Padadotoc Tano Pakasoˈlinay Falocoˈ ko Waywayan a Dademak

1. Mitikol ko tarokos ci Pawlo to hakelong no ˈorip no niyah hano marenecen hani?

TAROKOS ci Pawlo mafanaˈay to mamapatay ko niyah, kawra mitikol to hakelong no ˈorip tada marenecan nanay cingra. Sanay cingra: ‘O cacikayen malaheciayto ako a comikay, o pihakelongan maˈimeray ako a mitafo.’ (2 Timoti 4:6-8) I katayalan ni Pawlo i ci Yihofaan i, adihayay ko citanengay a saˈosi, pakasoˈlinay cingra to mihaydaan ni Yihofa cingra. Makalimay kita citaneng ko saˈosi, hanaca macada ko pihayda ni Yihofa. Sasamaan ko demak hani?

2. Tano pakasoˈlinay falocoˈ ko waywayan a dademak o manan ko tatodong hani?

² Masowalay ni Pawlo ko niyah ato romaroma madimadiay a Krisciyang sanay: ‘Tano waywayan ita a dademak, pakayniay i pakasoˈlinay falocoˈ, coko maˈaraway aca.’ (2 Korinto 5:7) O manan ko tatodong no sowal ni Pawlo hani? O waywayan ato demak no tamdaw, ano pakayni aca i maˈaraway, paihkalay to pisaˈosi ningra, o maˈaraway, matengilay, ato nafalocoˈan no niyah ko miharatengan. Roma i, ano tano pakasoˈlinay falocoˈ ko waywayan no tamdaw, ano misaˈosi cingra i, wa pakasoˈlin ci Yihofaan. O waywayan ningra paihkalay, pakasoˈlinay cingra ano dofdofen ko sakayat ni Yihofa a midemak, wa ngaˈayto ko kaˈorip nohatini, pakasoˈlinho to papafelien ni Yihofa to ngaˈayay a lifon noikor.—ˈOlic 119:66; Hipray 11:6.

3. Tano pakasoˈlinay falocoˈ ko waywayan a midemak kita, wa milifok to manan a epoc? (2 Korinto 4:18)

³ Ano misaˈosi i, soˈlin wa mitiˈer kita to nafalocoˈan no niyah, kawra i kalimlaan a saˈosi i, ano o maˈaraway aca ato matengilay ko miharatengan i, alatek wa cowa ka tatodong koniya saˈosi. Misamaanay hani? Samanen o maˈaraway ato matengilay ita, alatek coko soˈlinay. Ano soˈlinayto han i, o waywayan ato midemakan ita ano tano o maˈaraway aca, telocto, alatek wa misakahmaw to araaw ato sapalimoˈot ni Yihofa. (Patnakay 11:9; Matay 24:37-39) Kawra, tano pakasoˈlinay falocoˈ ko waywayan a midemak, alatek o saˈosi ita wa ‘micada ko Tapang.’ (Ifiso 5:10) Midofdof kita to sakayat ni Yihofa a midemak, wa rihaday ko falocoˈ, milifok to soˈlinay a lipahak. (ˈOlic 16:8, 9; Isaya 48:17, 18) Cowa konini aca, padadotoc tano pakasoˈlinay falocoˈ ko waywayan a dademak kita, wa milifokho to midaˈocay a ˈorip.—ˈOsien ko 2 Korinto 4:18.

4. Sasamaan mafanaˈ kita to pakasoˈlinay falocoˈ ko waywayan a midemak anca tano maˈaraway aca hani?

⁴ Sasamaan mafanaˈ kita to pakasoˈlinay falocoˈ ko waywayan a midemak, anca tano maˈaraway aca hani? Miharateng toniya salicay wa mafanaˈ to sapacaˈof: “Ano mamisaˈosi i, o manan a lalangian ko miharatengan hani? O maˈaraway aca ko miharatengan ako han? Anca o pakasoˈlinay ci Yihofaan a falocoˈ no mako ko midofdofan, ato sakayat ni Yihofa a misaˈosi han?” Dotoc, mamilengo kita to tolo a lalangian, misamaan tano pakasoˈlinay falocoˈ ko waywayan a midemak: Mipiliˈ to hakatayalan; mipiliˈ to hararamod; macada ko sakayat no likakawa no Kawas. Wa mihacecay kita a milengo to manan ko haharatengen a lalangian, ngaˈ citaneng ko pisaˈosi.

MIPILIˈ TO HAKATAYALAN

5. Mipiliˈ to hakatayalan kita i, o manan a lalangian ko miharatengan hani?

⁵ Makalimay kita tano ˈicel no niyah a ngaˈay paririˈ to paro no lomaˈ. (Patnakay 7:12; 1 Timoti 5:8) O roma katayalan adihayay ko lifon, ngaˈay maˈaca ko hasakaˈorip a dafong, iraho ko hahopeden a payci. Kawra o roma a katayalan cowa ka adihay ko lifon, maedengay aca to hasakaˈorip. Ano mamisaˈosi to katayalan i, wa miharateng kita to hakowaay ko lifon noniya tayal. Kawra, ano onini aca a lalangian ko miharatengan i, o waywayan a midemak tano maˈaraway aca coko pakayniay i pakasoˈlinay falocoˈ.

6. Mipiliˈ to katayalan i, sasamaan kita tano pakasoˈlinay falocoˈ a misaˈosi? (Hipray 13:5)

⁶ Mipiliˈ kita to katayalan i, ano ciharatengay kita to sasamaan milingat to kalalaˈed aci Yihofaan koniya tayal i, o pakayniay i pakasoˈlinay falocoˈ ko waywayan a midemak. Ngaˈayay licayen ko niyah: “Oniya tayal wa papidemak takowanan to kapiliˈan ni Yihofa han?” (Taneng 6:16-19) “Mipiliˈ toniya tayal wa micona to midokoay a demak no mako, anca macerid cowa ka kalacafay to paro no lomaˈ han?” (Filipi 1:10) Ano “hayi” sa ko caˈof i, aka micada to mahaenay a katayalan. Soˈliˈlin pasangaray mikilim to katayalan, kawra mihaen ko saˈosi o citanengay koni. Mipiliˈ kita to katayalan o tano pakasoˈlinay falocoˈ a misaˈosi, paihkalay to pakasoˈlinay toha mamidipot ci Yihofa kitanan.—Matay 6:33; ˈosien ko Hipray 13:5.

7-8. I Katimol a Amilika a faˈinayan salikaka samaanay tano pakasoˈlinay falocoˈ ko waywayan a midemak? (Nengnengen ko coka.)

⁷ Ci Hawiea faˈinayan salikaka i Katimol a Amilika, mafanaˈay cingra tano pakasoˈlinay falocoˈ ko waywayan a midemak o kalimlaan. Sanay cingra: “Na makalimay kako sakairaaw to kasemeran no tao a katayalan, oniya tayal ikakaay to isaˈayaway a lifon, hanaca tada malikoan nanay kako, oranto, misingsianto ako.” Ikor, milimasmasan no kosi ko ˈakawangay ko saaroˈan a masasoˈaraw takowanan. Kawra, sapirienangaw to misakafahay ci Hawie, sanay cingra: “Iˈayaw no masasoˈaraw i, mitolonay kako micangacang to sapadama ni Yihofa. Pakasoˈlinay kako o Cingra aca ko mafanaˈay to o manan ko sangaˈayay takowanan. Makalimay kako ngaˈay ko kacakat i katayalan, kawra ano micona koniya tayal takowanan i pidokoan a patosokan i, cowa ko mamicada toniya tayal kako.”

⁸ Sanay ci Hawie: “Toya masasoˈaraw i, oya mikowanay no katayalan sanay, oniya tayal wa macerid a miciyapan, tano mikangodoay a waywayan kako a paihkal to saali no niyah. Oha mamirienang kako to midokoay no Krisciyang a demak, mansa cowa ka ngaˈay macerid a miciyapan.” Milalang toniya tayal ci Hawie. Ikor no tosa a lipay, misatapangayto malo miceriday misakafahay cingra. Ikor no pina folad, makilimay ningra ko apotoˈay ko toki a tayal. Sanay cingra: “Pacaˈofay ci Yihofa to satolon no mako, pafeli takowanan to matatodongay a misakafah a katayalan. Maolahay kako toniya tayal. Samanen adihayayto ko toki ako dademak ci Yihofaan ato salikaka.

9. I nalifetan ni Terasor mananamay iso ko manan?

⁹ Ano miconaay kitanan ko tayal tano pakasoˈlinay falocoˈ ko waywayan a midemak i, sasamaan aki? Nengnengen ko nalifetan no i Kangkoay ci Terasor. Sanay cingra: “Na macadaay ako ko ngaˈayay a katayalan, toloay kaikaka to isaˈayaway a lifon koniya tayal, hanaca o kalikoan ako kasemeran no tao koniya tayal.” Nikawrira, maceriday miciyapan ci Terasor, telocto i, maceriday malawa ningra ko saˈopo. Roma i, papisamangahay ko cafacafay ningra, papihimed to misakaniway a waywayan no kosi. Sapihawadaw ci Terasor toniya tayal, kawra calemcemay cingra pasangar mikilim to katayalan. O manan ko padamaay cingranan a mifalic hani? Sanay cingra: “Hapakuk 3:17-19 patalipaˈelalay takowanan, soˈlin awa ko lifon ako, wa dipoten ni Yihofa kako, mansa sawad sanayto kako toya tayal. ˈAlomanay a tawki sanay, sakairaaw no ˈakawangay a lifon i, wa kinafalah to kihcod ko matayalay tamdaw, mahawpay caka cerid kalacafay to paro no lomaˈ ato pihakelongan ningra. Kawra, mahemekay kako citenang ko pisaˈosi, madipot ko kalalaˈed aci Yihofa ato paro no lomaˈ. Ikor no cecay miheca, padamaan ni Yihofa kako makilim ko ngaˈayay a katayalan. Soˈlin cowa ka adihay ko lifon, kawra maedengayto ko payci a paririˈ to paro no lomaˈ, adihayayho ko toki matayal saki ci Yihofaan. Paisalakaten ita ci Yihofa, alatek wa ira ko pasangar i kaˈorip, kawra wa dipoten ni Yihofa kita.” Ano pakasoˈlin kita to sakayat ni Yihofa ato mikiˈokan Ningra i, wa ngaˈayto padadotoc tano pakasoˈlinay falocoˈ ko waywayan a midemak, wa palemeden ni Yihofa kita.

MIPILIˈ TO HARARAMOD

10. Mipiliˈ to hararamod i, o manan a lalangian ko haharatengen hani? Kawra oha mamisinanot to manan?

¹⁰ O raramod o sapatelong ni Yihofa, sakaciraramodaw o matatodongay a harateng koni. Ano mipiliˈ to hararamod i, o fafahiyan salikaka o papotalay no faˈinayan salikaka ko minengnengan, sasowalen ato waywayan, o pinengneng no tao, hafay, ˈinorong no lomaˈ, ato harateng ningra toniya faˈinayan salikaka.b Oniya lalangian soˈlin o kalimlaan, kawra ano onini aca ko miharatengan noniya fafahiyan salikaka, mahaen o pisaˈosi ningra o maˈaraway aca.

11. Mipiliˈ to hararamod i, sasamaan kita tano pakasoˈlinay falocoˈ a misaˈosi? (1 Korinto 7:39)

¹¹ Maˈaraw ni Yihofa ko salikaka ita mipiliˈ to hararamod a midoedo to sakayat Ningra a midemak i, maedeng malikoan nanay Cingra. Tinakoen, paifalocoˈen no salikaka ko sapalimoˈot no Fangcalay Cudad, mitala mataˈlif ko ‘no kaemangan a lintad’ ngaˈ miharateng to sakaciraramodaw. (1 Korinto 7:36) Mipiliˈ to hatatodong no raramod i, o miharatengan nangra to hararamod, iraay ko makapahay capeling a mala faˈinay anca fafahi i pinengneng ni Yihofa. (Taneng 31:10-13, 26-28; Ifiso 5:33; 1 Timoti 5:8) Ano cowa ko micadaay to paputisem a Misawacayay Tamdaw ni Yihofa maolahay cangranan, wa milalang cangra, samanen midofdofay cangra to 1 Korinto 7:39 (ˈOsien) a sapalimoˈot, o ‘ilalomaˈay aca no Tapang a tamdaw ko hararamod.’ Padadotocay cangra tano pakasoˈlinay falocoˈ ko waywayan a dademak, pakasoˈlinay cangra toha mamidipot ci Yihofa to saali no nafalocoˈan nangra, hanaca o sangaˈayay ko pidemak Ningra awaay ko mikikakaay.—ˈOlic 55:22.

12. I nalifetan ni Losa mananamay iso ko manan?

¹² Nengnengen ko nalifetan no fafahiyan salikaka ci Losa, misakafahay cingra i Koronpiya. Pakayniay i katayalan, maceriday cingra macacawmaˈ to cowa ko Krisciyang a faˈinayan. Ikor, oniya faˈinayan maolahay cingranan, ano ci Losato maolahay cingranan. Sanay ci Losa: “Mipadamaay to tamdaw i pikilomaˈan, awaay ko tatiihay pinangan, o ngaˈayay tamdaw nengnengen. Maolahay kako to picada ningra takowanan. Iraay ko kaolahan ako malo faˈinay a capeling ningra, kawra cowa ko Misawacayay Tamdaw ni Yihofa cingra. Milalang to kaolah ningra pasangarayto, samanen matoˈolay kako itiya, sakaciraramodaw, kawra awaay ko makilimay to hararamod i lalomaˈ no soˈlinay kimad a tamdaw.” Nikawrira, cowa ka samacayen ni Losa minengneng ko maˈaraway a demak. Midotimay cingra to sasaˈosien wa samaan milingat to kalalaˈed aci Yihofa, mansa lalanganto ningra ko kacacawmaˈ toya faˈinayan, padadotoc fanekfek i no pidokoan a tayal. Cowa ka halafin, macadaay ningra ko satahidang no SKE, nohatini o mikiriwiˈay misakafahay cingra. Sanay ci Losa: “Patomesan ni Yihofa ko hemek no falocoˈ ako!” Nolatekay tano pakasoˈlinay falocoˈ ko waywayan a midemak cowa ko madoloay, mangalef ira ko pakidemay ko saali no falocoˈ pakayni toniya demak. Kawra, ano midofdof kita to harateng ato sakayat ni Yihofa, wa paira to kadofahay a sapalemed.

MACADA KO SAKAYAT NO LIKAKAWA NO KAWAS

13. Macada ko sakayat no likakawa no Kawas i, alatek o manan ko kaciharatengan ita?

¹³ O malohemay malitengay i kasakopang, kasakilac kantok, katayalan no fenpo anca Malohemay Malitengay i Congpo maceriday milasil to milingatay to pidokoan a sakayat. Kawra nolatekay cowa ka cipinang kita hano ira ko mahaenay a sakayat. Ano mahaen, alatek o maˈaraway aca ita noniya sakayat mamifekad to manan a pasangar. Hanaca wa misinanot toya milasilay a salikaka to kadangocan nangra. Kawra, ano mihaen kita to demak i, o pakayniay aca i maˈaraway a midemak.

14. O manan ko maharatengay ita, oha ngangaˈay i macada ko sakayat i, pakayni pakasoˈlinay falocoˈ ko waywayan a midemak? (Hipray 13:17)

¹⁴ Pakayni i pakasoˈlinay falocoˈ ko waywayan a midemak, wa pakasoˈlin to mikayatan ni Yihofa ko likakawa Ningra nohatini, pakasoˈlinho to mafanaˈay Cingra to pakayraan ita. Mansa, wa tangsol kita midofdof to sakayat halo tawlik a midemak. (ˈOsien ko Hipray 13:17.) Mafanaˈay kita, ano midofdof kita wa micowat to makakedecay no kasakopang. (Ifiso 4:2, 3) Pakasoˈlinay kita, soˈlin cowa ka lefot ko mikayatay a salikaka, kawra ano midofdof kita to sakayat, wa milifok to sapalemed ni Yihofa. (1 Samuil 15:22) Pakasoˈlinayho kita, ano salofen sa ko sakayat i, tahira i matatodongay a tatokian, wa mihaen ko demak ni Yihofa.—Mika 7:7.

15-16. Soˈlin cisasa ko faˈinayan salikaka to macadaay a sakayat, kawra o manan ko padamaay cingranan, tano pakasoˈlinay falocoˈ ko waywayan a midemak hani? (Nengnengen ko coka.)

¹⁵ Pakasoˈlin ko falocoˈ ita midofdof to sakayat ngaˈ milifok to epoc. Nengnengen ko tinakoan. I Milo, soˈlin mafanaˈay ko ˈalomanay to sasowalen no Sipanya, kawra ˈalomanay ko somowalay to niyah a sasowalen, mahawpay ko Keciwya a sasowalen. Halafinay a miheca, somowalay toniya sasowalen a salikaka i pitosilan a kilac mikilim to somowalay to Keciwya a tamdaw. Ikor, sapidofdofaw to sarikec no sifo, cowa ka ngaˈay pakayni toniya pakayraan mikilim to tamdaw. (Loma 13:1) Calemcemay ko roma salikaka misakadademak to faelohay pakayraan, alatek cowa ka ngaˈay ko minaroˈan no mitosilay. Kawra, kamayan midofdofay ko salikaka to sakayat no likakawa, telocto palemedan ni Yihofa cangra, padama cangranan makilim ko ˈalomanay somowalay to Keciwya a tamdaw.

¹⁶ Ci Kaywen o malohemay malitengay no Keciwya a kasakopang, isaˈayaw na calemcemay cingra toniya faelohay sakayat, sanay cingra: “Macada koniya sakayat i, o harateng ako: ‘Wa makilimho nohatini ko somowalay to Keciwya a tamdaw han?’” Ikor samaanay ko demak ni Kaywen? Sanay cingra: “Maharateng ako ko Taneng 3:5, maharatengay ko nalifetan ni Mosi. Palimoˈotan ni Yihofa cingra mikayat to Israil tamdaw miliyas to Icip, tahira i lawac no Kahngangay a Riyar. Kawra hato awaayto ko lalan itira, ira sato ko sofitay no Icip, awaay ko pilaliwan no Israil tamdaw. Kawra, kamayan midofdof ci Mosi to sakayat. Telocto i, tano kasapaan ci Yihofa a milidong to Israil tamdaw.” (Kasadakan 14:1, 2, 9-11, 21, 22) Makalimay ci Kaywen midofdof to faelohay a sakayat, misalof to sapitosil a pakayraan. Teloc samaanayto? Sanay cingra: “O sapalemed ni Yihofa cowa ko maharatengay niyam! Isaˈayaw, mitosil kami mara:ayay ko rarakaten a lalan, cecayay tosaay ko makilimay to somowalay to Keciwya a tamdaw. Nohatini sato, padeteng sanay kami tayra i kasaˈopoan no somowalay to Keciwya a kitiraan a mitosil, telocto ˈalomanay ko milengoan niyam a tamdaw, ˈalomanayto ko lalisoˈen ato pakingkiwan, matongalayto ko mirienangay to saˈopo niyam.” Oniya tinakoan paihkalay, tano pakasoˈlinay falocoˈ ko waywayan a midemak kita, wa milifok to sapalifon ni Yihofa.

17. Mikitini toniya lalakaw o manan ko mananamay iso?

¹⁷ Malengoayto ita ko tolo a kalimlaan a pakayraan samaan tano pakasoˈlinay falocoˈ ko waywayan a midemak. Cowa konini aca, i kalo nokaˈorip wa mihaen ko demak, tinakoen i lawla, pakafanaˈan, paririˈ to wawa. Ano o mananto a demak ko hasasaˈosien ita, cowa ko maˈaraway aca a misaˈosi, haratengen ko kalawidang ita aci Yihofa, midofdof to sakayat Ningra, pakasoˈlinho to hamamidipot Cingra kitanan. Mihaen i, oha ‘mamidaˈoc midoedo kita to Kawas ci Yihofaan.’—Mika 4:5.