Kapah Salikaka—Todongen ci Marko Aci Timoti

1-2. O manan a lalangian ko mamicona ci Markoan aci Timoti to sakatayalaw to tao?

KAPAH salikaka, makalimay kiso saki ci Yihofaan a matayal, sapadamaawho to i kasakopangay a salikaka. ˈAlomanay a tamdaw mahecaday tisowanan ko harateng. ˈAlomanay kapah salikaka mikifalocoˈ makalim matayal to salikaka, tada kahemekan koni! (ˈOlic 110:3) Kawra, alatek tahalifa kiso to pasangar. Wa matalaw kiso to coko kafanaˈan a kaˈorip, mansa cisasa ko harateng mitongal to tayal saki ci Yihofaan hani? Wa cangoˈoten kiso to pakasoˈlinay falocoˈ a eca ka picada to ˈinorong han? Aka calemcem, cowa ko kiso aca ko mahaenay ko harateng.

² Ci Marko aci Timoti iraay ko mahecaday a harateng. Cowa ko ka fanaˈan to sasamaan ko kafalic no kaˈorip nangra, alatek cowa ka pakafilo to faelohay a ˈinorong, kawra cowa ka pakaynian toniya lalangian a micona cangranan padadotoc matayal to tao. Matahidangay ci Marko malacafay ci Pawlo aci Parnapas to saka cecay miliwko a mitosil i, alatek malacafayay to wina sinowayay ko kaˈorip. (Dmak 12:12, 13, 25) Kawra sapitongalaw to tayal ci Yihofaan, miliyasay ci Marko to kananaman a nokaˈorip. Isalakat malinahay tayra i Antiok, ikor malacafayay ci Pawloan aci Parnapas tayra i maraayay a pala. (Dmak 13:1-5) Mahecaday ci Timotian. Matahidangay ni Pawlo cingra mirienang to miliwkoay mitosil, alatek malacafayay to wama wina maˈorip. Kaemangayho cingra itiya, awaayho ko nalifetan, mahaenay alatek cangoˈotay ko pakasoˈlinay falocoˈ, cisasaay mala dama ni Pawlo. (Palinien to 1 Korinto 16:10, 11 ato 1 Timoti 4:12.) Kawra, kamayan ci Timoti micada to satahidang ni Pawlo, ikor adihayay ko malifokay ningra a sapalemed, ira ko makapahay a nalifetan no kaˈorip.—Dmak 16:3-5.

3. (1) Hano mafanaˈ kita, to masemeray ci Pawlo ci Markoan aci Timoti? (2 Timoti 4:6, 9, 11) (Nengnengen ko coka.) (2) Oniya lalakaw mamilengo to manan?

³ Kaemangho ci Marko aci Timoti adihayayto ko kalimlaan a nalifetan nangra, mafanaˈayto to sasamaan micada to masakalimlaan a ˈinorong. Masemeray ci Pawlo toniya tatosa kapah. Na mafanaˈ ci Pawlo to mamapatay ko niyah i, makalimay i tatihi no niyah ci Marko aci Timoti. (ˈOsien ko 2 Timoti 4:6, 9, 11.) Ci Marko aci Timoti iraay ko masamaanay makapahay capeling a masemer ci Pawlo cangranan hani? Ano o kapah salikaka sasamaan mitodong to taˈarawan nangra? O sapalimoˈot ni Pawlo sasamaan pakaciepoc to kapah salikaka hani?

MITODONG CI MARKOAN—MAKAHI MATAYAL

4-5. Samaanay mahapinang ita ci Marko makahiay matayal to tao?

⁴ O cecay milengoay to Fangcalay Cudad sanay, matayalay to tamdaw a tatodong i, mahawpay ko soˈlin i cowa ka dolo a pakayraan kamayan talaˈayaw a mipadama to tao. Itini toniya pakayraan i, patirengay ci Marko to ngaˈayay a taˈarawan. Misaˈosi ci Pawlo to sakinatosa miliwko mitosil i, cowa ka keriden ningra a malacafay, mararomay cingra a matoled. (Dmak 15:37, 38) Kawra, cowa ka sawaden ningra ko sakatayalaw to salikaka.

⁵ Micadaay ci Marko to satahidang ni Parnapas, kalacafay tayra i roma kilac mitosil. Maedeng 11 miheca ikor, sakinacecay ni Pawlo i Loma mapalit i, ci Marko ato roma salikaka itiniay i tatihi ni Pawlo a kalacafay. (Filimon 23, 24) Miakoˈiday ci Pawlo to sadama ni Marko, pairaay to ‘taˈangayay a sahinom’ cingranan.—Kolosay 4:10, 11.

6. Pakayni macacawmaˈ to matenesay a Krisciyang, macadaay ni Marko ko manan a epoc? (Nengnengen ko ilaenoay safanaˈ.)

⁶ Maceriday ci Marko macacawmaˈ to matenesay a Krisciyang, adihayay ko macadaay a epoc. Ci Marko itiniay i Loma midama ci Pawloan, ikor tayraayho i Papilon midama ci Pitiroan. Itira, malacafayay tatosa a matayal, palahaday to tangongolay a olah, o ‘wawa ako ci Marko’ sanay ci Pitiro. (1 Pitiro 5:13) Sowal ni Pitiro, alatek adihayay ko matengilay ni Marko to nokaˈorip ni Yis ato mitosilay tayal a demak, mahawpay ko kesemeran a demak, alatek oniya demak maˈoningay i Marko a cudad.a

7. Ci Cing Sen Yo samaanay mitodong to taˈarawan ni Marko? (Nengnengen ko coka.)

⁷ ˈIfowaay ci Marko saki ci Yihofaan, malacafayay to matenesay a salikaka a malawidang. Sasamaan kiso mitodong ci Markoan hani? Ano sapicadaaw kiso to kaolahan a ˈinorong kawra cowaho ka cada iso i, aka a matoled, ngaˈayay saharateratengen iraayho manan a pakayraan matayal saki ci Yihofaan ato kasakopang. Nengnengen ko nalifetan ni Cing Sen Yo. Isaˈayaw maceriday palalini to roma kapah salikaka cingra, maˈaraw ko roma tamdaw kaliki ira ko ˈinorong, hato misakahmawan ko niyah sanay miharateng. Ikor, fanaˈ hananay ningra ko matenesay faˈinayan salikaka to nafalocoˈan no niyah. Painian no malohemay malitengay cingra papisamacay to madangalay nohatini a tayal, a matayal to tao, soˈlin cowa ka mahapinang no tao, padadotocen a midemak. Mihayiay ci Cing Sen Yo toniya sapaini, talaˈayaway cingra padama to malitengay i kasakopang, padama pakalic to mamirenang to saˈopo a tamdaw. Nohatini o malohemay malitengay ci Cing Sen Yo. Tikolen ko isaˈayaway, sanay cingra: “Malifetayto ako matayal to tao o manan ko tatodong. Mahapinangay ako, padama to tamdaw o kahemekan a demak.”

MITODONG CI TIMOTIAN—MIKIFALOCOˈ CIHARATENG TO TAO

8. Hano piliˈen ni Pawlo ci Timoti toha cafay hani? (Filipi 2:19-22)

⁸ Na tahacadaay ci Pawlo to saroero itini i roma a niyaroˈ, patikol cingra tora pala i, misaaliay to timoloay a salikaka malacafay cingranan. Salakat mipiliˈan ningra ko cinalifetan o ci Silas, ikor ci Timoti ko mipiliˈan ningra. (Dmak 15:22, 40) Hano piliˈen ni Pawlo ci Timoti toha cafay hani? O cecay lalangian i, iraay ko makapahay a ngangan ni Timoti. (Dmak 16:1, 2) Roma i, mikifalocoˈay cingra ciharateng to tao.—ˈOsien ko Filipi 2:19-22.

9. Samaanen ita mihapinang to mikifalocoˈay ci Timoti ciharateng to salikaka?

⁹ Ci Timoti satapang matayal aci Pawlo i, tano waywayan paihkal to ciharatengay to tao ikakaay to niyah. Mihaenay, paitiraan ni Pawlo cingra itini Piriya, ho pakalalok cingra to patatikolay mihakelongay a salikaka. (Dmak 17:13, 14) Itiya i katihi ni Timoti iraayho ci Silas, adihayay ko mananamay ningra ci Silasan. To cecay liyad ikor, miocoran ni Pawlo ci Timoti tayra i Tisalonika, patanoktok to itiraay a kasakopang. (1 Tisalonika 3:2) Ikor no 15 miheca i, o olah ni Timoti to salikaka tangongol tangongolay. Nolatekay, maˈaraw ningra ko makesemay salikaka tomangicay cingra. (Loma 12:15; 2 Timoti 1:4) Kapah salikaka, samaanen iso mitodong ci Timotian hani?

10. Samaanay mafanaˈ ci Icay ciharateng to tao?

¹⁰ Nengnengen ko cecay faˈinayan salikaka ci Icay samaanay mafanaˈ ciharateng to tao. Mala kapah cingra i, pasangaran macacawmaˈ to ikakaay ko mihecaan a salikaka. I Kasaˈopoan, pilitemoh aca ningra to salikaka, ikor miliyasayto. Painian no cecay malohemay malitengay cingra, tano pakahemeken ko salikaka a misatapang a pasowal, pakalalokayho cingranan miharateng to o manan ko kahemekan nangra. Misakadademakan ningra koniya sapaini. Anini o malohemay malitengay ci Icay, sanay cingra: “Nohatini ngaˈayayto kako macacawmaˈ to cowa ka hecad ko mihecaan a tamdaw, cipinangayto to pasangar no tao, mafanaˈayho sasamaan a padama cangranan, marenecan kako.”

11. O kapah salikaka sasamaan ciharateng to i kasakopangay a salikaka? (Nengnengen ko coka.)

¹¹ Kapah salikaka, ngaˈayay kiso mafanaˈ ciharateng to tao. ˈAyaw ato herek no saˈopo, ngaˈayay kiso masasowal to cowa ka hecad ko mihecaan ato kalomahadan a tamdaw, licayen cangra samaanay ko kaˈorip, ikor misongilaˈ a mitengil. Palidlid sato i, wa mahapinang iso to manan ko papadamaen cangranan. Tinakoen, mahapinang iso to cowa ka fanaˈ ko malitengay misakadademak to JW Library^®, ngaˈayay pamadaen iso cangra han? Anca, mahapinang iso to cowa ka matahidang cangra a mitosil, ngaˈayay kalacafayen iso cangra han? Mihaen kiso talaˈayaw ciharateng to salikaka, wa patireng to ngaˈayay taˈarawan i kasakopang.

I SAPALIMOˈOT NI PAWLO MILIFOK TO EPOC

12. O kapah salikaka sasamaan nai sapalimoˈot ni Pawlo ci Timotian milifok to epoc hani?

¹² Sano wamaay ci Pawlo a palimoˈot ci Timotian, padama cingranan palaˈosi to ˈinorong, ira ko malaˈosiay a nokaˈorip. (1 Timoti 1:18; 2 Timoti 4:5) Kapah salikaka, wa ngaˈay nai sapalimoˈot ni Pawlo milifok to epoc. Ngaˈayay sano sapatikami ni Pawlo tisowanan minengneng koya tosa tikami ci Timotian. Sinanoten a miˈosi, haratengenho to o manan a sapalimoˈot ko ngangaˈay sakadademaken. Nengnengen ita ko pina a tinakoan.

13. Sasamaan ko demak ita ngaˈ maingid ci Yihofa?

¹³ ‘Sarocoden ko falocoˈ malo patosokan a pahatatanam to niyah.’ (1 Timoti 4:7b) Sowal ni Pawlo o ‘misarocod to falocoˈ’ o manan ko tatodong hani? Tatodong i, makakedecay ko nafalocoˈan aci Yihofa, maolahayho midemak to matatodongay i pinengneng ni Yihofa a pakahemek Cingranan. Misarocod to falocoˈ a capeling cowa ka hofoc han iraayto, ao padetengan a mipalahad. Samaanen a palahad hani? ‘Pahatatanam to niyah’ a tatodong no Krisiya a sowal maceriday mitoroˈ to, saka ecaaw ka tapiˈ no miontoay mamicada to pakidemay marorayay a sapahatatanam. O miontoay mamiˈimer ngaˈ macada ko saka cecay a lifon. Malecaday, oha mamiˈimer kita, ngaˈ palahad to ngaˈayay nanaman i pidokoan a maingid ci Yihofa.

14. Miˈosi kita to Fangcalay Cudad i, o manan ko patosokan hani? Patinakoen a mitadtad.

¹⁴ O papalahaden ita a ngaˈayay nanaman i, to romiˈamiˈad miˈosi to Fangcalay Cudad. Ano miˈosi i, oha haratengen, patosokan iso i, o mamiingid ci Yihofaan. Tinakoen, maˈosi iso ci Yis atoya cihafayay a kapah masasowal cangra i, ngaˈayay haratengen o manan ko mananamay iso. (Marko 10:17-22) Ora pakasoˈlinay ci Yisan to o ci Misiya, kawra ora kapah awaay ko pakasoˈlinay falocoˈ ningra mikotod ci Yisan. Soˈlin mahaen, kamayan ci Yis ‘maolah cingranan.’ Masinanotay iso sidaˈitay ko sowal ni Yis cingranan han? Ihkalay koni, makalimay ci Yis ho ngangaˈay citaneng ko pisaˈosi ningra. Paihkalan ni Yis tora kapah a olah i, mahecaday toni Yihofa a olah. (Yohani 14:9) Miˈosi toniya miˈoningan i, ngaˈayay haratengen iso ko niyah a pakayraan: “Samaanen ako ngaˈ ho ngaˈay miingid ci Yihofaan? Ngaˈ adihay ko midemakan ako i ˈalomanay?”

15. Kapah salikaka patireng to ngaˈayay taˈarawan hano o masakalimlaan hani? Patinakoen a mitadtad. (1 Timoti 4:12, 13)

¹⁵ ‘Malo taˈarawan no madimadiay a tamdaw.’ (ˈOsien ko 1 Timoti 4:12, 13.) Palimoˈotan ni Pawlo ci Timoti, palahaden ko piˈosi, pakafanaˈ a ˈinaneng, palahadho to olah, pakasoˈlinay falocoˈ, makoracay a capeling. Misamaanay hani? Samanen o waywayan ikakaay ko ˈicel no sasowalen. Tinakoen manilnil kiso mikimad, lalakaw no kimad samaanen ita fanekfek a mitosil. Ano misarocod kiso mitosil i, mihaen mikimad sato kiso i, wa fanekfekto ko pikimad iso. O ngaˈayay taˈarawan iso wa ciˈicelto ko kimad iso.—1 Timoti 3:13.

16. (1) O kapah salikaka sasamaan i limaay a pakayraan patireng to makapahay taˈarawan hani? (2) O kapah salikaka sasamaan itini i “sasowalen” patireng to taˈarawan?

¹⁶ I 1 Timoti 4:12, masowalay ni Pawlo koniya kapah salikaka i limaay a pakayraan patireng to makapahay taˈarawan. Notekedan a pikingkiw i, songilaˈen iso mikingkiw to kahececay a pakayraan, wa taˈangay ko mamacada iso a epoc. Ano saka itiniaw kiso i “sasowalen” malo makapahay taˈarawan, saharateratengen iso: “I nokaˈorip, samaanen ako pakayni i sasowalen pakalalok to tao hani?” Ano kalacafayho kiso to wama wina mikilomaˈ, ngaˈayay tongalen iso ko piakoˈid cangranan, miakoˈid to roray nangra han? I kasaˈopoan, ngaˈayay tano niyah a sowal a pacaˈof han? Herek no saˈopo i, wa pakahemeken iso ko cikamokay a salikaka han? Misaˈicel kiso itini sasowalen patireng to makapahay taˈarawan, ho maˈaraw no tao ko nika cakat iso.—1 Timoti 4:15.

17. Sapipalaˈosiaw kiso to i pidokoan a patosokan, sasamaan ko demak no kapah salikaka hani? (2 Timoti 2:22)

¹⁷ ‘Liyasen kono kaemanganho a ˈanof, micangacang to moecelay.’ (ˈOsien ko 2 Timoti 2:22.) Pakalalokan ni Pawlo ci Timoti micoˈay to ˈanof, samaanen o hatiniay a ˈanof wa miconged to patosokan no pidokoan, wa mipalak to kalalaˈed ci Yihofaan. Alatek o roma lawla cowa ko mararaway, kawra wa maˈafas ko adihayay a toki iso, awato ko romiˈad maladademakay ni Yihofa. Haratengen, hakowaay ko toki iso a mionto, misangwang, misalama to sasalamaen hani? Ngaˈayay sakadademaken iso ko toki saki ci Yihofaan han? Tinakoen ceriden a mitosil, anca mitomadaw misafaeloh to Kasaˈopoan. Mihaen kiso to demak, wa mapakafanaˈ to maolahay to Kawas a widang, papadama cangra tisowanan patireng anca palaˈosi to patosokan i pidokoan.

FANEKFEK A MATAYAL, MAKAPAH KO KAˈORIP

18. O kaˈorip ni Marko aci Timoti tada marenec a makapah, hano haenen ko sowal hani?

¹⁸ Ci Marko aci Timoti makahiay a kinafalah to niyah, matayal saki tao, telocto i, marenec a makapah ko nokaˈorip. (Dmak 20:35) Sapipadamaaw to salikaka, na tayraay i mara:ayay icowacowaay a pala ci Marko. Roma i, miˈoningay to ratoh a cudad, tano kasemeran a miˈoning to kaˈorip ato pitosil ni Yis. Malikoan ci Timoti padama ci Pawloan patireng to faelohay kasakopang, halo mihinom ato pakalalok to salikaka. Maˈaraw koniya tatosa fanekfek a matayal, paihkalay to kinafalahay a waywayan i, masemeray ci Yihofa.

19. Kapah salikaka, hano sinanoten iso ko sapalimoˈot ni Pawlo ci Timotian hani? Mihaen ko demak iso o manan ko mamacada a sapalemed?

¹⁹ O tikami ni Pawlo ci Timotian, paihkalayto maolahay cingra toniya kapah. Kapah salikaka, haratengen koniya tosa tikami iraay ko olah ni Yihofa tisowanan. Tangongolay ko olah Ningra tisowanan, ho malaˈosi ko hakelong no ˈorip iso! Mansa, paifalocoˈen koniya tosa sapalimoˈot no tikami, misaˈicel matayal saki tao. Mihaen, wa marenec a mahemek ko kaˈorip iso, wa ngaˈay ‘matawmec ko soˈlinay a ˈorip.’—1 Timoti 6:18, 19.