Parihadayay ko Olah ni Yihofa Kitanan!

1. Sasamaan ko demak ita, o pakahemekay ci Yihofaan hani?

HARATENGEN hena, pafelien iso ko widang to mikifalocoˈan a misaday a sapatelong, onini a sapatelong makapahay ngaˈayay sakadademaken, kawra macada no widang i, kasimaan sanay cingra a mitekol i hako, cowa ka halafin mapawanayto ningra. Mihaen ko demak no widang makesemay kiso alatek. Kawra ano ceriden ningra misakadademak ko sapatelong iso, paihkal to miakoˈiday tisowanan, wa mahemeken kiso. Malecaday, pakayni i olah ni Yihofa kitanan, miocor to Wawa Ningra kinafalah to ˈorip a pafeli kitanan to sapatefoc. Ano paihkal kita to miakoˈiday Cingranan, misalimla to olah Ningra, wa pakahemek Cingranan.—Yohani 3:16; Loma 5:7, 8.

2. Onini a lalakaw mamilengo to manan?

² Kawra, palidlid sato ko toki a malingad, alatek o pinengneng ita to sapatefoc a sapatelong cowa to pisakareteng, mahecaday to tekol hananay i hako, cowato ka pinengneng a miharateng. Cowa ka sapihaenaw kita a midemak! Mansa, wa macerid kita midotim to kinafalah no Kawas aci Kristo i kitanan, padadotoc mitongal to miakoˈiday a falocoˈ Cangranan. Onini a lalakaw mamilengo, nohatini wa mikitini i sapatefoc kita a milifok to manan a sapalemed, ato noikoran mikitini i sapatefoc a milifok to manan a sapalemed. Wa milengoho sasamaan paihkal to miakoˈiday falocoˈ ci Yihofaan, mangalef i ˈayaw ato ikor no Piharatengan to Kinafalah ni Yis a Saˈopo a folad mihaen to demak.

NOHATINI A SAPALEMED

3. Mikitini i sapatefoc macadaayto ita a cecay sapalemed o manan hani?

³ Naitiniayto kita i sapatefoc ni Yis a micada to adihayay sapalemed. Tinakoen, pakayni i sapatefoc, misododanto ni Yihofa ko raraw ita. Soˈlin awaay ko haˈinorong Ningra misodod kitanan, kawra mahemekay Cingra mihaen to demak. Mihaenay, miˈoningay to ˈOlic matomesay ko piakoˈid a pakahemek ci Yihofaan sanay: ‘Yihofaaw, o ngaˈayay Kiso, mahemekayho misodod to tamdaw.’—ˈOlic 86:5; 103:3, 10-13.

4. Ci Yihofa pakayniay cimaanan misaday to sapatefoc a sapatelong? (Luka 5:32; 1 Timoti 1:15)

⁴ O roma tamdaw cowa ka citatodong sanay milifok to sasodod ni Yihofa. Soˈlinay i, kita o tamdaw maemin cowa ka citatodong. Tarokos ci Pawlo cipinangay to hatiniay a harateng, na masowalay ningra ‘cowa ka citatodong malo tarokos’ sanay. Kawra, sanayho cingra: ‘Pakayniay i mikiriwiˈay a sidaˈit no Kawas, ngaˈ malo aniniay a kako.’ (1 Korinto 15:9, 10) Ano pakayni to raraw no niyah a pasasiyor, wa makahi ci Yihofa misodod kitanan, kawra cowa ko iraay ko fadangalan ita micada to sasodod ni Yihofa, ao pakayniay i olah ni Yihofa kitanan. Ano caka citatodong kako micada to sasodod ni Yihofa sa i, haratengen, oniya sapatefoc a sapatelong cowa ko sakitini i awaay ko raraw a tamdaw, ao pakayniay i pasasiyoray to raraw a tamdaw a misaday.—ˈOsien ko Luka 5:32; 1 Timoti 1:15.

5. Misodod ci Yihofa kitanan, o tatodong ita konini han? Tadtaden hena.

⁵ Halafinayto kita matayal saki ci Yihofaan, wa milifok kita to sasodod ni Yihofa, aka saan miharateng. Manaokaniw, misalimlaay ci Yihofa to na demakan ita a kihcod. (Hipray 6:10) Kawra, o sapatefoc cowa ka ciˈaca a sapatelong ni Yihofa kitanan, cowa ko mitayalan ita a lifon. Ano o sasodod ni Yihofa o mietanan ita a milifok sa i, o mahaenay a harateng hato hapimaanto ko sapatefoc sanay, o kinafalah ni Yis awaayto ko epoc.—Nengnengen ko Kalatiya 2:21.

6. Misamaanay misaˈicel ci Pawlo matayal saki ci Yihofaan hani?

⁶ Mafanaˈay ci Pawlo cowa pakayniay to ˈicel no niyah a milifok to pihayda ni Yihofa. Ano mahaenay i, hano kamayan misaˈicel cingra matayal saki ci Yihofaan hani? Cowa ko sapisawacayaw to citatodongay ko niyah, ao miakoˈid ci Yihofaan pafeli toniya mikiriwiˈay a sidaˈit. (Ifiso 3:7) Mahecad ci Pawloan, padadotoc kita tawlik a mala dademakay ni Yihofa, cowa ko mamietan to sasodod ni Yihofa, ao paihkalay kita to miakoˈiday a harateng.

7. Nohatini, mikitini i sapatefoc o mananho a sapalemed ko mamacada ita hani? (Loma 5:1; Yakop 2:23)

⁷ Nohatini, mikitini i sapatefoc macadaay ita a roma sapalemed i, o ngaˈay makedec ko kalawidang ci Yihofaan.a Masowalay no kaˈayaway a lalakaw, nano hofoc han kita maraayayto ko kalalaˈed ita aci Yihofa. Kawra pakayniay i sapatefoc, ngaˈay kita ‘dipayal ko kalalaˈed aci Yihofaan,’ ho ngaˈay kita miingid Cingranan.—ˈOsien ko Loma 5:1; Yakop 2:23.

8. Ngaˈay kita mitolon ci Yihofaan, hano o aakoˈiden ita a demak hani?

⁸ Samanen mala widangayto ni Yihofa, iraayto ko kalikoan ita mitolon Cingranan. Ano misaˈopoto kita mitolon Cingranan, anca notekedan a mitolon, mitengilayto Cingra. O mitolonay padamaay kitanan talipaˈelal ko ponoˈ, rihaday ko falocoˈ. Cowa konini aca, o satolon patongalay to kalawidang ita ato Kawas. (ˈOlic 65:2; Yakop 4:8; 1 Yohani 5:14) Haratengen to samaanay ko demak ni Yis, i fafekangho no sera miceriday cingra mitolon ci Yihofaan, samanen mafanaˈay cingra mitengilay ci Yihofa, mafanaˈayho mitolon wa paˈicel to kalalaˈed ningra ato kakarayan Wama. (Luka 5:16) Pakayni to kinafalah ni Yis, ngaˈay malo widang ni Yihofa kita, itini satolon pasowal to nafalocoˈan, tada miakoˈiday kita to kinafalah ningra.

NOIKORAN A SAPALEMED

9. Anoikor, madimadiay midoko ci Yihofaan a tamdaw mikitini i sapatefoc mamilifokho to manan sapalemed?

⁹ Anoikor, madimadiay midoko ci Yihofaan a tamdaw mikitini i sapatefoc mamilifokho to manan sapalemed? Wa tahadaˈoc cangra maˈorip. Toniya pina caˈol mihecaan, o tamdamdaw cowa pakaliyas to patay, mansa ˈalomanay tamdaw to midaˈocay maˈorip o mitiihan aca sanay. Kawra, isalakatay a araaw ni Yihofa oha tahadaˈoc maˈorip ko tamdaw. Ano caka mararaw ci Atam, cowa ko papasowal ko tamdaw to awaay ko midaˈocay a ˈorip. Soˈlin nohatini, ˈalomanay tamdaw midaˈocay a ˈorip cowa ko mamalaˈosi sanay, kawra pakayni toniya demak taˈangayay ko mihadakan ni Yihofa a ˈaca, kinafalahan ko ˈorip no foseniˈan a Wawa Ningra, mihaenay i, o midaˈocay a ˈorip oha tatalaen ita a makapahay hatokel.—Loma 8:32.

10. Manilnilay no fangcalay saocor a Krisciyang ato roma lopayˈay siri hinatalaay to manan hani?

¹⁰ Soˈlin midaˈocay a ˈorip o hanoikor ngaˈ malifok ita a sapalemed, kawra halamhamay ci Yihofa kitanan hinatala toniya sapalemed. Manilnilay no fangcalay saocor a Krisciyang tawlikay a hinatala tayra i kakarayan malacafay ci Kristoan a mala hongti, midemak to pakalalokay pakahemekay a tayal. (Paˈarawan 20:6) O roma lopayˈay siri hinatalaay sapicomodaw i fafekang no sera a lakoing, itiyato i, mamaliyasto ko roray ato somad. (Paˈarawan 21:3, 4) Ano o roma lopayˈay siri kiso i, haratengen, palalinien to tayraay i kakarayan, itini fafekang no sera milifok to midaˈocay a ˈorip cowa ko “sahinom” aca koni! O isalakatay a araaw no Kawas to tamdaw konini, itiyato i, wa raheker a lipahak ko kaˈorip iso.

11-12. Anoikor a lakoing, mamilifok kita to masamaanay a sapalemed? (Nengnengen ko coka.)

¹¹ Saharateratengen ko itini i lakoing a maˈorip kiso. Itiya i, wa cowato ka calemcem kiso to adada ato patay. (Isaya 25:8; 33:24) Wa saloen ni Yihofa ko matatodongay a saali iso. Itiyato i, nanimaanto kiso hani? Mikingkiw to pinaloma ato pinaˈorip han? Minanam to midatokay han? Anca o micacokaay han? O roma i, iraayho ko roma tayal wa pakahemek tisowanan, masaloho ko saali no tao, tinakoen mitangtang to kaesoˈay kakaenen, misangaˈ to lalosidan, midimokos to hanahana, paloma to kakaenen ato losay, misafaco ato patireng to lomaˈ. (Isaya 35:1; 65:21) Itiyato i, cowato ka calemcem to kacangoˈot no toki, samanen awato ko tolas no toki iso misolap ato minanam to kihcod.

¹² Itiyato i, mamilitemoh kita to masacaˈolay masaefanay a patikolay maˈorip a tamdaw, wa paira kitanan to taˈangayay a lipahak! (Dmak 24:15) Cowa konini aca, wa ngaˈayho kita misongilaˈ misolap to misangaˈan ni Yihofa a kasapaan a kihcod, ho matongal ko kafanaˈ ita Cingranan. (ˈOlic 104:24; Isaya 11:9) O tada hinatalaan ita a demak i, itini faelohay a hekel wa patikolto kita a malefot, cowato ko mamararaw, midoko kita ci Yihofaan i, cowato ko pakayniay i raraw a miroroh to niyah! Ano mahaenay i, wa pakayni kiso to misatekeday a coos, misawad to hanoikor a makapahay sapalemed han? (Hipray 11:25) Cowa! Oniya sapafeli ni Yihofa kitanan a sapalemed, citatodongay to mihadakan ita to kihcod a ˈaca. Haratengen, o lakoing cowato ko hatokel no ikor, ao itiniayto i kaˈorip no mita a malaˈosi. Ira ko makapahay hanoikor no mita, sahtoay pakayniay i tangongolay ko olah ni Yihofa kitanan, mihadakay toniya masakalimlaan a sapatefoc a sapatelong.

TANO OLAH A PATIKOL TO OLAH NI YIHOFA

13. Paihkalay ci Yihofa to tadamaanay a olah kitanan, misamaan kita miakoˈid Cingranan? (2 Korinto 6:1)

¹³ Ci Yihofa pakayniay kitanan milimasmas toniya misakalimlaan a sapatefoc a sapatelong, misamaan kita miakoˈid Cingranan hani? Paisalakaten i nokaˈorip ita ko tayal Ningra. (Matay 6:33) Samanen, miocoran ni Yihofa ci Yis ‘patado to polong a tamdaw a mapatay, ho ecato pakayni saki niyah ko tamdaw a maˈorip, ao pakayniay to patadoay cangranan a mapatay ikor patikol maˈorip a Tapang a maˈorip.’ (2 Korinto 5:15) Cowa ko pakatoledaw kita to sapafeli ni Yihofa kitanan a mikiriwiˈay sidaˈit.—ˈOsien ko 2 Korinto 6:1.

14. Misamaan kita paihkal to pakasoˈlin falocoˈ to sakayat ni Yihofa?

¹⁴ Pakasoˈlin kita to sakayat ni Yihofa, o patikolay to olah Ningra a pakayraan konini. Samaanen ko demak hani? Ano misaˈosi kita i, tinakoen tahacowa ko picudad, anca o manan ko hatayal i, songilaˈen a miharateng to makalimay ci Yihofa kitanan sasamaan ko pidemak. (1 Korinto 10:31; 2 Korinto 5:7) Ano tano pakasoˈlinay falocoˈ citanengay ko pisaˈosi, wa paˈicel to pakasoˈlinay falocoˈ ita ci Yihofaan, makakedec to kalawidang Cingranan, patanoktokho to hanoikor a hatokel i falocoˈ no mita.—Loma 5:3-5; Yakop 2:21, 22.

15. I ˈayaw ato ikor no Piharatengan to Kinafalah ni Yis a Saˈopo a folad, misamaan ko demak ita paihkal to miakoˈiday?

¹⁵ O roma patikol to olah ci Yihofaan a pakayraan, i ˈayaw ato ikor no Piharatengan to Kinafalah ni Yis a Saˈopo a folad, tano waywayan paihkal to miakoˈiday kita to sapatefoc. Sasamaan ko demak hani? Cowa aca songilaˈen ita misaday mirienang to Piharatengan a Saˈopo, mitahidangho kita to roma tamdaw mirienang toniya masakalimlaan a saˈopo. (1 Timoti 2:4) Ngaˈayay tadtaden iso cangra to samaanay ko pisikay toniya saˈopo, ngaˈayayho papinengneng cangranan to jw.org wangcan Misamaanay Hano Mapatay ci Yis Hani? ato Haratengen ko Nano Demak ni Yis Kitaanan oniya tosa a ika. Mamisaˈicel ko malohemay malitengay, mitahidang toya pahanhanay to mitosil a tamdaw mirienang to Piharatengan a Saˈopo. Ano ira cangra mirienang, halo matemer ko falocoˈ nangra patikol i katihi ni Yihofa, wa mahemek kita ato coyoh! (Luka 15:4-7) Mirienang to Piharatengan a Saˈopo toya romiˈad, wa mikiriwiˈ kita a militemoh toya sakinacecay mirienangay atoya halafinay cowa ka pirienang to saˈopo a tamdaw, nanay matinako nangra ko dihkoay a olah no mita!—Loma 12:13.

16. I ˈayaw ato ikor no Piharatengan Kinafalah ni Yis a Saˈopo a pina lipay, hano mamisimsim kita adihay ko pirienang to midokoay a demak?

¹⁶ I ˈayaw ato ikor no Piharatengan to Kinafalah ni Yis a Saˈopo a pina lipay, ngaˈayay kiso mitongal to mitosilay a tayal han? Mihaenay i, wa ira ko adihayay a toki piakoˈid to Kawas aci Yisan. Ano matongal ko tayal ita saki ci Yihofaan, wa matinako ko sapadama Ningra kitanan, mihaen i, tanoktok tanoktokto ko pakasoˈlinay falocoˈ Cingranan. (1 Korinto 3:9) O roma i, haratengenho midoedo to ilalomaˈ no Romiˈamiˈad Miasip a Midotim to Sinael, anca ilalomaˈ no Rayray no Saˈopo a dadoedoen miˈosi to Fangcalay Cudad a rayray, misongilaˈ a miˈosi to milingatay to Piharatengan a Saˈopo a sinael. Wa ngaˈayho misatapang to mikingkiway a limasmas, pacalep a midotim toniya sinael.

17. Sasamaan kita ngaˈ pakahemek ci Yihofaan? (Nengnengen ko sapatongal lalakaw “Misamaan a Patikol to Olah ni Yihofa.”)

¹⁷ Alatek o pakayraan iso, cowa ka ngaˈay mitoor to emin a sapaini noniya lalakaw a midemak. Ano mahaenay i, haratengen cowa ka palalini ci Yihofa tisowanan ato tao. Mafanaˈay ci Yihofa to maolahay kiso Cingranan, maˈaraway Ningra misalimlaay kiso to sapatefoc a sapatelong, halo naifalocoˈay iso miakoˈid Cingranan, wa mahemek Cingra.—1 Samuil 16:7; Marko 12:41-44.

18. Misamaanay hano aakoˈiden ita ci Yihofa aci Yis hani?

¹⁸ Masodod ko raraw ita, ngaˈay mala widang kita ci Yihofaan, iraho ko hatokel milifok to midaˈocay a ˈorip, sahtoay pakayni to masakalimlaan a sapatefoc a sapatelong. O olah ni Yihofa pafeliay kitanan to hatiniay a sapalemed, nanay tahadaˈoc kita paihkal to miakoˈiday Cingranan! (1 Yohani 4:19) O roma i, tangongolay ko olah ni Yis kitanan, pakayni kitanan kinafalah to kalimlaan a ˈorip ningra, nanay tahadaˈoc kita miharateng paihkal to miakoˈiday falocoˈ cingranan!—Yohani 15:13.