Pakayni ci Yisan, Hakowaay ko Kalimlaan to Ngangan ni Yihofa?

1-2. (1) ˈAyaw no kinafalah ci Yis to ˈorip a dadaya i, o manan ko midemakan? (2) Oniya lalakaw mamilengo to manan?

KONGYEN 33 miheca Nisan folad 14 romiˈad, Pisepatan a dadaya, malacafayay ci Yis to madimadiay a tarokos itira i tingloh no lomaˈ komaen to salikoray a lafi. Mafanaˈay cingra to iraay ko mamisafelit cingranan, misiˈayaw to sasawkit, masaˈosi ko raraw, micada to saroero, salikor i, papatayen. Mihaenay, ikor no lafi pasowalay cingra to sapakalalok to nisawawaan. ˈAyaw no mamiliyas itira i, paterepay ci Yis, pasikakarayan a mitolon to kakarayan Wama. Tarokos ci Yohani pakayni toniya masakalimlaan a satolon miˈoningay i Yohani 17 fedengan.

² Oniya lalakaw mamilengo, mikitini kita to satolon ni Yis o manan ko mamananam. ˈAyaw no kinafalah ci Yis to ˈorip i, o manan ko kaciharatengan ningra? Itini fafekang no sera o manan ko misakaretengan ningra? Nengnengen ita.

‘MAHEREKAYTO KAKO PAKAFANAˈ CANGRANAN TO NGANGAN ISO’

3. Pakayni i ngangan ni Yihofa, o manan ko sowal ni Yis? O manan ko tatodong no sowal ningra hani? (Yohani 17:6, 26)

³ Mitolonan ni Yis ci Yihofa sanay: ‘Maherekayto kako pakafanaˈ cangranan to ngangan Iso.’ Soˈlinay i, toya dadaya, cowa ka kinacecay aca ci Yis pasowal toniya demak. (ˈOsien ko Yohani 17:6, 26.) O manan ko tatodong no sowal ni Yis hani? Fanaˈanto ako ko nisawawaan to cima ko ngangan no Kawas cowa ka saan. Samanen sahtoay o Yutaya tamdaw ko nisawawaan, mafanaˈay cangra to ci Yihofa ko ngangan no Kawas, samanen itini Hipray Sowal Fangcalay Cudad kinapinaayto a caˈol mahadak koniya ngangan. O tatodong ni Yis i, pakafanaˈan ningra ko nisawawaan a cipinang, oniya ngangan mitaypiyaway to samaanay a Kawas Cingra. Padamaan ni Yis ko nisawawaan matongal ko kafanaˈ ci Yihofaan, mahawpay ko kafanaˈ to capeling ato araaw Ningra, ato nadademakan Ningra to manan, ano ikor wa misamaan to demak. Edengan ci Yis ko padamaay to nisawawaan tangongol ko kafanaˈ ci Yihofaan.

4-5. (1) O ngangan no nima tamdaw alatek wa misamaan malo ciepocay kitanan hani? Patinakoen a mitadtad. (2) Samaanay ko nisawawaan ni Yis matongal ko nika fanaˈ ci Yihofaan?

⁴ Tinakoen, ano i kasakopang iraay ko malohemay malitengay o ising ci Maysang, pinaayto miheca kamo malacafay i kasakopang. Cecay romiˈad, tahalifa kiso to hamamapatay a demak, malingad kiso tayra i katayalan ningra a pipaisingan, cingra ko mitokaday tisowanan, mipaˈorip tisowanan. Nohatini, matengil iso ko ngangan ci Maysang i, o harateng iso cowa ka hecad to isaˈayaway. Oniya ngangan, cowa aca ko malohemay malitengay no kasakopang iso, mitaypiyawayho to paˈoripay tisowanan a ising.

⁵ Malecaday toni, o nisawawaan ni Yis isalakat mafanaˈayto to ngangan ni Yihofa, kawra i sapadama ni Yis i, matongalay ko nika fanaˈ nangra to mitaypiyaway tonini a ngangan no Kawas. Hano mahaen ko sowal hani? Samanen o sasowalen waywayan ni Yis sahtoay paihkalay to makapahay capeling no ikakarayan a Wama, misinanotay ko nisawawaan mitengil to sapakafanaˈ ni Yis, sasamaan micada to tamdaw, wa mangalefto ko nika fanaˈ ci Yihofaan.—Yohani 14:9; 17:3.

‘PAFELIANTO ISO KAKO TO NGANGAN ISO’

6. O ngangan no Kawas pafelianto cingra, hano mahaen ko sowal ni Yis? (Yohani 17:11, 12)

⁶ Pakayni i nisawawaan mitolonay ci Yis ci Yihofaan sanay: ‘Pafelianto Iso kako to ngangan Iso, . . . pakayni to ngangan Iso, nanay dimokosen Iso cangra.’ (ˈOsien ko Yohani 17:11, 12.) Oniya sowal i, o ngangan ni Yis mifalicanto o ci “Yihofa” han? Cowa. Sinanoten, pasowal ci Yis to ngangan ni “Yihofa” i, o ‘ngangan Iso’ sanay. Ano hatiraay i, o sowal ni Yis o manan ko tatodong hani? Salakat, mitaypiyaway ci Yis ci Yihofaan a pasowal, pakayniayho i ngangan Ningra midemak to adihayay kasapaan a demak. (Yohani 5:43; 10:25) Roma i, tatodong no ngangan ni Yis i, ‘ci Yihofa ko milidongay.’ O ngangan ni Yis ato ci Yihofa malalitingay konini.

7. Misamaanay hano ira ko fadangalan ni Yis a mitaypiyaw ci Yihofaan a pasowal? Patinakoen a mitadtad.

⁷ Tinakoen, minilnilan no hongti ko cecay tamdaw mitaypiyaw cingranan, iraay ko fadangalan mitaypiyaw to hongti mitenak to lihaf. O sowal ningra mahecaday to sowal no hongti. Ano ci Yis i, mahecadayto o minilnilan ni Yihofa a taypiyaw, cifadangalan tano ngangan Ningra a pasowal.—Matay 21:9; Luka 13:35.

8. ˈAyaw no tatayni ci Yis i fafekang no sera, ‘pakayniay i ngangan Ako ko sakaira ningra’ hano mahaen ko sowal ni Yihofa? (Kasadakan 23:20, 21)

⁸ Saan ko Fangcalay Cudad o “Sowal” ci Yis, samanen pakayniay ci Yihofaan cingra a somowal, ciˈinorongay mifanaˈ to naitiniay i Kawas a lihaf ato sakayat to coyoh ato tamdamdaw. (Yohani 1:1-3) Miliyas ko Israil tamdaw to Icip i, na miocoran ni Yihofa ko coyoh mikerid cangranan, oniya coyoh alatek ci Yis ko mitoroˈan. Palimoˈot ci Yihofa to Israil tamdaw oha mamitengil to sowal ningra, saan: ‘Pakayniay i ngangan Ako ko sakaira ningra.’a (ˈOsien ko Kasadakan 23:20, 21.) Saan ci Yihofa, samanen ci Yis mitaypiyaway Cingranan, hanaca midamaay to ngangan Ningra, patalahkal to fangcalay ngangan Ningra, o masakalimlaan ko ˈinorong ni Yis.

‘WAMAAW, NANAY PAˈDILEN ISO KO NGANGAN NO MISO’

9. Pakayni ci Yisan, hakowaay ko kalimlaan to ngangan ni Yihofa? Tadtaden.

⁹ Mahecaday to masowalay i fatac, ˈayaw no tatayni ci Yis i fafekang no sera i, pakayni cingranan o ngangan ni Yihofa o masakalimlaan. Itiniho ci Yis i fafekang no sera i, o midemakan ningra sahtoay paihkalay to misakaretengay cingra to ngangan ni Yihofa. Mamihererek ci Yis to i fafekang no sera mitosil i, na mingitangitan ningra ci Yihofa: ‘Wamaaw, nanay paˈdilen Iso ko ngangan no Miso.’ Itiya, tangsolay ci Yihofa nai kakarayan mihadak to sano kakelengay a ngihaˈ pacaˈof cingranan: ‘Maherekayto Kako paˈdil to ngangan Ako, o mamiliyawho mihaen to demak.’—Yohani 12:28.

10-11. (1) Samaanay ci Yis paˈdil to ngangan ni Yihofa? (Nengnengen ko coka.) (2) Samaanay mapakadit ko ngangan ni Yihofa hani?

¹⁰ Paˈdilan ni Yis ko ngangan ni Yihofa. Tano masamaanay a pakayraan hani? O cecay a pakayraan i, fanaˈen ko tamdaw to makapahay capeling ato tadamaanay a demak no kakarayan a Wama. Kawra, sapaˈdilaw to ngangan ni Yihofa milingatayho to adihayay a demak. Patalahkalen ko ngangan ni Yihofa malo fangcalay, mapakaditay ko ngangan Ningra misaaliay to sapikoracaw.b I taˈarawan a satolon ni Yis, na paihkalay ci Yis to masakalimlaan koni. Pakafanaˈ cingra to nisawawaan a mitolon ci Yihofaan sanay: ‘Itiniay kakarayan a Wama niyam, nanay mapatalahkal ko ngangan Iso malo fangcalay.’—Matay 6:9.

¹¹ Mihaenay, hano patalahkalen ko fangcalay ngangan ni Yihofa hani? Misamaanay hano mapakadit ko ngangan Ningra to hakakoracen hani? Itiniho i Itin i, mitonganganan ni Akoma Satan ko Kawas, pakadit to ngangan Ningra. Mikokot ci Satan to o makaniway ci Yihofa sanay, miterekan Ningra ko ngaˈayay to hano Niyah, cowa ka pafelien ci Atam aci Ifa. (Satapangan 3:1-5) Mihaen ko sowal ni Satan, mahecaday to cowa ka tatodong ko pikowan ni Yihofa. Mihaen ci Satan mikokot ci Yihofaan, mahecadayto miˈodisay to ngangan ni Yihofa. Ikor i lintad ni Yopu, sanayho ci Satan, midoko ko tamdaw to Kawas i, sapicadaaw to hasakangaˈay aca no niyah. Sanayho ci Satan, tahalifa ko emin a tamdaw to sapalifet i, wa misawad a midoko ci Yihofaan, samanen awaay ko cecacecay a tamdaw maolah Cingranan. (Yopu 1:9-11; 2:4) Mihaenay, cima kora makaniway hani? Ci Yihofa anca ci Satan han? O sapacaˈof noniya salicay i, misaaliay to hatoki ngaˈ mafanaˈ kita.

‘O ˈORIP AKO . . . HAYI SANAY KINAFALAH KAKO’

12. Tangongolay ko kaolah to ngangan ni Yihofa, mansa makahiay ci Yis misamaan to demak hani?

¹² Samanen tangongolay ko kaolah ni Yis ci Yihofaan, mansa makahiay midemak to kihcod mikorac to mapakaditay a ngangan ni Yihofa, ho mapatalahkal ko ngangan Ningra malo fangcalay. Makahiay ci Yis pakayni i ngangan ni Yihofa kinafalah to ˈorip, sanay cingra: ‘O ˈorip ako . . . hayi sanay kinafalah kako.’c (Yohani 10:17, 18) O lalitengan no tamdaw ci Atam aci Ifa mitowakangay ci Yihofaan a midama ci Satanan. Cowa ka hecad ci Yis, makahiay cingra tayni i fafekang no sera, madimadiay i hakelong no ˈorip ningra. (Hipray 4:15; 5:7-10) Soˈlin itini i pisemseman hecek a mapatay, makahiay cingra a miemem. (Hipray 12:2) Tano waywayan misawacay ci Yis to maolahay ci Yihofaan ato fangcalay ngangan Ningra.

13. Misamaanay ci Yis a misawacay to makaniway ci Satan? (Nengnengen ko coka.)

¹³ Tano hakelong no ˈorip ni Yis misawacayay to makaniway ci Satan, cowa ko ci Yihofa! (Yohani 8:44) Awaay ko cima to pakafiloay ko nika fanaˈ ni Yis ci Yihofaan. Mihaenay, ano soˈlinay a mikokot ci Satan ci Yihofaan i, wa mafanaˈ ci Yis. Nikawrira, padadotocay ci Yis midama to fangcalay ngangan ni Yihofa, paihkalay koni sahtoay o makaniway ko sowal ni Satan. Soˈlin hawadento ni Yihofa a midipot ci Yis, hato miliyasan a mifalah cingra i, kawra hayi sanay mapatay cowa ka mitowakang ci Yis to ikakarayan a Wama.—Matay 27:46.d

‘MALAˈOSIAYTO AKO . . . KO SAPATOROD ISO A DEMAK’

14. Madimadiay ci Yis, misamaanan ni Yihofa palifon cingra hani?

¹⁴ ˈAyaw no kinafalah to ˈorip toya dadaya i, mitolonay ci Yis to ikakarayan a Wama sanay: ‘Malaˈosiayto ako . . . ko sapatorod Iso a demak.’ Pakasoˈlinay ci Yis to papalifonen no ikakarayan a Wama ko kamadimadi ningra. (Yohani 17:4, 5) Mihaenay ci Yihofa palifon cingranan. Mapatay ci Yis ikor, cowa ka paipatademan han ni Yihofa cingra. (Dmak 2:23, 24) Patikolan paˈorip ni Yihofa ci Yis a patayra i kakarayan, pafelianho cingra to saˈakawangay a saaroˈan. (Filipi 2:8, 9) Ikor, mala Hongtiay no Kitakit no Kawas ci Yis, misatapang a mikowan. Wa palaˈosi koniya Kitakit to manan a demakan hani? Sapacaˈof i, wa itini i taˈarawan a satolon a makilim. Pakafanaˈan ni Yis ko nisawawaan a mitolon ci Yihofaan: ‘Nanay kataynito ko Kitakit no Miso, nanay malaˈosito ko araaw Iso i fafekang no sera, mahecadto i kakarayan.’—Matay 6:10.

15. Ci Yis anoikor o mananho ko dademaken ningra?

¹⁵ Cato ka halafin, i Armakiton taˈangayay a folaw, wa mifolaw ci Yis to ˈada no Kawas, palaˈafo to emin mariˈangay a tamdaw. (Paˈarawan 16:14, 16; 19:11-16) Dotoc, wa pakefengen ni Yis ci Satan itini i ‘awaay ko tolas a ofang’ a mipalit cingra. (Paˈarawan 20:1-3) Ikor no Comaˈol Miheca noka Pikowan i, papairato ci Yis to dipayal ato rihaday, padama cangranan malo malefotayto, patikolenho ningra paˈorip ko mapatayay. Itini pikowan ni Yis i, oniya cikiw mamala lakoingto. O araaw ni Yihofa salikor wa malaˈosito!—Paˈarawan 21:1-4.

16. Malahci ko Comaˈol Miheca noka Pikowan i, wa misamaanto ko kaˈorip hani?

¹⁶ Malahci ko Comaˈol Miheca noka Pikowan i, wa misamaanto ko kaˈorip hani? Itiyato i, o mirocokan na ci Ataman a raraw ato dangoc no tireng i, wa malahdawto maemin. Cowato ka pisaali ko tamdaw to sapatefoc, cowato pisaali ci Yisan malo taˈangayay saysi, ato 144,000 a tamdaw malo saysi, samanen mala ngaˈayayto ko tamdaw aci Yihofa, cowato ka pisaali to sapisododaw no Kawas cangranan. ‘Ano o [materekay ni Atam i tamdamdawan] a patay salikoray a ˈada’ mapalaˈafoayto, o mapatay a tamdaw patatikolayto a maˈorip. I fafekangayho no sera a tamdamdaw sahtoay o malefotayto!—1 Korinto 15:25, 26.

17-18. (1) O kahererekan no Comaˈol Miheca noka Pikowan i, o manan ko hamamifekad a demak hani? (2) O kahererekan no pikowan ni Yis i, o manan ko hademak hani? (1 Korinto 15:24, 28) (Nengnengen ko coka.)

¹⁷ Itiyato i, iraayho ko hinatalaan a mikiriwiˈay a demak: Oya milingatay to fangcalay ngangan ni Yihofa a lacongis wa masongilaˈto a masaysay. Hano mahaen ko sowal hani? Mahecad toya masowalay isawni, i Itin pasowalay ci Satan o makaniway ci Yihofa sanay, mikokot Cingranan to awaay ko olah a Mikowanay. Mikitiyaay misatapang, ˈalomanay ko madimadiay midoko ci Yihofaan a tamdaw, tano waywayan a midama to pikowan Ningra, misaliyaliyaw patalahkal to ngangan Ningra malo fangcalay. Mahererekto ko Comaˈol Miheca noka Pikowan i, ya mapakaditay a ngangan ni Yihofa salikor wa malaˈosito a makorac. Misawacayay koni, tada matomesay to olah ko ikakarayan a Wama ci Yihofa!

¹⁸ Mahapinangay ko wacay, o sakokot ni Satan sahtoay o patelasay, itiyato i, awaayto ko papakasoˈlin a tamdaw to mangah ningra. Mihaen, o kahererekan no pikowan ni Yis i, o manan ko hademak hani? Wa mahecad cingra ci Satanan a mitowakang ci Yihofaan han? Cowa! (ˈOsien ko 1 Korinto 15:24, 28.) Wa patikolen ni Yis ko Kitakit i kakarayan a Wama, midofdof to sapikowan no kakarayan a Wama. Cowa ka hecad cingra ci Satanan, samanen maolahay ci Yihofaan, mansa mamikifalocoˈ cingra a patikol to kihcod ci Yihofaan. Mapalaˈafoto ci Satan i, ya mapakaditay a ngangan ni Yihofa wa masongilaˈto a makorac, mapatalahkalto ko fangcalay ngangan Ningra!

19. Pakayni ci Yisan i, hakowaay ko kalimlaan to ngangan ni Yihofa hani?

¹⁹ O midemakan ni Yis a kihcod a misawacayay, tada o sangaˈayay mitaypiyaway ci Yihofaan cingra. Mansa hayi sanay ci Yihofa a pafeli to ngangan no Niyah i cingranan! Pakayni ci Yisan, hakowaay ko kalimlaan to ngangan ni Yihofa hani? Ikakaay to maamaan! Pakayni i ngangan ni Yihofa, i fafekangho no sera ci Yis i, hayi sanay kinafalah to ˈorip, i hererek no Comaˈol Miheca noka Pikowan i, makahiay patikol to kihcod i kakarayan a Wama. Samaanen ita mitodong ko ngaˈayay taˈarawan ni Yis hani? Dotoc a lalakaw mamilengo tonini a salicay.