LALENGOEN LALAKAW 23
RADIW 2 Ci Yihofa ko Ngangan Iso
Pakayni Tisowanan, Hakowaay ko Kalimlaan to Ngangan ni Yihofa?
‘Milasilay ci Yihofa: “O misawacayay Ako a tamdaw kamo.”’—ISAYA 43:10.
KALIMLAAN NO LALAKAW
Nengnengen ita o kahacecay a tamdaw sasamaan a misaˈicel, mikorac to mapakaditay a ngangan ni Yihofa, patalahkal to ngangan Ningra malo fangcalay.
1-2. Sasamaan kita a mihapinang to misakaretengay ci Yis to ngangan ni Yihofa hani?
PAKAYNI ci Yisan, o ngangan ni Yihofa ikakaay ko kalimla to maamaan. Midopo to fangcalay ngangan ni Yihofa, o masakalimlaan ci Yis. Mahecad to isaˈayaw a lalakaw, pakayni i ngangan ni Yihofa ato mitaypiyawan tonini a ngangan a kihcod, makalimay kinafalah ci Yis to ˈorip no niyah. (Marko 14:36; Hipray 10:7-9) Pakayni sapatalahkalaw to fangcalay ngangan no ikakarayan a Wama, kahererekan ni Yis to Comaˈol Miheca noka Pikowan i, wa makalim cingra patikol to kihcod a fadangalan i kakarayan a Wama. (1 Korinto 15:26-28) Pakayni i ngangan ni Yihofa a midemakan ni Yis a kihcod, tada misawacayayto maolahay cingra ci Yihofaan.
2 Ci Yis pakayniay i ngangan no kakarayan a Wama tayni i fafekang no sera. (Yohani 5:43; 12:13) I fafekangho no sera cingra i, padamaay to nisawawaan mafanaˈ to ngangan ni Yihofa. (Yohani 17:6, 26 ato roma pihongyak.) Pakayniay to ngangan ni Yihofa pakafanaˈ to tamdaw, halo pakayni toniya ngangan midemak to kasapaan a demak. (Yohani 10:25) O roma i, ci Yis na pakayniay i nisawawaan a mitolon ci Yihofaan sanay: ‘Pakayni i ngangan no Miso i, nanay dimokosen Iso cangra.’ (Yohani 17:11) Mahapinangay, ci Yis pakayni i ngangan ni Yihofa tangongolay ko kaolah. Mihaenay, o cecay tamdaw ano cowa ka fanaˈ to ngangan ni Yihofa, anca cowa tanonini a ngangan a pangangan Cingranan, samaanto o mikotoday ci Yisan ko niyah han ko sowal hani?
3. Oniya lalakaw mamilengo to manan?
3 Malo soˈlinay a Krisciyang, wa mikotod kita to pasaripaˈan ni Yis, misakareteng a maolah to fangcalay ngangan ni Yihofa. (1 Pitiro 2:21) Oniya lalakaw mamilengo, misamaanay oya milasilay to ‘ngaˈayay lihaf no Kitakit’ a tamdaw hano o finawlan han ni Yihofa cangra hani? (Matay 24:14) Oniya lalakaw wa milengoho, kita kahacecay a tamdaw sasamaan ko demak, paihkal to misakaretengay to fangcalay ngangan no Kawas.
‘O CECAY ˈOPO MALO I NGANGANAY NINGRA A FINAWLAN’
4. (1) ˈAyaw no patatikol ci Yis tayni i kakarayan o manan ko sowal to nisawawaan? (2) O sowal ni Yis mikidatay to manan a salicay?
4 ˈAyaw no patatikol ci Yis tayni i kakarayan sanay a pasowal to nisawawaan: ‘Matefad i tireng namo ko fangcalay saocor i, wa macada namo ko ˈicel, i Yirusalim, polong no Yutaya, Samariya, tangasa i mara:ayay a pala, malo misawacayay tamdaw no mako.’ (Dmak 1:8) Mahapinangay, o ngaˈayay lihaf wa malasil tayni i papotal no Israil a pala, salikor kalo kitakit a tamdaw wa ira ko hapakayraan malo nisawawaan ni Yis. (Matay 28:19, 20) Sanay ci Yis: ‘Wa . . . malo misawacayay tamdaw no mako kamo.’ Malo faelohay a nisawawaan a misawacayay ni Yis a tamdaw wa maedengto han? Mamafanaˈho cangra to ngangan ni Yihofa, a misawacay Cingranan han? Itini Dmak 15 fedengan a miˈoningan papadama kitanan makilim ko sapacaˈof.
5. Yirusalimay a tarokos ato malohemay malitengay samaanay a mitadtad, o emin a Krisciyang oha mamafanaˈ to ngangan ni Yihofa? (Nengnengen ko coka.)
5 I Kongyen 49 miheca, masaˈopoay ko Yirusalimay a tarokos ato malohemay malitengay, milengoay to cowaho ka picada to kerit a ˈAlafang tamdaw misamaan ko demak ngaˈ mala Krisciyang. Salikorto ko pilengo i, padek a safa ni Yis ci Yakop sanay: ‘Ci Simon isawniayho misongilaˈ a mitadtad to saˈayaway midimokos ko Kawas to ˈAlafang tamdaw, misamaan itini lalomaˈ nangra mipiliˈ to cecay ˈopo malo i nganganay Ningra a finawlan.’ Dotoc mihadakan ni Yakop ko sowal no pairasolay ci Amos, sanay: ‘Oya maˈosaway a tamdaw ato o emin a ngangasaw malo i nganganay no Mako a tamdaw, malacafay micangcang ci Yihofaan. O sowal ni Yihofa konini.’ (Dmak 15:14-18) Mahapinangay, o faelohay a nisawawaan cowa ko kafanaˈ aca ci Yihofaan, wa malo i nganganay ni Yihofa a tamdaw, sakora sowal i, wa pakayni i ngangan ni Yihofa cangra a mafanaˈ ko tamdaw, halo misawacay tonini a ngangan.
Isaka 1 hahekalan a mikayatay a kasacefang no malohemay malitengay a saˈopo, madimadiay a salikaka mahapinangay nangra ko Krisciyang o i nganganay ni Yihofa a tamdaw. (Nengnengen ko saka 5 fatac)
6-7. (1) Tayni ci Yis i fafekang no sera, o cecay lalangian o manan hani? (2) Tayni ci Yis i fafekang no sera, kalimlaan a lalangian o manan hani?
6 O tatodong no ngangan ni Yis i, o ‘milidongay ci Yihofa,’ soˈlinay pakayniay ci Yihofa ci Yisan a milidong to pakasoˈlinay ko falocoˈ a tamdaw. Tayni ci Yis i fafekang no sera pakayniay i tamdaw a kinafalah to ˈorip, malo sapatefoc. (Matay 20:28) Mihaen wa irato ko hapakayraan no tamdaw a malidong, midaˈoc ko ˈorip.—Yohani 3:16.
7 Mihaen, o manan ko mifekaday a demak isalakat a misaali ko tamdaw to sapilidongaw hani? Mahecad to malengoay isaˈayaw a lalakaw, itini Itin, o lalitengan no tamdaw ci Atam aci Ifa mitowakangay ci Yihofaan, ikor malahdawayto ko sakatahadaˈocaw no ˈorip. Mihaenay, ira ci Yis a milidong to tamdamdaw. (Satapangan 3:6, 24) Kawra onini aca ko sakatayniaw ni Yis i fafekang no sera a lalangian han? I Itin mifekaday a demak i, milingatayho to cecay masakalimlaan a demak: Mapakaditay ko ngangan ni Yihofa, misaaliay to sapatalahkalaw malo fangcalay. (Satapangan 3:4, 5) Oha sakalidongaw no teloteloc ni Atam aci Ifa, milingatay toniya demak. Itini sapatalahkalaw pala fangcal to ngangan ni Yihofa i, tada o matatodongay a tamdaw ci Yis, samanen pakayniay i ngangan ni Yihofa cingra a tayni, o sasowalen ato waywayan ningra sahtoay o mahecaday to harateng ni Yihofa.
O cecay tamdaw ano cowa ka fanaˈ to ngangan ni Yihofa, anca cowa tanonini a ngangan a pangangan Cingranan, samaanto o mikotoday ci Yisan ko niyah han ko sowal hani?
8. O emin mihakelongay ci Yisan a tamdaw o mamihayi to manan hani?
8 Ano o Yutayato anca o ˈAlafang a tamdaw, o emin mihakelongay ci Yisan a tamdaw mamihayi, o sakalidong naitiniay i Wama ni Yis ci Yihofa a Kawas. (Yohani 17:3) Mahecad ci Yisan, wa pakayni i ngangan ni Yihofa cangra mafanaˈ ko tamdamdaw. O roma i, o mamihayiho cangra, patalahkal to ngangan ni Yihofa malo fangcalay o masakalimlaan a demak. Oha sakalidongaw nangra pakayniay tonini a demak. (Dmak 2:21, 22) Mansa ya kinafalah ci Yis to ˈorip toya dadaya, i salikoray no satolon ningra saan pasowal cingra ci Yihofaan: ‘Maherekayto kako pakafanaˈ cangranan to ngangan Iso, ikor oha mamafanaˈho cangra, mihaen i, oya olah Iso takowanan a mahaenay a olah, ho ngangaˈay a materek ilalomaˈ nangra, mamalalitingho kako cangranan.’ (Yohani 17:26) Mihaenay, oya emin madimadiay mikotoday ci Yisan a tamdaw, cowa ko nika fanaˈ aca ci Yisan, mamafanaˈho ci Yihofaan.
‘O MISAWACAYAY TAMDAW AKO KAMO’
9. Sapikotodaw kita ci Yisan sasamaan ko demak hani?
9 Mahecad to masowalay isawni, o eminho misasoˈlinay mikotod ci Yisan a tamdaw, misaaliay misakareteng to patalahkal to fangcalay ngangan ni Yihofa a demak. (Matay 6:9, 10) Paisalakaten ita ko ngangan ni Yihofa mikikakaay to kihcod. Coko harateng aca koni, pairaanho ko waywayan a misakadademak. Mihaen, sasamaanen ita ko demak, patalahkal to ngangan ni Yihofa malo fangcalay, misawacay to sakokot ni Satan ci Yihofaan sahtoay o misamangahay hani?
10. Isaya 42-44 fedengan o manan ko mitadtadan hani? (Isaya 43:9; 44:7-9) (Nengnengen ko coka.)
10 Mikitini i Isaya 42-44 fedengan mahapinang ita, i patalahkal to fangcalay ngangan ni Yihofa a demak, iraay ko kalimlaan a ˈinorong no mita. Mitadtaday koniya pina a fedengan, hato itiniay i pisayfangan ci Yihofa a milicay to kawas no kalo a kitakit, oha ngangaˈay cangra a misawacay to soˈlinay a kawas ko niyah. Sanayho ci Yihofa a pasowal, ngaˈayay cangra mitahidang to misawacayay tamdaw no niyah. Kawra, awaay ko makilimay nangra to cimacima a tamdaw a misawacay!—ˈOsien ko Isaya 43:9; 44:7-9.
Itini ˈalomanay demak i, mahecaday kita itini pisayfangan a misawacay ci Yihofaan (Nengnengen ko saka 10 fatac)
11. Mikitini Isaya 43:10-12, o manan ko milasilan ni Yihofa to finawlan no Niyah?
11 ˈOsien ko Isaya 43:10-12. Pasowalay ci Yihofa to finawlan Ningra: ‘O misawacayay tamdaw Ako kamo, . . . O Kawas Kako.’ Mitahidangan ni Yihofa kita malo misawacayay tamdaw Ningra, oha papacaˈof kita to mihadakan Ningra a salicay: ‘Edengan Kako, iraayho ko roma Kawas han?’ (Isaya 44:8) Iraay ko kalikoan ita tano waywayan ato sasowalen a misawacay, edengan ci Yihofa ko soˈlinay a Kawas, o tadamaanay ko ngangan Ningra. Wa misaˈicel kita patalahkal to ngangan Ningra malo fangcalay. Ano samaanto ko saroero ni Satan kitanan, wa tano hakelong no ˈorip ita a misawacay to soˈlinay a maolah ci Yihofaan, tahadaˈoc a madimadi Cingranan.
12. O sapairasol no Isaya 40:3, 5 samaanay a malaˈosi hani?
12 Midopo kita to ngangan ni Yihofa, macada Ningra ko sapaˈdil, o mitodongay ci Yisan koni. Hano mahaen ko sowal hani? Pairasolayho ko Isaya a cudad to roma a demak, wa ira ko cecay a tamdaw ‘pakayni ci Yihofaan milosimet (o roma pihongyak “misaday.”) to lalan.’ (Isaya 40:3 ato roma pihongyak.) Oniya sapairasol samaanay a malaˈosi hani? O Mipaputisemay a Yohani o misadayay to lalan a tamdaw, padamaay cingra to tamdaw maherek a misaday mikotod ci Yisan. Samanen pakayniay i ngangan ni Yihofa ci Yis a tayni, pakayni i ngangan ni Yihofa a pasowal, mihaenay pakayniay ci Yihofaan ci Yohani a misaday to lalan. (Matay 3:3; Marko 1:2-4; Luka 3:3-6) Mahecaday a sapairasol padadotocay a pasowal: ‘O sapaˈdil ci Yihofaan wa mapatalahkal.’ (Isaya 40:5) Onini a sowal samaanay a malaˈosi hani? Tayni ci Yis i fafekang no sera, malefotay a patalahkal to ˈdil ni Yihofa, mahecaday to tayniay ci Yihofa i fafekang no sera.—Yohani 12:45.
13. Sasamaan kita mikotod to pasaripaˈan ni Yis hani?
13 Mahecad ci Yisan, o misawacayay a tamdaw ni Yihofa kita. Pakayniay kita to ngangan ni Yihofa ko sakafanaˈ no tao, halo milasil i tamdamdaw to kasapaan a demak Ningra. Sapisongilaˈaw a misawacay ci Yihofaan, wa mala o misawacayay tamdaw ni Yis kita, padama to tamdaw a cipinang, i patalahkal to fangcalay ngangan ni Yihofa tada masakalimlaan ko ˈinorong ningra. (Dmak 1:8) O tadamaanay a misawacayay tamdaw ci Yis, mamikotod kita to pasaripaˈan ningra a misawacay ci Yihofaan. (Paˈarawan 1:5) Mihaenay, ano kitato i, sasamaan a paihkal to misakaretengay ko niyah to ngangan ni Yihofa hani?
SASAMAAN PAIHKAL TO MISAKARETENGAY KO NIYAH TO NGANGAN NI YIHOFA
14. Mikitini ˈOlic 105:3, sasamaan kita paihkal to misakaretengay ko niyah to ngangan ni Yihofa?
14 Pakayni i ngangan ni Yihofa a malikoen. (ˈOsien ko ˈOlic 105:3 ato roma pihongyak.) Malikoan kita milengo to fangcalay ngangan ni Yihofa, ‘pakayni ci Yihofaan a malikoen,’ maedeng masemeray Cingra. (Yirimiya 9:23, 24; 1 Korinto 1:31; 2 Korinto 10:17) Ngaˈay milasil to fangcalay ngangan Ningra, midopo to ngangan Ningra, tada malikoay kita a mahemek. Cowa ka pakayni i ngangan Ningra kita a mangodoen, cowa ka mangodoen kita pasowal to cafay matayal, cafay micudad, fiyafiyaw ato cimacima a tamdaw to Misawacayay Tamdaw ni Yihofa kita. Nikawrira, mamiconged ci Satan Akoma kitanan a milengo to ngangan ni Yihofa. (Yirimiya 11:21; Paˈarawan 12:17) Ci Satan ato makaniway pairasolay ningra sakawalawalaw no mita to ngangan ni Yihofa. (Yirimiya 23:26, 27) Kawra maolahay to ngangan no ikakarayan a Wama, wa padadotoc kita pakayni i ngangan Ningra a ‘mahemek to romiˈamiˈad.’—ˈOlic 5:11; 89:16.
15. Micangacang to ngangan ni Yihofa o manan ko tatodong hani?
15 Padadotoc micangacang to ngangan ni Yihofa. (Yoil 2:32; Loma 10:13, 14) Micangacang to ngangan ni Yihofa cowa aca ko nika fanaˈ to ngangan Ningra, anca tano ngangan Ningra a pangangan. Wa cipinangho kita to masamaanay a Kawas ci Yihofa, pakasoˈlin Cingranan halo micangacang to sapadama Ningra ato sakayat. (ˈOlic 20:7; 99:6; 116:4; 145:18) Roma i, o mamilasilho kita to fangcalay ngangan ato capeling Ningra, mitahidang to tamdaw a pasasiyor, padama cangranan mafalic itini i nokaˈorip. Mihaen, mamacada nangra ko pihayda ni Yihofa, milifok to hasakalidongaw.—Isaya 12:4; Dmak 2:21, 38.
16. Sasamaan kita a misawacay to misamangahay ko sowal ni Satan hani?
16 Makalim pakayni i ngangan ni Yihofa a taharoray. (Yakop 5:10, 11) Ano tahapades kita i, padadotoc madimadi ci Yihofaan, o misawacayayto o misamangahay ci Satan. I lintad ni Yopu, mihadakay ci Satan to sakokot a pasowal: ‘O niyah aca ko miharatengan no tamdaw, mamihayi kinafalah to kihcod a midipot to ˈorip no niyah.’ (Yopu 2:4) Tatodong no sowal ni Satan, wa i karihadayan ko tamdaw ngaˈ midokoay to Kawas, ano tahalifa to pasangar i, wa miliyas to Kawas. Madimadiay ci Yopu, misawacay to pikokot ni Satan sahtoay o misamangahay. Malecad ci Yopuan, ira ko kalikoan ita a misawacay, ano o mananto ko pakayraan ni Satan a miˈodis kitanan, cowa ko mamisawad kita a midoko ci Yihofaan. Papakasoˈlin kita, wa pakayni ci Yihofa i ngangan no Niyah padadotoc midimokos kitanan.—Yohani 17:11.
17. Mikitini 1 Pitiro 2:12, sasamaan kita a paˈdil to ngangan ni Yihofa?
17 Misaˈicel pakayni i ngangan ni Yihofa a paˈdil. (Taneng 30:9; Yirimiya 7:8-11) Mitaypiyaway kita ci Yihofaan, pakayni i ngangan Ningra a mafanaˈ ko tamdamdaw, mansa o sasowalen waywayan ita milingatay to ngangan ni Yihofa, mihaen wa paˈdil to ngangan Ningra, anoca wa mapakangodo to ngangan Ningra. (ˈOsien ko 1 Pitiro 2:12.) Makalimay kita paˈdil to ngangan ni Yihofa, mansa wa misinanot to sasowalen ato midemakan no niyah. Soˈlin cowa ko malefotay kita, kawra ano misaˈicel kita a midemak i, ngaˈayto a paˈdil to ngangan ni Yihofa.
18. Misamaanho kita a paihkal to misakaretengay ko niyah to ngangan ni Yihofa? (Nengnengen ko ilaenoay safanaˈ.)
18 Paikakaen ko fangcalay ngangan ni Yihofa a minengneng to niyah. (ˈOlic 138:2) Hano pairaen ita ko mahaenay a waywayan hani? Maolahay to ngangan ni Yihofa, midofdof to kimad Ningra a midemak, i tatihiay a tamdaw alatek cowa ka olah kitanan, hanaca mipalak to ngangan no mita.a Ci Yis sapatalahkalaw to fangcalay ngangan ni Yihofa i, hayi sanay malo o mararaway tamdaw, mapatay i pisemseman a hecek. ‘Misakahmaway minengneng to ngodo’ cingra, cowa ka pisikol to samaanay ko pinengneng no tao cingranan. (Hipray 12:2-4) O misakaretengan ni Yis a minengneng o sapidofdofaw to araaw no Kawas.—Matay 26:39.
19. O misakaretengan iso a minengneng o fangcalay ngangan ni Yihofa han? Misamaanay?
19 Pakayniay i ngangan ni Yihofa kita a malikoen, pakayniayho ko Misawacayay Tamdaw ni Yihofa kita a mahemeken. Mansa, makahiay kita mihadidi to sapakangodo no tao. Misakaretengan ita a minengneng i, o ngangan ni Yihofa, cowa ko niyah a ngangan. Ano o mananto ko pakayraan ni Satan a miconged kitanan, mamisetek kita to falocoˈ padadotoc pakahemek to fangcalay ngangan ni Yihofa. Mihaen, o misawacayay kita to o mitodongay ci Yisan ko niyah, misakareteng a minengneng ko fangcalay ngangan ni Yihofa a paikaka to kihcod.
RADIW 10 Pahemeken ko Kawas Ita ci Yihofa!
a Ano o madimadiayto a Yopuan mapakaditay a mapakokot no tamdaw i, na pakayniay i misakaretengay to ngangan no niyah a cowato ka pidipot to fangcalay ngangan no Kawas. Isalakat, mapatay ko wawa ningra, malahdaw ko kihcod a hafay i, ‘cowa ka raraw, cowa ka piroroh to Kawas.’ (Yopu 1:22; 2:10) Kawra ikorto i, mapakokot no tolo a widang cingra to midemakay to tatiihay a demak, ‘o mafolaay macalohay ko sowal’ ningra. Sapisawacayaw cingra to cowa ka raraw ko niyah, sapidipotaw to ngangan no niyah ikakaay to patalahkal to fangcalay ngangan no Kawas.—Yopu 6:3; 13:4, 5; 32:2; 34:5.