O Kamay ni Yihofa Cowa ka Apotoˈ

1. Mikerid ci Mosi to Israil tamdaw miliyas to Icip i, samaanay paihkal to pakasoˈlinay falocoˈ ci Yihofaan hani?

O HIPRAY a cudad masowalay ko ˈalomanay pakasoˈlinay ci Yihofaan a tamdaw, masalalomaˈay ci Mosi o mikiriwiˈay a taˈarawan. (Hipray 3:2-5; 11:23-25) Mikerid cingra to Israil miliyas to Icip i, paihkalay to tanoktokay pakasoˈlinay falocoˈ. Tahasiˈayaw ci Falawan ato taˈangayay a sofitay, cowa ka cekid ci Mosi. Pakayniay i pakasoˈlinay falocoˈ, mikeridan ningra ko ˈalomanay pakataˈlif to Kahngangay Riyar, micomod i kohkoh. (Hipray 11:27-29) Ikor, ˈalomanay Israil tamdaw malahdawayto ko pakasoˈlinay falocoˈ, cowato pakasoˈlin to iraay ko ˈicel ni Yihofa midimokos cangranan, kawra ci Mosi kamayan misarocoday a pakasoˈlin ci Yihofaan. Cowa pakatoleden ni Yihofa ci Mosi, midemak to kafahkaˈan, pafeli to Israil tamdaw to kakaenen ato nanom, itira i kohkoh iraay ko kakaenen iraay ko nananomen.a—Kasadakan 15:22-25; ˈOlic 78:23-25.

2. Misamaanay hano licayen no Kawas ci Mosi: ‘Citolasay ko ˈicel ni Yihofa han?’ (Saˈosi 11:21-23)

² Miliyas ko Israil to Icip maedeng cecay miheca ikor, mihayian ni Yihofa ko Israil tamdaw to papafeli cangranan to kakaenen a titi. Soˈlin iraay ko tanoktokay a pakasoˈlinay falocoˈ ni Mosi, kawra cisasaho cingra ci Yihofaan to hapapalaˈosi to mikiˈokan hokira. Itiya i, pakopang i kohkoh ko Israil a tamdaw, maedeng pinaay soˈot a efan, mansa cowa ka fanaˈ ci Mosi to sasamaanen ni Yihofa pafeli ko ˈalomanay Israil to kakaenen a titi. Milicayan ni Yihofa ci Mosi: ‘Citolasay ko ˈicel ni Yihofa han?’ (ˈOsien ko Saˈosi 11:21-23.) Oniya sowal tano Hipray a sowal tatodong i, “tada apotoˈay ko kamay ni Yihofa han?” sanay. Itini o mitoroˈan to “kamay ni Yihofa” sa i, o fangcalay saocor ni Yihofa kora, misakadademakan Ningra toniya ˈicel palaˈosi to araaw no Niyah. Mihaenay, mahecaday ci Yihofa milicay ci Mosian: ‘Soˈlinay awaay ko hapakayraan Ako palaˈosi to misowalan Ako a demak han?’

3. Hano sasinanoten ita ko nalifetan ni Mosi ato Israil tamdaw hani?

³ Na calemcemay kiso wa ira ko ˈicel ni Yihofa midimokos to paro no lomaˈ ato saali iso han? Dotoc nengnengen ita, misamaanay ci Mosi ato Israil tamdaw hano cangoˈot ko pakasoˈlinay falocoˈ ci Yihofaan, cisasa ci Yihofaan to mamidipot cangranan hokira. Maminengnengho kita to safalod no Fangcalay Cudad, pakayni tonini pakasoˈlin ci Yihofaan wa ira ko ˈicel Ningra midimokos to saali ita.

MIKITINI CI MOSIAN ATO ISRAIL TAMDAW MINANAM TO SAPAKAFANAˈ

4. Misamaanay ˈalomanay Israil tamdaw hano misatapangay cisasa to hadadimokosen ni Yihofa cangra hani?

⁴ Misamaanay ˈalomanay Israil tamdaw hano cisasa to hadadipoten ni Yihofa cangra hani? Itiya, Israil ato ‘ˈalomanay ˈalafang a tamdaw’ miliyas to Icip, misatapangay tayra tora Mikiˈokan no Kawas a Pala. Cecayayto a liyad romakat cangra itini i kohkoh. (Kasadakan 12:38; Limoˈot 8:15) Oniya ˈalomanay ˈalafang a tamdaw masengaay to komaen to mana a ngaliwngiw, telocto i, madengaay ko Israil tamdaw, misatapangayto a ngaliwngiw. (Saˈosi 11:4-6) O finawlan sakakomaenaw itini i Icip a kakaenen. Itiya i, taˈangayay ko saroero ni Mosi, alatek iraay ko tatodong ningra pafeli to titi to ˈalomanay komaen sanay cingra miharateng.—Saˈosi 11:13, 14.

5-6. ˈAlomanay Israil tamdaw macadaay ko tatiihay a pifiyor, mikitini toniya demak o manan ko mananamay ita?

⁵ Oniya ˈalomanay ˈalafang a tamdaw cangoˈotay ko miakoˈiday ci Yihofaan a falocoˈ, madengaay ko Israil tamdaw to harateng nangra. Anini, ano i tatihi ita ira ko cangoˈotay ko miakoˈiday falocoˈ a tamdaw, wa madenga nangra kita alatek, telocto i, satapangayto ngaliwngiw to sapafeli ni Yihofa a dafong. Ano macerid kita miharateng to isaˈayaway iraay a dafong, anca iraay kono tao a dafong a maˈinap cangranan, alatek mamifekad ko mahaenay a pakayraan. Kawra ano masamaanto ko mamafekad a demak, pairaen ko marenecay falocoˈ, wa mahemek ko kaˈorip ita sanay.

⁶ Soˈlin, wa miharateng ko Israil to mikiˈokan no Kawas cangranan. Mikiˈokay ci Yihofa, micomod cangra tora faelohay a palomaˈan ikor, wa ngaˈay kadofah ko kaˈorip nangra, milayap to kadofahay a dafong. Kawra oniya sakiˈok tayra cangra micomod tora Mikiˈokan no Kawas a Pala ngaˈ masaˈosi, cowa ko aitini i kohkoh. Mahecaday toni, wa saharateratengen ko mikiˈokan ni Yihofa itini faelohay hekal no kaˈorip no mita, cowa ko mamisamacay to aniniay cowa ka ala iso a dafong. Roma i, wa ngaˈayho kita miˈosi to papaˈicel to pakasoˈlinay falocoˈ a sinael, halo pidotim, a patongal to pakasoˈlinay falocoˈ a mitiˈer ci Yihofaan.

7. Misamaanay hano pakasoˈlin kita, o kamay ni Yihofa cowa ka apotoˈ?

⁷ Licayen ni Yihofa ci Mosi, ‘apotoˈay ko kamay ni Yihofa han,’ cowa aca ko patalipaˈelal ci Mosian awaay ko tolas no ˈicel Ningra, pakafanaˈ ci Mosian, ano icowato ko finawlan Ningra, cowa pakayni maraay ko kalalaˈed eca ka ngaˈay padama cangranan sanay. Soˈlin o Israil tamdaw itiraay i makedalay a kohkoh, kamayan pafelian ni Yihofa cangra to kadofahay a titi no kakaenen. Paihkalay koni, ano ‘layaˈen ko fadangalan ato ciˈicelay a kamay’ ni Yihofa, wa madimokos ko finawlan Ningra. (ˈOlic 136:11, 12) Mihaenay, ano tahacada kita to sapalak i, ngaˈayay pakasoˈlin kita, ano icowato kita, layaˈen no Kawas ko kamay, wa ngaˈay padama kitanan to kahacecay tamdaw.—ˈOlic 138:6, 7.

8. Misamaan kita ngaˈ wa caka hecad to Israil pahecad to raraw nangra? (Nengnengen ko coka.)

⁸ Kalikito ci Yihofa palaˈosi to sowal Ningra, ho ira ko titi to kakaenen no finawlan Ningra. Midemak ci Yihofa to kafahkaˈan pafeli cangranan to adihayay a tikolac, kawra cowa ka pakayni cangra toniya demak miakoˈid ci Yihofaan. ˈAlomanay tamdaw mangalefay ko nika ˈanof, saromiˈad salafii sanay a milepel to tikolac. Pakaira tora ‘paihkalay to maˈanofay a tamdaw’ tada maketeray ci Yihofa, mitefoc cangranan. (Saˈosi 11:31-34) Mikitini toniya tinakoan mananamay ita ko maanan masakalimlaan a sapakafanaˈ hani? Kita maemin a tamdaw ano cihafayayto manikawayto, sasinanoten koni, hamaan makefong to maˈanofay a talakal. ‘Itinien ita i kakarayan mihoped ko hafay,’ misaˈicel mitongal to kalawidang ci Yihofaan aci Yisan, paisalakaten i nokaˈorip ita koniya demak. (Matay 6:19, 20; Luka 16:9) Mihaen kita to demak i, wa pakasoˈlinto kita dadimokosen ni Yihofa to kihcod a nokaˈorip.

9. Ngaˈay kita pakasoˈlin to maanan hani?

⁹ Anini, layaˈen ni Yihofa ko ciˈicelay a kamay, padama to finawlan Ningra. Sa koniya sowal i, cowa ko tatahalifa kita to pasangar no kaˈorip, cowaho ko cacangaoˈot to kakaenen han? Cowa.b Kawra ci Yihofa cowa ko mamifalah kitanan, ano o maanto ko malitemohay ita a pasangar, oha mamidama Cingra kitanan. Dotoc mamifolfol kita, itini toniya tosa pakayraan ngaˈay kita paihkal to pakasoˈlinay falocoˈ, pakasoˈlin kita ci Yihofaan layaˈen Ningra ko ciˈicelay a kamay, midimokos to saali ita itini kaˈorip: (1) misiˈayaw to pasangar no kaˈorip i; (2) pakayni hanoikor pakadafongay a saali a misaday i.

MISIˈAYAW TO PASANGAR NO KAˈORIP

10. Pakayni sakaˈorip ita a payci alatek iraay ko masamaanay a pasangar?

¹⁰ Palidlid sato mangata ko hererek noniya hekal, alatek pasangar pasangar ko pietan to payci. Pakayni pades, masasifodayto ko sifo, fodifod maˈaˈodisay anca mifekaday ko faelohay a lifong, alatek matongalay ko mihadakan ita a payci, mangalef malahdawto ko katayalan, hafay ato paro no lomaˈ. Itiyato i, alatek mamikilim kita to faelohay katayalan, hanaca misimsim to malinah ko paro no lomaˈ tayra i roma pala maˈorip. Itini mahaenay a pakayraan i, misamaan kita citaneng ko pisaˈosi, paihkal to mitiˈeray kita ci Yihofaan?

11. Sasamaan kita misiˈayaw to pasangar no kaˈorip? (Luka 12:29-31)

¹¹ O cecay masakalimlaan ciepocay a pakayraan i, fanaˈen ci Yihofa to cariraw iso. (Taneng 16:3) Ngitangingten Cingra pafeli tisowanan to taneng, ho citaneng kiso pisaˈosi, cangacangen Cingra padama tisowanan aka a marawraw, eca ka pakayni to niyah a demak a ‘cariraw a calemcem.’ (ˈOsien ko Luka 12:29-31.) Ngitangitenho Cingra padama tisowanan palahad to marenecay a falocoˈ, ano iraho ko rikoˈ kakaenen marenecento. (1 Timoti 6:7, 8) O roma i, ngaˈayay kilimen iso ko mitepangan no likakawa a lalakaw, nengnengen icowaay ko ciepocay a pakayraan a miremo to pasangaray no kaˈorip. I jw.org wangcan adihayay ko mahaenay a ika ato lalakaw, ˈalomanay ko salikaka mikitini micada to taˈangayay a epoc.

12. Ano sapidemakaw to sakangaˈay no paro no lomaˈ a saˈosi, haratengen ko manan a salicay?

¹² O roma tamdaw micadaay to faelohay katayalan ikor, mamiliyas to paro no lomaˈ tayra i roma a pala matayal, kawra adihayay ko nalifetan paihkalay to mahaenay a pisaˈosi cowa ko citanengay. Mihaenay, ˈayaw no mamicada to faelohay a katayalan i, hamaan o lifon aca ko haratengen, haratengenho koniya tayal mamisamaan pifiyor to paro no lomaˈ iso ato kalalaˈed aci Yihofaan. (Luka 14:28) Saharateratengen: “Ano miliyas kako to lomaˈ tayra i roma a pala matayal, sasamaan ko pifiyor to raramod ako hani? Malinah kako tayra i roma a pala ikor, ngangaˈayho kako mirienang to polong a saˈopo, mitosilay, ato kalacafay to salikaka micawmaˈ han?” Ano ira ko wawa iso, haharatengen iso: “Ano awa kako i tatihi no wawa i, ngangaˈayho kako ‘mitoor to harateng ni Yihofa pakafanaˈ ato mirikec’ cangranan han?” (Ifiso 6:4) Ano o paro no lomaˈ anca widang iso cowa pikangodo to safalod no Fangcalay Cudad, hamaan a tengilen ko sowal nangra. Mamidofdof to harateng no Kawas.c Itiniay i kaetip no Asia ko kaˈorip ni Toni, kinapinaay cingra matahidang no ngaˈayay a katayalan, tayra i roma a kitakit mietan to adihayay a payci. Kawra misongilaˈ a mitolon halo malalengo to fafahi ikor, misaˈosiayto cingra cowa ka picada toniya tayal, hanaca, misaˈicelay cingra miˈesal to mapalakay a payci. Sanay ci Toni: “Mahaenay ko saˈosi niyam, iraay ko kalikoan ako padama to ˈalomanay tamdaw mafanaˈ ci Yihofaan, o wawa niyam fanekfekayho matayal saki ci Yihofaan. Mananamayto kami, ano tooren niyam ko Matay 6:33 a sowal a maˈorip, dadimokosen ni Yihofa kami.”

SADAYEN KO HANOIKOR PAKADAFONGAY A SAALI

13. Sapidimokosaw to hanoikor a pakadafongay a saali no niyah, sasamaan ko demak ita hani?

¹³ Ano misaday kita to hanoikor a pakadafongay a saali i, ora pisaˈosi ita paihkalay to hakowaay ko pakasoˈlin ita ci Yihofaan. Pakalalokay ko Fangcalay Cudad kitanan malalok a matayal, samanen mihaen to demak i, wa ngaˈay madimokos ko hanoikor ita a saali. (Taneng 6:6-11) Mihaenay, pakayni hanoikor mihoped to miming a payci o ciepocay a pakayraan, samanen o payci i roma a pakayraan madipotay kita. (Patnakay 7:12) Kawra, hamaan pakayni mietanay to payci mala masakalimlaan a demak itini nokaˈorip.

14. Misaday kita to hanoikor a saali i, hano haratengen ita ko maˈoningay i Hipray 13:5 hani?

¹⁴ Tano sapatinako ni Yis a mitadtad, ano samacay sa ko tamdaw mihoped to payci, ‘i pinengneng no Kawas cowa ka cihafay,’ o cowa ko cipinangay a inaneng. (Luka 12:16-21) Cowa ka fanaˈ kita to hamamifekad nocila ko manan a demakan. (Taneng 23:4, 5; Yakop 4:13-15) Roma i, masowal ni Yis ko emin misaˈosiay mikotod cingranan a tamdaw mamisongilaˈ misaday, makahi ‘misawad to kihcod a hafay no niyah.’ (Luka 14:33) Isaka 1 hahekalan, i Yutiyaay a Krisciyang o mahaenay ko nalifetan nangra, kawra makahiay cangra micada to hatiniay a masiponay. (Hipray 10:34) Anini, ˈalomanay ko salikaka pakayni cowa ka pidama to roma kapot no sifo, malahdaway ko katayalan nangra. (Paˈarawan 13:16, 17) Mihaen cangra makahi a kinafalah, o pakasoˈlinay to sakiˈok ni Yihofa. Sanay ci Yihofa: ‘Cowa ko fafalahen Ako kiso, cowa ko mamiliyas tisowanan.’ (ˈOsien ko Hipray 13:5.) Wa misaˈicel kita misaday to hanoikor a saali, kawra ano fahal sa mifekad ko pades i, pakasoˈlinho to papadamaen ni Yihofa kita.

15. Pakayni palahad to wawa, o Krisciyang pairaen ko samaanay noka pinengneng hani? (Nengnengen ko coka.)

¹⁵ I roma serangawan, palahad ko mararamoday to wawa a sakakaay lalangian i, o sapidimokosaw to niyah ano maliteng. Sakora sowal i, ano malitengto i o tatiˈeren no niyah ko wawa sanay. Kawra sowal no Fangcalay Cudad, papakaynien no wama wina to wawa a mihoped. (2 Korinto 12:14) Manaokaniw, malitengto ko wama wina ikor, alatek misaaliay toha sadimokos no wawa, ˈalomanay ko wawa makahiay mihaen to demak. (1 Timoti 5:4) Kawra mitiˈeray ci Yihofaan a Krisciyang wama wina mafanaˈay, soˈlinay palipahakay cangranan i, cowa ko pidimokos no wawa cangranan, ao malo midokoay ci Yihofaan a tamdaw.—3 Yohani 4.

16. O wama wina sasamaan padama to wawa misongilaˈ a misaday, ho midimokos to niyah i noikoran? (Ifiso 4:28)

¹⁶ Misongilaˈ ko wama wina pakafanaˈ to wawa, padama cangranan lomahadto ikor, mafanaˈ midimokos to niyah, itini toniya tatokian patirengen no wama wina ko ngaˈayay taˈarawan, pakafanaˈ to wawa pakasoˈlin mitiˈer ci Yihofaan. I kaemangho ko wawa i, pakafanaˈen ko wawa, o malalokay o makapahay a capeling. (Taneng 29:21; ˈosien ko Ifiso 4:28.) Itini picudadan cangra i, padama cangranan misongilaˈ a milahci to picudadan a demak. Misaˈosi to hacacadaen ko manan a sapakafanaˈ i, kilimen no wama wina halo misakadademak to safalod no Fangcalay Cudad, padama to wawa citaneng ko pisaˈosi. O patosokan i, oha ngangaˈay cangra anoikor mafanaˈ a midimokos to niyah, mamicerid mirienang to mitosilay a tayal, hanaca mirienang to mieminay to toki a matayal.

17. O manan ko pakasoˈlinen ita hani?

¹⁷ Pakasoˈlinay ko madimadiay a sikawdan ni Yihofa, iraay ko ˈicel ato kalim ni Yihofa parenec to saali nangra. Palidlid sato mangata ko hererek noniya hekal, o pakasoˈlinay falocoˈ ita ci Yihofaan wa tahalifa to sapalifet. Kawra mamisarocod kita mitiˈer ci Yihofaan, pakasoˈlinen Cingra mamihadak to ˈicel, pafeli to saali no kaˈorip ita a dafong. Ngaˈay pakasoˈlin kita, ciˈicelay a kamay ni Yihofa ato milayaˈan Ningra a fadangalan cowa ka apotoˈ, ano icowato kita i, mamidimokos Cingra kitanan!