangra ko mipatayay. Nikawrira, mikitiniay ciolahay falocoˈ palimoˈot cangranan: ‘Ka pasasiyor kamo, ka patatikol, mihaen o mamahepolto ko raraw namo, papafelien ni Yihofa kamo to rihadayay a laliyadan.’ (Dmak 3:14, 15, 17, 19) Paihkalay ko sowal ni Pitiro, o soˈlinay ko falocoˈ pasasiyor a tamdaw o ‘papatatikol,’ o mamifalic to harateng, caayto pidemak to mararaway a demak, hanaca misatapang midemak to kaolahan ni Yihofa a demak. Somowalayho ci Pitiro, o hahepolen ni Yihofa ko raraw nonini a tamdaw, malecad o awaayto materek. Ikor no pi:na miheca, pasowalan ni Pitiro ko salikaka: ‘Ci Yihofa . . . . mihadidiay Cingra tamowanan, cowa ka halamham to sakalaˈafoaw no cecacecay a tamdaw, ao halamhamay to pasasiyor ko tamdamdaw maemin.’ (2 Pitiro 3:9) Ikor no mararaw kita ano mikifalocoˈ a pasasiyor, soˈliˈlin pakidemay ko raraw, iraayho ko hatokel ita!

15-16. (1) Samaanay ci Pawlo cipinang to tatodong no misododay? O manan ko mananamay ningra? (1 Timoti 1:12-15) (2) Dotoc a lalakaw mamilengo to manan?

¹⁵ Masowal ko misaaliay to sapasasiyoraw ato sasodod a tamdaw, maharatengay ita itiniay i Tarsus a Sawloan, o tarokos ci Pawlo. Na pakidemay ko pihakokay ningra to Krisciyang, cato ko mamalidong cingra sanay ko ˈalomanay Krisciyang. Maedeng mahaenay ko harateng no cowa ka lefot a tamdaw. Cowa ka lecad ko pinengneng ni Yis, cingra ato kakarayan Wama o ngaˈayay ni Pawlo ko maˈaraway nangra. Sowal ni Yis: ‘Onini a tamdaw o mipiliˈan ako a lalosidan.’ (Dmak 9:15) Misakadademakan ni Yis ko kafahkaˈan a demak mikayat ci Pawloan a pasasiyor. (Dmak 7:58–8:3; 9:1-9, 17-20) Ikor no malo Krisciyang ci Pawlo marariday pasowal to salikaka, miakoˈiday cingra ci Yihofaan aci Yisan siniˈada cingranan, pafeli cingranan to kadofahay mikiriwiˈay a sidaˈit. (ˈOsien ko 1 Timoti 1:12-15.) Miakoˈiday ko falocoˈ ningra a pasifanaˈ to salikaka: ‘O sidaˈit no Kawas o mamikayat tisowanan a pasasiyor.’—Loma 2:4.

¹⁶ Kinacecayay, mafanaˈ ci Pawlo pakihateran no Korinto a kasakopang ko maˈodangay a tamdaw materek i kasakopang, itiya mihadakay ci Pawlo to manan a sakayat hani? Mikitini i sowal ningra, mamahatatanam ita, ano mirikec ci Yihofa i, mikitiniay ciolahay falocoˈ, ano pasasiyor ko tamdaw i, patalahkalay Cingra to siniˈada. O mamananamho ita samaan mitodong ci Yihofaan sidaˈit a mipadang to tamdaw. Dotoc a lalakaw mamisongilaˈ a milengo toya mafekaday itini kasakopang no Korinto a demak.