Mikitini Palilam ni Yis to Epang a Kasapaan, o Manan ko Mamananam Ita?

1. Itini i lintad no Fangcalay Cudad, hano kalimlaan ko epang hani?

I LINTAD no Fangcalay Cudad, sakakaay a kakaenen i, o epang. (Satapangan 14:18; Yohani 21:9) O epang o masakalimlaan a kakaenen no tamdamdaw, mansa, itini i Fangcalay Cudad, nolatekay tano o ‘epang’ mitaypiyaway to kakaenen. (Patnakay 11:1 ato roma pihongyak; Dmak 20:7, pitadtad no Sapikingkiw a Fangcalay Cudad) O roma i, kinatosaay ci Yis misakadademak to epang midemak to kasapaan. (Matay 16:9, 10) Sakinacecay i, maˈoningay itini i Yohani saka 6 fedengan. Itini toniya lalakaw, wa mifolfol toniya maˈoningay, nengnengen hena o manan ko mamananam ita.

2. Mihakelongay ci Yisan a ˈalomanay, hano misaali to kakaenen hani?

² Maharek ko miliwkoay mitosil no tarokos i, keridan ni Yis cangra mikalic to tamina milakowit to Kalili a Riyar. (Marko 6:7, 30-32; Luka 9:10) Tayra cangra i ngata no Pitsayta a pala ikor, sapipahanhanaw cangra, kawra tangsolay irato ko ˈalomanay tamdaw. Cowa ka pisakahmaw ci Yis to saali no ˈalomanay, pairaan ningra ko toki pakafanaˈ cangranan mafanaˈ to Kitakit no Kawas, miadahho to adadaay. Mangatato ko picelem no cidal i, maharatengay no nisawawaan to ˈalomanay awa ko kakaenen. O ˈalomanay tamdaw cowa ka pisaday to kakaenen, wa tayra i niyaroˈ miˈaca to kakaenen. (Matay 14:15; Yohani 6:4, 5) Samaanan ni Yis ko demak hani?

PALILAM TO EPANG A KASAPAAN

3. Mansanay ko sowal ni Yis to tarokos hani? (Nengnengen ko a coka.)

³ Hananay ni Yis ko tarokos: ‘Cowa ko hamamiliyas cangra, pafelien namo to kakaenen cangra.’ (Matay 14:16) Kawra misamaan hokira? Itiya o faˈinayan aca 5,000 ko tamdaw, ano tongalen ko fafahiyan ato wawa, maedeng 15,000 ko ˈaloman. (Matay 14:21) Ikor sanay ci Antiri: ‘Iraay ko cecay faˈinayan a wawa itini, limaay ko taˈangayay emi a ˈapelad epang, ato tosaay mimingay a foting ningra, kawra wa maedeng a palilam ko ˈalomanay tamdaw han?’ (Yohani 6:9) Itiya o maceriday a kakaenen ko taˈangayay emi a ˈapelad a epang. O mimingay a foting, alatek misakiloan ikor miˈicangan a mitapay. Kawra, oniya mimingay a kakaenen misamaan a maedeng ko ˈalomanay a tamdaw komaen hani?

4. Mikitini i Yohani 6:11-13 o manan ko mananamay ita hani? (Nengnengen ko coka.)

⁴ Makalimay ci Yis paihkal to hinapaladaˈay a pakaen to ˈalomanay, hananay ningra ko ˈalomanay sacefacefang a maroˈ i rengorengosan. (Marko 6:39, 40; ˈosien ko Yohani 6:11-13.) ˈAyaw no palilam ci Yis to epang ato foting i ˈalomanay, i salakatay mitolon to Kawas. Mihaen cingra to demak paihkalayto oniya kakaenen sahtoay naitiniay i Kawas, tada miakoˈiday cingra. Oniya ngaˈayay taˈarawan ni Yis patalipaˈelalay kitanan, ano o cecayay kita, anca iraho ko romaroma tamdaw i katihi, ˈayaw no kakomaen kita i, wa tolonen ita ko Kawas. Dotoc, palilaman ni Yis ko kakaenen i ˈalomanay tamdaw. Sahtoay mafecolayto ko ˈalomanay, hanaca adihayayho ko ˈosaw. Mihaenay ocoran ni Yis ko tarokos misaˈopo to maˈosaway a kakaenen, ho caka kinafalah to kakaenen. Oniya pakayraan ngaˈayay nanamen ita ci Yis. Ano iraay ko wawa iso, tanamen malacafay to wawa miˈosi toniya maˈoningay, wa ngaˈay mananam ko manan.

5. Maˈaraw no ˈalomanay ko midemakan ni Yis samaanay ko harateng nangra? Itiya samanayto ko demak ni Yis hani?

⁵ O sapakafanaˈ a pakayraan ni Yis ato midemakan a kasapaan, tada masemeray ko ˈalomanay tamdaw. Mafanaˈay cangra na pairasolay ci Mosi, wa ocoren no Kawas ko mahecaday ci Mosian a pairasolay, mansa saan cangra miharateng alatek: ‘Ora ci Yis i, oya masowalay a pairasolay han?’ (Limoˈot 18:15-18) Alatek saan cangra, wa malo tadamaanay citanengay a mikowanay ci Yis, oha ngangaˈay pafeli to kakaenen to polong Yutaya a tamdaw. Mihaenay ‘midopo cingranan a mala hongti.’ (Yohani 6:14, 15) Itiya i, mikowanan no Loma ko Yutaya tamdaw, ano hakelongen ni Yis ko harateng nangra i, wa milingat to mikowanay no Yutaya tamdaw a demak. Mihaenay cingra to demak han? Cowa. Saan ko Fangcalay Cudad, liyas sanay ci Yis ‘tayra i lotok.’ Soˈlin macada ningra ko saroero no tao, kamayan cingra minaˈay to mirikecay a demak. Patirengay ci Yis to tada ngaˈayay a taˈarawan no mita!

6. Samaanen ita mitodong ko ngaˈayay taˈarawan ni Yis hani? (Nengnengen ko coka.)

⁶ Soˈliˈlin, cowa ka mingitangit ko tao kitanan midemak to kasapaan paira to epang ato miadahay to adada, cowa ka pidama kitanan malo mikowanay. Kawra, o harateng no ˈalomanay, ano ciˈicelay ko cecay tamdaw ngangaˈay malo mikeriday sa i, alatek papitopa kitanan toniya tamdaw, anca o roma a pakayraan midama cingranan. Kawra haratengen ko taˈarawan ni Yis. Minaˈay cingra to kihcod mirikecay a demak, ikor sanayho cingra: ‘O Kitakit ako cowa koninian a hekal.’ (Yohani 18:36; 17:14) Anini, pahecaday ko Krisciyang ci Yisan, madimadi to Kitakit no Kawas. Wa misawacay kita toniya Kitakit no Kawas, ato mingitangit to kairaan noniya Kitakit. (Matay 6:10) Nohatini, tikolen ita koniya mipalilam to epang ci Yis a kasapaan a maˈoningay, o mananho ko mamananam ita.

‘O TATODONG NO PALILAMAY TO EPANG A KASAPAAN’

7. O manan ko midemakan ni Yis? Samaanay ko harateng no tarokos hani? (Yohani 6:16-20)

⁷ Mafecolto ko ˈalomanay ikor, miocoran ni Yis ko tarokos pakatamina minokay i Kapirnaum, talalikor sanay cingra tayra i lotok, miliyas tora midamaay cingranan mala hongti a ˈalomanay. (ˈOsien ko Yohani 6:16-20.) Itiniayho i rariyaran parakat to tamina ko tarokos i, fahal sa taˈangay ko fali, macowacoˈ ko riyar. Ikor, maˈaraway nangra ci Yis romakat i rariyaran, pasayra i cangranan a miraod. Dotoc, miowawan ni Yis ko tarokos ci Pitiro a romakat i rariyaran. (Matay 14:22-31) Ya macakat i tamina ci Yis i, materepayto ko faliyos. Tada fahkaˈay ko tarokos, sanay cangra: ‘Soˈlinay o Wawa no Kawas kiso!’a (Matay 14:33) Oha sasinanoten i, nohatini ngaˈ sowal sanay ko tarokos to mahaenay a sowal, isaˈayaw palilam ci Yis to epang a kasapaan i, cowa ka pipasowal to mahaenay a sowal. Cowa ka cipinang ko tarokos, sapafeli ni Yihofa ci Yisan a ˈicel i, cowa ko pipalilam aca to kakaenen. Mansa sanay ko sowal ni Marko: ‘Fahkaˈay ko [tarokos], samanen cowaho ka cipinang cangra to o manan ko tatodong no palilamay to epang a kasapaan, maoratayho ko falocoˈ nangra.’ (Marko 6:50-52) Caka halafin i, masowalay ni Yis ko palilam to epang i ˈalomanay a demak, mitadtadayho to masakalimaan a kimad.

8-9. Misamaanay hano kilimen no ˈalomanay ci Yis hani? (Yohani 6:26, 27)

⁸ Saka tosa romiˈad, tayraay ko ˈalomanay toya palilam ci Yis cangra to epang a pala, kawra awaayto ci Yis ato tarokos itira. Orato i, macakatay cangra to naitiniay i Tipiriyasay a tayniay a tamina, tayra i Kapirnaum mikilim ci Yisan. (Yohani 6:22-24) Mihaen cangra to demak o sakacipinangaw to Kitakit no Kawas han? Cowa. Sakakaay nangra a harateng i, o sapiladaˈaw to kakaenen ci Yisan. Hano mafanaˈ kita hani?

⁹ Ya mahela no ˈalomanay tamdaw ci Yis i Kapirnaum i, sasoˈlinen ni Yis a somowal, mikilim cangra cingranan i, o pakayniay i sakafecolaw aca. Samanen ‘komaen to epang mafecolayto’ cangra itiya, mansa nohatini miliyaway mikilim cingranan. Palimoˈotan ni Yis cangra, hamaan pakayni i ‘mamapalak a kakaenen’ a matayal, ao pakayniay i ‘sakamidaˈoc ko ˈorip a kakaenen’ a matayal. (ˈOsien ko Yohani 6:26, 27.) Hano ira ko sakamidaˈoc ko ˈorip a kakaenen! O sowal ni Yis tada fahkaˈan ko ˈalomanay tamdaw. O masamaanay a kakaenen hani? Misamaan ngaˈ milifok to mahaenay a kakaenen?

10. Sapilifokaw ko ˈalomanay to midaˈocay a ˈorip, sasamaan ko demak hani?

¹⁰ O harateng no ˈalomanay, sakatayalaw cangra anca midemak to maanan ngaˈ mamalifok nangra ko mahaenay a kakaenen. Alatek maharatengay nangra ko Rikec ni Mosi misaˈosi to dademaken no tamdaw. Kawra, hananay ni Yis cangra: ‘Pakasoˈlin mihakelong kamo to miocoran no Kawas a tamdaw, o midemakay kamo to tayal no Kawas’ sanay. (Yohani 6:28, 29) Soˈlinay i, na milengoanto ni Yis, ‘sapilifokaw to midaˈocay a ˈorip,’ oha paihkal to pakasoˈlinay falocoˈ to miocoran no Kawas a tamdaw. (Yohani 3:16-18, 36) Ikor, mamiliyawho ci Yis milengo to sasamaan ngaˈ milifok to midaˈocay a ˈorip.—Yohani 17:3.

11. O kaciharatengan no ˈalomanay, ono tirengan aca a saali, hano mafanaˈ kita hani? (ˈOlic 78:24, 25)

¹¹ Cowa ka pihayi ko ˈalomanay to sowal ni Yis, sanay milicay cangra: ‘O manan ko midemakan iso a kasapaan, ho ngaˈay maˈaraw niyam a pakasoˈlin tisowanan hani?’ (Yohani 6:30) Dotoc, masowalay nangra koya lintad ni Mosi, tefadan no Kawas i kakarayan ko mana pakaen to lalitengan nangra. (Nihimiya 9:15; ˈosien ko ˈOlic 78:24, 25.) ˈArawhan, o sakakomaenaw aca no ˈalomanay, orato i, masowalay ni Yis ko ‘nai kakarayan soˈlinay a kakaenen.’ (Yohani 6:32) Cowa ka hecad to mana koni, wa paira to midaˈocay a ˈorip no tamdaw. Kawra cowa ka pilicay ko ˈalomanay ci Yisan to o manan ko tatodong no sowal ningra, o kaciharatengan no ˈalomanay ono tirengan aca a saali, cowa ka pikihar to sapakafanaˈ ni Yis cangranan a kimad. Mikitini toniya maˈoningay o manan ko mananamay ita hani?

O MANAN KO SAKAKAAY HAHARATENGEN ITA HANI?

12. O sowal ni Yis o manan ko sakaretengen ita hani?

¹² Mikitini Yohani saka 6 fedengan, mananamay ita ko masakalimlaan a kimad. O kaciharatengan ita i, o nofalocoˈan a saali, ira ko ngaˈayay kalalaˈed ita aci Yihofa. Ya minaˈay ci Yis to sakayhid ni Satan i, na masowalay ningra koni. (Matay 4:3, 4) O roma i, i Sapasifanaˈ i Lotok masowalay ningra, mirenec to nofalocoˈan a saali o masakalimlaan. (Matay 5:3) Mihaenay, ngaˈay salalicayen ko niyah: “O pakayraan nokaˈorip ako, soˈlinay paihkal to misakaretengan ako o mirenecay to nofalocoˈan a saali, cowa kono pakadafongay han?”

13. (1) Sakasinowayaw ko kaˈorip hano cowa ko mararaway hani? (2) O manan ko sasinanoten ita a sapatalipaˈelal hani? (1 Korinto 10:6, 7, 11)

¹³ Pakayni kita tono pakadafongan a mitolon, sakasinowayaw no kaˈorip, cowa ko mararaway. (Luka 11:3) Sowal no Fangcalay Cudad, maroray matayal kita ikor, ‘komaen miˈinip’ o naitiniay i Kawas a sapatelong. (Patnakay 2:24; 8:15; Yakop 1:17) Kawra, haharatengen ita, aka a misakareteng to pakadafongay i kaˈorip no mita. Patikami ko tarokos ci Pawlo to saka 1 hahekalan a Krisciyang i, masowalay ko likisi no lalitengan a Israil, mahawpay ko mifekaday a demak i Sinay Lotok. Mirikecay ci Pawlo to Krisciyang: ‘Hamaan tangoˈol to mariˈangay a demak, mahecad to [Israil tamdaw] tangoˈol to mariˈangay a demak.’ (ˈOsien ko 1 Korinto 10:6, 7, 11.) Midemakay ci Yihofa to kasapaan pafeli to kakaenen i Israil tamdaw, kawra paihkalay to macoosay cangra, telocto i, pakariˈangay to Israil tamdaw koniya kakaenen. (Saˈosi 11:4-6, 31-34) O roma, mitaˈongan nangra ko tano ekiman mitoˈtoˈan a kolong a samiyay, itira a komaen romadiw makero. (Kasadakan 32:4-6) Matatodongay ko sapatalipaˈelal ni Pawlo to itiyaay a Krisciyang, samanen mangataayto ko sakalaˈafo no lekakawa no Yutaya i Kongyen 70 miheca. Anini, itiniay kita to i salikorayto a ˈawaled maˈorip, mihaenay sakaretengen ita koniya sapatalipaˈelal ni Pawlo.

14. Pakayni i kakaenen, o manan ko sapairasol no Fangcalay Cudad hani?

¹⁴ Milengo ci Yis to pakayniay i ‘anini a kakaenen ita’ a mitolon i, palimoˈotayho kitanan mitolon micangacang to araaw no Kawas ‘malaˈosi i fafekang no sera, mahecadto i kakarayan.’ (Matay 6:9-11) Ikor, malaˈosi ko araaw no Kawas i fafekang no sera i, samaanto ko kaˈorip ita hani? Itini Isaya 25:6-8, mikowanto ko Kitakit no Kawas i polong no cikiw i, wa kadofahto ko kakaenen. Paliˈayawayho somowal ko ˈOlic 72:16: ‘Kadofah ko kinaira no sera to panay, maledef ko pinaloma i taporoporoan.’ Kadofah ko pinaloma toniya sera, sapitanamaw kiso mitangtang to masakenakenaay kaesoˈay a kakaenen han? Roma i, wa ngaˈayho kiso mipaloma to niyah a fadisosoˈ, komaen to masakenakenaay a pinaloma. (Isaya 65:21, 22) Aka mapawan, wa ngaˈayho kiso malacafay to salawina widang komaen to kaesoˈay a kakaenen!

15. Oya patikolay maˈorip a tamdaw maminanamho to maanan hani? (Yohani 6:35)

¹⁵ ˈOsien ko Yohani 6:35. Oya komaenay to pakayni i kasapaan ni Yis a epang ato foting a ˈalomanay tamdaw, wa samaanto cangra hani? Soˈlin awaay ko pakasoˈlinay falocoˈ nangra ci Yisan itiya, kawra, wa mapatikol maˈorip cangra alatek. Itiya, mamaˈaraw iso ko pina tamdaw nangra alatek. (Yohani 5:28, 29) Na masowalay ni Yis: ‘O kako ko sapilifokaw to ˈorip no tamdaw a kakaenen. Cima ko tayniay i takowanan i, cowato ko mamacahiw.’ Itiya i, oya patikolay maˈorip a tamdaw maminanam toniya sowal ni Yis o manan ko tatodong. Papatirengho cangra to pakasoˈlinay falocoˈ pakayni i sapatefoc ni Yis, pakasoˈlin to kinafalahay ci Yis to ˈorip saki cangranan. Itiya i, wa ira ko sapakafanaˈ a limasmas i polong no sera, padama to patikolay maˈorip a tamdaw, ato mihofocan itini lakoing a wawa mafanaˈ to soˈlinay a kimad. Ngangaˈay mirienang toniya sapakafanaˈ, pairaay to lipahak kitanan! Padama to tamdaw patireng to ngaˈayay kalawidang ato Kawas, ikakaay ko komaen to kaesoˈay a kakaenen a lipahak.

16. Dotoc a lalakaw mamilengo to manan hani?

¹⁶ Malengoayto ita ko Yohani saka 6 fedengan a pina maˈoningay. Kawra, pakayni milifok to midaˈocay a ˈorip, adihayayho ko masowalay ni Yis a demak. Oha mamisinanot ko itiyaay a Yutaya tamdaw to sowal ni Yis, anini i, mahecaday kita. Mihaenay, dotoc a lalengoen lalakaw wa padadotoc milengo to Yohani saka 6 fedengan a maˈoningay.