Salicay no Miˈosiay Tamdaw

Hakowaay ko ˈakawang no omakan no fangcalay sefi ni Solomon?

Omakan no fangcalay sefi itiniay i picomodan no Fangcalay Kitiraan. ˈAyaw no 2023 miheca a Pihongyak no Faelohay Hekal a Fangcalay Cudad sanay ko sowal, ‘9 kongce ko kakahad no omakan, mahecaday to kakahad no fangcalay sefi, o ˈakawang 120.’ (2 Rayray 3:4) O roma mihongyakan a Fangcalay Cudad “120 ciko no kamay” ko ˈakawang sanay, tatodong i oniya mapatirengay 53 a kongce ko ˈakawang!

Kawra, 2023 miheca miinsacan a Pihongyak no Faelohay Hekal a Fangcalay Cudad misalofan ko milingatay toniya sinael. Nohatini, sanay ko sinael, o omakan no fangcalay sefi ni Solomon ‘20 a ciko no kamay ko ˈakawang,’ maedeng 9 kongce.a Dotoc wa mitadtad to pisalof toniya sinael a lalangian.

1 Hongti 6:3 cowa ka somowal to hakowaay ko ˈakawang no omakan. Itini toniya sinael i, mitiliday ci Yirimiya somowalay to kakahad ato koˈedaw no omakan, kawra cowa ka somowal to ˈakawang. Itini toniya fedengan dotoc a sinael, misongilaˈan ni Yirimiya mitadtad ko mahapinangay a dafong, mahawpay ko fodawan a tangko, 10 ko fodawan sano palidingay a fintang ato i papotalay a tosa fodawan a hecek. (1 Hongti 7:15-37) Ano mataˈlif ko 50 kongce ko ˈakawang no omakan, o saˈakawangay no fangcalay sefi a mapatirengay, misamaanay hano cowa ka somowal ci Yirimiya to ˈakawang nora omakan hani? O roma i, misalalangian ko ikor no pina soˈot miheca a mitatiliday to likisi no Yutaya sanay, i fangcalay sefi ni Solomon i, o ˈakawang no omakan cowa ka taˈlif to roma mapatirengay.

Cisasaay ko mikakingkiway a tamdaw, wa pakafilo ko lowil no fangcalay sefi to 120 ciko no kamay ko ˈakawang no omakan han? I nolitengan, tano fakelohan patatingloh a ˈakawangay mapatirengay, sahtoay kakahaday ko taˈanengan, maˈipocay talafekang, o cecay tinakoan i, o efiw no Icip a fawahan. Kawra cowa ka hecad ko fangcalay sefi ni Solomon. O harateng no mikakingkiway, o lowil no fangcalay sefi maedeng 6 ciko no kamay ko kakifetol (2.7 kongce). Mansa, mikakingkiway to nolitengan a mapatirengay ci Teawtore Pusink sanay: “Nengnengen ko kakifetol no lowil no [fangcalay sefi a picomodan], cowa ko 120 ciko no kamay ko [ˈakawang] no omakan.”

2 Rayray 3:4 alatek mararaway ko pitodong no mitatiliday. Soˈlin o roma nolitengan a matiliday noniya sinael o “120,” kawra o roma cifadangalay a matiliday o “20 ciko no kamay” sanay, mahawpay ko i saka 5 hahekalan a ni Alisanta a Mitodongan a Matiliday, atoya saka 6 hahekalan ni Amporosiw a Mitodongan a Matiliday. Mahaenay i, mitodongay mitilid a tamdaw hano “120” han ningra mitilid ko “20 ciko no kamay” hani? Lalangian i, i Hipray sasowalen, “100” (simoˈot) ato “ciko no kamay” hato mahecaday ko pitilid. Mansa, iraay ko cecay mitodongay mitilid a tamdaw alatek “semoˈot” han ningra mitilid ko “ciko no kamay.”

Manaokaniw, misaˈicelay kita cipinang to milingatay to fangcalay sefi ni Solomon, halo matatodong ko pitadtad, kawra o masakalimlaan i, o mitaypiyawan noniya fangcalay sefi a tatodong, oya mipatinakoan a tadamaanay a fangcalay sefi. Mitahidangan ni Yihofa ko madimadiay sikawdan, tayni i mipatinakoan a tadamaanay fangcalay sefi a midoko Cingranan, tada miakoˈiday kita!—Hipray 9:11-14; Paˈarawan 3:12; 7:9-17.