Wa Malowid Iso ko Masofaway a Falocoˈ!

1-2. Nolatekay iraay ko masamaanay a harateng ni Pawlo hani? Iraay ko manan malecaday a pakayraan ita ci Pawloan? (Loma 7:21-24)

PAKAYNI i tarokos ci Pawloan, maharatengay iso ko manan hani? Maharatengay to fanekfekay cingra tayra icowacowa a mitosil, mikimad to mitemeray to falocoˈ a kimad, hanaca adihayay ko mitilidan ningra maloloday a Fangcalay Cudad. O timoloay madimadiay a Krisciyang ci Pawlo. Kawra iraay ko katoledan no falocoˈ ningra. Malecaday cingra kitanan, mamicoˈay to masofaway a falocoˈ.

² ˈOsien ko Loma 7:21-24. O sapatikami ni Pawlo to itiniay i Loma a Krisciyang, masowalay ko kacarirawan ningra a demak. Anini ˈalomanay a tamdaw iraay ko mahecaday ningra a harateng. Soˈlin madimadiay cingra, makalimay sapitooraw to araaw ni Yihofa a midemak, kawra iraay ko sakararawaw a harateng ni Pawlo, mansa tada marorayay cingra. Cowa aca marorayen ko falocoˈ, nolatekay maharatengay ni Pawlo ko mararaway no niyah isaˈayaw a makesem, anca pakayni i halafinay a pasangar a marorayen ko falocoˈ.

3. Oniya lalakaw mamilengo to manan? (Nengnengen ko “Sapitadtad a Sowal.”)

³ Soˈlin marorayay ko falocoˈ ni Pawlo nolatekay, kawra cowa ka pafiyoren ningra ko masofaway a falocoˈa to niyah. Nolatekay hano marorayay ko falocoˈ no niyah saan ko harateng ni Pawlo hani? Sasamaan cingra misiˈayaw to masofaway a falocoˈ hani? Sasamaan kita malaˈosi pakalowid to masofaway a falocoˈ hani? Oniya lalakaw papacaˈof tonini a salicay.

Hano Ira ko Masofaway a Falocoˈ ni Pawlo Hani?

4. Na midemakay ci Pawlo to manan pakesemay cingranan a demak?

⁴ O raraw isaˈayaw. O roma ngangan ni Pawlo i, ci Sawlo, ˈayaw no malo Krisciyang cingra, adihayay ko midemakan to pakesemay cingranan a demak. Tinakoen, itiya tano fakelohen no tamdaw mipatay ko madimadiay a Stifano i, itatihiay cingra a minengneng, hanaca midamaay cangranan mihaen to demak. (Dmak 7:58; 8:1) Roma i, pakidemay cingra mikariˈang a mihakokay to Krisciyang.—Dmak 8:3; 26:9-11.

5. Pakayni na midemakan ningra isaˈayaw a demak, samaanay ko piharateng ni Pawlo hani?

⁵ Ikor malo Krisciyangayto ci Pawlo. Kawra latekay pakayni noka riˈang ningra mihakokay to nisawawaan ni Yis makeseman nanay ko harateng. Halafinay a mala Krisciyang cingra, mangalefay ko kasomad ningra. Maedeng i Kongyen 55 miheca, mipatikamiay ci Pawlo to Korintoay kasakopang sanay: ‘Awaay ko tatodong ako malo tarokos, samanen na mihakokayay kako to kasakopang no Kawas.’ (1 Korinto 15:9) Medeng ikor no 5 miheca, patikamiay ci Pawlo to Ifiso kasakopang sanay: ‘Ilalomaˈ no polong a fangcalay finawlan, ano sasafaayto cowa pakalini kako.’ (Ifiso 3:8) Ikor patikamiay ci Pawlo ci Timotian, sanay somowal to niyah, na ‘mipakaditay to Kawas, mihakokay to tamdaw, pakangodo to tamdaw,’ ‘o satatiihay no ciraraway a tamdaw.’ (1 Timoti 1:13) Haratengen hena, milisoˈ ci Pawlo to kasakopang i, maˈaraw ko na mihakokayay ningra a salikaka ato paro no lomaˈ nangra i, hakowaay ko nika ngodo a miroroh to niyah hani?

6. Pakayniayho ci Pawlo to manan a demak a macarirawen? (Nengnengen ko ilaenoay safanaˈ.)

⁶ O cecay “ceka” no tireng. Sowal ni Pawlo pakayniay cingra i cecay demak a macarirawen, hato ‘macekaay ko tireng.’ (2 Korinto 12:7) Cowa ka somowal cingra tonini a “ceka” o adada no tireng, anca roma a pasangar, kawra ano tano “cekaan” ni Pawlo patinako ko pasangar ningra, paihkalay koni pakayni toniya demak, tada marorayay cingra.b

7. Pakayni noka cowa ka lefot samaanay mifiyor ci Pawloan hani? (Loma 7:18, 19)

⁷ Cowa ka lefot ko tamdaw. O mamiˈodot ci Pawlo to dangoc no niyah. (ˈOsien ko Loma 7:18, 19.) Soˈlin makalimay cingra midemak to matatodongay a demak, kawra nolatekay cowa pakadangar, samanen cowa ka lefot ko tamdaw. Sanayho cingra, sapicoˈayaw to mararaway a coos, kiemel midemak to matatodongay a demak, oha padadotoc cingra a misaˈicel. (1 Korinto 9:27) Soˈlin mahaen, nolatekay kamayan a mararaw cingra. Haratengen hena, oya misaˈicelan ningra miremo a dangoc miliyawho a masadak i, masomadan nanay a matoled cingra.

Samaanay ci Pawlo Misiˈayaw to Masofaway a Falocoˈ?

8. Mikitini tikami ni Pawlo mahapinang, alatek tano manan a pakayraan cingra miremo to dangoc no niyah hani?

⁸ Sapisiˈayawaw to masofaway a falocoˈ, misaˈicelay ci Pawlo miremo to dangoc no niyah. Hano mafanaˈ kita hani? Mikitini i tikami ni Pawlo mahapinang, misongilaˈay a misimsim to fangcalay saocor sasamaan padama cingranan ato salikaka, micoˈay a pakalowid to mararaway a coos. (Loma 8:13; Kalatiya 5:16, 17) Marariday ci Pawlo a somowal, cowa ka ngaˈay ko Krisciyang midemak to maanan mararaway a demak ato waywayan. (Kalatiya 5:19-21, 26) Palimoˈotay ci Pawlo to Krisciyang, paihkalay koni, o mamihaen ko niyah a midemak. Maedeng marariday cingra mikinsa to dangoc no niyah, micangacang to sakayat no Fangcalay Cudad, mihapinang o manan ko hadademaken ngaˈ milifok to pihayda ni Yihofa.

9-10. O manan ko padamaay ci Pawloan miremo to masofaway a falocoˈ? (Ifiso 1:7; nengnengen ko coka.)

⁹ Soˈlin nolatekay matoleday a masomad ci Pawlo, kawra ngaˈayho cingra mikitini i adihayay a demakan milifok to lipahak. Tinakoen, matengil ningra ko lihaf no roma kasakopang, lipahakan nanay. (2 Korinto 7:6, 7) Mikitini kalawidang to salikaka, milifokay cingra to lipahak. (2 Timoti 1:4) Roma i, ngaˈayayho cingra ‘tano tingalaway makapahay falocoˈ’ midoko to Kawas, mafanaˈayho to mihaydaan no Kawas cingra, mansa lipahakay cingra. (2 Timoti 1:3) Soˈlin mapalit itini Loma a tatokian, kamayan ci Pawlo pakalalok to salikaka ‘ka pakayni i Tapang mararid a mahemek.’ (Filipi 4:4) Mikitini kita toniya sowal ni Pawlo ngaˈay mahapinang, cowa ka mafiyor no masofaway a falocoˈ cingra. Paihkalay konini, ano ira ko masofaway a harateng i, misamacayay ci Pawlo to lipahakay a demak, palipahak to niyah.

¹⁰ Ngaˈay ci Pawlo pakalowid to masofaway a falocoˈ, o roma lalangian i, o sapatelong no Kawas ko sapatefoc cingranan. (Kalatiya 2:20; ˈOsien ko Ifiso 1:7.) Pakasoˈlinay cingra ci Yihofaan pakayniay i sapatefoc misodod to raraw ningra, hanaca padadotoc mihaen to demak. (Loma 7:24, 25) Mihaenay, soˈlin iraay ko dangoc ni Pawlo, na midemakayho to pakidemay a raraw, kamayan cingra lipahak a midoko ci Yihofaan.—Hipray 9:12-14.

11. O tinakoan ni Pawlo hano ngaˈay pakalalok kitanan hani?

¹¹ Malecad ci Pawloan, alatek wa maroray kita a misaˈicel ngaˈ, itini haratengan, sasowalen ato waywayan malecad to palinian ni Yihofa. Saan kita miharateng alatek: “Tada marorayayto kako!” saan. Ci Ilisac o tosaay poloˈ ko pina mihecaan a fafahiyan salikaka, somowalay cingra to harateng no niyah: “O tinakoan ni Pawlo tada pakalalokay takowanan. Cowa ko kako aca ko mahaenay a harateng. Mikitini nalifetan ningra mahapinangay ako, tada cipinangay ci Yihofa to pasangar no finawlan no Niyah.” Mihaenay sasamaan ko demak ita ngaˈ mahecad ci Pawloan, soˈlin nolatekay masofaw ko falocoˈ, kawra kamayanho tano tingalaway makapahay falocoˈ lipahak a midoko ci Yihofaan hani?

Sasamaan Kita Pakalowid to Masofaway a Falocoˈ?

12. Mararid kita midemak to manan a micoˈay to masofaway a falocoˈ?

¹² Padadotocen ko ngaˈayay nanaman i pidokoan a demak. Palahad kita to ngaˈayay nanaman i midokoay a demak, wa madoloto padadotoc tawlik ko harateng. Misamaanay aki? Haratengen, ngaˈay ko kaen, ngaˈay ko fotiˈ ita, mararid a miwicawic to tireng, ira ko tanoktokay a tireng. Malecaday, to romiˈamiˈad miˈosi kita to Fangcalay Cudad, mararid a mitosil, malalok a misaday, tawlik a mirienang to saˈopo, wa kiemel ko harateng, ira ko ˈicel misiˈayaw to masofaway a falocoˈ.—Loma 12:11, 12.

13-14. Padadotoc to ngaˈayay nanaman i midokoay a demak iraay ko manan a epoc? Patinakoen a mitadtad.

¹³ Nengnengen ko nalifetan no faˈinayan salikaka ci Yohani. I 39 ko mihecaan ningra ciadadaay to ekang, itiya i, toloay ko mihecaan no wawa ningra. I satapang, calemcemay a matalaw cingra, sanay ko harateng: “Kaemangayho kako, hano ciadada to ekang hani?” Samaanay ci Yohani misiˈayaw to masofaway a falocoˈ hani? Sanay cingra: “Soˈlin marariday kako a maroray, kawra o paro no lomaˈ niyam kamayan padadotoc to ngaˈayay a nanaman i midokoay a demak. Cowa ka pilawa kami to saˈopo, to lipalipay malingaday a mitosil, miceridayho misikay to pakalomaˈay a pidoko. Soˈlin nolatekay cowa ko madoloay, kawra kamayan kiemel kami mihaen to demak.” Tikolen ni Yohani miharateng konini a nalifetan, sanay cingra: “Misiˈayaw toniya pakidemay a pasangar i, tada masofawayto ko falocoˈ ako. Kawra mananamay ako, o sapafeli ni Yihofa a ˈicel ato olah Ningra tamiyanan, padamaay tamiyanan milowid toniya masofaway a falocoˈ. O dadamaen ni Yihofa kiso, malecad to pidama Ningra takowanan.”

¹⁴ Saˈayaway a fatac masowalay a fafahiyan salikaka ci Ilisa sanay: “Mikitini mirienang to saˈopo ato notekedan a pikingkiw mananamay ako, mitengilay ci Yihofa to satolon ako, hanaca tada maolahay Cingra takowanan. Oniya soˈlinay kimad tada palipahakay takowanan.” Itini Afrika malo kasakilac kantok faˈinayan salikaka ci Nolan, sanay cingra, o niyah ato fafahi ci Tanna samaanay milowid to masofaway a falocoˈ. Saan: “Misaˈicelay kami padadotoc to ngaˈayay nanaman i midokoay a demak. Soˈlin matoled kami, padadotocay mihaen to demak. Pakacipinangay ci Yihofa tamiyanan, padama Cingra tamiyanan miliyaw a mahemek. Ano masomad i, maharatengay niyam papadama ci Yihofa tamiyanan, palemed tamiyanan. Soˈlin cowa ka fanaˈ kami to sasamaan ko demak Ningra, kawra mafanaˈay kami, wa padama Cingra tamiyanan.”

15. Sapiremoaw to masofaway a falocoˈ, sasamaanho ko pidemak ita? Tano tinakoen a mitadtad.

¹⁵ Sapiremoaw to masofaway a falocoˈ, o pipadadotoc aca to ngaˈayay nanaman i midokoay a demak cangoˈotayho. Patinakoen, ano marariday adada ko tatelecan iso, o karomakat aca to romiˈamiˈad cangoˈotayho. Alatek mamikilimho kiso to milingatay a lalakaw, anca paˈaraw to ising, ihkal ko kafanaˈ to hano adada ko tatelecan. Malecaday, mamisolap kita to Fangcalay Cudad ato mitepangan no likakawa, ngaˈ mafanaˈto hano ira ko masofaway a falocoˈ, ato sasamaan a misiˈayaw. Ngaˈayayho kilimen ita ko matenesay a salikaka masasowal, mitengil to sapaini nangra. Sasamaanho ko pidemak ita?

16. Sakafanaˈaw to lalangian no masofaway a falocoˈ, sasamaan ko pidemak iso? (ˈOlic 139:1-4, 23, 24)

¹⁶ Mitolon ci Yihofaan micangacang to sapadama Ningra tisowanan, cipinang to pakayraan no niyah. Mafanaˈay ko hongti ci Tafiti tada cipinangay ci Yihofa cingranan, mansa micangacangay cingra ci Yihofaan padama cingranan a cipinang, hano macariraw ko niyah anca ira ko masofaway a falocoˈ. (ˈOsien ko ˈOlic 139:1-4, 23, 24.) Ngaˈayay cangacangen iso ci Yihofa padama tisowanan mafanaˈ to lalangian no masofaway a falocoˈ, ato sasamaan a miremo. Licayen ko niyah to pina salicay: “Ira ko hatiniay a masofaway a falocoˈ, o manan ko lalangian hani? O manan a demakan ko pairaay to masofaway a falocoˈ ako hani? Marariday kako miharateng to masofaway a demak, anca palipahakay takowanan a demak hani? Mamikilim kako to manan a lalakaw hongaˈ padama takowanan hani?”—Filipi 4:8.

17. Ngaˈayay kingkiwen iso ko manan a lalakaw, ho misamacay ko niyah i tawlikay a demak hani? (Nengnengen ko coka.)

¹⁷ Adihayen ko pikingkiw to milingatay to pasangaray iso a lalakaw. Nolatekay, mikingkiw ato midotim to samaanay ci Yihofa paihkal to makapahay capeling, wa taˈangayay ko pipadama tisowanan. Tinakoen, midotimay ci Pawlo to limasmas no sapatefoc, mihapinang to tada makahiay ci Yihofa misodod to tamdaw, mihinomay koni cingranan. Ngangaˈay kiso mihaen to demak, ngaˈayay sakadademaken iso to “Pirorodan to Mitepangan Cudad no Misawacayay Tamdaw ni Yihofa,” “Pirorodan to Mitepangan Cudad no Mikecolay” ato roma kakingkiwen a lalosidan, mikingkiw to samaanay a Kawas ci Yihofa, hano o siniˈadaay to tamdaw a Kawas ci Yihofa, makahiay Cingra misodod to tamdaw, pakayni i finawlan no Niyah paihkalay to madimadiay a olah. Maˈaraw iso koniya lalakaw ikor, ngaˈayay tiliden, oya matiliday iso a lalakaw ngaˈay telien i madoloay maˈaraw a kitiraan. Mihaen ano matoled iso i, ngaˈayay ˈosien iso koniya lalakaw. Mamisaˈicel kiso misakadademak to mananamay i nokaˈorip no niyah.—Filipi 4:8.

18. O roma salikaka mikingkiway to manan a lalakaw, mansa pakalowiday to masofaway a falocoˈ hani?

¹⁸ Ci Ilisa mikingkiway to pakayniay ci Yopuan a matiliday i Fangcalay Cudad. Sanay cingra: “Tada cipinangay kako to nafalocoˈan ato nalifetan ni Yopu, samanen malecaday ci Yopuan, i malecaday a tatokian tahalifa kako to adihayay karorayan a demak. Soˈlin caka fanaˈ cingra hano tahalifa to hatiniay a pasangar, kawra itini sapasangaray a tatokian cowa ka pisawad cingra mitiˈer ci Yihofaan.” (Yopu 42:1-6) Masowalay i kaˈayaway fatac ci Tanna sanay: “Kako ato faˈinay mipiliˈay to “Miingid ci Yihofaan” sanay a cudad a mikingkiw. Tada miakoˈiday kami ci Yihofaan malecad o misakorengay misakapah tamiyanan. Ano pakayni kita i raraw ato dangoc no niyah a matoleden i, haratengen ko pasifanaˈay ci Yihofa tamiyanan, padama tamiyanan malo ngaˈayay a tamdaw. Telocto i, wa matongal ko kangaˈay no kalalaˈed ita aci Yihofa.”—Isaya 64:8.

O Papadamaen ni Yihofa Kiso Pakalowid to Masofaway a Falocoˈ

19. Pairaen ita ko masamaanay matatodongay noka pinengneng hani?

¹⁹ Soˈliˈlin mapalahadayto ita ko ngaˈayay nanaman i midokoay a demak, misongilaˈayho a mikingkiw to milingatay to pakayraan no niyah a lalakaw, kawra kamayanho matoled ko falocoˈ, hanaca marorayan nanay ko harateng. Kawra tadiˈecen ko sapadama ni Yihofa, wa ngaˈay maesal ko pifiyor no masofaway a falocoˈ. Ngangaˈay ita ira ko tingalaway makapahay falocoˈ, lipahak a matayal ci Yihofaan, mahemek a maˈorip.

20. Mamisetek kiso to falocoˈ midemak to manan?

²⁰ Nanay misetek kita to falocoˈ, misaˈicel micoˈay to masofaway a falocoˈ. Soˈlin ira ko dangoc no mita, na pakidemay ko raraw, anca tahasiˈayaw to roma a pasangar, ano tadiˈecen ita ko sapadama ni Yihofa, oha mamaˈimer ko masofaway a falocoˈ, ira ko rihaday no falocoˈ. (ˈOlic 143:10) I faelohay a hekal i, wa madoloto kita padadotoc tawlik ko harateng! Itiya, ano lomowad to papacem i, sahtoay o makapahay demak ko maharatengay. Wa awato ko cariraw ita, wa lipahakto midoko ci Yihofaan.