LALENGOEN LALAKAW 3
RADIW 35 Hapinangen O Manan ko Masakalimlaan
Citanengay ko Pisaˈosi, Pakahemekay ci Yihofaan
‘Mikangodo ci Yihofaan o salakatay no taneng, mafanaˈ to Tada Fangcalay iraay ko kacipinang.’—TANENG 9:10.
KALIMLAAN NO LALAKAW
Nengnengen sasamaan kita misakadademak to sifanaˈ, kacipinang ato pafafidaˈay a inaneng a citaneng ko pisaˈosi.
1. Kita o cecacecay tamdaw wa misamaan ko demak to romiˈamiˈad?
TO ROMIˈAMIˈAD, adihayay ko hasasaˈosien no mita. Madoloay ko roma saˈosi, tinakoen o manan ko hasakalanam, anca pina ko toki mafotiˈ. O roma saˈosi cowa ko madoloay, o hatiniay a saˈosi milingatay to sakatanoktok no tireng ato falocoˈ, alatek milingatayho to salawina ato widang no mita, ato kalalaˈed ita aci Yihofaan. Nanay o saˈosi ita sakaciepoc no niyah ato paro no lomaˈ sanay ko harateng ita. Masakalimlaan i, makalimay kita to misaˈosian ita wa ngaˈay pakahemek ci Yihofaan.—Loma 12:1, 2.
2. O masamaanay a pakayraan papadama kitanan citaneng ko pisaˈosi?
2 Sakacitanengaw ko pisaˈosi ita i, wa (1) cipinang to demak, (2) sinanoten ko harateng ni Yihofa, (3) palalinien ko masasiromaay a saˈosi. Oniya lalakaw mamilengo toniya tolo a pakayraan, milengoho to sasamaan kita pahatatanam to pafafidaˈay a inaneng no niyah.—Taneng 2:11.
CIPINANG TO DEMAK
3. ˈAyaw no mamisaˈosi hano cipinangho to pakayraan hani? Patinakoen hena a mitadtad.
3 Sakacitanengaw ko pisaˈosi i, saka cecay i, kacipinang to demak. Hano masakalimlaan koni hani? Haratengen hena, cecay pakidemay ko adada a tamdaw ano panengneng to ising, cowa ka pikinsa ko ising cingranan, cowa ka pilicay to adada ningra, wa saˈosi sa to sasamaan ko sapiadah cingranan han? Cowa. Malecaday, ano songilaˈen ita cipinang to milingatay a pakayraan, oha cacitaneng ko pisaˈosi. Mihaenay, sasamaanen ko pidemak hani?
4. Mikitini Taneng 18:13, sakacipinangaw toniya demak wa misamaan ko demak iso? (Nengnengen ko coka.)
4 Ngaˈayay kiso pakayni i salicay cipinang to pakayraan. Ano ira ko widang mitahidang tisowanan a mihalama, malingad kiso han? Ano caka fanaˈ kiso toniya milimasmasay a tamdaw i, anca cowa ka cipinang toniya limasmas nangra, ngaˈayay licayen cangra: “Oniya demak wa icowa a kitiraan? Hacowaay a tatokian? Hakowaay ko mamirienang a tamdaw? Cimacima ko mirienangay? Cima ko ciˈinorongay toniya demak? Itini toniya demak, o manan ko demak no ˈalomanay? Wa ira ko epah han?” Isalakat cipinangho to caˈof noniya salicay, papadama tisowanan citaneng ko pisaˈosi.—ˈOsien ko Taneng 18:13.
Pakaynien i salicay a cipinang to demak (Nengnengen ko saka 4 fatac)a
5. Cipinang kiso to pakayraan i, sasamaanto ko demak iso?
5 Dotoc, Ngaˈayay misinanot kiso to kafanaˈan iso a kihcod a pakayraan. Tinakoen, ano toya romiˈad ira ko cowa pidofdof to palinian no Fangcalay Cudad a tamdaw mirienang i, anca wa ira ko epah toya romiˈad, kawra awaay ko ciˈinorongay misinanot to adihayay ko miˈinipan a epah. Onini a demak wa masasifod awaay ko misikolay alatek han? (1 Pitiro 4:3) Anca oniya tatokian o mamirienang to saˈopo anca o pitosilan a tatokian. Sasamaan ko demak iso? Misongilaˈ a misinanot to kafanaˈan iso a kihcod a pakayraan, o palaˈosiayto kiso to citanengay a saˈosi. Nohatini, mafanaˈayto kiso pakayni toniya demak a harateng no niyah, kawra oha mamisaˈosi kiso a milicay to niyah: Samaanay ko harateng ni Yihofa hani?—Taneng 2:6.
SINANOTEN KO HARATENG NI YIHOFA
6. Mikitini Yakop 1:5, hano mamicangacang kita to sapadama ni Yihofa?
6 Tolonen ci Yihofa a micangacang papadama tisowanan cipinang to harateng Ningra. Sowal no Fangcalay Cudad, ci Yihofa ‘o hinapaladaˈay, hanaca cowa mikapoˈi to tamdaw.’ (ˈOsien ko Yakop 1:5.) Mikiˈokay Cingra pafeli kitanan to taneng, ho mahapinang ita ko saˈosi no niyah wa pakahemek Cingranan hokira.
7. Sasamaan kiso cipinang to harateng ni Yihofa hani? Patinakoen a mitadtad.
7 Maharek kita a mitolon i, sinanoten ko sapacaˈof ni Yihofa. Saharateratengen hena, makaliorat kiso to lalan i piliwkoan, mikilimay kiso to itiraay a tamdaw to sapadama. Maharek kiso a milicay to lalan caka pitala to sapacaˈof a milaliwto kiso han? Cowa. Mitoroˈ cingra to halalan iso i, misongilaˈay kiso a mitengil. Malecaday, mitolon micangacang to taneng ni Yihofa ikor, tengilen ko sapacaˈof ni Yihofa, ora pakayraan i, kilimen ko milingatay a rikec ato safalod no Fangcalay Cudad. Tinakoen, misaˈosi to na malengoay isawni a demak i, ngaˈayay saharateratengen, pakayni i lawla ato tatiihay a widang a cawmaˈ, samaanay ko pinengneng no Fangcalay Cudad? Ngaˈayayho haratengen, misamaanay hano micangacang to Kitakit no Kawas ikakaay to sakarenecaw no niyah a saali hani?—Matay 6:33; Loma 13:13; 1 Korinto 15:33.
8. Sakacipinangaw to harateng ni Yihofa, sasamaan ko demak iso hani? (Nengnengen ko coka.)
8 Nolatekay, iraay ko padamaay tisowanan ngaˈ cipinang to harateng ni Yihofa. Sasamaan ko demak hani? Wa ngaˈay kiso mikilim to cinalifetan a salikaka a milicay. Kawra, ano malalok a mikingkiw wa sakaciepoc tisowanan. Misakadademak kiso to Pirorodan to Mitepangan Cudad no Misawacayay Tamdaw ni Yihofa ato Sakayat no Kaˈorip no Krisciyang toniya kakingkiwen a lalosidan, wa makilim iso ko adihayay sapadama a lalakaw. Matengil iso ko sapaini no tao ato makilimay a lalakaw ikor, haratengen, o patosokan iso i, o citanengay ko pisaˈosi a pakahemek ci Yihofaan.
Sinanoten ko harateng ni Yihofa (Nengnengen ko saka 8 fatac)b
9. Misamaan kita pakasoˈlin to saˈosi no niyah wa ngaˈay pakahemek ci Yihofaan hani? (Ifiso 5:17)
9 Hano mafanaˈ kita to mahemekay ci Yihofa to pisaˈosi ita hani? Salakat, tangongolen ita a mafanaˈ ci Yihofaan. Sanay ko Fangcalay Cudad: ‘Mafanaˈ to tada fangcalay iraay ko kacipinang.’ (Taneng 9:10) Ano tangongol ko nika fanaˈ ita to capeling ato araaw ni Yihofa, cipinangho o manan ko kaolahan ato kaˈintehan Ningra, wa ira ko soˈlinay noka cipinang. Saharateratengen iso hena: “Pakayni i kafanaˈ ako ci Yihofaan, o manan a saˈosi o papakahemek Cingranan hani?”—ˈOsien ko Ifiso 5:17.
10. Misamaanay o safalod no Fangcalay Cudad hano ikaka to lalengawan no paro no lomaˈ ato pinangan no niyaroˈ hani?
10 Nolatekay, sapakahemekaw kita ci Yihofaan, alatek wa matoleden ko ingataay ita a tamdaw. Tinakoen, o roma wama wina miroeroay to fafahiyan wawa, papikadafoay cingra to cihafayay, anca adihayay ko sapakotiya a tamdaw. Soˈlin cowa ka pisakareteng koniya tamdaw to kalalaˈed ci Yihofaan, o wama wina kamayan papikadafo cingranan. Mihaen ko demak no wama wina o sakangaˈayaw no wawa, ciraramod ikor wa ngaˈay caka cariraw to kaˈorip, kawra oniya fafahiyan salikaka wa misaharaterateng cingra: Masamaanay a faˈinay ako wa ngaˈay padama takowanan patanoktok to kalalaˈed aci Yihofa? Samaanay ko pinengneng ni Yihofa toniya demak? O sapacaˈof itiniay i Matay 6:33, sanay ko sinael o Krisciyang wa ‘isalakaten a micangacang ko Kitakit no Kawas.’ Mansa, soˈlin mikangodoay kita to wama wina ato roma tamdaw, kawra o misakaretengan ita i, o sapakahemekaw ci Yihofaan.
PALALINIEN KO MASASIROMAAY A SAˈOSI
11. O masamaanay a capeling ko masowalay no Filipi 1:9, 10 ngaˈay padama tisowanan palalini to masasiromaay a saˈosi?
11 Misinanot kiso to milingatay a safalod no Fangcalay Cudad ikor, misaaliay palalinien ko masasiromaay a saˈosi. (ˈOsien ko Filipi 1:9, 10.) O pafafidaˈay a inaneng wa padama tisowanan mahapinang ko cowa ka hecad a mipiliˈan wa ira ko masamaanay a minaroˈan. I roma pakayraan madoloay kiso misaˈosi, kawra nolatekay adihayay ko maharatengay a lalangian. Ano mahaenay a pakayraan i, o pafafidaˈay a inaneng wa padama tisowanan citaneng ko pisaˈosi.
12-13. O pafafidaˈay a inaneng samaanay padama tisowanan citaneng ko pisaˈosi, mipiliˈ to matatodongay a tayal hani?
12 Saharateratengen ko ilaenoay pakayraan. Sapipaririˈaw to paro no lomaˈ, misaaliay to katayalan kiso. Nohatini, iraay ko tosa papiliˈen iso a tayal. Mafanaˈay kiso to kihcod a pakayraan, tinakoen oniya tayal o masamaanay ko demak, tatokian, mapalakay i lalan a toki. Oniya tosa a tayal cowa ka pisafelit to safalod no Fangcalay Cudad. Alatek o cecay ko mipiliˈan iso, samanen maolahay kiso to dademaken noniya tayal, anca adihayay ko lifon. Kawra, ˈayaw no mamisaˈosi i, haratengenho iso ko roma a lalangian.
13 Tinakoen, ngaˈayay saharateratengen iso, oniya tayal wa malawa ako ko saˈopo han? Wa adihay ko mamapalak a toki, micona to sapidimokosaw kiso to paro no lomaˈ itini no cihaleday to pakasoˈlinay falocoˈ han? Saharateratengen koniya salicay oha papadama tisowanan ‘mihapinang to o manan ko masakalimlaan a demak.’ Mihaen, wa citaneng ko pisaˈosi iso, milifok to sapalemed ni Yihofa, caka micangacang kiso to pakadafongan a misakahmaw to midokoay a demak ato saali no paro no lomaˈ.
14. Misamaanay ko pafafidaˈay a inaneng ato olah papadama kitanan eca ka ‘pakapolin to tao’ hani?
14 O pafafidaˈay a inaneng wa ngaˈay padama kitanan misinanot to harateng no tao, mihaen o pisaˈosi ita eca ka ‘pakapolin to tao.’ (Filipi 1:10) Misaˈosi to o manan ko hacaˈedong, o notekedan a demak i, misinanot to harateng no tao o masakalimlaan. Ano maolah kiso to roma a rikoˈ, kawra o pinengneng no salikaka ato tao cowa ka sanengseng koniya rikoˈ, wa misamaanto ko demak iso? O pafafidaˈay a inaneng wa padama kitanan mikangodo to harateng no tao, o olah wa pakalalok kitanan ‘ciharateng to tao,’ mitawmec to matatodongay a caˈedong. (1 Korinto 10:23, 24, 32; 1 Timoti 2:9, 10) Mihaen i, o saˈosi ita paihkalay to mikangodoay maolahay to tao.
15. ˈAyaw no mamisaˈosi to kalimlaan a demak i, o manan ko sasinanoten iso?
15 Pakafanaˈ ci Yis kitanan isalakaten ‘misaˈosi to hahakowa ko mamapalak a ˈaca.’ (Luka 14:28) Mansa, ano mamisaˈosi to kalimlaan a demak, isalakaten miharateng to hahakowa ko mamapalak iso a ˈaca. Oniya ˈaca mahawpay ko hahakowa ko mamapalak iso a toki, ˈicel ato hafay. Itini roma pakayraan, misaaliay kiso sakalalengoaw to paro no lomaˈ, haratengen to sasamaan cangra midama tisowanan. Misinanot toniya demak hano masakalimlaan hani? Samanen mihaen to demak alatek pakacipinang tisowanan to misamaan a misalof, anoca mipiliˈ to roma matatodongay a pakayraan. O roma i, malalengo to paro no lomaˈ, tengilen ko sapaini a harateng nangra, wa mahemek cangra a midama tisowanan, ho malaˈosi ko mihalakaan iso.—Taneng 15:22.
KA CITANENG KO PISAˈOSI
16. Misakadademak kiso to manan a pakayraan wa citaneng ko pisaˈosi? (Nengnengen ko sapatongal lalakaw “Sasamaan a Citaneng ko Pisaˈosi.”)
16 Ano doedoen iso ko masowalay a pakayraan a midemak, wa citaneng ko pisaˈosi. Ano talaˈayaway kiso cipinang to kihcod a pakayraan, mikilim to milingatay a safalod no Fangcalay Cudad, wa malaˈosi ko misaˈosian iso to papakahemek ci Yihofaan. Nohatini ngaˈay a micangacang a mitolon kiso ci Yihofaan a padama tisowanan a malaˈosi.
17. Ka citaneng ko pisaˈosi o kalimlaan a pakayraan o manan?
17 Alatek adihayayto ko citanengay a pisaˈosi no miso, kawra haratengen, citaneng ko saˈosi o mitiˈeray to taneng ni Yihofa, cowa kono niyah a inaneng ato nalifetan. Edengan ci Yihofa ko papafeli tisowanan to soˈlinay a sifanaˈ, kacipinang ato pafafidaˈay a inaneng, paira to soˈlinay a taneng no miso. (Taneng 2:1-5) Wa padamaen ni Yihofa kiso citaneng ko misaˈosian a pakahemek Cingranan.—ˈOlic 23:2, 3.
RADIW 28 Mala Widang ni Yihofa
a TATODONG NO COKA: Malalengoay ko pina kaemangay salikaka to macadaay nangra a satahidang no lawla.
b TATODONG NO COKA: Ilalomaˈ no cecay faˈinayan salikaka talaˈayaway mikilim to lalakaw, ikor ngaˈ misaˈosi to mamalingad hokira.