Milengo to Soˈlinay Kimad i, Pairaen ko Sidaˈitay

1. Samaanen ita ko demak ngaˈ masalalomaˈ no paro no lomaˈ ni Yihofa?

SAKINACECAY masasowal to salikaka i, marariday a milicay: “Samaanay kiso mafanaˈ to soˈlinay kimad?” Sowal no roma tamdaw: “Itiniay i soˈlinay kimad a lomahad.” O romaroma tamdaw sanay: “Ingata satapang sanayho kako minanam ato micada to soˈlinay kimad.” Malalengo kami maceriday masowal ko “soˈlinay kimad,” samanen tada masakalimlaan ko soˈlinay kimad kitanan. Makallimay masalalomaˈ no paro no lomaˈ ni Yihofa, mamaolah to soˈlinay kimad, mamitoorho to soˈlinay kimad a maˈorip, mahawpay itini sasowalen waywayan pairaen ko soˈliˈlinay haharateng no mita.—ˈOlic 15:1-3.

2. (1) Samaanay ko pinengneng no tamdaw ci Yisan? (2) O sapakafanaˈ ni Yis a soˈlinay kimad pairaay to masamaanay noka pifiyor hani?

² Sahtoay o soˈlinay ko sowal ni Yis, mitooray to soˈlinay kimad pasifanaˈ to tamdaw. Soˈlin mafanaˈay cingra to pakararaw ko sowal no niyah to tamdaw, kamayan a soˈlin ko sowal, misafelitay cingranan a tamdaw i, mihayiay toniya demak. (Matay 22:16) Pasifanaˈ cingra to soˈlinay kimad paira to masamaanay noka pifiyor, saan cingra: ‘Tayni kako mamikidat to sakaliwasak, mitowakang ko faˈinayan wawa to wama, mitowakang ko fafahiyan wawa to wina, mitowakang ko kadafo to wina no faˈinay.’ (Matay 10:35) Cowa ka ciharateng ci Yis ira ko tatiihay harateng no tamdaw to soˈlinay kimad. Sowal ni Yis i, wa ira ko hatiniay a demak mifekad sanay. Mafanaˈay cingra o soˈlinay kimad wa pafafidaˈ toniya hekal, ira ko maolahay to soˈlinay kimad, ato iraay ko ˈintehay to soˈlinay kimad a tamdaw.—Matay 23:37; 2 Tisalonika 2:9-11.

3. Oniya lalakaw mamilengo to manan?

³ Malecad ci Yisan, mamisaˈicel kita misasoˈliˈlin ko harateng, soˈlin mafanaˈ to cowa ka hemek no tao to sowal no niyah, kamayan somowal to soˈlinay a sowal. O roma i, soˈlin cowa ka olah to roma tamdaw to milasilan ita a soˈlinay kimad, kamayan kita padadotoc a mitosil. Nikawrira cowa ko mamikihar kita to nafalocoˈan no tao, haratengay sa a somowal hokira? Cowa ka hatira! Oniya lalakaw aisalakat a milengo to masakalimlaan a salicay: Wa icowa kita mikilim to soˈlinay kimad hani? Dotoc mamilengoho ko lalakaw, soˈlin ko sowal ita, milengo to soˈlinay kimad i, sinanoten ko araaw no falocoˈ ato waywayan no niyah, misinanotho to kasomowalan a tatokian. Oniya lalakaw papadama kitanan palahad to sidaˈitay a waywayan, itini matatodongay tatokian somowal to matatodongay a sowal.

Wa Icowa Kita Mikilim to Soˈlinay Kimad Hani?

4. O Pipowaran no soˈlinay kimad ci Yihofa, hano saan ko sowal hani?

⁴ O Pipowaran no soˈlinay kimad ci Yihofa, o kahacecay a sowal Ningra sahtoay o soˈlinay kimad. Tinakoen, o patirengan Ningra a ngaˈayay ato tatiihay a palinian, sahtoay o soˈlinay ngaˈayay tadiˈecen. (ˈOlic 19:9; 119:142, 151) O pairasolan Ningra a demak wa malaˈosi maemin. (Isaya 55:10, 11) Tatooren Ningra midemak ko mikiˈokan no Niyah. (Saˈosi 23:19) Cowa ko misamangahay Cingra. (Hipray 6:18) Soˈlinay haw i, ci Yihofa o ‘pafeliay to soˈlinay kimad’ ‘midoedoay to soˈlinay kimad’ a Kawas.—ˈOlic 31:5, ato roma pihongyak.

5. Mamadolo kita pakahela to Pipowaran no soˈlinay kimad, hano saan ko sowal hani? (Dmak 17:27)

⁵ Harateng no romaroma tamdaw pasangaray mahela ko Pipowaran no soˈlinay kimad sanay, kawra madoloay mahela ko ‘pafeliay to soˈlinay kimad’ ‘midoedoay to soˈlinay kimad’ a Kawas ci Yihofa. I taliyok no kaˈorip no mita iraay ko wacay to materekay Cingra. (Loma 1:20) Itini Atin ko tarokos ci Pawlo i, pasowalay to iraay ko sifanaˈ a Krisiya a tamdaw, makalimay ko Kawas ‘mahela’ no tamdaw Cingra, hanaca ‘cowa ka piraay Cingra to kahacecay tamdaw.’ (ˈOsien ko Dmak 17:27.) Padadotocay Cingra misolot to misapoeneray mikilimay to soˈlinay kimad a tamdaw miingid Cingranan.—Yohani 6:44.

6. (1) Itini Fangcalay Cudad mamahela ita ko maanan a soˈlinay kimad? (2) Ngaˈay cipinang toniya soˈlinay kimad samaanay ko harateng iso? Misamaanay?

⁶ Minanam kita to Fangcalay Cudad o mamahela ci Yihofa, samanen o Fangcalay Cudad sahtoay tano fangcalay saocor no Kawas patemer ko tamdaw a tiliden, o lalakaw ilalomaˈ o soˈlinay kimad, ngaˈayay pakasoˈlinen ita a mitadiˈec. (2 Pitiro 1:20, 21) Tinakoen, ngangaˈay pakasoˈlinen ita i Fangcalay Cudad pakayniay i misangaˈay a maˈoningay—oniya kihcod sahtoay o misangaˈan no Kawas. (Satapangan 1:1, 26) Ngangaˈay pakasoˈlinen ita ko pitadtad no Fangcalay Cudad to pades—tahapades ato mapatayay ko tamdamdaw a lalangian, o raraw. (Loma 5:12; 6:23) Ngangaˈay pakasoˈlin kita to misowalan no Fangcalay Cudad sapisaysay a pakayraan—wa pakaynien ni Yihofa i Wawa Ningra ci Yisan, papalahdawen ko pairaan no ‘misamangahay a wama’ ci Satan a kihcod a pades. (Yohani 8:44; Loma 16:20) Ngangaˈayho pakasoˈlinen ita ko misowalan no Fangcalay Cudad a hatokel—wa sahcien ni Yis palahdaw ko tatiihay, patikol paˈorip to mapatayay, pala lakoingho toniya cikiw, patikol malefot ko tamdaw. (Yohani 11:25, 26; 1 Yohani 3:8) Cowa ko kacipinang aca ita toniya masakalimlaan a kimad, misakadademakanho ni Yihofa kita mifanaˈ to tamdaw to soˈlinay kimad, tada o kalikoanto konini!—Matay 28:19, 20.

Araaw no Falocoˈ

7-8. Somowal kita to soˈlinay sowal, milasil to soˈlinay kimad i, kalimlaan ko araaw no falocoˈ han? Patinakoen a mitadtad. (Marko 3:11, 12) (Nengnengen ko coka.)

⁷ Malecad masowalay ikaˈayaway a fatac, ano ciharatengay kita masalalomaˈ no paro no lomaˈ ni Yihofa i, ka somowal to soˈlinay sowal, milasil to soˈlinay kimad. Kawra sapakahemekaw ci Yihofaan i, mihaen to demak cangoˈotayho, samanen misakaretengan Ningra ko araaw no falocoˈ ita. Nengnengen ko mifekaday a demak itini pitosil ni Yis i fafekang no sera. (ˈOsien ko Marko 3:11, 12.) Itiya itiniay i lawac no riyar a Kalili mitosil ci Yis, ˈalomanay ko tamdaw mikilimay cingranan. Romaroma tamdaw maemetay no tatiihay coyoh, nipitorosay i kaˈayaw cingra owaw sanay pasowal: ‘O Wawa no Kawas kiso.’ Hano mifanaˈ ko tatiihay coyoh pakayniay to soˈlinay kimad ni Yis hani? Alatek sapilifokaw to pakasoˈlin no ˈalomanay cangranan, dotoc mamikayhid ko tatiihay coyoh to ˈalomanay tamdaw, ho ecato ka pidoko ko ˈalomanay ci Yihofaan. Soˈliˈlin soˈlinay ko sowal no tatiihay coyoh, kawra o araaw no falocoˈ nangra o misatekeday. Mafanaˈay ci Yis to o manan ko maharatengay no tatiihay coyoh, mansa cowa ka pakahemek cangranan, mirikecayho cangranan akato ka somowal to pakayniay cingranan a demak.

⁸ Mikitini toniya matiliday mananamay ita ko maanan hani? O araaw no falocoˈ ita a somowal to soˈlinay sowal, milasil to soˈlinay kimad, tada masakalimlaan i pinengneng ni Yihofa. Mihaenay ano pakafanaˈ kita to tamdaw to soˈlinay kimad i, pairaen ko matatodongay araaw no falocoˈ, pakayniay i noka olah ci Yihofaan. Pakayni misowalan ita a soˈlinay kimad, ano pakahemek ko tao kitanan i, aka papiharatengen ko tao to tada idahiyay kita, ao panokayen ko ˈdil ci Yihofaan.—Matay 5:16; nengnengen ko Dmak 14:12-15.

9. Aka pidemak kita to maanan? Misamaanay?

⁹ Haratengen ko roma pakayraan, patalipaˈelalen ita ko niyah aka a paˈdil to niyah. Tinakoen, o mikeriday a faˈinayan salikaka pasowal to cecay hahimeden a demak. Ano pasowalen ita ko tao toniya demak i, ikor soˈlinay mahaen o misowalan ita a mifekad ko demak, haratengto no tao i, tada idahiyayto kita wa saan. Adihayay ko kafanaˈan to kalimlaan a demak. Mihaen ko demak alatek paˈakawangay to niyah a saaroˈan itini falocoˈ no tao, kawra cowa ka paˈakawang to niyah a epoc i pinengneng no Kawas. Samanen hatiniay a waywayan cowa ko mamilifok to pihaydaan Ningra. (Taneng 11:13) Misamaanay hani? Soˈliˈlin sahtoay o soˈlinay ko misowalan ita, kawra awaay ko fadangalan ita pasowal to tao koniya demak, hanaca o araaw no falocoˈ ita i, o misatekeday.

Waywayan

10. Ano somowal ‘pairaen ko sidaˈitay,’ o manan ko tatodong hani? (Kolosay 4:6)

¹⁰ ˈOsien ko Kolosay 4:6. Patalipaˈelalan ni Pawlo ko Kolosayay a Krisciyang, ano somowal i, ‘pairaen ko sidaˈitay.’ O tatodong nonini a Krisiya a sowal i, ano somowal kita i, sinanoten ita o misowalan ita iraay ko epoc to tao hokira, sinanotenho ko waywayan ita a somowal, ciharateng to nafalocoˈan no tao, tano kaolahan no tao a pakayraan a masasowal.

11-12. Misakadademak to Fangcalay Cudad pasifanaˈ to tamdaw i, mamisinanot to maanan? Misamaanay hani? Tano tinakoen a mitadtad. (Nengnengen ko coka.)

¹¹ Ano pakafanaˈ kita to tamdaw to soˈlinay kimad i, dofdofen ko sapalimoˈot ni Pawlo, sidaˈiten ko sasowalen. Patinakoan no Fangcalay Cudad ko soˈlinay kimad to cihinangay a fonos, onini a fonos ngaˈayay pafafidaˈ to papotal ato ikemoday a falocoˈ, mahapinang to i falocoˈay a harateng ato halaka no tamdaw. (Hipray 4:12) Kawra misakadademak kita toniya fonos i, ano caka pinaˈon mamidokaˈ to tao, papiliˈayto ko tao, alatek i, o mamalacongis. Hano saan ko sowal hani?

¹² Patinakoen, mitosil kita malitemoh to cecay tada pakasoˈlinay to midokoan ningra a tamdaw. Marariday cingra pasayra i samiyay cingra a mitolon, malacafayayho to paro no lomaˈ misalisin to kahofocan ato pipatikolan ni Yis a maˈorip. Soˈlin ngaˈayay kita tano Fangcalay Cudad mitadtad cingranan, pasayra toya awaay ko ˈorip a samiyay mitolon tada o mafolaay, ngaˈayayho tano Fangcalay Cudad misawacay cingranan, misalisin to kahofocan ni Yis ato patikolan maˈorip a lisin o mararaway koni. (Isaya 44:14-20; 2 Korinto 6:14-17) Soˈliˈlin o misowalan ita sahtoay o soˈlinay kimad, nikawrira sakinacecay masasoˈaraw patodicek sa pasowal cingranan, cowato pisongilaˈ kita misakadademak to fonos no Kimad no Kawas.

13. Ano somowal kita i, sasamaan tano ‘pacinahan a kakaenen’ hani?

¹³ Sowal ni Pawlo, ano somowal kita i, malecad o ‘pacinahan a kakaenen.’ O tatodong ningra i, somowal kita to ngaˈayay tengilen a sowal, mifalic to soˈlinay kimad cowa ka saan, anoca cowa pifanaˈ to tamdaw to milingatay to soˈlinay kimad a roma a demak. Pakalalokay cingra kitanan mitoor to kaolahan no tao a kakaenen, tano kaolahan no tao a pakayraan milasil to soˈlinay kimad. (Yopu 12:11) Latekay mihaen to demak cowa ko madoloay. Malecad o mitangtangay i, wa tano kaolahan no niyah a pacinah, hanaca maolahay ko tao sanay a miharateng. Malecaday, miharateng kita o pakayraan no niyah a somowal i, o kaolahan no ˈalomanay saan. Kawra cowa ka mahaen. Tinakoen, itini roma serangawan, marariday ko tamdaw patodicek sa somowal to harateng no niyah, ano matoˈasayto i, mihaenan nangra. Kawra itini roma a serangawan, mahaenay pakayraan cowa ko misakangodoay to tao, ao kapiliˈan no tao. I salikoray noniya sinael sanayho ci Pawlo, ka fanaˈ kita ‘misamaan a pacaˈof to kahacecay a tamdaw.’ Paihkalay koniya sowal, ano somowal kita i, haharatengen o kaolahan no tao koni, cowa ko haratengay sa ko niyah a mipacinah, tatodong i, simsimen ko serangawan ato kalomahadan no tao, ciharateng to nafalocoˈan nangra.

Tatokian

14. I fafekangho no sera ci Yis i, hano cowa pasifanaˈ to nisawawaan to kafanaˈan no niyah a kihcod hani?

¹⁴ Ano pasowal ci Yis to nisawawaan i, sahtoay o sidaˈitay, pasifanaˈayho cangranan to adihayay a demak. (Marko 6:34) Soˈlin mafanaˈay ci Yis adihayayho ko nananamen no nisawawaan, kawra cowa ka tangsol sa pasifanaˈ to nisawawaan to kafanaˈan noniya kihcod. Misamaanay hani? Samanen mafanaˈay cingra to citolasay ko inaneng no nisawawaan, mafanaˈay cingra o roma soˈlinay kimad awaay ko pakayraan nangra a micada, mihaenay cowa ko sangaˈayay tatokian itiya pasifanaˈ to nisawawaan tonini a soˈlinay kimad. (Yohani 16:12) O manan ko mananamay ita hani?

15. Aka tangsol han pasowal to pakingkiwan, mananamay no niyah a kihcod a kimad i Fangcalay Cudad, misamaanay hani? (Taneng 25:11) (Nengnengen ko coka.)

¹⁵ Mikitini taˈarawan ni Yis mananamay ita, aka tangsol han pasowal ko tao to mananamay no niyah a kihcod a kimad i Fangcalay Cudad. Mihaenay, sasamaan kita minanam ci Yisan hani? O caciharateng to pakayraan no tao. Haratengen ikaˈayaway fatac masowalay toya maolahay misalisin to kahofocan ni Yis a lisin a tamdaw. Itini ˈayaw no pina lipay pisalisinan to kahofocan ni Yis a romiˈad malacafayay kiso cingranan minanam to Fangcalay Cudad. Soˈlin mafanaˈay kiso o kahofocan ni Yis a lisin naitiniay i mararaway a pihakelongan, mafanaˈho cowa ka olah ko Kawas to tamdaw misalisin to mahaenay a lisin, kawra ano tangsol sa kiso tano Fangcalay Cudad pasowal cingranan, hamaan misalisin toniya mararaway pihakelongan a lisin, hanaca pasowal cingranan akato pisalisin to kahofocan ni Yis, mihaen ko sowal iso o sidaˈitay han? Soˈlin o roma pakingkiwan mananam ko pina kimad i, tangsolay a midemak, kawra ˈalomanay tamdaw misaaliayho to toki ngaˈ ngaˈay misalof to harateng a mafalic. Mihaenay, sapipadamaaw to pakingkiwan a macakat, mitala kita to matatodongay a tatokian, itini kadoloan nangra a micada i, itiyato a milengo to tatengilen nangra a soˈlinay kimad.—ˈOsien ko Taneng 25:11.

16. Sasamaan ko pidemak ita ngaˈ papadama to pakingkiwan ‘midoedo to soˈlinay kimad a maˈorip’?

¹⁶ Pasifanaˈ ko tamdaw to pakayniay ci Yihofaan a soˈlinay kimad, pairaay to lipahak kitanan. Sapipadamaaw to pakingkiwan ‘midoedo to soˈlinay kimad a maˈorip,’ sasamaan ko pidemak ita? (3 Yohani 3, 4) Ka padadotoc mala ngaˈayay taˈarawan nangra, itiniho i nokaˈorip no niyah a misawacay pakasoˈlinay kita to mikiˈokan no Fangcalay Cudad oha mamalaˈosi maemin. Roma i, pakafanaˈ kita to tamdaw to soˈlinay kimad i, matatodongay ko araaw no falocoˈ, sidaˈit ko waywayan, itiniho matatodongay a tatokian somowal to matatodongay a sowal. Aka mapawan, ano pakahemek ko tao kitanan i, panokayen ko ˈdil ci Yihofaan. Mihaen kita to demak o misawacayay, o finawlan no ‘pafeliay to soˈlinay kimad’ ‘midoedoay to soˈlinay kimad’ a Kawas ci Yihofa kita.