Misamaan Kiso Ngaˈ Milifok to Midaˈocay a ˈOrip?

1. Pakayni to midaˈocay ˈorip, samaanay ko harateng no roma a tamdaw?

ˈALOMANAY a tamdaw pakayni sakatanoktok no tireng halafinay ko kaˈorip, misinanotay to kakaenen ato miwicawicay a mionto. Kawra pakayni midaˈocay ˈorip, cowa ko soˈlinay koni sanay cangra, harateng nangra ano malitengto i padadotocho a maˈorip, tada misemsemay a demak, cowa ko kahalamhaman koni. Kawra i Yohani 3:16 ato 5:24, somowalay ci Yis iraay ko tokel no tamdaw tahadaˈoc maˈorip, somowalayho o midaˈocay a ˈorip o naitiniay i Kawas a sapalemed.

2. Pakayni to midaˈocay ˈorip, i Yohani saka 6 fedengan o manan ko sowal ni Yis? (Yohani 6:39, 40)

² Kinacecayay midemak ci Yis to kasapaan, tano mimingay a epang ato foting mapafecolay ko masaefanay a tamdaw.a Saka tosa romiˈad, ˈalomanay tamdaw mikotoday ci Yisan tayra i Kapirnaum, oniya niyaroˈ itiniay i lawac no Kalili a Riyar. Itira, ya misowalan ni Yis to ˈalomanay, ikakaay to inacilaay midemakan ningra a kasapaan tada fahkaˈay ko ˈalomanay tamdaw. Hananay ni Yis cangra, iraay ko hatokel no tamdaw patatikol maˈorip, hanaca tahadaˈoc a maˈorip. (ˈOsien ko Yohani 6:39, 40.) Haratengen hena, o sowal ni Yis pakayni to mapatayay salawina iso iraay ko manan epoc hani? O sowal ningra paihkalay, ˈalomanay mapatayay tamdaw wa patatikol maˈorip, kiso ato salawina widang iso wa ngaˈay tahadaˈoc a maˈorip. Kawra dotoc o sowal ni Yis pasangaran nanay ko ˈalomanay tamdaw a cipinang. O manan ko sowal ni Yis hani? Padadotocen ita minengneng ko Yohani saka 6 fedengan.

3. Itini Yohani 6:51 o manan ko sowal ni Yis?

³ Midemakan ni Yis a kasapaan pakaen to ˈalomanay tamdaw a epang, maharatengay nangra ko itiyaho lalitengan nangra sapafeli no Kawas a mana. Mafanaˈay cangra masowalay no Fangcalay Cudad ko mana o ‘nai kakarayan matefad a kakaenen.’ (Yohani 6:31; ˈOlic 105:40) Orato i, misakadademakan ni Yis ko mana to sapikayat a sowal, padadotoc pakafanaˈ to ˈalomanay. Saan ci Yis o ‘nai kakarayan soˈlinay a kakaenen’ ko niyah, o ‘sapafeli no Kawas a kakaenen,’ o ‘sapilifokaw no tamdaw to ˈorip a kakaenen.’ (Yohani 6:32, 33, 35) Soˈlin o mana o sapafeli no Kawas, kawra oya komaenay to mana a tamdaw salikor mapatayayto. (Yohani 6:49) Dotoc mipalalinian ni Yis, sanay cingra: ‘Kako o naitiniay i kakarayan a tayni, o sapilifokaw no tamdaw to ˈorip a kakaenen. O cima ko komaenay toniya kakaenen, wa midaˈoc a maˈorip.’ (ˈOsien ko Yohani 6:51.) Tada makalioratay ko itiraay a Yutaya tamdaw, misamaanay sa ko sowal ni Yis o naitiniay i kakarayan a ‘kakaenen’ cingra hani? Misamaanay hano ikakaay han cingra to sapafeli no Kawas to lalitengan a mana ko nika ngaˈay hani? Sanayho ci Yis: ‘O sapafeli ako a kakaenen o heci ako kora.’ O manan ko tatodong hani? Sakacipinangaw ita ato salawina no mita misamaan milifok to midaˈocay ˈorip, misaaliay to sakacipinangaw to sowal ni Yis. Dotoc folfolen ita koni.

O MANAN KO TATODONG NO SOWAL NI YIS?

4. Misamaanay o roma tamdaw fahkaˈay to sowal ni Yis hani?

⁴ Matengil no ˈalomanay ko sowal ni Yis, o heci ningra ‘o pakayniay to ˈorip no tamdamdaw a sapafeli’ a kakaenen, tada fahkaˈay cangra. O harateng nangra soˈlinay o heci ni Yis ko sapafeli cangranan a komaen han? (Yohani 6:52) Dotoc a sowal ni Yis, alatek mangalef ko kafahkaˈ no tamdaw, sanay cingra: ‘Ano cowa ka komaen to heci no Wawa no tamdaw, cowa ka pinanom to remes ningra, wa awa ko ˈorip ilalomaˈ namo.’—Yohani 6:53.

5. Misamaanay o tatodong ni Yis cowa ko soˈlinay minanom to remes ningra hani?

⁵ I lintad ni Nowa, mikecengan no Kawas ko tamdaw cowa ka ngaˈay komaen to remes. (Satapangan 9:3, 4) Ikor, pakaynian ni Yihofa to Rikec ni Mosi miliyaw milasil toniya rikec. Sanay ko rikec, ano komaenayho to remes a tamdaw ‘wa patayen maemin.’ (Lifi 7:27) Midofdofan ni Yis koniya Rikec, pakafanaˈayho to tao a midofdof. (Matay 5:17-19) Mansa, cowa ko soˈlinay papikomaen ko tamdaw to heci, minanom to remes ningra. Pasowal ci Yis toniya kafahkaˈan a sowal, o araaw i, pakafanaˈ to tamdaw misamaan milifok to ‘tahadaˈocay a ˈorip.’—Yohani 6:54.

6. Misamaan kita a cipinang to misowalan ni Yis i Yohani 6:53 a sowal?

⁶ Mihaenay, misamaan kita cipinang to sowal ni Yis hani? Soˈlinay i, o sapatinako ko misowalan ni Yis. ˈAyaw noni, mipasowalan ningra koya Samariya fafahiyan na mihaenayto to demak, itiya sanay ko sowal ningra: ‘Ano cima ko minanomay to sapafeli ako a nanom i, wa tahadaˈoc cato ka soˈaw. O sapafeli ako a nanom wa malo pipowaran, padadotoc mahadak ko nanom, sapicadaaw ko tamdaw to midaˈocay a ˈorip.’ (Yohani 4:7, 14)b Oniya Samariya fafahiyan ano minanom to kalo a nanom, wa milifok to midaˈocay a ˈorip, cowa ka haen ko tatodong no sowal ni Yis. Mahecaday toni, ya pasowal cingra toya ˈalomanay i Kapirnaum i, komaen to heci ningra, minanom to remes ningra wa midaˈocto a maˈorip cowa ka saan.

MALALITINGAY KO SOWAL NI YIS ATO LAFI NO TAPANG HAN?

7. O roma a tamdaw misamaan a cipinang to sowal ni Yis i Yohani 6:53?

⁷ O roma a tamdaw sanay, misowalan ni Yis i Yohani 6:53 milingatay to Lafi no Tapang, samanen itini toniya Lafi no Tapang, masowalay ni Yis ko mahahecaday a sowal. (Matay 26:26-28) O harateng nangra, o sowal ni Yis kahacecay a tamdaw kakomaen to heci, minanom to remes ningra ngaˈ midaˈoc ko ˈorip, ano mihaen i, polong mirienangay to Lafi no Tapang a tamdaw sahtoay kakomaen to epang ato miˈinip to epah. Soˈlinay mahaen han? Mihecahecaan ˈalomanay ko tamdaw malacafay kitanan mirienang to Lafi no Tapang, wa mangalef ko sakafanaˈaw ita to sapacaˈof noniya salicay. Soˈlinay i, misowalan ni Yis i Yohani 6:53, ato patireng to Lafi no Tapang a misowalan ningra, cowa ka hecad ko tatodong. Dotoc wa mifolfol kita, oniya tosa a pakayraan icowaay ko kasairoma.

8. Pakayni i sowal ni Yis itini i Kalili ato Lafi no Tapang, o manan ko kasasiroma? (Nengnengen ko coka.)

⁸ Nengnengenho ita koniya tosa pakayraan o manan ko kasasiroma. Saka cecay, icowaay ato ihacowaay ci Yis pasowal to Yohani 6:53-56 hani? Itiniay i Kalili, itiya i Kongyen 32 miheca, maedeng ˈayaw no pipatireng ni Yis to Lafi no Tapang i Yirusalim a cecay miheca. Saka tosa, o cima ko mipasowalan ni Yis toniya sowal hani? Itiya pasowalan ni Yis to ˈalomanay a tamdaw. Kawra sakakaay ciharatengay nangra i, o saali no tireng no niyah, cowa ko nofalocoˈan a saali. (Yohani 6:26) Ya sowal ni Yis cowa ka cipinang cangra i, kalikiayto cangra cowato ko pakasoˈlin ci Yisan, o roma nisawawaan cato ka pikotod cingranan. (Yohani 6:14, 36, 42, 60, 64, 66) Kawra, i Kongyen 33 miheca patireng ci Yis to Lafi no Tapang i, edengan koya 11 a madimadiay a tarokos kalacafay cingranan. Soˈlin cowa ka cipinang cangra to sapakafanaˈ ni Yis, kamayan pakasoˈlin to o Wawa no Kawas ci Yis, o nai kakarayan a tayni. (Matay 16:16) Cowa ka hecad cangra to i Kaliliay a tamdaw! Pakahemekan ni Yis cangra: ‘Tahasiˈayaw kako to sapalifet i, cowa ka piliyas kamo takowanan.’ (Luka 22:28) Oniya tosa a demak paihkalayto, o sowal ni Yis itini Yohani 6:53, cowa ka somowal to itini i Lafi no Tapang misamaan ko demak no nisawawaan. Dotoc nengnengen ita ko roma a kasasiromaan.

O SOWAL NI YIS SAKACIEPOC TISOWANAN

9. Patireng to Lafi no Tapang i, o cima ko mipasowalan ni Yis toniya sowal?

⁹ Toya patireng to Lafi no Tapang i, pafeli ci Yis to awaay ko tamod a epang to tarokos, pasowal cangranan o epang mitaypiyaway to tireng ningra. Ikor, pafelian cangra to epah, halo somowal to epah mitaypiyaway to ‘katatelekan a remes.’ (Marko 14:22-25; Luka 22:20; 1 Korinto 11:24) Sinanoten, ‘patireng to katatelekan’ saan ci Yis. Onini o faelohay a katatelekan, o Kawas atoya itini i ‘Kitakit no Kawas’ mala hongtiay a Krisciyang a katatelek, cowa ko emin a tamdaw ko patatelekan. (Hipray 8:6, 10; 9:15) Soˈlin itiyaay a tarokos cowa ka cipinang to sowal ni Yis, kawra wa kaliki cangra manilnil no fangcalay saocor, malo faelohay katatelekan a mikiˈokay a tamdaw, halo malacafay ci Yisan i kakarayan a mala hongti.—Yohani 14:2, 3.

10. Itini i Kalili ci Yis ato patireng to Lafi no Tapang i, ora mipasowalan ningra a tamdaw o manan ko kasasiroma hani? (Nengnengen ko coka.)

¹⁰ Sinanoten, patireng to Lafi no Tapang i, pasowalan ni Yis ko ‘mimingay a ˈopo a siri,’ oya tayraay i kakarayan kalacafay cingranan mala hongti a tamdaw. (Luka 12:32) Mihaenay i, mirienang to Lafi no Tapang i, edengan koniya tamdaw ngaˈay komaen to epang ato epah. Itiya madimadiay a tarokos ato ikor a roma Krisciyang malo mimingay ˈopo a tamdaw. Kawra itira i Kalili i, mipasowalan ni Yis a tamdaw mahawpay ko ˈalomanay a tamdaw. Itiya i, pasayniay cingra i ˈalomanay a tamdaw a pasowal.

11. Hano mafanaˈ kita o misowalan ni Yis i Kalili, cowa ko pasayniay i mimingay ˈopo a tamdaw a pasowal?

¹¹ ˈAlomanay tahatengilay to sowal ni Yis i Kalili a tamdaw, o sapialaaw aca to kakaenen cingranan. Kawra, ano palalinien to soˈlinay a kakaenen, o araaw ni Yis i, wa ngaˈay misamacay cangra to sapilifokaw to midaˈocay a ˈorip a limasmas. Hananay ni Yis mifanaˈ cangra, mapatayay a tamdaw ira ko hatokel itini salikoray a romiˈad patikol a maˈorip, hanaca tahadaˈoc a maˈorip. Oya masowalay ni Yis a sapalemed cowa ka hecad to Lafi no Tapang, itini i Kalili masowalay ni Yis a sapalemed cowa ko mimingay a tamdaw ko mamilifok, ao emin a tamdaw ko ira ko hatokel a milifok. Sanay ci Yis: ‘O cima ko kakomaen toniya kakaenen, o nira ko tahadaˈoc a maˈorip. O hasapafeli a kakaenen i, o heci ako, o pakayniay i ˈorip no polong a tamdaw a pafeli.’—Yohani 6:51.

12. Sapilifokaw ko tamdaw to midaˈocay a ˈorip i, misamaan ko demak hani?

¹² Cowa ka saan ko sowal ni Yis, o hekal a cecacecay tamdaw oha mamilifok to midaˈocay a ˈorip. Soˈlinay i, edengan koya ‘komaenay toniya kakaenen,’ oya pakasoˈlinay midofdof ci Yisan a tamdaw ngaˈ milifok toniya sapalemed. ˈAlomanay i kiyokay a tamdaw sanay, ano pakasoˈlin aca ci Yisan, o mamilidong a tatapangan han ko pinengneng i, wa milifok to midaˈocay a ˈorip sanay. (Yohani 6:29) Kawra, pakasoˈlin ci Yisan cowaho ka edeng. I Kalili ˈalomanay ko tahatengilay to sowal ni Yis a tamdaw, isalakat pakasoˈlinay cingranan, kawra cowa ka padadotoc mihakelong cingranan.

13. Ano makalim malo soˈlinay a nisawawaan ni Yis i, sasamaan ko demak hani?

¹³ ˈAlomanay tamdaw makalimay mihakelong ci Yisan, o sapirenecaw aca to saali no niyah nai ci Yisan, tinakoen miadah to adada, miala to cowa ka cipayci a kakaenen, anca mitengil to matatodongay to harateng nangra a kimad. Kawra, ihkalay ko pitadtad ni Yis, caka ngaˈay sapilifokaw aca to dafong ngaˈ mihakelong cingranan. O araaw ningra tayni i fafekang no sera, cowa ko sapirenecaw aca to saali no tamdamdaw. Mamicada ko tamdaw to emin a sapakafanaˈ ni Yis a kimad, halo midofdof a midemak, mihaen i o soˈlinay a nisawawaan ningra.—Yohani 5:40; 6:44.

14. Sapilifokaw to epoc mikitini i heci ato remes ni Yis i, sasamaanen ita ko demak hani?

¹⁴ Ihkalay ko sowal ni Yis, paihkal ko ˈalomanay tamdaw to pakasoˈlinay faloco ngaˈ. Onini tada masakalimlaan to itiyaay a Yutaya tamdaw, anini pakayni kitanan i, mahecaday masakalimlaan koni. (Yohani 6:40) O manan ko papaihkalen to pakasoˈlinay falocoˈ hani? Oha papakasoˈlinen ko heci ato remes ningra wa paira to sakalidong. Mihaenay, o tatodong no Yohani 6:53 i, pairaen ita ko pakasoˈlinay falocoˈ to kinafalahan ni Yis a sapatefoc, ngaˈ mamilifok to midaˈocay a ˈorip. Ngangaˈay milifok toniya sapalemed a tamdaw awaay ko tolas.—Ifiso 1:7.

15-16. Mikitini i Yohani saka 6 fedengan, o manan ko mananamay ita a masakalimlaan a kimad?

¹⁵ Itini maˈoningay i Yohani saka 6 fedengan, taˈangayay ko epoc kitanan ato salawina no mita. Mahapinangayto ita, tada ciharatengay ci Yis to tamdaw. Tinakoen, itini i Kalili miadahan ningra ko adadaay tamdaw, pakafanaˈ to ˈalomanay mafanaˈ to Kitakit no Kawas, macahiw i pafelian cangra to kakaenen. (Luka 9:11; Yohani 6:2, 11, 12) O masakalimlaan i, padama cingra to tamdaw a cipinang to o ‘sapilifokaw no tamdaw to ˈorip a kakaenen’ cingra.—Yohani 6:35, 48.

¹⁶ To mihecahecaan mirienang to Lafi no Tapang a saˈopo i, oya ‘roma lopayˈay siri’ cowa ka ngaˈay komaen to epang ato epah. (Yohani 10:16) Kawra, pakayni i sapatefoc ni Yis paihkalay cangra to pakasoˈlinay falocoˈ, wa ngaˈay milifok to epoc nai ‘heci’ ato ‘remes’ ni Yis. (Yohani 6:53) O roma i, faelohay katatelekan a mikiˈokay a tamdaw, wa malacafay ci Yisan i kakarayan malo hongti a tamdaw, itini tora Lafi no Tapang wa kakomaen to epang ato epah. Haratengen, ano o manilnilay no fangcalay saocor a Krisciyang, anoca ono ‘roma lopayˈay siri,’ oya maˈoningay i Yohani saka 6 fedengan tada o taˈangayay ko epoc kitanan. Pakasoˈlinen ita a midofdof ci Yis, pakasoˈlin to sapatefoc ningra, ngaˈ wa milifok to midaˈocay a ˈorip.