Pafeliay ci Yihofa to Sapatefoc—Sasamaan Kiso a Paihkal to Miakoˈiday?

1-2. Makahiay ci Yis a kinafalah to ˈorip, mamicoloh kitanan sasamaan ko demak? Misamaanay? (2 Korinto 5:14, 15) (Nengnengen ko coka.)

PATINAKOEN, matelepay ko ˈakawangay a lomaˈ, awaayto ko pakayraan iso a masadak, ikorto iraay ko paˈoripay tisowanan a tamdaw, sasamaan ko piharateng iso hani? Wa tada miakoˈid kiso cingranan, hato cikiyamay to ˈorip cingranan. Soˈlin ˈalomanay ko mapaˈoripay ningra a tamdaw, cowa ko kiso aca, maedeng mamiakoˈid kiso cingranan, pasowal cingranan cowa ko mamapawan kiso to pipaˈorip ningra.

² Malecad ikaˈayaway a lalakaw, awaay ko pakayraan ita milidong to niyah, kawra o sapatefoc ni Yis padamaay kitanan malidong nai raraw, macadaay ita ko sasodod a maadah ko falocoˈ, ngaˈay miliyawto malakangaˈay to Kawas. Hanaca, wa milayap to midaˈocay a ˈorip i noikoran a faelohay hekal. Makahiay ci Yis a kinafalah to ˈorip, paihkalay koni to tangongolay ko olah to tamdamdaw. Soˈlinay i, iti:yaho maolahayto cingra kitanan. (Taneng 8:30, 31) Na somowalay ko tarokos ci Pawlo: ‘O olah ni Kristo hato micolcolay kitanan.’ (ˈOsien ko 2 Korinto 5:14, 15.) Tatodong i, ano cipinangay kita to kasapaan ko olah ni Yis, mamicoloh kitanan tano waywayan a paihkal to miakoˈiday ko niyah cingranan, halo cowa ko mamapawan to nademakan ningra saki kitaanan.

3. Pakayni sapatefoc, o piakoˈid a pakayraan no kahacecay tamdaw hano caka hecad hani?

³ Mihaenay sasamaan kiso paihkal to miakoˈiday hani? Alatek o sapacaˈof iso cowa ka lecad tono tao. Misamaanay hani? Patinakoen, iraay ko tatolo a tamdaw tatayra i malecaday a pala, kawra cowa ka hecad ko palowadan nangra a pala, mipiliˈan a lalan cowa ka hecad. Mahaenay ko pakayraan ita. Iraay ko malecaday a patosokan no mita, o papaihkal to miakoˈiday ci Yihofaan aci Yisan. Kawra, nohatini cowa ka hecahecad ko “pakayraan” no kahacecay a tamdaw. O roma i, mikingkiwayho to Fangcalay Cudad, o roma i, micadaayto to paputisem a Krisciyang. Anca o romaroma i, o moraraway a lopayˈay siri. Mansa, o pipaihkal ita to miakoˈiday a pakayraan cowa ka hecad. Nohatini ano samaanayto ko “pakayraan” iso, oniya lalakaw papadama tisowanan a cipinang, sasamaan a paihkal to miakoˈiday a harateng ci Yihofaan aci Yisan.

Mikakingkiwan to Fangcalay Cudad

4. Maˈaraway ni Yihofa ko maanan a capeling no mipakingkiwan to Fangcalay Cudad?

⁴ Ano pakingkiwan kiso to Fangcalay Cudad i, haratengen: Micada kiso to ngaˈayay lihaf, makahi minanam to Fangcalay Cudad, paihkalay koni misolotan ni Yihofa kiso, ciharatengay Cingra mala widang tisowanan. (Yohani 6:44; Dmak 13:48) ‘Mikinsaay to falocoˈ no tamdaw’ a Kawas ci Yihofa tada ciharatengay tisowanan. Mafanaˈay Cingra to sakafanaˈaw kiso Cingranan, mitoor to palinian Ningra a maˈorip, tada lipahakay ci Yihofa; maˈaraw Ningra padadotoc kiso misaˈicel, mifalic to niyah, mamasemer Cingra. (Taneng 17:3; 27:11) Pakayni i sapatefoc, wa ngaˈay kiso mala widang ci Yihofaan. (Loma 5:10, 11) Hamaan a mapawan tonini a demak!

5. O pakingkiwan to Fangcalay Cudad sasamaan misakadademak to sapalimoˈot no Filipi 3:16?

⁵ Ano mahaenay i, o pakingkiwan to Fangcalay Cudad sasamaan a paihkal to miakoˈiday ko niyah to sapafeli ni Yihofa a sapatefoc hani? O cecay pakayraan i, tengilen ko sapalimoˈot ni Pawlo itini Filipi 3:16: ‘Ano hakowaay ko kacakatan ita i, doedoen kora malecaday a lalan, masolimet padadotoc a talaˈayaw.’ Mihaenay, ka padadotoc a misaˈicel, aka a papiconaen ko cimacima tamdaw ato maamaan a demak to karomakat iso to midaˈocay ˈorip a lalan.—Matay 7:14; Luka 9:62.

6. O pakingkiwan ano pasangaray micada to kimad no Fangcalay Cudad anca miremo to tatiihay a nanaman i, sasamaan ko pidemak? (Limoˈot 30:11-14) (Nengnengen ko coka.)

⁶ Ano pasangaray kiso micada to mananamay a kimad no Fangcalay Cudad i, sasamaan ko pidemak hani? Ngaˈayay kilimen ko milingatay a lalakaw, ngaˈayho tolonen ci Yihofa padama to niyah ihkal ko kacipinang konini a kimad. (ˈOlic 86:11) Ano mahaen to demak ikor, pasangaranho a micada, aka haharateng han konini a demak, kawra hamaan a sawaden minanam to Fangcalay Cudad. Ano pasangaranho a misawad ko mirikecan no Fangcalay Cudad a tatiihay nanaman, sasamaanto aki? Haratengen, cipinangay ci Yihofa to hakowaay ko ˈicel iso, cowa ka pisaali Cingra to cowa ka madangar iso a demak. Wa ngaˈay kiso mitoor to palinian Ningra a maˈorip. (ˈOsien ko Limoˈot 30:11-14.) Mikiˈokayho ci Yihofa papadama tisowanan. (Isaya 41:10, 13; 1 Korinto 10:13) Mihaenay, aka pisawad! Hamaan haharateng han ko pasangaran nanay miremo to tatiihay a nanaman, ao ceriden a miharateng to maolahay ci Yihofa tisowanan, pakayni tisowanan a kinafalah to Wawa no Niyah. Ano matongal ko olah iso ci Yihofaan, o mamahapinangto ‘o sarikec Ningra cowa ko karetengay a ˈinorong.’—1 Yohani 5:3.a

7. Itiniay soˈlinay kimad a lomahad a kaemangay ngaˈayay misaharaterateng to maanan?

⁷ Itiniay kiso i soˈlinay kimad lomahad a kaemangay han? Ano hatiraay i, o mipakingkiwan to Fangcalay Cudad kiso. O masakalimlaan a pakingkiwan no wama wina kiso. Sowal no Fangcalay Cudad: ‘Ka piingid kamo to Kawas, aingiden no Kawas kamo.’ (Yakop 4:8; 1 Rayray 28:9) Ano talaˈayaw kiso miingid ci Yihofaan, wa mihaen Cingra miingid tisowanan. Ciharateng Cingra tisowanan, cowa ko pakayniay i o Misawacayay Tamdaw ni Yihofa ko wama wina iso, ao makalimay misawidang tisowanan. Pakayni toniya demak midemakay ci Yihofa to maanan aki? Kinafalahay Cingra to ˈorip no Wawa ci Yis. Aka a mapawan toniya masakalimlaan a sapatelong Ningra tisowanan! (Loma 5:1, 2) Anini miheca ˈayaw no Piharatengan a Saˈopo, saharateratengen o manan ko midemakan ni Yihofa aci Yis tisowanan. Miakoˈiday kiso cangranan, o caciharateng micangacang to patosokan i midokoay a demak, misakadademak to hakelong no ˈorip pacoˈay to olah ni Yihofa ato ni Yis.b

O Micadaay to Paputisem a Krisciyang

8. Micadaay to paputisem a Krisciyang samaanay paihkal to miakoˈiday ko niyah to sapafeli no Kawas a sapatefoc?

⁸ Ano micadaayto kiso to paputisem a Krisciyang, itiniay i adihayay a demakan paihkalay to miakoˈiday ko niyah ci Yihofaan aci Yisan to midemakan Nangra. Tinakoen, pakayni sapitooraw to palinian ni Yihofa a maˈorip, malo widang Ningra, midemakay to adihayay nokafalic. Midofdofay to sapalimoˈot ni Yis patenak to ngaˈayay lihaf, pasifanaˈ to tamdaw to soˈlinay kimad. Patafang to tireng ci Yihofaan, micada to paputisem. Roma i, pakayni kiso i pihakelongan miemem to pisafelit alatek. (2 Timoti 3:12) Itini sapalifet padadotoc midoko ci Yihofaan, misawacayay koni to miakoˈiday kiso Cingranan, mipafeli to Wawa malo sapatefoc.—Hipray 12:2, 3.

9. O micadaay to paputisem a Krisciyang maminaˈon to maanan?

⁹ Nikawrira, o micadaayto to paputisem a Krisciyang o maminaˈon to cecay a demak, aka palidlid han mafasaw ko miakoˈiday a falocoˈ. Misamaanay hani? Nengnengen ko tinakoan no saka 1 hahekalan a Ifisoay a Krisciyang. Pakahemekan ni Yis cangra paihkal to mihadidiay, kawra sanayho pasowal: ‘Iraay ko rarikecan ako tisowanan a demak, hayi sanay kiso mifasaw to salakatay a olah no niyah.’ (Paˈarawan 2:3, 4) Mikitini i sowal ni Yis a mahapinang, o pidoko no cecay Krisciyang pakayni kataˈlif no toki malo nanamanto ko pidemak alatek. Alatek mitolonayho cingra, mitosilay, mirienangay to saˈopo, kawra o nanaman aca, cowa ko naitiniay i olah. Ano mahapinang iso cowato ka lecad ko niyah to isaˈayaway a maolah ci Yihofaan, sasamaan ko pidemak hani?

10. Sasamaan kiso midoedo to sapaini ni Pawlo a midemak? (1 Timoti 4:13, 15)

¹⁰ Palimoˈotan ni Pawlo ci Timoti, ka picerid a ‘misimsim’ to midokoay a demak no niyah, ‘misarocodho’ to falocoˈ matayal ci Yihofaan. (ˈOsien ko 1 Timoti 4:13, 15.) Ngaˈayho saharateratengen iso ko niyah itini pidokoan a pakayraan samaanayto ko midemakan, haratengenho ko niyah misamaan ngaˈ ‘tiˈeren ko fangcalay saocor fanekfek ko falocoˈ.’ (Loma 12:11) Tinakoen, pakayni sapisongilaˈaw ko niyah mirienang to saˈopo, wa ngaˈay kiso talaˈayaw misaday to lalakaw han? Pakayni sapilifokaw to epoc mikingkiw i, ngaˈayay kilimen iso awaay ko ˈadeses a kitiraan misongilaˈ a midotim han? Mihaen ko demak iso i, hato patongalay to kasoy i namal, mamiliyaw fanekfek ko piakoˈid iso ci Yihofaan, miakoˈid to sapafeli Ningra a sapatefoc ato roma a sapalemed. ˈAyaw no Piharatengan a Saˈopo, ngangaˈay misongilaˈ kiso miharateng, malo finawlan ni Yihofa malifokay iso ko maanan a mikiriwiˈay a sapalemed. Mihaen mamatongal to piakoˈid kiso to sapafeli ni Yihofa a sapatefoc, ho ngaˈay mala widang Ningra kiso.

11-12. Ano cowato ka malecad to isaˈayaway a fanekfek ko niyah, saan kiso miharateng, o paihkalay koni to malahdaway ko fangcalay saocor iso han? Tadtaden hena. (Nengnengen ko coka.)

¹¹ Itini midokoay a demak ano cowato ka lecad ko isaˈayaway ko niyah a fanekfek, saan kiso a miharateng, aka a matoled, malahdawayto ko fangcalay saocor i niyahan, aka ka saan. Haratengen ko sowal ni Pawlo i Korintoay a Krisciyang. Masowal ko mitosilay tayal i, sanay cingra: ‘Soˈlinto cowa ka toor ko misahalakaan ako, kamayan mapatorod kako to misimaway a tayal.’ (1 Korinto 9:17) O manan ko tatodong noniya sowal ningra hani?

¹² Nolatekay awaay ko harateng ni Pawlo sapitosilaw, kawra kamayan a kiemel padadotoc a mitosil, soˈlin itiya caka ciharateng cingra sapihaenaw to demak, kamayan padadotoc milasil to ngaˈayay lihaf. Wa ngaˈay pahecad kiso toni Pawlo a misaˈosian, soˈlin awaay ko saloˈingaw kamayan midemak to matatodongay a demak. Ka pitolon micangacang ci Yihofa padama tisowanan ‘ira ko kalim no falocoˈ halo ira ko ˈicel a midemak.’ (Filipi 2:13) Ka pisaˈicel padadotoc to ngaˈayay nanaman i pidoko. Soˈlinay haw i, padadotocay kiso maolah ci Yihofaan. Ano kiemel kiso midemak to matatodongay a demak i, cecay liyad ikor, wa miliyawto fanekfek ko falocoˈ no miso.

13. Sasamaan kita padadotoc mikinsa to niyah to o ‘mitawmec to pihakelongan hokira’?

¹³ 2 Korinto 13:5 sanay: ‘Ka padadotoc kamo a mikinsa to niyah mitawmec to pihakelongan hokira, padadotoc mihapinang to masamaanay a tamdaw ko niyah.’ Soˈlinayto, oha mamikinsa kita to niyah. Ngaˈayay licayen ko niyah: O midokoay a demak paisalakatan ako itini i nokaˈorip ako han? (Matay 6:33) O mipiliˈan ako a lawla paikalay to ˈintehay kako to mariˈangay a demak han? (ˈOlic 97:10) Micowatay kako to dipayal, padadotoc a misaˈicel makakedec to salikaka han? (Ifiso 4:2, 3) Piharatengan to Kinafalah ni Yis a Saˈopo papisaharateratengay kitanan konini a salicay. Midotim kita to na midemakan ni Yihofa aci Yis kitanan a kihcod, ciharatengayto sapaihkalaw to miakoˈiday a harateng ci Yihofaan, halo tano waywayan a misawacay to cowato ko pakayni to niyah a maˈorip, ao pakayni to Tatapangan ci Yisan a maˈorip.c

Moraraway Lopayˈay a Siri

14. O roma Krisciyang pakayniay i manan a lalangian cato ka picawmaˈ to kasakopang?

¹⁴ O roma na madimadiay a Krisciyang cowato ka macacawmaˈ to kasakopang. Hano haenen cangra hani? O roma i, pakayniay i pakidemay ko ‘cariraw no kaˈorip,’ (Luka 21:34) o roma i, pakayniay i sasowalen no salikaka a mapolin, (Yakop 3:2) o roma i, midemakay to pakidemay a raraw, kawra cowa pikilim to sapadamaaw. Ano pakayniay kiso to mahaenay a lalangian a miraay to kasakopang, malecad o miliyasay to pasirian no Kawas, sasamaan ko pidemak iso hani? Midotim to pakaynian ni Yihofa ci Yisan a sapatefoc ato olah Nangra, misamaan a padama tisowanan hani?

15. Samaanay ko demak ni Yihofa paihkal to ciharatengay Cingra to moraraway a lopayˈay siri? (Icikil 34:11, 12, 16)

¹⁵ Haratengen hena, samaanay ko pinengneng ni Yihofa to moraraway a lopayˈay siri. Cowa ka keter Cingra cangranan, cowa ka mapawan cangranan. Soˈlinay i, talaˈayaway Cingra mikilim cangranan, padama cangranan minokay, halo pakaen cangranan. (ˈOsien ko Icikil 34:11, 12, 16.) Mahaenay ci Yihofa micada tisowanan hokira? Hayi! Nengnengen iso konini a lalakaw o paihkalay maolahay kiso to moecelay. Isalakat o kemod no falocoˈ iso ko minengnengay ci Yihofa, mansa misolotay tisowanan micomod to pasirian Ningra. Nohatini, mahecaday maˈaraw Ningra ko kemod no falocoˈ iso, mansa papinokay tisowanan.

16. O manan ko papadama to moraraway lopayˈay siri, minokay i tatihi ni Yihofa? (Nengnengen ko coka.)

¹⁶ “Patikol Tayni Tatihi ni Yihofa” oniya kihpicay casi iraay ko padihekoay to falocoˈ a sowal: “Aka calemcem, ano minokay i tatihi ni Yihofa, o papadamaen ni Yihofa kiso. Paˈicelen Ningra kiso misiˈayaw to pasangar no kaˈorip, ho ngaˈay misodod to midokaˈay tisowanan a tamdaw, ho miliyaw ira ko tingalaway falocoˈ, ira ko rihaday no falocoˈ. Ikor, mahecad kiso to isaˈayaway, kalacafay to salikaka midoko ci Yihofaan.” Roma haratengen, sapipadamaaw ko malohemay malitengay tisowanan. Ngangaˈay cangra malo ‘pikiˈadingan to faliyos ato ˈorad a kitiraan’ no miso. (Isaya 32:2) Pafelian ni Yihofa kiso to sapatefoc, coko aakoˈiden iso Cingranan han? Mankora haratengen: “Sapinokayaw i tatihi ni Yihofa, sasamaan kako nohatini midemak hani?” (Isaya 1:18; 1 Pitiro 2:25) Tinakoen, ngaˈayay kiso tayra i Kasaˈopoan mirienang to saˈopo han? Ngaˈayay rinnaken iso to cecay malohemay malitengay, mipadama tisowanan han? Alatek limasmasen ningra to salikaka malacafay tisowanan malalengo to Fangcalay Cudad to cecay liyad. Misaˈicel kiso tano waywayan paihkal to miakoˈiday ko niyah to sapafeli ni Yihofa a sapatefoc, wa palemeden Ningra kiso.

Sasamaan ko Caˈof Iso?

17-18. Anini a miheca ˈayaw no Piharatengan a Saˈopo, wa ngaˈay kita misakadademak to toki midemak to maanan?

¹⁷ Sowal ni Yis, miocoran ni Yihofa cingra tayni i fafekang no sera mikinafalah to ˈorip, pakayniay i ‘eca ka mapalaˈafo ko polong pakasoˈlinay Cingranan a tamdaw, ao wa milifok to midaˈocay a ˈorip.’ (Yohani 3:16) O sapatefoc i, o sapilidong ni Yihofa kitanan mihepol to raraw ato patay a pakayraan. Aka a mapawan kita, o sapatefoc o masakalimlaan a sapatelong. (Loma 3:23, 24; 2 Korinto 6:1) Ngaˈayay kita i ˈayaw no Piharatengan a Saˈopo, misimsim to paihkalan ni Yihofa aci Yis kitanan a olah, nanay o olah Nangra micoloh kitanan, tano olah patikol to olah.

¹⁸ Sasamaan ko caˈof iso to sapafeli ni Yihofa a sapatefoc? O sapacaˈof iso alatek cowa ka lecad tono tao. Wa pakasoˈlinen iso, kiso ato masacaˈolay masaefanay a tamdaw malacafay misaˈicel midoko ci Yihofaan, ‘cowa pakayniay i niyah a maˈorip, ao pakayniay to patadoay [kitanan] a mapatay, ikor patikolay maˈorip a Tapang a maˈorip,’ mamilifok to sapalemed ni Yihofa.—2 Korinto 5:15.