Hano Misaali Kita to Sapatefoc Hani?

1-2. Misamaanay hano misaali kita to sapakaˈoripaw? (Loma 7:22-24) (Nengnengen ko coka.)

HARATENGEN hena: Fahal sanay mapiliw ko lomaˈ, mapaekelay ilalomaˈ ko cecay tamdaw. Soˈlin maˈoripayho cingra, kawra mapaekelay ko tireng ningra, awaay ko pakayraan a miliyas. Edengan waho sanay cingra a miowaw, nanay ira ko tamdaw padama cingranan.

² Kita kahacecay tamdaw mahecaday to misowalan isawni. Misamaanay hani? Samanen mitowakangay ci Atam to Kawas ikor malo mararaway a tamdaw, mirocokan no emin a teloteloc ko raraw ningra. Telocto i, karetengay ko pipaekel no raraw to emin a tamdaw, mahecaday mapaekelay no mapelalayto a lomaˈ, awaay ko pakayraan a miliyas. Itini Loma a cudad, mitadtaday ci Pawlo tada pakidemay ko pifiyor no raraw to tamdamdaw. (ˈOsien ko Loma 7:22-24.) Ihkalay mahapinang ningra, karetengay ko mipaekel no raraw to niyah, mansa miowaway cingra: ‘O cima ko mamipaˈorip takowanan paliyas toniya mamapatay a tireng hani?’ Mafanaˈay ci Pawlo, ano cowa ka mapaˈorip i, o patay aca ko mitalaan. (Loma 6:23) Nohatini mahecaday ko pakayraan ita. Tada misaaliay kita to sapakaˈoripaw!

3. O sapatefoc sasamaan a mipaˈorip kitanan hani?

³ Soˈlin pakayni i raraw, hato awaay ko hatokel no tamdamdaw a matoleden. Kawra o piowaw ni Pawlo to ‘cima ko papaˈorip takowanan,’ ikor, tanoktokay ko pakasoˈlinay falocoˈ ningra a pasowal: ‘Koˈiday to Kawas pakayni Tatapangan ita ci Yis Kristo mapaˈorip kako!’ (Loma 7:25) O misowalan ni Pawlo i, oya mipatafangan ni Yis a sapatefoc.a Kawra o sapatefoc sasamaan a mipaˈorip kitanan hani? Toloay ko pakayraan. (1) Mamasodod ko raraw no mita, (2) wa mapaadah kita, mamapatikol malo malefotay ko tireng ato falocoˈ, (3) malakangaˈay kita ato Kawas. Oniya lalakaw mamilengo toniya toloay kalimlaan, ano midotim kita toniya demak i, mamangalef ko nika olah ita ci Yihofaan, samanen o ‘pafeliay to hatokel a Kawas’ Cingra. (Loma 15:13) O roma i, mamangalef ko nika olah ita ci Yisan, samanen ‘pakayniay toniya Wawa, matedal kita pakayniay i sapatefoc ningra.’—Kolosay 1:14.

Pakayniay i Sapatefoc ni Yis wa Masodod ko Raraw no Mita

4-5. Kita kahacecay tamdaw misaaliay to sasodod ni Yihofa, misamaanay hani? (Patnakay 7:20)

⁴ Kita kahacecay tamdaw sahtoay cowa ko malefotay, mararaway itini waywayan anca i sasowalen. (ˈOsien ko Patnakay 7:20.) Mansa, misaaliay kita to sasodod ni Yihofa. Itini Rikec ni Mosi, maˈodangay ato mipatayay to tamdaw, o pakidemay a raraw, o papatayen ko pisawkit. (Lifi 20:10; Saˈosi 35:30, 31) Soˈlin cowa ka pakidem ko romaroma raraw, kawra i pinengneng ni Yihofa i, mahecaday o raraw. Na somowalay ci Tafiti i ˈOlic: ‘Wa minaˈon kako to rakat ako, eca ka mararaw ko sema ako.’ (ˈOlic 39:1) Ihkalay konini, ano somowal kita i, wa mararaw alatek.—Yakop 3:2.

⁵ Iraay ko hatiniay iso a nalifetan han? Na somowalay kiso to pina a sowal ikor, hato cowa ka ngaˈay mihaen a somowal. Anca midemak to roma a demak ikor, cowa ka ngaˈay koniya demak, nanay hato cowa ka demaken. Iraay ko hatiniay a nalifetan ita alatek. Sanay ko Fangcalay Cudad: ‘Awaay ko raraw ako ano saan kita a somowal i, o misamangahay kita to niyah, awaay ko soˈlinay kimad i falocoˈ no mita.’—1 Yohani 1:8.

6-7. O manan a lalangian ni Yihofa wa masodod ko raraw no mita? (Nengnengen ko coka.)

⁶ Tada makalimay ci Yihofa misodod kitanan, kawra o masadafdafay Cingra, misaaliay to matatodongay a lalangian ngaˈ ngaˈay misodod kitanan. Mihaenay i, o patafangan ni Yis a ˈorip, o matatodongay a lalangian Ningra. (Ifiso 1:7) Kawra milimasmasan ni Yihofa ko sapatefoc ni Yis, cowa ka pikihar to raraw no mita han? Anca padadotoc kita mararaw wa ngaˈay han? Cowa ka saan. Soˈlinay haw i, ˈintehay ci Yihofa to raraw.—Isaya 59:2.

⁷ Pakayni i Rikec ni Mosi, sapicadaaw to sasodod ni Yihofa, mapatafang ko Israil tamdaw to pinaˈorip malo sapatoˈaya. (Lifi 4:27-31; 17:11) Paihkalay koniya limasmas, misaaliay ko tamdamdaw to sangaˈayay a sapatoˈaya, oya malefotay a ˈorip ni Yis. Pakayni sapatefoc ni Yis, makahiay ci Yihofa misodod kitanan. O roma i, pakayni kinafalahan ni Yis a ˈorip, oha mamacada ita ko adihayay a sapalemed. Mikitini mitilidan ni Pawlo a tikami to Korinto a Krisciyang cipinangayto kita, mafanaˈay cingra to tada ciepocay koniya sapalemed. Ya pasowal ci Pawlo to midemakan nangra a mariˈangay demak, ikor mifanaˈ ci Pawlo cangranan: ‘Kamo . . . Nohatini pakayni i ngangan no Tapang ita ci Yis Kristoan, mitiˈer to fangcalay saocor no Kawas no mita, maherekayto misawsaw a makorac, malo fangcalay, pangangan to moecelay a tamdaw.’—1 Korinto 6:9-11.

8. ˈAyaw no mirienang to aniniay miheca Piharatengan to Kapatay ni Yis a Saˈopo i, o manan ko haharatengen iso hani?

⁸ ˈAyaw no mirienang to aniniay miheca Piharatengan to Kapatay ni Yis a Saˈopo i, saharateratengen iso, sapicadaaw to sasodod ni Yihofa, o manan ko tatodong i tisowanan. Tinakoen, isaˈayaw mararaway kiso, nohatini i, naifalocoˈanto a pasasiyor, akato aira sa ko kiyam no falocoˈ, samanen pakaynianto ni Yihofa to sapatefoc ni Yis misodod tisowanan. Kawra o falocoˈ iso cowato ka rihaday, samaanto hani? Alatek saan kiso: “Mafanaˈay kako pakaynianto ni Yihofa to sapatefoc misodod takowanan, nikawrira cowa ko mamisodod kako to niyah.” Ano mahaenay ko harateng iso i, aka mapawan: Mamicada kiso to sasodod ni Yihofa hokira, o fadangalan ni Yihofa koni; hanaca o sapisawkit a fadangalan patorodan no Kawas ci Yis. Kiso ato roma tamdaw awaay ko fadangalan a misaˈosi, o cima ko ngangaˈay micada to sasodod no Kawas. Sanay ko Fangcalay Cudad: ‘Ano itini kita i tedi romakat i, mahecaday to itiniay i tedi no Kawas . . . O remes no Wawa Ningra ci Yis mikoracay to kihcod a raraw no mita.’ (1 Yohani 1:6, 7) Oniya sinael mahecaday to roma soˈlinay kimad no Fangcalay Cudad, ngangaˈay pakasoˈlinen! O sapatefoc misalalangiay to Rikec no Kawas, mansa ngaˈay sododen ni Yihofa kita, makalimay ci Yihofa mihaen ko demak, samanen sanay ko Fangcalay Cudad, ‘makahiay [Cingra] misodod to tamdaw.’—ˈOlic 86:5.

O Sapatefoc ni Yis wa Mapaadah Kitanan

9. O tatodong no “raraw” oya mararaway a waywayan, o mananho ko mitoroˈan hani? (ˈOlic 51:5, ato roma pihongyak.)

⁹ Itini Fangcalay Cudad, tatodong no “raraw” hananay i, iraay ko mararaway a waywayan, mahawpayho o ciraraway a pakayraan, tatodong i, hofoc han cirarawayto ko tireng. (ˈOsien ko ˈOlic 51:5, ato roma pihongyak.) Mihaenay i, iraay ko mararaway a harateng, cidangocayto ko tireng ato falocoˈ. Telocto i, adadaayto, mamaliteng mamapatay ko tamdamdaw. Soˈlin hofoc han ko ˈengaenga, cowaho ka mararaw i, pakayniay i ciraraway a pakayraan adada anca hofoc han mapatayayto. O roma i, ano ngaˈayay tamdaw anca mariˈangay tamdaw wa taharoray, salikor i, mapatayto. Mirocokay kita to nano raraw ni Atam, mansa mamilifet kita to mahecaday a demak.

10. Ya mararaw ci Atam aci Ifa ikor, samaanay a milingat cangranan?

¹⁰ Saharateratengen, ya mararaw ci Atam aci Ifa ikor, samaanay a milingat cangranan. Pakidemay ko nika rawraw no falocoˈ nangra. Mitowakangto to Kawas cangra ikor, ‘matiliday i falocoˈ nangra’ a rikec milifetayto cangra to teloc no mararaway. (Loma 2:15) Cowato ka rihaday ko makapahay falocoˈ nangra, mikilimay to sapitahepo to tireng nangra a dafong, milimekayho, matalaway maˈaraw ko Kawas. (Satapangan 3:7, 8) Masangaˈ ci Atam aci Ifa ikor, sakinacecay ira ko hatiniay a harateng, cikiyamayto ko falocoˈ nangra, cariraway, cowato ka rihaday, marorayay, mangodoayto, tahira i kapatayan nangra a romiˈad, kamayan ira ko hatiniay marawraway falocoˈ nangra.—Satapangan 3:16-19.

11. O raraw samaanay milingat kitanan hani?

¹¹ Mahecaday toni, milingatay ko raraw kitanan. Pakayni i raraw, matomesay ko roray itini tireng ato falocoˈ ita. Ano misamaanto ko ˈicel no mita i, sapisalofaw to pakayraan no niyah, citolasay ko ˈicel ita. Misamaanay hani? Samanen sanay ko Fangcalay Cudad, ano misamaanto ko pisaˈicel i, awaay ko kapo. (Loma 8:20) Soˈlinayto, mahecaday ko polong a tamdaw. Haratengen, misaˈicelay ko tamdaw a sapidipotaw to kaˈorip ita a pala, sakairaaw ko rihaday a kaˈorip, malahdaw to nikaw, micowat to dipayal, ˈarawhan i, citolasay ko ˈicel. Kawra pairaay to hatokel ko sapatefoc ni Yis kitanan. O manan a hatokel hani?

12. O sapatefoc ni Yis pairaay to maanan a hatokel hani?

¹² O sapatefoc ni Yis pairaay to maanan hatokel hani? Sanay ko Fangcalay Cudad: ‘O mamatedalto ko masangaˈay a maamaan, cowato ka mahaen ko koli, mapalit no mamanahol a tireng.’ (Loma 8:21) Itini noikor a faelohay hekal, pakaynian no Kawas ko sapatefoc ni Yis patikol to malefotay ˈorip ita. Wa awato ko adada no falocoˈ ato tireng, cato ka cikiyam ko falocoˈ ita, cariraw, marawraw, maroray, mangodo. O roma i, misaˈicelay midipot to kaˈorip ita a kitiraan, micowat to dipayal, itini pikowan no Paˈoripay a Tatapangan ita, ‘Dipayalay a ˈAˈideman’ ci Yis Kristo, aira ko makapahay a minaroˈan.—Isaya 9:6, 7.

13. ˈAyaw no mirienang to aniniay miheca Piharatengan a Saˈopo, mamidotim kiso to maanan?

¹³ Songilaˈen a miharateng, ano cato ka ˈimer no raraw i, samaanto ko kaˈorip iso hani? Haratengen hena, itini faelohay a hekal, pacerem kiso a lomowad i, cowato ka alemˈemay ko tireng, sinowayayto ko falocoˈ iso, cowato ko cacalemcem to macahiw ko niyah ato paro no lomaˈ, cato ka calemcem to adada anca mapatay. Ano hatinito i, rarihadayto ko falocoˈ iso. Samanen ‘mikedecay kiso mimetmet to . . . ikaˈayaway a hatokel,’ oniya hatokel ‘malecaday to ˈenor no ˈorip, o soˈlinay ngaˈayho tiˈeren.’ (Hipray 6:18, 19) O ˈenor patanoktokay to tamina, o sapatefoc malecaday to ˈenor patanoktokay to pakasoˈlinay falocoˈ iso, paˈicel tisowanan miemem to sapalifet, mihadidi a mitala to faelohay hekal. Ano o mananto ko masiˈayaway a pasangar, wa ngaˈay kiso pakasoˈlin ‘papalifonen [ni Yihofa] ko mingitangitay micangacangay Cingranan a tamdaw.’ (Hipray 11:6) Pakayni sapatefoc, nohatiniho micadato kiso to sahinom, noikor ira ko makapahay a hatokel!

O Sapatefoc Malakangaˈay Kita ato Kawas

14. Pakayni i raraw, samaanayto ko kalalaˈed ita to Kawas? Hano mahaen hani?

¹⁴ Mararaway ci Atam aci Ifa ikor, cowato ka ngaˈay ko kalalaˈed no tamdaw ato Kawas. Somowalayho ko Fangcalay Cudad, masongilaˈay to maketon ko kalalaˈed no tamdaw ato Kawas. (Loma 8:7, 8; Kolosay 1:21) Misamaanay hano mahaen hani? Samanen malefotay tada fangcalay ci Yihofa, cowa ka pihayda to masakenakenaay a raraw ato tatiihay a demak Cingra. Pakayni ci Yihofaan saan ko Fangcalay Cudad: ‘Tada makoracay, awaay ko dangoc Iso, cowa ka eca ka pisikor to mariˈangay waywayan, cowa ka pihayda to mariˈangay a demak.’ (Hapakuk 1:13) Ano tano sapatinako a mitadtad i, mahecaday o taˈangayay ˈalo ko raraw, kalacinowasay to kalalaˈed ita to Kawas. Ano awaay ko taˈangayay a kayakay, awaay ko pakayraan ita milakowit toniya taˈangayay a ˈalo, tatodong i, cowa ka ngaˈay kita miingid ci Yihofaan. O sapatefoc ni Yis mahecaday tora taˈangayay a kayakay, o ngangaˈay panokay kitanan itini katihi ni Yihofa, ho ngaˈay malakangaˈay ko kalalaˈed Cingranan.

15. O sapatefoc samaanay mifasaw to ngolaw ni Yihofa hani? Pairaay to masamaanay makapahay a minaroˈan?

¹⁵ Sanay ko Fangcalay Cudad, ‘pakaynian [ni Yis] ko raraw ita malo mingitangit to sidaˈit a sapatoˈaya.’ (1 Yohani 2:2) O roma pihongyak sanay, ‘mifasaw to ngolaw no Kawas.’ Kawra o sapatefoc sasamaan a mifasaw to ngolaw ni Yihofa hani? Mapatay ko Wawa no niyah ngaˈ, mafasaw ko ngolaw han? Cowa ka saan. Samanen o masadafdafay a milimasmas ko sapatefoc, matatodongay to moecelay a palinian ni Yihofa, mansa mafasaway ko ngolaw Ningra. Iraay ko sapatefoc, cowa ka lefot a tamdamdaw wa ngaˈayto miliyaw miingid ci Yihofaan. (Loma 3:23-26) ˈAyaw no patafang ci Yis to ˈorip ningra i, o madimadiay a sikawdan citatodongay malo moecelayto a tamdaw, sanay ko ‘pinengneng’ ni Yihofa. (Satapangan 15:1, 6) Misamaanay hani? Samanen pakasoˈlinay Cingra to Wawa no Niyah ci Yis, mamipatafang to ˈorip ningra mala sapatefoc. (Isaya 46:10) O sapatefoc pairaay to hatokel no tamdamdaw, wa ngaˈayto kita malakangaˈay to Kawas.

16. ˈAyaw no mirienang to aniniay miheca Piharatengan a Saˈopo, mamidotim kiso to maanan? (Nengnengen ko coka.)

¹⁶ Wa ngaˈay kiso miharateng, malakangaˈay to Kawas, sasamaan a ciepoc kiso. Tinakoen, ngangaˈay mala ‘widang’ kiso ci Yihofaan, anca mahecad to sapasifanaˈ ni Yis o ‘Wamato’ ko Kawas. (Matay 6:9) Ya malo widang anca Wama han ci Yihofa i, paihkalen ko misapoeneray waywayan ato misakaretengay a mikangodo. Misamaanay hani? Samanen sahtoay o ciraraway a tamdaw kita, ngaˈayay ingiden ita ci Yihofa, sahtoay o pakayniay i limasmas ni Yihofa to sapatefoc, cowa ko ˈicel no mita. Sanay ko Fangcalay Cudad: ‘Pakaynian [ni Yihofa ci Yisan] itini pisemseman no hecek a milakisan a remes, micowatto to sakalangaˈay, ho . . . wa ngaˈay pakayni ci Yisan a malakangaˈay to Kawas.’ (Kolosay 1:19, 20) Mihaenay i, soˈlin cowaho ka lefot kita nohatini, kawra kamayan kita ngaˈay miingid ci Yihofaan.

O Sapatefoc Patalahkalay to Sidaˈit ni Yihofa

17. O sapatefoc samaanay misawacay to kadofahay a siniˈada ci Yihofa hani? (Ifiso 2:4, 5)

¹⁷ Pakaynian ni Yihofa to sapatefoc misawacay to ‘kadofahay to siniˈada’ a Kawas ko Niyah. ‘Pakayniay kita i raraw, soˈlinay i, o mapatayay kita, kawra pakaynian no Kawas to sapatefoc ‘miliyaw a mapaˈorip’ kita. (ˈOsien ko Ifiso 2:4, 5.) Oya ‘iraay ko moecelay waywayan, ngaˈay milifok to midaˈocay ˈorip a tamdaw,’ samaanen nangra ko demak hani? Mahecaday cangra to mapaekelay no mapiliway a lomaˈ, milalingay to adada, mafanaˈay cangra to misaaliay to sapadama, orato i, miwahoay nanay ira ko tamdaw a paˈorip. (Dmak 13:48) Samaanan ni Yihofa pacaˈof cangra hani? Ora pakayraan i, patengilan no Kawas cangra to ngaˈayay lihaf no Kitakit no Kawas, o roma, padamaho cangranan ira ko sifanaˈ ni Yihofa ato Wawa Ningra ci Yis Kristo. (Yohani 17:3) Isalakat ci Satan saan, mikayhid cingra ci Atam aci Ifaan a mararaw i, oha mamiconged to araaw no Kawas a malaˈosi, ˈarawhan i, taˈangayay ko raraw ningra!

18. Pakayni to sapatefoc, o manan ko haharatengen ita?

¹⁸ Soˈlin itini toniya lalakaw somowalay o sapatefoc pakayni kitanan iraay ko epoc. Kawra haharatengen, o sapafeli ni Yihofa a sapatefoc, cowa ko pakayniay aca to sapaˈoripaw kitanan. Mihaen Cingra to demak iraay ko masakalimlaan a lalangian, oha papacaˈof to mikidatan ni Satan a lacongis itini i Itin. (Satapangan 3:1-5, 15) Mikitini i raraw ato patay paˈorip ci Yihofa kitanan, misawacayay to matomesay ko olah a Kawas Cingra. Pakayni i sapatefoc, pakayniay ci Yihofa to ngangan no Niyah mifalah to kihcod a kadit, mala fangcalay to ngangan no Niyah. Akoˈiden ko mikiriwiˈay a sidaˈit ni Yihofa, soˈlin o ciraraway tamdaw kita, kawra malikoay kita malacafay Cingranan pacaˈof to sasa ni Satan. (Taneng 27:11) Miakoˈiday kiso to sapafeli ni Yihofa to sapatefoc han? Ano mihaenay i, mamisamaan kiso paihkal to miakoˈiday a falocoˈ hani? Nengnengen ko dotoc a lalakaw.